လူသတ်မှု

မြေလတ်အသံ၊ ဧပြီ ၃၊ ၂၀၂၆။

ထိုင်းနိုင်ငံ၊ ဘန်ကောက်မြို့၊ မင်ဘူရီခရိုင်မှာ အသက် ၇ နှစ်အရွယ် သမီးဖြစ်သူကို သတ်ဖြတ်ထွက်ပြေးခဲ့တဲ့ မြန်မာအမျိုးသမီး ၁ ဦး ကော့လန်းကျွန်းကို ထွက်ပြေးတိမ်းရှောင်စဉ် ဖမ်းဆီးရရှိခဲ့တယ်လို့ ထိုင်းဒေသတွင်းသတင်းတွေမှာ ဖော်ပြပါတယ်။

ပြီးခဲ့သည့် ဧပြီ ၁ ရက်က ဘန်ကောက်မြို့၊ မင်ဘူရီခရိုင်၊ ရမ်ခမ်းဟမ်း လမ်းသွယ် ၁၉၀ ရှိ နေအိမ် ၁ လုံးမှာ အသက် ၃၄ နှစ်အရွယ် မြန်မာနိုင်ငံသား မမျိုး (ခ) မမျိုးပပထွန်း က သူ့ရဲ့ အသက် ၇ နှစ်အရွယ် သမီးအရင်းကို လည်ပင်းညှစ်သတ်ခဲ့တာလို့ ဆိုပါတယ်။

ယမန်နေ့ ဧပြီ ၂ ရက် မွန်းလွဲပိုင်းမှာ စုံစမ်းစစ်ဆေးရေးရဲတပ်ဖွဲ့နဲ့ ပတ္တရားခရီးသွားရဲတပ်ဖွဲ့တို့ ပူးပေါင်းပြီး ချွန်ဘူရီခရိုင်၊ ဘန်လမွန်ရှိ ကော့လန်းကျွန်းပေါ်က ဟိုတယ်အခန်း ၁ ခုမှာ မမျိုးပပထွန်း ကို ဖမ်းဆီးနိုင်ခဲ့တယ်လို့ သိရပါတယ်။

ကိုယ်ရေးကိုယ်တာ ပြသနာတွေနဲ့ စိတ်ဖိစီးမှုတွေကြောင့် ကိုယ့်ကိုယ်ကိုယ် အဆုံးစီရင်ဖို့ ဆုံးဖြတ်ခဲ့ကာ ဧပြီ ၁ ရက် နေ့လယ် ၂ နာရီခန့်မှာ သမီးဖြစ်သူကို လည်ပင်းညှစ်သတ်ခဲ့ပြီးနောက် နောင်တရ စိတ်ပြောင်းကာ ကော့လန်းကျွန်းကို ထွက်ပြေးခဲ့တာဖြစ်ကြောင်း မမျိုးပပထွန်းက စကားပြန်ကနေတဆင့် ထွက်ဆိုချက်ပေးခဲ့တယ်လို့ ဆိုပါတယ်။

ရဲတပ်ဖွဲ့ရဲ့ ထုတ်ပြန်ချက်အရ တရားခံက ပြစ်မှုအားလုံးကိုဝန်ခံထားပြီး သူ့မှာ စိတ်ကျရောဂါ (Depression) ခံစားနေရကာ လူနေမှုဘဝအခက်အခဲတွေ အမြဲကြုံတွေ့နေရသူဖြစ်တယ်လို့ပြောကြားခဲ့ပြီး မမျိုးပပထွန်းဟာ ဘရူနိုင်းနိုင်ငံမှာ အလုပ်သွားရောက်လုပ်ကိုင်ရာကနေ ထိုင်းနိုင်ငံကိုရောက်ရှိလာတာ ရက်ပိုင်းသာ ရှိသေးတယ်လို့ သိရပါတယ်။

စိတ်ဖိစီးမှုတွေကြောင့် သမီးနဲ့အတူ သေကြောင်းကြံစည်ရာမှ လူသတ်မှု ဖြစ်ပွားခဲ့တာဖြစ်ပြီး ရဲတပ်ဖွဲ့အနေနဲ့ တရားခံကို နောက်ထပ်စစ်ဆေးမေးမြန်းမှုတွေပြုလုပ်ဖို့ မင်ဘူရီရဲစခန်းကို ခေါ်ဆောင်ထိန်းသိမ်းထားတယ်လို့ သိရပါတယ်။

Ref – MGR online.

ဝက်လက်၊ မတ် ၂၃၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ရွှေပန်းကုန်းရွာမှာ တောင်သူ ၂ ဦးအချင်းများရာက ၁ ဦးခေါင်းဖြတ် သတ်ခံခဲ့ရတယ်လို့ ဒေသခံတွေဆီက သိရပါတယ်။

မတ်လ ၂၁ ရက်မနက်ပိုင်းမှာ ရွှေပန်းကုန်းရွာနေ အသက် ၅၀ အရွယ် ဇော်မျိုးလှိုင် (ခ) မော့တော့နဲ့ အသက် ၇၀ အရွယ် ဦးတင်သန်းတို့ဟာ ၎င်းတို့ပိုင် ကပ်လျက်လယ်ကွက်အတွင်း အလုပ်လုပ်နေရာကနေ အချင်းများပြီး ဇော်မျိုးလှိုင် (ခ) မော့တော့ က ဓါးနဲ့ခုတ်သတ်ခဲ့တာလို့ ဆိုပါတယ်။

