ကျော်စွာ

ကနီ၊ စက်တင်ဘာ ၂၁၊ ၂၀၂၆။

စစ်ကိုင်းတိုင်း၊ ကနီမြို့အနီးမှာ ယာလုပ်ငန်းလုပ်ရင်း တောင်ယာထဲမှာ တဲထိုးနေထိုင်နေတဲ့ အမျိုးသား ၁ ဦးကို စစ်တပ်ပတ်ကင်းက ဖမ်းဆီးပြီး ပစ်သတ်ခဲ့တယ်လို့ ဒေသခံတွေဆီက သိရပါတယ်။

အဲ့ဒီပတ်ကင်းအဖွဲ့ဟာ ပြီးခဲ့တဲ့ စက်တင်ဘာ ၂၀ ရက်နေ့က ပတ်ကင်းလှည့်ရင်း ယုန်မရတောရပ်ကွက် ၃ အနီးက ယာတောနားမှာ ဖမ်းဆီးသတ်ဖြတ်ခဲ့တာဖြစ်လို့ ဒေသခံတဦးက ပြောပါတယ်။

“အလင်းဝင် မိန်းကလေး ၂ ယောက်၊ ယောက်ျားလေး ၁ ယောက် Gun ၂ လက် စခက လိုက်ရှာတာ၊ တောထွက်တဲ့ သူအသတ်ခံရတာ။” လို့ ကနီဒေသခံက ပြောပါတယ်။

အသတ်ခံရတဲ့ အမျိုးသားမှာ ကနီမြို့နဲ့ ကပ်လျက်မှာရှိတဲ့ ယုန်မရတောမှာ နေထိုင်တဲ့ အသက် ၄၀ ကျော်အရွယ် တောင်သူဦးသိန်းအောင် ဆိုသူဖြစ်ပြီး ဦးခေါင်းကို သေနတ်နဲ့ ပစ်သတ်ခံရတဲ့ ဒဏ်ရာနဲ့ မှောက်လျက်သေဆုံးနေတာ ဖြစ်ပါတယ်။

ကနီမြို့မှာ အထိုင်ချထားတဲ့ အာဏာသိမ်းစစ်တပ်ဟာ အင်အား ၈၀၀ နီးပါးနဲ့ စစ်ကြောင်း ၂ ကြောင်းခွဲပြီး မုံရွာ-ယာကြီး-ကလေးဝ လမ်းပိုင်းတွေကို ပြန်လည်ထိန်းချုပ်နိုင်ဖို့ စစ်ကြောင်းထိုးတာကြောင့် အနီးအနားရှိ ကျေးရွာတွေက ပြည်သူတွေ လွတ်ရာရှောင်တိမ်းနေရသလို၊ ကနီမြို့ပတ်လည်မှာလည်း ပတ်ကင်းလှည့်ကာ၊ အနီးဝန်းကျင် ကျေးရွာတွေကို စစ်ကြောင်းထိုး မီးရှို့တာတွေလည်း ပြုလုပ်လေ့ရှိတယ်လို့ သိရပါတယ်။

မုံရွာ၊ စက်တင်ဘာ ၂၊ ၂၀၂၆။

စစ်ကိုင်းတိုင်း၊ မုံရွာမြို့မှာ ယာဉ်ထိန်းရဲတွေနဲ့ စစ်တပ်ပူးပေါင်းပြီး ဆိုင်ကယ်လိုင်စင်၊ ယာဉ်မောင်းလိုင်စင်နဲ့ ဆိုင်ကယ်ဦးထုပ်၊ နောက်ကြည့်မှန်၊ ဘရိတ်စတာတွေကို အသေးစိပ် စစ်ဆေးနေလို့ နေ့စားအလုပ်သမားတွေ အလုပ်မသွားနိုင်ဘဲ ဖြစ်နေတယ်လို့ သိရပါတယ်။

မနေ့ မနက်ပိုင်းကစလို့ ယာဉ်ထိန်းရဲတဝက်၊ စစ်သားတဝက်ပါတဲ့ အဖွဲ့တွေက မုံရွာမြို့၊ ကျောက္ကာလမ်းတလျောက်နဲ့ မြို့ပတ်လမ်းတလျောက်မှာ ခရီးသွားဆိုင်ကယ်တွေကို စစ်ဆေးနေတာလို့ မြို့ခံတဦးက ဆိုပါတယ်။

