သေဆုံး

ပဲခူး၊ အောက်တိုဘာ ၁၊ ၂၀၂၆။

ပဲခူးတိုင်းအနောက်ခြမ်း၊ ပြည်ခရိုင်အတွင်း ပြီးခဲ့တဲ့ စက်တင်ဘာလထဲမှာ အုပ်ချုပ်ရေးမှူး ၁ ဦးအပါအဝင် အမျိုးသား ၆ ဦးနဲ့ အမျိုးသမီး ၁ ဦးတို့ PDF တွေနဲ့ အမည်မသိ လက်နက်ကိုင်အဖွဲ့တွေရဲ့ ပစ်သတ်မှုခံခဲ့ရကြောင်း သိရပါတယ်။

အသတ်ခံရသူတွေကတော့ ပြည်မြို့နယ်ထဲက ၂ ဦး၊ ပေါင်းတည်မြို့နယ်ထဲက ၂ ဦး၊ သဲကုန်းမြို့နယ်ထဲက အမျိုးသမီး ၁ ဦး အပါအဝင် ၂ ဦးနဲ့ ပေါက်ခေါင်းမြို့နယ်ထဲက ၁ ဦးတို့ဖြစ်ပြီး အဲ့ဒီဖြစ်စဉ်တွေက စက်တင်ဘာ ၄ ရက်ကနေ ၂၄ ရက်အတွင်း ဖြစ်ပွါးခဲ့တာလို့ သိရပါတယ်။

စတင်ဖြစ်ပွါးခဲ့တဲ့ စက်တင်ဘာ ၄ ရက်နေ့က ပေါင်းတည်မြို့နယ် အဂ္ဂရာပြည့်အုပ်စု မှန်ပြင်ကျောရွာနေ အသက် ၄ဝ နှစ်ကျော်အရွယ် ငှက်ကြီးဆိုသူဖြစ်ပြီး ၁၀ ရက်နေ့မှာတော့ ပြည်မြို့နယ်၊ ဝက်ထီးကန်နယ်မြေ၊ သစ်ချိုပင်အုပ်စု၊ ကန်စုရွာက မှုခင်းရှုထောင့်သတင်းထောက် မျိုးချစ်ကို ဆိုသူတို့ဖြစ်ပါတယ်။

အလားတူ စက်တင်ဘာ ၁၃ ရက်နေ့မှာတော့ သဲကုန်းမြို့နယ်၊ ဗြမ္မအင်းအုပ်စု၊ ကွင်းကြီးရွာက အသက် ၃၆ နှစ်အရွယ် သီတာ(ခ)ဒေါ်နီလာမြင့် ဆိုသူဖြစ်ပြီး ၁၇ ရက်က ပေါက်ခေါင်းမြို့နယ်၊ မတောက်တာကျေးရွာက အသက် ၃၇ နှစ်အရွယ် ကိုဉာဏ်ပိုင်ကျော် ဆိုသူနဲ့ ၁၈ ရက်နေ့မှာတော့ ပြည်မြို့နယ် ဝက်ထီးကန်နယ်မြေ သစ်ချိုပင်အုပ်စု အုပ်ချုပ်ရေးမှူး ကိုကျော်ဆန်း တို့ အသတ်ခံခဲ့ရတာ ဖြစ်ပါတယ်။

နောက်ဆုံးအသတ်ခံရသူ ၂ ဦးကတော့ စက်တင်ဘာ ၁၉ ရက်နေ့က သဲကုန်းမြို့နယ်၊ ကန့်လန့်ကုန်းအုပ်စု၊ ကြည်ရွာက အသက် ၅ဝ ခန့် ကိုအေးကို ဆိုသူနဲ့ ၂၄ ရက်နေ့မှာတော့ ပေါင်းတည်မြို့နယ် ပန်းသင်းပင်ကျေးရွာအရှေ့ဘက်ရှိ စမ်းကြီးရွာက အသက် ၃ဝ အရွယ် ကိုလွင်မိုးအောင် တို့ဖြစ်ကြောင်း သိရပါတယ်။

