မြေလတ်အသံ၊ ဩဂုတ် ၇၊ ၂၀၂၆။
ဝက်လက်၊ ဩဂုတ် ၇၊ ၂၀၂၆။
စစ်ကိုင်းတိုင်း၊ ဝက်လက်မြို့နယ်၊ ရှိန်းမကားတိုက်နယ်၊ ကမ်းဖြူကျေးရွာ စာသင်ကျောင်း ဗုံးကြဲခံရလို့ စာသင်ကျောင်းပျက်စီးကာ နွား ၁၃ ကောင်သေသွားတယ်လို့ တိုက်နယ်ပကဖ တာဝန်ရှိသူတွေထံက သိရပါတယ်။
ဩဂုတ်လ ၆ ရက်နေ့ည ၁၁ နာရီကျော်ခန့်က ကမ်းဖြူနဲ့ ကျွန်းပင်ကျေးရွာကြားရှိ အ.မ.က ကမ်းဖြူစာသင်ကျောင်းဝင်းထဲကို တံတားဦးလေတပ်ကနေ တက်လာတဲ့ ဂျက်ဖိုက်တာက ဗုံးတလုံးကြဲချသွားခဲ့တာ ဖြစ်ပါတယ်။
“ပြည်သူ့နေအိမ်တွေနဲ့တော့ နည်းနည်းဝေးတယ်။ ကျောင်းပေါ်တည့်တည့်ကျတာ မဟုတ်ပေမယ့် ပေါက်ကွဲအားနဲ့ ပွင့်ထွက်ကုန်တာ။ စာသင်ကျောင်းကပိတ်ထားတာ ကြာပြီး။ နွားတွေက ကျောင်းနားမှာ လှန်ထားတာ”လို့ ရှိန်းမကားတိုက်နယ် ပကဖတာဝန်ခံက ပြောပါတယ်။
လေယာဥ်ဗုံးကျလို့ ပြည်သူထိခိုက်မရှိပေမယ့် စာသင်ကျောင်းဆောင် ၂ ဆောင်၊ လူနေအိမ် ၃ လုံး ပျက်စီးခဲ့သလို နွား ၁၃ ကောင်လည်း သေဆုံးခဲ့တာ ဖြစ်ပါတယ်။
ဗုံးကြဲခံရပြီးနောက် ကျေးရွာနှစ်ရွာက ဒေသခံတွေက နောက်ထပ်ဗုံးလာကြဲမှာကို စိုးရိမ်နေကြပေမယ့် ကျေးရွာကနေ ထွက်ပြေးတိမ်းရှောင်တာတော့ မရှိသေးဘူးလို့ သိရပါတယ်။
ပြီးခဲ့တဲ့ ဇူလိုင်လ ၂၈ ရက်နေ့ကလည်း ဝက်လက်မြို့နယ်၊ ပေါက်ကန်ဘူတာကျေးရွာကို စစ်တပ်က လေကြောင်းကနေ ကြဲချတဲ့ ဗုံးသီးထိမှန်လို့ သက်ကြီးအမျိုးသား ၁ ဦးသေဆုံးခဲ့တယ်လို့ သိရပါတယ်။
ခင်ဦး၊ ဩဂုတ် ၇၊ ၂၀၂၆။
စစ်ကိုင်းတိုင်း၊ ခင်ဦးမြို့နယ်၊ အနောက်ခြမ်းက ကျေးရွာတွေမှာ ရေကြီးနေလို့ သောင်းနဲ့ချီတဲ့ ပြည်သူတွေဟာ ရေဘေးလွတ်ရာနေရာတွေကို ရွှေ့ပြောင်းနေရတယ်လို့ ခင်ဦးမြို့နယ် ပကဖတာဝန်ရှိသူတွေထံက သိရပါတယ်။
မနေ့က ဩဂုတ်လ ၆ ရက်နေ့ကစတင်ပြီး မိုးသည်းထန်စွာရွာသွန်းသလို သဖန်းဆိပ်ဆည်ရေကြောင့် မူးမြစ်ရေတက်လာပြီး၊ ခင်ဦးအနောက်ခြမ်းက ကျေးရွာတွေဖြစ်တဲ့ အနောက်ရသစ်၊ မူးပါ၊ ဇီးတော၊ လက်ပံ၊ ကျွန်းတောကြီး၊ ကျွန်းတောလေး၊ ဇီးအုံးနဲ့ ယာတော်ကျေးရွာတွေ အပါအဝင် ကျေးရွာ ၁၅ ခန့်မှာ ရေကြီးနေတာ ဖြစ်ပါတယ်။
“ရွာထဲမှာဆို ရေက ခါးကျော်ကျော်လောက်။ အချို့နေရာဆို လည်ပင်းလောက်ရှိတယ်။ ပြည်သူတွေကအကုန်ရွှေ့ နေရတယ်။ ဗျူဟာလမ်းအနောက်ဘက်ခြမ်းက ရေကြီးနေတာဆိုတော့ အရှေ့ဘက်ခြမ်းကို အကုန်ရွေ့နေရတယ်။ ဆိတ်၊ နွား၊ ကြက်၊ ဝက် တိရစ္ဆာန်တွေ အကုန်ရွှေ့ရတယ်”လို့ ခင်ဦးမြို့နယ် ပကဖတာဝန်ခံက ပြောပါတယ်။
