သေဆုံး

ဆားလင်းကြီး၊ ဩဂုတ် ၁၉၊ ၂၀၂၆။

စစ်ကိုင်းတိုင်း၊ ဆားလင်းကြီးမြို့နယ်၊ ရေခါးရွာ ဗုံးကြဲခံရပြီး အမျိုးသမီး ၂ ဦးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ဩဂုတ်လ ၁၈ ရက်နေ့ ညနေ ၄ နာရီခန့်က စစ်ကောင်စီ ဂျက်ဖိုက်တာနှစ်စီးက ကျေးရွာထဲကို ဗုံး ၂ လုံးကြဲချပြီး၊ ရောကတ်တွေနဲ့ပါ ပစ်ခတ်ခဲ့တာလို့ ဆိုပါတယ်။

“ရေခါးရွာထိပ် ဘုန်းကြီးကျောင်းနှစ်ကျောင်းကြားကို ကြဲသွားတာ။ ကျောင်းလည်း ပျက်စီးတယ်။ လူကမိန်းကလေးတွေကြီး သေတာ။ လယ်တီကျေးရွာက တယောက်ပါတယ်။”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဗုံးကြဲခံရမှုအတွင်း ရေခါးကျေးရွာနဲ့ လယ်တီကျေးရွာက အသက် ၃၀ ကနေ ၄၀ ကြားရှိ အမျိုးသမီး ၂ ဦးနေရာမှာတင် သေဆုံးသွားတယ်လို့ ဆိုပါတယ်။

ဒါ့အပြင် ဘုန်းကြီးကျောင်း ၂ ကျောင်း၊ နေအိမ် ၅ လုံး၊ နွားနှစ်ကောင် သေဆုံးခဲ့ပြီး ဒေသခံပြည်သူတွေကတော့ ရွာကနေ တိမ်းရှောင်နေကြတယ်လို့ သိရပါတယ်။

ဩဂုတ်လ ၁၈ ရက်နေ့ကလည်း စစ်ကိုင်းတိုင်း၊ ဝက်လက်မြို့နယ်အတွင်းက ညောင်ကြီးတောနဲ့ ကူကောင်းကျေးရွာတို့ လေကြောင်းတိုက်ခိုက်ခံရပြီး ကူကောင်းကျေးရွာက နေအိမ်ထဲနေနေတဲ့ သက်ကြီး အမျိုးသမီးတဦး ရောကတ်ထိမှန်လို့ သေဆုံးတယ်လို့ သိရပါတယ်။

ဝက်လက်၊ ဇူလိုင် ၂၈၊ ၂၀၂၆

စစ်ကိုင်းတိုင်း၊ ဝက်လက်မြို့နယ်၊ ပေါက်ကန်ဘူတာကျေးရွာကို စစ်တပ်က လေကြောင်းနဲ့ ဗုံးကြဲချခဲ့တာကြောင့် သက်ကြီးအမျိုးသား ၁ ဦးသေဆုံးသွားတယ်လို့ တိုက်နယ် ၄ ပကဖ တာဝန်ရှိသူတွေထံက သိရပါတယ်။

ဇူလိုင်လ ၂၈ ရက်နေ့မနက် ၁၀ နာရီခွဲခန့်မှာ တံတားဦးလေတပ်ကနေ တက်လာတဲ့ ဂျက်ဖိုက်ဟာ ပေါက်ကန်ဘူတာကျေးရွာထဲကို ဗုံး ၂ လုံးကြဲချသွားခဲ့တာ ဖြစ်ပါတယ်။

“ဗုံးက ရွာမြောက်ဖျားတလုံး ရွာလယ်တလုံးကျတာ။ ရွာလယ်ကျတဲ့ဟာမှာ အိမ်ဘေးကျတော့ အစမှန်တာပေါ့။ ခုထိတဲ့သူတွေက အိမ်ထဲရှိနေရင်း ထိတာ” လို့ တိုက်နယ် ၄ ပကဖတာဝန်ရှိသူက ဆက်ပြောပါတယ်။

ဗုံးထိမှန်တာကြောင့် ပက်လပ်ကုလာထိုင်မှာ ထိုင်နေတဲ့ အသက် ၆၃ နှစ်အရွယ် ဦးမြင့်သန်းမှာ နေရာမှာပင် သေဆုံးသွားခဲ့ပြီး၊ အသက် ၄၃ နှစ်အရွယ် မဖြူဝင်းက ဒဏ်ရာရရှိသွားတာ ဖြစ်ပါတယ်။

