စစ်ကော်မရှင်

မုံရွာ၊ ဧပြီ ၁၈၊ ၂၀၂၆။

စစ်ကိုင်းတိုင်း၊ မုံရွာမြို့နယ်၊ ကျောက္ကာရွာကို စက်တပ်လေထီးနဲ့ဗုံးကြဲခဲ့တာကြောင့် ပြည်သူ ၃ ဦးသေဆုံးခဲ့တယ်လို့ မုံရွာမြို့နယ်ပကဖတာဝန်ရှိသူဆီက သိရပါတယ်။

ဧပြီ ၁၆ ရက်နေ့လယ် ၂ နာရီခန့်မှာ စက်တပ်လေထီး ၃ စီးဟာ ကျေးရွာအနီး ထန်းဇလုပ်ချောင်းနားကို ဗုံး ၂ လုံးကြဲချခဲ့တယ်လို့ဆိုပါတယ်။

“ဘာမှမရှိဘဲနဲ့ စက်တပ်လေထီးတွေက အရာတော်ဘက်ကိုသွားပြီးတော့ အပြန်မှာချသွားတာ။ ချောင်းနားမှာကပြည်သူတွေ ရေကစားတာရှိတယ်။ လူတွေလည်းတအားရှုပ်နေတာမျိုးမဟုတ်ဘူး။ တမင်ချချင်လို့ချသွားတာ”လို့ မုံရွာမြို့နယ်ပကဖ ပြန်ကြားရေးတာဝန်ရှိသူကပြောပါတယ်။

ဗုံးပေါက်ကွဲစထိမှန်တာကြောင့် အသက် ၃၀ ကျော်ဝန်းကျင်အရွယ်အမျိုးသမီး ၂ ဦး၊ အသက် ၂၀ ကျော်အရွယ် အမျိုးသား ၁ ဦးတို့သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၂၀ ကနေ ၄၀ ကြား အမျိုးသားနဲ့အမျိုးသမီး ၁၀ ဦးကျော်ဒဏ်ရာရပြီး နေအိမ် ၂ လုံးနဲ့ဆိုင်ကယ်ပြင်ဆိုင် ၁ ဆိုင်မီးလောင်ပျက်စီးခဲ့တယ်လို့ သိရပါတယ်။

ဇန်နဝါရီ ၂ ရက်ကလည်း မုံရွာမြို့နယ်၊ ညောင်ပင်ကျေးရွာကို စစ်ကော်မရှင်ဘက်က စက်တပ်လေထီးနဲ့ဗုံးကြဲလို့ ကလေးငယ် ၂ ဦးသေဆုံးပြီး အမျိုးသမီး ၄ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ ဧပြီ ၇၊ ၂၀၂၆။

စစ်ကော်မရှင်ရဲ့ လေကြောင်းတိုက်ခိုက်မှုနဲ့ သတ်ဖြတ်မှုတွေကြောင့် ၂၀၂၆ မတ် ၁ ရက်ကနေ ၃၁ ရက်အတွင်း အမျိုးသမီး ၈၈ ဦးသေဆုံးခဲ့တယ်လို့ မြန်မာ့အမျိုးသမီးသမဂ္ဂ – BWU ရဲ့ ဧပြီ ၇ ရက်ထုတ် အစီရင်ခံစာမှာဖော်ပြပါတယ်။

စစ်ကော်မရှင်ရဲ့လေကြောင်းသုံးဗုံးကြဲတိုက်ခိုက်မှုကြောင့် ၅၇ ဦး၊ မတရားသတ်ဖြတ်ခံရမှုကြောင့် ၂၁ ဦး၊ မီးရှို့သတ်ဖြတ်ခံရမှုကြောင့် ၄ ဦး၊ လက်နက်ကြီး ပစ်ခတ်ခံရမှုကြောင့် ၃ ဦး၊ ပဋိပက္ခနဲ့ဆက်နွယ်တဲ့ လိင်ပိုင်းဆိုင်ရာအကြမ်းဖက်ခံရမှုကြောင့် ၁ ဦး၊ အကျဥ်းထောင်တွင်းဆေးကုသခွင့်မရရှိခြင်းကြောင့် ၁ ဦး၊ မြေမြှုပ်မိုင်းကြောင့် ၁ ဦး သေဆုံးခဲ့ကြတာပါ။

