ပစ်သတ်

◼️ (၁) ဦးအရှင်ဖမ်းခံရပြီး (၈) ဦးထွက်ပြေး

မလှိုင်၊ စက်တင်ဘာ ၁၊ ၂၀၂၆။

မန္တလေးတိုင်း၊ မလှိုင်မြို့နယ်၊ ထမ္မကြီးကျေးရွာက အုပ်ချုပ်ရေးမှူးလည်းဖြစ် ပြည်သူ့စစ်ခေါင်းဆောင်လည်းဖြစ်သူအပါအဝင် ၁၂ ဦးဟာ ကျေးရွာအတွင်းမှာ ပစ်သတ်ခံရတယ်လို့ ဒေသတော်လှန်ရေးအဖွဲ့တွေနဲ့နီးစပ်တဲ့ ဒေသခံတွေထံက သိရပါတယ်။

ဩဂုတ်လ ၃၁ ရက်နေ့မနက် ၆ နာရီခန့်မှာ PDF တပ်ဖွဲ့ဝင်တွေက ကျေးရွာထဲကို ရောက်လာပြီး ကျေးရွာအုပ်ချုပ်ရေးမှူး အသက် ၄၄ နှစ်အရွယ် ဦးစိုးလင်းထိုက်ပါ ၁၂ ဦးကို ရွာလယ်မှာပင် ပစ်သတ်သွားတယ်လို့ ဆိုပါတယ်။

“ခေါင်းဆောင်ကိုအရင်ဖမ်းတယ်။ ပြီးမှသူလက်အောက်ကအဖွဲ့ဝင်တွေကိုဖမ်းတယ်။ တနေရာစီကနေခေါ်လာပြီး ရွာလယ်ခေါင်မှာ တန်းစီပြီး ပစ်ခတ်ရှင်းလင်းသွားတာ”လို့ တော်လှန်ရေးအဖွဲ့တွေနဲ့ နီးစပ်တဲ့ ဒေသခံတဦးကပြောပါတယ်။

သေဆုံးသွားသူတွေထဲက ဦးစိုးလင်းထိုက်ဟာ ကျေးရွာအုပ်ချုပ်ရေးမှူးဖြစ်သလို စစ်တပ်က ဖွဲ့စည်းထားတဲ့ ပြည်သူ့လုံခြုံရေးနဲ့ကာကွယ်ရေးတပ်ဖွဲ့(ပလကဖ) ခေါ် ပြည်သူ့စစ်ခေါင်းဆောင်လည်းဖြစ်ပြီး ကျန်သူတွေက သူအဖွဲ့ဝင်တွေဖြစ်တယ်လို့ ဆိုပါတယ်။

ထမ္မကြီးကျေးရွာက စိုးလင်းထိုက်ဦးဆောင်တဲ့ ပလကဖ အဖွဲ့ဝင် ၂၀ ဦးရှိပြီး အမျိုးသမီး ၃ ဦးလည်းပါဝင်ကာ မလှိုင်မြို့ပေါ်ကို တပတ်လျှင် ၇ ဦး လုံခြုံရေးကိစ္စတွေအတွက် သွားပေးရသလို မြို့ပေါ်ရောက်ချိန် လက်နက်ကိုင်ရပေမယ့် ကျေးရွာပြန်လာချိန်မှာတော့ လက်နက်တွေထားခဲ့ရတယ်လို့ သိရပါတယ်။

အဲဒီ ပစ်ခတ်မှုကို ဒေသတွင်း PDF တပ်ဖွဲ့တခုက လာရောက်ပြုလုပ်သွားတာဖြစ်ပြီး ပစ်ခတ်မှုအတွင်း ဦးစိုးလင်းထိုက်အပါအဝင် အသက် ၂၀ ကနေ ၆၃ နှစ်ကြား အမျိုးသမီး ၂ ဦး၊ အမျိုးသား ၁၀ ဦးသေဆုံးပြီး အဖွဲ့ဝင် အမျိုးသား ၁ ဦးကို အရှင်ဖမ်းသွားတယ်လို့ ဆိုပါတယ်။

ဒေသတွင်း PDF တွေက စိုးလင်းထိုက်ရဲ့အဖွဲ့ကို လာရောက်ဖမ်းဆီးချိန် အဖွဲ့ဝင် အမျိုးသမီး ၁ ဦးနဲ့အမျိုးသား ၇ ဦးကတော့ လွတ်မြောက်သွားတယ်လို့ သိရပါတယ်။

ပစ်ခတ်မှုနဲ့ပတ်သက်ပြီး ပြုလုပ်ခဲ့တဲ့ PDF တပ်ဖွဲ့ဘက်ကတော့ ယနေ့စက်တင်ဘာလ ၁ ရက်နေ့အထိ သတင်းထုတ်ပြန်တာမရှိသေးပါဘူး။

ဖြစ်စဉ်ဖြစ်ပွားပြီးနောက်မှာတော့ အာဏာသိမ်းစစ်တပ်က အင်အား ၁၀၀ ခန့်နဲ့ ကျေးရွာထဲကိုရောက်လာ အထိုင်ချတပ်စွဲထားတယ်လို့ သိရပါတယ်။

