ကျော်ကြီး

တောင်သာ၊ ဇူလိုင် ၂၉၊ ၂၀၂၆။

မန္တလေးတိုင်း၊ တောင်သာမြို့နယ်၊ သီးကုန်းကျေးရွာမှာ တောင်သာမြို့နယ် လူဝင်မှုကြီးကြပ်ရေး ဦးစီးမှူးကို တော်လှန်ရေးအဖွဲ့တွေက ဖမ်းဆီးထိန်းသိမ်းသွားခဲ့တာလို့ မြေပြင်အခြေနေသိရှိတဲ့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဖမ်းဆီးခံရသူက မြို့နယ်လဝက ဦးစီးမှူး အသက် ၄၇ နှစ်အရွယ် ဒေါ်မိုးစန္ဒာဆိုသူဖြစ်ပြီး ဇူလိုင်လ ၂၇ ရက်နေ့ မနက်ပိုင်းမှာ သီးကုန်းကျေးရွာက သူ့မိဘနေအိမ်မှာရှိနေချိန် ဝင်ရောက်ဖမ်းဆီးသွားတာလို့ ဆိုပါတယ်။

“ဖမ်းတာက တော်လှန်ရေးရဲဘော်တွေဘက်က ဖမ်းဆီးထိန်းသိမ်းထား ရှိတယ်။ သူကလည်း စကစ ဒေါက်တိုင်ဖြစ်တဲ့အတွက် ဖမ်းတာဖြစ်တယ်။ သူအမေဆီကို အလည်လာတဲ့အချိန် သတင်းရလို့ပါ”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဒေါ်မိုးစန္ဒာဟာ စစ်ကော်မရှင်ဒေါက်တိုင်ဖြစ်တာနဲ့အညီ ပြည်သူတွေ မှတ်ပုံတင်အပါအဝင် လဝကဝန်ဆောင်မှုယူချိန်မှာ ငွေကြေးတောင်းကြမ်းတာ၊ ပြည်သူတွေနဲ့ အဆင်မပြေတာတွေလည်း ရှိတယ်လို့ ဆိုပါတယ်။

သူကိုဖမ်းဆီးထားတဲ့ အဖွဲ့နာမည်ကိုတော့ လတ်တလောဖြေဆိုဖို့ ငြင်းဆန်ထားပြီး ဖမ်းဆီးထားတဲ့အဖွဲ့ရဲ့ သက်ဆိုင်ရာတာဝန်ရှိသူတွေက စစ်ဆေးမှုတွေပြုလုပ်ပြီး အရေးယူဖို့တော့ရှိမယ်လို့ သိရပါတယ်။

ပြီးခဲ့တဲ့နှစ် နိုဝင်ဘာလ ၅ ရက်နေ့ကလည်း တောင်သာမြို့နယ်၊ ရုံးစည်ကြီးရဲစခန်းက ရဲတပ်သား စိုင်းခွန်ကျော်အပါအဝင် ဇနီးနဲ့ သားဖြစ်သူကို တော်လှန်ရေးအဖွဲ့တွေက ဖမ်းဆီးထိန်းသိမ်းခဲ့သေးတယ်လို့ သိရပါတယ်။

ဝက်လက်၊ ဇူလိုင် ၂၈၊ ၂၀၂၆

စစ်ကိုင်းတိုင်း၊ ဝက်လက်မြို့နယ်၊ ပေါက်ကန်ဘူတာကျေးရွာကို စစ်တပ်က လေကြောင်းနဲ့ ဗုံးကြဲချခဲ့တာကြောင့် သက်ကြီးအမျိုးသား ၁ ဦးသေဆုံးသွားတယ်လို့ တိုက်နယ် ၄ ပကဖ တာဝန်ရှိသူတွေထံက သိရပါတယ်။

ဇူလိုင်လ ၂၈ ရက်နေ့မနက် ၁၀ နာရီခွဲခန့်မှာ တံတားဦးလေတပ်ကနေ တက်လာတဲ့ ဂျက်ဖိုက်ဟာ ပေါက်ကန်ဘူတာကျေးရွာထဲကို ဗုံး ၂ လုံးကြဲချသွားခဲ့တာ ဖြစ်ပါတယ်။

