စစ်ကော်မရှင်

ချောင်းဦး၊ ဩဂုတ် ၁၊ ၂၀၂၆။

စစ်ကိုင်းတိုင်း၊ ချောင်းဦးမြို့နယ်၊ ခင်မွန်ကျေးရွာထဲကိုရောက်နေတဲ့ ပအဖတာဝန်ခံအပါ ၃ ဦးကို စစ်ကော်မရှင်တပ်တွေကပစ်သတ်ခဲ့တယ်လို့ ဖြစ်စဥ်ကိုသိရှိတဲ့ဒေသကာကွယ်ရေးအဖွဲ့ဝင်တွေဆီက သိရပါတယ်။

ပစ်သတ်ခံရသူတွေဟာ အသက် ၂၅ နှစ်ကနေ ၃၀ ကြားရှိ ခင်မွန်ကျေးရွာပအဖတာဝန်ခံနဲ့ စစ်ကော်မရှင်တပ်ရဲ့ သတင်းတွေကိုထောက်လှမ်းပေးတဲ့ အမျိုးသား ၂ ဦးတို့ဖြစ်ပြီး ဇူလိုင်လ ၃၀ ရက် ညနေ ၄ နာရီကျော်မှာ ပစ်သတ်ခံခဲ့ရတာလို့ ဆိုပါတယ်။

“ရွာထဲ သူတို့အသိအိမ်မှာရှိနေချိန် ဝင်စီးခံရတာ။ အိမ်စီးကားနဲ့ရောက်လာပြီး ပစ်ခတ်တာ။ အရပ်ဝတ်တွေနဲ့ပဲ။ သတင်းပေးရှိလို့ပဲ ရဲဘော်တွေရောက်နေတာကိုသိပြီး လာပစ်သွားတာ”လို့ ဖြစ်စဥ်ကိုသိတဲ့ ဒေသကာကွယ်ရေးအဖွဲ့ဝင်တဦးက ပြောပါတယ်။

ပစ်ခတ်မှုကြောင့် ၃ ဦးစလုံးမှာ နေရာမှာတင်သေဆုံးခဲ့ပြီး အလောင်းတွေကိုတော့ စစ်ကော်မရှင်တပ်တွေ ထွက်သွားပြီးနောက် ရွာခံတွေနဲ့ သက်ဆိုင်ရာတပ်ဖွဲ့တွေဘက်က ကောက်ယူသင်္ဂြိုဟ်လိုက်တယ်လို့ ဆိုပါတယ်။

ခင်မွန်ကျေးရွာဟာ စစ်ကော်မရှင်အဖွဲ့တွေရော တော်လှန်ရေးတပ်ဖွဲ့ဝင်တွေပါ ဝင်ထွက်သွားလာနေတဲ့ ကျေးရွာဖြစ်ပြီး နှစ်ဘက်စလုံးက ကျေးရွာထဲအထိုင်ချနေထိုင်တာမျိုးတော့မရှိဘူးလို့ ဆိုပါတယ်။

စစ်ကော်မရှင်ထောက်ခံတယ်လီဂရမ်တွေမှာတော့ ကျေးရွာထဲကင်းပုန်းဝပ်နေချိန် PDF တပ်ဖွဲ့ဝင်တွေ ဝင်ရောက်လာလို့ ပစ်ခတ်ခဲ့တာဖြစ်ပြီး အလောင်း ၃လောင်း၊ AK ကျည် ၂၈ တောင့်၊ လက်ပစ်ဗုံး ၂လုံး ၊ TYT စကားပြောစက်တို့ကို သိမ်းဆည်းရမိတယ်လို့ ဖော်ပြထားပေမယ့် အဆိုပါပစ္စည်းတွေဟာ ကျဆုံးသူတွေရဲ့ ပစ္စည်းတွေ ဟုတ် မဟုတ်ကတော့ အတည်မပြုနိုင်သေးဘဲ အလောင်းတွေကတော့ မှန်ကန်ကြောင်း အထက်ပါကာကွယ်ရေးအဖွဲ့ဝင်က ပြောပါတယ်။

