သတင်း

ဝက်လက်၊ ဇူလိုင် ၃၁၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်နဲ့ ခင်ဦးမြို့နယ်တွေမှာ စစ်ကောင်စီတပ်ရဲ့ လေကြောင်းကနေ တိုက်ခိုက်ခံခဲ့လို့ ပြည်သူ ၁ ဦးသေ ၂ ဦးဒဏ်ရာရသွားတယ်လို့ သက်ဆိုင်ရာမြို့နယ် ပကဖတာဝန်ရှိသူတွေထံက သိရပါတယ်။

ဇူလိုင်လ ၃၀ ရက်နေ့ နေ့လည် ၂ နာရီကျော်ခန့်က တံတားဦးကနေ တက်လာတဲ့ ဂျက်ဖိုက်တာဟာ ခင်ဦးမြို့နယ်၊ ထနောင်းကုန်းကျေးရွာအနောက်ဘက် လယ်ကွင်းထဲကို ဗုံး ၃ လုံးကြဲချခဲ့တယ်လို့ ဆိုပါတယ်။

“နွားကျောင်းတဲ့ အမျိုးသားက နွားလှန်ပြီး စောင့်နေချိန် မှန်သွားတာ။ အမျိုးသမီးတယောက်လည်း ထိသေးတယ်။ သူက လမ်းသွားရင်း ထိတာ။ ဗုံးလာကြဲတာက ရှောင်ရ၊ ဝပ်ရမယ်ဆိုတာ မလုပ်လိုက်မိလို့ ထိမှန်ကုန်တာ”လို့ ခင်ဦးမြို့နယ် ပကဖတာဝန်ခံက ပြောပါတယ်။

ဗုံးထိမှန်တာကြောင့် အသက် ၅၀ ကျော်အရွယ် ဦးမောင်မောင်ဆိုသူ နေရာမှာပင်သေဆုံးပြီး၊ အသက် ၆၀ ကျော်အရွယ် အမျိူးသမီးတဦးလည်း ဒဏ်ရာရကာ နွားနှစ်ကောင်လည်း သေပြီး၊ နေအိမ် ၂ လုံးလည်း ပျက်စီးခဲ့ပါတယ်။

အလားတူ အဆိုပါည ၉ နာရီကျော်ခန့်မှာ ဝက်လက်မြို့နယ်၊ ငါးပတ်ချောင်းကျေးရွာကို တံတားဦးလေတပ်ကနေ တက်လာတဲ့ ဂျက်ဖိုက်တာ ၂ စီးဟာ ကျေးရွာထဲကို လေကြောင်းတိုက်ခိုက်မှုပြုလုပ်ခဲ့တယ်လို့ ဆိုပါတယ်။

“ကြဲတာက ရွာထဲကို ကြဲချတာ။ ဗုံးက ၄ လုံး ကြဲသွားတာ။ ဆူဆိုက်နဲ့က သုံးကြိမ် ချသွားသေးတယ်။ တိုက်ပွဲတွေရှိလို့ ကြဲတာမဟုတ်ဘူး။ ဒီအတိုင်းလာကြဲသွားတာ”လို့ ဝက်လက်မြို့နယ် ပကဖ ပြန်ကြားရေးတာဝန်ရှိသူက ပြောပါတယ်။

လေကြောင်းတိုက်ခိုက်မှုအတွင်း အသက် ၇၆ နှစ်အရွယ် ဦးသန်းလွင်မှာ ဦးခေါင်းထိခိုက်ဒဏ်ရာရခဲ့ပြီး နေအိမ် ၃ လုံးထက်မနည်းလည်း ပျက်စီးခဲ့တယ်လို့ ဆိုပါတယ်။

အဆိုပါ လေကြောင်းတိုက်ခိုက်ခံရပြီးနောက် ဒေသခံတွေက ကျေးရွာတွေကနေ ထွက်ပြေးတိမ်းရှောင်ကြတာမျိုးမရှိပဲ ဗုံးခိုကျင်းတွေမှာသာ ပုန်းခိုနေနေရတယ်လို့ သိရပါတယ်။