ဒါ့အပြင် နေအိမ် ၃ လုံးလည်း ပျက်စီးသွားပြီး တိုက်လေယာဉ်နဲ့ ဗုံးကြဲခံရလို့ ကျေးရွာအတွင်း စိုးရိမ်သူအချို့က ထွက်ပြေးတိမ်းရှောင် သွားကြတယ်လို့ သိရပါတယ်။

ပြီးခဲ့တဲ့ ဇွန်လ ၁၆ ရက်နေ့ကလည်း ဝက်လက်မြို့နယ်၊ နတ်ကုန်းတလိုင်းရွာသစ်နဲ့ ဝက်လူးအိုင်ကျေးရွာတွေက ဒေသခံပြည်သူတွေကို စစ်တပ်က ဒရုန်းနဲ့ တိုက်ခိုက်ခဲ့လို့ ဝက်လူးအိုင်ရွာက အမျိုးသမီး ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ သိရပါတယ်။

ရေတာရှည်၊ ဇူလိုင် ၁၁၊ ၂၀၂၆။

ပဲခူးတိုင်း၊ ရေတာရှည်မြို့နယ်၊ စည်ပိုင်းကျေးရွာမှာ ဗုံးကြဲခဲရလို့ ရွာခံအမျိုးသား ၁ ဦး ဦးခေါင်းပြတ်ထွက်ပြီး ခန္ဓာကိုယ်ကြေမွသေဆုံးခဲ့တယ်လို့ ဖြစ်စဥ်ကို ကိုယ်တိုင်ကြုံတွေ့ခဲ့ရသူဆီက သိရပါတယ်။

ဇူလိုင် ၁၀ ရက်မနက် ၁၁ နာရီကျော်မှာ တောင်ငူလေတပ်ကနေတက်လာတဲ့ ဂျက်ဖိုက်တာက ကျေးရွာထဲကို ဗုံး ၂ လုံးကြဲချခဲ့ချိန် အသက် ၄၅ နှစ်အရွယ် ကိုနိုင်လင်းသေဆုံးပြီး အသက် ၄၀ ကျော်အရွယ် ဇနီးဖြစ်သူနဲ့ နောက်ထပ်အိမ်နီးနားချင်းဖြစ်သူ အသက် ၂၀ ကျော်အရွယ် လူငယ်တို့ ပြင်းထန်ဒဏ်ရာရခဲ့တယ်လို့ ဆိုပါတယ်။

“ဗုံးကြဲချိန် အဲ့နားရှိနေတာ။ ကြဲတဲ့ ၂ လုံးက ရွာလယ်တည့်တည့်ကျတာ။ အိမ်ပေါ်တည့်တည့်ကျတာ။ နားတွေဆို အူထွက်သွားတယ်။ ပေါင် ၂၅၀ ထက်တော့မလျော့ဘူး။ ဗုံးကအိမ်ရှေ့နဲ့အိမ်နောက် ခွကျတာ။ ဦးနှောက်တွေ မျက်လုံးတွေဆို နံရံတွေမှာကပ်နေလို့ ကျွတ်ကျွတ်အိတ်ထဲကောက်ထည့်ပြီး သင်္ဂြိုဟ်ပေးခဲ့ရတယ်”လို့ ကိုယ်တိုင်ကြုံတွေ့ခဲ့သူတဦးက ပြောပါတယ်။

ဒါ့အပြင်နေအိမ် ၃ လုံးပျက်စီးပြီး သေဆုံးသူအလောင်းကိုချက်ချင်းသင်္ဂြိုဟ်လိုက်ရသလို ဒဏ်ရာရသူတွေကိုလည်း နီးစပ်ရာဆေးခန်းကို ပို့ဆောင်ကာဆေးကုသနေရတယ်လို့ ဆိုပါတယ်။

ဇွန်လ ၆ ရက်ကလည်း ရေတာရှည်မြို့နယ်၊ နဂျပ်အနောက်ရွာကို ဗုံးကြဲခံရလို့ ပြည်သူ ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ သိရပါတယ်။