ဖေဖော်ဝါရီ ၈ ရက်ကလည်း မြင်းမူမြို့နယ်၊ ထီးဆောင်းကျေးရွာနဲ့ကန်ပြားကျေးရွာကြားရှိ PDF စခန်းတခုစီးနင်းခံရပြီး တပ်ဖွဲ့ဝင် ၄ ဦးဒဏ်ရာရကာ ပစ္စည်းအချို့ဆုံးရှုံးခဲ့တဲ့ဖြစ်စဥ်ရှိခဲ့ပါသေးတယ်။

စစ်ကိုင်း၊ ဇွန် ၂၅၊ ၂၀၂၆။

စစ်ကိုင်းတိုင်း၊ မုံရွာ၊ မြင်းမူ၊ ချောင်းဦး၊ စစ်ကိုင်း၊ ဘုတလင်မြို့နယ်တွေမှာ တိုက်ပွဲဖြစ်ခဲ့ပြီး စစ်ကော်မရှင်တပ်ဖွဲ့ဝင် ၃၃ ဦးသေဆုံးတယ်လို့ ဇွန် ၂၄ ရက်မှာ ပြည်သူ့ကာကွယ်ရေးတပ်မတော် – PDF က သတင်းထုတ်ပြန်ပါတယ်။

မေ ၅ ရက်မှာ မုံရွာမြို့နယ်၊ မုံရွာ-ယာကြီး-ကလေးဝလမ်းပေါ် သင့်ငံရွာမှာရောက်ရှိနေတဲ့ တပ်မ ၉၉ လက်အောက်ခံ ခမရ-၁၄ မှ အင်အား ၂၀၀ ပါစစ်ကြောင်းကို ယင်းမာပင်ခရိုင်စစ်ဌာနကွပ်ကဲမှုနဲ့ မိုင်းခွဲ တိုက်ခိုက်ခဲ့ရာ စစ်ကော်မရှင်တပ်ဖွဲ့ဝင် ၆ ဦး သေဆုံးပြီး ထိခိုက်ဒဏ်ရာရသူအများအပြားရှိတယ်လို့ ဆိုပါတယ်။

အဲ့ဒီနောက် မေ ၆ ရက်မှာ အဲ့ဒီစစ်ကြောင်းကခွဲထွက်လာတဲ့ အင်အား ၅၀ ပါ စစ်ကြောင်းဟာ ချောင်းမရွာကိုရောက်လာစဥ် သေဆုံးတပ်သား ၁ ဦးရဲ့ ရုပ်အလောင်းကိုမြှုပ်ကာ ကျန်ဒဏ်ရာရ တပ်သားတွေနဲ့ ဘန့်ဘွေး(ပျူရွာ)ကိုဝင်ရောက်သွားတယ်လို့ ထုတ်ပြန်ချက်မှာဖော်ပြထားပါတယ်။

ဒါ့အပြင် မေ ၁၉ ရက်မှာလည်း မြင်းမူမြို့နယ်၊ အလ္လကပ္ပရွာအရှေ့ထိပ် စစ်ကော်မရှင်ဂိတ်က ထွက်လာတဲ့ စစ်ကော်မရှင်တပ်သားတွေကို လက်လုပ်မိုင်း ၃ လုံးနဲ့ မိုင်းဆွဲတိုက်ခိုက်ခဲ့ရာ ၃ ဦး သေဆုံးပြီး ၃ ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။

