မြေလတ်အသံ

ကန့်ဘလူ၊ စက်တင်ဘာ ၂၆၊ ၂၀၂၆။

စစ်ကိုင်းတိုင်း၊ ကန့်ဘလူမြို့နယ်၊ ထန်းတပင်ကျေးရွာမှာ နာရေးနှစ်ပတ်လည်လုပ်နေတဲ့ ဘုန်းကြီးကျောင်းဒရုန်းဗုံးကျပြီး ကျောင်းထိုင်ဆရာတော်အပါ ၂ ဦးဒဏ်ရာရတယ်လို့ ကန့်ဘလူမြို့နယ်ပကဖတာဝန်ရှိသူတွေထံက သိရပါတယ်။

စက်တင်ဘာလ ၂၆ ရက် မနက် ၉ နာရီ မိနစ် ၂၀ ခန့်မှာ ဇီးကုန်းသကြားစက်မှာ တပ်စွဲထားတဲ့ စစ်တပ်ကနေ ဒရုန်းနဲ့ ဘုန်းကြီးကျောင်းပေါ်ကို ဗုံးတလုံးချခဲ့တာလို့ ဆိုပါတယ်။

“မနှစ်က ရွာကအမျိုးသမီးတယောက် စစ်တပ်ကဖမ်းပြီး သတ်ဖြတ်လိုက်တာရှိတယ်။ အဲဒါကို ဒီနေ့ နှစ်ပတ်လည် ဆွမ်းကျွေး၊ ကုသိုလ်အမျှတမ်းပေးဝေတာ လုပ်နေတာ။ လုပ်နေတာက ကျောင်းမှာလုပ်နေတာကိုး။ ဗုံးက ကျောင်းပေါ်တည့်တည့်ကျတာ”လို့ ကန့်ဘလူမြို့နယ်ပကဖတာဝန်ရှိသူက ပြောပါတယ်။

ဗုံးထိမှန်တာကြောင့် သက်တော် ၅၀ အရွယ်ကျောင်းထိုင်ဆရာတော်နဲ့ အမျိုးသမီး ၁ ဦး ဗုံးစထိမှန်ဒဏ်ရာရပြီး ဘုန်းကြီး
ကျောင်းလည်းပျက်စီးမှု ရှိခဲ့ပါတယ်။

ဘုန်းကြီးကျောင်းပေါ် ဗုံးကျရောက်ပေါက်ကွဲတာကြောင့် တရားနာ ရောက်နေသူတွေလည်း ကျောင်းပေါ်ကနေ ထွက်ပြေးတိမ်းရှောင်ကြရတယ်လို့ ဆိုပါတယ်။

စစ်တပ်ဘက်က ဗုံးလာကြဲချိန်မှာ ကျေးရွာအနီးဝန်းကျင်မှာ တိုက်ပွဲဖြစ်တာမျိုးမဟုတ်ဘဲ ကျေးရွာဘုန်းကြီးကျောင်းကိုသာ ဦးတည်ပြီး ဗုံးချခဲ့တာလို့ သိရပါတယ်။

ဩဂုတ်လ ၂၀ ရက်ကလည်း ကန့်ဘလူမြို့နယ်၊ ရင်ခတ်ကုန်းကျေးရွာရှိ စတားလင့်သုံးနေတဲ့နေရာနဲ့ ရင်ခပ်ကုန်း၊ သပြေသာကျေးရွာကြားရှိ စစ်ရှောင်တွေနေတဲ့ ဘုန်းကြီးကျောင်း ဗုံးကြဲခံရလို့ သံဃာတပါးအပါအဝင် ၂ ဦးသေပြီး ၁ ဦးဒဏ်ရာရခဲ့တယ်လို့ သိရပါတယ်။

ညောင်ဦး၊ စက်တင်ဘာ ၂၆၊ ၂၀၂၆။

မန္တလေးတိုင်း၊ ညောင်ဦးမြို့နဲ့အနီးတဝိုက်ကျေးရွာတွေမှာ အုပ်ချုပ်ရေးမှူးတွေက စစ်မှုထမ်းပေါ်တာ မဆွဲဟုအာမခံပြီး တအိမ်ထောင်ကို စစ်မှုထမ်းကြေး ၃၀,၀၀၀ ကောက်ခံနေတယ်လို့ မြို့ခံတွေဆီက သိရပါတယ်။