“ဗုံးက ရွာမြောက်ဖျားတလုံး ရွာလယ်တလုံးကျတာ။ ရွာလယ်ကျတဲ့ဟာမှာ အိမ်ဘေးကျတော့ အစမှန်တာပေါ့။ ခုထိတဲ့သူတွေက အိမ်ထဲရှိနေရင်း ထိတာ” လို့ တိုက်နယ် ၄ ပကဖတာဝန်ရှိသူက ဆက်ပြောပါတယ်။

ဗုံးထိမှန်တာကြောင့် ပက်လပ်ကုလာထိုင်မှာ ထိုင်နေတဲ့ အသက် ၆၃ နှစ်အရွယ် ဦးမြင့်သန်းမှာ နေရာမှာပင် သေဆုံးသွားခဲ့ပြီး၊ အသက် ၄၃ နှစ်အရွယ် မဖြူဝင်းက ဒဏ်ရာရရှိသွားတာ ဖြစ်ပါတယ်။

ဒါ့အပြင် နေအိမ် ၃ လုံးလည်း ပျက်စီးသွားပြီး တိုက်လေယာဉ်နဲ့ ဗုံးကြဲခံရလို့ ကျေးရွာအတွင်း စိုးရိမ်သူအချို့က ထွက်ပြေးတိမ်းရှောင် သွားကြတယ်လို့ သိရပါတယ်။

ပြီးခဲ့တဲ့ ဇွန်လ ၁၆ ရက်နေ့ကလည်း ဝက်လက်မြို့နယ်၊ နတ်ကုန်းတလိုင်းရွာသစ်နဲ့ ဝက်လူးအိုင်ကျေးရွာတွေက ဒေသခံပြည်သူတွေကို စစ်တပ်က ဒရုန်းနဲ့ တိုက်ခိုက်ခဲ့လို့ ဝက်လူးအိုင်ရွာက အမျိုးသမီး ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ သိရပါတယ်။

ဆော၊ ဇူလိုင် ၂၇၊ ၂၀၂၆။

မကွေးတိုင်း၊ ဆောမြို့နယ်၊ ကြံခင်းကျေးရွာနဲ့ စစ်ကိုင်းတိုင်း၊ စစ်ကိုင်းမြို့နယ် တလိုင်းကျွန်းကျေးရွာတွေမှာ လေကြောင်းတိုက်ခိုက်ခံရလို့ ကလေးငယ်အပါအဝင် ၄ ဦးသေဆုံးခဲ့တယ်လို့ ဒေသကာကွယ်ရေးတပ်ဖွဲ့ဝင်တွေထံက သိရပါတယ်။

ဇူလိုင်လ ၂၆ ရက်နေ့ နေ့လည် ၂ နာရီခန့်မှာ ဆောမြို့ကို ဦးတည်ကာ စစ်ကြောင်းဝင်လာတဲ့ စစ်ကော်မရှင်စစ်ကြောင်းက ဆောမြို့နယ်၊ သီးကုန်းကျေးရွာအရှေ့ဘက် ကြံခင်းကျေးရွာကို ဒရုန်းနဲ့ဗုံးကြဲချခဲ့တာလို့ ဆိုပါတယ်။

“ဒရုန်းနဲ့လာတာဆိုတော့ ဗုံးက လေးလုံးကြဲသွားတာ။ ထိတဲ့သူတွေက နေ့လယ်ပိုင်းဆိုတော့ နေအိမ်နားမှာ ရှိနေချိန်ထိကြတာ။ သေတဲ့နှစ်ယောက် အိမ်နီးနားချင်းတွေ”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