မူးမြစ်ရေဟာ တဖြည်းဖြည်းတက်လာတာကြောင့် ပြည်သူတွေရွှေ့ပြောင်းဖို့ အချိန်ရခဲ့တာကြောင့် အချိန်မီပြောင်းရွှေ့နိုင်ခဲ့လို့ အသေအပျောက် မရှိကြဘူးလို့ဆိုပါတယ်။
ရွေ့ပြောင်းထားကြရတဲ့ ပြည်သူတွေက ဗျူဟာလမ်းပိုင်းပေါ်နဲ့ ကုန်းမြင့်ပိုင်းတွေမှာ ယာယီတိမ်းရှောင်နေကြရပြီး၊ အမိုးအကာ မရှိသူတွေက မိုးရေထဲ နေနေကြရတယ်လို့ သိရပါတယ်။
ရေဘေးသင့်နယ်မြေတွေဟာ တော်လှန်ရေးအင်အားစုတွေရဲ့ ထိန်းချုပ်နယ်မြေဖြစ်တာကြောင့် ပြည်သူတွေကို တော်လှန်ရေးအဖွဲ့တွေက ကူညီဆောင်ရွက်ပေးနေကြပြီး ပြင်ပအကူအညီတွေတော့ မရောက်လာသေးဘူးလို့ ဆိုပါတယ်။
ရေဘေးရှောင်ကြရတဲ့ ကျေးရွာတွေက အနည်းဆုံးအိမ်ခြေ ၂၀၀ ကနေ အများဆုံး အိမ်ခြေ ၅၀၀ ကျော်အထိရှိတဲ့ကျေးရွာတွေဖြစ်လို့ လူဦးရေတသောင်းကျော်လောက် ရေဘေး ရှောင်နေကြရတယ်လို့ သိရပါတယ်။
မူးမြစ်ရေကြီးနေလို့ မူးမြစ်ကမ်းဘေးရှိ ရေဦး၊ ဒီပဲယင်း၊ တန့်ဆည်၊ ကောလင်းမြို့နယ်တွေက ကျေးရွာတွေမှာလည်း ရေကြီးမှုတွေ ဖြစ်နေကြောင်း သိရပါတယ်။
ဓာတ်ပုံ – ခင်ဦးမြို့နယ် သတင်းမှန်ပြန်ကြားရေး
ဆိုးလ်၊ ဩဂုတ် ၆၊ ၂၀၂၆။
ကိုးရီယာနိုင်ငံရောက် မြန်မာ့ဒီမိုကရေစီအရေး တက်ကြွလှုပ်ရှာသူတွေ ဦးဆောင်ပြီး ၃၈ နှစ်မြောက် ရှစ်လေးလုံးအရေးတော်ပုံအကြို အထိမ်းအမှတ် “ကိုရီးယားအစိုးရသို့ အထူးတိုက်တွန်းတောင်းဆိုစာ ပေးပို့ခြင်း”ခေါင်းစဥ်နဲ့ ဆိုးလ်မြို့ရှိ ကိုးရီယားလွှတ်တော်ရှေ့မှာ ဒီကနေ့မနက်ပိုင်းက ပြုလုပ်ခဲ့ပြီး ပူးတွဲသတင်းစာရှင်းလင်းပွဲတရပ် ပြုလုပ်ခဲ့ကြောင်း သိရပါတယ်။
အဆိုပါပွဲကို ကိုရီးယားလွှတ်တော်အမတ် အီဂန်အီးလ် လာရောက်ပါဝင်ပြီး မြန်မာ့ဒီမိုကရေစီအင်အားစုများကို အားပေးစကား ပြောကြားကာ ပေးပို့လာတဲ့စာတွေကိုလည်း ကိုယ်တိုင်လက်ခံယူသွားခဲ့ကြောင်း သိရပါတယ်။
ဓာတ်ပုံ – ကိုလင်းအိမ်
ဓာတ်ပုံ – ကိုလင်းအိမ်
မြန်မာပြည်သူများမှ ကိုရီးယားအစိုးရနဲ့ ကိုရီးယားလွှတ်တော်ကို စာ ၃ စောင်ပေးပို့ခဲ့ပြီး ရှစ်လေးလုံး ၃၈ နှစ်မြောက် အထူးတိုက်တွန်းခြင်း၊ အာဆီယံဆုံးဖြတ်ရပ်တည်ချက်ကို ထောက်ခံပေးရန်နဲ့ ကုလသမဂ္ဂမှာ သံအမတ်ကြီး ဦးကျော်မိုးထွန်းကို ဆက်လက်ထောက်ခံပေးရန်တို့ ပါဝင်ပါတယ်။