အခုနှစ် ဇူလိုင်လကစတင်ပြီး ညောင်ဦးမြို့၊ ပုဂံမြို့၊ ပုဂံမြို့သစ်၊ တောင်ဇင်၊ မြင်းကပါ၊ ဝက်ကြီးအင်းအပါအဝင် ပုံဂံနဲ့ကပ်လျက်ကျေးရွာတွေထိ စစ်မှုထမ်းကြေးပေးဆောင်ရတယ်လို့ ဆိုပါတယ်။

“ဒီမှာက ပေါ်တာဆွဲစရာ လူငယ်တွေလည်းမရှိတော့ဘူး။ အိမ်ထောင်စုတခုကို ၃၀,၀၀၀ ပေးရတယ်။ လတိုင်းဆောင်နေတာ။ မြို့ပေါ်တွေမှာပေါ်တာမဆွဲဘူးလို့ သူတို့တာဝန်ယူပြီးသားလို့ပြောတယ်။ လုံးဝမဆွဲဘူးလို့လည်း ကြေညာတယ်။ အရင်ကတော့ မပေးရဘူး။ ခုပေးရတာဆို နှစ်လ ဒီလပါဆို သုံးလရှိပြီ”လို့ ပုဂံမြို့ခံတစ်ဦးက ပြောပါတယ်။

စစ်မှုထမ်းကြေးက အိမ်တိုင်းပေးနေရတာဖြစ်ပြီး ငွေကိုတော့ သက်ဆိုင်ရာ ရပ်ကွက်ကျေးရွာ အုပ်ချုပ်ရေးမှူးတွေက လကုန်တိုင်းကောက်ယူလေ့ရှိတယ်လို့ ဆိုပါတယ်။

စစ်မှုထမ်းကြေးပေးဆောင်ပြီးနောက်ပိုင်းမှာတော့ မြို့ပေါ်ရပ်ကွက်တွေမှာ စစ်မှုထမ်းအတွက် ပေါ်တာဆွဲတယ်ဆိုတဲ့ အသံတွေတော့ မကြားရတော့သလို လမ်းပိုင်းတွေပေါ်မှာ စစ်ဆေးမှုတွေလည်း နည်းသွားတယ်လို့ သိရပါတယ်။

စစ်မှုထမ်းကြေး မကောက်ခင်ကာလက စစ်တပ်နဲ့ပျုစောထီးအဖွဲ့တွေဟာ စစ်မှုထမ်းရဖို့ အလုပ်ရုံ၊ နေအိမ်နဲ့ လမ်းသွားလမ်းလာတွေပါမကျန် ပေါ်တာဆွဲဖမ်းဆီးနေတာကြောင့် မြို့ခံစစ်မှုထမ်း အသက်အရွယ်အကျုံးဝင်သူတွေဟာ ပြည်ပနိုင်ငံတွေကိုထွက်ပြေးတိမ်းရှောင်နေရတဲ့အထိဖြစ်နေတယ်လို့ သိရပါတယ်။

ဓါတ်ပုံ – စစ်ကောင်စီ

ညောင်ဦး၊ စက်တင်ဘာ ၂၅၊ ၂၀၂၆။

မန္တလေးတိုင်း၊ ညောင်ဦးမြို့နယ်အတွင်းမှာ အာဏာသိမ်းစစ်တပ်နဲ့ တော်လှန်ရေးပူးပေါင်းတပ်တွေ စစ်ရေးပြင်းထန်နေချိန် ကမ္ဘာ့ရှေးဟောင်းအမွေအနှစ် စာရင်းဝင်ပုဂံမှာ သီတင်းကျွတ်အားလပ်ရက်အတွက် ဟိုတယ်နဲ့ တည်းခိုခန်းတွေ ပြည့်နေတယ်လို့ ခရီးသွားလုပ်ငန်းလုပ်ဆောင်နေသူတွေနဲ့ ညောင်ဦးပကဖ တာဝန်ရှိသူတွေထံက သိရပါတယ်။