အဲဒီအထဲက လွင်မိုးအောင်၊ အေးကိုနဲ့ ငှက်ကြီးတို့ဟာ စစ်ကော်မရှင်တပ်ကို သတင်းပေးတာ၊ ရိက္ခာပို့တာ၊ စစ်ကြောင်းထိုးချိန်လမ်းပြတာ၊ တပ်ဖွဲ့ဝင်တွေနဲ့ ထောက်ပို့တွေကိုစုံစမ်းတာတွေပြုလုပ်ခဲ့လို့ သေနတ်နဲ့ ပစ်သတ်ခဲ့တာလို့ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့က ပြောပါတယ်။

“သူတို့ကို ကျနော်တို့က စကစဆီကို မဆက်သွယ် သတင်းမပေးဖို့ ကြိုတင်သတိပေးတယ်။ ပြောထားရင် သူတို့က ခဏပဲ ရှောင်နေတယ် ပြီးပြန်လုပ်တယ်။ ဒါကြောင့် မဖြစ်မနေရှင်လင်းလိုက်ရတာ” လို့ ပြည်ခရိုင်တပ်ရင်း ၁ စစ်ထောက်လှမ်းရေးနှင့် သတင်းပြန်ကြားရေးတာဝန်ခံ ရဲဘော်က ပြောပါတယ်။

ကျန်အသတ်ခံရသူ ၄ ဦးကိုတော့ ဘယ်အဖွဲ့တွေက ဘာကြောင့် သတ်သွားတယ်ဆိုတာကို ဘယ်လက်နက်ကိုင်အဖွဲ့ကမှ အောက်တိုဘာ ၁ ရက်နေ့ ဒီကနေ့အထိ ထုတ်ပြန်တာမျိုး မရှိသေးပါဘူး။

ပြီးခဲ့တဲ့ စက်တင်ဘာ ၁၂ ရက်ကလည်း ပေါင်းတည်မြို့နယ် ကြာနီကန်အုပ်စုထဲမှာနေကြတဲ့ စစ်ကော်မရှင်တပ်ရဲ့အမာခံသတင်းပေး စစ်မှုထမ်းဟောင်း ပေါင်တို(ခ)အေးနိုင် ရဲ့နေအိမ်နဲ့ စစ်အုပ်စုဝင်တွေကို နေအိမ်အတွင်း ဝင်ထွက်ခွင့်ပြုထားတဲ့ မိသင်းတို့ရဲ့ နေအိမ်တွေကို ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့နဲ့ ပူးပေါင်းအဖွဲ့တွေက ဝင်ရောက်စီးနင်းခဲ့ပေမယ့် သူတို့ ၂ ဦးစလုံး ကြိုတင်ရှောင်တိမ်းနေလို့ လွတ်မြောက်သွားခဲ့တယ်လို့ ဒေသခံတွေဆီက သိရပါတယ်။

သတင်း – သော်တာအောင်

နတ်တလင်း၊ အောက်တိုဘာ ၁၊ ၂၀၂၆။

ပဲခူးတိုင်း၊ နတ်တလင်းမြို့နယ်၊ သီရိမြိုင်ကျေးရွာကို စစ်ကြောင်းထိုးမီးရှို့ပြီး ဒရုန်းနဲ့ဗုံးကြဲနေလို့ ပြည်သူ ၂ ဦးသေဆုံးထားပြီး ၂၀ ကျော်ဒဏ်ရာရထားတယ်လို့ ​ဒေသကာကွယ်ရေး အဖွဲ့ဝင်တွေထံက သိရပါတယ်။

စက်တင်ဘာလ ၃၀ ရက် မနေ့ညနေ ၃ နာရီကျော်ခန့်က နတ်တလင်းကနေ အင်အား ၄၀၀ ကျော်ပါ စစ်တပ်စစ်ကြောင်းဟာ တောင်ညိုကွက်သစ်၊ ကျောက်ခွက်ကျေးရွာတို့ကို ရောက်ရှိလာပြီး သီရီမြိုင်ရွာထဲကို လက်နက်ကြီးတွေနဲ့ပစ်သလို ဒရုန်းတွေနဲ့လည်း တိုက်ခိုက်ခဲ့တာလို့ ပြောပါတယ်။

