ပေါ်တာဆွဲ

မန္တလေး၊ ဇူလိုင်၂၃၊ ၂၀၂၆။

မန္တလေးမြို့မှာ တပတ်အတွင်း လူငယ် ၈ ဦး ပေါ်တာဆွဲခံရပြီး၊ တခြားမြို့တွေကနေ မန္တလေးမြို့ကို လာသူတွေကိုလည်း ကားဂိတ်၊ ရထားဂိတ်တွေကနေ စောင့်ပြီးပေါ်တာဆွဲနေတယ်လို့ မြို့ခံတွေက ပြောပါတယ်။

ဇူလိုင်လ ၁၅ ရက်နေ့မှာ မန္တလေးမြို့၊ ကြံခင်းရပ်ကွက်မှာ အသက် ၂၀ ဝန်းကျင်လူငယ်တဦးကို စစ်တပ်ခန့် ရာအိမ်မှူးတွေက နေအိမ်ထဲအထိ ဝင်ရောက်ပေါ်တာဆွဲခဲ့တာလို့ သိရပါတယ်။

အဲဒီညမှာပဲ ၇၂ လမ်း၊ ၃၄×၃၅ လမ်းကြားက ၁၈ နှစ်အရွယ် လူငယ်တဦးကို စစ်ကောင်စီတပ်က အိမ်စီးကားနဲ့ ပေါ်တာဆွဲခဲ့တယ်လို့ သိရပါတယ်။

ဇူလိုင်လ ၁၉ ရက်နေ့မှာ အောင်မြေသာစံမြို့နယ်က ဝဏ္ဏမျိုးဆိုတဲ့ လူငယ်တဦး နံနက် ၆ နာရီမှာ ဝက်သားသွားပို့စဉ် ပျောက်ဆုံးခဲ့တယ်လို့ သိရပါတယ်။

အလားတူ ဇူလိုင်လ၂၀ ရက်နေ့မှာ အောင်မြေသာစံမြို့နယ်၊ ၈၉ လမ်း၊ ၁၄ လမ်းက အသက် ၂၂ နှစ်အရွယ် အောင်ခိုင်ဆိုတဲ့ လူငယ်တဦး၊ မဟာအောင်မြေမြို့နယ်၊ မန်းမြို့ဈေး အနောက်ပေါက်က အသက်၂၀ အရွယ်လူငယ်တဦးနဲ့ ည ၁၁ နာရီမှာ မဟာအောင်မြေမြို့နယ်က ပုံနှိပ်တိုက်အတွင်း ဝင်ရောက်ကာ အသက်၂၀ ဝန်းကျင်လူငယ်တဦးတို့ကို တရက်ထဲမှာတင် လူငယ် ၃ ဦးကို ပေါ်တာဆွဲခဲ့တယ်လို့ သိရပါတယ်။

ဒါ့အပြင် ဇူလိုင်လ ၂၁ ရက် နေ့မှာ ၈၈×၈၉ လမ်း၊ ၂၁ လမ်းမှာလည်း ရန်ကုန်မြို့ကနေ သပိတ်ကျင်းမြို့နယ်ကို ပြန်ရန်လာတဲ့ လူငယ်၂ ဦးကို စစ်တပ်က ပေါ်တာဆွဲသွားတယ်လို့ သိရပါတယ်။

မန္တလေးမြို့က အဝေးပြေးကားဂိတ်နဲ့ ဘူတာကြီး ရထားဂိတ်တွေမှာပါ အိုးဝေ မောင်းသူတချို့က မြို့ခံပျူစောထီးတွေနဲ့ပေါင်းကာ ခရီးသည်တွေကို ပေါ်တာဆွဲရောင်းစားတာတွေ ပြုလုပ်နေတယ်လို့ သိရပါတယ်။

“ဂိတ်တွေမှာက အဆိုးဆုံးက အိုးဝေသုံးဘီးသမားတွေပဲ။ တချို့ပျူတွေက အိုးဝေဆွဲရင်း အဲ့လိုဆွဲတာတွေ ရှိတယ်။ ညနေဘက်ဆို မြို့ထဲအိမ်စီးကားနဲ့ လူလေးယောက်လောက် ပတ်ပြီး ဆွဲတင်သွားတာတွေလည်း ရှိတယ်။ လူတွေမြင်လည်း ဘာမှမပြောရဲဘူးလေ”လို့ မြို့ခံတဦးက ပြောပါတယ်။

ယခုရက်ပိုင်းအတွင်း မန္တလေးမြို့မှာ ပေါ်တာဆွဲမှုတွေက ယခင်ကထက်ပိုများလာပြီး၊ ယခုအချက်အလက်ဟာ မြေပြင်ကင်းထောက်အဖွဲ့ တွေဆီရတဲ့ အချက်အလက်သာဖြစ်ပြီး ဒီထက်ပိုများနိုင်တယ်လို့ မြို့ခံတွေက ပြောပါတယ်။

မန္တလေးမြို့မှာ ပြီးခဲ့တဲ့ဇွန်လက အုပ်ချုပ်ရေးမှူးအသစ်တွေရွေးပြီးတဲ့နောက် စစ်မှုထမ်းခေါ်ဆိုမှု ပိုများလာပြီး အိမ်ထောင်စုစာရင်းထဲနာမည်ရှိပြီး လူမလာပါက မိဘ၊ ဆွေမျိုးတွေကို ဖမ်းဆီးမယ်လို့ အုပ်ချုပ်ရေးမှူးတွေ ခြိမ်းခြောက်တာတွေလည်းရှိတယ်လို့ မြို့ခံတွေက ပြောပါတယ်။

သတင်း – နိုင်းဝမ်း

ရေတာရှည်၊ ဇူလိုင် ၁၈၊ ၂၀၂၆။

ပဲခူးတိုင်း၊ ရေတာရှည်မြို့နယ်၊ ကြံသနွယ်ကျေးရွာအုပ်စုရှိ ကျေးရွာတွေမှာ အုပ်ချုပ်ရေးမှူးနဲ့အဖွဲ့က စစ်မှုထမ်းကြေးလစဥ်ကောက်တဲ့အပြင် ညဘက်ပေါ်တာဆွဲဖမ်းဆီးမှုတွေလည်း ပြုလုပ်နေတယ်လို့ ရွာခံတွေဆီက သိရပါတယ်။