အဆိုပါ ဗုံးကြဲမှုကြောင့် အသက် ၁၃ နှစ်အရွယ်နဲ့ အသက် ၄၀ ဝန်းကျင်အရွယ် အမျိုးသားတို့ နေရာမှာပင် သေဆုံးပြီး နောက်ထပ် အသက် ၅၀ ဝန်းကျင်အရွယ် အမျိုးသားမှာ ခြေထော​က်ဒဏ်ရာရသွားတယ်လို့ ဆိုပါတယ်။

အလားတူ အဲ့ဒီနေ့ည ၁၂ နာရီခန့်မှာလည်း စစ်ကိုင်းမြို့နယ်၊ တလိုင်းကျွန်းကျေးရွာထဲကို တံတားဦးလေတပ်ကနေ တက်လာတဲ့ ဂျက်ဖိုက်တာက ကျေးရွာထဲကို ဗုံးကြဲချခဲ့တယ်လို့ ဆိုပါတယ်။

“ဗုံးက စာသင်ကျောင်းထဲကျတာ။ ရဲဘော်တွေ ထိတာ မရှိဘူး။ စာသင်ကျောင်း ပတ်ဝန်းကျင်မှာနေတဲ့ လင်မယား ၂ ဦး သေတာရှိတယ်။ အဆောက်အဦးတွေလည်း ပျက်စီးတယ်”လို့ ဝက်လက်မြို့နယ်ပကဖတာဝန်ရှိသူက ပြောပါတယ်။

ဗုံးကြဲခံရမှုကြောင့် အသက် ၅၀ ကျော်အရွယ် ဒေါ်စန်းနွယ်နဲ့ သူရဲ့အမျိုးသားဖြစ်သူ ဦးရွှေဒေါင်းတို့ လင်မယား ၂ ဥဦးသေဆုံးကာ၊ ကျေးရွာစာသင်ကျောင်းနဲ့ နေအိမ်တွေအပါအဝင် အဆောက်အဦး ၅ လုံးပျက်စီးခဲ့တယ်လို့ သိရပါတယ်။

စစ်ကြောင်းထိုးတာနဲ့ လေကြောင်းဗုံးကြဲခံရမှုတွေကြောင့် ဆောမြို့နယ်ထဲက ကြံခင်းကျေးရွာနဲ့ စစ်ကိုင်းမြို့နယ်ထဲက တလိုင်းကျွန်းရွာက ပြည်သူတွေဘေးလွတ်ရာကို တိမ်းရှောင်နေကြရပါတယ်။

ပြီးခဲ့တဲ့ ဇူလိုင်လ ၁၄ ရက်နေ့ကလည်း အရာတော်မြို့နယ်၊ ကံရင်းကျေးရွာမှာ ဗုံးထိမှန်လို့ ကိုယ်ဝန်ဆောင်မိခင်အပါအဝင် ၂ ဦးသေဆုံးခဲ့တယ်လို့ သိရပါတယ်။

ညောင်ဦး၊ ဇူလိုင်လ ၂၇။

မန္တလေးတိုင်း၊ ညောင်ဦးမြို့နယ်၊ ထရိုင်းတောကျေးရွာနဲ့ တောင်ဘီမကျေးရွာတွေမှာ ၂ ရက်အတွင်း အုပ်ချုပ်ရေးမှူးအပါအဝင် ၅ ဦး ပစ်သတ်ခံရပြီး သေဆုံးတယ်လို့ သိရပါတယ်။

ပြီးခဲ့တဲ့ ဇူလိုင်လ ၂၄ ရက်နေ့ မနက် ၆ နာရီခန့်က စည်ပင်သာကျေးရွာအုပ်ချုပ်ရေးမှူးနဲ့ အဖော်တွေဟာ တောင်ဘီမကျေးရွာထဲက ကုန်စုံဆိုင်တခုရဲ့ရှေ့မှာ ထိုင်နေကြစဉ် သေနတ်သမားတွေ လာရောက်ပစ်ခတ်သွားတာဖြစ်ပါတယ်။