သတင်းစာရှင်းလင်းပွဲမှာလည်း လွှတ်တော်အမတ် အီဂန်အီးလ်က မြန်မာ့ဒီမိုကရေစီရေးကို ကိုရီးယားမှ ဆက်လက် ထောက်ခံနေဆဲ ဖြစ်ပြီး၊ အားမလျှော့ကြရန် တိုက်တွန်း ပြောကြားသွားခဲ့ပါတယ်။
မြန်မာ့ဒီမိုကရေစီရေးထောက်ခံအားပေးနေတဲ့ ကိုရီးယားအရပ်ဘက်အဖွဲ့အစည်းများ တပ်ပေါင်းစုမှ တာဝန်ခံတွေကလည်း ရှစ်လေးလုံး မြန်မာ့ဒီမိုကရေစီအရေးတော်ပုံကို တန်ဖိုးထားပါကြောင်းနဲ့ မြန်မာပြည်သူတွေနဲ့အတူ ရပ်တည်နေကြောင်း ပြောကြားခဲ့ပါတယ်။
ဓာတ်ပုံ – ကိုလင်းအိမ်
ဓာတ်ပုံ – ကိုလင်းအိမ်
မွန်းလွဲပိုင်းမှာတော့ မြန်မာ့ဒီမိုကရေစီအရေးတက်ကြွလှုပ်ရှားသူတွေက အာဆီယံနိုင်ငံများသို့ အိတ်ဖွင့်ပေးစာပေးပို့ခြင်း သတင်းစာရှင်းလင်းပွဲကို ဆိုးလ်မြို့ ကိုရီးယား-အာဆီယံရုံးရှေ့မှာ ဆက်လက် ပြုလုပ်ခဲ့ပါတယ်။
အဲ့ဒီအိတ်ဖွင့်ပေးစာထဲမှာ အာဆီယံနိုင်ငံတွေအနေနဲ့ အာဆီယံချာတာပေါ်မှာ ခိုင်ခိုင်မြဲမြဲ ရပ်တည်ပြီး၊ အာဆီယံ ဘုံသဘောတူညီချက် ၅ ရပ်ကို မလိုက်နာတဲ့ စစ်ခေါင်းဆောင် မင်းအောင်လှိုင်ကို အသိအမှတ်မပြုဖို့ လေးလေးနက်နက် တောင်းဆိုထားတဲ့စာကို ကိုရီးယားနိုင်ငံဆိုင်ရာ အာဆီယံနိုင်ငံသံရုံးတွေကို ပေးပို့ခဲ့ပါတယ်။
မနက်ဖြန် ဩဂုတ်လ ၇ ရက်နေ့မှာလည်း ဆိုးလ်မြို့ အာဆီယံနိုင်ငံ သံရုံးတွေရှေ့မှာလည်း တဦးချင်း ထပ်မံဆန္ဒပြကြဖို့ မြန်မာ-ကိုရီးယားအဖွဲ့တွေက စီစဉ်ထားပါတယ်။
ဓာတ်ပုံ – ကိုလင်းအိမ်
ဓာတ်ပုံ – ကိုလင်းအိမ်
၃၈ နှစ်မြောက် ၈၈၈၈ အရေးတော်ပုံနေ့မှာတော့ မြန်မာသံရုံးရှေ့မှာ မြန်မာဒီမိုကရေစီရေးလှုပ်ရှားတဲ့ ကိုရီးယားအရပ်ဘက်အဖွဲ့အစည်းတွေနဲ့ မြန်မာအဖွဲ့အစည်းတွေပေါင်းပြီး သတင်းစားရှင်းလင်းပွဲပြုလုပ်ဖို့ရှိပြီး၊ ညနေပိုင်းမှာတော့ ဆိုးလ်မြို့ ဟုံးဒယ်ဘူတာမှာ မြန်မာအရေးဓာတ်ပုံပြပွဲနဲ့အတူ တော်လှန်သီချင်းများသီဆိုခြင်းနဲ့ ကဗျာရွတ်ခြင်း စတဲ့လှုပ်ရှားမှုတွေရှိပြုလုပ်ဖို့ ရှိတယ်လို့ သိရပါတယ်။
အဲ့ဒီအပြင် သြဂုတ်လ ၉ ရက်နေ့မှာကတော့ ဆိုးလ်မြို့ ဘိုရှင်းဂတ်ရင်ပြင်မှာ လူအများဆန္ဒပြပွဲကို နေ့လည် ၁၂ ကနေ ၃ နာရီထိ ပြုလုပ်သွားမှာဖြစ်ပါတယ်။
သတင်း – ကိုလင်းအိမ်
ကောလင်း၊ ဩဂုတ် ၆၊ ၂၀၂၆။