စစ်မှုထမ်းကြေးတအိမ် ကျပ် ၃၀,၀၀၀ နှုန်း၊ ဝန်ထမ်းမိသားစုတအိမ် ကျပ် ၁၅,၀၀၀ ကောက်ခံနေတဲ့အပြင် ပြီးခဲ့တဲ့ဇွန်လအတွင်းကစတင်ပြီး ကျေးရွာတွေမှာ ညဘက်လမ်းထွက်တဲ့လူငယ်တွေကို ကြံသနွယ်‌ကျေးရွာအုပ်စု အုပ်ချုပ်ရေးမှူး ဦးသိန်းရွှေ၊ ပျူစောထီးခေါင်းဆောင် ဇော်ဇော်အောင်(ခ)ပေါင်ချိန်တို့က ဖမ်းဆီးငွေတောင်းကာ ငွေမပေးနိုင်သူကို စစ်မှုထမ်းပို့ဖို့ကြိုးစားနေတယ်လို့ ဆိုပါတယ်။

“ပိုက်ဆံကောက်ကတည်းက စစ်မှူထမ်းပေးရရင် အပြင်ကဝယ်ထည့်ပေးမယ်ဆိုပြီးပြောခဲ့တယ်။ အခုကျတော့ သူတို့ကိုယ်တိုင်လိုက်ဖမ်းပြီးထည့်နေတာ။ သူတို့ဖမ်းမိတဲ့သူတွေထဲ ကျောင်းသားပါရင်လည်း ကျောင်းသားလို့မပြောဖို့ ပြောလို့ပြန်လွတ်လာရင်ရိုက်နှက်မယ်ဆိုပြီးခြိမ်းခြောက်တယ်။ ပြန်လွတ်လာသူရှိရင်လည်း ငွေပေးရမယ်ဆိုပြီး ခြိမ်းခြောက်တောင်းတယ်”လို့ ရွာခံတဦးက ပြောပါတယ်။

အုပ်ချုပ်ရေးမှူးနဲ့အဖွဲ့က စစ်မှုထမ်းပေါ်တာဆွဲကာ ငွေကြေးတောင်းခံနေတာကြောင့် ရွာခံလူငယ်တွေမှာည ၇ နာရီနောက်ပိုင်းကစကာ အပြင်မထွက်ရဲကြတော့ဘူးလို့ ဆိုပါတယ်။

ပြီးခဲ့တဲ့ဇွန် ၂၇ ရက်ကလည်း လယ်တောကနေပြန်လာတဲ့ ကြံသနွယ်ရွာသား ရဲဝင်းကျော်ကို အုပ်ချုပ်ရေးမှူးနဲ့အဖွဲ့ကဖမ်းဆီးပြီး မြို့နယ်ထွေအုပ်ရုံးမှာ ဖမ်းဆီးထားချိန် မိသားစုဝင်တွေနဲ့ရွာသားတွေက သွားရောက်တောင်းပန်ပြီး ငွေကျပ်သိန်း ၂၀ နဲ့ရွေးယူခဲ့ရတယ်လို့ ဆိုပါတယ်။

ကြံသနွယ်ကျေးရွာအုပ်စုမှာ ကြံသနွယ်၊ ခြံကျောင်း၊ မြောက်နန်ချွန်၊ တောင်နန်ချွန်၊ အရှေ့နန်ချွန်၊ ဆိုင်တမော့ကြီး၊ ဆိုင်တမော့လေး၊ ဆက်တစ်၊ ခေါင်းဖက်ရွာတို့ပါဝင်ပြီး ရွာတရွာမှာ အနည်းဆုံးအိမ်ခြေ ၂၀၀ မှ ၃၀၀ ကြားရှိကာ ရွာခံအများစုက လယ်၊ ယာ၊ ကိုင်းကျွန်းနဲ့သာမန်လက်လုပ်လက်စားများတယ်လို့ သိရပါတယ်။

အဆိုပါကျေးရွာတွေက စစ်မှုထမ်းကြေးကို ပြည်သူ့စစ်မှုထမ်းစတင်ခေါ်ဆောင်တဲ့ ၂၀၂၄ ခုနှစ် ဧပြီ ကတည်းက စစ်မှုထမ်းအသက်အရွယ်မရှိတဲ့နေအိမ်တွေပါမကျန် လစဥ်ပေးနေရတယ်လို့ သိရပါတယ်။

အောင်လံ၊ ဇူလိုင် ၆၊ ၂၀၂၆။

မကွေးတိုင်း၊ အောင်လံမြို့နယ်၊ ပြလို့တိုက်နယ်၊ ကွမ်းလောင်းကျေးရွာအဝင်အနားမှာ အုပ်ချူပ်ရေးမှူးတဦး ဓားခုတ်ခံရပြီးသေဆုံးခဲ့ကြောင်း အောင်လံမြို့နယ်ပကဖ တာဝန်ရှိသူထံက သိရပါတယ်။

ဓားနဲ့ခုတ်ခံရသူဟာ ကွမ်းလောင်းကျေးရွာ အုပ်ချုပ်ရေးမှူး အသက် ၇၀ အရွယ် ဦးအေးဟန်ဆိုသူဖြစ်ပြီး ဇူလိုင်လ ၅ ရက်နေ့ နေ့လည်ပိုင်းက ကျေးရွာထဲကနေ ဆိုင်ကယ်နဲ့ထွက်လာရာ ရွာအဝင်အရောက်မှာ ဓားနဲ့ခုတ်ခံရတာလို့ဆိုပါတယ်။

“ခုတ်တဲ့သူနဲ့က ရန်ငြိုးရန်စရှိတယ်လို့ သိရတယ်။ အုပ်ကြီးက *(စစ်သား)နဲ့‌အတူသွားအတူလာ၊ ပေါ်တာဆွဲတာမှာ ပါခဲ့တာတွေလည်း ရှိတယ်။ ပေါ်တာဆွဲတာကို မကျေနပ်လို့ ခုတ်တာလို့လောလောဆယ် သိရသေးတယ်”လို့ အောင်လံမြို့နယ်ပကဖ တာဝန်ရှိသူက ပြောပါတယ်။

သူကိုဓားနဲ့ခုတ်သူဟာ ကျောက်ဆွယ်ကျိုးရွာခံ အသက် ၃၀ ကျော်အရွယ်အမျိူးသား ၁ ဦးဖြစ်ပြီး ဓားနဲ့ခုတ်ခံရလို့ ဦးအေးဟန်မှာ ဦးခေါင်းနဲ့လက်တွေမှာ ဒဏ်ရာတွေရပြီးနေရာမှာသေဆုံးခဲ့တယ်လို့ ဆိုပါတယ်။

