ကန့်ဘလူ၊ ဇွန် ၁၉၊ ၂၀၂၆။

စစ်ကိုင်းတိုင်းထဲက ကန့်ဘလူ၊ ရွှေဘိုနဲ့ချောင်းဦးမြို့နယ်တို့မှာ နှင်းဆီလှုပ်ရှားမှုပြုလုပ်ခဲ့ကြတယ်လို့ သက်ဆိုင်ရာတော်လှန်ရေးအဖွဲ့အစည်းတွေဆီက သိရပါတယ်။

ဇွန် ၁၉ ရက်ဒီကနေ့မှာကျရောက်တဲ့ နိုင်ငံတော်၏အတိုင်ပင်ခံပုဂ္ဂိုလ် လူထုခေါင်းဆောင် ဒေါ်အောင်ဆန်းစုကြည်ရဲ့ ၈၁ နှစ် ပြည့်မွေးနေ့အထိမ်းအမှတ်အဖြစ် နယ်မြေခံတော်လှန်ရေးအဖွဲ့တွေနဲ့ ပြည်သူလူထု၊ ကျောင်းသားလူငယ်တွေပူးပေါင်းကာ နှင်းဆီလှုပ်ရှားမှုကိုပြုလုပ်ခဲ့ကြတာပါ။

အဲ့ဒီလှုပ်ရှားမှုအတွင်း ဘုရားကို နှင်းဆီပန်းဆက်ကပ်လှူဒါန်းတာ၊ အရိပ်အပင်တွေစိုက်ပျိုးတာ၊ ပြည်သူလူထုဆီ နှင်းဆီပန်းမျှဝေတာတွေ ပြုလုပ်ခဲ့ကြပါတယ်။

ဒါ့အပြင် နှင်းဆီသပိတ်လှုပ်ရှားမှုအနေနဲ့တကွ နိုင်ငံရေးအကျဉ်းသားအားလုံး ခြွင်းချက်မရှိ ချက်ချင်းလွှတ်၊ အဓမ္မစစ်မှုထမ်းဥပဒေ ချက်ချင်းဖျက် စတဲ့ကြွေးကြော်သံတွေကိုလည်း ဆိုခဲ့ကြတယ်လို့ သိရပါတယ်။

အလားတူနှင်းဆီပန်းလှုပ်ရှားမှုအတွင်း ခရမ်းပြာကြာပန်းတွေနဲ့ ဒေါ်အောင်ဆန်းစုကြည်ရဲ့ အမည်ကို ပုံဖော်ခဲ့ကြသလို နှင်းဆီပန်းကိုင်ဆောင်ကာ မွေးနေ့အထိမ်းအမှတ်လှုပ်ရှားမှုတွေလည်း ပြုလုပ်ခဲ့ကြပါတယ်။

ပြည်၊ ဇွန် ၁၉၊ ၂၀၂၆။

ပဲခူးတိုင်း၊ ပြည်မြို့နယ်တနေရာမှာ နိုင်ငံတော်အတိုင်ပင်ခံပုဂ္ဂိုလ် လူထုခေါင်းဆောင် ဒေါ်အောင်ဆန်းစုကြည်ရဲ့ ၈၁ နှစ်ပြည့် မွေးနေ့အထိမ်းအမှတ်အဖြစ် နှင်းဆီသပိတ်ပြုလုပ်ခဲ့တယ်လို့ ပြည်ခရိုင် ၃၆၀၂ တပ်ရင်းတာဝန်ရှိသူတွေဆီက သိရပါတယ်။

ဇွန် ၁၉ ရက် ဒီကနေ့မှာကျရောက်တဲ့မွေးနေ့အဖြစ် ပြည်မြို့ဒေသခံတချို့က အာရုဏ်ဆွမ်း ကပ်လှူတာနဲ့ နှင်းဆီလှုပ်ရှားမှုတွေပြုလုပ်ခဲ့တယ်လို့ဆိုပါတယ်။