စစ်ကိုင်းတိုင်း၊ ကောလင်းမြို့နယ်ထဲမှာ မိုးများပြီး ချောင်းရေတက်လာလို့ ကျေးရွာ ၁၀၀ ကျော် ရေကြီးနေတယ်လို့ ကော့လင်းခရိုင် ပကဖတာဝန်ရှိသူတွေထံက သိရပါတယ်။
ဩဂုတ်လ ၅ ရက်နေ့က စတင်ပြီး မိုးသည်းထန်စွာရွာသွန်းနေပြီး ဒေါင်းမြူချောင်းနဲ့ လာကာချောင်းတွေက ရေမြင့်တက်လာတာကြောင့် ကော့လင်းမြို့နယ် အနောက်ခြမ်းနဲ့ အရှေခြမ်းကျေးရွာတွေမှာ ရေကြီးတာတွေ ဖြစ်နေတယ်လို့ ဆိုပါတယ်။
“အဓိက အဆိုးဆုံးက ကောလင်းအနောက်ခြမ်းရွာတွေ ရေကြီးတာများတယ်။ ရေက ၄ ပေလောက်တက်လာတယ်။ နိမ့်တဲ့နေရာတွေဆို ပိုဆိုးတယ်။ လူတွေက အဝေးကြီးရွှေ့ပြောင်းရတာ မရှိဘူး။ ရွာအမြင့်ပိုင်းတွေ ပြောင်းကြရတာ ရှိတယ်။ စစ်ရှောင်တွေဆို အကုန်ရွှေ့ရတာ”လို့ ကောလင်းခရိုင် ပကဖတာဝန်ခံ ကိုမိုးဇော်အောင်က ပြောပါတယ်။
မိုးကလည်း အဆက်မပြတ်ဆက်လက်ရွာသွန်းနေတာကြောင့် ရေကြီးမှု ပိုမိုဖြစ်လာပါက စစ်ဘေးရှောင်တွေကော၊ ရွာခံတွေပါ သွားလာရေးပြတ်တောက်နိုင်ပြီး၊ စားသောက်နေထိုင်ရေးအတွက် အခက်ခဲကြုံလာနိုင်တယ်လို့ ဆိုပါတယ်။
ရေကြီးလာလို့ ကောလင်းအနောက်ခြမ်းကျေးရွာတွေက ကားလမ်းဘေးတွေမှာတဲထိုးနေရတဲ့ စစ်ရှောင်အိမ်ထောင်စု ၁၅၀၀ ကျော်၊ လူဦးရေ ၅၀၀၀ ကျော်ဟာ တဲအများစု ရေမြုပ်လို့ ပျက်စီးကုန်းပြီး၊ ကျေးရွာတွေရဲ့ အမြင့်ပိုင်းတွေကို ရွှေ့ပြောင်းနေရတယ်လို့ သိရပါတယ်။
စစ်ဘေးရှောင်တွေမှာ နေစရာတဲတွေမရှိတော့လို့ အမိုးအကာနဲ့ စားနပ်ရိက္ခာလိုအပ်ချက်တွေလည်း ရှိလာတယ်လို့ ဆိုပါတယ်။
NLD အစိုးရလက်ထက် ၂၀၁၆ ခုနှစ်ကလည်း ကောလင်းမြို့နယ်အတွင်းက ကျေးရွာပေါင်း ၁၀၀ ရေကြီးမှုကြုံတွေ့ခဲ့ရပြီး၊ နေအိမ်ခေါင်မိုးတွေ မြုပ်တဲ့အထိကြုံတွေ့ခဲ့ရကာ လူသေဆုံးတာ၊ ရာနဲ့ချီပြီး နေအိမ်တွေပျက်စီးခဲ့ရသလို ဆန်စပါးအပါအဝင် ကောက်ပဲသီးနှံစိုက်ခင်းများစွာ ပျက်စီးဆုံးရှုံခဲ့ရတယ်လို့ သိရပါတယ်။
■ နတ်တလင်းမှာလည်း လေယာဥ်နဲ့ဗုံးကြဲသွား
ပေါက်ခေါင်း၊ ဩဂုတ် ၆၊ ၂၀၂၆။
ပဲခူးတိုင်းအနောက်ခြမ်း၊ ပေါက်ခေါင်းမြို့နယ်မှာ စစ်ကောင်စီတပ်က ဒရုန်းနဲ့ ဗုံးသီးချတိုက်ခိုက်ခဲ့လို့ ပြည်သူ့ကာကွယ်ရေးရဲဘော် ၃ ဦး ဒဏ်ရာရရှိခဲ့သလို နတ်တလင်းမြို့နယ်မှာလည်း လေကြောင်းကနေ တိုက်ခိုက်ခံခဲ့ရတယ်လို့ ဒေသခံပြည်သူ့ကာကွယ်ရေးတပ်ဖွဲ့ဝင်တွေဆီက သိရပါတယ်။
