ရွှေဘို

စစ်ကိုင်း၊ ဇွန် ၂၇၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်နဲ့ ရွှေဘိုမြို့နယ်တို့က ကျေးရွာ ၃ ရွာမှာ စစ်ကော်မရှင်တပ်က လေကြောင်းကနေဗုံးကြဲခဲ့တာကြောင့် နေအိမ် ၁၀ လုံးပျက်စီးတယ်လို့ သက်ဆိုင်ရာမြို့နယ်ပကဖတွေနဲ့ တိုက်နယ်ပကဖ တာဝန်ရှိသူတွေဆီက သိရပါတယ်။

ဇွန် ၂၆ ရက်မနက် ၅ နာရီကျော်မှာ Y12 လေယာဥ်က ဝက်လက်မြို့နယ်၊ မြင်းသည်ကျေးရွာအနီး တောစပ်ကို ဗုံး ၆ လုံးကြဲချရာ ထိခိုက်ပျက်စီးမှုမရှိခဲ့ဘူးလို့ ဝက်လက်မြို့နယ်ပကဖတာဝန်ရှိသူဆီက သိရပါတယ်။

အဲဒီနောက်တဆက်တည်းဆိုသလို ရွှေဘိုမြို့နယ်၊ ရေတော်မူကျေးရွာကို ဗုံး ၄ လုံး ကြဲချရာ ၂ လုံးပေါက်ကွဲခဲ့သလို တက်တူကျေးရွာကို ၆ လုံးကြဲချခဲ့ရာ ၆ လုံးစလုံးပေါက်ကွဲခဲ့တာလို့လည်း ရွာခံကာကွယ်ရေးအဖွဲ့ဝင်တဦးက ပြောပါတယ်။

“မြင်သည်ဘက်က လေကြောင်းတိုက်ခိုက်မှုလုပ်တယ်လို့ သိသိချင်း ဗုံးခိုကျင်းတွေထဲ ဝင်ခိုင်းလိုက်တော့ လူထိခိုက်မရှိလိုက်ဘူး။ အိမ်တွေကြားကိုချတာဆိုတော့ အိမ်ထိခိုက်ပျက်စီးတော့ရှိတယ်။ “လို့ ရွာခံကာကွယ်ရေးအဖွဲ့ဝင်တဦးက ပြောပါတယ်။

တက်တူးရွာဗုံးကြဲခံရမှုမှာ နေအိမ် ၈ လုံး၊ ယက္ကန်းစင် ၂ ခု၊ ထော်လာဂျီ ၁ စီးပျက်စီးမှုရှိခဲ့ပြီး ရေတော်မူကျေးရွာမှာတော့ လူနေအိမ် ၂ လုံးပျက်စီးခဲ့တယ်လို့ ဆိုပါတယ်။

ဗုံးကြဲမှုကြောင့် မြင်းသည်နဲ့ရေတော်မူရွာတွေက ပြည်သူတွေက နေရပ်တိမ်းရှောင်တာ မရှိပေမယ့် တက်တူးရွာခံတွေကတော့ ဘေးလွတ်ရာတိမ်းရှောင်နေကြရပါတယ်။

မေ ၂၇ ရက်ကလည်း ရွှေဘိုမြို့နယ်၊ ရေတော်မူကျေးရွာကို စစ်ကော်မရှင်ရဲ့ ဒရုန်းကျရောက်ပေါက်ကွဲပြီး လင်မယား ၂ ဦးသေဆုံးကာ အမျိုးသမီး ၂ ဦးဒဏ်ရာရခဲ့ပါသေးတယ်။

စာတည်း – လင်း

ရွှေဘို၊ မေ ၂၈၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်က ချီပါ၊ ဘုန်းဘွဲ့၊ ပေါက်တုံ၊ ရေတော်မူရွာတို့ကို စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့တာကြောင့် ပြည်သူ ၄ ဦးသေဆုံးခဲ့တယ်လို့ ရွှေဘိုမြို့နယ်ပကဖ တာဝန်ရှိသူတွေဆီက သိရပါတယ်။