စာတည်း – စိုးဦး

စလင်း၊ ဇူလိုင် ၁၊ ၂၀၂၆။

မကွေးတိုင်း၊ စလင်းမြို့နယ်၊ ဆင်ဖြုုကျွန်းမြို့၊ အေးစုဖိုစု ရပ်ကွက်မှာ အမျိုးသမီး ၁ ဦးကို စစ်ကော်မရှင် တပ်သားတဦးက နေအိမ်ပေါ်တက်သေနတ်နဲ့ ပစ်သတ်သွားတယ်လို့မြို့ခံတွေထံက သိရပါတယ်။

ဇွန်လ ၃၀ ရက်နေ့ညနေ ၄ နာရီခန့်မှာ သရက်ချဥ်ကျေးရွာမှာ အထိုင်ချတပ်စွဲထားတဲ့ စစ်ကော်မရှင်တပ်သား သန့်ဇင်ဆိုသူဟာ အသက် ၄၀ ကျော်အရွယ် မနွယ်နီဦး နေအိမ်ကိုရောက်လာပြီးနောက် စကားများရန်ဖြစ်ကာ သေနတ်နဲ့ပစ်သတ်ခဲ့တာလို့ဆိုပါတယ်။

“သေသွားတဲ့မိန်းမက အဲစစ်သားတွေကို ထမင်းချက်ပြုတ်ကျွေးနေတဲ့သူလို့ သိရတယ်။ စစ်သားက ထမင်းချိုင့် လာယူချိန် ဘယ်လိုဖြစ်လဲမသိဘူး ပစ်သတ်သွားတယ်။ ဆေးလည်းကြောင်နေတယ်ပြောတယ်။ ထမင်းအချိန်မှီမရလို့ဖြစ်မယ်”လို့ မြို့ခံတဦးကပြောပါတယ်။

စစ်ကော်မရှင်တပ်သားက ပစ်တဲ့ ကျည်ထိမှန်လို့ အမျိုးသမီးမှာ ဦးခေါင်းပွင့်ထွက်ကာ ဦးနှောက်ထွက်ပြီး နေရာမှာတင် သေဆုံးသွားခဲ့တာ ဖြစ်ပါတယ်။

စစ်ကော်မရှင်ဘက်ကတော့ အဆိုပါ အမျိုးသမီးသေဆုံးမှုမှာ PDF တွေဘက် လာရောက်ပစ်သတ်သွားတယ်ဆိုပြီး သတင်းလွှင့်ထားတယ်လို့ ဆိုပါတယ်။

သေနတ်ပစ်ခတ်ခဲ့တဲ့ စစ်သားကိုတော့ စစ်ကော်မရှင်အဖွဲ့က ပြန်ဖမ်းသွားပြီး စလင်းတပ်နယ်ထဲကို ခေါ်ဆောင်သွားတယ်လို့ သိရပါတယ်။

ဇွန်လ ၂ ရက်နေ့ကလည်း ပွင့်ဖြူမြို့နယ်၊ မုန်းဇလဲကျေးရွာက NLD ရပ်ကျေးအလုပ်အမှုဆောင် ၁ ဦး ကျေးရွာအနီး စိုက်ခင်းထဲရှိနေချိန် ပျူစောထီးအဖွဲ့တွေက ဝင်ရောက်ပစ်ခတ်လို့ သေဆုံးသွားသေးတယ်လို့ သိရပါတယ်။

သဲကုန်း၊ ဇွန် ၅၊ ၂၀၂၆။

ပဲခူးတိုင်းအနောက်ခြမ်း၊ ပြည်ခရိုင်၊ သဲကုန်းမြို့နယ်၊ လင်းလဲကျေးရွာအုပ်ချုပ်ရေးမှူးကို နေအိမ်ထိ သွားရောက်ပြီး သေနတ်နဲ့ပစ်ခတ်ခဲ့တာကြောင့် သေဆုံးသွားတယ်လို့ ပြည်ခရိုင် ၃၆၀၁ တပ်ရင်းက ဇွန် ၅ ရက်‌ ဒီကနေ့ရက်စွဲနဲ့ သတင်းထုတ်ပြန်ပါတယ်။

ဇွန် ၃ ရက် ည ၉ နာရီခွဲမှာ လင်းလဲကျေးရွာအုပ်ချုပ်ရေးမှူး အသက် ၄၅ နှစ်အရွယ် ခင်း၀င်း (ခ) ရှမ်းကြီးရဲ့နေအိမ်မှာ ကာကွယ်ရေးတပ်ဖွဲ့ဝင်တွေကပစ်ခတ်ခဲ့တာလို့ ဆိုပါတယ်။

“ကျနော်တို့ လင်းလဲရွာထဲကိုသွားလည်းပြီးရော သူ့အိမ်မှာရှိနေတဲ့အချိန် သူကိုခေါ်ထုတ်ပြီးတော့ သူ့အိမ်ရှေ့မှာတင်ပဲ ကျနော်တို့ပစ်ခတ်ရှင်းလင်းလိုက်တာပါ။ သေနတ်က ၂ ချက်ပစ်တာပေါ့နော်။ ခေါင်းကိုပဲ ၂ ချက်လုံး မှန်သွားတာ။”လို့ ပြည်ခရိုင်တပ်ရင်း ၁ စစ်ထောက်လှမ်းရေးနဲ့ သတင်းပြန်ကြား တာဝန်ခံ Shadow က မြေလတ်အသံကိုပြောပါတယ်။

