စစ်ဘေးရှောင်

ဝက်လက်၊ မေ ၁၄၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်နဲ့ ချောင်းဦးမြို့နယ်တို့ကို စစ်ကော်မရှင်တပ်က လေကြောင်းကနေ ဗုံးကြဲခဲ့တာကြောင့် ကလေးငယ်နဲ့သံဃာတော်တွေ ထိခိုက်ဒဏ်ရာရခဲ့တယ်လို့ ဝက်လက်နဲ့ ချောင်းဦးမြို့နယ်ပကဖတာဝန်ရှိသူတွေဆီက သိရပါတယ်။

မေ ၁၃ ရက်နေ့လယ် ၁၂ နာရီခန့်မှာ ဂျက်ဖိုက်တာ ၁ စီးက ဝက်လက်မြို့နယ်၊ နဘဲပင်လှကျေးရွာ ဘုန်းကြီးကျောင်းအနီးကို ဗုံး ၂ လုံးကြဲချခဲ့တယ်လို့ ဆိုပါတယ်။

“တိုက်ပွဲဖြစ်ပွားတာမရှိဘဲ အကြောင်းမဲ့လာကြဲတာပဲ။ ဘုန်းကြီးကျောင်းနားကိုကျတာ။ ကျောင်းက ရွာထဲမှာပဲ။ ထိတဲ့ကလေးက ကျောင်ဘေးနားအိမ်က ကလေးပါ။ “လို့ ဝက်လက်မြို့နယ် ပကဖ ပြန်ကြားရေးတာဝန်ရှိသူက ပြောပါတယ်။

ဗုံးထိမှန်တာကြောင့် သက်တော် ၃၀ ကျော်အရွယ် သံဃာ ၁ ပါးနဲ့အသက် ၇ နှစ်အရွယ် ကလေးငယ် ၁ ဦးတို့ မစိုးရိမ်ရဒဏ်ရာရခဲ့ပြီး ဘုန်းကြီးကျောင်းနဲ့လူနေအိမ် ၁ လုံးပျက်စီးခဲ့ကာ ဗုံးကြဲခံရပြီးနောက် ဒေသခံအချို့ကတော့ ရွာကနေ ဘေးလွတ်ရာကိုထွက်ပြေးတိမ်းရှောင်နေကြတယ်လို့ ဆို ပါတယ်။

ဒါ့အပြင် အဲ့ဒီနေ့ညနေ ၃ နာရီကျော်မှာလည်း ချောင်းဦးမြို့နယ်၊ အမြင့်ကျေးရွာအနီးကို စက်တပ်လေထီး ၂ စီးက ဗုံး ၂ လုံးကြဲချခဲ့တယ်လို့ ချောင်းဦးမြို့နယ်ပကဖ တာဝန်ရှိသူကပြောပါတယ်။

“ရွာမြောက်ဘက်ကို လုပ်(ကြဲ)သွားတာ။ အရင်လုပ်နေကျ နေရာပဲ။ လူထိခိုက်တော့မရှိဘူး။ အဆောက်အဦတွေကလည်း ခဏခဏ ထုခံနေရတော့ ထပ်ပြီးပျက်စီးစရာလည်းမရှိတော့ပါဘူး”လို့ ပြောပါတယ်။

မေလ ၆ ရက်ကလည်း ဝက်လက်မြို့နယ်၊ ချက်ပြဲကျေးရွာမှာ လေကြောင်းကနေ ဗုံးကြဲခံရတာကြောင့် ပြည်သူ ၃ ဦးသေဆုံးပြီး ၄ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

