လူသတ်မှု

မန္တလေး၊ မတ် ၁၄၊ ၂၀၂၅။

မန္တလေးတိုင်း၊ ပြည်ကြီးတံခွန်မြို့နယ်၊ ညောင်ပင်သာရွာကနေ ပျောက်ဆုံးနေတဲ့ ညီအကို ၂ ဦးကို ၈ ရက်အကြာမှာ သေဆုံးလျက်ပြန်တွေ့ခဲ့တယ်လို့ မိသားစုနဲ့နီးစပ်သူတွေထံက သိရပါတယ်။

ပျောက်ဆုံးနေသူတွေဟာ အသက် ၁၃ နှစ် မောင်အောင်ခန့်ဦးနဲ့ ညီဝမ်းကွဲတော်စပ်သူ အသက် ၁၀ နှစ် မောင်ပြည့်စုံကျော်တို့ဖြစ်ပြီး ၎င်းတို့ ၂ ဦးဟာ မတ် ၂ ရက်ကစတင်ကာ နေအိမ်တွေကနေပျောက်ဆုံးနေရာက စဉ့်ကိုင်မြို့နယ်၊ ရဲရွာသစ်ကျေးရွာရဲ့အနောက်ဘက်လျှိုမြောင်အတွင်းမှာ မတ် ၁၀ ရက်က သေဆုံးလျက်ပြန်တွေ့ခဲ့ရတာလို့ ဆိုပါတယ်။

” စခန်းကတွေ့တယ်ဆိုလို့ အကြောင်းကြားလို့ သိရတာ။ အလောင်းမြင်ရချိန်မှာတော့ ခြေထောက်တွေ၊ခေါင်းတွေ အကုန်ကြေနေတာကိုတော့ မြင်ရတယ်။ နှစ်ယောက်စလုံးက အဲလိုတွေ့ရတာ။ ကျောက်ခဲနဲ့ထုသတ်ထားတယ်လို့တော့ သိထားရတယ်။”လို့ မိသားစုနဲ့နီးစပ်သူတဦး မြေလတ်အသံကို ပြောပါတယ်။

ပျောက်ဆုံးကလေး၂ ဦးအသတ်ခံရတာနဲ့ပတ်သက်ပြီး ကျူးလွန်သူတွေလို့ယူဆထားတဲ့ ပြည်ကြီးတံခွန်မြို့နယ်၊ ညောင်ဝန်းကျေးရွာနေ လူငယ် ၄ ဦးကို နယ်မြေခံရဲစခန်းက ဖမ်းဆီးစစ်ဆေးနေကာ ဖမ်းဆီးခံရသူတွေက ဘယ်သူတွေဆိုတာနဲ့ ဘာကြောင့်သတ်ဖြတ်ခဲ့တယ်ဆိုတာကို မသိရသေးဘူးလို့ဆိုပါတယ်။

ဆယ်ကျော်သက်ညီအကို ၂ ဦးရုပ်အလောင်းပြန်တွေ့ခဲ့တဲ့နေရာဟာ မြစ်ငယ်မြစ်ရဲ့တဖက်ကမ်းဖြစ်လို့ နေထိုင်ရာကျေးရွာနဲ့ ၁၀ မိုင်ကျော်ကွာဝေးပြီး ရုပ်အလောင်းတွေကို မတ် ၁၁ ရက်မှာ ပြန်သယ်ဆောင်သင်္ဂြိုဟ်ပေးခဲ့ကာ မတ် ၁၃ ရက်မှာ အလောင်းတွေ့ရှိတဲ့နေရာမှာ သပိတ်ဆွမ်းသွပ်အလှူပြုလုပ်ပေးခဲ့တယ်လို့ သိရပါတယ်။

အမှုနဲ့ပတ်သက်ပြီး ဖမ်းဆီးခံထားရတဲ့ လူငယ် ၄ ဦးနဲ့ပတ်သက်တဲ့ အချက်အလက်တွေနဲ့ ဘာကြောင့်သတ်ခဲ့တယ်ဆိုတာကို တရားရုံးတင်မှသိရမှာဖြစ်ကြောင်း ရဲဘက်ကအကြောင်းကြားထားလို့ တရားရုံးတင်မယ့်ရက်ကို နစ်နာသူမိသားစုဝင်တွေဘက်က စောင့်ဆိုင်းနေတယ်လို့ သိရပါတယ်။