“လယ်ချင်းကပ်လျက်ကို အချင်းချင်းမတည့်ကြတာ၊ မတည့်ကြတော့ သတ်ခံရတဲ့ လူကနေပြီး ဟိုဖက်အခင်းနဲ့ လယ်ကြားထဲကို ဆူးကိုင်းချတာတွေ ဘာတွေလုပ်တာ၊ ဖြစ်ချင်တော့ မနေ့က သတ်ခံရတဲ့သူက သတ်တဲ့လူ လယ်ကွက်ဖက်ကို၊ ငှက်ပျောခင်းဖက်ကို ပေါင်းသတ်ဆေးဆိုလား၊ ပိုးသတ်ဆေးဆိုလား သွားဖြန်းတာ၊ အဲဒါ မခံနိုင်တော့ကျ သတ်မိသွားတာ။” လို့ ဒေသခံတဦးက ပြောပါတယ်။

လူသတ်မှုဖြစ်စဉ်ကို မျက်မြင်သိသူ မရှိခဲ့ပေမယ့် ကျူးလွန်သူ ဇော်မျိုးလှိုင် (ခ) မော့တော့ ကိုယ်တိုင်က ရပ်ကျေးပအဖဆီမှာ လာရောက် အဖမ်းခံခဲ့တာလို့ အထက်ပါဒေသခံက ဆိုပါတယ်။

“ဟိုတိုင်းဆို ဘယ်သူမှမသိဘူး၊ သူကိုယ်တိုင်ကိုက ပအဖရုံးကို လာပြီးတော့ လာပြောတာပေါ့၊ သူလူသတ်ခဲ့တယ် ဆိုတဲ့အကြောင်း။” လို့ အုပ်ချုပ်ရေးနဲ့ နီးစပ်သူတဦးက ပြောပါတယ်။

ဇန်နဝါရီ ၂၂ ရက်ကလည်း ဝက်လက်မြို့နယ်၊ ကျီးကန်ရွာက ကျေးရွာလမ်းကော်မတီ အဖွဲ့ဝင် စပါးပွဲစား ၁ ဦး ရွာတော်ရွာနဲ့ မဲကုန်းရွာကြားမှာ ပစ္စတိုနဲ့ ဦးခေါင်းကိုပစ်သတ်ခံခဲ့ရပြီး ဖေဖော်ဝါရီလ ၁၂ ရက်မှာလည်း ဝက်လက်မြို့နယ်၊ ရွာသာကြီးရွာ အသက် ၅၀အရွယ် လင်မယား ၂ ဦး သူတို့ပိုင် လယ်ကွက်တွေမှာပဲ ပေါက်ပြားနဲ့ ခုတ်သတ်ခံခဲ့ရတဲ့ဖြစ်စဥ်တွေ ရှိခဲ့ပါသေးတယ်။

စာတည်း – လင်း

မြေလတ်အသံ၊ ဒီဇင်ဘာ ၁၈၊ ၂၀၂၅။

မြန်မာနိုင်ငံသားအမျိုးသားတဦးကိုသတ်ဖြတ်ခဲ့ပြီးနောက် စည်ပိုင်းအတွင်းထည့်ကာ အလောင်းစွန့်ပစ်ခဲ့တဲ့ တရားခံဖြစ်သူ မြန်မာအမျိုးသားကို ဒီဇင်ဘာ ၁၈ ရက် ဒီကနေ့မှာ ထိုင်းရဲတပ်ဖွဲ့က ချန်ထဘူရီတရားရုံးဖမ်းဝရမ်းနဲ့ စမွတ်ဆာခွန်ခရိုင်၊ အုန်းနွဲ့မြို့၊ ဖစ်ကစင်လမ်းမှာ ဖမ်းဆီးရရှိခဲ့တယ်လို့ ထိုင်းဒေသတွင်းသတင်းတွေမှာ ဖော်ပြပါတယ်။

လူသတ်မှု၊ အလောင်းဖျောက်ဖျက်မှု စတဲ့အမှုတွေနဲ့ တရားစွဲဆိုခံထားရတဲ့ ဖမ်းဆီးခံရသူ မြန်မာနိုင်ငံသား အသက် ၃၀ အရွယ် အဆိုပါအမျိုးသားကတော့ ဖမ်းဝရမ်းထုတ်ခံထားရတာမှန်ပေမယ့် လူသတ်မှုမှာ ပါဝင်ပတ်သက်မှုမရှိကြောင်းနဲ့ စွဲချက်အားလုံးကို ငြင်းဆိုထားတယ်လို့ ဆိုပါတယ်။

ပြီးခဲ့တဲ့ ဒီဇင်ဘာ ၄ ရက်က ချန်ထဘူရီခရိုင်၊ နာယိုင်အိုင်မြို့နယ်၊ နာယိုင်အိုင်ရွာအနီးရှိ ဝါးရုံတခုအနီး စွန့်ပစ်ထားတဲ့ပလပ်စတစ်ပုံးအမည်းအတွင်း ပုပ်ပွနေတဲ့အလောင်းကိုဒေသခံတွေတွေ့ရှိရာမှ ရဲတပ်ဖွဲ့ကိုအကြောင်းကြားခဲ့တာလို့ သိရပါတယ်။