အလားတူ ဇွန် ၂ ရက်မှာ ချောင်းဦးမြို့နယ်၊ ငါးယှန်ကျေးရွာကထွက်လာတဲ့ တပ်မ ၃၃ လက်အောက်ခံ ခလရ – ၇၆)၊ ခမရ – ၁၃၊ ရတဖ – ၁၆၊ ပြည်သူ့စစ်ပူးပေါင်းအင်အား ၁၀၀ ပါစစ်ကြောင်းကို ချောင်းဦး – ပခုက္ကူ လမ်းပိုင်းပေါ်ရှိ ဆင်မြေကျေးရွာကိုထွက်လာချိန် ထပ်မံတိုက်ခိုက်ခဲ့ပါတယ်။

ဒီတိုက်ခိုက်မှုအတွင်း စစ်ကော်မရှင်တပ်ဖွဲ့ဝင် ၂၃ ဦးသေဆုံး၊ ၉ ဦးဒဏ်ရာရကာ စစ်သုံ့ပန်း ၂ ဦးဖမ်းမိပြီး လက်နက်မျိုးစုံ ၁၆ လက်လည်းသိမ်းဆည်းနိုင်ခဲ့တယ်လို့ ဆိုပါတယ်။

အလားတူ ဇွန် ၅ ရက်မှာလည်း စစ်ကိုင်းမြို့နယ်၊ ကျောက်ဆည်ရွာနဲ့ အုန်းတောရွာကြားမှာ နမခ က ထွက်လာတဲ့ သံပြားကာ ကား ၈ စီး၊ ဆီဘောက်ဆာ ကား ၁၄ စီးကို စစ်ကိုင်းခရိုင်စစ်ဌာနကွပ်ကဲမှုနဲ့ မိုင်း ၆ လုံးသုံးတိုက်ခိုက်ရာ ကား ၁ စီးပျက်စီးပြီး ထိခိုက်ဒဏ်ရာရသူ အများအပြားရှိခဲ့တယ်လို့ ဆိုပါတယ်။

အဲ့ဒီနေ့မှာပဲ မြင်းမူမြို့နယ်၊ ထီးဆောင်းရွာ အရှေ့ဘက် စစ်ကိုင်း တမခ -၃၃ မှ ထွက်ခွာလာတဲ့ သံပြားကာ ကား ၈ စီး၊ ၁၂ ဘီးကား ၂ စီး နဲ့ ၆ ဘီးကား ၅ စီးကို စစ်ကိုင်းခရိုင်စစ်ဌာနကွပ်ကဲမှုနဲ့ ကြားဖြတ်မိုင်းဆွဲတိုက်ခိုက်ခဲ့သေးတယ်လို့ ထုတ်ပြန်ချက်မှာ ဖော်ပြပါတယ်။

ဇွန် ၁၅ ရက်မှာလည်း မြင်းမူမြို့နယ်၊ ဂွေးပင်တောရွာအထိုင်ချစစ်ကော်မရှင်တပ်သား အင်အား ၂၅ ဦးခန့်နဲ့ မြောင်လမ်းခွဲနဲ့ ဂွေးပင်တောရွာကြား ကင်းပုန်းဝပ်ဖို့ထွက်လာချိန် မိုင်းဆွဲတိုက်ခိုက်ခဲ့တယ်လို့ ဆိုပါတယ်။