ကနီ၊ မေ ၁၄၊ ၂၀၂၆။

စစ်ကိုင်းတိုင်း၊ ကနီမြို့နယ်အတွင်း လှည့်ပတ်စစ်ကြောင်းထိုးနေတဲ့ စစ်ကော်မရှင်တပ်ဖွဲ့ဝင်တွေ ပြန်ထွက်သွားပြီးနောက် မုံရွာ-ယာကြီး-ကလေးဝ လမ်းတလျှောက်ကျေးရွာတွေက ခိုင်းနွားအများအပြားနဲ့ နွားလှည်း ၈ စီးထက်မနည်း ပျောက်ဆုံးနေတယ်လို့ ဒေသခံတွေဆီက သိရပါတယ်။

ဧပြီ ၂၃ ရက်ကစတင်ကာ ယင်းမာပင်နဲ့ကနီနယ်အစပ်ကျေးရွာတွေကို စစ်တပ်က ၃ ပတ်ကြာ လှည့်ပတ်စစ်ကြောင်းထိုးခဲ့တာဖြစ်ပြီး မေလ ၁၁ ရက်မှာ စစ်ကြောင်းပြန်လည်ထွက်ခွာပြီးနောက် ကျေးရွာတွေအသီးသီးကနေ နွားနဲ့လှည်းတွေအပါ လူသုံးပစ္စည်းတွေပျောက်ဆုံးနေတာလို့ ဆိုပါတယ်။

“ လမ်းတလျှောက် ရွာတွေကနေ ပစ္စည်းတွေကို ရသလောက် အကုန်သယ်တာ၊ ကုန်စုံဆိုင်တွေက စားစရာ သောက်စရာတွေရော။ စားသောက်ဆိုင်တွေက အရက်၊ ဘီယာ၊ ခေါင်ရည်တွေရော အကုန်ယူတာ။ ဆိုင်ရှင်တွေက ရွာထဲပြန်ဝင်လာတော့ ခင်ဗျားတို့ မပြေးကြနဲ့၊ ကျုပ်တို့က ဘာမှမလုပ်ဘူးလို့ ပြောတယ်။ အိမ်မှာ လူမတွေ့ရင်တော့ သူတို့ကို ဆန့်ကျင်တယ်လို့ ယူဆပြီး သူတို့လုပ်ချင်ရာလုပ်မယ်လို့ ပြောတယ်” လို့ ယာကြီးရွာခံ အမျိုးသမီးတဦးက မြေလတ်အသံကို ပြောပါတယ်။

စစ်ကြောင်းထိုးစဉ်ကာလအတွင်း စစ်တပ်က ဒေသခံတွေရဲ့ နွားလှည်းတွေကို အသုံးပြုပြီး ဒေသခံတွေပိုင်တဲ့ သံသေတ္တာ၊ ဗီဒို၊ ရေနွေးဓာတ်ဘူး စတဲ့ စစ်ဘေးရှောင်ရာကို ယူမသွားနိုင်တဲ့ ပစ္စည်းတွေကို ယူဆောင်ခဲ့တာလို့ မျက်မြင်တွေ့သူ ဒေသခံအချို့က ပြောပါတယ်။

အဆိုပါ စစ်ကြောင်းဟာ လမ်းတလျှောက်ကျေးရွာတွေက ပြည်သူ ၇ ဦးထက်မနည်းကို ဓားစာခံဖမ်း ဆီးသွားခဲ့ပြီး ကနီမြို့ထဲကို ပြန်ဝင်တဲ့ မေလ ၁၁ရက်မှာတော့ ပြန်လွှတ်ပေးခဲ့တယ်လို့ ဒေသခံတွေက ပြောပါတယ်။