စာတည်း – ဟိန်းစံ

ပဲခူး၊ မတ် ၁၂၊ ၂၀၂၅။

ပဲခူးတိုင်း၊ ပဲခူးမြို့၊ စိန်ထွန်းရပ်ကွက်၊ လက်ဝဲသုန္ဒရလမ်းမှာ ခင်ပွန်းဟောင်းက သူ့ရဲ့ဇနီးဟောင်းကို ဓားနဲ့ထိုးလို့ သေဆုံးသွားတယ်လို့ ဖြစ်စဥ်ကိုသိရှိထားတဲ့ ဒေသခံတွေထံက သိရပါတယ်။

ဓားနဲ့ထိုးခံရသူဟာ အသက် ၃၀ ဝန်းကျင်အရွယ် မလင်းလင်းကျော်ဆိုသူဖြစ်ပြီး မတ် ၁၂ ရက် မနက် ၁ နာရီကျော်ခန့်က နေအိမ်မှာရှိနေချိန် ခင်ပွန်းဟောင်းဖြစ်သူ ကိုအောင်မြင့်မြတ်က ဓားနဲ့ထိုးခဲ့တာလို့ ဆိုပါတယ်။

“ယောကျာ်းဖြစ်သူက နေအိမ်ထဲဝင်လာပြီး ဓားနဲ့ထိုးသွားတာလို့တော့ သိထားရတယ်။ ဓားထိုးခံရလို့ ဒဏ်ရာတွေရနေလို့ဆေးရုံကိုပို့ပြီး ဆေးကုမှုလုပ်နေချိန်မှာ ဒီမနက်မှာဘဲဆုံးသွားတာ”လို့ ဖြစ်စဥ်ကိုသိရှိထားတဲ့ ဒေသခံတဦးက ပြောပါတယ်။

ဓားနဲ့ထိုးခံရလို့ မလင်းလင်းကျော်မှာ ဝမ်းဗိုက်မှာ ထိုးသွင်းဒဏ်ရာရပြီး ပဲခူးဆေးရုံမှာ ဆေးကုသမှုခံယူနေစဥ် မနက် ၅ နာရီခန့်မှာ သေဆုံးသွားတယ်လို့ ဆိုပါတယ်။

သေဆုံးသူ မလင်းလင်းကျော်ရဲ့အလောင်းကို ဒီနေ့လယ် ၁ နာရီကျော်မှာ စင်ဖြူကွင်းသုဿာန်မှာ သင်္ဂြိုဟ်လိုက်တယ်လို့သိရပြီး ဓားနဲ့ထိုးသွားတဲ့ ကိုအောင်မြင့်မြတ်ကတော့ မတ် ၁၂ ရက် ညနေပိုင်းထိ ဖမ်းဆီးနိုင်ခြင်းမရှိသေးဘဲ ထွက်ပြေးလွတ်မြောက်နေဆဲလို့ ဒေသခံတွေက ပြောပါတယ်။

ကိုအောင်မြင့်မြတ်နဲ့မလင်းလင်းကျော်တို့ဟာ လွန်ခဲ့တဲ့ နှစ်နှစ်ခန့်ကတည်းက တရားဝင်ကွာရှင်းထားတာဖြစ်ပြီး မလင်းလင်းကျော်မှာ သားနှစ်ဦးကျန်ရစ်ခဲ့တယ်လို့ သိရပါတယ်။

ပြီးခဲ့တဲ့ ဇန်နဝါရီ ၈ ရက်နေ့ကလည်း ပဲခူးမြို့နယ်၊ ဇောင်းတူကျေးရွာမှာ လင်မယားနှစ်ယောက် စကားများရန်ဖြစ်ရာမှ လင်ဖြစ်သူက မယားဖြစ်သူကို ဓားနဲ့ခုတ်လို့ သေဆုံးသွားတယ်လို့ သိရပါတယ်။