အဲ့ဒီနေ့မှာပဲ စစ်ကိုင်းမြို့နယ်၊ နှုံးတွင်းရွာနဲ့ နတ်ခရိုင်ရွာကြား နမခ ကထွက်လာတဲ့ စစ်ယာဥ်တန်းကို လက်လုပ်မိုင်း ၂ လုံးနဲ့ မိုင်းဆွဲတိုက်ခိုက်ခဲ့ရာ ကား ၂ စီးထိခိုက်ပျက်စီးခဲ့သလို စစ်ကိုင်း တမခ -၃၃ မှ ထွက်လာတဲ့ စစ်ယာဥ်တန်းကို မြင်းမူမြို့နယ်၊ ထီးဆောင်းရွာအရှေ့ဘက်မှာ ထပ်မံပြီး ပဒေသာမိုင်း ၃ လုံးနဲ့ မိုင်းဆွဲတိုက်ခိုက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဇွန် ၁၈ ရက်မှာတော့ ဘုတလင်မြို့နယ်၊ အနောက်ဇီးတောရွာမှ ဘုတလင်မြို့ ထွေ/အုပ်ရုံးကို ထွက်လာတဲ့ နမခ မှ အင်အား ၂၅၀ ခန့်ပါစစ်ကြောင်းကို မုံရွာခရိုင်စစ်ဌာနကွပ်ကဲမှုနဲ့ စောင့်ကြို မိုင်းဆွဲတိုက်ခိုက်ခဲ့ရာ စစ်ကော်မရှင်တပ်ဖွဲ့ဝင် ၅ ဦးခန့် ပြင်းထန်ထိခိုက်ဒဏ်ရာ ရရှိခဲ့တယ်လို့ သိရပါတယ်။

ဒီတိုက်ခိုက်မှုတွေအတွင်း စစ်ကော်မရှင်တပ်ဖွဲ့ဝင် ၃၃ ဦးသေဆုံးကာ ၁၇ ဦး ထိခိုက်ဒဏ်ရာရရှိပြီး စစ်သုံ့ပန်း ၂ ဦး အပါအဝင် လက်နက်မျိုးစုံ ၁၆ လက်နဲ့ ခဲယမ်းပစ္စည်းတွေကို သိမ်းပိုက်ရရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

အုတ်ဖို၊ ဇွန် ၁၀၊ ၂၀၂၆။

ပဲခူးတိုင်း၊ အုတ်ဖိုမြို့နယ်၊ ထန်းပင်ကုန်းကျေးရွာကို စစ်ကော်မရှင်စစ်ကြောင်းကမီးရှို့ခဲ့တာကြောင့် နေအိမ် ၇၀ မီးလောင်ပျက်စီးခဲ့တယ်လို့ ဒေသအခြေစိုက်ကာကွယ်ရေးအဖွဲ့တာဝန်ရှိသူတွေဆီက သိရပါတယ်။

ဇွန် ၉ ရက်မနက် ၇ နာရီကျော်မှာ ချောင်းဂွရွာကထွက်လာတဲ့ အင်အား ၁၀၀ ကျော်ပါ စစ်ကော်မရှင်စစ်ကြောင်းဟာ ရွာထဲကိုရောက်လာပြီးနောက် ကျေးရွာအနောက်ပိုင်းရှိ နေအိမ်တွေကို မီးရှို့ခဲ့တာလို့ဆိုပါတယ်။

“မီးတို့တာ။ မိုးတွေရွာလို့ နေ့လည်လောက်မီးငြိမ်းသွားတယ်။ မနက်ပိုင်းမီးတွေ တော်တော်လောင်တယ်။ အနောက်ပိုင်းတပိုင်းလုံးနီးပါးကုန်တယ်။ အိမ်ထဲကနေ ဆယ်ဘီးကားတွေနဲ့ ပစ္စည်းတွေသယ်ပြီးမှရှို့တာ”လို့ ဒေသအခြေစိုက်ကာကွယ်ရေးတပ်ဖွဲ့တာဝန်ရှိသူကပြောပါတယ်။

မီးရှို့ခံရတာကြောင့် အိမ်ခြေ ၃၀၀ ကျော်ရှိထန်းပင်ကုန်းရွာက အိမ်ခြေ ၇၀ ခန့်မီးလောင်ပျက်စီးနိုင်ပြီး စစ်ကော်မရှင်စစ်ကြောင်းကတော့ ဇွန် ၁၀ ရက်ဒီကနေ့အထိ ရွာထဲမှာပဲရှိနေသေးတယ်လို့ ဆိုပါတယ်။