“ဒေသတွင်းရှိ ဘုန်းတော်ကြီးကျောင်းတခုမှာ အုန်းထမင်း၊ ကြက်သားနှပ် အာရုံဆွမ်းနှင့် ဝတ္တုငွေတွေ ကပ်လှူခဲ့တယ်။ ပြီးတာနဲ့ နှင်းဆီးပန်း ပန်တဲ့လှုပ်ရှားမှုပြုလုပ်ခဲ့တယ်”လို့ ပြည်ခရိုင် ၃၆၀၂ တပ်ရင်းတာဝန်ရှိသူတဦးက ပြောပါတယ်။

ဒီအစီအစဥ်တွေထဲမှာ မတရားဖမ်းဆီးခံထားရတဲ့ လူထုခေါင်းဆောင် ဒေါ်အောင်ဆန်းစုကြည်နဲ့အတူ နိုင်ငံရေးအကျဉ်းသားတွေ အမြန်ဆုံးလွတ်မြောက်ဖို့၊ ခေတ်အဆက်ဆက် ဒီမိုကရေစီတော်လှန်ရေးတိုက်ပွဲအတွင်း ကျဆုံးခဲ့တဲ့ရဲဘော်တွေ ကောင်းရာဘုံဘဝရောက်ဖို့နဲ့ စစ်အာဏာရှင်ကျဆုံးဖို့ ကြွေးကြော်မှုတွေလည်းပြုလုပ်ခဲ့တယ်လို့ ဆိုပါတယ်။

ဝက်လက်၊ ဇွန် ၁၉၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်မှာ ဒေါ်အောင်ဆန်းစုကြည် ၈၁ နှစ်မြောက် မွေးနေ့အကြို ၈ မိုင် ၁ ဖာလုံတာဝေးပြေးပြိုင်ပွဲကျင်းပပြုလုပ်ခဲ့တယ်လို့ ဝက်လက်မြို့နယ်လူထုသပိတ်တိုက်ပွဲဦးဆောင်ကော်မတီဆီက သိရပါတယ်။

ဇွန် ၁၉ ရက် ဒီကနေ့မှာကျရောက်တဲ့ ဒေါ်အောင်ဆန်းစုကြည်ရဲ့မွေးနေ့အထိမ်းအမှတ်အဖြစ် ဒီပြိုင်ပွဲကိုပြုလုပ်ခဲ့တာဖြစ်ပြီး ဝက်လက်မြို့နယ်ရှိကျေးရွာပေါင်း ၃၀ က ပြိုင်ပွဲဝင် ၂၀ ကျော် ပါဝင်ယှဉ်ပြိုင်ခဲ့ကြတယ်လို့ ဆိုပါတယ်။

အဆိုပါ ပြိုင်ပွဲလမ်းတလျှောက် ကျေးရွာတွေက ပြည်သူတွေဟာလည်း ပြိုင်ပွဲဝင်တွေကို စည်စည်ကားကားအားပေးခဲ့ပြီး ဆုပေါင်း ၁၉ ဆု ချီးမြှင့်ခဲ့ကာ သက်ကြီးပြိုင်ပွဲဝင်တွေအတွက် သီးသန့်ဆုတွေလည်းပေးခဲ့တယ်လို့ ဝက်လက်မြို့နယ်လူထုသပိတ်တိုက်ပွဲဦးဆောင်ကော်မတီက ပြောပါတယ်။

ပြိုင်ပွဲကို ဝက်လက်မြို့နယ်သပိတ်ဦးဆောင်ကော်မတီက ဦးဆောင်ကျင်းပခဲ့ပြီး ဝက်လက်မြို့နယ် ပြည်သူ့အုပ်ချုပ်ရေးအဖွဲ့ဝင်တွေနဲ့ ကျောင်းသားသမဂ္ဂတွေက ပူးပေါင်းခဲ့တယ်လို့ သိရပါတယ်။