ဓားခုတ်မှုကျူးလွန်ခဲ့တဲ့ အမျိုးသားကို စစ်ကောင်စီအဖွဲ့တွေက လိုက်လံရှာဖွေနေပေမယ့် ထွက်ပြေးလွတ်မြောက်နေတယ်လို့ ဆိုပါတယ်။

သေဆုံးသူအုပ်ချုပ်ရေးမှူးရဲ့ နာရေးကိုတော့ ဇူလိုင်လ ၆ ရက်နေ့ညနေပိုင်းမှာ ကျေးရွာသုသာန်မှာပင် သဂြိုလ်သွားမယ်လို့ သိရပါတယ်။

ပြီးခဲ့တဲ့ ဇန်နဝါရီလ ၃၀ ရက်နေ့ကလည်း
အောင်လံမြို့နယ်၊ မိုးကောင်းကျေးရွာမှာ အုပ်ချုပ်ရေးမှူး ၁ ဦးပစ်သတ်ခံရလို့ သေဆုံးသွားတယ်လို့ သိရပါတယ်။

ဓာတ်ပုံ – ကွမ်းလောင်းကျေးရွာဆိုင်းဘုတ်

မင်းလှ၊ ဇွန် ၂၊ ၂၀၂၆။

ပဲခူးတိုင်းအနောက်ခြမ်း၊ မင်းလှမြို့နယ်မှာ အသွင်ပြောင်းအစိုးရနဲ့စစ်တပ်က ဈေးအရောင်းပွဲတော်‌တွေကျင်းပနေပြီး ပွဲကအပြန်လူငယ်တွေကို ပေါ်တာဆွဲဖမ်းဆီးနေတယ်လို့ ဒေသခံတွေဆီကသိရပါတယ်။

စစ်ကွင်းမြို့မှာ မေလ ၂၇ ရက်ကစတင်ကာ ဒီကနေ့အထိ စျေးအရောင်းဆိုင်ခန်းတွေအများအပြားနဲ့ အပျော်စီးစရာနေရာတွေပါဝင်တဲ့ စျေးပွဲတော်ကျင်းပနေပြီး၊ ပြီးခဲ့တဲ့ ဧပြီလအတွင်းက မင်းလှမြို့၊ အထက်တန်းကျောင်းဘောလုံးကွင်းအတွင်းပြုလုပ်ခဲ့တဲ့ စျေးပွဲတော်မှာ လူငယ် ၂၀ ဦးထက်မနည်း ဖမ်းဆီးခံခဲ့ရတယ်လို့ မြို့ခံတဦးက မြေလတ်အသံကို ပြောပါတယ်။

” ပွဲမပါဘူး။ ဈေးဆိုင်တွေနဲ့ ကလေးဆော့လို့ရတဲ့နေရာတွေလေ။ ည‌ဘက်ပြန်တဲ့အချိန် ပေါ်တာဆွဲတာတွေရှိတယ်။ သတင်းတွေလည်း မတက်တော့ လုပ်ချင်တိုင်းလုပ်ရနေတဲ့သဘော။ ပွဲကအပြန် အဖမ်းခံရတာရှိတယ်။ ပေါ်တာပေါ့။ တိုင်လည်းမရ ပိုက်ဆံရှိတဲ့လူကတော့ သိသိချင်းပြန်ရွေးထုတ်ရတယ်။ ကြာသွားရင်‌‌ ငွေရှိလည်းရွေးမရ။ ရွာဘက်တွေက အဖမ်းခံရတာများတယ်၊ စစ်ကွင်းပွဲကတော့ ခုထိဘာအသံမှမကြားဘူး”လို့ စစ်ကွင်းဒေသခံတဦးက မြေလတ်အသံကိုပြောပါတယ်။

စစ်ကွင်းဈေးပွဲတော်ကာလအတွင်း လူငယ်တွေပေါ်တာဆွဲဖမ်းဆီးခံရမှုအခြေအနေတွေကို မသိရသေးပေမယ့် မင်းလှဈေးပွဲတော်ရက်တွေမှာ လူဆယ်နဲ့ချီ ဖမ်းဆီးခံရတာကြောင့် သတိထားသွားလာနေ ထိုင်ကြဖို့ မင်းလှဒေသခံတဦးက အခုလိုပြောပါတယ်။

“တချို့လည်းပါသွားတယ်။ ပိုက်ဆံရှိမှပဲ။ မရှိရင်တော့ ပါတယ်။ ချက်ချင်း‌ ရွေးရတာ။ ညဘက်ပွဲကအပြန်လမ်းဆုံ(သရက်တပင်ရွာတာဆုံ)မှာရယ်၊ ထောက်ကြံ့ကွင်းနားရယ်၊ ကြို့ကုန်းထိပ်ရယ် နောက်ပိတ်ဆုံးပြန်တဲ့ကလေးတွေ အဆွဲခံရတာ” လို့ ဆိုပါတယ်။

အသွင်ပြောင်းအစိုးရနဲ့ စစ်တပ်က ပြည်သူ့စစ်မှုထမ်းသင်တန်းတွေကို လစဥ်ဖွင့်လှစ်နေပြီး အဲ့ဒီသင်တန်းတွေမှာ သင်တန်းသားလူဦးရေပြည့်မီဖို့အတွက် စစ်တပ်ထိန်းချုပ်မြို့နယ်တွေက လူငယ်တွေကို ပစ်မှတ်ထား ပေါ်တာဆွဲဖမ်းဆီးနေတာလည်း ဖြစ်ပါတယ်။

ပွင့်ဖြူ၊ ဖေဖော်ဝါရီ ၁၄၊ ၂၀၂၆။

မကွေးတိုင်း၊ မကွေးမြို့အထွက်ရှိ ကံပြားစစ်ကော်မရှင်ဂိတ်မှာ ခရီးသည်တင်ကားပေါ်က လူငယ်အမျိုးသား ၁၁ ဦးကို ပေါ်တာဆွဲဖမ်းဆီးပြီး ငွေကျပ်သိန်း ၁၅၀ နဲ့ ပြန်ရွေးခိုင်းနေတယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁၃ ရက်နေ့လယ် ၂ နာရီခန့်မှာ ပွင့်ဖြူမြို့နယ်၊ ကျောင်းတော်ရာ ကားဂိတ်ကနေ ရန်ကုန်ကိုထွက်လာတဲ့ ‘နန်းထိုက်တော်ဝင်’ကားပေါ်မှာ လိုက်ပါလာသူတွေထဲက အသက် ၁၈ ကနေ ၂၂ အရွယ် အမျိုးသား ၁၁ ဦးကို ဖမ်းဆီးခဲ့တာလို့ ဆိုပါတယ်။