စဉ့်ကူး၊ ဇူလိုင် ၁၁၊ ၂၀၂၆။

မန္တလေးတိုင်း၊ စဉ့်ကူးမြို့နယ်နဲ့ မကွေးတိုင်း၊ အောင်လံမြို့နယ်တွေမှာ အုပ်ချုပ်ရေးမှူးအပါအဝင် ၄ ဦးသေနတ်နဲ့ပစ်ခံရပြီး သေဆုံးခဲ့တယ်လို့ ဒေသကာကွယ်ရေးအဖွဲ့တာဝန်ရှိသူတွေဆီက သိရပါတယ်။

ဇူလိုင် ၈ ရက်မနက် ၆ နာရီကျော်မှာ စဉ့်ကူးမြို့နယ်၊ ရွှေဂုံတိုင်ကျေးရွာရှိ “လပြည့်ဝန်း” လက်ဖက်ရည်ဆိုင်မှာထိုင်နေတဲ့ ကျေးရွာအုပ်ချုပ်ရေးမှူး အသက် ၅၃ နှစ်အရွယ် ဦးအောင်ဆန်းဝင်း (ခ) မင်းမင်းနဲ့ ရွှေဒုံးကျေးရွာတာဝန်ခံ အသက် ၄၅ နှစ်အရွယ် ကိုသန်းဇော်တို့ကို သေနတ်သမားတွေက ဆိုင်ထဲဝင်လာပြီး ပစ်ခတ်ခဲ့တာလို့ ဆိုပါတယ်။

“ပစ်တာကတော့ တပ်ရင်းတွေဘက်က ပစ်တယ်လို့တော့သိရတယ်။ လက်ဖက်ရည်ဆိုင်ထဲထိ ဝင်ပစ်တာပေါ့။ အဲ့ဒါဖြစ်ပြီး ရွာခံတွေဖမ်းဆီးခံရတာတော့မရှိဘူး။ အလောင်းတွေတော့ စဉ့်ကူးဘက် သယ်သွားကြတယ်။ “လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

အုပ်ချုပ်ရေးမှုးနဲ့ ကျေးရွာတာဝန်ခံတို့ဟာ စစ်တပ်လက်အောက်ခံဖြစ်သလို ပြည်သူတွေဆီက စစ်မှုထမ်းအကြောင်းပြငွေညှစ်တာနဲ့ သတင်းပေးလုပ်နေတာကြောင့် ပစ်ခတ်ရှင်းလင်းခံရတာလို့ ဆိုပါတယ်။

အလားတူ ဇူလိုင် ၈ ရက်ည ၁၀ နာရီကျော်ခန့်မှာလည်း အောင်လံမြို့နယ်၊ ဥယျာဥ်ကျေးရွာနေ ပျူစောထီးအဖွဲ့ဝင် အသက် ၃၆ နှစ်အရွယ် သက်နိုင်စိုး (ခ) ကြွက်နီရဲ့နေအိမ်ကို ဝင်ရောက်ပစ်ခတ်ခဲ့တယ်လို့ ပစ်ခတ်မှုပြုလုပ်ခဲ့တဲ့ ဒေသကာကွယ်ရေးအဖွဲ့တာဝန်ရှိသူက ပြောပါတယ်။

“ကြွက်နီက မြို့ပေါ်နေတာများတယ်။ သူအိမ်ပြန်ရောက်လာချိန်စောင့်ပြီး နေအိမ်ထဲဝင်ပစ်တာ။ အိမ်ထဲဝင်ပစ်ချိန်မှာတော့ သူတို့လင်မယားနဲ့ သူ့ယောက္ခမလင်မယားရှိနေတာ။ ပစ်ခတ်ပြီးတဲ့နောက်မှာလည်း ရွာထဲကအခြားပျူစောထီးတွေက သေနတ်ပစ်ဖောက်တဲ့ ဖြစ်စဉ်တွေ ရှိခဲ့တယ်။ ပျူခေါင်းဆောင် အတာအိမ်ကိုလည်းဝင်ဖို့လုပ်သေးတယ် သူမရှိလို့ ဘာမှမလုပ်ခဲ့ရဘူး”လို့ ပစ်ခတ်မှုပြုလုပ်ခဲ့တဲ့ အဖွဲ့တာဝန်ရှိသူက ပြောပါတယ်။