“မျှောတော်တောင်ပေါ်ကနေ ဒရုန်းတွေ အသွားအပြန်ချတာရှိတယ်။ ကာမီကာဇေကော ဒီအတိုင်း ဗုံးချတာတွေလည်းပါတယ်။ ၅ စီးထက်မနည်း ရှိတယ်။ နှစ်မျိုးစလုံးသုံးတယ်။ ရွာသားတွေကတော့ တော်တော်များများ ပြေးကုန်ပြီ။ ဒီမနက်တော့ ရွာကို မီးတို့နေတယ်။”လို့ ဒေသကာကွယ်ရေးအဖွဲ့ တာဝန်ရှိသူတဦးက ပြောပါတယ်။

ဒရုန်းနဲ့ ဗုံးချခဲ့လို့ အသက် ၁၃ နှစ်အရွယ် ယောက်ျာလေး ၁ ဦးနဲ့ အသက် ၅၂ နှစ်အရွယ် အမျိုးသမီး ၁ ဦးတို့ သေဆုံးခဲ့ပြီး ကလေးငယ်တွေအပါအဝင် ၂၀ ကျော် ဒဏ်ရာရထားကြောင်းနဲ့ ဒဏ်ရာရသူတွေရဲ့ အသေးစိတ်အခြေအနေကို စုံစမ်းနေဆဲလို့ ဆိုပါတယ်။

အောက်တိုဘာလ ၁ ရက်နေ့မနက် ၉ နာရီခန့်မှာတော့ အဆိုပါစစ်ကြောင်းဟာ သီရိမြိုင်ကျေးရွာထဲကို စစ်ကြောင်းထိုးလာပြီးနောက် နေအိမ်တွေကို မီးရှို့နေကာ အနည်းဆုံး ၁၀ လုံးထက်မနည်း ပျက်စီးနိုင်တယ်လို့ ဆိုပါတယ်။

လက်ရှိ အဲဒီစစ်ကြောင်းဟာ ကျေးရွာထဲ ရှိနေသေးသလို လက်နက်ကြီးတွေပတ်ဝန်းကျင်ရွာတွေကို ပစ်ခတ်နေသေးတာကြောင့် သီရီမြိုင်၊ ဆီဆုံကုန်း၊ တောင်ညိုကွက်သစ်၊ ရွာသာယာ၊ အောင်မြင်ရွာတွေအပါအဝင် ကျေးရွာပေါင်း ၂၀ ကျော်က ပြည်သူ ၈၀၀၀ ကျော် ဘေးလွတ်ရာကို ထွက်ပြေးနေရပါတယ်။

ပြီးခဲ့တဲ့ ဖေဖော်ဝါရီလ ၁၃ ရက်နေ့ကလည်း နတ်တလင်းမြို့နယ်၊ ညောင်လှ၊ ကွင်းစမ်းနဲ့ ရွာသာယာကျေးရွာတွေကို စစ်ကြောင်းထိုးမီးရှို့လို့ နေအိမ် ၃၁ လုံးမီးလောင်ပျက်စီးခဲ့တယ်လို့ သိရပါတယ်။

ဆားလင်းကြီး၊ ဩဂုတ် ၁၉၊ ၂၀၂၆။

စစ်ကိုင်းတိုင်း၊ ဆားလင်းကြီးမြို့နယ်၊ ရေခါးရွာ ဗုံးကြဲခံရပြီး အမျိုးသမီး ၂ ဦးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ဩဂုတ်လ ၁၈ ရက်နေ့ ညနေ ၄ နာရီခန့်က စစ်ကောင်စီ ဂျက်ဖိုက်တာနှစ်စီးက ကျေးရွာထဲကို ဗုံး ၂ လုံးကြဲချပြီး၊ ရောကတ်တွေနဲ့ပါ ပစ်ခတ်ခဲ့တာလို့ ဆိုပါတယ်။