အလားတူ ဇူလိုင်လ ၂၅ ရက်နေ့မနက် ၇ နာရီခန့်ကလည်း ထရိုင်းတောရွာသား အသက် ၅၈ နှစ်အရွယ် ဦးဥာဏ်ပိုဟာ သူ့ရဲ့နေအိမ်မှာ ရှိနေစဉ် သေနတ်သမားတွေ လာရောက်ပစ်ခတ်သွားခဲ့တာ ဖြစ်ပါတယ်။

ထရိုင်းတောရွာက ဦးဉာဏ်ပို အသတ်ခံရတာနဲ့ပတ်သက်လို့ ဘယ်အဖွဲ့က ဘာကြောင့်လုပ်တယ်ဆိုတာ မြို့နယ်ကို သတင်းမပို့သေးသလို၊ သူ့ရဲ့နေအိမ်မှာ ကျည်ကာင်္အကျီတွေ့ကြောင်းနဲ့ ပျူစောထီးသင်တန်းတက်ရောက်ထားသူဖြစ်တယ်လို့ ပြောပါတယ်။

“(ဦးဉာဏ်ပို)သတင်း မပို့သေးတော့ ဘယ်အဖွဲ့လုပ်တယ်။ ဘာကြောင့်လုပ်တယ်။ ဆိုတာမသိရသေးဘူး။ ရွာခံတွေပြောပြချက်အရ သူကပျူသင်တန်းဆင်းတာ သူအိမ်မှာကျည်ကာအင်္ကျီတွေ့တယ်ဆိုပြီး သိရတယ်။ သေချာမစစ်ရသေးတော့ အတိအကျမပြောနိုင်သေးဘူး။ တောင်ဘီမ ကတော့ အကြမ်းဖျင်းသိထားသလောက် စည်ပင်သာရွာအုပ်ကြီးနဲ့အဖွဲ့က စကစနဲ့ပေါင်းပြီး ပျူစောထီးလုပ်နေလို့ ရှင်းခံရတာလို့ သိရတယ်”လို့ ညောင်ဦးမြို့နယ်ပကဖ တာဝန်ရှိသူတဦးက ပြောပါတယ်။

သေနတ်နဲ့ ပစ်ခတ်ခံရတာကြောင့် ထရိုင်းတောရွာခံ ဦးဉာဏ်ပိုမှာ နေရာမှာပင်သေဆုံးခဲ့သလို၊ တောင်ဘီမကျေးရွာ ပစ်ခတ်မှုဖြစ်စဥ်မှာ အသက် ၄၈ နှစ်အရွယ် စည်ပင်သာကျေးရွာ အုပ်ချုပ်ရေးမှူး ဦးကျော်လွင်ဦး၊ ဦးသက်လွင်ဦး ၃၅ နှစ်၊ ဦးကျော်ဝင်းသူ ၃၆ နှစ်နဲ့ အသက် ၄၁ နှစ်အရွယ် ဦးမင်းထွန်းတို့မှာ ကျည်ထိမှန်ဒဏ်ရာများရရှိကာ သေဆုံးသွားပါတယ်။

ဒါ့အပြင် အသက် ၄၀ ကျော်အရွယ်ဦးအောင်မျိုးသက်ဆိုသူမှာလည်း ယာပါးနဲ့ ဝဲလက်ဖျံရိုးတို့မှာ ကျည်ထိဒဏ်ရာရခဲ့လို့ ညောင်ဦးပြည်သူ့ဆေးရုံမှာ တင်ထားရတယ်လို့ သိရပါတယ်။

အဆိုပါပစ်ခတ်မှုတွေကို ဘယ်အဖွဲ့တွေက ဘာကြောင့်ပြုလုပ်ခဲ့တယ်ဆိုတာ ဇူလိုင်လ ၂၇ ရက်နေ့အထိ သက်ဆိုင်ရာအဖွဲ့တွေဘက်က သတင်းထုတ်ပြန်တာမရှိသေးပါဘူး။

