ဝက်လက်၊ ဇူလိုင် ၂၈၊ ၂၀၂၆

စစ်ကိုင်းတိုင်း၊ ဝက်လက်မြို့နယ်၊ ပေါက်ကန်ဘူတာကျေးရွာကို စစ်တပ်က လေကြောင်းနဲ့ ဗုံးကြဲချခဲ့တာကြောင့် သက်ကြီးအမျိုးသား ၁ ဦးသေဆုံးသွားတယ်လို့ တိုက်နယ် ၄ ပကဖ တာဝန်ရှိသူတွေထံက သိရပါတယ်။

ဇူလိုင်လ ၂၈ ရက်နေ့မနက် ၁၀ နာရီခွဲခန့်မှာ တံတားဦးလေတပ်ကနေ တက်လာတဲ့ ဂျက်ဖိုက်ဟာ ပေါက်ကန်ဘူတာကျေးရွာထဲကို ဗုံး ၂ လုံးကြဲချသွားခဲ့တာ ဖြစ်ပါတယ်။

“ဗုံးက ရွာမြောက်ဖျားတလုံး ရွာလယ်တလုံးကျတာ။ ရွာလယ်ကျတဲ့ဟာမှာ အိမ်ဘေးကျတော့ အစမှန်တာပေါ့။ ခုထိတဲ့သူတွေက အိမ်ထဲရှိနေရင်း ထိတာ” လို့ တိုက်နယ် ၄ ပကဖတာဝန်ရှိသူက ဆက်ပြောပါတယ်။

ဗုံးထိမှန်တာကြောင့် ပက်လပ်ကုလာထိုင်မှာ ထိုင်နေတဲ့ အသက် ၆၃ နှစ်အရွယ် ဦးမြင့်သန်းမှာ နေရာမှာပင် သေဆုံးသွားခဲ့ပြီး၊ အသက် ၄၃ နှစ်အရွယ် မဖြူဝင်းက ဒဏ်ရာရရှိသွားတာ ဖြစ်ပါတယ်။

ဒါ့အပြင် နေအိမ် ၃ လုံးလည်း ပျက်စီးသွားပြီး တိုက်လေယာဉ်နဲ့ ဗုံးကြဲခံရလို့ ကျေးရွာအတွင်း စိုးရိမ်သူအချို့က ထွက်ပြေးတိမ်းရှောင် သွားကြတယ်လို့ သိရပါတယ်။

ပြီးခဲ့တဲ့ ဇွန်လ ၁၆ ရက်နေ့ကလည်း ဝက်လက်မြို့နယ်၊ နတ်ကုန်းတလိုင်းရွာသစ်နဲ့ ဝက်လူးအိုင်ကျေးရွာတွေက ဒေသခံပြည်သူတွေကို စစ်တပ်က ဒရုန်းနဲ့ တိုက်ခိုက်ခဲ့လို့ ဝက်လူးအိုင်ရွာက အမျိုးသမီး ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ သိရပါတယ်။

စစ်ကိုင်း၊ ဇွန် ၂၇၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်နဲ့ ရွှေဘိုမြို့နယ်တို့က ကျေးရွာ ၃ ရွာမှာ စစ်ကော်မရှင်တပ်က လေကြောင်းကနေဗုံးကြဲခဲ့တာကြောင့် နေအိမ် ၁၀ လုံးပျက်စီးတယ်လို့ သက်ဆိုင်ရာမြို့နယ်ပကဖတွေနဲ့ တိုက်နယ်ပကဖ တာဝန်ရှိသူတွေဆီက သိရပါတယ်။

ဇွန် ၂၆ ရက်မနက် ၅ နာရီကျော်မှာ Y12 လေယာဥ်က ဝက်လက်မြို့နယ်၊ မြင်းသည်ကျေးရွာအနီး တောစပ်ကို ဗုံး ၆ လုံးကြဲချရာ ထိခိုက်ပျက်စီးမှုမရှိခဲ့ဘူးလို့ ဝက်လက်မြို့နယ်ပကဖတာဝန်ရှိသူဆီက သိရပါတယ်။