“ကလေးကို ရန်ကုန်ခေါ်လိုက်တယ်ဆိုတာက အသက်က ၁၈ နှစ်ပဲရှိသေးတယ်၊ ရွာတွေမှာ ဆွဲနေတယ်ဆိုတော့ ကလေးကို ရန်ကုန်မှာ အလုပ်လုပ်ဖို့ခေါ်လိုက်တာ၊ အခုဟာက တခြားမြို့နယ်မှာ အဆွဲခံရတာမဟုတ်ဘူး၊ မကွေးတိုင်း ကိုယ့်မြို့နယ်ထဲမှာ အဆွဲခံရတာ‌” လို့ ကျောင်းတော်ရာဒေသခံတဦးက ပြောပါတယ်။

ဖမ်းဆီးခံရသူတွေဟာ ကျောင်းတော်ရာက အမျိုးသား ၆ ဦး၊ မုန်းအရှေ့ဘက်ကမ်း သမင်ခြံရွာက အမျိုးသား ၁ ဦး၊ ဘူးသယ်ရွာက အမျိုးသား ၂ ဦး၊ ရွှေလီထနှောင်းကုန်းရွာက အမျိုးသား ၂ ဦးဖြစ်ပြီး လက်ရှိမှာတော့ မကွေးမြို့ပေါ်က အထွေထွေအုပ်ချုပ်ရေးမှူးရုံးမှာ ဖမ်းဆီးထားတယ်လို့ ဆိုပါတယ်။

“မနေ့က တချို့ဆို ဆက်မသွားရဲတော့ဘူး၊ အမျိုးသမီးတွေဆို ပြန်လာကြတာ၊ ဒီမနက် ရွာကလူတွေကတော့ လိုက်ကြတယ်၊ ဘူးသယ်ရွာက လူတွေကတော့ နေ့လယ်ကျမှ လိုက်ဖို့ ပြင်ဆင်နေကြတယ်၊ ကျောင်းတော်ရာကလည်း လိုက်ကြတယ်၊ သိန်း ၁၅၀ နဲ့ ရွေးဖို့ မကွေးထွေအုပ်ရုံးကိုလာခဲ့လို့ ပြောပါတယ်၊ လူ ၁ ဦးကို သိန်း ၁၅၀ ဆိုတော့ ကျမတို့မိဘတွေက ဘယ်အဆင်ပြေနိုင်မလဲ”လို့ သူက ဆက်ပြောပါတယ်။

အခုလိုလမ်းခရီးမှာ ပေါ်တာဆွဲဖမ်းဆီးမှုတွေရှိနေတာကြောင့် ဒေသခံခရီးသွားတွေအနေနဲ့ စိုးရိမ်နေကြရကာ အဆိုပါစစ်ကော်မရှင်ဂိတ်ဟာလည်း အဲ့ဒီဒေသမှာ မကြာခဏဖမ်းဆီးတာတွေရှိနေတယ်လို့ သိရပါတယ်။

ပြီးခဲ့တဲ့ ဖေဖော်ဝါရီ ၁၀ ရက်ကလည်း ပွင့်ဖြူမြို့နယ်၊ ကျောင်းတော်ရာက အလုပ်သွားလုပ်တဲ့ လူငယ် ၄ ဦးကို ပွင့်ဖြူမြို့နယ်၊ ရွာခိုင်ရွာမှာ စစ်ကော်မရှင်တပ်ဖွဲ့ဝင်တွေက ဖမ်းဆီးခဲ့ပါသေးတယ်။

စာတည်း – လင်း

မြေလတ်အသံ၊ ဒီဇင်ဘာ ၅၊ ၂၀၂၅။

မန္တလေးတိုင်း၊ မိတ္ထီလာခရိုင်၊ ဝမ်းတွင်းမြို့မှာ ဒေသခံတွေကို စစ်ကော်မရှင်တပ်က လိုက်လံဖမ်းဆီးရာ ဒီဇင်ဘာ ၄ ရက် ၁ ရက်တည်းမှာ အမျိုးသား ၁၅ ဦးဖမ်းဆီးခံလိုက်ရတယ်လို့ ဒေသခံတွေကပြောပါတယ်။

ဒီဇင်ဘာ ၄ ရက်မနက်ပိုင်းကစပြီး အင်အား ၃၀ ကျော်ပါတဲ့ စစ်ကော်မရှင်တပ်နဲ့ရဲတပ်သားတွေက သဖန်ရွာ၊ ရှားတောရွာ၊ ရွှေဖလားကန်ရွာ၊ တဲစုရွာ၊ သုံးဒေါင့်အိုင်ရွာ၊ ဖိုကုန်းရွာ၊ ရုံးပင်ကုန်းရွာတို့ကို ညနေ ၅ နာရီကျော်အထိ တရွာဝင်တရွာထွက် ဖမ်းဆီးခဲ့တာလို့ဆိုပါတယ်။

“စစ်ကား ၃ နဲ့ဝင်ဆွဲတာ။ တရွာဝင် တရွာထွက်ပေါ့။ ၁၅ ရွာလောက်ကို ဝင်ဆွဲတာ။ အဲ့မှာ ကျောင်းသွားကြိုသူတွေနဲ့ လမ်းပေါ်သွားလာနေသူတွေ အဖမ်းခံရတာပါ။ သိရသလောက်တော့ အဲ့ဘက်ကရွာတွေအကုန်မွှေသွားတာ”လို့ ဒေသခံအမျိုးသားတဦးက ပြောပါတယ်။

ဖမ်းဆီးခံရသူ ၁၅ ဦးမှာ အသက် ၂၀ နဲ့ ၄၀ အရွယ်ရှိကြတဲ့ သဖန်ရွာမှ ၇ ဦး၊ ရှားတောမှ ၃ ဦး၊ ရွှေဖလားကန်မှ ၁ ဦး၊ တဲစုရွာမှ ၄ ဦးတို့ဖြစ်ကြပြီး ၎င်းတို့ကို ပင်းတလဲရဲစခန်းမှ ရဲတပ်သားတွေနဲ့ စစ်ကော်မရှင်တပ်သားတွေက ပူးပေါင်းဖမ်းဆီးခဲ့တာလို့ သူကဆိုပါတယ်။