အဆိုပါပစ်ခတ်မှုအတွင်း ပျူစောထီးအဖွဲ့ဝင် သက်နိုင်စိုး (ခ) ကြွက်နီ၊ ယောက္ခမဖြစ်သူ အသက် ၄၃ နှစ်အရွယ် ဒေါ်စန်းစန်းအေးတို့သေဆုံးခဲ့ပြီး ကြွက်နီရဲ့ မိန်းမဖြစ်သူ အသက် ၂၇ နှစ်အရွယ်နဲ့ ယောက္ခထီးဖြစ်သူ အသက် ၄၈ နှစ်အရွယ်တို့ ဒဏ်ရာရခဲ့တယ်လို့ ဆိုပါတယ်။

ကြွက်နီရဲ့နေအိမ်ကို ဝင်ရောက်ပစ်ခတ်ချိန် သူကိုင်ဆောင်တဲ့ အူဇီသေနတ် ၁ လက်နဲ့ ကျည်ဆန်အချို့ကိုလည်း သိမ်းဆည်းရမိခဲ့တယ်လို့ သိရပါတယ်။

ဇူလိုင် ၅ ရက်ကလည်း အောင်လံမြို့၊ ပြလို့တိုက်နယ်၊ ကွမ်းလောင်းကျေးရွာအဝင်အနားမှာ အုပ်ချုပ်ရေးမှူး ဦးအေးဟန် ဓားခုတ်ခံရပြီးသေဆုံးခဲ့တဲ့ဖြစ်စဥ် ရှိခဲ့ပါသေးတယ်

ပေါင်းတည်၊ ဇူလိုင် ၁၊ ၂၀၂၆

ပဲခူးတိုင်း၊ ပေါင်းတည်မြို့နယ်၊ တောင်ခမောက်ရွာနဲ့ လက်ပံခုန်ရွာကြားကို လေကြောင်းကနေ ဗုံးကြဲတာကြောင့် အသက် ၅၀ ကျော် အမျိုးသား ၁ ဦးသေဆုံးခဲ့ရတယ်လို့ ပြည်ခရိုင်တပ်ရင်း(၁) စစ်ထောက်လှမ်းရေးနှင့် သတင်းပြန်ကြားတာဝန်ခံရဲဘော် Shadow ထံက သိရပါတယ်။

ဇူလိုင်လ ၁ ရက်နေ့ နေ့လယ် ၁၂ နာရီ ၄၅ မိနစ်ခန့်အချိန် နေပြည်တော်ကနေ တက်လာတဲ့ ဂျက်ဖိုက်တာ ၂ စီးက ကျေးရွာ ၂ ရွာကြားရှိ လမ်းပိုင်းကို ဗုံး ၄ လုံးကြဲချသွားတယ်လို့ ဆိုပါတယ်။

“အဲနေရာမှာ ဘာတိုက်ပွဲမှမရှိဘူး။ သူက အဲနေရာက တဲမှာနေတာ။ နွားတွေမွေးပြီးတော့ နို့ညှစ်ရောင်းတာ။ သူတဲနားကို ဗုံးကျပြီး အစမှန်ပြီးသေတာ။ သူတဲမှာ သူအမေနဲ့ သူနဲ့နှစ်ယောက်တည်းရှိတာ”လို့ ပြည်ခရိုင်တပ်ရင်း(၁)စစ်ထောက်လှမ်းရေးနှင့်သတင်းပြန်ကြားတာဝန်ခံရဲဘော် Shadow က ပြောပါတယ်။

ဗုံးစမှန်တာကြောင့် တောင်ခမောက်ရွာသား အသက် ၅၀ ကျော်ရှိ ဦးဆန်းမြင့်မှာ ကျောနဲ့တင်ပါးကို အစဖောက်ဝင်ပြီး၊ ရင်ဘက်မှ ဖေါက်ထွက်ကာ နေရာမှာတင် သေဆုံးသွားပါတယ်။

ဒါ့အပြင် တဲအိမ်လည်းပျက်စီးမှုအနည်းငယ်ရှိခဲ့ပြီး အသက် ၇၈ နှစ်အရွယ် မိခင်ဖြစ်သူမှာတော့ ထိခိုက်တာမရှိဘူးလို့သိရကာ ဗုံးကြဲချချိန် ကျေးရွာနှစ်ရွာက ပြည်သူအချို့ကတော့စိုးရိမ်ပြီး တိမ်းရှောင်သွားကြတာရှိတယ်လို့ သိရပါတယ်။