ဒါ့အပြင် ဒီမနက် ၆ နာရီကျော်ကစတင်ပြီး ရွာထဲတပ်စွဲထားတဲ့ စစ်ကော်မရှင်အဖွဲ့တွေက ရိုးမအတွင်းတောစပ်တွေကို လက်နက်ကြီးတွေနဲ့ဆက်တိုက်ပစ်ခတ်နေကာ ထိခိုက်မှုအခြေနေကိုတော့ မသိရသေးဘူးလို့ ဆိုပါတယ်။

ပြီးခဲ့တဲ့ဇွန် ၁ ရက်ကလည်း အုတ်ဖိုမြို့နယ်၊ ချောင်းဂွ၊ ကျွဲတဲကုန်း၊ ချောင်းဆုံလေးကျေးရွာတွေကို စစ်ကော်မရှင်အဖွဲ့တွေက မီးရှို့တာကြောင့် အိမ်ခြေ ၁၀၀ ကျော် မီးလောင်ပျက်စီးခဲ့ပါသေးတယ်။

စာတည်း – လင်း

ဝက်လက်၊ ဇွန် ၄၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ရွှေကျင်ကျေးရွာမှာ လက်နက်ကြီးကျပြီး ပြည်သူ ၃ ဦး ထိခိုက် ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဇွန် ၃ ရက်ညနေ ၄ နာရီကျော်မှာ လှတောရွာမှာအခြေစိုက်ထားတဲ့ စစ်ကော်မရှင်တပ်ဖွဲ့ဝင်တွေက လက်နက်ကြီးနဲ့ပစ်ခတ်ခဲ့ရာ ကျေးရွာအပြင်ဘက်ရှိ စားသောက်ဆိုင် ၁ ခုအနီး ကျရောက်ပေါက်ကွဲခဲ့တာလို့ ဆိုပါတယ်။

“စကစ စခန်းကနေ ကောင်တာ ပြန်ထုတာလို့တော့ သိရတယ်။ ၁ လုံးတည်း အသံကြားရတယ်။ MK စားသောက်ဆိုင်နားကျတာ။ ရွှေကျင်စျေးတန်းနားပေါ့။ ထိတဲ့သူတွေက ဆိုင်ထဲရှိနေကြတာ။ ကျနော်ရောက်တော့ ထိတဲ့သူတွေကမရှိကြတော့ဘူး။ ဆေးထိုးသွားတဲ့သူ သွားကြတာဆိုတော့”လို့ ဒေသခံတဦးကပြောပါတယ်။

လက်နက်ကြီးပေါက်ကွဲစထိမှန်တာကြောင့် အသက် ၃၀ ကနေ ၄၀ ကြားအရွယ်ရှိအမျိုးသား ၃ ဦးထိခိုက်ဒဏ်ရာရပြီး နီးစပ်ရာမှာဆေးကုသမှုခံယူနေကြကာ ရွာခံအချို့လည်း ဘေးလွတ်ရာကိုတိမ်းရှောင်နေကြတယ်လို့ ဆိုပါတယ်။

လက်နက်ကြီးမပစ်ခင် တော်လှန်ရေးအဖွဲ့ဝင်တွေက လှတောအခြေစိုက် စစ်ကော်မရှင်အဖွဲ့စခန်းကို သွားရောက်တိုက်ခိုက်ခဲ့ပြီး ထိခိုက်မှုအခြေနေတော့ မသိရဘူးလို့ ဆိုပါတယ်။

မေ ၂၈ ရက်ကလည်း ဝက်လက်မြို့နယ်၊ ရေထွက်ကျေးရွာကိုစစ်ကော်မရှင်ဘက်က အသေခံဒရုန်းနဲ့ ဗုံးချတာကြောင့် ဒေသကာကွယ်ရေးအဖွဲ့ဝင် ၁ ဦးသေဆုံးပြီး နောက်ထပ်အဖွဲ့ဝင် ၁ ဦးနဲ့ပြည်သူ ၁ ဦး ဒဏ်ရာရခဲ့တယ်လို့ သိရပါတယ်။