စာတည်း – ကိုချမ်း

စစ်ကိုင်း၊ ဖေဖော်ဝါရီ ၁၅၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ကန်ကြီးတောကျေးရွာက ကက်သလစ်ခရစ်ယာန်ဘုန်းကြီးတပါး ဓားနဲ့ခုတ်သတ်ခံရပြီး သတ်ဖြတ်သူတွေကို ဖမ်းမိထားတယ်လို့ ဒေသတာဝန်ရှိသူဆီက သိရပါတယ်။

ဖေဖော်ဝါရီ ၁၄ ရက် ည ၉ နာရီခန့်မှာ ရွှေဘိုမြို့နဲ့ ကျောက်မြောင်းမြို့ကြား ကန်ကြီးတောကျေးရွာက ကက်သလစ်ခရစ်ယာန်ဘုရားကျောင်းထဲ ဝင်ရောက်သတ်ဖြတ်ခဲ့သူ ၁၀ ဦးကို ဖမ်းဆီးထိန်းသိမ်းထားတယ်လို့ ဆိုပါတယ်။

“ရွာခံတွေကနေ လာတိုင်လို့ သင်းအုပ်ဆရာ(ဘုန်းကြီး)ကိုပေါ့ ဓားတွေနဲ့လည်းခုတ်ပြီးသတ်ထားတယ်ဆိုတော့ ကျနော်တို့သွားကြည့်တော့ Deadbody ပဲကျန်ခဲ့တယ်။ အဲမှာစုံစမ်းပြီးတော့ သတ်သွားတဲ့အဖွဲ့ကို ၉ နာရီကျော်လောက်မှာ ဖမ်းဆီးထိန်းသိမ်းထားတယ်။”လို့ ဒေသတာဝန်ရှိသူက ပြောပါတယ်။

သတ်ဖြတ်မှုကျူးလွန်သူတွေဟာ ရွှေဘိုမြို့နယ်၊ တအုံကျေးရွာ ဒေသကာကွယ်ရေးအဖွဲ့ဝင်တွေဖြစ်တယ်လို့ သိရတဲ့အတွက် ခေါင်းဆောင် တိုက်ကော အပါ ၁၀ဦးကို ရွှေဘိုခရိုင် PDF တပ်ရင်း ၅က ဖမ်းဆီးထိန်းသိမ်းထားတယ်လို့ ဆိုပါတယ်။

ဖမ်းမိချိန် သေနတ် ၅ လက်၊ ဓားရှည် ၁ လက်ကိုလည်း သိမ်းဆည်းရမိထားပြီး အဖွဲ့ဝင်တွေမှာ အရက်နံ့တွေလည်းရတယ်လို့ ဆိုပါတယ်။

ဖြစ်စဉ်မှာ ဖေဖော်ဝါရီ ၁၄ ရက် ည ၇ နာရီခန့်မှာ ကန်ကြီးတောကျေးရွာ၊ လုဒ်မယ်တော်သခင်မ ဘုရားကျောင်းမှာ အသက် ၄၄ နှစ်အရွယ် ဖာသာရ်ဒေါနယ်မာတင် (Fr. Donald Martin) တပါးတည်းရှိနေချိန် လက်နက်ကိုင်ထားသူ ၁၀ ဦး ကျောင်းထဲဝင်လာပြီး ဒူးထောက်ခိုင်းခဲ့တယ်လို့ ဆိုပါတယ်။

“သတ်တဲ့သူတွေပြောတာကတော့ ဝင်ဝင်ချင်း ဒူးထောက်ခိုင်းတာကို “ငါက သင်းအုပ်ဆရာ ဘာလို့ဒူးထောက်ရမှာလဲ ပြောလို့” ဓားနဲ့ တန်းခုတ်လိုက်တယ်လို့တော့ပြောတယ်။ သေနတ်တောင် တချက်မှ ဖောက်မသွားဘူး။ ဓားရှည်တလက်တည်းနဲ့ပဲ ခုတ်ထားတာလို့ပြောတယ်။”လို့ ဒေသတာဝန်ရှိသူက ပြောပါတယ်။