ပြီးခဲ့တဲ့နိုဝင်ဘာလ ၂၈ ရက်နေ့ကလည်း ညောင်ဦးမြို့နယ်၊ ရွာသစ်ကုန်းကျေးရွာထိပ်မှာ သစ်ထောင့်ကျေးရွာအုပ်ချုပ်ရေးမှူး ဦးမောင်သန်းဆိုသူ ပစ်သတ်ခံရပြီး သေဆုံးသွားမှုဖြစ်ပွါးခဲ့တယ်လို့ သိရပါတယ်။

ဆော၊ ဇူလိုင် ၂၅၊ ၂၀၂၆။

မကွေးတိုင်း၊ ဆောမြို့နယ်၊ ဆောမြို့နဲ့လောင်းရှည်မြို့အကြားရှိ PDF ယာယီစခန်းကို ဝင်သိမ်းတဲ့စစ်ကောင်စီအဖွဲ့ကို ဒေသကာကွယ်ရေးတပ်ဖွဲ့ဝင်တွေကတိုက်ခိုက်ရာ လက်နက်အချို့သိမ်းဆည်းရမိထားတယ်လို့ ဖြစ်စဥ်ကိုသိရှိတဲ့ ဒေသခံကာကွယ်ရေးတပ်ဖွဲ့ဝင်တဦးက ပြောပါတယ်။

ဇူလိုင် ၂၄ ရက်နေ့လယ် ၁၂ နာရီခန့်မှာ လောင်းရှည်မြို့ကနေထွက်လာတဲ့ အင်အား ၂၀၀ ပါ စစ်ကြောင်းဟာ လောင်းရှည်နဲ့ဆောမြို့အစပ်က ဂန့်ဂေါခရိုင်တပ်ရင်း ၆ ရဲ့စခန်းနေရာကို ဝင်ရောက်စီးနင်းပြီးနောက် ပြန်ထွက်လာချိန်မှာတိုက်ခိုက်ခံရတာလို့ဆိုပါတယ်။

“စခန်းဟောင်းကို ဟပေးလိုက်တာ။ တပ်ရင်း ၆ ကစခန်းကုန်းကို ဟပေးပြီးမှဝင်တိုက်တာ။ အာပီဂျီတွေကော G3 တွေကော၊ MA 3 တွေနဲ့ ၆၀ သီး၊ ၈၀ သီးတွေလည်းတော်တော်ရလိုက်တယ်”လို့ ဖြစ်စဥ်ကိုသိတဲ့ ကာကွယ်ရေးတပ်ဖွဲ့ဝင်က ပြောပါတယ်။

အဆိုပါ တိုက်ပွဲအတွင်းစစ်ကောင်စီဘက်က ထိခိုက်သေဆုံးသူတွေရှိသလို လက်နက်တွေလည်း သိမ်းဆည်းရမိကာ အသေးစိတ်ကိုတော့သက်ဆိုင်ရာတပ်ရင်းတွေက သတင်းထုတ်ပြန်ပေးမယ်လို့ အထက်ပါကာကွယ်ရေးတပ်ဖွဲ့ဝင်က ပြောပါတယ်။

စစ်ကောင်စီထောက်ခံ တယ်လီဂရမ်တွေမှာတော့ ဆောမြို့နယ်အတွင်းက PDF စခန်းတခုကို သိမ်းပိုက်ရရှိတယ်လို့ဖော်ပြထားကာ ဓာတ်ပုံတွေထဲမှာတော့ လက်လုပ်သေနတ်အဟောင်းအချို့နဲ့ လူနေတဲအချို့ကိုတွေ့ရပြီး စခန်းကတော့ တပ်ရင်း ၆ ရဲ့ယာယီစခန်းဖြစ်တယ်လို့ အထက်ပါကာကွယ်ရေးတပ်ဖွဲ့ဝင်က အတည်ပြုပါတယ်။

စစ်ကောင်စီတပ်တွေဝင်ရောက်ခဲ့တဲ့စခန်းဟာ ကာကွယ်ရေးတပ်တွေဖွဲ့ဝင်တွေ အတည်တကျမနေထိုင်တဲ့ ယာယီစခန်းတခုဖြစ်ပြီး ဝင်ရောက်ချိန်မှာလည်း တပ်ဖွဲ့ဝင်တွေမရှိဘူးလို့ သိရပါတယ်။