ပြီးခဲ့တဲ့ ဇူလိုင်လ ၂၈ ရက်နေ့ကလည်း ဝက်လက်မြို့နယ်၊ ပေါက်ကန်ဘူတာကျေးရွာကို စစ်တပ်က လေကြောင်းကနေ ကြဲချတဲ့ ဗုံးသီးထိမှန်လို့ သက်ကြီးအမျိုးသား ၁ ဦးသေဆုံးသွားတယ်လို့ သိရပါတယ်။

မြေလတ်အသံ၊ ဇူလိုင် ၃၀၊ ၂၀၂၆။

စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်းစစ်ဌာနချုပ်ကို ဘက်ပြောင်းခိုလှုံသွားတဲ့ တက်ကြွလှုပ်ရှားသူ အမျိုးသမီးတဦးက ယင်းမာပင်မြို့နယ်ထဲက တပ်ဖွဲ့ဝင်ရဲဘော်တချို့ကို စစ်တပ်စိုးမိုးနယ်မြေတွေထဲ လှည်းဖြားခေါ်ဆောင်မှုတွေ ပြုလုပ်နေတယ်လို့ ကိုယ်တိုင်ကြုံတွေ့ခဲ့ရသူတွေဆီက သိရပါတယ်။

ဘက်ပြောင်းခိုလှုံသွားသူ အမျိုးသမီးမှာ မိချယ် (ခေါ်) ချယ်ချယ် ဆိုသူဟာ အာဏာသိမ်းစက မုံရွာ၊ ချောင်းဦး၊ ယင်းမာပင်၊ ဆားလင်းကြီးနဲ့ ကနီ စတဲ့ ဒေသတွေက ဆန္ဒပြပွဲတွေမှာ ကိုယ်တိုင်ပါဝင်ခဲ့သူဖြစ်ပြီး တော်လှန်ရေးတပ်စခန်းတချို့နဲ့ ရင်းနှီးသူလည်း ဖြစ်တယ်လို့ သူနဲ့ရင်းနှီးတဲ့ ဆက်ဆံရေးရှိသူတဦးက ဆိုပါတယ်။

ဇူလိုင်လ ၂၇ ရက်နဲ့ ၂၈ ရက်နေ့တွေမှာ အဆိုပါ ဘက်ပြောင်းခိုလှုံသူ အမျိုးသမီးက ယင်းမာပင်မြို့နယ်အခြေစိုက် တော်လှန်ရေးရဲဘော် ၂ ဦးကို အလုံတပ်မြို့၊ မုံရွာမြို့နဲ့ အောင်ဇေယျစစ်မှုထမ်းဟောင်းကုန်းတို့ဆီကိုလာရန် ဖုန်းဆက်ကာ လှည့်ဖြားခေါ်ဆောင်ခဲ့တာလို့ ဆိုပါတယ်။

“သူက အဲဒီဖက်ရောက်သွားတာကိုတော့ သိရတယ်။ အဖမ်းခံရတာလား၊ ဘက်ပြောင်းတာလားတော့ မသိဘူး။ သေနတ်ဝယ်မယ်ပြောပြီး အလုံက စွယ်တော်ဦးစားသောက်ဆိုင်ကို လာပေးဖို့ခေါ်တာ။ မလာရဲဘူးပြောတော့ အောင်ဇေယျကုန်းကို ခေါ်တာ။ နောက်တော့ သူဘက်ပြောင်းသွားတဲ့အကြောင်း မက်ဆေ့(Messages) တွေကျလာတယ်။” လို့ လှည့်ဖြားအခေါ်ခံရသူ ရဲဘော်တဦးက ပြောပါတယ်။