စက်တင်ဘာလ ဒုတိယအပတ်လောက်ကစတင်ပြီး ညောင်ဦးမြို့နယ် အနောက်ဘက်ခြမ်း၊ ချောက်နဲ့ ပုဂံကြားမှာ စစ်တပ်အင်အား ၂၀၀ ကျော်နဲ့ ကျေးရွာတွေကို စစ်ကြောင်းထိုးနေတာမျိုးတွေရှိနေပြီး ထိတွေ့တိုက်ပွဲအချို့လည်း ဖြစ်ပွားထားတယ်လို့ ဆိုပါတယ်။

“အရှေ့ဘက်ခြမ်းကတော့ ပြန်ဆုတ်သွားတာမကြာသေးဘူး။ အနောက်ဘက်ခြမ်းမှာ ဖြစ်နေတာတော့ ရှိတယ်။ အရှေ့ခြမ်းမှာဆို လွန်ခဲ့တဲ့ ၁၀ ရက်လောက်ကမှ ပြန်ဆုတ်သွားတာ။ မိုင်းထိပြီး ဆုတ်သွားကြတာ။ အရှေ့ဘက်ခြမ်းကတော့ ပုံမှန်ရှိတယ်။ အနောက်ဘက်ကိုတော့ မကြမကြာစစ်ကြောင်းဝင်နေတာ”လို့ ညောင်ဦးပကဖ တာဝန်ရှိသူက ပြောပါတယ်။

ပုဂံနဲ့ ဧရာဝတီမြစ်ပဲခြားတဲ့ တဖက်ကမ်းရှိ ပခုက္ကူမြို့နယ်၊ မြစ်ခြေမြို့အနီးနဲ့ ရေနံချပ်ကျေးရွာတွေမှာလည်း စစ်တပ်စစ်ကြောင်းတွေရှိနေတယ်လို့ သိရပါတယ်။

တဖက်မှာလည်း စစ်ရေးပြင်းထန်နေပေမယ့် လာမယ့် အောက်တိုဘာလ သီတင်းကျွတ်ပိတ်ရက်ရှည်ကာလအတွင်းမှာ ပုဂံက ဟိုတည်နဲ့ တည်းခိုခန်းတွေမှာ လာရောက်တည်းခိုဖို့ စာရင်းပေးထားသူတွေနဲ့ပြည့်နေတယ်လို့ ခရီးသွားလုပ်ငန်းလုပ်ဆောင်နေသူတဦးက ပြောပါတယ်။

“သီးတင်းကျွတ်အတွက် တော်တော်များများပြည့်နေပြီ။ ဒီလ ၂၅၊ ၂၆ အတွက်တောင် အပြည့်။ နောက်လဆိုလည်း အပြည့်ဖြစ်နေပြီ။ ဘုရားဖူးတွေက အခုချိန်ကတည်းက ရှိနေပြီး။ လမ်းအခြေနေလည်းကောင်းတယ်။ ကျောက်ပန်းတောင်-အမြန်လမ်းကတော့ ကောင်းတယ်။ ဟိုတယ်၊ တည်းခိုခန်းကပြည့်ပြီး။ အီဗိုက်အဌားတွေတောင် ပြည့်နေပြီး။ ကျောင်းပိတ်ရက်အတွက် က နာမည်ကြီးဟိုတယ်တွေက လုံးဝမရတော့ဘူး”လို့ ပြောပါတယ်။

ပုဂံမြို့ပေါ်မှာတော့ စစ်တပ်၊ ရဲနဲ့ ပြည်သူစစ်တွေက အချိန်ပြည့် ကင်းပတ်နေတာမျိုးတွေရှိနေပြီး ပွင့်လင်းရာသီကာလ ပုဂံကိုလာမယ့် ဘုရားဖူးတွေရဲ့ လုံခြုံရေးလုပ်ဆောင်နေတာမျိုးတွေ ရှိနေတယ်လို့ ဆိုပါတယ်။