အဆိုပါ ပလပ်စတစ်အမှိုက်ပုံးကို နိုဝင်ဘာ ၂၉ ရက်ကတည်းက လာရောက်စွန့်ပစ်ထားတာဖြစ်ပြီး ဒီဇင်ဘာ ၄ ရက်မှာတော့ အမှိုက်ပုံးအတွင်းမှ လက်နဲ့ခြေထောက်တွေကို ကြိုးတုပ်ကာ ပုဆိုး၊ စောင်၊ ပလပ်စတစ်အိတ်တွေနဲ့အထပ်ထပ်ပတ်ထားတဲ့ အသက် ၄၀ ဝန်းကျင်ခန့်ရှိ မြန်မာနိုင်ငံသားအလောင်းကို တွေ့ရှိခဲ့ရတယ်လို့ဆိုပါတယ်။

ရဲတပ်ဖွဲ့စုံစမ်းစစ်ဆေးမှုအရ လူသတ်မှုမှာ ကျူးလွန်သူ ၃ ဦးပါဝင်ကြောင်းဖော်ထုတ်နိုင်ခဲ့ကာ အခင်းဖြစ်နေရာအနီးရှိ CCTV မှတ်တမ်းတွေကနေတဆင့် သံသယဖြစ်ဖွယ်ကား ၁ စီးကို ခြေရာခံနိုင်ခဲ့ပြီး စမွတ်ဆာခွန်မှာ ပုန်းအောင်နေတဲ့တရားခံကို လက်ရှိမှာဖမ်းဆီးထားပြီဖြစ်တာကြောင့် ကျန်တရားခံပြေး ၂ ဦးကိုလည်း ဖမ်းဆီးနိုင်ရေး ဆက်လက်ဆောင်ရွက်နေတယ်လို့ ထိုင်းရဲတပ်ဖွဲ့က ဆိုပါတယ်။

ဖမ်းဆီးခံရသူက ပြစ်မှုကျူးလွန်ထားခြင်းမရှိကြောင်း ငြင်းဆိုထားပေမယ့် ရဲတပ်ဖွဲ့ဘက်ကတော့ ခိုင်လုံတဲ့သက်သေအထောက်အထားတွေ ရရှိထားပြီးဖြစ်လို့ ဥပဒေအတိုင်း ဆက်လက်ဆောင်ရွက်သွားမယ်ဆို ပြောဆိုထားပြီး လက်ရှိမှာ တရားခံကို နာယိုင်အိုင်ရဲစခန်းမှာ ထိန်းသိမ်းထားတယ်လို့ သိရပါတယ်။

ပဲခူး၊ နိုဝင်ဘာ ၂၈၊ ၂၀၂၅ ။

ပဲခူးမြို့မှာ လူသတ်မှု၊ လုယက်မှုကျူးလွန်သူ ၃ ဦးကို ပဲခူးခရိုင်တရားရုံးက မသေမချင်းကြိုးကွင်းစွပ်သတ်ဖို့ သေဒဏ်အမိန့်ချမှတ်လိုက်တယ်လို့ ပဲခူးရဲတပ်ဖွဲ့အသိုင်းအဝိုင်းနဲ့နီးစပ်သူတွေဆီက သိရပါတယ်။

သေဒဏ်ချမှတ်ခံရသူတွေဟာ လူသတ်မှု၊ လုယက်မှုဥပဒေပုဒ်မတွေနဲ့ တရားစွဲဆိုခံထားရတဲ့ မျိုးမင်းပိုင်(ခ)ကာတွန်း၊ အောင်မျိုးမင်း(ခ)အောင်အောင်နဲ့ ဝင်းကျော်တို့ဖြစ်ပြီး နိုဝင်ဘာ ၂၇ ရက်မှာ ပဲခူးခရိုင်တရားရုံးက ၎င်းတို့ ၃ ဦးကို သေဒဏ်ချမှတ်ခဲ့တာပါ။

” မနှစ်က ကေစ့်(အမှု)ကို သေဒဏ်ချတာ။ ၂၀၂၄ တုန်းက ဆိုင်ကယ်ရောင်းဝယ်လုပ်မယ်ဆိုပြီးခေါ်သွားတာ ၁ ယောက်က။ ကျန် ၂ ယောက်ကစောင့်ပြီး ဓားနဲ့ထိုးတာ။ ထွက်ပြေးတာကို နောက်ကလိုက်ထိုးတာ မသေမချင်း။ အဲ့ဒါကိုသေဒဏ်ချတာ။ အင်းစိန်ကိုချက်ချင်းပို့တာ။ လူသတ်မှုက အင်းစိန်ပို့ရတာ” လို့ ပဲခူးရဲတပ်ဖွဲ့အသိုင်းအဝိုင်းနဲ့နီးစပ်သူ မြို့ခံတဦးက မြေလတ်အသံကို ပြောပါတယ်။