“သုံးဒေါင့်အိုင်၊ ဖိုကုန်း၊ ရုံးပင်ကုန်းရွာတွေမှာလည်း ပါသွားတဲ့သူတွေ အတော်များတယ်။ လူဦးရေအတိကျမသိရဘူး။ အိမ်မှာအိပ်နေတဲ့လူပါ ခေါ်သွားတာတဲ့”လို့ သူကဆိုပါတယ်။

အဆိုပါဖမ်းဆီးခံရသူ ၁၅ ဦးကို ဝမ်းတွင်းမြို့၊ မြို့နယ်ထွေ/အုပ်ရုံးမှာထိန်းသိမ်းခဲ့ပြီးနောက် အဲဒီကနေတဆင့် ဒီဇင်ဘာ ၅ ရက်ဒီကနေ့မနက်ပိုင်းမှာ မိတ္ထီလာမြို့ပေါ်ကို ပြောင်းရွှေ့ခေါ်ဆောင်သွားခဲ့တယ်လို့ သိရှိထားရကြောင်း အထက်ပါအမျိုးသားကဆက်ပြောပါတယ်။

ပြီးခဲ့တဲ့နိုဝင်ဘာ ၆ ရက်နဲ့ ၅ ရက်ကလည်း ဝမ်းတွင်းမြို့နယ်၊ ကျောင်းကုန်းရွာမှ ၁ ဦး၊ ရွာသစ်ရွာမှ ၂ ဦး၊ သစ်ပလွေကန်မှ ၂ ဦး စုစုပေါင်း ၅ ဦးတို့ကိုဖမ်းဆီးခဲ့ပြီး အဲ့ဒီထဲက ၁ ဦးသာ ပြန်လွတ်လာခဲ့တယ်လို့ ဒေသခံတွေက ပြောဆိုကြပါတယ်။

စာတည်း – လင်း

ပွင့်ဖြူ၊ နိုဝင်ဘာ ၁၄၊ ၂၀၂၅။

မကွေးတိုင်း၊ မင်းဘူးခရိုင်၊ ပွင့်ဖြူနဲ့စကုမြို့နယ်တွေမှာ စစ်ကော်မရှင်တပ်ဖွဲ့ဝင်တွေက ပေါ်တာဆွဲဖမ်းဆီးတာတွေ ဆက်တိုက်လုပ်ဆောင်နေပြီး လူငယ် ၂၀ ကျော်ဖမ်းဆီးခံထားရတယ်လို့ ဒေသခံတွေဆီက သိရပါတယ်။

စကုမြို့နယ် လယ်ကိုင်းကျေးရွာလမ်းဆုံနဲ့ လယ်ကိုင်း-ကျောင်းတော်ရာအကြားလမ်းပိုင်းမှာ စစ်ကော်မရှင်ပူးပေါင်းတပ်တွေက ခရီးသွားကားတွေနဲ့ အနီးဝန်းကျင်ကျေးရွာတွေက လူငယ်တွေကို နိုဝင်ဘာလဒုတိယပတ်အတွင်း နေ့စဥ်ပေါ်တာဆွဲဖမ်းဆီးနေတာလို့ ဆိုပါတယ်။

” မနေ့ကလယ်ကိုင်းကနေ ကျောင်းတော်ရာသွားတဲ့နေရာမှာ (ခရီးသွားကားကို) ဆွဲတယ်။ ပါသွားတာက လူငယ် ၂ ဦးပါသွားတယ်။ ကားအမည်တော့ မသိလိုက်ဘူး ရိုးရိုးအရပ်ကားပါ။ အသက်အရွယ် ၁၈ နှစ်နဲ့ ၂၁ နှစ် အရွယ်တွေပါ၊ မနေ့ကမနက် ၁၀ နာရီလောက်မှာဆွဲတာ၊ နေ့တိုင်းလိုလိုဆွဲနေတာ” လို့ ပွင့်ဖြူမြို့ခံတဦးက မြေလတ်အသံကို ပြောပါတယ်။

အလားတူ ပွင့်ဖြူနဲ့ စလင်းမြို့အကြားက ရှောက်တောရွာအနီး မင်းဘူး – ပွင့်ဖြူ – စလင်းလမ်းပိုင်းမှာရှိတဲ့ မုန်းချောင်းတံတားထိပ်က စစ်ကော်မရှင်တပ်၊ ရဲနဲ့ ပျူစောထီးပူးပေါင်းတပ်ဖွဲ့တွေကလည်း ခရီးသွားကားတွေမှာပါလာတဲ့ လူငယ်တွေနဲ့ ဒေသခံလူငယ်တွေကို ပေါ်တာဆွဲဖမ်းဆီးနေတယ်လို့ သိရပါတယ်။

စစ်ကော်မရှင်တပ်ရဲ့ပေါ်တာဆွဲဖမ်းဆီးမှုတွေကြောင့် စကုမြို့နယ်ကျောင်းတော်ရာနဲ့ဝဲဒေါင့်ကျေးရွာတွေက အသက် ၁၈ ကနေ ၂၂ နှစ်ကြား လူငယ်အမျိုးသား ၁၅ ဦး၊ ပွင့်ဖြူမြို့နယ်မှာ အသက် ၂၅ ကနေ ၃၀ နှစ်အကြားရှိ လူငယ်မျိုးသားတွေဖြစ်တဲ့ အင်းနက်ရွာခံ ၁ ဦး၊ မုန်းဇလဲရွာခံ ၁ ဦး၊ တောင်အင်းရွာခံ ၁ ဦး၊ ရွာသစ်ရွာ ခံ ၁ ဦး၊ ခင်တဲရွာခံ ၁ ဦး၊ သူဌေးကုန်းရွာခံ ၃ ဦး စုစုပေါင်း ၈ ဦးအထိ ဖမ်းဆီးခံထားရတယ်လို့ သိရပါတယ်။

ဒါ့အပြင် ခရီးသွားကားတွေပေါ်ကလူငယ်တွေလည်း ဖမ်းဆီးခံထားရကာ အဲ့ဒီဖမ်းဆီးခံရမှုတွေကတော့ ခရီးသွားတွေဖြစ်တာကြောင့် ဖမ်းဆီးခံရသူတွေရဲ့ အခြေအနေတွေကို မသိရဘူးလို့ ဆိုပါတယ်။