“ရေခါးရွာထိပ် ဘုန်းကြီးကျောင်းနှစ်ကျောင်းကြားကို ကြဲသွားတာ။ ကျောင်းလည်း ပျက်စီးတယ်။ လူကမိန်းကလေးတွေကြီး သေတာ။ လယ်တီကျေးရွာက တယောက်ပါတယ်။”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဗုံးကြဲခံရမှုအတွင်း ရေခါးကျေးရွာနဲ့ လယ်တီကျေးရွာက အသက် ၃၀ ကနေ ၄၀ ကြားရှိ အမျိုးသမီး ၂ ဦးနေရာမှာတင် သေဆုံးသွားတယ်လို့ ဆိုပါတယ်။

ဒါ့အပြင် ဘုန်းကြီးကျောင်း ၂ ကျောင်း၊ နေအိမ် ၅ လုံး၊ နွားနှစ်ကောင် သေဆုံးခဲ့ပြီး ဒေသခံပြည်သူတွေကတော့ ရွာကနေ တိမ်းရှောင်နေကြတယ်လို့ သိရပါတယ်။

ဩဂုတ်လ ၁၈ ရက်နေ့ကလည်း စစ်ကိုင်းတိုင်း၊ ဝက်လက်မြို့နယ်အတွင်းက ညောင်ကြီးတောနဲ့ ကူကောင်းကျေးရွာတို့ လေကြောင်းတိုက်ခိုက်ခံရပြီး ကူကောင်းကျေးရွာက နေအိမ်ထဲနေနေတဲ့ သက်ကြီး အမျိုးသမီးတဦး ရောကတ်ထိမှန်လို့ သေဆုံးတယ်လို့ သိရပါတယ်။

ဝက်လက်၊ ဇူလိုင် ၂၈၊ ၂၀၂၆

စစ်ကိုင်းတိုင်း၊ ဝက်လက်မြို့နယ်၊ ပေါက်ကန်ဘူတာကျေးရွာကို စစ်တပ်က လေကြောင်းနဲ့ ဗုံးကြဲချခဲ့တာကြောင့် သက်ကြီးအမျိုးသား ၁ ဦးသေဆုံးသွားတယ်လို့ တိုက်နယ် ၄ ပကဖ တာဝန်ရှိသူတွေထံက သိရပါတယ်။

ဇူလိုင်လ ၂၈ ရက်နေ့မနက် ၁၀ နာရီခွဲခန့်မှာ တံတားဦးလေတပ်ကနေ တက်လာတဲ့ ဂျက်ဖိုက်ဟာ ပေါက်ကန်ဘူတာကျေးရွာထဲကို ဗုံး ၂ လုံးကြဲချသွားခဲ့တာ ဖြစ်ပါတယ်။

“ဗုံးက ရွာမြောက်ဖျားတလုံး ရွာလယ်တလုံးကျတာ။ ရွာလယ်ကျတဲ့ဟာမှာ အိမ်ဘေးကျတော့ အစမှန်တာပေါ့။ ခုထိတဲ့သူတွေက အိမ်ထဲရှိနေရင်း ထိတာ” လို့ တိုက်နယ် ၄ ပကဖတာဝန်ရှိသူက ဆက်ပြောပါတယ်။

ဗုံးထိမှန်တာကြောင့် ပက်လပ်ကုလာထိုင်မှာ ထိုင်နေတဲ့ အသက် ၆၃ နှစ်အရွယ် ဦးမြင့်သန်းမှာ နေရာမှာပင် သေဆုံးသွားခဲ့ပြီး၊ အသက် ၄၃ နှစ်အရွယ် မဖြူဝင်းက ဒဏ်ရာရရှိသွားတာ ဖြစ်ပါတယ်။