“မနက်၉နာရီလောက်က ကျောက္ကာမိးပွိုင့်မှာ စပြီးစစ်ဆေးဖမ်းဆီးပြနေပြီ။ အခုလက်ရှိ သူတို့ထုတ်တဲ့ဥပဒေက ဆိုင်ကယ်လိုင်စင်၊ ယာဉ်မောင်းလိုင်စင်၊ ဦးထုပ်၊ ဘက်မှန် အစုံပါရမယ်တဲ့လေ။ ဘက်မှန်က ဝါးနေရင် မရဘူးတဲ့ဗျ။” လို့ ပြောပါတယ်။

လိုအပ်ချက်မပြည့်စုံတဲ့ ဆိုင်ကယ်ပိုင်ရှင်တွေကိုတော့ တသမတ်တည်းမဟုတ်တဲ့ အခကြေးငွေနဲ့ ဒဏ်ကြေးပေးဆောင်ခိုင်းကာ၊ အဲဒီနေရာမှာတင် ဒဏ်ကြေးမဆောင်နိုင်တဲ့ ဆိုင်ကယ်တွေကိုတော့ တရားရုံးမှာလိုက်ပြီး ဒဏ်ကြေးဆောင် ရွေးရတယ်လို့ မြို့ခံတဦးက ဆိုပါတယ်။

ဩဂုတ်လ ၃၀ရက်နဲ့ ၃၁ရက်တွေက မြို့ထဲရပ်ကွက်တွေမှာ ရပ်ကွက်ကော်မတီဝင် (အုပ်ချုပ်ရေးမှူး၊ ရာအိမ်မှူး၊ ဆယ်အိမ်မှူး) တွေဦးဆောင်ပြီး ယာဉ်စီးနင်းသူတွေ လိုက်နာရမယ့် စည်းကမ်းတွေကို ကားတွေနဲ့ လှည့်လည်ကြေညာတာတွေ ပြုလုပ်ခဲ့တယ်လို့ ဆိုပါတယ်။

ဒီကနေ့ စက်တင်ဘာ ၂ ရက်နေ့မှာတော့ မုံရွာမြို့ပတ်လည် ကျေးရွာတွေက နေ့စားအလုပ်သမားတွေဟာ အခုလို ဖမ်းဆီးမှုတွေကြောင့် အလုပ်မသွားနိုင်ဘဲဖြစ်နေတယ်လို့ သိရပါတယ်။

“ခေတ်ကလည်း မကောင်းတော့ ဘာလိုင်စင်မှလည်း လုပ်မထားရဘူး။ တရက် ၁၅၀၀၀၊ ၂၀၀၀၀ ရတာ ဖမ်းခံရရင် ကုန်မှာ။ ဒါနဲ့ အလုပ်လည်း မသွားရတော့ဘူး။ လိုင်စင်လုပ်ရင်လည်း ဒဏ်ကြေးတွေနဲ့ မနည်းဘူး။” လို့ ပန်းရံလုပ်သားတဦးက ပြောပါတယ်။

အခုလို တင်းကြပ်တဲ့ စစ်ဆေးမှုတွေအပြင် စစ်တပ်ရဲ့ ပေါ်တာဆွဲဖမ်းဆီးမှုတွေကြောင့် မုံရွာမြို့တွင်းလမ်းမတွေဟာ လူသွားလူလာ နည်းပါးနေပြီလို့ မြို့ခံတဦးဆီက သိရပါတယ်။

“အသွားလာကတော့ အရင်နေ့တွေကတည်းက သိပ်မရှိတော့ဘူး။ ပေါ်တာကြောက်ကြလို့လေ။ မနက်ခင်းပိုင်းသာ ဈေးအသွားအလာကြောင့်ပဲ ရှိတတ်တာ။” လို့ မြို့ခံတဦးက ပြောပါတယ်။

ဆိုင်ကယ် လိုင်စင်မပါခဲ့ရင် ဆိုင်ကယ်ကို ခေတ္တသိမ်းထားကာ လိုင်စင်မလုပ်ခဲ့တဲ့ နှစ်အလိုက် ဒဏ်ကြေးဆောင်ရပြီး ဒဏ်ကြေးကိုသီးသန့်သတ်မှတ်ထားခြင်းမရှိကြောင်းနဲ့ ယာဉ်မောင်းလိုင်စင်နဲ့ ဆိုင်ကယ်အင်္ဂါရပ်နဲ့မညီတဲ့ ဆိုင်ကယ်တွေကိုတော့ ၂၀၀၀၀ ကနေ စပြီး ပေးနေရတယ်လို့ ဒေသခံတွေဆီက သိရပါတယ်။