ဒီပစ်ခတ်မှုကို ဗျူဟာ ၂၁ ကွပ်ကဲမှုအောက်မှာရှိတဲ့ ပြည်ခရိုင် တပ်ရင်း ၁ တပ်ခွဲ ၄ နဲ့ တပ်ရင်း ၂ တပ်ခွဲ ၄ တပ်ဖွဲ့၀င်တွေက ပူးပေါင်းလုပ်ဆောင်ခဲ့တာဖြစ်ပြီး စစ်ကော်မရှင်တပ်နဲ့ ဆက်သွယ်ထားတဲ့ ဖုန်း ၂ လုံးကိုလည်း သိမ်းဆည်းခဲ့တယ်လို့ဆိုပါတယ်။

“ကျနော်တို့ မရှင်းခင်ပေါ့နော်၊ သူ့ကိုဆက်မလုပ်ဖို့ကို ဖုန်းနဲ့လှမ်းပြီးတော့မှတားမြစ်တာမျိုး ရှိတယ်ပေါ့နော်။ သူကဂရုမစိုက်ဘူး။ PDF မကြောက်လို့တို့ဘာတို့ အမြဲတမ်းစိန်ခေါ်နေတဲ့ကောင် အဲ့ဒါကြောင့်မလို့ ကျနော်တို့ကလည်းပဲ ပြတ်ပြတ်သားသားပဲ အရေးယူဆောင်ရွက်တာ”လို့ အထက်ပါတာ၀န်ခံက ပြောပါတယ်။

သေဆုံးသွားတဲ့ ရပ်‌ကျေးအုပ်ချုပ်ရေးမှူးဟာ PDF မကြောက်လို့အုပ်ချုပ်ရေးမှူး တက်လုပ်တာလို့ ဒေသခံပြည်သူတွေကို အမြဲပြောလေ့ရှိပြီး အုပ်စုအတွင်းမှာလည်း အိမ်ထောင်စု တစုကို စစ်မှုထမ်းကြေး ၅ သောင်းမှ ၁ သိန်းထိ ကောက်ခံသလို ပုတီးကုန်းရဲစခန်းက နယ်ထိန်းနဲ့ ပူးပေါင်းပြီး အရက်ဆိုင်နဲ့ လောင်းကစားဒိုင်တွေကိုလည်း ငွေကြေးများကောက်ခံပေးတာအပြင် စစ်ကော်မရှင်တပ်ဖွဲ့၀င်တွေနဲ့ ပူးပေါင်းပြီး ကျေးရွာအုပ်စုအတွင်းရှိ ဒေသခံပြည်သူတွေကို ဆဲဆိုလေ့ရှိသူဖြစ်တာကြောင့်အခုလိုအရေးယူလိုက်ရတာဖြစ်တယ်လို့ ထုတ်ပြန်ထားပါတယ်။

ပြီးခဲ့တဲ့ မတ် ၂၅ ရက်နေ့လယ် ၂ နာရီခန့်ကလည်း ပုတီးကုန်းမြို့၊ ညောင်၀င်းကျေးရွာ အုပ်ချုပ်ရေးမှူး ဇော်မင်း (ခ) ကုလားဆိုသူကို တပ်ရင်း ၂ တပ်ခွဲ ၄ တပ်ဖွဲ့၀င်တွေက နေအိမ်မှာသေနတ်နဲ့ ပစ်ခတ်ရာ သေဆုံးခဲ့ပါသေးတယ်။

စာတည်း – လင်း

သဲကုန်း၊ မတ် ၂၇၊ ၂၀၂၆။

ပဲခူးတိုင်း၊ သဲကုန်းမြို့နယ်၊ ညောင်ဝင်းကျေးရွာအုပ်ချုပ်ရေးမှူး နေအိမ်မှာ ပစ်သတ်ခံရပြီး သေဆုံးခဲ့တယ်လို့ ပြည်ခရိုင်တပ်ရင်း ၁ တာဝန်ရှိသူတွေဆီက သိရပါတယ်။

ပစ်သတ်ခံရသူဟာ အသက် ၅၀ အရွယ် ဦးဇော်မင်း ခ ကုလားဆိုသူဖြစ်ပြီး မတ် ၂၅ ရက်နေ့လယ် ၂ နာရီခန့်မှာ ဒေသခံကာကွယ်ရေးတပ်ဖွဲ့ဝင်တွေက ဝင်ရောက်ပစ်ခတ်ခဲ့တယ်လို့ ဆိုပါတယ်။

“နေအိမ်ထဲဝင်ပြီး ၃ ချက်ပစ်ခဲ့တာ။ ပြန်ခုခံချိန်တော့မရဘူး။ မြို့နဲ့လည်းနီးနေတော့အမြန်ပစ်ပြီး ပြန်ထွက်လာရတယ် ဘာမှမရလိုက်ဘူး။ မိသားစုဝင်တွေရှိပေမယ့် မဆိုင်တဲ့သူကိုဘာမှမလုပ်ခဲ့ဘူး”လို့ ပြည်ခရိုင်တပ်ရင်း ၁ စစ်ထောက်လှမ်းရေးနဲ့ သတင်းပြန်ကြားတာဝန်ခံ Shadow ကပြောပါတယ်။