အဲ့ဒီထဲမှာ စစ်ကိုင်းတိုင်းက ၃၇ ဦးနဲ့သေဆုံးသူအများဆုံးဖြစ်ခဲ့ပြီး ပဲခူးတိုင်းက ၂၈ ဦး၊ မကွေးတိုင်းက ၅ ဦး၊ မန္တလေးတိုင်းက ၅ ဦး၊ ကရင်ပြည်နယ်က ၅ ဦး၊ ကရင်နီပြည်နယ်က ၄ ဦး၊ တနင်္သာရီတိုင်းက ၂ ဦး၊ ရှမ်းပြည်နယ်က ၁ ဦးနဲ့ ရခိုင်ပြည်နယ်က ၁ ဦးတို့ဖြစ်တယ်လို့ အစီရင်ခံစာမှာဖော်ပြပါတယ်။

သေဆုံးသူတွေထဲမှာ အသက် ၁၈ နှစ်အောက် အမျိုးသမီးငယ် ၂၀ ဦးနဲ့ ကိုယ်ဝန်ဆောင်အမျိုးသမီး ၃ ဦးပါဝင်ပါတယ်။

အလားတူ လေကြောင်းကနေဗုံးကြဲတိုက်ခိုက်မှုကြောင့် အမျိုးသမီး ၄၈ ဦး၊ မြေမြှုပ်မိုင်းကြောင့် ၄ ဦး၊ လက်နက်ကြီးပစ်ခတ်မှုကြောင့် ၁ ဦး၊ ကျည်ထိမှန်မှုတို့ကြောင့် ၁ ဦး စုစုပေါင်း အမျိုးသမီး ၅၄ ဦးလည်း ထိခိုက်ဒဏ်ရာရခဲ့တယ်လို့ ဆိုပါတယ်။

မတ်လအတွင်း အမျိုးသမီးအများဆုံးသေဆုံးခဲ့တဲ့ဖြစ်စဥ်ထဲမှာ မတ်လ ၅ ရက်က ပဲခူးတိုင်း၊ ညောင်လေးပင်မြို့နယ်၊ ရေတွင်းကုန်း၊ ခရုကုန်းနဲ့ ကျောင်းကုန်းရွာက ဒေသခံတွေကို စစ်ကော်မရှင်တပ်က အစုလိုက်အပြုံလိုက် သတ်ဖြတ်ခဲ့တဲ့ဖြစ်စဥ်ဖြစ်ပြီး စုစုပေါင်း အမျိုးသမီး ၁၇ ဦးသေဆုံးခဲ့တယ်လို့လည်း BWU ရဲ့ အစီရင်ခံစာမှာဖော်ပြပါတယ်။

မြေလတ်အသံ၊ မတ် ၂၀၊ ၂၀၂၆။

မန္တလေးတိုင်းနဲ့ ပဲခူးတိုင်းမှာ PDF ၅၀၀ ကျော် ဘက်ပြောင်းလာတယ်လို့ စစ်ကော်မရှင်ဝါဒဖြန့် ရုပ်သံလိုင်းရဲ့ ထုတ်ပြန်ကြေညာချက်တွေအရ သိရပါတယ်။

မတ်လ ၂၀ ရက်မှာ ပဲခူးတိုင်းအတွင်းကနေ ဘက်ပြောင်းလာတဲ့ PDF အမျိုးသား ၂၁ ဦးနဲ့ အမျိုးသမီး ၁ ဦးတို့ကို လက်ခံကြိုဆိုမှုနဲ့ ထောက်ပံကြေးငွေပေးအပ်ပွဲကို တောင်ပိုင်းတိုင်းစစ်ဌာနချုပ်အတွင်းမှာ ပြုလုပ်ခဲ့ပြီး သူတို့နဲ့အတူ သေနတ် ၁၃ လက်၊ လက်ပစ်ဗုံး ၃ လုံး၊ ခဲယမ်းတွေလည်းပါဝင်တယ်လို့ ဆိုထားပါတယ်။