စာတည်း – လင်း

နတ်တလင်း၊ ဇွန် ၁၈၊ ၂၀၂၆။

ပဲခူးတိုင်း၊ နတ်တလင်းမြို့နယ်အရှေ့ခြမ်း၊ အောင်ရတနာအုပ်စု၊ ညောင်လှကျေးရွာမှာ ဒရုန်းနဲ့ ဗုံးကြဲခံရလို့ ပြည်သူ ၃ ဦးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဇွန်လ ၁၆ ရက် ညနေ ၃ နာရီကျော်မှာ တောင်ညိုရဲစခန်းနဲ့ မျှော်တော်တောင်စခန်းကနေ အင်အား ၅၀ ကျော်နဲ့ကင်းပတ်ထွက်လာတဲ့ စစ်ကြောင်းနဲ့ ဒေသခံတော်လှန်ရေးတပ်တွေအကြား ညောင်လှကျေးရွာစာသင်ကျောင်းအနီး တိုက်ပွဲတွေဖြစ်ပွားခဲ့ပြီး တိုက်ပွဲဖြစ်ပွားချိန် စစ်တပ်က ဒရုန်း၊ လက်နက်ကြီးတွေနဲ့ ပစ်ခတ်ခဲ့ရာမှာ ပုန်းအောင်းနေတဲ့ပြည်သူတွေကို ထိမှန်သေဆုံးခဲ့တာလို့ ဆိုပါတယ်။

” တိုက်ပွဲဖြစ်ချိန် ပြည်သူတွေက ပြေးသူပြေး၊ ပုန်းတဲ့သူပုန်းနေကြတာ။ ဒရုန်းဗုံးတွေက ကွက်သစ်ဘက် လူနေအိမ်တွေပေါ်ကျတော့ ထိခိုက်သေဆုံးတာရှိခဲ့တယ်” လို့ ဒေသကာကွယ်ရေးအဖွဲ့ဝင်တဦးက မြေလတ်အသံကို ပြောပါတယ်။

ဒရုန်းဗုံးထိမှန်တာကြောင့် ညောင်လှရွာ၊ ကွက်သစ်ပိုင်းနေ အသက် ၆၀ နှစ် ဦးအေး၊ အသက် ၇၅ နှစ် ဦးစိုးကြီး၊ အသက် ၅၈ နှစ် ဒေါ်မထွေးတို့ ၃ ဦးသေဆုံးခဲ့ပြီး အသက် ၈ နှစ် မစုစုစမ်းနဲ့ မိခင်ဖြစ်သူ အသက် ၅၂ နှစ် ဒေါ်မြတို့ ဒဏ်ရာရခဲ့ကာနေအိမ် ၃ လုံးခန့်ပျက်စီးခဲ့တယ်လို့ သိရပါတယ်။

ညောင်လှတိုက်ပွဲမတိုင်ခင် ဇွန်လ ၁၆ ရက် မနက်ပိုင်းမှာလည်း အဲ့ဒီစစ်ကြောင်းနဲ့ အောင်ရတနာစျေး အနီး တိုက်ပွဲဖြစ်ခဲ့ပြီး တိုက်ပွဲတွေအတွင်း စစ်သား ၆ ဦး ထိခိုက်ဒဏ်ရာရပြီး သေဆုံးသူတွေလည်းရှိနိုင်တယ်လို့ တပ်ရင်း ၁ ရဲ့ထုတ်ပြန်ချက်မှာ ဖော်ပြထားပါတယ်။

တိုက်ပွဲဖြစ်ပြီးနောက် စစ်တပ်စစ်ကြောင်းဟာ ညောင်လှကျေးရွာအတွင်းတပ်စွဲခဲ့ပြီး ဇွန်လ ၁၇ ရက် ယမန်နေ့မှာ ကျောက်ခွက်နဲ့ကျောက်စွယ်ရွာတွေဘက်ကို စစ်ကြောင်းဆက်ထိုးကာ ဒီကနေ့ ဇွန်လ ၁၈ ရက်မနက်ပိုင်းအထိ စစ်ကြောင်းက အဲ့ဒီကျေးရွာတွေအနီးမှာပဲ ရှိနေတယ်လို့ သိရပါတယ်။

လက်ရှိမှာ ကျောက်စွယ်နဲ့ကျောက်ခွက်ရွာတွေက အမျိုးသား ၄ ဦးကို ဖမ်းဆီးခံထားရပြီး စစ်ကြောင်းကြောင့် ညောင်လှ၊ ကျောက်ခွက်နဲ့ကျောက်စွယ်ရွာက ဒေသခံတွေဘေးလွတ်ရာကိုတိမ်းရှောင်နေကြပါတယ်။