သေနတ်နဲ့အနီးကပ်ပစ်ခံရတာကြောင့် နေရာမှာတင်သေဆုံးခဲ့ပြီးနောက်မှာ စစ်ကော်မရှင်အဖွဲ့တွေက လာရောက်စစ်ဆေးပြီး အလောင်းကိုသယ်သွားကြတယ်လို့ ဆိုပါတယ်။

အူပ်ချုပ်ရေးမှူး ဇော်မင်း (ခ) ကုလားဟာ ၂၀၂၅ မှာ အုပ်ချုပ်ရေးမှူးဖြစ်လာပြီး သားဖြစ်သူကလည်း သဲကုန်းရဲစခန်းက နယ်ထိန်းဖြစ်တာကြောင့် ညောင်ဝင်းအုပ်စုအတွင်း ပေါ်တာဆွဲတာ၊ စစ်မှုထမ်းကြေး ကောက်ခံတာ၊ ရွာသားတွေကိုခြိမ်းခြောက်တာတွေ ပြုလုပ်တဲ့အတွက် ခုလိုပစ်ခတ်ခဲ့တာလို့ ဆိုပါတယ်။

ဒါ့အပြင် သူဟာ “ရွာသားတွေကြေညာလိုက် ကြိုက်တဲ့ PDF ခေါ်လာခဲ့ မကြောက်လို့အုပ်ချုပ်ရေးမှူးလုပ်နေတာ” လို့လည်း ပြောဆိုကြိမ်းဝါးတတ်တယ်လို့ ပြည်ခရိုင်တပ်ရင်း ၁ စစ်ထောက်လှမ်းရေးနဲ့ သတင်းပြန်ကြားတာဝန်ခံ Shadow က ဆက်ပြောပါတယ်။

ဒီပစ်ခတ်မှုကို ပြည်ခရိုင်တပ်ရင်း ၁ တပ်ရင်းရုံး တိုက်ခိုက်ရေးအဖွဲ့ တပ်ခွဲ ၁ နဲ့ ပြည်ခရိုင်တပ်ရင်း ၂ တပ်ခွဲ ၄ တို့က ပူးပေါင်းလုပ်ဆောင်ခဲ့တာလို့ သိရပါတယ်။

မတ်လ ၈ ရက်ကလည်း သဲကုန်းမြို့နယ်၊ ကြို့ပင်သာရွာနေ အုပ်ချုပ်ရေးမှူး ခင်စိုး နေအိမ်မှာပစ်သတ်ခံရလို့ သေဆုံးခဲ့သေးတယ်လို့ သိရပါတယ်။

စာတည်း – လင်း

ဆင်ပေါင်ဝဲ၊ ဇန်နဝါရီ ၂၀၊ ၂၀၂၆။

မကွေးတိုင်း၊ ဆင်ပေါင်ဝဲမြို့နယ်၊ ချောင်းကောက်ကျေးရွာက ကြံခိုင်ရေးပါတီဥက္ကဌဟောင်းနဲ့ သမက်ဖြစ်သူတို့ ဖမ်းဆီးသတ်ဖြတ်ခံရတယ်လို့ ဖြစ်စဥ်ကိုသိထားတဲ့ ဒေသခံတွေထံက သိရပါတယ်။

သတ်ဖြတ်ခံရသူတွေက အသက် ၇၀ အရွယ် ဦးမြင့်ငွေနဲ့ သမက်ဖြစ်သူ အသက် ၄၀ ကျော်အရွယ်ရှိ ကိုဝင်းမောင်တို့ဖြစ်ပြီး ဇန်နဝါရီ ၁၈ ရက်ည ၈ နာရီမှာ နေအိမ်ကနေ ဖမ်းဆီးခံရပြီးနောက် ဇန်နဝါရီ ၁၉ ရက်မနက် ၇ နာရီခန့်မှာ နားပဲ့ကျေးရွာအနီး ကိုးပင်-သာဂရလမ်းပေါ်မှာ ပစ်သတ်ခံထားရတာကို တွေ့ခဲ့ရတာလို့ ဆိုပါတယ်။

“တပ်ယူနီဖောင်းနဲ့ဝင်ပြီး အသွင်ယူပြီး ဆိုင်ကယ် ၅ စီးလောက်နဲ့ သေနတ်တွေနဲ့ညကြီးခေါ်ပြီးတော့မှ ဟိုဘက်လမ်းပေါ်ရောက်တော့ အဲ့နားမှာပစ်သတ်ခဲ့တာ၊ နောက်နေ့မနက်ကျတော့ အဲ့မှာတွေ့တာ။”လို့ ဖြစ်စဥ်ကိုသိရှိတဲ့ ဒေသခံတဦးကပြောပါတယ်။

ဖမ်းဆီးချိန် ဦးမြင့်ငွေရဲ့ ကားကိုလည်းယူသွားတယ်လို့ သိရပြီး သေနတ်နဲ့ပစ်ခတ်လို့ ၂ ဦးစလုံးမှာ ဦးခေါင်းပွင့်ထွက်ဒဏ်ရာတွေနဲ့ သေဆုံးနေတာကို တွေ့ရတယ်လို့ ဆိုပါတယ်။

သေဆုံးသူဦးမြင့်ဝေဟာ ချောင်းကောက်ရွာ ကြံ့ခိုင်ရေးပါတီဥက္ကဌဟောင်းနဲ့ လွှတ်တော်ကိုယ်စားလှယ်ဟောင်းတဦးလည်းဖြစ်တယ်လို့ အထက်ပါဒေသခံကပြောပါတယ်။