ဒါ့အပြင် မတ်လ ၁၉ ရက်ကလည်း မန္တလေးတိုင်းအတွင်းမှာရှိတဲ့ PDF ၊ TNLA၊ AA နဲ့ လက်နက်ကိုင်အဖွဲ့အမျိုးမျိုးက အလင်းဝင်ရောက်လာတဲ့သူ ၅၀၀ ကျော်ကို အလယ်ပိုင်းတိုင်းစစ်ဌာနချုပ်မှာ ကြိုဆိုပွဲ ပြုလုပ်ခဲ့ပြီး မိဘအုပ်ထိန်းသူတွေဆီကို ပြန်လည်အပ်နှံတဲ့အခမ်းအနား ပြုလုပ်ခဲ့တယ်လို့ သိရပါတယ်။

မတ်လ ၁၈ ရက်မှာ ရေတာရှည်အခြေစိုက် မြေလတ်ဗမာအဖွဲ့က မိုင်းတာဝန်ရှိသူဒေါင်းနီဆိုသူဟာ သေနတ် ၂ လက်၊ ဆိုင်ကယ်နဲဖုန်းအချို့ကိုယူပြီး စစ်ကော်မရှင်တပ်ဆီ ဘက်ပြောင်းသွားတဲ့ဖြစ်စဥ် ရှိခဲ့တယ်လို့ သိရပါတယ်။

ဘက်ပြောင်းလာသူတွေဆီကနေ လက်နက် ၁၀၀ ဝန်းကျင်၊ ခဲယမ်း ၆၀၀၀ ကျော်၊ အလင်းဝင်ရောက်လာသူ အမျိုးသား ၄၅၃ ဦး၊ အမျိုး သမီး ၅၃ ဦး စုစုပေါင်း ၅၀၆ ဦးတို့ဖြစ်တယ်လို့ စစ်ကော်မရှင်ရဲ့ ထုတ်ပြန်ချက်တွေအရ သိရပါတယ်။

မြေလတ်အသံ၊ မတ် ၂၀၊ ၂၀၂၆။

၈ ရက်အတွင်း ပဲခူးတိုင်း ရွှေကျင်မြို့နယ်၊ စစ်ကိုင်းတိုင်း မုံရွာမြို့နယ်၊ ယင်းမာပင်မြို့နယ်၊ တန့်ဆည်မြို့နယ်၊ မင်းကင်းမြို့နယ်နဲ့ မကွေးတိုင်း ဂန့်ဂေါမြို့နယ်တို့မှာ စစ်ကော်မရှင်တပ်ရဲ့ ဗုံးကြဲ ပစ်ခတ်မှုတွေကြောင့် ကလေးငယ်တွေအပါအဝင် ၁၄ ဦးသေဆုံးပြီး ၁၅ ဦးထိခိုက်ဒဏ်ရာရခဲ့ပါတယ်။

ဒီအရေအတွက်ဟာ မတ် ၁၁ ရက်ကနေ မတ် ၁၈ ရက်အတွင်း မြေလတ်အသံက လက်လှမ်းမီသလောက် တင်ပြခဲ့တဲ့သတင်းတွေကတဆင့် ပြန်လည်စုစည်းထားတဲ့ အရေအတွက်ဖြစ်ပါတယ်။

သေဆုံးသူတွေမှာ အသက် ၉ နှစ်ကနေ ၅၀ နှစ်အရွယ်ကြားဖြစ်ပြီး အမျိုးသမီးနဲ့ PDF တပ်ဖွဲ့ဝင်တချို့လည်း ပါဝင်ပါတယ်။

မတ်လ ၁၁ ရက်နေ့လယ် ၁၂ နာရီ မိနစ် ၄၀ မှာ ပဲခူးတိုင်း၊ ရွှေကျင်မြို့နယ်၊ ကရင့်အမျိုးသားအစည်းအရုံး – KNU တပ်မဟာ ၃ ထိန်းချုပ်နယ်မြေရှိ အင်းဗလာရွာကို စက်တပ်လေထီးနဲ့ဗုံးကြဲခဲ့တာကြောင့် အသက် ၉ နှစ်အရွယ် မိန်းကလေး ၁ ဦး၊ အသက် ၂၀ ကနေ ၆၀ ကြား အမျိုးသား၊အမျိုးသမီး ၆ ဦး စုစုပေါင်း ၇ ဦး သေဆုံးခဲ့ပါတယ်။

မတ်လ ၁၂ ရက် မနက် ၉ နာရီခွဲမှာလည်း စစ်ကိုင်းတိုင်း၊ မုံရွာမြို့နယ် ကျေးရွာ ၁ ရွာကို စစ်ကော်မရှင်ရဲ့ စစ်တပ်လေထီးနဲ့ ဗုံးကြဲခဲ့တာကြောင့် PDF ၁ ဦးအပါ ၂ ဦးထိခိုက်ဒဏ်ရာရခဲ့ပါတယ်။