ပုဂံမှာတော့ နှစ်စဥ် နွေရာသီကျောင်းပိတ်ရက်၊ ဒီဇင်ဘာပိတ်ရက်နဲ့ သီတင်းကျွတ်ကာလတွေမှာ ပြည်တွင်းပြည်ပ ခရီးသွားတွေနဲ့စည်ကားနေတတ်ပြီး အဆိုပါကာလတွေမှာ ဟိုတည်၊ တည်းခိုခန်း၊ နေအိမ်လုံးချင်းအဌားတွေ ပြည့်နေတတ်တယ်လို့ သိရပါတယ်။

ဆော၊ စက်တင်ဘာ ၂၅၊ ၂၀၂၆။

မကွေးတိုင်း၊ ဆောမြို့နယ်၊ အင်ဘူးကျေးရွာအနီးမှာ စစ်ရှောင်သွားတဲ့ ချင်းလူမျိုး လင်မယားစုံတွဲ ၂ တွဲကို အာဏာသိမ်းစစ်တပ်က ဖမ်းဆီးလိုက်တာလို့ ဒေသခံတွေဆီက သိရပါတယ်။

စက်တင်ဘာလ ၂၄ ရက်နေ့ ညနေ ၃ နာရီ မိနစ် ၃၀ ခန့်မှာ မဆာထွီကျေးရွာနေ အသက် ၄၀ ဝန်းကျင်အရွယ် လင်မယားစုံတွဲ ၂ တွဲက သူတို့နေထိုင်ရာ ကျေးရွာကနေ ဆိုင်ကယ်တွေနဲ့ လောင်းရှည်မြို့ပေါ် စစ်ရှောင်လာချိန် စစ်ကြောင်းနဲ့တိုးပြီး ဖမ်းဆီးခံရတာလို့ ဆိုပါတယ်။

“ဆိုင်ကယ်က ၃ စီးလာတာ။ ကလေးတွေပါတဲ့ အစီးကို လွှတ်ပေးလိုက်ပြီးတော့ သူတို့ကိုတော့ ဖမ်းထားလိုက်တယ်။ အနည်းဆုံး ၇ ဦးလောက်လာတာ။ သူတို့က ချင်းဘုံလူမျိုးတွေ။ သူတို့က စစ်ကြောင်းရှိမှန်းတောင် မသိဘူးတဲ့။ ရိုးသားတဲ့သူတွေဆိုတော့”လို့ ဒေသခံတဦးက ပြောပါတယ်။

ဖမ်းဆီးခံရသူတွေဟာ ချင်းမျိုးနွယ်စုတွေထဲက ချင်းဘုံမျိုးနွယ်စုဝင်တွေဖြစ်ပြီး၊ သူတို့ကို စစ်တပ်တပ်စွဲထားတဲ့ ဆောမြို့နယ်၊ အင်ဘူးကျေးရွာ စာသင်ကျောင်းမှာပဲ ဖမ်းဆီးထားပြီး စက်တင်ဘာလ ၂၅ ရက်နေ့မနက်ပိုင်းအထိ ပြန်မလွှတ်သေးဘူးလို့ ဆို​ပါတယ်။

ဆောမြို့နယ်၊ အင်ဘူးကျေးရွာမှာ ပြီးခဲ့တဲ့ စက်တင်ဘာလ ပထမပတ်လောက်ကတည်းက အင်အား ၁၀၀ ကျော်ပါ အာဏာသိမ်းစစ်တပ် စစ်ကြောင်းရောက်ရှိနေကာ လမ်းသွားလမ်းလာ ခရီးသွား ပြည်သူတွေကို ဖမ်းဆီးစစ်ဆေးတာတွေ ပြုလုပ်နေတာလို့ ဒေသခံတွေက ပြောပါတယ်။