၂၀၂၄ ဧပြီ ၂၆ ရက် ညနေပိုင်းက ဥဿာမြို့သစ် ၈ ရပ်ကွက်မှာနေထိုင်တဲ့ ဆိုင်ကယ်တက္ကစီမောင်းသူ အသက် ၄၃ နှစ်ရှိ ဦးတင်နိုင်စိုး မြသီတာရွာ၊ ဗားမဲ့ဘုန်းကြီးကျောင်းအနီးဘောလုံးကွင်းအတွင်း အသတ်ခံခဲ့ရမှုမှာ ပြစ်မှုကျူးလွန်သူတွေလို့ယူဆရတဲ့ မျိုးမင်းပိုင်(ခ)ကာတွန်း၊ အောင်မျိုးမင်း(ခ) အောင်အောင်နဲ့ ဝင်းကျော် တို့ ၃ ဦးကို အခင်းဖြစ်ပွားပြီး ၁ ပတ်ခန့်အကြာမှာ ရဲကဖမ်းဆီးခဲ့တာလို့ သိရပါတယ်။

ရဲစစ်ဆေးချက်အရ မျိုးမင်းပိုင်ဟာ ငွေကြေးအခက်အခဲရှိတာကြောင့် သူငယ်ချင်းတွေဖြစ်တဲ့ အောင်အောင်(ခ)အောင်မျိုးမင်း ၊ ဝင်းကျော်တို့နဲ့ တိုင်ပင်ကာ ၎င်းနဲ့ရင်းနှီးတဲ့ ဦးတင်နိုင်စိုးထံက ဆိုင်ကယ်နဲ့ငွေကြေးတွေလုယူရန် တိုင်ပင်ခဲ့ကြကြောင်း၊ ၎င်းနောက် ဦးတင်နိုင်စိုးကို ဆိုင်ကယ်အရောင်းအဝယ်ရှိကြောင်း အခင်းဖြစ်နေရာကိုချိန်းဆိုလိုက်ပြီး ရောက်ရှိလာချိန်မှာ ဓား၊ စကေဘာအသုံးပြုကာ ဝိုင်းဝန်းသတ်ဖြတ်ခဲ့ပြီးနောက် ဦးတင်နိုင်စိုးရဲ့ ဆိုင်ကယ်၊ လက်ကိုင်ဖုန်းနဲ့ လက်စွပ် ၁ ကွင်း တို့ကို လုယက်ခဲ့ကြောင်း စစ်ဆေးပေါ်ပေါက်ခဲ့တယ်လို့ ရဲစခန်းနဲ့နီးစပ်သူမြို့ခံတဦးထံက သိရပါတယ်။

အဲ့ဒီနောက် ၎င်းတို့ ၃ ဦးကို ပဲခူးအချုပ်ထောင်မှာ ချုပ်နှောင်ထားကာ လူသတ်မှု၊ လုယက်မှုပုဒ်မတွေနဲ့ ပဲခူးခရိုင်တရားရုံးနဲ့ ၁ နှစ်ခွဲကြာ အမှုစစ်ဆေးပြီးနောက် ယမန်နေ့မှာ သေဒဏ်တွေအသီးသီးချမှတ်ခဲ့တာလည်း ဖြစ်ပါတယ်။

စာတည်း – ဟိန်းစံ

မိတ္ထီလာ၊ စက်တင်ဘာ ၁၉၊ ၂၀၂၅။

မန္တလေးတိုင်း၊ မိတ္ထီလာမြို့မှာ လောင်းကစားရှုံးကြွေးဆပ်ဖို့ သူငယ်ချင်းဖြစ်သူကိုသတ်ပြီး ငွေလုယူသွားတဲ့ အမျိုးသား ၂ ဦးကို စက်တင်ဘာ ၁၇ ရက်မှာ ဖမ်းမိခဲ့တယ်လို့ မြို့ခံတွေထံက သိရပါတယ်။

စက်တင်ဘာ ၁၅ ရက် မနက်ပိုင်းက မိတ္ထီလာမြို့၊ နန်းတော်ကုန်းရပ်ကွက်နယ်မြေ၊ မြောက်ကန်စောင်း၊ ကလေးကစားကွင်းအနီးမှာ အသက် ၃၀ နှစ်အရွယ် အမည်မသိအမျိုးသား ၁ ဦး သေဆုံးနေတဲ့ ရုပ်အလောင်းတွေ့ရှိတာနဲ့ပတ်သက်ပြီး မြို့တွင်း CCTV မှတ်တမ်းတွေနဲ့ မြေပြင်သတင်းစုံစမ်းချက်တွေအရ သံသယရှိသူ အမျိုးသား ၂ ဦးကို ရဲကဖမ်းဆီးစစ်ဆေးရာက သတ်ဖြတ်ခဲ့ကြောင်း ဝန်ခံခဲ့ကြတာလို့ ဆိုပါတယ်။

ဖမ်းဆီးခံရသူ ၂ ဦးဟာ မကွေးတိုင်း၊ နတ်မောက်မြို့နယ်၊ ရွာတော်ကျေးရွာနေ ဇော်လှိုင်းနဲ့ ဇာနည်အောင်တို့ဖြစ်ပြီး သေဆုံးသူ စမ်းကုန်းရွာသား ကိုဇင်မင်းထက်နဲ့အတူ မန္တလေးမြို့ကို ဝက်ရောင်းပြီးအပြန် မိတ္ထီလာမြို့တည်းခိုခန်းတခုမှာ ဝင်ရောက်တည်းခိုချိန် သေဆုံးသူမှာပါတဲ့ ငွေတွေကို လုယူလိုတာကြောင့် သတ်ဖြတ်ခဲ့တာဖြစ်ကြောင်း ဝန်ခံထွက်ဆိုထားတာပါ။