အဲဒီနောက်တဆက်တည်းဆိုသလို ရွှေဘိုမြို့နယ်၊ ရေတော်မူကျေးရွာကို ဗုံး ၄ လုံး ကြဲချရာ ၂ လုံးပေါက်ကွဲခဲ့သလို တက်တူကျေးရွာကို ၆ လုံးကြဲချခဲ့ရာ ၆ လုံးစလုံးပေါက်ကွဲခဲ့တာလို့လည်း ရွာခံကာကွယ်ရေးအဖွဲ့ဝင်တဦးက ပြောပါတယ်။

“မြင်သည်ဘက်က လေကြောင်းတိုက်ခိုက်မှုလုပ်တယ်လို့ သိသိချင်း ဗုံးခိုကျင်းတွေထဲ ဝင်ခိုင်းလိုက်တော့ လူထိခိုက်မရှိလိုက်ဘူး။ အိမ်တွေကြားကိုချတာဆိုတော့ အိမ်ထိခိုက်ပျက်စီးတော့ရှိတယ်။ “လို့ ရွာခံကာကွယ်ရေးအဖွဲ့ဝင်တဦးက ပြောပါတယ်။

တက်တူးရွာဗုံးကြဲခံရမှုမှာ နေအိမ် ၈ လုံး၊ ယက္ကန်းစင် ၂ ခု၊ ထော်လာဂျီ ၁ စီးပျက်စီးမှုရှိခဲ့ပြီး ရေတော်မူကျေးရွာမှာတော့ လူနေအိမ် ၂ လုံးပျက်စီးခဲ့တယ်လို့ ဆိုပါတယ်။

ဗုံးကြဲမှုကြောင့် မြင်းသည်နဲ့ရေတော်မူရွာတွေက ပြည်သူတွေက နေရပ်တိမ်းရှောင်တာ မရှိပေမယ့် တက်တူးရွာခံတွေကတော့ ဘေးလွတ်ရာတိမ်းရှောင်နေကြရပါတယ်။

မေ ၂၇ ရက်ကလည်း ရွှေဘိုမြို့နယ်၊ ရေတော်မူကျေးရွာကို စစ်ကော်မရှင်ရဲ့ ဒရုန်းကျရောက်ပေါက်ကွဲပြီး လင်မယား ၂ ဦးသေဆုံးကာ အမျိုးသမီး ၂ ဦးဒဏ်ရာရခဲ့ပါသေးတယ်။

စာတည်း – လင်း

ဝက်လက်၊ ဇွန် ၁၉၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်မှာ ဒေါ်အောင်ဆန်းစုကြည် ၈၁ နှစ်မြောက် မွေးနေ့အကြို ၈ မိုင် ၁ ဖာလုံတာဝေးပြေးပြိုင်ပွဲကျင်းပပြုလုပ်ခဲ့တယ်လို့ ဝက်လက်မြို့နယ်လူထုသပိတ်တိုက်ပွဲဦးဆောင်ကော်မတီဆီက သိရပါတယ်။

ဇွန် ၁၉ ရက် ဒီကနေ့မှာကျရောက်တဲ့ ဒေါ်အောင်ဆန်းစုကြည်ရဲ့မွေးနေ့အထိမ်းအမှတ်အဖြစ် ဒီပြိုင်ပွဲကိုပြုလုပ်ခဲ့တာဖြစ်ပြီး ဝက်လက်မြို့နယ်ရှိကျေးရွာပေါင်း ၃၀ က ပြိုင်ပွဲဝင် ၂၀ ကျော် ပါဝင်ယှဉ်ပြိုင်ခဲ့ကြတယ်လို့ ဆိုပါတယ်။