နောက်ထပ် တော်လှန်ရေး ရဲဘော်တဦးကိုလည်း မုံရွာမြို့ထဲမှာ ရိက္ခာလာယူဖို့ ပြောပြီး ခေါ်ဆောင်ကာ ချိန်းဆိုထားတဲ့နေရာအရောက်မှာ စစ်ကားတွေ အချိန်ကိုက် ရောက်လာတယ်လို့ ဆိုပါတယ်။

“ငါ့မောင်လေး ဘယ်မှာတုန်းပေါ့၊ ဒီစခန်းအတွက် ရိက္ခာလေး လှူချင်လို့၊ တန်းချင်လို့ ဆိုတဲ့ပုံစံမျိုးနဲ့ ဆက်သွယ်လာတယ်။ ဘယ်နားလေး လောက်ပေါ့၊ မြို့ထဲမှာ နင့်လူတွေရှိလား။ ဒါမှမဟုတ် ထောက်ပို့ရဲဘော်တွေရှိလား။ သူတို့ကို လာယူခိုင်းလိုက်ပေါ့။ သူက အဲ့လိုချိန်းတာဗျ။” လို့ ရဲဘော်တဦးက ပြောပါတယ်။

သူမဟာ စစ်ကိုင်းတိုင်းအတွင်းက တော်လှန်ရေးနယ်မြေအသီးသီးမှာ နှစ်ရှည်လှည့်လည်နေထိုင်ခဲ့သူဖြစ်ကာ၊ ဖိုလ်ဝင်တောင်အနီးတဝိုက်မှာ ၁ နှစ်ကျော်နေထိုင်သွားခဲ့တာဖြစ်ပြီး၊ လက်နက်ကိုင်ထားတဲ့ ဓာတ်ပုံတွေနဲ့ မကြာခဏ ဆိုရှယ်မီဒီယာမှာ ထုတ်ပြလေ့ရှိသူဖြစ်ပြီး၊ ဇူလိုင်လထဲမှာပဲ နမခဘက်ကို ဘက်ပြောင်းသွားတာဖြစ်တယ်လို့ သိရပါတယ်။

ဓာတ်ပုံ – PDF တွေနဲ့ အချိန်ကြာမြင့်စွာ နေထိုင်ခဲ့သူအမျိုးသမီး စစ်တပ်နဲ့ပေါင်းသွားသူ မိချယ် (ခ) ချယ်ချယ်

■ အုပ်ချုပ်ရေးအဖွဲ့ဝင်တွေရဲ့ ဆွေမျိုးတွေကို ချန်လှပ်ထားလို့ ဒေသခံတွေ မကျေနပ်

ပန်းတောင်း၊ ဇူလိုင် ၃၀၊ ၂၀၂၆။

ပဲခူးတိုင်းအနောက်ခြမ်း၊ ပြည်ခရိုင်၊ ပန်းတောင်းမြို့နယ်မှာ စစ်ကောင်စီလက်အောက်ခံ အုပ်ချုပ်ရေးအဖွဲ့ဝင်တွေက ပြည်သူတွေဆီက စစ်မှုထမ်းကြေးပေးထားသော်လည်း ပြည်ပရောက်နေသူတွေကို ပြန်ခေါ်ခိုင်းသလို သတ်မှတ်ထားတဲ့ အသက်ကျော်လွန်သူတွေကိုပါ စစ်မှုထမ်းရန် စာရင်းကောက်ယူနေပြီး၊ အုပ်ချုပ်ရေးပိုင်းက ဆွေမျိုးတွေကို စာရင်းထဲမပါတဲ့အတွက် ဒေသခံတွေက ကျေနပ်မှုမရှိဘူးလို့ သိရပါတယ်။