ပဲခူးတိုင်းအတွင်း ပြီးခဲ့တဲ့ ဇွန်လ ၆ ရက်နေ့ကလည်း ရေတာရှည်မြို့နယ်၊ နဂျပ်ကျေးရွာမှာ လေကြောင်းကနေ ဗုံးကြဲလို့ သက်ကြီးအမျိုးသား ၁ ဦးသေဆုံးခဲ့တယ် သိရပါတယ်။

■ သေဆုံးမှုအပေါ် သမာသမတ်ကျကျဖြေရှင်းပေးဖို့ ခရိုင်တပ်ရင်းတွေ တောင်းဆို

မြေလတ်အသံ၊ ဇွန် ၂၈၊ ၂၀၂၆။

အစည်းအဝေးပြုလုပ်နေစဥ် သေနတ်နဲ့ပစ်ခတ်ခံရပြီး သေဆုံးသွားတဲ့ ယင်းမာပင်ခရိုင်တပ်ရင်း ၆ တပ် ရင်းမှူး ပုလဲမောင်ရဲ့ဈာပနကို လူအနည်းငယ်နဲ့သာပြုလုပ်ခဲ့ရပြီး သတ်ဖြတ်ခံရမှုအပေါ် သမာသမတ်ကျကျ ကိုင်တွယ်ဖြေရှင်းပေးဖို့ ယင်းမာပင်ခရိုင်တပ်ရင်းတွေက ဒီကနေ့မှာ ထုတ်ပြန်တောင်းဆိုလိုက်ပါတယ်။

ကိုပုလဲမောင်ရဲ့ ဈာပနကို ဇွန်လ ၂၇ ရက် ယမန်နေ့က သူ့ဇာတိကျေးရွာမှာပဲပြုလုပ်ခဲ့ပြီး စျာပနကို ယင်းမာပင်ခရိုင်ရဲ့တာဝန်ရှိသူတွေ တဦးမှတက်ရောက်တာမတွေ့ရဘူးလို့ မိသားစုဝင်နဲ့နီးစပ်သူတဦးက မြေလတ်အသံကို ပြောပါတယ်။

“ကျနော်သိရသလောက် သူ့ရဲ့ဈာပနကို သူ့အိမ်မှာပဲ သူ့မိသားစုက လုပ်ချင်တယ်ဆိုပြီးတော့ တပ်ရင်းကို ပြောတဲ့အတွက်ကြောင့် သူ့ရဲ့ရွာမှာပဲ လုပ်ဖြစ်ပါတယ်၊ သူ့ရွာက (စစ်တပ်တပ်စွဲထားတဲ့) မင်းတိုင်ပင်ရွာနဲ့ နီးတဲ့အတွက်ကြောင့် အရမ်းကြီး ကြီးကြီးကျယ်ကျယ်မလုပ်တော့ဘဲနဲ့ လူတွေတော့ အရမ်းမပါဘူးတဲ့။ ကျနော် မနေ့ကလှမ်းမေးတဲ့အချိန်မှာ (ဈာပန)လုပ်တဲ့အချိန်မှာ ရဲဘော် ၁ ယောက် ၂ ယောက်ပါတယ်တဲ့၊ အခြား ဗိုလ်စွမ်းတို့လိုမျိုး တာဝန်ရှိသူတွေ တယောက်မှ မလာပါဘူး”လို့ ပြောပါတယ်။

ဇွန်လ ၂၆ ရက်က ယင်းမာပင်ခရိုင်ကွပ်ကဲရေးမှူး စွမ်းသူမောင် ဦးစီးပြီး ပြုလုပ်တဲ့အစည်းအဝေးတခုမှာ တပ်ရင်း ၆ တပ်ရင်းမှူး ပုလဲမောင် ကို ခရိုင်ကွပ်ရဲ့ကိုယ်ရေးအရာရှိ(PA) ဆိုသူ ငဖြိုးက သေနတ်နဲ့ ပစ်သတ်ခဲ့တာပါ။

ပစ်ခတ်မှု ကျူးလွန်တဲ့ ဗိုလ်စွမ်းသူမောင်ရဲ့ PA ငဖြိုးကို လက်နက်ဖြုတ်သိမ်းပြီး ယင်းမာပင်ခရိုင် စစ်ဌာနလက်အောက်က အချုပ်ထောင်မှာ ထိန်းသိမ်းထားတယ်လို့ အမျိုးသားညီညွတ်ရေးအစိုးရ – NUG ကာကွယ်ရေးဝန်ကြီးဌာနက ဇွန်လ၂၆ ရက် ညမှာ ထုတ်ပြန်ထားပါတယ်။