စာတည်း – လင်း

ရွှေဘို၊ မေ ၂၈၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်က ချီပါ၊ ဘုန်းဘွဲ့၊ ပေါက်တုံ၊ ရေတော်မူရွာတို့ကို စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့တာကြောင့် ပြည်သူ ၄ ဦးသေဆုံးခဲ့တယ်လို့ ရွှေဘိုမြို့နယ်ပကဖ တာဝန်ရှိသူတွေဆီက သိရပါတယ်။

မေ ၂၇ ရက်မနက် ၁၀ နာရီ ၄၅ မိနစ်ခန့်မှာ ချီပါရွာကားလမ်းဘေး လက်ဖက်ရည်ဆိုင်အနီးကို ဒရုန်းဗုံးနဲ့ ၁ ကြိမ်၊ မနက် ၁၁ နာရီခန့်မှာ ဘုန်းဘွဲ့ရွာကားလမ်းဘေးရှိ အသုပ်ဆိုင်အနီးနဲ့ မနက် ၁၁ နာရီခွဲမှာလည်း ပေါက်တုံရွာအနောက်ဘက်တို့ကို အသေခံဒရုန်း၊ ဒရုန်းဗုံးတို့နဲ့ကြဲချတိုက်ခိုက်ခဲ့တယ်လို့ ဆိုပါတယ်။

ဒါ့အပြင် နေ့လယ် ၁၂ နာရီခန့်မှာလည်း မုံရွာနမခ က တက်လာတဲ့ စက်တပ်လေထီးဟာ ရေတော်မူရွာ အနောက်ပိုင်းကို ဗုံး ၁ လုံးကြဲချခဲ့ရာ နေအိမ်တွေပေါ်ကျရောက်ပေါက်ကွဲခဲ့တာလို့ ဆိုပါတယ်။

“ချီပါမှာ မာတီနဲ့ချခံရတာ လက်ဖက်ရည်ဆိုင်ပျက်စီးထိခိုက်မရှိ။ အဲ့ဒါပြီးတော့ ဘုန်းဘွဲ့မှာက လမ်းဘေးအသုပ်ဆိုင်ကိုချတာ။ အသုပ်ဆိုင်ကအမျိုးသမီးလည်းပြင်းထန်ဒဏ်ရာရပြီး သူလည်း ပျက်စီး(သေ)တယ်။ ပေါက်တုံမှာက သုံးဘီးမောင်းသမား မြို့ကနေပြန်လာတာ။ ဒရုန်းလာတာတွေ့လို့ သူကသုံးဘီးပေါ်ကခုန်ချပြီးရှောင်တာမှာ သူရှောင်တဲ့ဘက်ကို ဒရုန်းကျပြီးသေတာ။ ရေတော်မူကိုချတာမှာ အိမ်ပေါ်ကျပြီး အိမ်ထဲရှိနေသူတွေသေတာရှိတယ်”လို့ ရွှေဘိုမြို့နယ်ပကဖ တာဝန်ရှိသူက ပြောပါတယ်။

ဒီတိုက်ခိုက်မှုတွေကြောင့် ဘုန်းဘွဲ့ရွာက အသက် ၄၂ နှစ်အရွယ်အမျိုးသမီးသေဆုံး၊ လူလတ်ပိုင်း အမျိုးသမီး ၂ ဦးဒဏ်ရာရကာ လက်ဖက်ရည်ဆိုင်ပျက်စီးခဲ့သလို သစ်ချိုပင်ရွာသား အသက် ၄၀ အရွယ် သုံးဘီးမောင်းသူနဲ့ ရေတော်မူရွာကအသက် ၄၀ အရွယ် လင်မယား ၂ ဦးသေဆုံးပြီး အိမ်နီးချင်းအသက် ၄၀ အရွယ်အမျိုးသား ၁ ဦးနဲ့ အမျိုးသမီး ၁ ဦး ဒဏ်ရာရကာ နေအိမ် ၂ လုံးလည်းပျက်စီးခဲ့တယ်လို့ ဆိုပါတယ်။