အဆိုပါ ပြိုင်ပွဲလမ်းတလျှောက် ကျေးရွာတွေက ပြည်သူတွေဟာလည်း ပြိုင်ပွဲဝင်တွေကို စည်စည်ကားကားအားပေးခဲ့ပြီး ဆုပေါင်း ၁၉ ဆု ချီးမြှင့်ခဲ့ကာ သက်ကြီးပြိုင်ပွဲဝင်တွေအတွက် သီးသန့်ဆုတွေလည်းပေးခဲ့တယ်လို့ ဝက်လက်မြို့နယ်လူထုသပိတ်တိုက်ပွဲဦးဆောင်ကော်မတီက ပြောပါတယ်။

ပြိုင်ပွဲကို ဝက်လက်မြို့နယ်သပိတ်ဦးဆောင်ကော်မတီက ဦးဆောင်ကျင်းပခဲ့ပြီး ဝက်လက်မြို့နယ် ပြည်သူ့အုပ်ချုပ်ရေးအဖွဲ့ဝင်တွေနဲ့ ကျောင်းသားသမဂ္ဂတွေက ပူးပေါင်းခဲ့တယ်လို့ သိရပါတယ်။

စာတည်း – လင်း

ဝက်လက်၊ ဇွန် ၁၇၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ညောင်ပင်ကြီးတောကျေးရွာမှာ လေကြောင်းတိုက်ခိုက်ခံရတာကြောင့် ကိုယ်ဝန်သည် ၁ ဦးအပါအဝင် ၄ ဦးသေဆုံးခဲ့တယ်လို့ ရွာခံတွေဆီက သိရပါတယ်။

ဇွန် ၁၇ ရက်နေ့လယ် ၁၂ နာရီ မိနစ် ၄၀ ခန့်မှာ စစ်ကော်မရှင်ရဲ့ဂျက်ဖိုက်တာတစီးဟာ ကျေးရွာအရှေ့တောင်ပိုင်းကို ဗုံးသီး ၂ လုံးကြဲချပြီး ရော့ကတ်နဲ့ပါပစ်ခတ်သွားတယ်လို့ ဆိုပါတယ်။

“ကိုယ့်အိမ်နဲ့ကိုယ်နေချိန်ဖြစ်တာ။ တယောက်ကဆိုလမ်းပေါ်ရောက်နေချိန်ထိတာ။ ဟိုကအိမ်ပေါ်ကိုတည့်တည့်ကျတာ။ ဗိုက်ကြီးသည်နဲ့ကလေးငယ်က သူအိမ်ထဲက မန်းကျည်းပင်ကိုထိပြီးမှ အထဲကသူတွေထိတာ။ သေတဲ့သူတွေကို ချက်ချင်းသင်္ဂြိုဟ်ရတာ။ အပိုင်းပိုင်းဖြစ်သွားတာ။ တယောက်ပဲအကောင်းတိုင်းရတယ်”လို့ ရွာခံတဦးကပြောပါတယ်။

ဗုံးထိမှန်တာကြောင့် အသက် ၃၀ အရွယ်ကိုယ်ဝန်သည်အမျိုးသမီး ၁ ဦး၊ သမီးဖြစ်သူ အသက် ၂ နှစ်အရွယ် မိန်းကလေးငယ် နဲ့ အသက် ၅၀ အရွယ်အမျိုးသမီး ၂ ဦးတို့သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၄၀ ကနေ ၅၀ ကြားအရွယ်အမျိုးသမီး ၃ ဦးထက်မနည်းဒဏ်ရာရပြီး ဒဏ်ရာရသူအရေအတွက်ကိုစိစစ်နေဆဲလို့ ဆိုပါတယ်။

ဗုံးကြဲမှုအတွင်းနေအိမ် ၁ လုံးပျက်စီးပြီး နွား ၃ ကောင်ထက်မနည်းသေဆုံးကာ ဗုံးလာကြဲပြီးနောက် ရွာခံတွေဟာနေအိမ်တွေအတွင်းမှာ ပုန်းအောင်းနေခဲ့ရတယ်လို့ အထက်ပါရွာခံက ပြောပါတယ်။