“ ဒီနားတင် ၁ အိမ်တည်းနဲ့ နွား ၃ကောင် ပျောက်တဲ့အိမ် ရှိတယ်၊ စစ်ပြေးရတော့ နွားတွေကို အစာနဲ့ ရေရှိတဲ့နေရာသွားလို့ရအောင် ကြိုးတွေ လွှတ်ထားခဲ့တာ၊ အဲဒီလွှတ်ထားတဲ့နွားတွေကို သူတို့က လိုက်ဖမ်းပြီး လှည်းတပ်မောင်းတာ။ လှည်း ၁ စီးရဲ့ နောက်မှာလည်း နွား ၃ ကောင်လောက် အပိုဆွဲသွားသေးတာ၊ အခု နွားပျောက်တဲ့လူတွေက မဟူရိုးပေါ် သူတို့ ကနီအထိ သွားတဲ့လမ်းတလျှောက် နွားရှာနေကြတယ်၊ တွေ့တဲ့ သူတွေလည်း ရှိတယ်၊ တချို့လည်း မတွေ့ကြသေးဘူး” လို့ မုံရွာ-ယာကြီး လမ်းဘေးနေ ပြည်သူတဦးက ပြောပါတယ်။

စစ်ကြောင်းထဲမှာအမျိုးသမီးအချို့လည်း လိုက်ပါလာခဲ့ပြီး စာသင်ကျောင်းနဲ့ ဆေးရုံ၊ ဆေးခန်းတွေဖွင့်ပြီး ကျေးရွာတွေကို ပြန်လည်တိုးတက်အောင် လုပ်ပေးမယ်လို့ပြောဆိုကာ လမ်းတလျှောက်ပြည်သူတွေကို စည်းရုံးရေးဆင်းသွားတယ်လို့ ဒေသခံတွေက ဆိုကြပါတယ်။

လက်ရှိမှာ ဒေသခံတွေရဲ့ခိုင်းနွားအကောင်ရေ ၂၀ ကျော်နဲ့ လှည်း ၈ စီးထက်မနည်းပျောက်ဆုံးထားတယ်လို့ ဆိုပါတယ်။

၃ ပတ်နီးပါးအကြာ လှည့်ပတ်ထိုးခဲ့တဲ့ အဲ့ဒီစစ်ကြောင်းကြောင့် ယင်းမာပင်နဲ့ ကနီမြို့နယ်အစပ် ကျေးရွာတွေအပါ ရွာပေါင်း ၃၀ ထက်မနည်းက ဒေသခံတွေ သောင်းနဲ့ချီ စစ်ဘေးတိမ်းရှောင်နေခဲ့ကြရတာလည်း ဖြစ်ပါတယ်။

ဆော၊ မေ ၁၃၊ ၂၀၂၆။

မကွေးတိုင်း၊ ဆောမြို့နယ်အတွင်းကို စစ်ကော်မရှင်တပ်ကအင်အား ၁,၀၀၀ ကျော်နဲ့ စစ်ကြောင်းထိုးနေတာကြောင့် ဒေသခံပြည်သူ ၁၀,၀၀၀ ကျော်ထွက်ပြေးနေရတယ်လို့ ဒေသခံတွေဆီက သိရပါတယ်။

မေ ၁၂ ရက်ညနေပိုင်းမှာ ပေါက်မြို့နယ်၊ ကျောက်တံခါးရွာဘက်ကနေ တပ်မ ၉၉ က စစ်ကြောင်းမှူး ဗိုလ်မှူး သိုက်အောင်မောင်းဦးစီးတဲ့ အင်အား ၄၀၀ ပါစစ်ကြောင်းဟာ ဆောမြို့နယ်၊ ပုံတောင် တောင်ပေါ်ကိုတက်လာတဲ့အပြင် လောင်းရှည်အခြေစိုက် ကပစ ၂၅ က အင်အား ၇၀၀ ပါစစ်ကြောင်းကလည်း လောင်းရှည်မြို့ကတဆင့် ဆောမြို့နယ်၊ တောင်ဘို့ကြီးရွာကိုဝင်လာတာလို့ ဆိုပါတယ်။