သြဂုတ်လ ၅ ရက် မွန်းတည်ချိန်ခန့်က ပေါက်ခေါင်းမြို့နယ်မှာ စစ်ကောင်စီတပ်က ဒရုန်းအသုံးပြုတိုက်ခိုက်ခဲ့တာဖြစ်ပြီး နတ်တလင်းမြို့နယ်မှာတော့ ဂျက်ဖိုက်တာနဲ့ တိုက်ခိုက်ခဲ့တာဖြစ်တယ်လို့ သိရပါတယ်။
ပေါက်ခေါင်းမြို့နယ်အတွင်း ဒရုန်းနဲ့တိုက်ခိုက်ရာမှာ ပေါင်းတည်ပကဖ က ရဲဘော်တဦး၊ တပ်ရင်း ၃၆၀၁ က ရဲဘော်တဦးနဲ့ တပ်ရင်း ၃၆ဝ၂ က ရဲဘော်တဦး ပေါင်း ၃ ဦး ဒဏ်ရာရရှိခဲ့ပြီး နတ်တလင်းမြို့နယ်က တိုက်ခိုက်မှုအခြေအနေကိုတော့ မသိရသေးဘူးလို့ ဆိုပါတယ်။
“ရဲဘော်တွေက ဆိုင်ကယ်နဲ့ သွားနေတာကို အပေါ်ကနေ ဒရုန်းနဲ့ ဗုံးသီးလိုက်ချတာ၊ ပြီးတော့ နောက်ကနေလိုက်ပစ်လို့ လူလွတ်ရုံး ပြေးခဲ့ရတာ။ စီးလာတဲ့ဆိုင်ကယ်တော့ မယူနိုင်တော့ ဘူးပေါ့” လို့ အခြေနေကို သိရှိသူ ပြည်သူ့ကာကွယ်ရေး ရဲဘော်တဦးက ပြောပါတယ်။
နတ်တလင်းမြို့နယ်က ပဲခူးရိုးမပေါ်တနေရာကို ဗုံးကြဲတိုက်ခိုက်တာကိုတော့ ဆက်သွယ်ရေး အခက်အခဲကြောင့် အသေးစိတ်ကို မသိရသေးဘူးလို့ နတ်တလင်းဒေသခံ ပြည်သူ့ကာကွယ်ရေး ရဲဘော်တဦးက ပြောပါတယ်။
နတ်တလင်းမြို့နယ်အတွင်း လေယာဉ်နဲ့ဗုံးကြဲတိုက်ခိုက်မှုကိုတော့ မြေလတ်အသံက သီးခြားအတည်ပြုဖို့ ကြိုးစားနေပါတယ်။
တချိန်တည်းဆိုသလိုပင် ပဲခူးတိုင်းအနောက်ခြမ်းက သာယာဝတီခရိုင် ကြို့ပင်ကောက်မြို့နယ် ရုံးချောင်းအုပ်စု အင်တိုင်းကုန်းရွာက နေအိမ်တွေပေါ်ကို စစ်ကောင်စီတပ်က Y-12 လေယာဉ်နဲ့ ဗုံးကြဲတိုက်ခိုက်ခဲ့လို့ တနှစ်သားအရွယ်ကလေးငယ်တဦးအပါ ပြည်သူ ၆ ဦး ဒဏ်ရာရခဲ့ပါတယ်။
အလားတူ ပြီးခဲ့တဲ့ ဩဂုတ်လ ၂ ရက်ကလည်း ကြို့ပင်ကောက်မြို့နယ်နဲ့ နယ်မြေထိစပ်နေတဲ့ အုတ်ဖိုမြို့နယ်က ပဲခူးရိုးမတနေရာကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့လို့ တော်လှန်ရေးတပ်ဖွဲ့တွေရဲ့စခန်းတခုပျက်စီးခဲ့သလို ပြည်သူ့ကာကွယ်ရေးရဲဘော် ၂ ဦးလည်း ဒဏ်ရာရခဲ့ပါသေးတယ်။
တန့်ဆည်၊ ဩဂုတ် ၆၊ ၂၀၂၆။
စစ်ကိုင်းတိုင်း၊ တန့်ဆည်နဲ့ ကန့်ဘလူမြို့နယ်ကြားရှိ စည်တုံလုံးချောင်းနဲ့ မူးမြစ် ရေလျှံလို့ ကျေးရွာ ၄၀ ကျော်ရေကြီးနေတယ်လို့ တန့်ဆည်မြို့နယ် ပကဖတာဝန်ရှိသူတွေထံက သိရပါတယ်။