ဇွန် ၁၆ ရက်ညနေကလည်း ရွှေဘိုလေ့ကျင့်ရေး ၈ တပ်ကနေ လွှတ်တင်လိုက်တဲ့ အသေခံဒရုန်းဟာ ဝက်လက်မြို့နယ်၊ ဝက်လူးအိုင်ရွာထဲကျပြီး အမျိုးသမီး ၁ ဦးသေဆုံးကာ ၂ ဦးဒဏ်ရာရခဲ့ပါသေးတယ်။

စာတည်း- လင်း

ဝက်လက်၊ ဇွန် ၈၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ရှားကွဲရွာနဲ့ ရေကမိုးရွာကြားကနေအိမ်တွေကို စစ်ကော်မရှင်တပ်က မီးရှို့ခဲ့တယ်လို့ သစ်ဆိမ့်တိုက်နယ်တာဝန်ရှိသူတွေဆီက သိရပါတယ်။

ဇွန် ၈ ရက်မနက် ၈ နာရီခန့်မှာ ရှားကွဲရွာမှာတပ်စွဲထားတဲ့ စစ်ကော်မရှင်အင်အား ၇၀ ခန့်ဟာ စစ်ကြောင်းထိုးလာပြီးနောက် မီးရှို့ခဲ့တာလို့ဆိုပါတယ်။

“ရှားကွဲနဲ့ရေကမိုးကြား မန္တလေးတောင်နားက တောတိုက်နေအိမ်တွေကိုမီးရှို့တာ။ အိမ်တွေမှာတော့ လူမနေကြဘူး။ ပိုင်ရှင်တွေက စစ်ရှောင်နေကြတာကြာပြီ”လို့ သစ်ဆိမ့်တိုက်နယ်ပကဖတာဝန်ရှိသူက ပြောပါတယ်။

စစ်ကော်မရှင်အဖွဲ့တွေ မီးရှို့တာကြောင့် တောတိုက်ထဲကနေအိမ် ၁၀ လုံးထက်မနည်း မီးလောင်ပျက်စီးနိုင်ပြီး အသေးစိတ်ကိုတော့ မသိရသေးဘူးလို့ဆိုပါတယ်။

မီးရှို့ပြီးနောက် စစ်ကော်မရှင်စစ်ကြောင်းဟာ ရှားကွဲကျေးရွာကိုပြန်လည်အထိုင်ချတပ်စွဲထားပြီး စစ်ကြောင်းကြောင့် ရေကမိုး၊ ရှားကွဲ၊ ရွာသစ်၊ ထုံးဘိုကုန်း၊ ဂူကြီး၊ ငါးဘတ်ချောင်း၊ သစ်ဆိမ့်ရွာတွေက ပြည်သူ ၃,၀၀၀ ကျော်လည်း စစ်ရှောင်နေကြရတယ်လို့ အထက်ပါပကဖတာဝန်ရှိသူက ပြောပါတယ်။

မတ် ၁၀ ရက်ကလည်း ဝက်လက်မြို့နယ်၊ ငါးဘတ်ချောင်းကျေးရွာကို စစ်ကော်မရှင်စစ်ကြောင်း ဝင်သွားပြီးနောက် မီးရှို့သတ်ဖြတ်ခံထားရတဲ့ အမျိုးသမီးအလောင်းတွေ့ပြီး နေအိမ် ၆ လုံးလည်းဖျက်ဆီးခံခဲ့ရပါသေးတယ်။

စာတည်း – လင်း

ဝက်လက်၊ ဇွန် ၁၊ ၂၀၂၆ ။

စစ်ကိုင်းတိုင်း၊ ဝက်လက်​မြို့နယ်၊ ရွှေဘို-မန္တလေးလမ်းပိုင်းမှာ စစ်မှုထမ်းသင်တန်းဆင်း စစ်သားဟောင်း ၁ ဦးကို ဖမ်းဆီးနိုင်ခဲ့တယ်လို့ ဝက်လက်မြို့နယ်ပကဖ တာဝန်ရှိသူတွေထံက သိရပါတယ်။