” သူတို့အချင်းချင်းဘဲ။ ၃ ယောက်အတူသွားပြီး ကျန်တဲ့ ၂ ယောက်ကသတ်တာ။ တည်းခိုခန်းမှာ တည်းပြီး သတ်တဲ့ကောင်က တရွာတည်းသားကို ငါတော့ပိုက်ဆံလိုနေပြီး ကူညီအုန်းဆိုပြီးတော့၊ အဲ့နှစ်ယောက်က တရွာတည်းသား။ သေတဲ့တယောက်က နောက်တရွာက။ သတ်တဲ့ ဇော်လှိုင်းဆိုတဲ့ ကောင်လေးက စလော့ ဂိမ်းတွေဆော့တာ။ ငွေသိန်း(ကျပ်) ၃၀၀၊ ၄၀၀ လောက်ရှုံးထားတာ။ အဲ့ဒါကြောင့် ငွေလိုချင်လို့ လုပ်တာ”လို့ ဖြစ်စဥ်ကိုသိထားတဲ့ မိတ္ထီလာဒေသခံတဦးက ပြောပါတယ်။

စက်တင်ဘာ ၁၄ ရက် မနက်ပိုင်းမှာ သေဆုံးသူနဲ့ကျူးလွန်သူ ၂ ဦး တို့ဟာ နတ်မောက်ကနေ မန္တလေးမြို့ကို သေဆုံးသူ ဇင်မင်းထက် ပိုင်ဆိုင်တဲ့ ဝက်တွေကို သွားရောက်ရောင်းချခဲ့ပြီးနောက် နတ်မောက်မြို့ကိုပြန်လာချိန် အဲ့ဒီနေ့ညပိုင်းမှာ မိတ္ထီလာမြို့သစ်ရှိ ဟိုတယ်တခုမှာညအိပ်တည်းခိုချိန် သတ်ဖြတ်ခဲ့ပြီး သေဆုံးသူမှာ ပါလာတဲ့ ငွေကျပ် သိန်း ၄၇၀ ကို ယူဆောာင်ခဲ့တယ်လို့ သိရပါတယ်။

” ဟိုတယ်မှာပဲသတ်တာ။ တယောက်ကခေါင်းအုံးနဲ့ဖိပေးတယ်။ ဇာနည်အောင်က။ ဇော်လှိုင်းက ဓားနဲ့ ထိုးတယ်။ ဟိုတယ်ကလူလာနည်းတဲ့ဟိုတယ်။ အလောင်းကို နှစ်ယောက်ထမ်းပြီး ကားခေါင်းခန်းထဲထည့် မနက်အရောက် ပြန်ရမှာဆိုပြီးပြောပြီးထွက်လာကြတာ။ မန်နေဂျာကလည်း သတိမထားမိလိုက်တာမျိုး ဖြစ်တယ်”လို့ အထက်ပါမြို့ခံက ဆက်ပြောပါတယ်။

သတ်ဖြတ်ပြီးနောက် စက်တင်ဘာ ၁၅ ရက် မနက် ၄ နာရီကျော်မှာ ရုပ်အလောင်းကို ကားနဲ့သယ်ပြီး နန်းတော်ကုန်းရပ်ကွက်အပိုင်ထဲမှာ လာရောက်စွန့်ပစ်ခဲ့တာလို့ ဆိုပါတယ်။

လူသတ်လုယက်မှုကျူးလွန်သူ ၂ ဦးကို ရာဇသတ်ကြီးပုဒ်မ-၃ဝ၂/၃၉၄/၁၁၄ နဲ့ မိတ္ထီလာမြို့နယ်၊ အမှတ် ၂ နယ်မြေရဲစခန်းက အမှုဖွင့်ဖမ်းဆီးထားတယ်လို့ သိရပါတယ်။

စာတည်း – လင်း

ပဲခူး၊ ဇွန် ၂၇၊ ၂၀၂၅။

ပဲခူးမြို့၊ ကျွန်းသာယာရပ်ကွက်မှာ သားအဖချင်းစကားများရာက သားက အဖေဖြစ်သူကို ဓားနဲ့ထိုးလို့ သေဆုံးသွားတယ်လို့ မြို့ခံတွေထံက သိရပါတယ်။

သေဆုံးသူမှာ အသက် ၄၄ နှစ်အရွယ် ဦးဉာဏ်လင်းဖြစ်ပြီး ဇွန် ၂၅ ရက် ည ၁၀ နာရီကျော်မှာ ၎င်းရဲ့သားဖြစ်သူ အသက် ၂၅ နှစ်အရွယ် ချစ်ဦးမောင်နဲ့ နေအိမ်ထမင်းစားခန်းအတွင်း စကားများရန်ဖြစ်ရာက သားဖြစ်သူကဓားနဲ့ထိုးလို့ သေဆုံးသွားတာလို့ ဆိုပါတယ်။

” ထမင်းစားနေရင်းနဲ့ထဖြစ်တာ။ သားလုပ်သူက ထရင်းပန်းကန်စင်ကို တိုက်မိသွားရာက စကားများကြတာ။ သူတို့နှစ်ယောက်တည်းအနောက်မှာ ရန်ဖြစ်နေကြတာ။ အရင်ကလည်းဖြစ်နေကြ။ အရင်ကလည်း ဒီအတိုင်းစကားများပြီး ပြီးသွားတာ။ ဖြစ်တဲ့အချိန်မှာ နှစ်ယောက်စလုံးအရက်သောက်ထားတယ်။ တူတူသောက်တာတော့မဟုတ်ဘူး” လို့ ဖြစ်စဥ်ကိုသိရှိတဲ့ပဲခူးမြို့ခံတဦးက မြေလတ်အသံကိုပြောပါတယ်။