တိုက်ပွဲဖြစ်ပြီးနောင် အဆိုပါစစ်ကြောင်းဟာ ဆောမြို့ထိမရောက်သေးဘဲ ဇူလိုင် ၂၅ ရက်အထိ တိုက်ပွဲဖြစ်တဲ့ဧရိယာဝန်းကျင်အတွင်းမှာသာ ရှိနေသေးတယ်လို့ ဆိုပါတယ်။

အဆိုပါ တိုက်ပွဲဖြစ်ခဲ့တဲ့စစ်ကြောင်းဟာ ဇူလိုင် ၁၁ ရက်ကစတင်ကာ ပွင့်ဖြူကနေအင်အား ၄၀၀ ကျော်နဲ့ လောင်းရှည်မြို့ကို ဦးတည်ထွက်ခွာလာတဲ့စစ်ကြောင်းဖြစ်ပြီး လောင်းရှည်ကနေ ဆောမြို့၊ အဲဒီကမှတဆင့် ကန်ပက်လက်အထိ စစ်ကြောင်းထိုးဖို့စီစဥ်နေတာလို့သိရကြောင်း အထက်ပါတပ်ဖွဲ့ဝင်က ပြောပါတယ်။

စလင်း၊ ဇူလိုင် ၂၄၊ ၂၀၂၆။

မကွေးတိုင်း၊ စလင်းမြို့နယ်၊ မန်ကျီးပင်ပုကျေးရွာမှာ မိုင်းထိလို့ တောင်သူတဦး ခြေထောက်ပြတ်ခဲ့တယ်လို့ ကူညီဆောင်ရွက်ပေးခဲ့သူတွေထံက သိရပါတယ်။

မိုင်းထိသူဟာ အဆိုပါကျေးရွာနေ အသက် ၃၅ နှစ်အရွယ် ဦးရဲမြင့်ဆိုသူဖြစ်ပြီး ဇူလိူင်လ ၂၃ ရက်နေ့မနက် ၁၁ နာရီကျော်ခန့်မှာ နေအိမ်ကနေ လယ်ကွင်းထဲအသွား ရွာအပြင်လယ်ကွင်းနားမှာ မိုင်းထိခဲ့တာလို့ ဆိုပါတယ်။

“အဲဘက်တွေမှာက နီးစပ်တဲ့နေရာတွေမှာ မိုင်းတွေထောင်ထားတာ ရှိတယ်။ မသွားခိုင်းတဲ့နေရာတွေ ရှိတယ်။ သူကတောင်သူ သွားလာရင်း ထိတာ။ ခြေထောက်တော့ ပြတ်သွားတယ်”လို့ ကူညီဆောင်ရွက်ပေးခဲ့သူတဦးက ပြောပါတယ်။

မိုင်းထိတာကြောင့် ဦးရဲမြင့်မှာ မျက်နှာ၊ လက်နှစ်ဖက်နဲ့ ဘယ်ဘက်ခြေထောက်တို့မှာ ထိခိုက်ဒဏ်ရာရပြီး ခြေကျင်းဝတ်နဲ့ ခြေသလုံးသားတွေမှာ ကြေမွသွားတယ်လို့ ဆိုပါတယ်။

မိုင်းထိလူနာကိုတော့ ဒေသခံတွေက စလင်းကနေတဆင့် မကွေးပြည်သူ့ဆေးရုံကို ပို့ဆောင်လိုက်ပြီး ဘယ်ဘက်ခြေထောက် ဖြတ်လိုက်ရတယ်လို့ သိရပါတယ်။

အဆိုပါအမျိုးသားထိခဲ့တဲ့ မိုင်းကိုတော့ ဘယ်အဖွဲ့တွေက ထောင်ထားတဲ့မိုင်းဆိုတာ အတည်မပြုနိုင်သေးဘူးလို့ ဆိုပါတယ်။