ပန်းတောင်းမြို့နယ်၊ တုံကင်းအုပ်စုမှာ အခုလ တတိယပတ်က ရပ်ကျေးအုပ်ချုပ်ရေး အဖွဲ့ဝင်တွေ၊ ရဲ၊ လဝကနဲ့ စစ်သားတွေက လိုက်လံစာရင်း ကောက်ခံခဲ့တာဖြစ်တယ်လို့ ဒေသခံတဦးက ပြောပါတယ်။

“စစ်မှုမထမ်းကြေး သိန်း ၁၀၀ ပေးလိုက်ရတာ ဆယ်ရက်ကျော်ပဲ ရှိသေးတယ်။ စစ်မှုထမ်းစာရင်း လိုက်ကောက်နေတာမှာ အသက် ၃၇ နှစ်အရွယ်တွေလည်း စာရင်းပါတယ်။ နိုင်ငံခြားသွားသူတွေလည်း ပြန်ခေါ်ပေးဖို့ အုပ်ချုပ်ရေးပိုင်းက ပြောတယ်။ အိမ်တွေကိုလည်း ဓါတ်ပုံရိုက်တယ်။ ကျန်ခဲ့တဲ့မိဘတွေနဲ့ ဇနီးမယားတွေကိုလည်း လက်မှတ်တွေ ထိုးခိုင်းတယ်” လို့ ဒေသခံတဦးက ပြောပါတယ်။

သတ်မှတ်ထားတဲ့ အသက်ကျော်လွန်သူတွေကိုပါ စစ်မှုထမ်းစာရင်းထပ်မံကောက်ယူပေမယ့် အုပ်ချုပ်ရေးအဖွဲ့ဝင်တွေရဲ့ တူနဲ့ သားတွေကိုတော့ ချန်လှပ်ထားတဲ့အတွက် စာရင်းကောက်ယူသူတွေနဲ့ ဒေသခံတွေ စကားများ ရန်ဖြစ်တာတွေလည်း ရှိတယ်လို့ သူက ဆက်ပြောပါတယ်။

တုံကင်းအုပ်စုဟာ စစ်မှုထမ်းစတင်စုဆောင်းချိန်ကစလို့ လစဥ်ဆိုသလို စစ်မှုထမ်းကြေး စုဆောင်းပေးခဲ့သော်လည်း ပြီးခဲ့တဲ့တလကျော်က စစ်မှုကြေးမပေးတဲ့အတွက် အဲဒီအုပ်စု ရွာထောင်ရွာက လူငယ်တဦးကို စစ်အုပ်စုက လာဖမ်းသွားတဲ့အတွက် ကျပ် သိန်း ၁၃၀ နဲ့ ပြန်ရွေးခဲ့ရတယ်လို့ ဆိုပါတယ်။

“ပန်းတောင်းမှာ စစ်မှုထမ်းဖမ်းနေတာက တော်တော်ကြမ်းတော့ တိမ်းရှောင်တဲ့လူငယ်တွေလည်းများတယ် လူငယ်ယောင်္ကျားလေးတွေ မြို့မှာ သိပ်မတွေ့ရတော့ဘူး၊ ရေသန့်လည်ပို့တာတောင် အမျိုးသမီးတွေဖြစ်နေပြီ။ စစ်မှုထမ်းအတွက်ဆိုပြီး သန်းခေါင်စာရင်းနဲ့ လိုက်နေတယ်” လို့ ဥသျှစ်ပင်မြို့ခံတဦးက ပြောပါတယ်။

စစ်အုပ်စုဟာ ပြည့်သူ့စစ်မှုထမ်းဥပဒေကို ၂၀၂၄ ခုနှစ် ဖေဖေါ်ဝါရီ ၁၀ ရက်က စတင်အသက်သွင်းကာ သတ်မှတ်ထားတဲ့ အသက်အရွယ်တွေမှာ အမျိုးသားဖြစ်ပါက အသက် ၁၈ နှစ်ကနေ ၃၅ နှစ်အတွင်းဖြစ်ပြီး၊ အမျိုးသမီးဖြစ်ပါက ၁၈ နှစ် ၂၇ အတွင်းရှိ လူငယ်တွေကို စစ်မှုထမ်းစေခဲ့တာဖြစ်ပါတယ်။