ဖာသာရ်ဒေါနယ်မာတင်ကို သတ်တဲ့အဖွဲ့ ကျောင်းထဲကနေ ပြန်လည်ထွက်သွားခဲ့ပြီး ခဏအကြာ ဒေသခံတွေ ဘုရားကျောင်းထဲလာကြည့်ရာမှ လည်ဂုတ်နဲ့ ရင်ဘတ်တွေမှာ မသေမချင်းခုတ်ဖြတ်ထားတဲ့ ဒဏ်ရာတွေ တွေ့ရတယ်လို့ သိရပါတယ်။

ဖာသာရ်ဒေါနယ်မာတင်ကို သတ်ဖြတ်သူတွေဘက်က သူတို့အဖွဲ့က သတ်တဲ့အကြောင်းဝန်ခံထားပြီး မြို့နယ် ပလဖဆီ လွှဲပြောင်းဖို့စီစဉ်ထားကာ ဘာကြောင့်သတ်ဖြတ်တယ်ဆိုတာကိုတော့ သေချာမစစ်ဆေးရသေးဘူးလို့ ဆိုပါတယ်။

လက်ရှိ Fr. Donald Martin ရဲ့ ရုပ်ကလာပ်ဟာ ရွှေဘိုမြို့ကတဆင့် ပြင်ဦးလွင်မြို့ကို ရောက်ရှိပြီးမနက်ဖြန် နေ့လယ် သင်္ဂြိုဟ်မှာဖြစ်တယ်လို့ သိရပါတယ်။

ခုလို သတ်ခံလိုက်ရတာနဲ့ပတ်သတ်ပြီး သေဆုံးသူ ဖာသာရ်ဒေါနယ်ရဲ့သူငယ်ချင်း ဘုန်းကြီးတပါးက “ဖာသာရ်ဒေါနယ်ဟာ ကျောင်းသားဘဝကတည်းကအစ၊ ကိုရင်ဘဝတလျှောက်လုံး၊ ယခု ဘုန်းကြီးဘဝတလျှောက်လုံး မှန်မှန်ကန်ကန် နေထိုင်သူ၊ ဖြောင့်မတ်သူ ဖြစ်ပါတယ်။” လို့ ဆိုပါတယ်။

အမှန်တရားအတွက်ဆို အကြီးအကဲလည်း ပြန်ပြောဝံ့သူမို့ နောင်တော်ကိုရင်တွေက သဘောကျကြ လေးစားကြရတဲ့ ဘုန်းကြီးတပါးဖြစ်ပြီး ရဟန်းသိက္ခာခံပြီးနောက် စဉ့်ကိုင်မြို့နယ်၊ ဇော်ဂျီကျေးရွာမှာ ကျောင်းထိုင်အဖြစ် တာဝန်ကျခဲ့ကာ ကျောင်းထိုင်အဖြစ် အကောင်းဆုံး တာဝန်ကျေသူဖြစ်တယ်လို့ ဆိုပါတယ်။

လက်ရှိတာဝန်ကျတဲ့ ရွှေဘိုမြို့နယ်၊ ကန်ကြီးတောကျေးရွာ၊ လုဒ်မယ်တော်သခင်မ ဘုရားကျောင်းမှာ သာသနာ့တာဝန်ထမ်းဆောင်နေတာ ၂ နှစ်နီးပါးရှိပြီဖြစ်တယ်လို့ သိရပါတယ်။

စာတည်း – ဈာန်မြင့်

ပဲခူး၊ ဇွန် ၁၂၊ ၂၀၂၃။

ပဲခူးတိုင်းအနောက်ခြမ်း၊ ကြို့ပင်ကောက်မြို့နယ်မှာ ဇွန်လ ၁၁ ရက် မနေ့ နေ့လယ် ၁၂ နာရီလောက်က အိမ်နီးချင်းလင်မယား စကားများတာကို ဝင်ပြောရာက လူသတ်မှုဖြစ်ပွားခဲ့တယ်လို့ သိရပါတယ်။