မေ ၂၇ ရက်မနက် ၁၀ နာရီ ၄၅ မိနစ်ခန့်မှာ ချီပါရွာကားလမ်းဘေး လက်ဖက်ရည်ဆိုင်အနီးကို ဒရုန်းဗုံးနဲ့ ၁ ကြိမ်၊ မနက် ၁၁ နာရီခန့်မှာ ဘုန်းဘွဲ့ရွာကားလမ်းဘေးရှိ အသုပ်ဆိုင်အနီးနဲ့ မနက် ၁၁ နာရီခွဲမှာလည်း ပေါက်တုံရွာအနောက်ဘက်တို့ကို အသေခံဒရုန်း၊ ဒရုန်းဗုံးတို့နဲ့ကြဲချတိုက်ခိုက်ခဲ့တယ်လို့ ဆိုပါတယ်။

ဒါ့အပြင် နေ့လယ် ၁၂ နာရီခန့်မှာလည်း မုံရွာနမခ က တက်လာတဲ့ စက်တပ်လေထီးဟာ ရေတော်မူရွာ အနောက်ပိုင်းကို ဗုံး ၁ လုံးကြဲချခဲ့ရာ နေအိမ်တွေပေါ်ကျရောက်ပေါက်ကွဲခဲ့တာလို့ ဆိုပါတယ်။

“ချီပါမှာ မာတီနဲ့ချခံရတာ လက်ဖက်ရည်ဆိုင်ပျက်စီးထိခိုက်မရှိ။ အဲ့ဒါပြီးတော့ ဘုန်းဘွဲ့မှာက လမ်းဘေးအသုပ်ဆိုင်ကိုချတာ။ အသုပ်ဆိုင်ကအမျိုးသမီးလည်းပြင်းထန်ဒဏ်ရာရပြီး သူလည်း ပျက်စီး(သေ)တယ်။ ပေါက်တုံမှာက သုံးဘီးမောင်းသမား မြို့ကနေပြန်လာတာ။ ဒရုန်းလာတာတွေ့လို့ သူကသုံးဘီးပေါ်ကခုန်ချပြီးရှောင်တာမှာ သူရှောင်တဲ့ဘက်ကို ဒရုန်းကျပြီးသေတာ။ ရေတော်မူကိုချတာမှာ အိမ်ပေါ်ကျပြီး အိမ်ထဲရှိနေသူတွေသေတာရှိတယ်”လို့ ရွှေဘိုမြို့နယ်ပကဖ တာဝန်ရှိသူက ပြောပါတယ်။

ဒီတိုက်ခိုက်မှုတွေကြောင့် ဘုန်းဘွဲ့ရွာက အသက် ၄၂ နှစ်အရွယ်အမျိုးသမီးသေဆုံး၊ လူလတ်ပိုင်း အမျိုးသမီး ၂ ဦးဒဏ်ရာရကာ လက်ဖက်ရည်ဆိုင်ပျက်စီးခဲ့သလို သစ်ချိုပင်ရွာသား အသက် ၄၀ အရွယ် သုံးဘီးမောင်းသူနဲ့ ရေတော်မူရွာကအသက် ၄၀ အရွယ် လင်မယား ၂ ဦးသေဆုံးပြီး အိမ်နီးချင်းအသက် ၄၀ အရွယ်အမျိုးသား ၁ ဦးနဲ့ အမျိုးသမီး ၁ ဦး ဒဏ်ရာရကာ နေအိမ် ၂ လုံးလည်းပျက်စီးခဲ့တယ်လို့ ဆိုပါတယ်။

လေကြောင်းတိုက်ခိုက်မှုတွေကြောင့် ရေတော်မူရွာက ဒေသခံ ၁၀၀ ဝန်းကျင်ဘေးလွတ်ရာကို တိမ်းရှောင်နေကြရတယ်လို့ သိရပါတယ်။

မေ ၂၂ ရက်ကလည်း ရွှေဘိုမြို့နယ်၊ အနောက်တောင်ခြမ်း၊ ချီပါကျေးရွာကို စက်တပ်လေထီးနဲ့ ဗုံးကြဲခဲ့တာကြောင့် ၁ ဦးသေဆုံးပြီး ၈ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

ရွှေဘို၊ မေ ၂၃၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်အနောက်တောင်ခြမ်းရှိ ချီပါရွာ လေကြောင်းတိုက်ခိုက်ခံရပြီး ၂ ဦးသေဆုံးကာ ၇ ဦးဒဏ်ရာရခဲ့တယ်လို့ ရွေဘိုမြို့နယ်ပကဖတာဝန်ရှိသူတွေဆီက သိရပါတယ်။