မေလ ၃၁ ရက် ယမန်နေ့မနက် ၉ နာရီခန့်က ဝက်လက်ပကဖအဖွဲ့ဝင်အချို့ဟာ အထက်ပါလမ်းပိုင်းမှာစစ်ဆေးရေးလုပ်နေချိန် မန္တလေးဘက်ကနေ ရွေဘိုဘက်ကိုမောင်းနှင်လာတဲ့ ခရီးသည်တင်ယာဥ်ပေါ်ကနေ ဖမ်းမိခဲ့တာလို့ ဆိုပါတယ်။

” လိုင်းကားနဲ့ မိသားစုလိုက်ပြန်လာတာ။ သူက စစ်မှုထမ်း ၂ နှစ်ပြီးလို့ ပြန်လာတဲ့သူ။ သူကိုစစ်ဆေးရမယ်။ စစ်ကြောင်းလိုက်တဲ့အခါတွေမှာ ရာဇဝတ်မှုကျူးလွန်ထားတာရှိရင် အရေးယူသွားမှာပါ” လို့ ဝက်လက်မြို့နယ်ပကဖပြန်ကြားရေးတာဝန်ရှိသူက မြေလတ်အသံကို ပြောပါတယ်။

ဖမ်းဆီးခံရသူဟာ စစ်မှုထမ်းသင်တန်းအပတ်စဥ် ၂ ဆင်း တပ်သားဟောင်း သိန်းဇော် ဖြစ်ပြီး ၎င်းနဲ့အတူ ကလေး ၄ ဦး၊ ဇနီးနဲ့ မိခင်ဖြစ်သူတို့ကို ဖမ်းမိခဲ့တာဖြစ်ပေမယ့် မိသားစုဝင်တွေနဲ့ကလေးတွေကို ခံဝန်ထိုးကာ နေ့ချင်းပြန်လွှတ်ပေးလိုက်တယ်လို့ ဆိုပါတယ်။

လက်ရှိမှာ ဖမ်းမိထားတဲ့ တပ်သားဟောင်း သိန်းဇော်ကို ရွှေဘိုခရိုင်တပ်ရင်း ၁ ကို လွှဲပြောင်းထားပြီး ၎င်းဟာ စစ်မှုထမ်းအပတ်စဥ်သင်တန်းဆင်း ၂ ပြီးနောက် တိုက်ပွဲတွေနည်းပါးတဲ့ တနိုင်းအခြေစိုက် ခလရ ၂၉၇ ကို ရောက်ရှိကာ ပြီးခဲ့တဲ့ မေလ ၁၈ ရက်မှာ စစ်မှုထမ်း ၂ နှစ်ပြည့်ပြီး စစ်တပ်ကနေထွက်ခွင့်ရခဲ့သူဖြစ်တယ်လို့ သိရပါတယ်။

စစ်တပ်က ပြည်သူစစ်မှုထမ်းအပတ်စဥ် ၁ နဲ့ ၂ က စစ်မှုထမ်း၂ နှစ်ပြီးမြောက်သူတွေကို တပ်ကနေ ထွက်ခွင့်ပေးနေတယ်လို့ စစ်တပ်ကိုထောက်ခံရေးသားနေတဲ့ တယ်လီဂရမ်ချန်နယ်အချို့တွေမှာ ဖော်ပြနေကြတာလည်း ဖြစ်ပါတယ်။

စစ်မှုထမ်း ၂ နှစ်ပြည့်မြောက်တဲ့ စစ်မှုထမ်းအပတ်စဥ် ၁ နဲ့ ၂ မှာ စစ်မှုထမ်းစစ်သား ၁၀,၀၀၀ ဝန်းကျင် တက်ရောက်ခဲ့ရတာဖြစ်ပြီး စစ်မှုထမ်းနှစ်ပြည့်ပြီးနောက် စစ်တပ်ကနုတ်ထွက်ခွင့်ရရှိသူဟာ ရာဂဏန်းသာရှိတယ်လို့ စစ်တပ်အသိုင်းအဝိုင်းထံက သိရပါတယ်။