အဲဒီနောက် လူငယ်တွေကို နည်းလမ်းမျိုးစုံနဲ့ ဖမ်းဆီးခေါ်ဆောင်ကာ ၂၀၂၄ နှစ် ဧပြီလမှစပြီး တပတ်လျှင် သင်တန်းသား ၅,၀၀၀ ဦးနဲ့ စစ်သင်တန်းပေးလျှက်ရှိရာ အခုအခါ သင်တန်းအမှတ်စဥ် ၂၆ ကို ရောက်ရှိပြီဖြစ်ပါတယ်။

တောင်သာ၊ ဇူလိုင် ၂၉၊ ၂၀၂၆။

မန္တလေးတိုင်း၊ တောင်သာမြို့နယ်၊ သီးကုန်းကျေးရွာမှာ တောင်သာမြို့နယ် လူဝင်မှုကြီးကြပ်ရေး ဦးစီးမှူးကို တော်လှန်ရေးအဖွဲ့တွေက ဖမ်းဆီးထိန်းသိမ်းသွားခဲ့တာလို့ မြေပြင်အခြေနေသိရှိတဲ့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဖမ်းဆီးခံရသူက မြို့နယ်လဝက ဦးစီးမှူး အသက် ၄၇ နှစ်အရွယ် ဒေါ်မိုးစန္ဒာဆိုသူဖြစ်ပြီး ဇူလိုင်လ ၂၇ ရက်နေ့ မနက်ပိုင်းမှာ သီးကုန်းကျေးရွာက သူ့မိဘနေအိမ်မှာရှိနေချိန် ဝင်ရောက်ဖမ်းဆီးသွားတာလို့ ဆိုပါတယ်။

“ဖမ်းတာက တော်လှန်ရေးရဲဘော်တွေဘက်က ဖမ်းဆီးထိန်းသိမ်းထား ရှိတယ်။ သူကလည်း စကစ ဒေါက်တိုင်ဖြစ်တဲ့အတွက် ဖမ်းတာဖြစ်တယ်။ သူအမေဆီကို အလည်လာတဲ့အချိန် သတင်းရလို့ပါ”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဒေါ်မိုးစန္ဒာဟာ စစ်ကော်မရှင်ဒေါက်တိုင်ဖြစ်တာနဲ့အညီ ပြည်သူတွေ မှတ်ပုံတင်အပါအဝင် လဝကဝန်ဆောင်မှုယူချိန်မှာ ငွေကြေးတောင်းကြမ်းတာ၊ ပြည်သူတွေနဲ့ အဆင်မပြေတာတွေလည်း ရှိတယ်လို့ ဆိုပါတယ်။

သူကိုဖမ်းဆီးထားတဲ့ အဖွဲ့နာမည်ကိုတော့ လတ်တလောဖြေဆိုဖို့ ငြင်းဆန်ထားပြီး ဖမ်းဆီးထားတဲ့အဖွဲ့ရဲ့ သက်ဆိုင်ရာတာဝန်ရှိသူတွေက စစ်ဆေးမှုတွေပြုလုပ်ပြီး အရေးယူဖို့တော့ရှိမယ်လို့ သိရပါတယ်။

ပြီးခဲ့တဲ့နှစ် နိုဝင်ဘာလ ၅ ရက်နေ့ကလည်း တောင်သာမြို့နယ်၊ ရုံးစည်ကြီးရဲစခန်းက ရဲတပ်သား စိုင်းခွန်ကျော်အပါအဝင် ဇနီးနဲ့ သားဖြစ်သူကို တော်လှန်ရေးအဖွဲ့တွေက ဖမ်းဆီးထိန်းသိမ်းခဲ့သေးတယ်လို့ သိရပါတယ်။