တပ်ရင်းမှူးသတ်ဖြတ်ခံရတာနဲ့ပတ်သတ်လို့ NUG ကာကွယ်ရေးဝန်ကြီးဌာနအနေနဲ့ တရားမျှတမှု ရရှိရေးနဲ့ ကျူးလွန်သူတွေကို ထိရောက်စွာ အပြစ်ပေးအရေးယူနိုင်ရေးအတွက် သမာသမတ်ကျကျ ကိုင်တွယ်ဖြေရှင်းပေးဖို့ ယင်းမာပင်ခရိုင်တပ်ရင်း ၁ နဲ့ ဗျူဟာအမှတ် ၄၇ တပ်ရင်းတို့က ဒီကနေ့မှာ ထုတ်ပြန်တောင်းဆိုထားတာလည်း ဖြစ်ပါတယ်။

နတ်မောက်၊ ဇွန် ၂၆၊ ၂၀၂၆။

မကွေးတိုင်း၊ နတ်မောက်မြို့နယ်၊ သမုန်းကုန်းကျေးရွာကို စစ်ကော်မရှင်တပ်က လေကြောင်းကနေဗုံးကြဲ၊ ပစ်ခတ်ခဲ့တာကြောင့် ပြည်သူ ၅ ဦးသေဆုံးတယ်လို့ နတ်မောက်မြို့နယ် ပကဖတာဝန်ရှိသူတွေဆီ သိရပါတယ်။

ဇွန် ၂၅ ရက်ညနေ ၄ နာရီကျော်မှာ ရွာထဲကို စစ်ကော်မရှင်ရဲ့ဂျက်ဖိုက်တာ ၂ စီးကနေ ဗုံး ၄ လုံးကြဲချခဲ့တဲ့အပြင် စက်သေနတ်တွေနဲ့ပါ ပစ်ခတ်ခဲ့တာလို့ ဆိုပါတယ်။

“ရွာလယ်ပေ ၅၀ လမ်းရဲ့တဖက်က နေအိမ်တွေနားရယ် ရွာမြောက်ဘက်ခြမ်းက လူနေအိမ်ကြားတွေထဲကို ကျတာ။ တိုက်ပွဲတွေဖြစ်နေတာမျိုးလည်းမရှိဘူး”လို့ နတ်မောက်မြို့နယ်ပကဖတာဝန်ရှိသူက ပြောပါတယ်။

ဗုံးပေါက်ကွဲစထိမှန်တာကြောင့် အသက် ၃၃ နှစ်အရွယ်မသန်းသန်းမော်၊ သားဖြစ်သူ အသက် ၁၂ နှစ်အရွယ် မောင်အောင်ဘုန်းခန့်၊ အသက် ၈ နှစ်အရွယ် ညီဘုန်းခန့်၊ အသက် ၃၉ နှစ်အရွယ် ကိုချစ်ဦး၊ အသက် ၆၉ နှစ်အရွယ် ဒေါ်ရီသက်တို့ သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၁၀ အရွယ် မိန်းကလေးငယ် ၁ ဦး၊ အသက် ၃၀ ကနေ ၄၀ ကြားရှိ အမျိုးသမီး ၁ ဦးနဲ့အမျိုးသား ၁ ဦးတို့ ထိခိုက်ဒဏ်ရာရပြီး နေအိမ် ၁၀ လုံးလည်း ပျက်စီးသွားတယ်လို့ နတ်မောက်မြို့နယ်ပကဖတာဝန်ရှိသူက ပြောပါတယ်။

ဗုံးကြဲခံရပြီးနောက် ရွာခံအချို့ဟာ ဘေးလွတ်ရာကို တိမ်းရှောင်သွားကြရတယ်လို့ ဆိုပါတယ်။

မတ် ၁ ရက်ကလည်း မကွေးတိုင်း၊ မင်းတုန်းမြို့နယ်၊ ပြောင်းကျေးရွာအနီးကို စစ်ကော်မရှင်ဘက်က လေကြောင်းကနေ ဗုံးကြဲတာကြောင့် ပြည်သူ ၂၅ ဦးသေဆုံးကာ ၂၀ ကျော်ဒဏ်ရာရခဲ့ပါသေးတယ်။

စာတည်း – လင်း