စကားများရန်ဖြစ်ချိန် သားဖြစ်သူက အရိုးအသွား ၁၀ လက်မခန့်ရှိ ကော်ရိုးတပ်စတီးဓားနဲ့ထိုးခဲ့လို့ ဦးဉာဏ်လင်းရဲ့ ညာဘက်လက်မောင်းပြတ်ရှ၊ ဓားဦးချွန် ချိုင်းအောက်ဖောက်ဝင်ကာ သွေးကြောမကြီးပြတ်တောက်တဲ့အပြင် အဆုတ်ကိုလည်းထိသွားလို့ ပြင်းထန်ဒဏ်ရာနဲ့ ပဲခူးဆေးရုံတင်ပို့စဥ် ဆေးရုံအရောက်မှာသေဆုံးသွားတာလို့ သိရပါတယ်။

ဖခင်ကို ဓားနဲ့ထိုးခဲ့တဲ့ သားဖြစ်သူကိုတော့ ရဲက ညတွင်းချင်းဖမ်းဆီးပြီး ပဲခူး အမှတ် ၂ ရဲစခန်းမှာ လူသတ်မှု ရာဇသတ်ကြီးပုဒ်မ ၃၀၂ အရ အမှုဖွင့်ချုပ်နှောင်ထားတယ်လို့ သိရပါတယ်။

ပြီးခဲ့တဲ့မေ ၂၀ ရက်ကလည်း ပဲခူးမြို့၊ မဇင်းရပ်ကွက်၊ မဟာစေတီ ၃ လမ်းနေ အသက် ၁၃ နှစ်အရွယ် မောင်သက်မင်းနိုင်ကို တရပ်ကွက်တည်းနေသူ အမျိုးသား ၂ ဦးက ငွေရလိုမှုနဲ့ ဖမ်းဆီးသတ်ဖြတ်ခဲ့သေးတယ်လို့ သိရပါတယ်။

စာတည်း – ဟိန်းစံ

ပဲခူး၊ မေ ၂၄၊ ၂၀၂၅။

ပဲခူးတိုင်း၊ ပဲခူးမြို့၊ မဇင်းဆည်နားမှာ အသက် ၁၃ နှစ်အရွယ်ကျောင်းသားကို ဖမ်းဆီးသတ်ဖြတ်ခဲ့သူ ၂ ဦးကိုဖမ်းမိခဲ့တယ်လို့ ပဲခူး အမှတ် ၂ ရဲစခန်းနဲ့နီးစပ်သူတွေဆီက သိရပါတယ်။

မေ ၂၃ ရက် နေ့လယ်ပိုင်းမှာ လူသတ်မှုကျူးလွန်ထားသူ မဇင်း ၂ လမ်းနေ အသက် ၃၂ အရွယ် ကျော်ကြီးနဲ့ မဇင်း ၃ လမ်းနေ အသက် ၃၁ အရွယ် အောင်နိုင်ဖြိုးတို့ကို သူတို့ရဲ့နေအိမ်တွေမှာ ဖမ်းမိခဲ့တယ်လို့ဆိုပါတယ်။

“တရားခံတွေကိုကတော့ သူတို့အိမ်မှာပဲဖမ်းတာ။ CCTV မှတ်တမ်းနဲ့ လိုက်ပြီးဖမ်းတာ။ သူတို့က အေးဆေးမသိအောင် သူတို့နဲ့မဆိုင်တဲ့သဘောနဲ့ အိမ်မှာပြန်နေနေတာ။ သူတို့သတ်တယ်ဆိုတာလည်း ဝန်ခံတယ်။”လို့ အမှတ် ၂ ရဲစခန်းနဲ့နီးစပ်သူတဦးက ပြောပါတယ်။

ကျော်ကြီးနဲ့ အောင်နိုင်ဖြိုးတို့မှာ အကြွေးတွေရှိနေပြီး ငွေလိုတာကြောင့် သေဆုံးသူကလေးရဲ့မိဘဆီမှာ ငွေညှစ်ဖို့ဖမ်းဆီးထားချိန် လူငယ်ကအော်ဟစ်နေတဲ့အတွက် ခြေလက်ကြိုးတုပ်ပြီး မြွေရေခွံအိတ်နဲ့ခေါင်းကိုစွပ်ထားရာက သေဆုံးသွားတာလို့ ၎င်းတို့ရဲ့ထွက်ဆိုချက်အရ သိရပါတယ်။

ကလေးငယ်ကို စတင်ဖမ်းဆီးသွားကတည်းက မဇင်းဆည်နားကို ဖမ်းဆီးသွားပြီး ချုပ်နှောင်ထားခဲ့တာလို့ ဆိုပါတယ်။

လက်ရှိမှာ ကျူးလွန်သူ ၂ ဦးကို ပဲခူး အမှတ် ၂ ရဲစခန်းမှာ ထိန်းသိမ်းထားပြီး ရာဇသတ်ကြီးပုဒ်မ ၃၀၂ လူသတ်မှုနဲ့ အမှုဖွင့်ထားတယ်လို့ သိရပါတယ်။