နောက်ထပ် စကုမြို့ခံတဦးကတော့ ” စကုမြို့ နဲ့ ပွင့်ဖြူဘက်တွေမှာ အခု ၃ ရက်အတွင်း အဓမ္မစစ်မှုထမ်း တော်တော်ဆွဲခံရပါတယ်။ Honda Fit အနက်ရောင် YGN 1K/1815 နဲ့ ပတ်ဆွဲနေတာပါ” လို့ ပြောပါတယ်။

လက်ရှိမှာ ပေါ်တာဆွဲဖမ်းဆီးသွားသူတွေကို မင်းဘူးမြို့အခြေစိုက်စစ်ကော်မရှင်တပ်ရင်းတွေဆီ ပို့ဆောင်ထားပြီး အဲ့ဒီကတဆင့် မကွေးမြို့ အမှတ် ၃ စစ်သားစုဆောင်းရေးတပ်ကို ပို့ဆောင်လေ့ရှိတယ်လို့ သိရပါတယ်။

နိုဝင်ဘာလပထမပတ်အတွင်း မကွေးတိုင်းအပါမြို့ကြီးအများအပြားမှာ စစ်ကော်မရှင်ဦးဆောင်ပြီး တန်ဆောင်တိုင်ပွဲတွေပြုလုပ်ခဲ့ရာ အဲ့ဒီကာလတွေမှာ ပေါ် တာဆွဲဖမ်းဆီးတာတွေ ယာယီရပ်နားခဲ့ပြီးတဲ့နောက် ဒုတိယအပတ်ကစတင်ကာ မကွေးတိုင်းက မြို့နယ်တွေမှာ အခုလို ဖမ်းဆီးမှုတွေပြန်လည်မြင့်တက်လာတာလည်း ဖြစ်ပါတယ်။

စာတည်း – ဟိန်းစံ

မြေလတ်အသံ၊ နိုဝင်ဘာ ၆၊ ၂၀၂၅။

မန္တလေးတိုင်း၊ မိတ္ထီလာခရိုင်၊ ဝမ်းတွင်းမြို့နယ်ရှိ ကျေးရွာ ၂ ရွာက အမျိုးသား ၃ ဦးကို စစ်ကော်မရှင် လက်အောက်ခံရဲတပ်ဖွဲ့ဝင်တွေက ဖမ်းဆီးသွားခဲ့တယ်လို့ ဒေသခံတွေဆီက သိရပါတယ်။

ဖမ်းဆီးခံရသူ ၃ ဦးမှာ အသက် ၂၀ ကျော်အရွယ် ကျောင်းကုန်းရွာသား ၁ ဦးနဲ့ ရွာသစ်ကျေးရွာသား ၂ ဦးတို့ဖြစ်ကြကာ နိုဝင်ဘာ ၆ ရက်မနက် ၁ နာရီကျော်က ဖမ်းဆီးခံခဲ့ရတာလို့ ဆိုပါတယ်။

“ဒီနေ့ညဉ့် ၁ နာရီအချိန်လောက်မှာလေ ရွာသစ်ရွာထဲ ရွာအလယ်ပိုင်းကအိမ်တွေ တစ်အိမ်တက်ဆင်း စစ်ပြီး လူငယ်တွေ့တဲ့အိမ်က လူငယ်ချောဆွဲခံရတာပဲ။ ပြီးတော့ ကျောင်းကုန်းထဲဝင်ဖမ်းတာ။ ရဲ**တွေက လူငယ်ရှိတဲ့အိမ်တွေကိုဆိုရင် တံခါးတွေကို အတင်းဆွဲဖွင့်တယ်။ သေနတ်ပြတယ်။ ဇွတ်အတင်းဝင်ရောက်ပြီးကိုဖမ်းတာ”လို့ ဝမ်းတွင်းဒေသခံအမျိုးသားတဦးက ပြောပါတယ်။

ပင်းတလဲရဲစခန်းမှ ရဲတွေဟာ ကျောင်းကုန်း နဲ့ ရွာသစ်ရွာတို့ကို လူဖမ်းဆီးဖို့ဝင်ရောက်လာချိန် ဆိုင်ကယ် ၄ စီးနဲ့ တပ်သား ၈ ဦးပါရှိပြီး သေနတ်ပစ်ဖောက်ဝင်ရောက်လာခဲ့တာလို့ အထက်ပါအမျိုးသားက ပြောပါတယ်။

အဆိုပါ ဖမ်းဆီးခံအမျိုးသား ၃ ဦးကို ၎င်းတို့ကျေးရွာနဲ့ ၇ မိုင်ကျော်ကွာဝေးတဲ့ ပင်းတလဲကျေးရွာရဲစခန်းမှာ ချုပ်နှောင်ထားတာကိုသိရှိရတာကြောင့် မိသားစုဝင်တွေက နိုဝင်ဘာ ၆ ရက်ဒီမနက် ၁၀ နာရီကျော်မှာ ရဲစခန်းကိုသွားရောက်ပြီး တွေ့ခွင့်တောင်းကြပေမယ့် တွေ့ခွင့်မပေးဘူးလို့လည်း သူကဆိုပါတယ်။

“စစ်မှုထမ်းအတွက် ချောဆွဲတာပါ။ စမထ(စစ်မှုထမ်း)အပါတ်စဉ် ဖွင့်ခါနီးပြီလေ။ ၉ ရက်နေ့လား ၁၀ ရက်နေ့လား လစဉ်ဖွင့်တာ။ လူမပြည့်လို့ဆွဲနေကျပါပဲ။ လတိုင်းဖမ်းတယ်။ လကုန်၊လဆန်း ရက်ရောက်တိုင်းချောဆွဲတာ”လို့ အထက်ပါအမျိုးသားက မှတ်ချက်ပေးပါတယ်။

အလားတူ နိုဝင်ဘာ ၅ ရက်ည ၉ နာရီကျော်ကလည်း ဝမ်းတွင်းမြို့နယ်၊ သစ်ပလွေကန်ကျေးရွာက အသက် ၂၀ နဲ့ ၃၀ ကြားရှိ အမျိုးသား ၂ ဦးကို စစ်ကော်မရှင်လက် အောက်ခံရဲတပ်သားတွေက ဝင်ရောက်ဖမ်းဆီးခဲ့ပြီး သူတို့ကိုလည်း ပင်းတလဲရွာရဲစခန်းမှာပဲ ချုပ်နှောင်ထားတယ်လို့ ဒေသခံတွေဆီက သိရပါတယ်။