ကျွန်းကုန်းကြီးကျေးရွာက ဦးမြင့်ဇော်ဦး(၅၁ နှစ်) တို့ လင်မယား ၂ ယောက် စကားများ ရန်ဖြစ်နေတာကြောင့် အိမ်နီးချင်းဖြစ်သူ ဦးမင်းမင်း(၃၆ နှစ်) က ဝင်ရောက်ဖြေရှင်းပေးရာမှာ ဦးမြင့်ဇော်ဦးက ဦးမင်းမင်းကို လက်သီးနဲ့ ၂ ချက်ထိုးလိုက်တယ်လို့ မြို့ခံတဦးက ဆိုပါတယ်။

“အဲဒါကို ကိုမင်းမင်းက မကျေနပ်လို့ အိမ်ပြန်ဓါးယူပြီး ပြန်ထိုးတာမှာ (ဦးမြင့်ဇော်ဦးမှာ)ဝမ်းဗိုက် ၁ ချက်၊ ဘယ်ဒူးနဲ့ညာဒူး ၁ ချက်စီဒဏ်ရာရပြီး သေတာ” လို့ သူက ရှင်းပြပါတယ်။

အခင်းဖြစ်ပြီးနောက် ကြို့ပင်ကောက်မြို့မရဲစခန်းက ဦးမင်းမင်းကို ဖမ်းဆီးသွားတယ်လို့ သိရပါတယ်။

ဦးမြင့်ဇော်ဦးရဲ့ အလောင်းကို ကြို့ပင်ကောက်မြို့နယ် ပြည်သူ့ဆေးရုံမှာ ရင်ခွဲစစ်ဆေးဖို့ ပို့ဆောင်ပြီးနောက် ညနေပိုင်းမှာ နေအိမ်သို့ ပြန်လည်ပို့ဆောင်ခဲ့တယ်လို့ ကြို့ပင်ကောက်မြို့နယ် ပရဟိတရဲ့အသင်းရဲ့ လူမှုကွန်ယက်စာမျက်နှာမှာ ဖော်ပြထားပါတယ်။

ပြီးခဲ့တဲ့မတ်လ ၂ ရက် ညနေ ၆ နာရီခွဲလောက်ကလည်း ကြို့ပင်ကောက်မြို့၊ ရွာမမြောက်ရပ်ကွက်၊ ဗောဓိ ၂ လမ်းမှာ ဓားခုတ်မှုဖြစ်ပွားခဲ့လို့ အမျိုးသား ၃ ဦးဒဏ်ရာရခဲ့ပါသေးတယ်။

စာတည်း – လင်းဇေ

ပဲခူး၊ ဖေဖော်ဝါရီ ၁၁၊ ၂၀၂၃။

ပဲခူးတိုင်းအနောက်ခြမ်း၊ ပန်းတောင်းမြို့နယ်၊ ဥသျှစ်ပင်ရဲစခန်းအပိုင် ကျီးပင်အုပ်စုထဲမှာ ဖေဖေါ်ဝါရီလ ၁၀ ရက် မနေ့ည ၈ နာရီခွဲလောက်က ခမည်းခမက်နှစ်ဦး အရက်အတူသောက်ရာက လူသတ်မှု ဖြစ်ပွားခဲ့တယ်လို့ ဒေသခံတဦးဆီက သိရပါတယ်။

ဥသျှစ်ပင်မြို့ လယ်တီကျေးရွာ ကွက်သစ်ရေငံတောတိုက်ထဲမှာ နေကြတဲ့ အသက် ၄၈ နှစ်အရွယ် ကိုမိုးကျော်ဆိုသူက အသက် ၅၃ နှစ်အရွယ် ဦးသိန်းရွှေနဲ့ အသက် ၄၇ နှစ်အရွယ် ဒေါ်မြခက်တို့လင်မယားနှစ်ဦးကို ဓါးနဲ့ခုတ်သတ်ခဲ့တာလို့ ဆိုပါတယ်။

“ခမည်းခမက်တွေ အရက်သောက်စကားများပြီး ဖြစ်ကြတာ ကောင်လေးရဲ့အဖေနဲ့အမေကို ကောင်မလေးအဖေက အရိုးအသွား ၂ ပေလောက်ရှိတဲ့ ဓါးမနဲ့ ခုတ်တာပါ။ ခုတ်တဲ့သူက ထွက်ပြေးရင်း​ ချောက်ထဲလိမ့်ကျလို့ ခြေထောက်ကျိုးသွားတယ်” လို့ မြို့ခံတဦးက ပြောပါတယ်။