“ဆောနယ်ထဲကိုရောက်နေတာက ၂ ကြောင်းပေါ့။ ပုံတောင်နဲ့ တောင်ဘိုကြီးရောက်နေကြပြီ။ မနေ့ညနေမှာ ပုံတောင်ဘက်ကို ကင်းထောက်ပြီးတော့မှာ ဒရုန်းနဲ့ဗုံး ၁၁ ကြိမ်ချသေးတယ် တောထဲကို၊ ကျောက်တံခါးအနောက်ဘက်မှာ ရွာမရှိတော့ဘူး။ ဒီမနက်မှာလည်း ကံကြီးရွာဘေးပတ်ဝန်းကျင်ကို ဂျက်ဖိုက်တာ ၂ စီးနဲ့ Y12 နဲ့ဗုံးကြဲသေးတယ်။ စစ်ကြောင်းထိုးနေတော့ လမ်းကြောင်းရှင်းတဲ့သဘော ဗုံးကြဲနေတာ”လို့ ဖြစ်စဥ်ကိုသိထားတဲ့ဒေသခံတဦးက ပြောပါတယ်။

လေကြောင်းဗုံးကြဲမှုတွေအတွင်း ထိခိုက်မှုအခြေအနေတွေကိုတော့ စုံစမ်းနေဆဲလို့ ဆိုပါတယ်။

စစ်ကြောင်းတွေကြောင့် ကံကြီး၊ ချောင်းခွ၊ ပြင်လယ်၊ ကံချောင်း၊ ရေရှင်ရွာတွေအပါအဝင် ကျေးရွာပေါင်း ၁၀ ရွာကျော်က ပြည်သူ ၁၀,၀၀၀ ကျော်ထွက်ပြေးတိမ်းရှောင်နေကြရတယ်လို့ သိရပါတယ်။

အဲ့ဒီစစ်ကြောင်း ၂ ကြောင်းဟာ မေလ ၁၃ ရက်အထိ တောင်ဘို့ကြီးနဲ့ ပုံတောင်အနီးတဝိုက်မှာပဲ ဆက်ရှိနေပြီး ပုံတောင်တဝိုက်ကစစ်ကြောင်းနဲ့ ဒေသကာကွယ်ရေးတပ်တွေအကြားမှာတော့ ထိတွေ့တိုက်ပွဲတွေ ရှိနေပြီး ထိခိုက်မှုအခြေအနေတွေကိုမသိရသေးဘူးလို့ အထက်ပါဒေသခံက ပြောပါတယ်။

တဖက်မှာလည်း မေလ ၁၂ ရက်မှာ စလင်းကထွက်လာတဲ့ အင်အား ၁၀၀ ကျော်ပါစစ်ကြောင်းကလည်း စလင်း-ကံပြားလမ်းအတိုင်း စေတုတ္တရာ-ဆောလမ်းပိုင်းကတဆင့် လောင်းရှည်ဘက်ကိုဦးတည်ထွက်ခွာလာနေသေးတယ်လို့ သိရပါတယ်။

စာတည်း – လင်း

အရာတော်၊ မေ ၄၊ ၂၀၂၆။

စစ်ကိုင်းတိုင်း၊ အရာတော်မြို့နယ်မှာ ပျူစောထီးအထိုင်ချရာကျေးရွာတွေက တိမ်းရှောင်နေရတဲ့ စစ်ဘေးရှောင်ပြည်သူတွေအတွက် ဆေးဝါးကုသမှုနဲ့ သောက်သုံးရေအရေးပေါ်လိုအပ်နေတယ်လို့ စစ်ရှောင်ကူညီပေးနေသူတွေဆီက သိရပါတယ်။

အရာတော်မြို့နယ်၊ ငွေတွင်း၊ စပါးတွင်းနဲ့ သလဲဘာကျေးရွာတွေကနေ ထွက်ပြေးတိမ်းရှောင်လာရတဲ့ စစ်ဘေးရှောင်တွေအနက် ငွေတွင်းနဲ့ သလဲဘာရွာက စစ်ဘေးရှောင် ၁၅၀ ခန့်မှာ အဆိုပါအခက်အခဲကို ရင်ဆိုင်နေရတာလို့ သိရပါတယ်။