မေ ၂၀ ရက်ညနေ ၅ နာရီခန့်မှာ ပဲခူးမြို့၊ မဇင်းရပ်ကွက်၊ မဟာစေတီ ၃ လမ်းနေ အသက် ၁၃ နှစ်အရွယ် မောင်သက်မင်းနိုင်ဟာ နေအိမ်ကထွက်သွားရာကပျောက်ဆုံးခဲ့ပြီး မေ ၂၃ ရက်မနက် ၈ နာရီခန့်မှာမှ မဇင်ဆည်အနီးလျှိုထဲမှာ အလောင်းကိုပြန်တွေ့ခဲ့တာ ဖြစ်ပါတယ်။

စာတည်း – လင်း

မန္တလေး၊ မေ ၂၊ ၂၀၂၅။

မန္တလေးတိုင်း၊ မဟာအောင်မြေမြို့နယ်၊ စိန်ပန်းရပ်ကွက်၊ ၃၇ လမ်းနဲ့ ၃၈ လမ်းကြား၊ သင်္ဂဇာပတ်လမ်း (အနောက်) ရှိ Happy Like လက်ဖက်ရည်ဆိုင်ပိုင်ရှင်အမျိုးသားကိုသတ်ခဲ့တဲ့ ဇနီးဖြစ်သူနဲ့ အမျိုးသား ၁ ဦးကိုဖမ်းဆီးထားတယ်လို့ မေ ၂ ရက်မှာ စစ်ကောင်စီက ထုတ်ပြန်ထားပါတယ်။

Happy Like လက်ဖက်ရည်ဆိုင်ပိုင်ရှင် အသက် ၅၀ နှစ်အရွယ် ဦးအောင်နေမျိုး ကို သူ့ရဲ့ဇနီးဖြစ်သူ ဒေါ်ရွှေစင်ဝင်းနဲ့ အသက် ၃၃ နှစ်အရွယ် ကိုဇော်ဖြိုးအောင် တို့က သတ်ဖြတ်ခဲ့တာဖြစ်ပြီး ကိုဇော်ဖြိုးအောင် ကို မေ ၁ ရက်က ဧရာဝတီတိုင်း၊ မော်ကျွန်းမြို့နယ်၊ တံခွန်တိုင်ကျုံဝရွာမှာ ဖမ်းမိခဲ့တာလို့ ဆိုပါတယ်။

ဧပြီ ၂၇ ရက်က ဦးအောင်နေမျိုးဟာ လက်ဖက်ရည်ဆိုင်အိပ်ခန်းအတွင်း ကျည်ထိမှန်ဒဏ်ရာတွေနဲ့ အသတ်ခံထားရတယ်ဆိုပြီး ဇနီးဖြစ်သူဒေါ်ရွှေစင်ဝင်းက ရဲထံကိုအကြောင်းကြားခဲ့တယ်လို့ သိရပါတယ်။

အခင်းဖြစ်နေရာကို သွားရောက်စစ်ဆေးချိန်မှာ ဦးအောင်နေမျိုးကို လက်ဖက်ရည်ဆိုင်အိပ်ခန်း အတွင်း ကုတင်ပေါ်မှာ ညာဘက်နားထင်ကနေ ဘယ်ဘက်နားထင်ထိကျည်ဖောက်ထွက် ဒဏ်ရာ ၁ ချက်၊ ဝမ်းဗိုက်မှာထိုးသွင်းဒဏ်ရာ ၂ ချက်တို့နဲ့ သေဆုံးနေတာကိုတွေ့ရတယ်လို့ ထုတ်ပြန်ချက်မှာ ဖော်ပြထားပါတယ်။

စစ်ဆေးမေးချိန်မှာ ဒေါ်ရွှေစင်ဝင်းရဲ့ အမူအယာပျက်နေတာကြောင့်ထပ်မံစစ်ဆေးခဲ့ရာမှာ ၎င်းရဲ့ ထွက်ဆိုချက်အရ ခင်ပွန်းဖြစ်သူမှာ ၎င်းအားအမျိုးမျိုးညှင်းပန်းနှိပ်စက်တဲ့အပြင် အတူနေညီအစ်ကိုမောင်နှမတွေကိုလည်း နေအိမ်မှအကြိမ်ကြိမ်မောင်းချတဲ့အတွက် နာကျည်းစိတ်ရှိတာကြောင့် သတ်ဖြတ်ပေးဖို့ ဒေါ်ရွှေစင်ဝင်းဟာ သူနဲ့ချစ်ကြိုက်နေတဲ့ ကိုဇော်ဖြိုးအောင်ကို နေအိမ်အခြေအနေ အသေးစိတ်ပြောဆိုအသိပေးပြီး ဧပြီ ၂၇ မှာလုပ်ကြံခဲ့ကြတာလို့ ဆိုထားပါတယ်။

ထွက်ဆိုချက်ရပြီးနောက် မေ ၁ ရက်မှာ ကိုဇော်ဖြိုးအောင်နေထိုင်တဲ့ အောင်မြေသာစံမြို့နယ်၊ ဒေါနဘွားရပ်ကွက်၊ အုတ်စက်ရပ်၊ အကွက် ၁၃ ရှိ အခန်းကိုဝင်ရှာချိန် SIGSAUER အမျိုးအစား 9mm ပစ္စတိုသေနတ် ၁ လက်၊ ကျည်အိမ် ၂ ခု၊ ၎င်းကျည် ၂၈ တောင့်နဲ့ Scoopy ဆိုင်ကယ် ၁ စီးတို့ကို သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