အဲ့ဒီနေ့ မနက် ၉ နာရီခန့်မှာပဲ စစ်ကိုင်းတိုင်း၊ ယင်းမာပင်မြို့နဲ့ ၇ မိုင်အကွာ ဖိုလ်ဝင်တောင်ဘုရားမုခ်ဝ အနီး စစ်တပ်လေထီး ၂ စီးနဲ့ ဗုံး ၂ လုံးကြဲခဲ့တာကြောင့် အသက် ၅၀ ကျော်အရွယ် ခရီးသွားအမျိုးသား ၁ ဦး၊ အမျိုးသမီး ၁ ဦးနဲ့ အဲ့ဒီနေရာအနီးရှိနေတဲ့ အသက် ၂၀ အရွယ် ဒေသခံကာကွယ်ရေးတပ်ဖွဲ့၀င် ၁ ဦးတို့ သေဆုံးခဲ့ပြီး ခရီးသွား ၅ ဦးနဲ့ PDF အဖွဲ့ဝင် ၃ ဦးဒဏ်ရာရခဲ့ပါတယ်။

ဒါ့အပြင် မတ် ၁၆ ရက်မနက် ၁၀ နာရီခန့်မှာလည်း စစ်ကော်မရှင်ရဲ့ဂျက်ဖိုက်တာ ၁ စီးက စစ်ကိုင်းတိုင်း၊ တန့်ဆည်မြို့နယ်၊ ပန်းတိမ်ကုန်းနဲ့ ရေရှင်ရွာကြားက စစ်ရှောင်တွေနေထိုင်တဲ့ တဲတိုက်ပေါ်ကို ဗုံးကြဲခဲ့တာကြောင့် အသက် ၄၀ အရွယ် အမျိုးသမီး ၁ ဦးသေဆုံးခဲ့ပါတယ်။

အလားတူ မတ် ၁၆ ရက်နေ့လယ် ၁ နာရီခန့်မှာလည်း မကွေးတိုင်း၊ ဂန့်ဂေါမြို့နယ်၊ ကျောက်ဂူဒေသ၊ ကံရွာအနောက်ဘက်တောစပ်မှာ စစ်ကော်မရှင်တပ်က လေကြောင်းကနေ ဗုံးကြဲခဲ့တာကြောင့် ကံရွာကျေးရွာကနေ စစ်ဘေးလာရှောင်နေတဲ့ အသက် ၅၀ အရွယ် အမျိုးသမီးနဲ့ အသက် ၁၃ နှစ်အရွယ် သမီးအငယ်ဆုံးတို့ နေရာမှာပဲသေဆုံးပြီး အသက် ၂၀ အရွယ် သမီးကြီးက ခြေထောက်ပြတ်သွားသလို ဖခင်ဖြစ်သူမှာလည်း ပြင်းထန်ဒဏ်ရာရသွားတယ်လို့ သိရပါတယ်။

မတ် ၁၈ ရက်နေ့လယ် ၂ နာရီခန့်မှာလည်း စစ်ကိုင်းတိုင်း၊ မင်းကင်းမြို့နယ်၊ ရွာဘရွာနဲ့ မြောက်ချွန်းရွာကြားရှိ ချင်းတွင်းမြစ်အတွင်းမှာရှိတဲ့ ရွှေမျောတွေကို လေကြောင်းကဗုံးကြဲခဲ့တာကြောင့် ရွှေမျောဖောင်တွေမှာ ဝင်ရောက်လုပ်ကိုင်နေတဲ့ အသက် ၂၅ နှစ်အရွယ် အမျိုးသား ၁ ဦးနေရာမှာသေဆုံးပြီး အသက် ၂၀ က နေ ၃၀ ကြားအမျိုးသား ၃ ဦး ပြင်းထန်ဒဏ်ရာတွေရခဲ့ပါတယ်။

