Zaw

မြေလတ်အသံ၊ မေ ၂၊၂၀၂၆။

ပဲခူးတိုင်းအရှေ့ခြမ်း၊ ညောင်လေးပင်မြို့နယ်၊ ပိန်းဇလုပ်မြို့၊ ကံ‌ကလေးကျေးရွာအုပ်စု၊ ရွာမကျေးရွာအထွက်မှာရှိတဲ့ စစ်ဆေးရေးဂိတ်ကို တိုက်ခိုက်ခဲ့တယ်လို့ Spring Warriors Column ဆီကသိရပါတယ်။

ပိန်းဇလုပ်အခြေစိုက် ခမရ ၂၆၄ တပ်ရင်းနဲ့ ၁ မိုင်ခန့်အကွာမှာရှိတဲ့ အဲ့ဒီစစ်ဆေးရေးဂိတ်မှာ စစ်ကော်မရှင်တပ်ဖွဲ့အင်အား ၃၀ ဝန်းကျင် အထိုင်ချတပ်စွဲနေတာဖြစ်ပြီး ဧပြီ ၂၇ ရက် ညပိုင်းမှာ ဝင်ရောက်တိုက်ခိုက်ခဲ့တာလို့ ဆိုပါတယ်။

“အဲ့ဒီဂိတ်က ရွာမအထွက်မှာရှိတာပါဗျ။ အင်အားကတော့ ၂၀ နဲ့ ၃၀ ကြား၀န်းကျင်မှာ ရှိပါတယ်။ ကျနော်တို့၀င်တိုက်တဲ့အချိန်မှာ သူတို့က ထွက်ပြေးသွားတယ်ဗျ။ အဲ့ဒီမှာ ကျနော်တို့က သူတို့ရဲ့ဂိတ်တွေအကုန်လုံးကို မီးရှို့ဖျက်ဆီးခဲ့တယ်”လို့ Spring Warriors Column ရဲ့ တာ၀န်ရှိသူက မြေလတ်အသံကိုပြောပါတယ်။

ဧပြီ ၂၉ ရက်မနက်ပိုင်းမှာလည်း စစ်‌ဆေးရေးဂိတ်ကို ပြန်လည်ဝင်ရောက်ဖို့လုပ်ဆောင်နေတဲ့ စစ်ကော် မရှင်တပ်ဖွဲ့တွေနဲ့ ထိတွေ့တိုက်‌ပွဲထပ်မံဖြစ်ခဲ့ပြီး စစ်ကော်မရှင်တပ်ဖွဲ့၀င်အလောင်း ၂ လောင်းကို မျက်မြင်တွေ့ခဲ့တယ်လို့ အထက်ပါတာ၀န်ရှိသူက ပြောပါတယ်။

“အဲ့ဒိီမှာ စစ်ကောင်စီက ပြန်၀င်နေတာတွေ့တော့ ထိတွေ့မှုဖြစ်ခဲ့တယ်။ အဲ့ဒီအချိန်မှာတော့ စစ်ကောင် စီ၂ ယောက် ကျတယ်။ တပ်ကြပ်ကြီးအပါအ၀င်ပေါ့၊ ကျန်တဲ့ရဲဘော်တွေအကုန်လုံးကလည်း ပြန်ပြီးထွက်ပြေးသွားကြတယ်။ အဲ့ဒီနောက်ပိုင်းတော့ စစ်ကောင်စီဘက်က ဘယ်လိုလှုပ်ရှားမှုတွေရှိနေလဲဆိုတာတော့ ကျနော်တို့လည်း မသိရသေးပါဘူး” လို့ ပြောပါတယ်။

ပြီးခဲ့တဲ့ မတ်လပထမအပတ်ထဲမှာလည်း ပိန်းဇလုပ်မြို့အခြေစိုက် အမှတ် ၂၆၄ ခြေမြန်တပ်ရင်းထဲကနေ ရေတွင်းကုန်း၊ ကျောင်းကုန်း၊ ကံကလေးရွာတွေဘက်ကို စစ်ကြောင်းထိုးလာတဲ့ စစ်တပ်စစ်ကြောင်းနဲ့ ဒေသတွင်းတော်လှန်ရေးတပ်ဖွဲ့တွေ ထိတွေ့တိုက်ပွဲတွေ ၃ ရက်နီးပါးဖြစ်ပွားခဲ့ပါသေးတယ်။

မြင်းခြံ၊ ဧပြီ ၂၉၊ ၂၀၂၆။

မန္တလေးတိုင်း၊ နွားထိုးကြီးမြို့နယ်အတွင်း ဧပြီ ၂၄ ရက်နဲ့ ၂၆ ရက်မှာ စစ်ကော်မရှင်တပ်နဲ့ ဒေသခံ ကာကွယ်ရေးတပ်တွေ တိုက်ပွဲဖြစ်ပြီး စစ်ကော်မရှင်တပ်သားအလောင်း ၁ လောင်းနဲ့ ခဲယမ်းပစ္စည်းတချို့ကို သိမ်းဆည်းခဲ့တယ်လို့ မြင်းခြံခရိုင် အမှတ် ၄ တပ်ရင်း NPDF ဆီက သိရပါတယ်။