အဲ့ဒီနောက် ကိုအောင်ဖြိုးအောင်ဟာ ၎င်းရဲ့ဇာတိဖြစ်တဲ့ တံခွန်တိုင်ကျုံဝါးကျေးရွာကို ပြန်သွားကြောင်းသိရတဲ့အတွက် သက်ဆိုင်ရာနယ်မြေရဲနဲ့ချိတ်ဆက်ပြီး ဖမ်းဆီးခဲ့တာလို့ သိရပါတယ်။

အမှုနဲ့ပတ်သက်ပြီး ပြစ်မှုကျူးလွန်သူ ၂ ဦးကို မဟာအောင်မြေမြို့နယ် အမှတ် ၇ နယ်မြေရဲစခန်းကနေ ပ ၅၀/ ၂၀၂၅၊ ရာဇသတ်ကြီးပုဒ်မ ၃၀၂ လူသတ်မှုနဲ့အမှုဖွင့်ဖမ်းဆီးထားတယ်လို့ သိရပါတယ်။

စာတည်း – လင်း

ပဲခူး၊ မတ် ၁၆၊ ၂၀၂၅။

ပဲခူးတိုင်း၊ ပဲခူးမြို့၊ စိန်ထွန်းရပ်ကွက်၊ လက်ဝဲသုန္ဒရလမ်းမှာ ဇနီးဟောင်းဖြစ်သူကို ဓားနဲ့ထိုးခဲ့ပြီး သေဆုံးသွားတာကြောင့် ထွက်ပြေးတိမ်းရှောင်နေတဲ့ အမျိုးသား လာရောက်အဖမ်းခံခဲ့တယ်လို့ ဒေသခံတွေဆီကသိရပါတယ်။

မတ် ၁၆ ရက်နေ့မနက် ၁၀ နာရီခန့်မှာ ထွက်ပြေးနေတဲ့ အမျိုးသားဖြစ်သူ ကိုအောင်မြင့်မြတ်ဟာ ပဲခူးမြို့မရဲစခန်းမှာ သူကိုယ်တိုင်လာအဖမ်းခံခဲ့တယ်လို့ ဆိုပါတယ်။

“သူကိုယ်တိုင်လာအဖမ်းခံတာလို့တော့ သိထားရတယ်။ သူတို့ရပ်ကွက်က အမှတ် ၁ စခန်းအပိုင်ဆိုတော့ အဲမှာဘဲလာအဖမ်းခံတာ။ ရဲစခန်းမှာချုပ်ထားတယ်လို့တော့ သိရတယ်”လို့ ဒေသခံတဦးကပြောပါတယ်။

လာရောက်အဖမ်းခံခဲ့တဲ့ ကိုအောင်မြင့်မြတ်ကို ဖြစ်စဉ်စဖြစ်တဲ့ရက်ကတည်းက ပဲခူးမြို့မရဲစခန်းမှာ ရာဇသတ်ကြီးပုဒ်မ ၃၀၂ နဲ့ အမှုဖွင့်ထားတာကြောင့် အဆိုပါပုဒ်မနဲ့ တရားရုံးတင်သွားဖွယ်ရှိတယ်လို့ ဆိုပါတယ်။

မတ် ၁၂ ရက်၊ မနက် ၁ နာရီကျော်ခန့်မှာ အသက် ၃၀ ဝန်းကျင်အရွယ် မလင်းလင်းကျော်ဟာ နေအိမ်မှာရှိနေချိန် ခင်ပွန်းဟောင်းဖြစ်သူ ကိုအောင်မြင့်မြတ်က နေအိမ်ကိုရောက်လာပြီး စကားများကြရာမှ ကိုအောင်မြင့်မြတ်က မလင်းလင်းကျော်ကို ဓားနဲ့ထိုးပြီး ထွက်ပြေးသွားခဲ့ပါတယ်။

ဓားနဲ့ထိုးခံရလို့ မလင်းလင်းကျော်မှာ ဝမ်းဗိုက်ထိုးသွင်းဒဏ်ရာရပြီး ပဲခူးဆေးရုံမှာ ဆေးကုသမှုခံယူနေစဥ် မနက် ၅ နာရီခန့်မှာ သေဆုံးသွားပြီး သူ့ရဲ့ရုပ်အလောင်းကိုတော့ မတ် ၁၂ ရက် နေ့လယ် ၁ နာရီကျော် စင်ဖြူကွင်းသုဿာန်မှာ နေ့ချင်းသင်္ဂြိုဟ်ခဲ့တယ်လို့ သိရပါတယ်။

ကိုအောင်မြင့်မြတ်နဲ့မလင်းလင်းကျော်တို့က လွန်ခဲ့တဲ့ နှစ်နှစ်ခန့်ကတည်းက တရားဝင်ကွာရှင်းထားသူတွေဖြစ်ပြီး မလင်းလင်းကျော်မှာ သားနှစ်ဦးကျန်ခဲ့တယ်လို့ သိရပါတယ်။

စာတည်း – ကိုချမ်း