ကနီ၊ ဩဂုတ် ၂၊ ၂၀၂၆။

စစ်ကိုင်းတိုင်း၊ ကနီမြို့နယ်၊ ယာကြီးရွာက ဓာတ်ဆီဆိုင်ကို လေကြောင်းတိုက်ခိုက်ခဲ့လို့ အမျိုးသား ၁ ဦးသေဆုံးပြီး၊ ကား ၂ စီး မီးလောင်သွားတယ်လို့ ဒေသခံတွေဆီက သိရပါတယ်။

ဩဂုတ်လ ၁ ရက်နေ့ နေ့လယ် ၃ နာရီခန့်က ယာကြီးကျေးရွာကို စစ်ကော်မရှင်တပ်က တိုက်ခိုက်ရေး ဂျတ်လေယာဉ်အပါဝင် ပါရာမော်တာတွေနဲ့ပါ လေကြောင်းက တိုက်ခိုက်ခံခဲ့ရတာလို့ ရွာခံတွေက ပြောပါတယ်။

“မြတ် ဘီယာဆိုင်ရဲ့ မြောက်ဘက်က ဓာတ်ဆီဆိုင်မှာ ကျတာ၊ ပထမက ဖိုက်တာက ဂန့်ဂေါကနေ သွားဝဲပြီး အပြန်မှာ ချသွားတယ်။ ချသွားပြီးတော့ ပါရာမော်တာ တက်တယ်။ ပါရာမော်တာကလည်း အဲဒီနားလေးပဲ ချတာ၊ တနေရာတည်းပဲ၊ ပြည်သူ ၁ ယောက် သေတယ်။” လို့ ရွာခံအမျိုးသားတဦးက ပြောပါတယ်။

သေဆုံးသူဟာ ရင်ဘတ်နဲ့ မျက်နှာတွေ ပွင့်ထားတဲ့ ဒဏ်ရာနဲ့ သေဆုံးသွားကာ ဆီဆိုင်ဘေးက ဆီတင်ကား ၁ စီးနဲ့ အခြားကုန်တင်ကား ၁ စီး မီးလောင်သွားတယ်လို့ ရွာခံအမျိုးသမီးတဦးဆီက သိရပါတယ်။

“ရင်ဘက်နဲ့ မျက်နှာ ပွင့်သွားတယ်တဲ့၊ ဗုံးစ ထိတဲ့လူတွေလည်း ရှိတယ်။ အရေအတွက် သေချာတော့ မသိရသေးဘူး။” လို့ အမျိုးသမီးတဦးက ပြောပါတယ်။

သေဆုံးသူအမျိုးသားက အသက် ၅၀ အရွယ် ဆယ်ရွာချောင်ကျေးရွာက ဦးပေါသီးဆိုသူ အမျိုးသားဖြစ်ပြီး၊ ကားရပ်နားချိန် စျေးဆင်းဝယ်ရာက ပြန်အထွက်မှာ ဗုံးထိမှန် သေဆုံးခဲ့တာလို့ ရွာခံအမျိုးသမီးတဦးက မြေလတ်အသံကို ပြောပါတယ်။

တိုက်ခိုက်ရေးလေယာဉ်နဲ့ ဗုံးကြဲပြီးနောက် ပါရာမော်တာနဲ့ ၂ ကြိမ် ဗုံးကြဲခဲ့ပြီး၊ ၁ ကြိမ်သာ ပေါက်ကွဲခဲ့တာကြောင့် အနီးအနားက နေအိမ်တွေလည်း ထိခိုက်ပျက်စီး သွားတယ်လို့ သိရပါတယ်။

ယာကြီးရွာဟာ မုံရွာ-ယာကြီး-မင်းကင်း-ကလေးဝ လမ်းပိုင်းမှာ ရှိတာဖြစ်ပြီး၊ စည်ကားတဲ့ ရွာကြီးတရွာလည်း ဖြစ်ပါတယ်။

မြေလတ်အသံ၊ ဇူလိုင် ၃၀၊ ၂၀၂၆။

စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်းစစ်ဌာနချုပ်ကို ဘက်ပြောင်းခိုလှုံသွားတဲ့ တက်ကြွလှုပ်ရှားသူ အမျိုးသမီးတဦးက ယင်းမာပင်မြို့နယ်ထဲက တပ်ဖွဲ့ဝင်ရဲဘော်တချို့ကို စစ်တပ်စိုးမိုးနယ်မြေတွေထဲ လှည်းဖြားခေါ်ဆောင်မှုတွေ ပြုလုပ်နေတယ်လို့ ကိုယ်တိုင်ကြုံတွေ့ခဲ့ရသူတွေဆီက သိရပါတယ်။