မေလ ၂၂ ရက်မနက် ၁၁ နာရီ မိနစ် ၄၀ ကနေ မိနစ် ၂၀ အကြာ စက်တပ်လေထီး ၂ စီးက ရွာထဲကို ဗုံး ၂ လုံးကြဲပြီးနောက် ၁၀ မိနစ်အကြာမှာ နောက်ထပ် Suicide Drone ၃ စီးကလည်း တပြိုင်နက်တည်း ရွာထဲကို တိုက်ခိုက်ခဲ့တာလို့ ဆိုပါတယ်။

“ရွာမြောက်ပိုင်း လူနေအိမ်ဝန်းတွေထဲ ကျတယ်။ တနေရာတည်းမဟုတ်ဘူး။ လမ်းဘေးတွေလည်း ကျတယ်။ လယ်ကြားတွေထဲလည်းကျတယ်။ ရွာထဲကိုဦးတည်ချတာ။” လို့ ရွှေဘိုမြို့နယ်ပကဖ တာဝန်ရှိသူကပြောပါတယ်။

ဗုံးထိမှန်တာကြောင့် အသက် ၈၀ ကျော်အရွယ် အမျိုးသား ၁ ဦးနဲ့ ၂၅ နှစ်အရွယ် အမျိုးသား ၁ ဦး သေဆုံးပြီး အသက် ၃၀ ကနေ ၅၀ ကြား အမျိုးသား ၁ ဦး၊ အမျိုးသမီး ၆ ဦးထိခိုက်ဒဏ်ရာရခဲ့တယ်လို့ ဆိုပါတယ်။

လေကြောင်းတိုက်ခိုက်ခံရတဲ့ ချီပါကျေးရွာထဲမှာ တော်လှန်ရေးအဖွဲ့တွေနေထိုင်တာမရှိသလို တိုက်ပွဲဖြစ်တာလည်းမရှိဘူးလို့ သိရပါတယ်။

လေကြောင်းတိုက်ခိုက်ခံရချိန် ရွာခံတွေမှာ နေအိမ်တွေရှိဗုံးခိုကျင်းတွေထဲ ဝင်ရောက်ပုန်းအောင်းခဲ့ရပြီး ထွက်ပြေးတိမ်းရှောင်မှုတွေတော့ မရှိခဲ့ဘူးလို့ ဆိုပါတယ်။

မေလ ၁၁ ရက်ညကလည်း ရွှေဘိုမြို့နယ်၊ မဲတောကျေးရွာကို လေကြောင်းကနေဗုံးကြဲခံရတာကြောင့် ပြည်သူ ၄ ဦး ထိခိုက်ဒဏ်ရာရခဲ့တယ်လို့ သိရပါတယ်။

စာတည်း – လင်း

ရွှေဘို၊ မေ ၁၂၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်၊ မဲတောကျေးရွာကို လေကြောင်းကနေဗုံးကြဲတာကြောင့် ပြည်သူ ၄ ဦးထိခိုက်ဒဏ်ရာရတယ်လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တွေနဲ့နီးစပ်သူဆီက သိရပါတယ်။

မေ ၁၁ ရက်ည ၉ နာရီကျော်မှာ ဂျက်ဖိုက်တာ ၁ စီးဟာကျေးရွာထဲကို ဗုံး ၃ လုံးကြဲချခဲ့ရာ ရွာစာသင်ကျောင်းနဲ့ ဘုန်းကြီးကျောင်းအနီးကို ကျရောက်ပေါက်ကွဲခဲ့တာလို့ဆိုပါတယ်။

“အဲ့နားမှာ ရဲဘော်လည်းမရှိဘူး။ ဘုန်းကြီးကျောင်းကိုအဓိကထားတာ။ ကျောင်းဝန်းထဲတော့ မကျဘူး။ ဘုန်းကြီးကျောင်းနားရှိတဲ့ ပြည်သူတွေတော့ထိကုန်တာ။” လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့နဲ့နီးစပ်သူတဦးက ပြောပါတယ်။

ဗုံးကြဲခံရမှုကြောင့် ရွာခံအသက် ၃၀ ကနေ ၅၀ ကြားရှိ အမျိုးသမီး ၂ ဦးနဲ့ အမျိုးသား ၂ ဦးလည်း မစိုးရိမ်ရဒဏ်ရာရခဲ့ပြီး ဗုံးဒဏ်ကြောင့် ဘုန်းကြီးကျောင်းနဲ့စာသင်ကျောင်းမှာ ပျက်စီးမှုအချို့ ရှိခဲ့တယ်လို့ ဆိုပါတယ်။