ဩဂုတ်လ ၅ ရက်နေ့ကစပြီး မိုးသည်းထန်စွာ ရွာသွန်းခဲ့လို့ ချောင်းရေမြင့်တက်လာသလို သဖန်းဆိပ်ဆည်မှာလည်း ရေလျှံပြီး ရေကျော်ကျလာတာတွေကြောင့် ချောင်းနဲ့ မြစ်ကမ်းနဘေးရှိ ကျေးရွာတွေကို ရေဝင်လာတာလို့ ဆိုပါတယ်။
“တံတားနှစ်စင်း ကျိူးထားတာရှိတယ်။ လယ်ကြားကုန်းကြားမှာနေတဲ့ လယ်စောင့်တဲတွေမှာနေတဲ့ စစ်ဘေးရှောင်နေရာတွေလည်း ရွှေ့ထားရတယ်။ ရေတွေက သုံးလေးပေလောက် တက်နေတာရှိတယ်။ အိမ်ထဲဝင်တဲ့အဆင့် အိမ်ယာတွေ ရွှေ့ပြောင်းထားရတာ ရှိတယ်။” လို့ တန့်ဆည်မြို့နယ် ပကဖတာဝန်ရှိသူတဦးက ပြောပါတယ်။
လတ်တလောမှာတော့ ရေကြီးတာက နေအိမ်တွေနစ်မြုပ်တဲ့ အခြေနေထိမရှိသေးပေမယ့် မိုးကလည်း အဆက်မပြတ် ရွာသွန်းနေတာကြောင့် ဆက်လက်စောင့်ကြည့်ရမယ့်အခြေနေမှာ ရှိနေတယ်လို့ ဆိုပါတယ်။
မြစ်ရေကြီးတာကြောင့် ဩဂုတ်လ ၆ ရက်နေ့မနက်မှာ တန့်ဆည်မြို့နယ်၊ ပေါင်ကတောင်ကျေးရွာက မူးမြစ်ကူး တံတားတစင်း၊ တန့်ဆည်မြို့နယ်၊ မူးခွကျေးရွာနဲ့ ကန့်ဘလူမြို့နယ်၊ ကံရိုးကျေးရွာကြားက မူးမြစ်ကူးတံတားတို့ ရေစီးနဲ့ မျောပါ ပျက်စီးသွားပါတယ်။
ရေကြီးလို့ တန့်ဆည်မြို့နယ်၊ ကပျု၊ သာခေါင်ကြီး၊ ဝက်သိုးရွာတွေက စစ်ဘေးရှောင် အိမ်ထောင်စု ၁၀၀ ကျော် ကုန့်မြင့်ပိုင်းတွေကို ရွှေ့ပြောင်းထားရပြီး၊ အခြားကျေးရွာနေ ပြည်သူတွေကတော့ နေအိမ်တွေထဲ ရေဝင်နေပေမယ့် အရေးပေါ်ရွှေ့ပြောင်းတာမျိုး မရှိသေးဘူးလို့ သိရပါတယ်။
ရေကြီးနေလို့ တန့်ဆည်နယ်ထဲက ကပျု၊ သာခေါင်ကြီး၊ ဝက်သိုး၊ အောင်သုခ၊ ဥာဏ်သာ၊ ရသစ်၊ ငတန်း၊ သာစည်ကုန်း၊ ရွှေလှံနဲ့ မူးခွကျေးရွာတွေနဲ့ ကန့်ဘလူမြို့နယ်ထဲက ကံရိုး၊ မိုးကောင်း၊ မူးကျင်းစု စတဲ့ကျေးရွာတွေ အပါအဝင် မူးမြစ်ကမ်းနဘေးကျေးရွာ ၄၀ ကျော်လောက်မှာ ရေကြီးနေတယ်လို့ သိရပါတယ်။
ကြို့ပင်ကောက်၊ ဩဂုတ် ၅၊ ၂၀၂၆။
ပဲခူးတိုင်း၊ ကြို့ပင်ကောက်မြို့နယ်၊ အင်တိုင်းကုန်းကျေးရွာမှာ Y-12 နဲ့ကြဲချတဲ့ ဗုံးစထိမှန်လို့ ကလေးငယ် ၂ ဦးအပါအဝင် ၆ ဦးဒဏ်ရာရခဲ့တယ်လို့ ကြို့ပင်ကောက်မြို့နယ် ပကဖတာဝန်ရှိသူတွေထံက သိရပါတယ်။
ဩဂုတ်လ ၅ ရက်နေ့ ဒီကနေ့ မွန်းတည့် ၁၂ နာရီခန့်က မှော်ဘီလေတပ်ကနေ တက်လာတဲ့ Y-12 လေယာဉ်တစီးဟာ ကျေးရွာအလယ်ပိုင်းကို ဗုံး ၂ လုံးကြဲချခဲ့လို့ ပြည်သူတွေနေထိုင်တဲ့ နေအိမ်အနီး ကျရောက်ပေါက်ကွဲခဲ့တာလို့ ဆိုပါတယ်။