ဒါ့အပြင် အင်ဘူးကျေးရွာအနောက်တောင်ဘက် စလင်းချောင်းအနီး ဖိုးချင်တောင်မှာလည်း စစ်တပ်က အင်အား ၄၀၀ ကျော်နဲ့ တပ်စွဲထားကာ မြေပြင်အခြေအနေကို စောင့်ကြည့်ပြီး တပ်ဖြန့်လှုပ်ရှားမှုတွေ ပြုလုပ်နေတယ်လို့ ဆိုပါတယ်။

ပြီးခဲ့တဲ့ ဩဂုတ်လ ၁၅ ရက်နေ့ကလည်း ဆောမြို့နယ်၊ သီကုန်းကျေးရွာ တောစပ်မှာ စစ်တပ်ကြဲချတဲ့ ဒရုန်းဗုံးထိမှန်လို့ စစ်ရှောင်ပြည်သူ ၃ ဦးသေဆုံးတယ်လို့ သိရပါတယ်။.

မြေလတ်အသံ၊ စက်တင်ဘာလ ၂၄၊ ၂၀၂၆။

NUG အထူးတိုင်း စစ်ဌာနချုပ် ဗုံးကြဲခံရလို့ ထိခိုက်သေဆုံးမှုတွေရှိတယ်လို့ ဒေသစစ်ရေးသတင်းရင်းမြစ်တွေဆီက သိရပါတယ်။

စက်တင်ဘာလ ၂၄ ရက် ဒီကနေ့ မနက် ၁၁ နာရီခန့်မှာ အာဏာသိမ်းစစ်တပ်ရဲ့ လေကြောင်းကနေ အထူးတိုင်းစစ်ဌာနရှိတဲ့ နေရာကို ဗုံး ၆ လုံးကြဲချသွားတယ်လို့ ဆိုပါတယ်။

“တပ်မဟာ ၃ နဲ့ ၁ အစပ်က သိမ်ဇရပ် အနောက်ဘက်ဂွင်ထဲမှာ ဖြစ်တာ။ အမတ ၃၁၀ နဲ့ တပ်မ ၄၄ က ဟောင်ဝင်ဇာနဲ့ ပစ်ခတ်တာတွေလည်း ရှိတယ်။ ထိခိုက်သေဆုံးတော့ ရှိတယ်”လို့ ဒေသစစ်ရေးသတင်းရင်းမြစ်တဦးက မြေလတ်အသံကို ပြောပါတယ်။

မြေလတ်အသံက လတ်တလောစုံစမ်းသိရှိချက်အရ သေဆုံးသူ PDF အဖွဲ့ဝင် ၄ ဦးရှိပြီးလို့ သိရပါတယ်။

ဗုံးကြဲခံရပြီးနောက်မှာ ကျိုက်ထိုနဲ့ သိမ်ဇရပ်အခြေစိုက် စစ်တပ်တွေကနေ လ​က်နက်ကြီးတွေ ဆက်တိုက်ပစ်ခတ်နေလို့ သေဆုံးထိခိုက်သူတွေ ကောက်ယူဖို့တောင် အခက်ခဲရှိနေတယ်လို့ သိရပါတယ်။

ပေါင်းတည်၊ စက်တင်ဘာ ၂၄၊ ၂ဝ၂၆။

ပဲခူးတိုင်းအနောက်ခြမ်း၊ ပေါင်းတည်မြို့မှာ အကျဉ်းချုံးကျင်းပတဲ့ ဗုဒ္ဓမြတ်စွယ်တော် အပူဇော်ခံလှည့်လည်ပွဲကို လာရောက်လည်ပတ်သူများပေမယ့် ပွဲတော်မှာ အခကြေးငွေနဲ့ ရုံသွင်းကပြတဲ့ စမ်းရေမိုးဇာတ်ပွဲကိုတော့ ပွဲကြည့်သူပရိတ်သတ်နည်းပါးခဲ့တယ်လို့ မြို့ခံတွေဆီက သိရပါတယ်။

စမ်းရေမိုးဇာတ်အဖွဲ့ ဟာ ပေါင်းတည်မြို့ မိုးလုံ၊ လေလုံ အားကစားခန်းမထဲမှာ စက်တင်ဘာ ၂၃ ရက် (မနေ့က)စတင်ပြီး ၂၇ ရက်အထိ (၅) ညတိုင်တိုင် ကပြမှာဖြစ်ပြီး ပထမဆုံးကပြတဲ့ မနေ့ညက ပွဲလာကြည့်သူနည်းတယ်လို့ သိရပါတယ်။