အဆိုပါပစ်ခတ်မှုကို ဘယ်လက်နက်ကိုင်အဖွဲ့အစည်းဘက်က လုပ်ခဲ့တယ်ဆိုတာကို မြေလတ်အသံက သီးခြားအတည်မပြုနိုင်သေးပါဘူး။

ဇန်နဝါရီ ၁၆ ရက်မနက်အစောပိုင်းကလည်း ဆင်ပေါင်ဝဲမြို့နယ်၊ ကြေးမခိုင်ကျေးရွာနေ အမျိုးသမီး ၂ ဦးနေအိမ်မှာရှိနေချိန်ပစ်သတ်ခံရလို့ သေဆုံးသွားတယ်လို့ သိရပါတယ်။

စာတည်း – လင်း

ဓါးထိုးသတ်ခံရတဲ့ အမျိုးသား ၁ ဦး ဓါးဒဏ်ရာတွေနဲ့လွတ်မြောက်လာ

မြင်းခြံ၊ ဒီဇင်ဘာ ၂၄၊ ၂၀၂၅။

မန္တလေးတိုင်း၊ မြင်းခြံမြို့နယ်၊ တလုပ်မြို့နဲ့ အိုင်းမရွာက နေအိမ် ၇၀၀ ကို စစ်ကော်မရှင်တပ်ဖွဲ့ဝင်တွေကမီးရှို့ပြီး အနည်းဆုံး ရွာခံ ၃ ဦးကိုလည်းပစ်သတ်ခဲ့တယ်လို့ မြင်းခြံအခြေစိုက် LPDF တခုရဲ့ တာဝန်ရှိသူဆီက သိရပါတယ်။

ဒီဇင်ဘာ ၂၁ ရက် မနက် ၈ နာရီခန့်မှာ တလုပ်မြို့မှာ စစ်ကော်မရှင်တပ်သားတွေက နေအိမ်တွေကို မီးရှို့ခဲ့တာကြောင့် မြို့တွင်းရှိနေအိမ် ၃၀၀ ခန့်မီးလောင်ပျက်စီးသွားတယ်လို့ ဆိုပါတယ်။

ဒါ့အပြင် ဒီဇင်ဘာ ၂၂ ရက်မှာလည်း မြင်းခြံမြို့နယ်မှာစစ်ကြောင်းထိုးနေတဲ့ အင်အား ၆၀ ကျော်ပါစစ်ကြောင်းဟာ အိုင်းမရွာထဲကိုဝင်ရောက်ကာ နေအိမ်တွေကိုမီးရှို့ပြီး ဒေသခံတွေကိုလည်းပစ်ခတ်ခဲ့တယ်လို့ မြင်းခြံအခြေစိုက် LPDF တခုရဲ့ တာဝန်ရှိသူဆီက သိရပါတယ်။

“တလုပ်မှာရှိတဲ့ စကမအဖွဲ့က တလုပ်ကိုရှို့တာက သက်သက်၊ အိုင်းမကိုဝင်လာတဲ့စစ်ကြောင်းက ရှို့တာက သက်သက်၊ အိုင်းမရွာကိုတော့ မနေ့ကထိ နေအိမ်တွေမကုန်မချင်းရှို့နေတာ”လို့ ဆိုပါတယ်။

၂၀၂၅ ဖေဖော်ဝါရီလပိုင်းမှာ တလုပ်မြို့သိမ်းဖို့အတွက် တော်လှန်ရေးတပ်တွေက သွားရောက် တိုက်ခိုက်ခဲ့ပြီးနောက်မှာ ဒေသခံတွေမြို့ပေါ်ကတိမ်းရှောင်ခဲ့ကြပြီး အဲ့ဒီအချိန်ကစလို့ မြို့ပေါ်မှာ စစ်ကော်မရှင်တပ်က တပ်စွဲထားတာလို့ ဆိုပါတယ်။

အိုင်းမရွာမှာ အိမ်ခြေ ၄၀၀ ခန့်ရှိပြီး စစ်ကော်မရှင်စစ်ကြောင်းက ၂ ရက်ဆက်မီးရှို့လို့ ရွာအတွင်းရှိ နေအိမ်အားလုံးနီးပါး မီးလောင်ပျက်စီးသွားပြီလို့ အထက်ပါတာဝန်ရှိသူက ပြောပါတယ်။

အိုင်းမရွာကိုဝင်ရောက်လာတဲ့ စစ်ကော်မရှင်စစ်ကြောင်းက ကျေးရွာအတွင်းတွေ့ရတဲ့ အသက် ၂၅ နှစ်အရွယ် လူငယ် ၁ ဦးရဲ့ ရင်ဘတ်ကို ဓားနဲ့ထိုးလည်ပင်းလှီးပြီး နောက်ထပ်အမျိုးသား ၃ ဦးကိုလည်း သေနတ်ကိုင်ဓာတ်ပုံရိုက်ပြီးနောက် ပစ်သတ်ခဲ့တယ်လို့ ဓားထိုးခံရပြီး ထွက်ပြေးလွတ်မြောက်လာသူရဲ့ ပြောပြချက်ကို အထက်ပါ LPDF တာဝန်ရှိသူက ပြန်ပြောပြပါတယ်။