“ဗုံးကျတဲ့နေရာမှာ တိုက်ပွဲဖြစ်တာမရှိဘူး။ လက်ရှိအနေနဲ့က ပြည်သူတွေက မိမိနေအိမ်မှာ မိမိကလေးတွေနဲ့အတူ ကိုယ့်အိမ်မှာ ကိုယ်နေနေတဲ့အချိန်မှာ ကြဲချတဲ့ ဗုံးတွေထိပြီး ဆိုးဆိုးဝါးဝါးဖြစ်ကုန်တာ”လို့ ကြို့ပင်ကောက်မြို့နယ်ပကဖ တာဝန်ခံက ပြောပါတယ်။
ဗုံးထိမှန်တာကြောင့် အသက် ၁ နှစ်သားဟိန်းထက်ပိုင်၊ အသက် ၁၂ နှစ်အရွယ် မချစ်၊ အသက် ၇၀ ကျော်အရွယ် ဦးမဲကြီး၊ ၄၄ နှစ်အရွယ် ဦးသန်းဇော်၊ ၄၇ နှစ်အရွယ် ဒေါ်ဋ္ဌေးဋ္ဌေးဦး၊ ၃၅ နှစ်အရွယ် မယုယုမော်တို့ဒဏ်ရာရပြီး အဲဒီအထဲမှာ ၁၂ နှစ်အရွယ် ကလေးမမှာ ဒဏ်ရာစိုးရိမ်ရတယ်လို့ သိရပါတယ်။
ဒါ့အပြင် ဗုံးကျတဲ့နေရာအနီးက နေအိမ် ၃ လုံးပျက်စီးကာ ရွာခံအချို့ကကြောက်လန့်ပြီး၊ ကျေးရွာကနေ တိမ်းရှောင်သွားကြတာတွေရှိသလို အများစုကတော့ ကျေးရွာမှာဆက်လက်နေထိုင်နေကြတယ်လို့ သိရပါတယ်။
ပြီးခဲ့တဲ့ ဇူလိုင်လ ၁၀ ရက်နေ့ကလည်း ရေတာရှည်မြို့နယ်၊ စည်ပိုင်းကျေးရွာမှာ ဗုံးကြဲခဲရလို့ ရွာခံအမျိုးသား ၁ ဦး ဥဦးခေါင်းပြတ်ထွက်ကာ ခန္ဓကိုယ်ကြေမွပြီး သေဆုံးခဲ့တယ်လို့ သိရပါတယ်။
သာယာဝတီ၊ ဩဂုတ် ၅၊ ၂၀၂၆။
ပဲခူးတိုင်းအနောက်ခြမ်း၊ သာယာဝတီမြို့နယ်က လက်ပစ်ဗုံးကိုင် အုပ်ချုပ်ရေးမှူးနဲ့ ရာအိမ်မှူးကို သြဂုတ်လ ၅ ရက် ဒီကနေ့မနက် ၂ နာရီလောက်က သေနတ်နဲ့ ပစ်သတ်ခံရတယ်လို့ သာယာဝတီမြို့နယ် ပြည်သူ့ကာကွယ်ရေးတပ်ဖွဲ့ဝင်တဥဦးထံက သိရပါတယ်။
သာယာဝတီမြို့နယ် ကျောက်တွင်းကျေးရွာအုပ်စု၊ မင်းလမ်းရွာက အုပ်ချုပ်ရေးမှူးတဖြစ်လဲ ပြည်ခိုင်ဖြိုးပါတီ ရပ်ကျေးဥက္ကဌ ဦးမြင့်ကြိုင်နဲ့ ရာအိမ်မှူးကိုကျော်အောင်တို့ကို ပစ်သတ်ခံခဲ့ရတာလို့ ပြောပါတယ်။
အုပ်ချုပ်ရေးမှူးဦးမြင့်ကြိုင်ကို သူရဲ့နေအိမ်မှာပဲ သေနတ်နဲ့ ပစ်သတ်ခဲ့ပြီး၊ ရာအိမ်မှူးကိုကျော်အောင်ကိုတော့ ဖမ်းဆီးလာစဉ် ထွက်ပြေးဖို့ကြိုးစားတာကြောင့် လမ်းမှာပစ်သတ်ခဲ့ရတာလို့ ဆိုပါတယ်။
“ကိုမြင့်ကြိုင်ကတော့ ခေါင်းကိုပစ်ခဲ့တာပါ။ ကျော်အောင်ကတော့ ရင်ပတ်ကို။ ကိုမြင့်ကြိုင်ဆီက လက်ပစ်ဗုံး ၂ လုံး သိမ်းလို့ ရခဲ့တယ်” လို့ သာယာဝတီဂဠုန်တပ်ဖွဲ့ မြေပြင်စစ်ရေး ဒုတာဝန်ခံ ရဲဘော်ကျော်ကြီးက ပြောပါတယ်။