ဘက်ပြောင်းခိုလှုံသွားသူ အမျိုးသမီးမှာ မိချယ် (ခေါ်) ချယ်ချယ် ဆိုသူဟာ အာဏာသိမ်းစက မုံရွာ၊ ချောင်းဦး၊ ယင်းမာပင်၊ ဆားလင်းကြီးနဲ့ ကနီ စတဲ့ ဒေသတွေက ဆန္ဒပြပွဲတွေမှာ ကိုယ်တိုင်ပါဝင်ခဲ့သူဖြစ်ပြီး တော်လှန်ရေးတပ်စခန်းတချို့နဲ့ ရင်းနှီးသူလည်း ဖြစ်တယ်လို့ သူနဲ့ရင်းနှီးတဲ့ ဆက်ဆံရေးရှိသူတဦးက ဆိုပါတယ်။

ဇူလိုင်လ ၂၇ ရက်နဲ့ ၂၈ ရက်နေ့တွေမှာ အဆိုပါ ဘက်ပြောင်းခိုလှုံသူ အမျိုးသမီးက ယင်းမာပင်မြို့နယ်အခြေစိုက် တော်လှန်ရေးရဲဘော် ၂ ဦးကို အလုံတပ်မြို့၊ မုံရွာမြို့နဲ့ အောင်ဇေယျစစ်မှုထမ်းဟောင်းကုန်းတို့ဆီကိုလာရန် ဖုန်းဆက်ကာ လှည့်ဖြားခေါ်ဆောင်ခဲ့တာလို့ ဆိုပါတယ်။

“သူက အဲဒီဖက်ရောက်သွားတာကိုတော့ သိရတယ်။ အဖမ်းခံရတာလား၊ ဘက်ပြောင်းတာလားတော့ မသိဘူး။ သေနတ်ဝယ်မယ်ပြောပြီး အလုံက စွယ်တော်ဦးစားသောက်ဆိုင်ကို လာပေးဖို့ခေါ်တာ။ မလာရဲဘူးပြောတော့ အောင်ဇေယျကုန်းကို ခေါ်တာ။ နောက်တော့ သူဘက်ပြောင်းသွားတဲ့အကြောင်း မက်ဆေ့(Messages) တွေကျလာတယ်။” လို့ လှည့်ဖြားအခေါ်ခံရသူ ရဲဘော်တဦးက ပြောပါတယ်။

နောက်ထပ် တော်လှန်ရေး ရဲဘော်တဦးကိုလည်း မုံရွာမြို့ထဲမှာ ရိက္ခာလာယူဖို့ ပြောပြီး ခေါ်ဆောင်ကာ ချိန်းဆိုထားတဲ့နေရာအရောက်မှာ စစ်ကားတွေ အချိန်ကိုက် ရောက်လာတယ်လို့ ဆိုပါတယ်။

“ငါ့မောင်လေး ဘယ်မှာတုန်းပေါ့၊ ဒီစခန်းအတွက် ရိက္ခာလေး လှူချင်လို့၊ တန်းချင်လို့ ဆိုတဲ့ပုံစံမျိုးနဲ့ ဆက်သွယ်လာတယ်။ ဘယ်နားလေး လောက်ပေါ့၊ မြို့ထဲမှာ နင့်လူတွေရှိလား။ ဒါမှမဟုတ် ထောက်ပို့ရဲဘော်တွေရှိလား။ သူတို့ကို လာယူခိုင်းလိုက်ပေါ့။ သူက အဲ့လိုချိန်းတာဗျ။” လို့ ရဲဘော်တဦးက ပြောပါတယ်။

သူမဟာ စစ်ကိုင်းတိုင်းအတွင်းက တော်လှန်ရေးနယ်မြေအသီးသီးမှာ နှစ်ရှည်လှည့်လည်နေထိုင်ခဲ့သူဖြစ်ကာ၊ ဖိုလ်ဝင်တောင်အနီးတဝိုက်မှာ ၁ နှစ်ကျော်နေထိုင်သွားခဲ့တာဖြစ်ပြီး၊ လက်နက်ကိုင်ထားတဲ့ ဓာတ်ပုံတွေနဲ့ မကြာခဏ ဆိုရှယ်မီဒီယာမှာ ထုတ်ပြလေ့ရှိသူဖြစ်ပြီး၊ ဇူလိုင်လထဲမှာပဲ နမခဘက်ကို ဘက်ပြောင်းသွားတာဖြစ်တယ်လို့ သိရပါတယ်။

ဓာတ်ပုံ – PDF တွေနဲ့ အချိန်ကြာမြင့်စွာ နေထိုင်ခဲ့သူအမျိုးသမီး စစ်တပ်နဲ့ပေါင်းသွားသူ မိချယ် (ခ) ချယ်ချယ်