“ရွာသား ၃ ယောက်ကို သေနတ်ကိုင်ခိုင်းပြီး ဓာတ်ပုံရိုက်ပစ်သတ်လိုက်တာကို လွတ်လာတဲ့ ကလေးပြောပြလို့သိရတယ်။ သူ့ကိုလည်း သတ်တာဘဲ။ ကလေးက သေချင်ယောင်ဆောင်ပြီး သူကံလည်းပါတော့ လွတ်လာတာ။ ဒဏ်ရာတွေနဲ့ဆိုတော့ နားလိုက် ပြေးလိုက်နဲ့ လွတ်လာတာ။ ကျနော်တို့ဆီက ပြည်သူအချို့လည်းရှိတော့ ကျနော်ဆီပို့ခိုင်းပြီး ဆေးရုံပို့ပေးခဲ့ရတာ”လို့ ပြောပါတယ်။

ထွက်ပြေးလွတ်မြောက်လာတဲ့ လူငယ်မှာ ရင်ဘတ်ကို ဓားနဲ့ ၃ ချက်ထိုးခံထားရပြီး လည်ပင်းကို ဓားနဲ့ ၁ ချက်လှီးခံထားရတယ်လို့ ဆိုပါတယ်။

ပစ်သတ်ခံရတဲ့ အမျိုးသား ၃ ဦးအပြင် နောက်ထပ်ရွာခံအချို့လည်း ဖမ်းဆီးသတ်ဖြတ်ခံထားရတယ်လို့ သတင်းရထားပေမယ့် စစ်ကော်မရှင်စစ်ကြောင်းက ကျေးရွာထဲရှိနေတာကြောင့် နယ်မြေမရှင်းလင်းနိုင်သေးတဲ့အတွက် အတည်မပြုနိုင်သေးဘူးလို့ ဆိုပါတယ်။

စစ်ကြောင်းဝင်မီးရှို့နေလို့ အိုင်းမ၊ မြို့ကြီးကုန်း၊ မြောက်ရွာ၊ ရဲတိုင်၊ ကျောက်ဖြူကန်ကျေးရွာတွေက ဒေသခံပြည်သူ ၅,၀၀၀ ကျော်ထွက်ပြေးနေရပါတယ်။

ဩဂုတ် ၈ ရက်ကလည်း မြင်းခြံမြို့နယ်၊ ဗလုံကျေးရွာကို စစ်ကော်မရှင်စစ်ကြောင်းထိုးလာပြီး လက်နက်ကြီးနဲ့ပစ် မီးရှို့လို့ စစ်ရှောင် ၃ ဦးဒဏ်ရာရပြီး နေအိမ် ၁၀၀ ကျော်မီးလောင်ပျက်စီးခဲ့တယ်လို့ သိရပါတယ်။

စာတည်း – လင်း

စလေ၊ ဒီဇင်ဘာ ၁၁၊ ၂၀၂၅။

မကွေးတိုင်း၊ ချောက်မြို့နယ်၊ စလေမြို့အဝင် ဘီယာဆိုင်မှာရှိနေတဲ့ပျူစောထီးခေါင်းဆောင်ကို ဒီဇင်ဘာ ၁၀ ရက်နေ့လယ်ပိုင်းမှာ ပစ်သတ်ခဲ့တယ်လို့ ပြည်သူ့ကာကွယ်ရေးတပ်မတော် မကွေးခရိုင် အမှတ် ၁ တပ်ရင်းဆီက သိရပါတယ်။

ချောက်မြို့နယ်၊ ချောင်းပိုက်ရွာက အသက် ၄၄ အရွယ်ပျူစောထီးခေါင်း မိုးအောင်ကို နေ့လယ် ၁၂ နာရီ ၄၅ မိနစ်မှာ ဘီယာသောက်နေချိန်ဝင်ရောက်ပစ်ခတ်ခဲ့တာလို့ ဆိုပါတယ်။

“စလေမြို့အဝင်က ဘီယာဆိုင်တဆိုင်မှာ သောက်နေတာကို သတင်းရလို့ ကျနော်တို့အနေနဲ့ အသင့်စောင့်နေခဲ့တယ်။ သူ့ဆီသွားပြီး ဝင်ရောက်ရှင်းလင်းလိုက်တာ၊ သူ့မှာ လက်နက်ပါတာ ဖြစ်တဲ့အတွက် မိုးအောင်ကို ပစ်လိုက်တဲ့အခါ မှန်သွားတဲ့အချိန် ကျနော်တို့ လက်နက်ယူတဲ့အခါမှာ လှုပ်နေသေးလို့ ထပ်ပြီးပစ်ခဲ့လိုက်တယ်” လို့ မကွေးခရိုင် အမှတ် ၁ တပ်ရင်း တာဝန်ရှိသူတဦးက ပြောပါတယ်။

သူဟာ ချောက်မြို့နယ်အတွင်းမှာ စစ်ကော်မရှင်တပ်တွေနဲ့အတူစစ်ကြောင်းထိုးရာမှာပါဝင်ပြီး ပေါ်တာဆွဲတာတွေကြောင့် ပစ်ခတ်ခဲ့တာဖြစ်ပြီး တော်လှန်ရေးတပ်တွေဘက်က ၂၅ ချက်ပစ်ခတ်ပေမယ့် ၅ ချက်ထိမှန်သေဆုံးခဲ့တယ်လို့ ဆိုပါတယ်။