အသတ်ခံရတဲ့ အုပ်ချုပ်ရေးမှူးနဲ့ ရာအိမ်မှူးတို့ဟာ စစ်မှုထမ်းစုဆောင်းရာမှာ ဦးဆောင်သူတွေဖြစ်ပြီး၊ စစ်ကောင်စီရဲ့ အမာခံထောက်တိုင်တွေ ဖြစ်သလို၊ သာယာဝတီနယ်မှာ စစ်ကြောင်းထိုးလာတဲ့ စစ်သားတွေကို သူတို့နေအိမ်တွေမှာ ဧည့်ခံတည်းခိုကြပြီး ရာအိမ်မှူးအိမ်မှာ ကင်းပုန်းဝပ်လေ့ရှိတယ်လို့ သူက ဆက်ပြောပါတယ်။
ပြီးခဲ့တဲ့ ဇူလိုင် ၂၇ ရက်မနက် ၁၀ နာရီခွဲကလည်း ပဲခူးတိုင်းအနောက်ခြမ်း၊ ပေါက်ခေါင်းမြို့နယ် တောင်လယ်အုပ်စု အောင်ချမ်းသာရွာသစ်နေ ခလရ ၅၃ တပ်က စစ်မှုထမ်းဟောင်း ကိုအောင်ကိုဝင်း ကိုလည်း တော်လှန်ရေးတပ်သားတွေက သူရဲ့နေအိမ်မှာ သေနတ်နဲ့ သွားရောက်ပစ်သတ်ခဲ့တယ်လို့ သိရပါတယ်။
ကြို့ပင်ကောက်၊ ဩဂုတ် ၅၊ ၂၀၂၆။
ပဲခူးတိုင်း၊ ကြို့ပင်ကောက်မြို့နယ်၊ မြို့ကိုင်းကျေးရွာမှာ ဘုန်းကြီးကျောင်းမှာ ညအိပ်ပြီးပြန်လာတဲ့ အမျိုးသား ၃ ဦးကိုစစ်တပ်က သေနတ်နဲ့လိုက်ပစ်လို့ ၁ ဦးသေတယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။
ဩဂုတ်လ ၄ ရက်နေ့ မနက် ၅ နာရီကျော်ခန့်က အသက် ၃၃ နှစ်အရွယ် ကိုပေါက်စ၊ ဦးစန်းမြင့်ပါ ၃ ဦးဟာ ကျေးရွာဘုန်းကြီးကျောင်းကနေ နေအိမ်အပြန် စစ်ကော်မရှင်စစ်ကြောင်းနဲ့တိုးပြီး ပစ်ခတ်ခံရတာလို့ ဆိုပါတယ်။
“ဘုန်းကြီးကျောင်းမှာ ညညဆို သူတို့ကသွားအိပ်တယ်။ အိမ်မှာ မအိပ်ကြဘူး။ မနက်ကျ ထပြန်ချိန် စစ်ကြောင်းနဲ့တိုးတော့ ပေါ်တာဆွဲတော့ ပြေးကြတာ။ ကိုပေါက်စက ခေါင်းကျည်ထိပြီး သေတယ်။ ဦးစန်းမြင့်က ဖမ်းခံရတယ်။ ဟိုတယောက်ကတော့ ပြေးတော့လွတ်သွားတယ်”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။
ဦးခေါင်းကျည်ထိသေဆုံးခဲ့တဲ့ ကိုပေါက်စရဲ အလောင်းကိုတော့ စစ်ကော်မရှင်အဖွဲ့တွေက ကျေးရွာထိပ် ဆည်ဘောင်တံတားဘေးက အုတ်တိုက်အပြာအနီးမှာ မြေမြုပ်သွားပါတယ်။
ဖမ်းဆီးခံထားရတဲ့ ဦးစန်းမြင့်ကိုတော့ စစ်ကော်မရှင်အဖွဲ့က သူတို့အထိုင်ချတပ်စွဲထားတဲ့ မင်းဝနဲ့ ကျခတ္တန်းကြီးကျေးရွာကိုခေါ်သွားပြီး ဩဂုတ်လ ၅ ရက်နေ့အထိ ပြန်မလွှတ်သေးပါဘူး။
ပြီးခဲ့တဲ့ ဇူလိူင်လ ၈ ရက်နေ့ကစတင်ပြီး ကြို့ပင်ကောက်မြို့နယ်အတွင်း စစ်ကောင်စီစစ်ကြောင်းရဲ့ သတ်ဖြတ်ခြင်းခံရသူ ၄ ဦးအထိ ရှိလာပြီး၊ သေဆုံးသွားသူတွေကတော့ ရုံးချောင်းကျေးရွာက မသီတာမိုး၊ ကျခတ္တန်းကြီးကျေးစွာက ဦးကြည်စိုး၊ မြို့ကိုင်းကျေးရွာက ဦးစိန်ရွှေနဲ့ မနေ့ကမှ ပစ်သတ်ခံလိုက်ရတဲ့ ကိုပေါက်စတို့ဖြစ်ပါတယ်။