“သောက်ရေက တုံငင်ရေ၊ ရေကြောမကောင်းတော့ ရေတွေကနီပြီး ဝမ်းပျက်ရောဂါတွေ ဖြစ်ကြတယ်၊ ဆေးဝါးအခက်အခဲက အရင်ကကျနော်တို့ဆီရှိတဲ့ဆေးတွေ ထောက်လှူပေးတယ်၊ အခုက ဝမ်းပျက်ရောဂါတွေဆိုတော့ ဓာတ်ဆားထုပ်ကို မပေးနိုင်တာကြာပြီ၊ ၇ ရက် ၁ ပတ် ရှိပါပြီ၊ စုစုပေါင်းစာရင်းအရ အိမ်ထောင်စု ၁၅၀ ရှိပါတယ်။” လို့ စစ်ဘေးရှောင်ကူညီသူတဦးက မြေလတ်အသံကို ပြောပါတယ်။

အသက် ၇၀ အထက်သက်ကြီးရွယ်အိုတွေနဲ့ ကလေးငယ်တွေမှာတော့ ရာသီဥတုအခြေအနေအရ ဖျားနာသူတွေရှိသလို သောက်သုံးရေမသန့်မှုကြောင့်ဖြစ်တဲ့ ရောဂါတွေလည်း ဖြစ်နေတယ်လို့ ဆိုပါတယ်။

၂၀၂၁ စစ်အာဏာသိမ်းပြီး ၁ နှစ်ကျော်အကြာ ၂၀၂၂ နှောင်းပိုင်းကစလို့ အထက်ပါကျေးရွာတွေမှာ ပျူစောထီးတွေအထိုင်ချတပ်စွဲသွားတာကြောင့် ဒေသခံတွေဟာ နေရပ်စွန့်ခွာတိမ်းရှောင်နေကြရတာလည်း ဖြစ်ပါတယ်။

လက်ရှိမှာ ငွေကြေးထောက်ပံ့မှု အခက်အခဲတွေကြောင့် စစ်ရှောင်ကူညီသူတွေက စားနပ်ရိက္ခာအတွက်သာ ကူညီပေးနိုင်တယ်လို့ ဆိုပါတယ်။

ဧပြီ ၁၅ ရက်ကလည်း သလဲဘာရွာတိုက်ပွဲကြောင့်ထွက်ပြေးခဲ့ရတဲ့ စစ်ဘေးရှောင်အမျိုးသား ၁ ဦး စစ်ကော်မရှင်တပ်ရဲ့ လေကြောင်းတိုက်ခိုက်မှုကြောင့် သေဆုံးခဲ့ရပါသေးတယ်။

စာတည်း – လင်း

ဆိပ်ဖြူ၊ ဧပြီ ၃၀၊၂၀၂၆။

မကွေးတိုင်း၊ ပခုက္ကူခရိုင်၊ ဆိပ်ဖြူမြို့နယ်၊ ဇီးဖြူကောင်းရွာနဲ့ ရေပုတ်ရွာတွေက နေအိမ်တွေကို စစ်ကော်မရှင်တပ်ကမီးရှို့ခဲ့တာကြောင့် ဒေသခံတွေ အရေးပေါ်အကူအညီတွေလိုအပ်နေတယ်လို့ ဒေသခံတွေဆီက သိရပါတယ်။

ဧပြီ ၂၅ ရက် နေ့လယ် ၁ နာရီဝန်းကျင်ကစတင်ပြီး အင်အား ၁၀၀ ကျော်ပါ စစ်ကော်မရှင်တပ်ဖွဲ့ဝင်တွေက အထက်ပါကျေးရွာတွေကို တပြိုင်တည်းဝင်ရောက်မီးရှို့ခဲ့တာကြောင့် နေအိမ် ၈၇ လုံးခန့် မီးလောင်ပျက်စီးခဲ့တာလို့ ပခုက္ကူခရိုင် အမှတ် ၁၉ တပ်ရင်းရဲ့ တာဝန်ရှိသူက ဆိုပါတယ်။