“လူတွေက စိတ်အပန်းဖြေတဲ့အနေနဲ့သာပဲ ပွဲတော်ထွက်လည်ကြတာ။ အဖက်ဖက်က ကြပ်တည်းမှုတွေနဲ့ ရင်ဆိုင်နေရတယ်။ ဒါ့ကြောင့်စမ်းရေမိုးကို စိတ်ဝင်စားမှု နည်းပါးတယ်”လို့ မြို့ခံအမျိုးသမီးတဦးက မြေလတ်အသံကို ပြောပါတယ်။

ဇာတ်ရေမိုးဇာတ်ပွဲအတွက် ဖျာလက်မှတ် ၁ ချပ်ကို ကျပ် ၁ သိန်းခွဲ၊ ၁ သိန်းနဲ့ ၇ သောင်းဖြစ်ပြီး၊ ဘေးတန်းက ကုလားထိုင် ၁ ခုံကို ကျပ် ၅ သောင်းနဲ့ ကျပ် ၄ သောင်းဆိုပြီး ပွဲမစတင်မီ ၃ ပတ်အလိုကတည်းက ရောင်းချတာဖြစ်ပြီး ရုံဝင်ခက လူကြီး ကျပ် ၁ သောင်းခွဲနဲ့ ကလေး ၁ သောင်းကျပ်လို့ ဆိုပါတယ်။

တခြားမြို့နယ်တွေမှာတော့ စမ်းရေမိုးဇာတ်ပွဲကြည့်သူ ကြိတ်ကြိတ်တိုးစည်းကားခဲ့ပေမယ့် ပေါင်းတည်မြို့ဘုရားပွဲရဲ့ ပထမဆုံးရက်မှာတော့ ပွဲကြည့်သူနည်းပါးတာကိုတွေ့ရပြီး၊ စမ်းရေမိုးဇာတ်အဖွဲ့နဲ့ ပတ်သက်လို့ ဆိုရှယ်မီဒီယာမှာ တင်လေ့ရှိသူ Aung Kyaw Tyn ကလည်း “ပေါင်းတည် ပထမည လူနည်းပါးတယ် စမ်းရေမိုးဝင်နေကျ စံချိန်အရပြောတာပါ” လို့ သူ့ရဲ့ Facebook မှာ ရေးသားထားတာကို တွေ့ရပါတယ်။

ပေါင်းတည်မြို့မှာ ဗုဒ္ဓစွယ်တော်ပွားအပူဇော်ခံပွဲကို စက်တင်ဘာ ၂၄ ရက်ကနေ စက်တင်ဘာ ၂၆ ရက် (တော်သလင်းလဆန်း ၁၃ ရက်ကနေ တော်သလင်းလပြည့်နေ့)အထိ ၃ ရက်တာ အကျဉ်းချုံး ကျင်းပခြင်းဖြစ်ပြီး စစ်တပ်က အာဏာမသိမ်းမီက ကျင်းပသလို ပွဲတော်လာသူတွေကို ဗလာဇာတ်နဲ့ ဖျော်ဖြေတာ၊ ဗုဒ္ဓစွယ်တော်ပွားမြို့ပေါ်ရပ်ကွက်တွေကိုလှည့်လည် အပူဇော်ခံရာမှာလည်း ယခင်ကလို ဇာတ်နိပတ်တွေ ယိမ်းကားတွေပါဝင်ခြင်းမရှိဘူးလို့ မြို့ခံတွေဆီက သိရပါတယ်။

ဗုဒ္ဓစွယ်တော်ပွားကို ဒီကနေ့ မွန်းလွဲ ၁ နာရီမှာ မြို့ပေါ်ရပ်ကွက်တွေကို လှည့်လည်အပူဇော်ခံမှာဖြစ်ပါတယ်။

သတင်း – သော်တာအောင်