“ပျူစောထီးခေါင်းဆောင်က ချောက်မြို့နယ်မှာဆိုရင် စစ်ကော်မရှင်က စစ်ကြောင်းထိုးတာတွေအပြင် အရင်တုန်းကလည်း စလေ တကြောနဲ့ မြစ်အနောက်ခြမ်းမှာ ပေါ်တာဆွဲတာတွေလည်းလုပ်တယ်။ သူက ပျူစောထီးခေါင်းဆောင်လည်းဖြစ်တယ်။ ချောင်းပိုက်ရွာမှာ ဂိတ်တွေထိုင်ပြီး လူငယ်တွေကို ပေါ်တာဆွဲတယ်။ သူနဲ့နီးစပ်ရာနေရာတွေမှာ ဆက်ကြေးကောက်တယ်၊” လို့ မကွေးခရိုင် အမှတ် ၁ တပ်ရင်း တာဝန်ရှိသူတဦးက ပြောပါတယ်။

ဇွန်လကလည်း သူ့ကိုပစ်ခတ်ဖို့ တော်လှန်ရေးတပ်တွေဘက်က ကြိုးစားခဲ့ဖူးပေမယ့် ထိခိုက်ဒဏ်ရာသာရခဲ့တယ်လို့ ဆိုပါတယ်။

“ဓားမြတိုက်တွေလည်း လုပ်တယ်။ အရင်တုန်းကတော့ သူ့ကိုလုပ်ဖို့ အဖွဲ့အစည်းအသီးသီးက ကြိုးစားကြတယ်။ မိုင်းဆွဲတာမျိုးတွေ ပစ်ခတ်တာမျိုးတွေလုပ်တယ်။ အဲ့ဒီတုန်းက ဒဏ်ရာပဲရတယ်။ ဒီလိုမျိုး သေဆုံးတာမရှိဘူး”လို့ ပြည်သူ့ကာကွယ်ရေးတပ်မတော် မကွေးခရိုင် အမှတ် ၁ တပ်ရင်း တာဝန်ရှိသူတဦးက ပြောပါတယ်။

ပစ်ခတ်ပြီးနောက် ပျူစောထီးခေါင်းဆောင်မိုးအောင်ဆီကနေ MA 22 ၁ လက်၊ ကျည်ဘောက် ၁ ခု၊ ကျည် ၁၀ တောင့်တို့ကို သိမ်းဆည်းရမိခဲ့ပြီး အလောင်းကိုတော့ ပစ်ခတ်ခဲ့တဲ့နေရာမှာ ထားခဲ့တယ်လို့လည်း ဆိုပါတယ်။

အဲ့ဒီနောက် ၁ နာရီလောက်မှာ စလေမြို့ရဲတွေဟာ သူ့ရဲ့အလောင်းကို ရင်ခွဲရုံပို့ပြီးနောက် သချောင်းပိုက်ရွာကို ပြန်ပို့တယ်လို့သိရကြောင်း အထက်ပါတာဝန်ရှိသူက ပြောပါတယ်။

ပြီးခဲ့တဲ့ ဒီဇင်ဘာ ၄ ရက်ကလည်း ချောက်မြို့၊ အမှတ် ၅ ရပ်ကွက် အုပ်ချုပ်ရေးမှူးကို လူငယ် ၂ ဦးက ဧည့်စာရင်းတိုင်ဖို့ဆိုကာ ဝင်ရောက်လာပြီး နေအိမ်ထဲမှာပဲ ပစ်သတ်သွားခဲ့တဲ့ဖြစ်စဉ်ရှိခဲ့ပါသေးတယ်။

စာတည်း – လင်း

ချောက်၊ ဒီဇင်ဘာ ၅၊ ၂၀၂၅။

မကွေးတိုင်း၊ ချောက်မြို့၊ အမှတ် ၅ ရပ်ကွက် အုပ်ချုပ်ရေးမှူးကို လူငယ် ၂ ဦးက ဧည့်စာရင်းတိုင်ဖို့ဆိုကာ ဝင်ရောက်လာပြီးနောက် နေအိမ်ထဲမှာပဲပစ်သတ်သွားတယ်လို့ ဖြစ်စဥ်ကိုသိရှိတဲ့ ချောက်မြို့ခံတွေဆီက သိရပါတယ်။

ပစ်သတ်ခံရသူက အမှတ် ၅ ရပ်ကွက်အုပ်ချုပ်ရေးမှူး အသက် ၅၂ အရွယ် ထွေးအောင်နိုင်ဖြစ်ပြီး ဒီဇင်ဘာ ၄ ရက် ညနေ ၅ နာရီဝန်းကျင်မှာ ပစ်သတ်ခံရတဲ့အပြင် လက်တဖက်လည်း ဖြတ်ခံလိုက်ရတယ်လို့ ဆိုပါတယ်။