ဒါ့အပြင် နေအိမ် ၃ လုံးလည်း ပျက်စီးသွားပြီး တိုက်လေယာဉ်နဲ့ ဗုံးကြဲခံရလို့ ကျေးရွာအတွင်း စိုးရိမ်သူအချို့က ထွက်ပြေးတိမ်းရှောင် သွားကြတယ်လို့ သိရပါတယ်။

ပြီးခဲ့တဲ့ ဇွန်လ ၁၆ ရက်နေ့ကလည်း ဝက်လက်မြို့နယ်၊ နတ်ကုန်းတလိုင်းရွာသစ်နဲ့ ဝက်လူးအိုင်ကျေးရွာတွေက ဒေသခံပြည်သူတွေကို စစ်တပ်က ဒရုန်းနဲ့ တိုက်ခိုက်ခဲ့လို့ ဝက်လူးအိုင်ရွာက အမျိုးသမီး ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ သိရပါတယ်။

ရေတာရှည်၊ ဇူလိုင် ၁၁၊ ၂၀၂၆။

ပဲခူးတိုင်း၊ ရေတာရှည်မြို့နယ်၊ စည်ပိုင်းကျေးရွာမှာ ဗုံးကြဲခဲရလို့ ရွာခံအမျိုးသား ၁ ဦး ဦးခေါင်းပြတ်ထွက်ပြီး ခန္ဓာကိုယ်ကြေမွသေဆုံးခဲ့တယ်လို့ ဖြစ်စဥ်ကို ကိုယ်တိုင်ကြုံတွေ့ခဲ့ရသူဆီက သိရပါတယ်။

ဇူလိုင် ၁၀ ရက်မနက် ၁၁ နာရီကျော်မှာ တောင်ငူလေတပ်ကနေတက်လာတဲ့ ဂျက်ဖိုက်တာက ကျေးရွာထဲကို ဗုံး ၂ လုံးကြဲချခဲ့ချိန် အသက် ၄၅ နှစ်အရွယ် ကိုနိုင်လင်းသေဆုံးပြီး အသက် ၄၀ ကျော်အရွယ် ဇနီးဖြစ်သူနဲ့ နောက်ထပ်အိမ်နီးနားချင်းဖြစ်သူ အသက် ၂၀ ကျော်အရွယ် လူငယ်တို့ ပြင်းထန်ဒဏ်ရာရခဲ့တယ်လို့ ဆိုပါတယ်။

“ဗုံးကြဲချိန် အဲ့နားရှိနေတာ။ ကြဲတဲ့ ၂ လုံးက ရွာလယ်တည့်တည့်ကျတာ။ အိမ်ပေါ်တည့်တည့်ကျတာ။ နားတွေဆို အူထွက်သွားတယ်။ ပေါင် ၂၅၀ ထက်တော့မလျော့ဘူး။ ဗုံးကအိမ်ရှေ့နဲ့အိမ်နောက် ခွကျတာ။ ဦးနှောက်တွေ မျက်လုံးတွေဆို နံရံတွေမှာကပ်နေလို့ ကျွတ်ကျွတ်အိတ်ထဲကောက်ထည့်ပြီး သင်္ဂြိုဟ်ပေးခဲ့ရတယ်”လို့ ကိုယ်တိုင်ကြုံတွေ့ခဲ့သူတဦးက ပြောပါတယ်။

ဒါ့အပြင်နေအိမ် ၃ လုံးပျက်စီးပြီး သေဆုံးသူအလောင်းကိုချက်ချင်းသင်္ဂြိုဟ်လိုက်ရသလို ဒဏ်ရာရသူတွေကိုလည်း နီးစပ်ရာဆေးခန်းကို ပို့ဆောင်ကာဆေးကုသနေရတယ်လို့ ဆိုပါတယ်။

ဇွန်လ ၆ ရက်ကလည်း ရေတာရှည်မြို့နယ်၊ နဂျပ်အနောက်ရွာကို ဗုံးကြဲခံရလို့ ပြည်သူ ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ သိရပါတယ်။