မင်းလှ၊ ဇွန် ၁၈၊ ၂၀၂၆။

ပဲခူးတိုင်း၊ မင်းလှမြို့နယ်၊ စမ်းဘုတ်ကျေးရွာမှာ ဒေသအခြေစိုက်လက်နက်ကိုင်အဖွဲ့က ရွာသား ၁ ဦးကို သတ်ဖြတ်ပြီး ၄ ဦးကိုဖမ်းဆီးထားတယ်လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တွေဆီက သိရပါတယ်။

မေ ၃၀ ရက်မှာ အသက် ၁၈ နှစ်အရွယ် မနွယ်နီဝင်း၊ အသက် ၃၄ နှစ်အရွယ် ဒေါ်ပူစူး၊ အသက် ၅၀ နှစ်အရွယ် ဦးကျော်လွင်စိုးတို့ကို ဖမ်းဆီးခဲ့သလို ဇွန် ၁၁ ရက်ညမှာ အသက် ၄၀ ကျော်အရွယ် ကိုငမျိုး၊ ဇွန် ၁၂ ရက်မှာ အသက် ၅၂ နှစ်အရွယ် ဒေါ်မိစန်းအေးတို့ကို နေအိမ်တွေကနေ ဖမ်းဆီးခဲ့တာလို့ ဆိုပါတယ်။

“ဘယ်အဖွဲ့လုပ်တာတော့ သိတယ်။ ပြောဖို့အဆင်မပြေသေးလို့။ ခုက ပြည်သူတွေခံရတာဖြစ်နေလို့။ ဒေသခံ ၃ ယောက်ကို အရင်ဖမ်းတယ်။ နောက်ရက်မှာ ကိုမျိုးကိုဖမ်းတယ်။ နောက်တရက်မှာ သတ်ပစ်တယ်။ လည်ဖြတ်ပြီးသတ်ဖြတ်ခံရတယ်။ သူခေါင်းတောင် ခြံစည်းရိုးပေါ်မှာ ချိတ်ခဲ့တာ။ လူမြင်ကွင်းမှာသတ်လိုက်တာ”လို့ ဖြစ်စဥ်ကိုသိတဲ့ ဒေသကာကွယ်ရေးအဖွဲ့ဝင်တဦးက ပြောပါတယ်။

သတ်ဖြတ်ဖမ်းဆီးခံရသူတွေထဲက ဦးကျော်လွင်စိုး ၁ ဦးသာ စစ်အာဏာမသိမ်းခင်က ကြံ့ခိုင်ရေးပါတီဝင်တဦးဖြစ်ခဲ့ပြီး စစ်အာဏသိမ်းပြီးနောက် ပါတီကနှုတ်ထွက်ပြီး စျေးဆိုင်ဖွင့်ထားသူဖြစ်ပြီး ကျန်သူတွေက လယ်လုပ်၊ စျေးရောင်းနဲ့ ကျပန်းလုပ်ကိုင်သူတွေဖြစ်ပြီး စစ်ကော်မရှင်အဖွဲ့ဝင်တွေနဲ့ ပတ်သက်တာမရှိတဲ့အရပ်သားတွေသာ ဖြစ်တယ်လို့ အထက်ပါအဖွဲ့ဝင်က ပြောပါတယ်။

ဖမ်းခံရသူ ၅ ဦးထဲမှာ ကိုငမျိုးဟာ အသတ်ခံခဲ့ရပြီး ကျန် ၄ ဦးမှာလည်း ဇွန်လ ၁၈ ရက်အထိ ပြန်မလွတ်လာသေးသလို ဘယ်မှာဖမ်းဆီးချုပ်နှောင်ထားတယ်ဆိုတာ မသိရသေးတာကြောင့် သူတို့ရဲ့အန္တရာယ်ကိုလည်း စိုးရိမ်နေကြရတယ်လို့ ဆိုပါတယ်။

အဆိုပါ လက်နက်ကိုင်အဖွဲ့ဟာ ဇွန် ၁၀ ရက်မှာ လက်ပံတန်းမြို့နယ်၊ ရေနောက်ရွာက အမျိုးသား ၂ ဦး၊ အမျိုးသမီး ၃ ဦးနဲ့ ဇွန် ၁၁ ရက်ညမှာ မင်းလှမြို့နယ်၊ စီတုန်းရွာက အမျိုးသား ၁ ဦးတို့ကိုလည်း သတ်ဖြတ်ခဲ့သေးတယ်လို့ ဖြစ်စဥ်ကိုသိတဲ့ဒေသကာကွယ်ရေးအဖွဲ့ဝင်တဦးဆီက သိရပါတယ်။