“ကောင်လေး ၂ ဦးက ဧည့်စာရင်းတိုင်ချင်တယ်ဆိုပြီး အိမ်ထဲဝင်ပစ်သွားတာ၊ အိမ်ထဲထိဝင်ပြီး ၃ ချက် ပစ်သွားတာ၊ ဦးခေါင်းပွင့်သွားတယ်၊ လက်တဖက် ပြတ်သွားတယ်၊ သေသွားပြီ၊ အခု ‘မနောဖြူ’ နာရေးကားနဲ့ ချောက်ရင်ခွဲရုံကိုပို့ထားတယ်၊ သူ့လက်ထဲမှာလည်း သေနက်အတိုရှိတယ်၊ သူကိုယ်ပိုင်ဝယ်ကိုင်ထားတာ၊ ချောက်မြို့မှာ ၁၅ ရပ်ကွက် ရှိတာကို ၁၅ ရပ်ကွက်ရဲ့ အုပ်ချုပ်ရေးမှူးတွေ အပေါ်မှာဆရာကြီးလိုနေတာ”လို့ ချောက်မြို့ခံတဦးက ပြောပါတယ်။

ဒီပစ်ခတ်မှုကိုဘယ်အဖွဲ့အစည်းတွေကလုပ်ခဲ့တယ်ဆိုတာကိုတော့ ထုတ်ပြန်ကြေညာတာမရှိသေးပါဘူး။

အမှတ် ၅ အုပ်ချုပ်ရေးမှူး ပစ်ခတ်ခံရပြီးနောက် ချောက်မြို့ အမှတ် ၁ ရပ်ကွက်၊ အမှတ် ၂ ရပ်ကွက်၊ အမှတ် ၃ ရပ်ကွက်၊ အမှတ် ၄ ရပ်ကွက်နေရာတွေမှာ စစ်ကော်မရှင်တပ်တွေက အသွားအလာတွေကို စစ်ဆေးနေတယ်လို့ သိရပါတယ်။

ပြီးခဲ့တဲ့ ဇန်နဝါရီ ၁၁ ရက်ကလည်း ချောက်မြို့နယ်၊ ဆားလယ်ကျွန်းကျေးရွာက စစ်တပ် သတင်းပေး ထွန်းနိုင် ဆိုသူ အသတ်ခံရပြီးသေဆုံးခဲ့ပါသေးတယ်။

စာတည်း – လင်း

နတ်တလင်း၊ ဒီဇင်ဘာ ၄၊ ၂၀၂၅။

ပဲခူးတိုင်း၊ နတ်တလင်းမြို့နယ်၊ ငုတ်တိုကျေးရွာက စိတ်ကျန်းမာရေးမကောင်းသူအမျိုးသား ၁ ဦး ပစ်သတ်ခံရတယ်လို့ ကျေးရွာနဲ့နီးစပ်သူတွေဆီက သိရပါတယ်။

ဒီဇင်ဘာ ၂ ရက်မနက် ၇ နာရီခန့်မှာ နတ်တလင်းဘက်ကနေ အင်အား ၅၀ ခန့်ပါ စစ်ကော်မရှင်အဖွဲ့ဟာ ငုတ်တိုကျေးရွာကိုဝင်လာပြီးနောက် ရွာထဲမှာလျှောက်သွားနေတဲ့ အသက် ၄၆ နှစ်အရွယ် ကိုညီညီကို ပစ်သတ်ခဲ့တာလို့ ဆိုပါတယ်။

“သူက လေဖြတ်ပြီး စိတ်ကျန်းမာရေးမကောင်းတော့တာပါ။ ရွာထဲလျှောက်သွားနေချိန် စကစ (စစ်ကော်မရှင်တပ်) နဲ့တိုးပြီး ပစ်ခံရတာ။ ပြောက်ကျားအင်္ကျီဝတ်ထားလို့ပစ်ခံရတယ်လို့တော့ သိရတယ်။ သူလည်းပြေးတော့ပြေးပါလိမ့်မယ်။ မလွတ်ဘဲပစ်ခံရတာ”လို့ ကျေးရွာနဲ့နီးစပ်သူတဦးက ပြောပါတယ်။

ပစ်ခတ်တာခံရတာကြောင့် ဦးညီညီရဲ့ ဦးခေါင်းနောက်စေ့ကျည်ထိဒဏ်ရာနဲ့ နေရာတင်သေဆုံးခဲ့ကာ အလောင်းကိုတော့ ပစ်သတ်ခံရတဲ့ညနေပိုင်းမှာ ရွာသားအချို့က သွားကောက်ပြီး သဂြိုဟ်လိုက်ရတယ်လို့ သိရပါတယ်။

စစ်ကြောင်းဝင်လာတာကြောင့် ငုတ်တိုရွာဒေသခံ ၁,၀၀၀ ကျော် ဘေးလွတ်ရာတိမ်းရှောင်နေကြရပြီး စစ်ကြောင်းကတော့ ဒီဇင်ဘာ ၄ ရက်အထိ ငုတ်တိုရွာဘုန်းကြီးကျောင်းမှာ ပြန်မထွက်သွားသေးဘဲ တပ်စွဲထားတယ်လို့ ကျေးရွာနဲ့နီးစပ်သူက ပြောပါတယ်။

အောက်တိုဘာ ၁၆ ရက်ကလည်း နတ်တလင်းမြို့နယ်၊ တောင်ညိုဆည်အနီး မကျီးပင်ကျေးရွာမှာ စက်တပ်လေထီးနဲ့ဗုံးကြဲခံရတာကြောင့် အမျိုးသား ၁ ဦးသေဆုံးပြီး ၂ ဦးဒဏ်ရာရတယ်လို့ သိရပါတယ်။

စာတည်း – လင်း