ဧပြီ ၂၄ ရက် မနက် ၆ နာရီခွဲကစတင်ကာ နွားထိုးကြီးမြို့နယ်၊ ခံစပ်ကုန်းအရှေ့ရွာကိုဦးတည်လာတဲ့ အင်အား ၃၀၀ ကျော်ပါစစ်ကြောင်းနဲ့ တနေကုန်တိုက်ပွဲဖြစ်ခဲ့သလို ဧပြီ ၂၆ ရက်မနက် ၈ နာရီခန့်မှာလည်း ခံစပ်ကုန်းရွာကနေ ညောင်ဇင်ရွာနဲ့ ကဒေါင်းရွာတို့ကိုဦးတည်လာတဲ့ စစ်ကော်မရှင်တပ်နဲ့ ထပ်မံတိုက်ပွဲဖြစ်ခဲ့ကြတာလို့ မြင်းခြံခရိုင် အမှတ် ၄ တပ်ရင်း NPDF ရဲ့ တာဝန်ရှိသူတဦးက ပြောပါတယ်။

“၂ ကြိမ်ဖြစ်တဲ့အခါမှာ သူတို့ဘက်က ထိခိုက်သေဆုံးမှုများတယ်။ ကျနော်တို့ ထောင်ထားတဲ့ မိုင်းတွေတိုးလို့ သေတာတွေလည်းရှိတယ်။ တိုက်ပွဲထဲမှာ သေဆုံးတဲ့သူတွေကို အလောင်းတောင်မကောက်ဘဲနဲ့ ၁ ယောက်လဲကျရင် နောက် ၁ ယောက်က ရှေ့အတင်းကျော်တက် အဲ့လိုအခြေအနေထိပါ အင်အားအလွန်အကျွံသုံးပြီး တိုးလာမျိုးဗျ။ ဒီသေဆုံးမှုတွေအကုန်လုံးကတော့ မျက်မြင် မြင်ရလို့ ကျနော်တို့ကထည့်သွင်းထုတ်ပြန်ထားတာ” လို့ ဆိုပါတယ်။

တိုက်ပွဲပြီးနောက် အလောင်း ၁ လောင်း၊ ကား ၁ စီး၊ ခဲယမ်းတချို့ကိုသိမ်းဆည်းနိုင်ခဲ့ပြီး ဒရုန်းကား ၁ စီးနဲ့ ရိက္ခာကား ၁ စီးကိုမီးရှို့ ဖျက်ဆီးနိုင်ခဲ့တယ်လို့ ဆိုပါတယ်။

“စစ်တပ်စစ်ကြောင်းက အင်းအားများတာက လွန်ခဲ့တဲ့ ၈ လလောက်ကထဲက ကျနော်တို့နဲ့ ဖြစ်လာခဲ့တဲ့ စစ်ကြောင်းလို့ ပြောလို့ရပါတယ်။ နွားထိုးကြီးမြို့နယ်မှာ သူတို့စစ်ကြောင်းတွေ ထိုးတယ်၊ ထိုးပြီးကျနော်တို့နဲ့အကြိမ်ကြိမ်တိုက်ပွဲတွေဖြစ်တယ်။ ၆ လနီးပါးလောက် ဆက်တိုက်ဖြစ်ပြီးတော့ ကျန်တဲ့ ၂ လလောက်မှာ ကျနော်တို့က နယ်မြေအခြေအနေအရ သူတို့ကို နောက်ဆုတ်လိုက်တဲ့အခါကျမှ မြင်းခြံမြို့နယ်ကို ကူးပြီးတော့မှတခါမီးတွေရှို့တယ်။ အိမ်တွေဖျက်ဆီးတယ်။ ပြည်သူတွေသတ်တယ်။ သတ်ပြီးတော့မှ ပြန်လာပြီးတော့မှ နွားထိုးကြီးမြို့နယ်ကို ပြန်၀င်တာပေါ့နော်။ ပြန်၀င်တဲ့အချိန်မှာ ကျနော်တို့နဲ့ထပ်ဖြစ်တာ။” လို့ သူက ဆက်ပြောပါတယ်။

ဒါ့အပြင် ဒီတိုက်ပွဲတွေအတွင်း စစ်ကော်မရှင်ဘက်က ၂၀ ကျော်သေဆုံးတာကို မျက်မြင်တွေ့ရတယ်လို့ဆိုပေမယ့် ဒီသေဆုံးမှုနဲ့ပတ်သက်ပြီးမြေလတ်အသံက သီးခြားအတည်မပြုနိုင်သေးပါဘူး။

ဒီတိုက်ခိုက်မှုကို မြင်းခြံခရိုင် အမှတ် ၄ တပ်ရင်း၊ မြင်းခြံခရိုင် အမှတ် ၁၀ တပ်ရင်းနဲ့ ပူးပေါင်းအဖွဲ့တွေ ဖြစ်တဲ့ မြင်းခြံခရိုင်အထူးလှုပ်ရှားစစ်ကြောင်း၊ မန္တလေးခရိုင် အမှတ် ၃ တပ်ရင်း ၊ MGN – 35၊ ပြည်သူ့ကြယ်တစ်ပွင့်တို့က တိုက်ခိုက်ခဲ့ကြတာလို့ ဆိုပါတယ်။

အဆိုပါစစ်ကြောင်းဟာ မတ်လနောက်ဆုံးပတ်ကစပြီး မြင်းခြံမြို့နယ်ထဲက ပျားရွာ၊ ထိန်ပန်း၊ ရွာသစ်၊ ကျီးပင်ကန်၊ တူရွင်းဘို့၊ ပျိုးကန် စတဲ့ရွာတွေအပါအဝင် ရွာပေါင်း ၂၀ နီးပါးကိုစစ်ကြောင်းထိုးကာ ဒေသခံတွေကိုလည်းသတ်ဖြတ်တဲ့အပြင် နေအိမ် ၁ ထောင်ကျော်ကိုလည်းမီးရှို့ခဲ့တဲ့စစ်ကြောင်း ဖြစ်တယ်လို့လည်း သိရပါတယ်။

တည်းဖြတ် – M