ဖေဖော်ဝါရီလ ၂၆ ရက်နေ့ကလည်း စလင်းမြို့နယ်၊ မြောင်းဘောင်ကျေးရွာအနီး တောစပ်မှာမိုင်းထိလို့ လင်မယား ၂ ဦးဒဏ်ရာရခဲ့တယ်လို့ သိရပါတယ်။

မြိုင်၊ ဇူလိုင် ၂၂၊ ၂၀၂၆။

မကွေးတိုင်း၊ မြိုင်မြို့နယ်၊ ဝက်ဖိုးကျေးရွာမှာ စစ်ကြောင်းထိုးနေတဲ့စစ်ကောင်စီတပ်ကရမ်းပစ်လိုက်တဲ့ လက်နက်ကြီးမှန်လို့ လင်မယား ၂ ဦးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဇူလိုင်လ ၂၂ ရက်နေ့မနက် ၇ နာရီခန့်က သင်းမကျေးရွာကိုရောက်နေတဲ့ စစ်ကောသ်စီစစ်ကြောင်းက ဝက်ဖိုးရွာဘက်ကို လက်နက်ကြီး ၃ လုံးထက်မနည်းပစ်ခတ်ခဲ့ရာမှာ လူနေအိမ်ပေါ်ကို ကျရောက်ပေါက်ကွဲခဲ့လို့ လင်မယား ၂ ဦး သေဆုံးရတာလို့ ပြောပါတယ်။

“ဒီမနက် သင်းမရွာကို မီးရှို့ပြီး အဲဒီကနေ ကျေးရွာတွေကို လက်နက်ကြီးတွေနဲ့လှမ်းပစ်တာ။ ဝက်ဖိုးရွာထဲကျတဲ့ လက်နက်ကြီးက နေအိမ်ဝင်းထဲကျပြီး အစမှန်ပြီး နေရာမှာတင် သေတာ”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

လက်နက်ကြီးထိမှန်တာကြောင့် အသက် ၄၀ ကျော်အရွယ် လင်မယား ၂ ဦးနေရာမှာတင် သေဆုံးပြီးနေအိမ်လည်းပျက်စီးသွားပါတယ်။

အဲဒီ့စစ်ကြောင်းဟာ ဇူလိုင်လ ၂၁ ရက်နေ့ညနေပိုင်းကတည်းက သင်းမရွာကိုရောက်ပြီးနောက် နေအိမ်တွေကို မီးရှိုခဲ့သလို ဒီကနေ့မနက်ပိုင်းမှာလည်း ကျေးရွာထဲက နေအိမ်တွေကို ထပ်မံမီးရှို့ခဲ့တာကြောင့် နေအိမ် ၂၀ လုံးထက်မနည်းပျက်စီးကာ အသေးစိတ်အချက်အလက်တွေတော့ နယ်မြေရှင်းလင်းရေး မလုပ်နိုင်သေးတာကြောင့် မသိရသေးဘူးလို့ဆိုပါတယ်။

အဆိုပါစစ်ကြောင်းဟာ ဇူလိုင်လ ၁၃ ရက်နေ့ကတည်းက ​ပေါက်နယ်ကနေတဆင့် မြိုင်နယ်ထဲကို စစ်ကြောင်းထိုးဝင်ရောက်လာတာဖြစ်ပြီး စစ်ကြောင်းထိုးလာတဲ့ လမ်းကြောင်းတလျှောက်ရှိ ကန်နက်၊ မြင်းကိုသစ်၊ ကိုင်းတောမ၊ ဝါးရင်းချိုင့်၊ ကွန်လပ်၊ ဘောတုံ၊ သံချောင်းရွာတွေက ပြည်သူ ၁၃ ဦးသတ်ဖြတ်ခဲ့တယ်လို့ အညာမြေအရပ်ဖက်လူမှုအဖွဲ့အစည်းရဲ့ထုတ်ပြန်ထားချက်အရ သိရပါတယ်။