အထက်ပါဒေသတွေမှာ စစ်ကော်မရှင်တပ်ဟာ လေကြောင်းတိုက်ခိုက်မှုအပြင် မြေပြင်စစ်ကြောင်းထိုး မီးရှို့တာနဲ့ လက်နက်ကြီးပစ်ခတ်မှုတွေကိုပါလုပ်နေတာကြောင့် ဒေသခံတွေလည်းဘေးလွတ်ရာကို တိမ်းရှောင်နေကြရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၆၊ မတ်လ ၁၉ ရက်ထိ စစ်ကော်မရှင်နဲ့ ၎င်းရဲ့လက်အောက်ခံတွေ ကြောင့် သေဆုံးခဲ့တဲ့ပြည်သူစုစုပေါင်း ၇,၉၃၆ ရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

ယင်းမာပင်၊ ဒီဇင်ဘာ ၁၇၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်က ကျေးရွာ ၆ ရွာကို စစ်ကော်မရှင်စစ်ကြောင်းက ဒီကနေ့ နေ့လယ် ၃ နာရီခန့်ကစလို့ မီးဝင်ရှို့နေတယ်လို့ ဒေသခံတွေဆီက သိရပါတယ်။

ယင်းမာပင်မြို့နယ်က ကျောက်မှော်၊ နှောပင်၊ ကျောက်ကုန်း၊ ကြက်လျှာ၊ အင်းပတ်၊ ကျွန်းပေါ်ရွာတွေကို စစ်ကြောင်း ၅ ခုခွဲပြီး စစ်ကော်မရှင်စစ်ကြောင်းက မီးရှို့နေတာလို့ ဆိုပါတယ်။

“နှောပင်ကနေ စရှို့တာ၊ ဒီနေ့နေ့လယ်ပိုင်းက၊ အခုတော့ ကျောက်ကုန်း၊ ကြက်လျှာ၊ အင်းပတ်၊ ကျွန်းပေါ်၊ ကျောက်မှော်တို့ရော ဆက်ရှို့နေတယ်။” လို့ ဒေသခံတဦးက ပြောပါတယ်။

အင်အား ၂၀၀ ပါ အဆိုပါစစ်ကြောင်းဟာ ဒီဇင်ဘာ ၁၆ ရက် ယင်းမာပင်မြို့နယ်၊ အောင်ဇေယျ စစ်မှုထမ်းဟောင်းကုန်းကနေ စတင်ထွက်ခွာလာတာဖြစ်ပြီး လက်ရှိအချိန်အထိ မီးရှို့ခံရတဲ့ရွာတွေထဲ ကနေ ပြန်မထွက်သေးဘူးလို့ ဒေသခံတွေက ပြောပါတယ်။

“ရှောင်တိမ်းနေရတဲ့ပြည်သူ သောင်းဂဏန်းရှိနိုင်တယ်၊ ရှောင်ရတဲ့ရွာ ၁၀ ရွာကျော်တယ်၊ စုန်းချောင်း၊ ပန်းတိမ်ပြင်၊ ကျောက်မှော်၊ နဘူးတော၊ နှောပင်၊ အင်းပတ်၊ ကျွန်းပေါ်၊ ကျောက်ကုန်း အဲဒီရွာတွေ ရှောင်နေကြရတာ၊ စစ်ကြောင်းက မနေ့က ရွှေတောင်ဦး အကျိုးအကန်းကုန်းကနေ အင်အား ၂၀၀ လောက်နဲ့ ခြေလျင်ထိုးလာတာ။” လို့ ဒေသခံတဦးက မြေလတ်အသံကို ပြောပါတယ်။

ရွာတွေကို မီးရှို့နေတဲ့စစ်ကြောင်းဟာ မီးမရှို့မီမှာ စစ်ကြောင်း ၃ ကြောင်းခွဲပြီး ပြည်သူပိုင် နေအိမ်တွေကနေ ပစ္စည်းတွေ ခိုးယူခဲ့တယ်လို့ ဒေသခံတွေကအတည်ပြုပါတယ်။

အဆိုပါစစ်ကြောင်းကြောင့် ကျောက်မှော်၊ အင်းပတ်၊ ကျောက်ကုန်း၊ ကြက်လျှာ၊ နှောပင်၊ ပန်းတိမ်ပြင်၊ နဘူးတော၊ စုန်းချောင်း၊ ကျွန်းပေါ် စတဲ့ ကျေးရွာ ၁၀ ရွာထက်မနည်းက ဒေသခံတွေ သောင်းနဲ့ချီ စစ်ဘေးတိမ်းရှောင်နေရတယ်လို့ သိရပါတယ်။

စာတည်း – လင်း