မေ ၄ ရက်ကလည်း ရွှေဘိုမြို့တောင်ဘက်မုခ် စစ်ကော်မရှင်တပ်စွဲနေရာကနေ လွှတ်တင်လိုက်တဲ့ ဒရုန်းက ရေတော်မူကျေးရွာစာသင်ကျောင်းထဲ ကျရောက်ပေါက်ကွဲပြီး အမျိုးသား ၂ ဦး ဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ရွှေဘို၊ မေ ၅၊ ၂၀၂၆။

စစ်ကိုင်းတိုင်း၊ ရွှေဘိုခရိုင်၊ ရွှေဘိုမြို့နယ်နဲ့ ဝက်လက်မြို့နယ်မှာ ဒရုန်းနဲ့တိုက်ခိုက်ခံရပြီး ပြည်သူ ၁ ဦးသေဆုံးကာ ၂ ဦးဒဏ်ရာရခဲ့တယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

မေလ ၄ ရက် မနက် ၁၁ နာရီခန့်မှာ ရွှေဘိုတောင်ဘက်မုခ်အနီးတပ်စွဲထားတဲ့ စစ်ကော်မရှင်တပ်ဖွဲ့ဝင်တွေဟာ ဗုံးတပ်ဆင်ထားတဲ့အသေခံဒရုန်း ၂ စီးကို ဝက်လက်မြို့နယ်၊ အုတ်ပုံရွာနဲ့ ရွှေဘိုမြို့နယ်၊ ရေတော်မူကျေးရွာစာသင်ကျောင်းတို့မှာ တိုက်ခိုက်ခဲ့တာလို့ ဆိုပါတယ်။

“ရေတော်မူစာသင်ကျောင်းထဲက ၁ စီးကျပြီး စာသင်ကျောင်းထဲရှိနေသူထိတာ။ နောက် ၁ စီးက အုတ်ပုံရွာထဲ နေအိမ်ချတာ သစ်ကိုင်းနဲ့တိုက်ပြီး စည်းရိုးတောင်မီးလောင်သွားသေးတယ်။ ဒရုန်းလာလို့ ဝပ်တာ။ အဲ့မှာမှန်တာ။ သေတာကအိမ်ရှင်”လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဒီတိုက်ခိုက်မှုကြောင့် အုတ်ပုံရွာက အသက် ၄၀ ကျော်အမျိုးသား ၁ ဦးနေရာမှာတင်သေဆုံးခဲ့ပြီး ရေတော်မူရွာက အမျိုးသား ၂ ဦးလည်း ထိခိုက်ဒဏ်ရာရခဲ့တယ်လို့ ဆိုပါတယ်။

ဧပြီ ၂၁ ရက်ကလည်း ရွှေဘိုမြို့နယ်၊ ဆောင်နန်းကျေးရွာအနီး လေကြောင်းကနေ ဗုံးကြဲခံရလို့ အမျိုးသမီး ၁ ဦးသေ ၃ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

စစ်ကိုင်း၊ မေ ၁၊ ၂၀၂၆။

စစ်ကိုင်းတိုင်း၊ ဒီပဲယင်း၊ ရွှေဘိုနဲ့ရေဦးမြို့နယ်တွေမှာ စစ်ကော်မရှင်တပ်က လေကြောင်းကနေ ဗုံးကြဲခဲ့တာ‌ကြောင့် နေအိမ်တွေပျက်စီးခဲ့တယ်လို့ ဒေသခံတွေနဲ့ ရေဦးမြို့နယ်ပကဖပြန်ကြားရေးတာဝန်ရှိသူဆီက သိရပါတယ်။

ဧပြီ ၃၀ ရက် ညနေ ၃ နာရီကျော်မှာ ဒီပဲယင်းမြို့နယ်အရှေ့တောင်ဘက်ခြမ်း ဖုတ္တတောကျေးရွာအနီးကို ဂျက်ဖိုက်တာ ၁ စီးနဲ့ လေကြောင်းတိုက်ခိုက်မှု ၄ ကြိမ် ပြုလုပ်ခဲ့ရာ နေအိမ် ၃ လုံးပျက်စီးမှုရှိခဲ့တယ်လို့ ဆိုပါတယ်။

မေလ ၁ ရက် ဒီမနက် ၁ နာရီ၀န်းကျင်မှာလည်း ဂျက်ဖိုက်တာ ၁ စီးက ရွှေဘိုမြို့နယ်၊ ဆောင်နန်းကျေးရွာအနီး ဒေသအခေါ် ဇင်ကြီးကုန်းကို ဗုံး ၂ လုံးကြဲချခဲ့တယ်လို့ ဆိုပါတယ်။