အဲ့ဒီသတ်ဖြတ်မှုတွေကို စုံစမ်းဖော်ထုတ်ပေးဖို့ အထက်အဆင့်ဆင့်ကိုတင်ပြထားတယ်လို့လည်း ရွှေတန်းမြေ ပြည်သူ့ကာကွယ်ရေးအဖွဲ့က ဇွန် ၁၄ ရက်စွဲနဲ့ ထုတ်ပြန်ထားခဲ့ပါတယ်။

ဝက်လက်၊ ဇွန် ၁၇၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ညောင်ပင်ကြီးတောကျေးရွာမှာ လေကြောင်းတိုက်ခိုက်ခံရတာကြောင့် ကိုယ်ဝန်သည် ၁ ဦးအပါအဝင် ၄ ဦးသေဆုံးခဲ့တယ်လို့ ရွာခံတွေဆီက သိရပါတယ်။

ဇွန် ၁၇ ရက်နေ့လယ် ၁၂ နာရီ မိနစ် ၄၀ ခန့်မှာ စစ်ကော်မရှင်ရဲ့ဂျက်ဖိုက်တာတစီးဟာ ကျေးရွာအရှေ့တောင်ပိုင်းကို ဗုံးသီး ၂ လုံးကြဲချပြီး ရော့ကတ်နဲ့ပါပစ်ခတ်သွားတယ်လို့ ဆိုပါတယ်။

“ကိုယ့်အိမ်နဲ့ကိုယ်နေချိန်ဖြစ်တာ။ တယောက်ကဆိုလမ်းပေါ်ရောက်နေချိန်ထိတာ။ ဟိုကအိမ်ပေါ်ကိုတည့်တည့်ကျတာ။ ဗိုက်ကြီးသည်နဲ့ကလေးငယ်က သူအိမ်ထဲက မန်းကျည်းပင်ကိုထိပြီးမှ အထဲကသူတွေထိတာ။ သေတဲ့သူတွေကို ချက်ချင်းသင်္ဂြိုဟ်ရတာ။ အပိုင်းပိုင်းဖြစ်သွားတာ။ တယောက်ပဲအကောင်းတိုင်းရတယ်”လို့ ရွာခံတဦးကပြောပါတယ်။

ဗုံးထိမှန်တာကြောင့် အသက် ၃၀ အရွယ်ကိုယ်ဝန်သည်အမျိုးသမီး ၁ ဦး၊ သမီးဖြစ်သူ အသက် ၂ နှစ်အရွယ် မိန်းကလေးငယ် နဲ့ အသက် ၅၀ အရွယ်အမျိုးသမီး ၂ ဦးတို့သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၄၀ ကနေ ၅၀ ကြားအရွယ်အမျိုးသမီး ၃ ဦးထက်မနည်းဒဏ်ရာရပြီး ဒဏ်ရာရသူအရေအတွက်ကိုစိစစ်နေဆဲလို့ ဆိုပါတယ်။

ဗုံးကြဲမှုအတွင်းနေအိမ် ၁ လုံးပျက်စီးပြီး နွား ၃ ကောင်ထက်မနည်းသေဆုံးကာ ဗုံးလာကြဲပြီးနောက် ရွာခံတွေဟာနေအိမ်တွေအတွင်းမှာ ပုန်းအောင်းနေခဲ့ရတယ်လို့ အထက်ပါရွာခံက ပြောပါတယ်။

ဇွန် ၁၆ ရက်ညနေကလည်း ရွှေဘိုလေ့ကျင့်ရေး ၈ တပ်ကနေ လွှတ်တင်လိုက်တဲ့ အသေခံဒရုန်းဟာ ဝက်လက်မြို့နယ်၊ ဝက်လူးအိုင်ရွာထဲကျပြီး အမျိုးသမီး ၁ ဦးသေဆုံးကာ ၂ ဦးဒဏ်ရာရခဲ့ပါသေးတယ်။

စာတည်း- လင်း