“အခုလက်ရှိအခြေအနေက အားလုံးရှောင်နေရတယ်၊ ယာယီဖြစ်မလား၊ ရေရှည်ဖြစ်မလားက စစ်ရေးအပေါ် မူတည်နေတယ်၊ အရေးပေါ် (လိုအပ်တာ)က မိုးကာ၊ အိုးခွက်၊ အိမ်သုံးပစ္စည်းတွေနဲ့ ရိက္ခာပေါ့”လို့ အထက်ပါတာဝန်ရှိသူက မြေလတ်အသံကိုပြောပါတယ်။

အဲ့ဒီကျေးရွာ ၂ ရွာက ဒေသခံ ၁,၀၀၀ ခန့်ဟာ မီးမလောင်ဘဲကျန်ခဲ့တဲ့ အိမ်တွေမှာ ယာယီနေထိုင်တာတွေရှိသလို အမိုးအကာမရှိဘဲ ရွာအပြင်တွေမှာနေထိုင်ကြရတဲ့ လူဦးရေအများအပြားရှိနေတယ်လို့ ဆိုပါတယ်။

ဒါ့အပြင် စစ်ကော်မရှင်တပ်ဖွဲ့ဝင်တွေက ကြက်သွန်ဂိုဒေါင်တွေကိုပါမီးရှို့ခဲ့တာကြောင့် ကြက်သွန်တင်း ၇၀,၀၀၀ မြန်မာငွေ သိန်း ၁ ထောင်နီးပါး မီးလောင်ဆုံးရှုံးခဲ့တယ်လို့ဆိုပါတယ်။

“လက်ရှိ နေစရာက ဖြစ်သလိုပဲနေနေရတာပေါ့လေ။ အစားအသောက်ကိုကျ ဘေးရွာတွေက ကူညီကြပါတယ်”လို့ ဒေသခံဖြစ်သူ ကိုဟိန်းက ပြောပါတယ်။

မီးဘေးသင့်ဒေသခံတွေထဲမှာ သက်ကြီးပိုင်းတွေလည်းပါတာကြောင့် ဆေးကုသမှုအကူအညီတွေလည်း လိုအပ်နေတယ်လို့ အထက်ပါဒေသခံကဆိုပါတယ်။

ဆိပ်ဖြူမြို့နယ်၊ ဇီးဖြူကောင်းရွာနဲ့ ရေပုတ်ရွာတွေကို ဆိပ်ဖြူမြို့နယ်အခြေစိုက် အမှတ် ၂၁ ကာကွယ်ရေးပစ္စည်းထုတ်စက်ရုံ၊ အမှတ် ၉ လေကြောင်းရန်ကာကွယ်ရေး စစ်ဆင်ရေးကွပ်ကဲမှုဌာနချုပ်နဲ့ အမှတ် ၂၀၃၆ လေကြောင်းရန်ကာကွယ်ရေးတပ်ရင်းတို့ ပူးပေါင်းထားတဲ့ အင်အား ၁၀၀ကျော်ပါစစ်ကြောင်းက မီးရှို့ခဲ့တာဖြစ်တယ်လို့ ပခုက္ကူခရိုင် အမှတ် ၁၉ တပ်ရင်းက သတင်းထုတ်ပြန်ပါတယ်။

စာတည်း – လင်း

တောင်သာ၊ ဧပြီ ၂၉၊ ၂၀၂၆။

မန္တလေးတိုင်း၊ တောင်သာမြို့နယ်အတွင်း စစ်ကော်မရှင်တပ်က စစ်ကြောင်းထိုးမီးရှို့နေတာကြောင့် အိမ်ခြေ ၄၀၀ ကျော်မီးလောင်ပျက်စီးထားတယ်လို့ တောင်သာမြို့နယ်ပကဖတာဝန်ရှိသူတွေဆီက သိရပါတယ်။