သေဆုံးတဲ့အမျိုးသားမှာ ဇက်ပိုးပြတ်ရှဒဏ်ရာ ၂ ချက်၊ အမျိုးသမီးမှာ လည်ပင်းပြတ်ရှဒဏ်ရာ တချက် ရရှိခဲ့တယ်လို့ သူကဆက်ပြောပါတယ်။

အလောင်းကို ဥသျှစ်ပင်ဆေးရုံကတဆင့် သဂြိုလ်မယ့် အေးသုခသုဿန်ကို ဖေဖေါ်ဝါရီလ ၁၁ ရက် ဒီနေ့မနက်မှာပဲ ပို့ဆောင်ထားတယ်လို့ သိရပါတယ်။

ပြီးခဲ့တဲ့ ဖေဖေါ်ဝါရီလ ၃ ရက်နေကလည်း ပန်းတောင်းမြို့နယ်အပိုင် ဒေါင်းမြတ်နားအုပ်စု တောင်ပို့ကွင်းကျေးရွာက အသက်၄၂ နှစ်အရွယ် ကိုမင်းဆိုသူကို တရွာတည်း အတူနေ အသက် ၃၂ နှစ်အရွယ် ကိုဆွေသူက ဓါးနဲ့ထိုးမှု ဖြစ်ပွားခဲ့ပါသေးတယ်။

ပန်းတောင်းမြို့နယ်မှာ မကြာခဏဆိုသလို ဓါးခုတ်မှု၊ လူသတ်မှုတွေ ဖြစ်ပွားပြီး အများစုဟာ ကျေးလက်တောရွာတွေမှာ နေထိုင်တဲ့ အခြေခံလူတန်းစားတွေ ဖြစ်တယ်လို့ သိရပါတယ်။

တောင်ငူ၊ ဖေဖော်ဝါရီ ၇၊ ၂၀၂၃။

ပဲခူးတိုင်း၊ တောင်ငူခရိုင်၊ အုတ်တွင်းမြို့နယ်၊ ပေါက်တောကျေးရွာအုပ်စု၊ ပေါက်တောရွာက သားအဖ ၂ ဦးဟာ ရန်ဖြစ်စကားများရာမှ သားဖြစ်သူက ဓားနဲ့ထိုးလိုက်လို့ အဖေဖြစ်သူ သေဆုံးသွားတယ်လို့ သိရပါတယ်။

ဖေဖော်ဝါရီ ၆ ရက်မနေ့ည ၇ နာရီ ၂၀ မိနစ်လောက်မှာ အသက် ၂၄ နှစ်အရွယ် ကိုရန်လင်းစိုးဆိုသူနဲ့ အဖေဖြစ်သူ ဦးဆန်းဝင်းတို့ အ‌ချေတင်စကားများရာမှ သားဖြစ်သူက ဓားနဲ့ထိုးလိုက်လို့ အဖေဖြစ်သူ ပွဲချင်းပြီး သေဆုံးသွားခဲ့တာလို့ ဒေသခံတဦးက ပြောပါတယ်။

“ဦးဆန်းဝင်းက အိမ်ထောင်ကွဲပါ။ သူ့မှာသား ၂ ယောက် သမီး ၁ ယောက် ရှိပါတယ်။ မနေ့က ဦးဆန်းဝင်းကို ဓားနဲ့ ထိုးလိုက်တာက သူ့သား အလတ်ကောင်ပါ” လို့ ဆိုပါတယ်။

ဒီဖြစ်စဥ် ဖြစ်ပွားခဲ့တာနဲ့ပက်သက်ပြီး အသေးစိတ်အခြေအနေတွေကို မသိရှိရသေးပါဘူး။

အခုလက်ရှိမှာတော့ ဦးဆန်းဝင်းကို သဂြိုဟ်ဖို့အတွက် ပြင်ဆင်နေပြီး ကိုရန်လင်းစိုးကိုတော့ စစ်ကောင်စီတပ်ဖွဲ့ဝင်တွေက ညတွင်းချင်း ဖမ်းဆီးရမိသွားတယ်လို့ သိရပါတယ်။