“လူထိခိုက်တာမရှိဘူး။ တောတိုက်လေးတွေ။ လူလည်းမနေပါဘူး။ ဟိုတနေ့ကဖြစ်ပြီးကတည်းက ဘယ်သူမှမနေဘူး။ မကျေနပ်လို့ ဗုံးလာထပ်ကြဲတာနေမယ်။ “လို့ ဒေသခံတဦးက ပြောပါတယ်။

အဆိုပါ ဗုံးကြဲမှုအတွင်း လူမနေတဲ့ တဲအိမ် ၂ လုံးပျက်စီးခဲ့ပြီး ဗုံးကျလို့ မြေကျင်းချိုင့်တွေဖြစ်ခဲ့တယ်လို့ ဆိုပါတယ်။

ဒါ့အပြင်မနက် ၁၁ နာရီကျော်မှာလည်း ဂျက်ဖိုက်တာ ၁ စီးနဲ့တံတားဦးကတက်လာတဲ့ ဂျက်ဖိုက်တာ ၁ စီးက ရေဦးနဲ့ တန့်ဆည်မြို့နယ်အစပ်ကို ဗုံး ၃ ကြိမ်ကြဲခဲ့တယ်လို့ ရေဦးမြို့နယ်ပကဖပြန်ကြားရေးတာဝန်ရှိသူကပြောပါတယ်။

“ရေဦးနဲ့တန့်ဆည်ချုပ်စပ်နေရာလို့ပဲ ပြောလို့ရမယ်။ ရေဦးအနောက်ခြမ်းပေါ့။ ဗုံးကျတာက တောထဲတနေရာပါ။ လူတော့မထိဘူး။ အဆောက်အဦအပျက်စီးက မြေပြင်ဆင်းမကြည့်ရသေးတော့ အတည်မပြုနိုင်သေးဘူး”လို့ သူကပြောပါတယ်။

ပြီးခဲ့တဲ့ဧပြီ ၂၁ ရက်ကလည်း ရွှေဘိုမြို့နယ်၊ ဆောင်နန်းကျေးရွာအနီး လေကြောင်းကနေ ဗုံးကြဲခံရလို့ အမျိုးသမီး ၁ ဦးသေဆုံးပြီး ၃ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ရွှေဘို၊ ဧပြီ ၂၂၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်၊ ဆောင်နန်းကျေးရွာအနီး လေကြောင်းကနေဗုံးကြဲခဲ့တာကြောင့် အမျိုးသမီး ၁ ဦးသေဆုံးပြီး ၃ ဦးဒဏ်ရာရတယ်လို့ ကျေးရွာနဲ့နီးစပ်သူတွေဆီက သိရပါတယ်။

ဧပြီ ၂၁ ရက်ည ၁၁ နာရီ ၄၅ မိနစ်မှာ ဂျက်ဖိုက်တာ ၂ စီးကကျေးရွာအနီးတောစပ်ကို ဗုံး ၃ လုံးကြဲချခဲ့တယ်လို့ ဆိုပါတယ်။

“ရွာသူရွာသားတွေ ဆိတ်မွေး၊ နွားမွေးလုပ်နေတဲ့တောတိုက်ကိုမှ ဘယ်သူကဘယ်လိုသတင်းပေးလို့ ကြဲမှန်းမသိဘူး။ တဲပေါ်မီးလောင်ဗုံးကျလို့ မိန်းမက မီးဖုတ်ပြီးသားဖြစ်သွားတယ်။ တလုံးက ဆိတ်ခြံထဲကျတယ်”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးကြဲခံရတာကြောင့် အသက် ၄၅ နှစ်အရွယ် ဒေါ်မဲစိန်ဆိုသူ နေရာတင်သေဆုံးပြီး မိသားစုဝင်တွေဖြစ်တဲ့ အသက် ၂၀ ကနေ ၄၀ ကြား အမျိုးသား ၃ ဦး ဒဏ်ရာရခဲ့တယ်လို့ဆိုပါတယ်။

ဒါ့အပြင် တဲ ၁ လုံးမီးလောင်ပျက်စီးပြီး ဆိတ် ၁၄ ကောင်နဲ့နွား ၃ ကောင်လည်းသေဆုံးသွားတယ်လို့ သိရပါတယ်။