■ အုတ်ဖိုမှာလည်း လေကြောင်းကနေဗုံးကြဲလို့ အမျိုးသမီး ၁ ဦး ဒဏ်ရာပြင်းထန်

မြေလတ်အသံ၊ မေ ၂၉၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်မှာ စစ်တပ်ရဲ့အသေခံဒရုန်းနဲ့တိုက်ခိုက်ခံရလို့ ကာကွယ်ရေးအဖွဲ့ဝင် ၁ ဦး ကျဆုံးခဲ့တယ်လို့ ဒေသကာကွယ်ရေးအဖွဲ့ဝင်တွေနဲ့နီးစပ်သူတွေထံက သိရပါတယ်။

မေလ ၂၈ ရက် မနေ့ ညနေ ၃ နာရီခွဲကျော်မှာ ရွှေဘိုမြို့တောင်ဘက်အဝင်မုခ်စစ်တပ်ဂိတ်ကနေ လွှတ်တင်လိုက်တဲ့ အသေခံဒရုန်း ၂ စီးဟာ ဝက်လက်မြို့ နယ်၊ ရေထွက်ကျေးရွာမြောက်ဘက်အထွက်အနီး ထမင်းဆိုင်နဲ့ ပအဖအခွန်ကောက်ဂိတ်အနီးကို ကျရောက်ပေါက်ကွဲခဲ့တာလို့ ဆိုပါတယ်။

“အဲ့နားမှာ အိမ်လေးရှိတယ်။ ဆိုင်ခပ်သေးသေးလေး ထမင်းခေါက်ဆွဲရောင်းတဲ့ စားသောက်ဆိုင်ပေါက်စလေး ဆိုင်ဘေးနားကျကွဲတာ။ ၂ စီးစလုံး။ ရဲဘော်တွေက အဲ့နားထိုင်နေကြတာမှာထိတာ”လို့ ဒေသကာကွယ်ရေးအဖွဲ့တွေနဲ့နီးစပ်သူတဦးက ပြောပါတယ်။

ဒရုန်းထိမှန်တာကြောင့် အသက် ၄၀ အရွယ် ကာကွယ်ရေးအဖွဲ့ဝင်အမျိုးသား ၁ ဦးနေရာမှာပင်သေဆုံးပြီး နောက်ထပ်အဖွဲ့ဝင် ၁ ဦးနဲ့ပြည်သူ ၁ ဦးထိခိုက်ဒဏ်ရာရခဲ့တယ်လို့ သိရပါတယ်။

အသေခံဒရုန်းနဲ့ တိုက်ခိုက်ခံရတဲ့နေရာအနီး ရေထွက်ကျေးရွာပြည်သူတွေကတော့ စစ်တပ်က ဒရုန်းနဲ့ထပ်မံတိုက်ခိုက်လာမှာစိုးရိမ်ပြီး ပြောင်းရွှေ့နေထိုင်နေကြတယ်လို့ ဆိုပါတယ်။

အလားတူ မေလ ၂၈ ရက် မနေ့မနက် ၉ နာရီကျော်မှာ အုတ်ဖိုမြို့နယ်၊ ထန်းပင်ကုန်းကျေးရွာကို စစ်တပ်က တိုက်လေယာဥ်နဲ့ဗုံး ၁ လုံးကြဲချခဲ့ရာ ပြည်သူနေအိမ်ပေါ်ကျရောက်ပေါက်ကွဲခဲ့တယ်လို့ သိရပါတယ်။

“ဖိုက်တာလာတာမှာ အသံကြီးကို အကြီးကြီးပဲ။ အကျယ်ကြီးပြီးမှာ ရွာအရှေ့ဘက်အိမ်ပေါ်ကျတာ။ ရွာသားတွေလည်း ပြေးနေရတာ။ အိမ်ပြန်ပြီး ပစ္စည်းလေးဘာလေးယူတာ ဖြစ်နိုင်လောက်တယ်။ ဒဏ်ရာရတာကပြင်းတယ်။ ခန္ဓာကိုယ်အနှံ့ပဲ”လို့ ဖြစ်စဥ်ကိုသိရှိတဲ့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဗုံးထိမှန်တာကြောင့် ထန်းပင်ကုန်းရွာခံ အသက် ၃၂ နှစ်အရွယ် မအေးလေးမှာ ခန္ဓာကိုယ်အနှံ ဗုံးစမှန်ဒဏ်ရာရပြီး အခြေအနေစိုးရိမ်ရသလို နေအိမ်လည်းပျက်စီးသွားတယ်လို့ ဆိုပါတယ်။