လေကြောင်းတိုက်ခိုက်မှုတွေကြောင့် ရေတော်မူရွာက ဒေသခံ ၁၀၀ ဝန်းကျင်ဘေးလွတ်ရာကို တိမ်းရှောင်နေကြရတယ်လို့ သိရပါတယ်။

မေ ၂၂ ရက်ကလည်း ရွှေဘိုမြို့နယ်၊ အနောက်တောင်ခြမ်း၊ ချီပါကျေးရွာကို စက်တပ်လေထီးနဲ့ ဗုံးကြဲခဲ့တာကြောင့် ၁ ဦးသေဆုံးပြီး ၈ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

ဘုတလင်၊ မေ ၂၃၊ ၂၀၂၆။

စစ်ကိုင်းတိုင်း၊ ဘုတလင်မြို့နယ်၊ ကံသစ်ကျေးရွာမှာ မိုင်းနင်းမိပြီး မိသားစု ၃ ဦး သေဆုံးခဲ့တယ်လို့ မုံရွာမြို့နယ်ပကဖ တာဝန်ရှိသူတွေဆီက သိရပါတယ်။

မေ ၂၂ ရက်မနက် ၇ နာရီခန့်မှာ စစ်ရှောင်ရာကနေ ရွာထဲပြန်ဝင်လာကြတဲ့ ရွာခံမိသားစု ၃ ဦးဟာ ရွာလမ်းပေါ်မှာ မိုင်းနင်းမိခဲ့တာလို့ ဆိုပါတယ်။

“စစ်ကြောင်းဝင်တော့ ရွာကလူတွေ ရှောင်နေကြတာ။ မနေ့ကမနက် စစ်ကြောင်းပြန်ထွက်သွားတော့ ပြန်ဝင်ကြတာမှာ ရွာထဲမှာထောင်ထားတာကိုမသိဘဲ နင်းမိတာ”လို့ မုံရွာမြို့နယ်ပကဖ တာဝန်ရှိသူတဦးက ပြောပါတယ်။

မိုင်းနင်းမိတာကြောင့် အသက် ၅ နှစ်အရွယ် သမီးဖြစ်သူနဲ့အသက် ၃၀ ကျော်ဝန်းကျင်အရွယ် မိဘ ၂ ဦးတို့နေရာမှာတင်သေဆုံးခဲ့ပြီး အလောင်းတွေကိုတော့ ရွာခံတွေကပင်ကျေးရွာသုဿာန်မှာ သင်္ဂြိုဟ်လိုက်ကြတယ်လို့ ဆိုပါတယ်။

မေလ ၂၁ ရက်မှာ အင်အား ၂၀၀ ခန့်ပါတဲ့ စစ်ကော်မရှင်စစ်ကြောင်းဟာ ကံသစ်ရွာကိုရောက်လာပြီး တပ်စွဲနေထိုင်နေတာကြောင့် ကျေးရွာနေပြည်သူအားလုံးဘေးလွတ်ရာကို တိမ်းရှောင်ခဲ့ကြရပြီး စစ်ကြောင်းပြန်ထွက်သွားပြီးနောက် ရွာထဲပြန်ဝင်နေကြပြီလို့ သိရပါတယ်။

မေလ ၉ ရက်ကလည်း မုံရွာမြို့နယ်၊ ဘူးတောင်းကန်ကျေးရွာမှာ စစ်ကော်မရှင်ပစ်တဲ့ လက်နက်ကြီးထိမှန်ပြီး ကလေးငယ်အပါအဝင် ၂ ဦးသေဆုံးခဲ့တယ်လို့ သိရပါတယ်။

စာတည်း – လင်း