အခုလို နေအိမ်တွေထဲအထိဝင်ရောက်ကာ မကြာခဏဖမ်းဆီးနေတာကြောင့် ဒေသခံတွေအနေနဲ့ နေ၀င်ရင်အပြင်မထွက်ရဲကြတော့ဘူးလို့ဆိုပါတယ်။

ပြည်သူ့စစ်မှုထမ်းအပတ်စဥ် ၁ ကို ၂၀၂၄ ဧပြီ ၈ ရက်မှာစတင်ဖွင့်လှစ်ခဲ့တာဖြစ်ပြီး ပျှမ်းမျှအားဖြင့် ၁ လကို အပတ်စဥ် ၁ ခုဖွင့်လှစ်နေတာဖြစ်ကာ လက်ရှိမှာ အပတ်စဥ် ၁၈ ကို အောက်တိုဘာ ၂၁ ရက်မှာ နောက်ဆုံးဖွင့်လှစ်ထားတာ ဖြစ်ပါတယ်။

စာတည်း – လင်း

စလင်း၊ အောက်တိုဘာ ၁၅၊ ၂၀၂၅။

မကွေးတိုင်း၊ စလင်းမြို့မှာ စစ်ကော်မရှင်တပ်ကပေါ်တာဆွဲဖမ်းဆီးနေပြီး အောက်တိုဘာ ၁၃ ရက်နဲ့ ၁၅ ရက်မှာ စုစုပေါင်းအမျိုးသား ၄ ဦးဖမ်းဆီးခံထားရတယ်လို့ ပြည်သူ့ညီနောင်-စလင်းအဖွဲ့ဆီက သိရပါတယ်။

အောက်တိုဘာ ၁၃ ရက် ည ၈ နာရီခွဲအချိန်မှာ စလင်းမြို့ကပြန်လာတဲ့ Micky-Myanmar Wifi ကုမ္ပဏီဝန်ထမ်း အသက် ၂၅ နှစ်အရွယ်အမျိုးသား ၂ ဦးကို စလင်းမြို့မြောက်ဘက် စစ်ကော်မရှင်စစ်ဆေးရေးဂိတ်အနီးမှာ ပေါ်တာဆွဲဖမ်းဆီးခဲ့တယ်လို့ ဆိုပါတယ်။

ဖမ်းဆီးခံရသူ ၂ ဦး ဆင်ဖြူကျွန်းမြို့၊ ပြန်လွှင့်ရပ်ကွက်မှာနေထိုင်တဲ့ အသက် ၂၅ နှစ်အရွယ် အမျိုးသား ၂ ဦးဖြစ်ပြီး ဒီကနေ့အထိ စလင်းမြို့မရဲစခန်းမှာချုပ်နှောင်ထားတယ်လို့ ပြည်သူ့ညီနောင်-စလင်းအဖွဲ့ တာဝန်ခံ ကိုပြည်သူ က ပြောပါတယ်။

ဒါ့အပြင် အောက်တိုဘာ ၁၅ ရက် ဒီကနေ့ ညနေ ၅ နာရီခွဲမှာလည်း အမျိုးသား ၂ ဦးကို စလင်းမြို့၊ ရှင်ဗလန်းနတ်နန်းအနီးမှာ စစ်ကော်မရှင်တပ်နဲ့ ပျူစောထီးတွေက ပေါ်တာဆွဲဖမ်းဆီးခဲ့တယ်လို့ သူကဆက်ပြောပါတယ်။

“စလင်းမြို့ ရှင်ဗလန်းနတ်နန်းနားမှာ ဆိုင်ကယ်မောင်းနှင်လာတဲ့ အမျိုးသား ၂ ဦးကို ဖမ်းဆီးစစ်ဆေးပြီး ကားပေါ်တင်ခေါ်ဆောင်သွားတယ်၊ စလင်းမြို့ ရှင်ဗလန်းနတ်နန်းနားမှာ စစ်ကော်မရှင်တပ်ဖွဲ့ဝင်တွေက အရပ်သားဟန်ဆောင်ပြီး အင်အား ၆ ဦးခန့်နဲ့ ဖမ်းဆီးစစ်ဆေးနေတာတွေ လုပ်နေတယ်” လို့ သူက ဆက်ပြောပါတယ်။

အဆိုပါ ဖမ်းဆီးခံရသူတွေနဲ့ပတ်သက်တဲ့ နောက်ဆက်တွဲအခြေအနေတွေကိုတော့ မြေလတ်အသံက သီးခြားအတည်မပြုနိုင်သေးပါဘူး။

မကွေးတိုင်းအတွင်း စလင်း၊ ပွင့်ဖြူ၊ ချောက်စတဲ့မြို့နယ်တို့မှာ စစ်ကော်မရှင်တပ်နဲ့ ပျူစောထီးတွေက မြို့ပေါ်ရပ်ကွက်တွေအပြင် ကျေးရွာတွေဘက်မှာပါ ပေါ်တာဆွဲဖမ်းဆီးမှုတွေ မကြာခဏပြုလုပ်လျှက် ရှိနေတာပါ။

ပြီးခဲ့တဲ့ အောက်တိုဘာ ၇ ရက်ကလည်း စလင်းမြို့နယ်၊ ငွေသောင်ကျေးရွာနဲ့ ချောက်ပင်ရွာက အမျိုးသား ၁၁ ဦး ပေါ်တာဆွဲဖမ်းဆီးခံရပြီး ၃ ဦးကတော့ ငွေပေးပြီးပြန်ရွေးခဲ့ရတယ်လို့ သိရပါတယ်။

စာတည်း – လင်း

ဖမ်းခံထားရသူထဲ စစ်တပ်လက်အောက်ခံဆယ်အိမ်မှူးရဲ့တူပါဝင်ပြီး သိန်းရာချီတောင်းလို့ ပြန်မရွေးနိုင်ခဲ့ဟုဆို

တောင်ငူ၊ အောက်တိုဘာ ၁၅၊ ၂၀၂၅။

ပဲခူးတိုင်း၊ တောင်ငူမြို့နယ်၊ အုတ်ကျွတ်တန်း ၁၀ ရပ်ကွက်မှာ လူငယ် ၃ ဦးကို စစ်ကော်မရှင်တပ်က ဖမ်းဆီးခေါ်ဆောင်သွားပြီး ၁ ဦးကို အသက်မပြည့်သေးတာကြောင့် ပြန်လွှတ်ပေးလိုက်တယ်လို့ ဖြစ်စဉ်ကိုသိရှိတဲ့ဒေသခံတဦးကပြောပါတယ်။