မေလ ၂၇ ရက်ကလည်း အုတ်ဖိုမြို့နယ်၊ ကိုင်းကြီးရွာမှာ စစ်ရှောင်နေရာကနေ ကျေးရွာခဏပြန်တဲ့ အမျိုးသား ၃ ဦး စစ်ကြောင်းနဲ့တိုးပစ်ခံရပြီး အမျိုးသား ၂ ဦးသေဆုံးကာ ၁ ဦးဒဏ်ရာရပြီး လွတ်မြောက်လာတယ်လို့ သိရပါတယ်။

သတင်း – ကျော်ကြီး

မြေလတ်အသံ

ဝက်လက် #အုတ်ဖို #ဒရုန်း #ဗုံးကြဲ #သေဆုံး

ဝက်လက်၊ မေ ၂၀၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ မင်းကန်ကျေးရွာအနီးမှာ နွားကျောင်းထွက်တဲ့ အမျိုးသမီး ၁ ဦး မိုင်းထိပြီးဒဏ်ရာရခဲ့တယ်လို့ ရွာခံတွေဆီက သိရပါတယ်။

မိုင်းထိသူဟာ မင်းကန်ရွာမှာနေထိုင်တဲ့ အသက် ၂၃ နှစ်အရွယ် မကလေးလေး (ခ) သူဇာမြင့်ဖြစ်ပြီး မေ ၁၉ ရက် ညနေ ၃ နာရီခန့်မှာ ကျေးရွာအနောက်တောင်ဘက် နွားကျောင်းထွက်ချိန် မိုင်းထိခဲ့တာလို့ ဆိုပါတယ်။

“သူက အဲ့ဘက်မှာနွားကျောင်းတာ။ နဂိုကလည်း သူကနွားကျောင်းနေကျ။ သူထိတာက လက်လုပ်မိုင်း။ ကွန်ကျူးပိုက်တွေနဲ့လုပ်တဲ့မိုင်းပါ” လို့ ရွာခံတဦးကပြောပါတယ်။

မိုင်းထိတဲ့အတွက် အဲ့ဒီအမျိုးသမီးရဲ့တင်ပါးနဲ့လက်ဖျံတို့မှာ မိုင်းစမှန်ဒဏ်ရာရခဲ့ပြီး နွားမ ၁ ကောင်ကတော့နေရာမှာတင် သေဆုံးခဲ့တယ်လို့ ဆိုပါတယ်။

အခုမိုင်းထိတဲ့ကျေးရွာအနီးကို စစ်ကော်မရှင်စစ်ကြောင်းဝင်ရောက်ဖူးတာမရှိဘဲ ပေါက်ကွဲတဲ့မိုင်းဟာ ကာကွယ်ရေးတပ်ဖွဲ့ဝင်တွေထောင်တတ်တဲ့မိုင်းမျိုးဖြစ်တယ်လို့ အထက်ပါရွာခံက ခန့်မှန်းပါတယ်။

ဒဏ်ရာရအမျိုးသမီးကိုတော့ နီးစပ်ရာဆေးခန်းမှာဆေးကုသနေရပြီး ဒဏ်ရာကတော့ မစိုးရိမ်ရဘူးလို့ သိရပါတယ်။

ပြီးခဲ့တဲ့ မတ်လ ၃၁ ရက်ကလည်း ပွင့်ဖြူမြို့နယ်၊ မလယ်ကျေးရွာနေ အသက် ၁၃ နှစ်အရွယ် မိန်းကလေးငယ် ၁ ဦး ကျေးရွာနဲ့ ၁ မိုင်အကွာတောစပ်ကို ထင်းခုတ်သွားချိန် မိုင်းထိပြီး ခြေထောက်ပြတ်ခဲ့သေးတယ်လို့ သိရပါတယ်။