ဧပြီ ၂၂ ရက်မှာ အင်အား ၁၅၀ ကျော်ပါစစ်ကော်မရှင်စစ်ကြောင်းဟာ ဧပြီ ၂၂ ရက် ကနေ ၂၈ ရက် မနက်ပိုင်းအထိ ဆည်ကုန်းရွာ၊ ထန်းပင်ကုန်းတောရိုး၊ သံချေးကုန်းရွာ၊ စုံတောမြိုင်၊ ခပေါင်း၊ မဲတော၊ ရုံးစဥ်လေး၊ သံဘိုရွာတို့ကို အစဥ်လိုက်မီးရှို့ခဲ့တယ်လို့ ဆိုပါတယ်။

“သံဘိုက အိမ်တောင်သိပ်မကျန်တော့ပါဘူး။ ကျနော်တို့တွေလည်း ရွာနားတွေတော့ ကပ်မရသေးဘူး။ **ကြောင်းမထွက်သေးတော့ ကူညီကယ်ဆယ်ရေးလုပ်ငန်းတွေလည်းမလုပ်နိုင်သေးဘူး။ “လို့ တောင်သာမြို့နယ်ပကဖတာဝန်ရှိသူက ပြောပါတယ်။

ခုလို စစ်ကြောင်းထိုးမီးရှို့တာကြောင့် ကျေးရွာပေါင်း ၈ ရွာက အိမ်ခြေအနည်းဆုံး ၄၀၀ ကျော် မီးလောင်ပျက်စီးထားပြီး စစ်ကြောင်းပြန်မထွက်သေးတာကြောင့် အသေးစိတ်စာရင်းကို မကောက်ယူနိုင်သေးဘူးလို့ ဆိုပါတယ်။

ဧပြီ ၂၉ ရက်ဒီမနက်မှာတော့ သံဘိုရွာကနေ ပန်းပေါင်းစုံကျေးရွာဘက်ကို စစ်ကြောင်းထွက်သွားပြီး လက်ရှိအချိန်ထိ လမ်းပိုင်းမှာပဲရှိနေသေးတယ်လို့ သိရပါတယ်။

ဒါ့အပြင် အိမ်ခြေ ၁၀၀ ကနေ ၄၀၀ ကြားရှိတဲ့ ဆည်ကုန်းရွာ၊ ထန်းပင်ကုန်းတောရိုး၊ သံချေးကုန်းရွာ၊ စုံတောမြိုင်၊ ခပေါင်း၊ မဲတော၊ ရုံးစဥ်လေး၊ သံဘိုရွာတို့က လူဦးရေ ၁၀,၀၀၀ နီးပါးဘေးလွတ်ရာကို ထွက်ပြေးတိမ်းရှောင်နေကြရတယ်လို့ သိရပါတယ်။

ဖေဖော်ဝါရီ ၁၁ ရက်ကလည်း တောင်သာမြို့နယ်၊ ပဲလင်းကျော်ကျေးရွာကို စစ်ကော်မရှင် စစ်ကြောင်းက ဝင်ရောက်မီးရှို့တာကြောင့် နေအိမ်နဲ့ဘုန်ကြီးကျောင်းအပါအဝင် အဆောက်အဦး ၅၀ ကျော်မီးလောင်ပျက်စီးခဲ့ပါသေးတယ်။

စာတည်း – လင်း

မကွေး၊ ဧပြီ ၂၈၊ ၂၀၂၆။

မကွေးတိုင်း၊ ပခုက္ကူခရိုင်၊ ဆိပ်ဖြူမြို့နယ်၊ ဇီးဖြူကောင်းရွာနဲ့ ရေပုတ်ရွာကနေအိမ်တွေကို စစ်ကော်မရှင်တပ်က မီးရှို့ခဲ့တယ်လို့ ဒေသခံနဲ့ ကာကွယ်ရေးတပ်ဖွဲ့ဝင်တွေဆီက သိရပါတယ်။