ဧပြီ ၆ ရက်ကလည်း ရွှေဘိုမြို့နယ်၊ ဆင်အင်းကျေးရွာအနီးတောစပ်ကို ဗုံးကြဲခဲ့တာကြောင့် သံဃာ ၁ ပါးအပါအဝင် ၂ ဦးသေဆုံးကာ ၉ ဦးဒဏ်ရာရတယ်လို့ သိရပါတယ်။

စာတည်း – လင်း

ရွှေဘို၊ ဧပြီ ၇၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်၊ ဆင်အင်းကျေးရွာအနီးတောစပ်ကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် သံဃာ ၁ ပါးအပါအဝင် ၂ ဦးသေဆုံးကာ ၉ ဦးဒဏ်ရာရခဲ့တယ်လို့ ရွာခံတွေဆီက သိရပါတယ်။

ဧပြီ ၆ ရက်မနက် ၁၁ နာရီခန့်မှာ ကျေးရွာအနီးတောစပ်မှာ ရွာခံတွေစုဖွဲ့နေထိုင်တဲ့နေရာကို စစ်ကော်မရှင်ရဲ့ ဂျက်ဖိုက်တာ ၁ စီးက ဗုံး ၄ လုံးကြဲချခဲ့ရာ ၂ လုံးက ပဲခင်းထဲကျရောက်ပေါက်ကွဲပြီး ၂ လုံးက ဘုန်းကြီးကျောင်းအနီး ကျရောက်ပေါက်ကွဲခဲ့တယ်လို့ ဆိုပါတယ်။

“စစ်ရှောင်နေရာလည်း မဟုတ်ဘူး။ နဂိုကတည်းက ရွာခံတွေက တောတက်လုပ်စားတဲ့သူတွေစုနေတဲ့ နေရာပေါ့နော်။ နွားတွေဘာတွေ မွေးနေကြတယ်။ ဟိုတုန်းကတည်းက နေတဲ့ တဲတွေပါ။ ဘုန်းကြီးကလည်း တောထဲမှာနေတာကြာပြီ။ စစ်ရှောင်စခန်းလည်းမဟုတ်ဘဲနဲ့ လာကြဲတာ ဘုန်းကြီးလည်းပျံလွန်တော်မူသွားတယ်”လို့ ရွာခံတဦးက ပြောပါတယ်။

ဗုံးပေါက်ကွဲထိမှန်လို့ သက်တော် ၄၀ ကျော်အရွယ် သံဃာ ၁ ပါး ပျံလွန်တော်မူပြီး ဘုန်းကြီးအတွက် ဝေယျာဝစ္စလုပ်ကိုင်ပေးနေသူ အသက် ၆၀ ကျော်အရွယ်အမျိုးသမီး ၁ ဦးသေဆုံးခဲ့ကာ အသက် ၂၀ ကျော်အရွယ် လူငယ် ၃ ဦး၊ အသက် ၄၀ ဝန်းကျင် အမျိုးသား ၄ ဦးနဲ့ အသက် ၂၀ ကနေ ၃၀ အကြား အမျိုးသမီး ၂ ဦးဒဏ်ရာရခဲ့တယ်လို့ ဆိုပါတယ်။

ဗုံးကြဲခံရတဲ့နေရာဝန်းကျင်မှာ တဲအရေအတွက် ၁၅ တဲနဲ့ ဘုန်းကြီးကျောင်းသာရှိပြီး ဗုံးကြဲမှုအတွင်း ဘုန်းကြီးကျောင်းနဲ့တဲအချို့ပျက်စီးခဲ့ကာ တဲစုမှာနေထိုင်သူတွေကတော့ ဘေးလွတ်ရာကို တိမ်းရှောင်နေကြရတယ်လို့ ဆိုပါတယ်။

ဇန်နဝါရီ ၂၆ ရက်ကလည်း ရွှေဘိုမြို့နယ်၊ ငပိအိုးကျေးရွာ လေကြောင်းကနေ ဗုံးကြဲခံရလို့ ပြည်သူ ၃ ဦးသေပြီး ၈ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

■ အကန့်အသတ်နဲ့သာရောင်းချနေလို့ ဒေသခံရာနဲ့ချီ စောင့်ဆိုင်းဝယ်ယူနေရ

ရွှေဘို၊ မတ် ၉၊ ၂၀၂၆။

စစ်ကော်မရှင်က စက်သုံးဆီနဲ့ပတ်သက်တဲ့ ကန့်သတ်ချက်တွေထုတ်ပြန်လာပြီးနောက် စစ်ကိုင်းတိုင်း၊ ရွှေဘိုမြို့နယ်ရှိ လမ်းဘေးဆီဆိုင်တွေမှာ စက်သုံးဆီ ၁ လီတာ ကျပ် ၁၀,၀၀၀ ကျော်ထိ စျေးတက်နေတယ်လို့ ရွှေဘိုဒေသခံတွေဆီက သိရပါတယ်။