စဉ့်ကူး၊ ဇူလိုင် ၂၂၊ ၂၀၂၆။

မန္တလေးတိုင်း၊ စဉ့်ကူးမြို့နယ်၊ ကြက်တူရွေးကျေးရွာမှာ စစ်ရှောင်နေရာမှ နေအိမ်ပြန်လာတဲ့ လင်မယား ဒရုန်းဗုံးထိမှန်လို့ မိန်းမဖြစ်သူသေဆုံးသွားတယ်လို့ စဉ့်ကူးမြို့နယ်ပကဖ တာဝန်ရှိသူတွေထံက သိရပါတယ်။

ဇူလိုင်လ ၂၁ ရက်နေ့ညနေ ၆ နာရီ မိနစ် ၃၀ ခန့်မှာ ကျွန်းကြီးရွာ ဘုန်းကြီးကျောင်းအတွင်း တပ်စွဲထားတဲ့ စစ်ကော်မရှင်တပ်သားတွေက ကြက်တူရွေးရွာဘက်ကို ဒရုန်းနဲ့ ၃ ကြိမ် ဗုံးသီးကြဲတိုက်ခိုက်ခဲ့တာလို့ ဆိုပါတယ်။

သူတို့က တောင်သူနဲ့ တံငါလည်းလု​ပ်တယ်။ ရေတက်တော့ လိုအပ်တဲ့ပစ္စည်းလေးယူရင်း နေအိမ်ပြန်နေ နေတာမှာ ထိတာ။ နေအိမ်ပေါ် တည့်တည့်ကျတာ။ ထိတာက လင်မယားနှစ်ယောက်ပါ။ သူတို့ကစစ်ရှောင်ရင်း မြစ်ရေတက်တော့ အိမ်မှာလာပြန်နေတာ”လို့ စဉ့်ကူးမြို့နယ်ပကဖ သတင်းတာဝန်ခံ ကိုသံမဏိက ပြောပါတယ်။

ဒရုန်းဗုံးထိမှန်လို့ အသက် ၅၀ ကျော်အရွယ် ဒေါ်ဝင်းဌေးမှာ ဝမ်းဗိုက် ဗုံးစမှန်ပြီး ဆေးကုသနေစဥ် သေဆုံးသွားကာ အမျိုးသားဖြစ်သူ ဦးမျိုးမင်းဦးမှာတော့ ဦးခေါင်းထိမှန် ဒဏ်ရာရသွားသလို သူတို့နေအိမ်လည်း ပျက်စီးသွားတယ်လို့ သိရပါတယ်။

အဆိုပါ ကြက်တူရွေးကျေးရွာရှိ ပြည်သူတွေဟာ ဇန်နဝါရီလလောက်ကတည်းက စစ်ကြောင်းထိုးတာနဲ့ တိုက်ပွဲတွေကြောင့် ကျေးရွာကနေ ရွာလုံးကျွတ်တိမ်းရှောင်နေကြရပြီး နီးစပ်ရာကျေးရွာတွေမှာ နေထိုင်နေကြရကာ စစ်ရေးအခြေနေကောင်းမွန်ချိန် ရွာခံတွေက လိုအပ်တဲ့ပစ္စည်းတွေ နေအိမ်ပြန်ယူလိုက်၊ ကျေးရွာထဲရက်အနည်းငယ်နေထိုင်လိုက် လုပ်နေကြရတာလို့ သိရပါတယ်။

ယခုလို စစ်ကော်မရှင်ဘက်က ဒရုန်းနဲ့ဗုံးကြဲခံရလို့ ကျေးရွာထဲပြန်နေထိုင်နေတဲ့ပြည်သူအချို့ ဘေးလွတ်ရာကို ထပ်မံတိမ်းရှောင်ကြရတယ်လို့ သိရပါတယ်။

ဇူလိုင်လ ၉ ရက်နေ့ကလည်း စဉ့်ကူးမြို့နယ်၊ ရွာတော်ရွာမှာ စစ်တပ်ပစ်တဲ့လက်နက်ကြီးထိမှန်လို့ ပြည်သူ ၅ ဦးဒဏ်ရာရတယ် သိရပါတယ်။