စာတည်း – လင်း

ဝက်လက်၊ မေ ၆၊ ၂၀၂၆ ။

စစ်ကိုင်းတိုင်း၊ ဝက်လက်မြို့နယ်၊ ချက်ပြဲကျေးရွာ (ဒေသအခေါ်စခန်းသာ) ကို စစ်ကော်မရှင်တပ်က လေကြောင်းကနေဗုံးကြဲလို့ အရပ်သား ၃ ဦးသေဆုံးခဲ့တယ်လို့ ဝက်လက်မြို့နယ်ပကဖတာဝန်ရှိသူတွေထံက သိရပါတယ်။

မေလ ၆ ရက် ဒီကနေ့ မနက် ၁ နာရီခန့်မှာ လေတပ်သုံးတိုက်လေယာဥ် ၃ စီးက ကျေးရွာနဲ့အနီးဝန်းကျင်ကို ဗုံး ၅ လုံးထက်မနည်းကြဲချခဲ့ရာ ကျေးရွာအတွင်းစားသောက်ဆိုင်နဲ့ ကျေးရွာနံဘေးနေရာတွေမှာ ကျရောက်ပေါက်ကွဲခဲ့တယ်လို့ ဆိုပါတယ်။

” စားသောက်ဆိုင် ခရီးသည်ကားတွေနားတဲ့ဆိုင်။ ထမင်း၊ ဘီယာရတဲ့ဆိုင် အဲ့ဆိုင်ပေါ်ကျတာ။ ၃ ယောက်စလုံးသေတာ။ ဆိုင်ရှင်တွေပဲ “လို့ ဝက်လက်မြို့နယ်ပကဖ သတင်းနဲ့ပြန်ကြားရေးတာဝန်ခံက ပြောပါတယ်။

ဗုံးထိမှန်တာကြောင့် စားသောက်ဆိုင်ပိုင်ရှင်လင်မယားတွေဖြစ်တဲ့ အသက် ၅၀ အရွယ် အမျိုးသားနဲ့ အသက် ၄၈ နှစ် အမျိုးသမီး၊ သမက်ဖြစ်သူ အသက် ၃၀ အရွယ်အမျိုးသားတို့ သေဆုံးခဲ့ကာ ဆိုင်အတွင်းရှိနေတဲ့ ချက်ပြဲရွာနေ ၁၈ နှစ် ယောက်ျားလေး ၁ ဦး၊ အသက် ၇ နှစ်နဲ့ ၂၈ နှစ် မိန်းကလေး ၂ ဦးတို့ ဒဏ်ရာရခဲ့တယ်လို့ သိရပါတယ်။

ဒါ့အပြင် ဗုံးထိမှန်တဲ့ စားသောက်ဆိုင်နေအိမ်နဲ့ အခြားနေအိမ် ၂ လုံးလည်းပျက်စီးခဲ့ပြီး စစ်ကော်မရှင်တပ်က အရပ်သားပြည်သူနေအိမ်တွေကို လေကြောင်းတိုက်ခိုက်မှုတွေမကြာခဏပြုလုပ်နေလို့ ပြည်သူတွေအနေနဲ့ လေကြောင်းသတိနဲ့ နေထိုင်နိုင်ကြဖို့ ပကဖက သတိပေးထုတ်ပြန်ထားပါတယ်။

မေလ ၄ ရက်မနက်ပိုင်းကလည်း ဝက်လက်မြို့နယ်၊ အုတ်ပုံရွာ ပြည်သူ့နေအိမ်နားကို စစ်ကော်မရှင်ဘက်က လွှတ်တင်တဲ့ ဒရုန်းဗုံးကျရောက်ပေါက်ကွဲခဲ့လို့ အမျိုးသား ၁ ဦးသေဆုံးခဲ့သေးတယ်လို့ သိရပါတယ်။