ရွှေဘိုမြို့ပေါ်က စက်သုံးဆီရောင်းပေးနေတဲ့ ဆိုင်ကြီးတွေမှာတော့ ဓာတ်ဆီ ၁ လီတာကျပ် ၃,၁၀၀ ဝန်းကျင်သာရှိပေမယ့် ပြင်ပလမ်းဘေးဆိုင်တွေမှာတော့ ယခင် ၁ လီတာကို ၄,၅၀၀ ကျပ်ကနေ မတ်လ ၅ ရက်ကစပြီး ၁ လီတာ ကျပ် ၁၂,၀၀၀ အထိ စျေးပေးဝယ်ယူရတယ်လို့ ဆိုပါတယ်။

“၁၂,၀၀၀ တောင်ဝယ်မရဘူး။ BOC ကပေးတာက ၃,၀၉၀ နဲ့ပေးတာ။ အပြင်က တိုးတန်းရောင်းနေတဲ့ဟာတွေ (ဆီဆိုင်ကြီးတွေမှာ တန်းစီးတိုးပြီး တဆင့်ပြန်ရောင်းချသူ) က ၁၀,၀၀၀ ကျော်နဲ့ ရောင်းနေကြတာ။ ညီမတို့က မတိုးနိုင်လို့ ရွာဘက်ကနေလှမ်းမှာပြီး သုံးနေရတယ်။ “လို့ ရွှေဘိုမြို့ပေါ်နေ ဒေသခံအမျိုးသမီးတဦးက ပြောပါတယ်။

ရွှေဘိုမြို့ပေါ်မှာ BOC အပါအဝင် စက်သုံးဆီဆိုင်ကြီး ၆ ဆိုင်ရှိပြီး ယာဥ်အမျိုးအစားအလိုက် အကန့်အသတ်နဲ့သာရောင်းချနေရတာကြောင့် ဆီဆိုင်တွေမှာ နေ့စဥ်တန်းစီဝယ်ယူနေရသူ ကား၊ ဆိုင်ကယ် ရာချီရှိနေတာလို့ သိရပါတယ်။

အရှေ့အလယ်ပိုင်းဒေသ အီရန်-အမေရိကန်နဲ့အစ္စရေးစစ်ပွဲတွေကြောင့် မတ်လ ၄ ရက်ကစတင်ပြီး စစ်ကော်မရှင်တပ်က စက်သုံးဆီအရောင်းဆိုင်တွေက ဆီရောင်းချပေးရာမှာ ဆိုင်ကယ် ၁ စီး ၅,၀၀၀၊ အိုးဝေ၊ သုံးဘီး ၁ စီးကို ၁၀,၀၀၀ ကျပ်၊ အိမ်စီးကား ၁ စီးကို ၃၀,၀၀၀ ကျပ်၊ ခရီးသည်တင်ယာဥ် ၁၀၀,၀၀၀ ကျပ်၊ ဒီဇယ် နံပါတ်အနီ ၄၀,၀၀၀ ကျပ်နဲ့ နံပါတ်အနက် ၃၀,၀၀၀ ကျပ်ဖိုးသာ ရောင်းချပေးဖို့ ညွှန်ကြားလာတာပါ။

စစ်ကော်မရှင်ထိန်းချုပ်ထားတဲ့ ရွှေဘိုမြို့ပေါ်မှာ စက်သုံးဆီရရှိဖို့ အချိန်ကြာမြင့်စွာ စောင့်ဆိုင်းဝယ်ယူနေရသလို တော်လှန်ရေးတပ်တွေထိန်းချုပ်ဒေသတွေမှာလည်း စက်သုံးဆီရရှိဖို့ဆီဆိုင်တွေမှာ တန်းစီတိုးဝယ်နေရပြီး ရွာတွေမှာတော့ ဓာတ်ဆီ ၁ လီတာ ကျပ် ၁၀,၀၀၀ ထိပေးဝယ်ရတယ်လို့ ဆိုပါတယ်။