အောက်တိုဘာ ၁၄ ရက် ည ၉ နာရီဝန်းကျင်မှာ ၁၆ နှစ်အရွယ် ကျော်ထက်ပိုင်၊ အသက် ၂၀ အရွယ် ဟိန်းမင်းထူးနဲ့ ဇင်မျိုးတို့ကို အလုပ်ဆင်းချိန်လမ်းလျှောက်အိမ်ပြန်လာစဉ် အုတ်ကျွတ်တန်းရပ်ကွက် ၁၀ လမ်းထိပ်မှာ စစ်ကော်မရှင်တပ်က ဖမ်းဆီးခေါ်ဆောင်သွားပြီး ကျော်ထက်ပိုင်ကိုတော့ စခန်းအရောက်မှာ မှတ်ပုံတင်စစ်ဆေးပြီး အသက်မပြည့်လို့ ပြန်လွှတ်ပေးခဲ့တာလို့ သိရပါတယ်။

“သူတို့စစ်မှုထမ်းအတွက် လူလိုတော့လက်ထောက်ချတဲ့သဘောပါပဲ။ အတွင်းလူပါလို့ပေါ့။ ဒီကလေးတွေ ဒီချိန်ပြန်လာတတ်တယ်ဆိုတာသိတော့လေ၊ ဆက်ကြေးလည်းကောက်တယ်၊ သူတို့လူလိုရင်လည်း အစားထိုးတယ်။ ပျူစောထီးအတွင်းလူရှိလို့ ဘယ်သူ့သားသမီး ဆွဲရင်လုပ်လို့ရတယ် ဆိုတဲ့ပုံစံမျိုးနဲ့ဆွဲနေတာ နိမ့်ပါးတဲ့ရပ်ကွက်တွေဆို သူတို့က အားကြီးလုပ်တယ်”လို့ ဒေသခံတဦးက ပြောပါတယ်။

အဖမ်းခံရသူ ၃ ဦးအနက် ဇင်မျိုးဆိုသူဟာ တောင်ငူမြို့အမှတ် ၁၀ ရပ်ကွက် စစ်မှုထမ်းကြေးကောက်ရာမှာ လိုက်လံလုပ်ဆောင်ပေးနေသူ အမှတ် ၁၀ ရပ်ကွက်ရဲ့ ဆယ်အိမ်မှူးသန်းလှအောင် ဇနီးရဲ့တူ ဖြစ်ပြီး သန်းလှအောင်ကိုယ်တိုင်သွားပြီး ညှိနှိုင်းထုတ်ယူခဲ့ပေမယ့် ပြန်လွှတ်မပေးခဲ့ဘူးလို့ ဒေသခံတဦးက ပြောပါတယ်။

“သူမနက်က သူ့တူအတွက်ကို အမှတ် ၁ စခန်းက နယ်ထိန်းကိုလှမ်းညှိတယ်တဲ့၊ ပထမတော့ သိန်း ၃၀ လို့ပြောတယ်တဲ့။ တကယ့်တကယ်သွားထုတ်တော့ သိန်း ၃၀ နဲ့လည်းမရဘူး။ အခုက ရာဂဏန်းပေးမှ လွှတ်ပေးမယ်ပြောပြီးတော့ လေတပ်စခန်းရှိတဲ့ နှစ်ဆောင်ပြိုင်လို့ခေါ်တဲ့ အဲ့ဘက်ကို ခေါ်သွားပြီလို့လည်း ကြားတယ်”လို့ သူကပြောပါတယ်။

ဒါ့အပြင် ဟိန်းမင်းထူးနဲ့ ကျော်ထက်ပိုင်တို့ ၂ ဦးဟာလည်း ညီအကိုတော်စပ်ပြီး မိဘတွေအနေနဲ့ လက်လုပ်လက်စားတွေဖြစ်တာကြောင့် ဟိန်းမင်းထူး ကို ငွေပေးပြီးမရွေးနိုင်ကြဘူးလို့ ဆိုပါတယ်။

တောင်ငူမြို့နယ်အတွင်း ပေါ်တာဆွဲဖမ်းဆီးခံရသူတွေကို တောင်ငူလေတပ်စခန်းဌာနချုပ် – တလခ ကို ကနဦးပို့ဆောင်ပြီးနောက် တောင်ပိုင်းတိုင်းစစ်ဌာနချုပ်နဲ့ အုတ်တွင်းမြို့နယ်၊ အုတ်တွင်းအခြေစိုက် အမှတ် ၆ တပ်မတော်တန်းမြင့်လေ့ကျင့်ရေးကျောင်း (တတက ၆) စစ်သင်တန်းကျောင်းကို ပို့ဆောင်လေ့ရှိပြီး အခု ဖမ်းဆီးခံရသူ ၂ ဦးကိုတော့ ဘယ်ကိုပို့ဆောင်တယ်ဆိုတာ အတိအကျမသိရသေးဘူးလို့ ဆိုပါတယ်။

တောင်ငူမြို့ပေါ်ရှိ အိမ်ထောင်စုတွေအနေနဲ့ ၁ လကို စစ်မှုထမ်းကြေး ၂ သောင်းပေး ဆောင်နေကြရပေမယ့် ပျူစောထီးအများစုကြောင့် မြို့ပေါ်အပြင် ကျေးရွာတွေဘက်မှာပါ ပေါ်တာဆွဲဖမ်းဆီးမှုတွေ မကြာခဏကြုံနေရပြီး နိမ့်ပါးတဲ့မိသားစုတွေက လူငယ်တွေကိုအဓိကထားဖမ်းဆီးနေကြတာလို့ ဒေသခံတဦးကပြောပါတယ်။

ပြီးခဲ့တဲ့ စက်တင်ဘာ ၂၀ ရက်ကလည်း တောင်ငူမြို့၊ သဖန်းပင်ကျေးရွာအုပ်စု၊ အလယ်ကျွန်းရွာမှာ ဒေသခံအမျိုးသား ၅ ဦး ပေါ်တာဆွဲဖမ်းဆီးခံရပြီး ၁ ဦးက ငွေပေးပြန်လွတ်လာကာ ၄ ဦးကတော့ စစ်မှုထမ်းအတွက် ပို့ဆောင်ခံခဲ့ရတယ်လို့ သိရပါတယ်။

စာတည်း – လင်း