ဧပြီ ၂၅ ရက် နေ့လယ် ၁ နာရီဝန်းကျင်ကစတင်ပြီး အင်အား ၁၀၀ ကျော်ပါ စစ်ကော်မရှင်တပ်ဖွဲ့ဝင်တွေက အထက်ပါကျေးရွာတွေကို တပြိုင်တည်းဝင်ရောက်မီးရှို့ခဲ့တာလို့ ဆိုပါတယ်။

“၁ နာရီပတ်ဝန်းကျင်လောက်မှာ မီးရှို့တာပေါ့၊ စရှို့တာမြင်ရတာ ရေပုတ်ကတော့ စပြီးမီးခိုးထွက်တာပေါ့၊ လူကတော့ အထိခိုက်မရှိပါဘူး။ စစ်ကြောင်းက ရေပုတ်နဲ့ ဇီးဖြူကောင်း ၃ နေရာလောက်ခွဲဝင်တာ၊ ရေပုတ်ကအနောက်ဘက်မှာ ဇီးဖြူကောင်းကအရှေ့ဘက်မှာ နီးတယ်။ သူတို့ မဝင်ခင် လက်နက်ကြီး ၁ ချက်ပစ်တယ်”လို့ ဇီးဖြူကောင်းကျေးရွာ ဒေသခံတဦးက ပြောပါတယ်။

မီးရှို့တာကြောင့် ဇီးဖြူကောင်းကျေးရွာက နေအိမ် ၆၉ လုံးနဲ့ ရေပုတ်ကျေးရွာက နေအိမ် ၁၈ လုံး မီးလောင်ပျက်စီးခဲ့ပြီး ဒေသခံတွေထိခိုက်မှုမရှိခဲ့ဘဲ လက်ရှိမှာတော့တိမ်းရှောင်နေကြရတယ်လို့ ပခုက္ကူခရိုင် အမှတ်၁၉ တပ်ရင်းရဲ့ တာဝန်ရှိသူက ပြောပါတယ်။

“တိမ်းရှောင်နိုင်ခဲ့ပါတယ်၊ စစ်ကြောင့် ထိခိုက်မိတာမျိုး မရှိပါဘူး၊ အကုန်ဘေးကင်းပါတယ်၊ အခု လက်ရှိအခြေအနေက အားလုံးရှောင်နေရတယ်၊ ယာယီဖြစ်မလား၊ ရေရှည်ဖြစ်မလားက စစ်ရေးအပေါ် မူတည်နေတယ်”လို့ သူကပြောပါတယ်။

အဲ့ဒီစစ်ကြောင်းဟာ ဆိပ်ဖြူမြို့နယ်အခြေစိုက် အမှတ် ၂၁ ကာကွယ်ရေးပစ္စည်းထုတ် စက်ရုံ၊ အမှတ် ၉ လေကြောင်းရန်ကာကွယ်ရေး စစ်ဆင်ရေးကွပ်ကဲမှုဌာနချုပ်နဲ့ အမှတ် ၂၀၃၆ လေကြောင်းရန် ကာကွယ်ရေးတပ်ရင်းတို့ ပူးပေါင်းထားတာလို့ ပခုက္ကူခရိုင် အမှတ် ၁၉ တပ်ရင်းက သတင်းထုတ်ပြန်ပါတယ်။

ပြီးခဲ့တဲ့ ဧပြီ ၂၀ ကလည်း မကွေးမြို့နယ်၊ ညောင်ပင်ရွာနဲ့ ကျွန်လှရင်ရွာတို့ကို စစ်ကော်မရှင်တပ်က မီးရှိုဖျက်ဆီးခဲ့တာကြောင့် နေအိမ်တွေပျက်စီးခဲ့ပါသေးတယ်။

သတင်း – ဇော်၊ စာတည်း – လင်း