“အရာတော်လမ်းခွဲဘက်က ဆီဆိုင်တွေကနေ ဘယ်လိုသယ်လဲတော့မသိဘူး။ ပုံးဝါလေးတွေနဲ့ ရွာကို သယ်သယ်လာကြတာရှိတယ်။ ကျနော်တို့နယ်ထဲတော့ ပန့်ဆိုင် ၁ ဆိုင်က ဆိုင်ကယ် ၁ စီးလာရင် ၁ လီတာဗူး ၁ ဘူးရောင်းပေးတယ်။ စျေးကတော့ ၅,၅၀၀၊ ၆,၀၀၀ ပေါ့။ ၁ ဘူးထက်တော့ ပိုရောင်း မပေးဘူး။ ရွာရောက်လာရင်တော့ ၁၀,၀၀၀။ သူတို့ကလည်း ဝယ်ယူစရိတ်၊ သယ်ယူစရိတ် ရှိတာကိုး။ သူတို့ကပန့်ဆိုင်ကနေယူပြီး ပြန်ရောင်းတာ”လို့ ဆင်အင်းရွာခံတဦးက ပြောပါတယ်။

စက်သုံးဆီစျေးတွေမြင့်တက်တာနဲ့ အလွယ်တကူဝယ်မရတာတွေကြောင့် စားအုန်းဆီစျေးတွေလည်း ယခင် ၁ ပိသာကျပ် ၁၀,၀၀၀ ကနေ ကျပ် ၁၄,၀၀၀ အထိမြင့်တက်သွားသလို အခြားအခြေခံ အစားအသောက်တွေကလည်း အမျိုးအစားအလိုက် ကျပ် ၁,၀၀၀ ကနေ ၅,၀၀၀ ကြားထိ စျေးတက်လာတယ်လို့ ဆိုပါတယ်။

ဒါ့အပြင်ဆီရောင်းချမှုကိုလည်း ဆိုင်တွေဘက်က အကြောင်းပြပိတ်ထားတာမျိုးမပြုလုပ်ရဘဲ နေ့စဥ် မနက် ၆ နာရီမှညနေ ၆ နာရီအထိ ရောင်းချပေးရမှာဖြစ်ပြီး ဆီဆိုင်တွေအရောင်းပိတ်ထားပါက ဆက်သွယ် တိုင်ကြားနိုင်တယ်ဆိုပြီး စစ်ကော်မရှင်တပ်ရဲ့ မတ်လ ၄ ရက်ထုတ် ညွှန်ကြားချက်မှာပါရှိပါတယ်။

မြို့ တွေရှိ စက်သုံးဆီအရောင်းဆိုင်များအနေနဲ့လည်း သက်ဆိုင်ရာမြို့နယ် အုပ်ချုပ်ရေးမှူးတွေရဲ့ ထောက်ခံချက်နဲ့သာ ရောင်းချပေးရန်စီမံသွားဖို့၊ အရောင်းဆိုင်များမှ ပုံး/ပေပါနဲ့ ရောင်းချခြင်း လုံးဝ (လုံးဝ) ဆောင်ရွက်ခြင်းမပြုရန်၊ ဖုန်းတာဝါတိုင်နဲ့ အခြားလုပ်ငန်းသုံးတွေကို ရောင်းချမယ်ဆိုပါကလည်း သက်ဆိုင်ရာမြို့နယ် အုပ်ချုပ်ရေးမှူးတွေရဲ့ စိစစ်ထောက်ခံချက်နဲ့သာ ရောင်းချသွားဖို့ ညွန်ကြားထားပါတယ်။

ဒါ့အပြင် မတ်လ ၇ ရက် နံနက်ပိုင်းမှစပြီး စက်သုံးဆီအရောင်းဆိုင်တွေက စုံရက်တွေမှာ စုံနံပါတ် အက္ခရာပါသော ယာဉ်နဲ့ မရက်တွေမှာ မနံပါတ်အက္ခရာပါတဲ့ယာဥ်တွေကိုသာ ရောင်းချပေးဖို့၊ အများသုံးသယ်ယူပို့ဆောင်ရေးယာဥ်၊ ဆောက်လုပ်ရေးလုပ်ငန်းသုံးယာဥ်၊ ကုန်ပို့ဆောင်ရေးယာဥ်၊ လူနာတင်ယာဥ်နဲ့ အမှိုက်သိမ်းယာဥ်တို့ကို စျေးနှုန်းမမြှင့်တင်ဘဲနေ့စဥ်ရောင်းချပေးဖို့ ညွှန်ကြားချက်မှာ ပါရှိပါတယ်။

စာတည်း – လင်း