ဘက်ပြောင်းခိုလှုံ

မကွေး၊ မေ ၂၅၊ ၂၀၂၆။

မကွေးတိုင်း၊ ပခုက္ကူမြို့အခြေစိုက် အမှတ် ၂၅၂ ခြေလျင်တပ်ရင်းက စစ်ကော်မရှင်တပ်သား ၂ ဦး Cobra One Pakokku တပ်ဖွဲ့ဆီ ဘက်ပြောင်းခိုလှုံလာတယ်လို့ မေ ၂၄ ရက်မှာ အဲ့ဒီအဖွဲ့က သတင်းထုတ်ပြန်ပါတယ်။

စစ်မှုထမ်းအပတ်စဥ် ၂၀ ဆင်းပြီးနောက် ခလရ ၂၅၂ မှာတာဝန်ထမ်းဆောင်နေကြတဲ့ တပ်သားကျော်ဇောထွေးနဲ့ တပ်သားဝင်းသန့်နိုင်တို့ဟာ မေ ၂၁ ရက်နဲ့ ၂၃ ရက်တို့မှာ Cobra One Pakoka ဆီ ချိတ်ဆက်ဘက်ပြောင်းလာခဲ့ကြတာလို့ ဆိုပါတယ်။

“ကျော်ဇောထွေးက ထိုင်းနိုင်ငံမှာအလုပ်သွားလုပ်ရင်း အထောက်ထားမပါလို့ ထိုင်းရဲကဖမ်းပြီး ထိုင်းနိုင်ငံထောင်ချပါတယ်။ လွတ်ရက်ရောက်တော့ စကစ လက်ထဲထိုးပေးလိုက်တာပါ။ တပ်သား (ဝင်းသန့်နိုင်) က မုံရွာမြို့ပေါ်မှာအဆွဲခံရတာပါ။ “လို့ Cobra One Pakokku ရဲ့တာ၀န်ခံ ဗိုလ်မြွေဟောက်က မြေလတ်အသံကိုပြောပါတယ်။

ဘက်ပြောင်းလာချိန် လက်နက်ခဲယမ်းတွေမပါလာတဲ့အတွက် ဆုငွေချီးမြှင့်တာမျိုးမရှိပေမယ့် သွားချင်တဲ့နေရာကို ပို့ဆောင်ပေးခဲ့တယ်လို့ အထက်ပါတာ၀န်ခံကဆိုပါတယ်။

အဲ့ဒီ ခလရ ၂၅၂ တပ်ရင်းထဲမှာ အင်အားမရှိတဲ့အတွက် ဒေသခံတွေကိုပေါ်တာဆွဲ‌၊ စစ်သင်တန်းပေးပြီးနောက် ရခိုင်ပြည်နယ်အပါ ရှေ့တန်းနေရာတွေကိုပို့ဆောင်နေတယ်လို့လည်း ဘက်ပြောင်းလာသူတွေက တဆင့် သိရတယ်။

စာတည်း – လင်း

ပခုက္ကူ၊ မတ် ၁၉၊ ၂၀၂၆။

မကွေးတိုင်း၊ မြိုင်မြို့နယ်၊ တွင်းမရွာပျူစောထီးစခန်းမှာ တာဝန်ကျနေတဲ့ စစ်ကော်မရှင်တပ်ကြပ်၁ ဦးနဲ့ တပ်သား ၁ ဦး လက်နက်နဲ့အတူ ဘက်ပြောင်းလာခဲ့တယ်လို့ နဂါးနီပြည်သူ့ကာကွယ်ရေးတပ်ဖွဲ့တာဝန်ရှိသူဆီက သိရပါတယ်။

ပခုက္ကူအခြေစိုက် ခလရ ၂၅၈ တပ်ကနေ တွင်းမရွာမှာတာဝန်ကျနေတဲ့ အသက် ၂၃ အရွယ် တပ်ကြပ် ဇော်ကြီးနဲ့ အသက် ၂၀ အရွယ် တပ်သား ဇင်မင်းအောင် တို့ဟာ မတ်လ ၁၈ ရက် နေ့လယ် ၁၂ နာရီမှာ MA 1 ၁ လက်၊ MA3 ၁ လက်၊ ကျည်ဘောက် ၄ ခု၊ ကျည် ၈၀ တို့ယူပြီး ဘက်ပြောင်းလာခဲ့ကြတာလို့ ဆိုပါတယ်။

“သူတို့က မနက် ၉ နာရီလောက်ကတည်းက ကင်းတာဝန်ကျနေချိန်မှာ ထွက်ပြေးလာကြတာ။ ကျနော်တို့ချိတ်ဆက်ပြီးမှထွက်လာတော့ သွားကြိုခဲ့ရတယ်။ လက်နက်တွေလည်း ယူဆောင်လာနိုင်ခဲ့ကြသေးတယ်”လို့ နဂါးနီပြည်သူ့ကာကွယ်ရေးတပ်ဖွဲ့ ခေါင်းဆောင် ဗိုလ်မီးတောက်က ပြောပါတယ်။

ရန်ကုန်ဇာတိဖြစ်သူ တပ်သား ဇင်မင်းအောင်ဟာ ၂၀၂၅ ခုနှစ် ဇန်နဝါရီလမှာ မူးယစ်ဆေးနဲ့ပတ်သက်တယ်ဆိုကာဖမ်းဆီးခံခဲ့ရပြီးနောက် ဂျိုးဖြူစစ်သင်တန်းကျောင်းမှာ စစ်မှုထမ်းအပတ်စဥ် ၁၀ တက်ရောက်ခဲ့ပြီးနောက် ခလရ ၂၅၈ ကိုရောက်ရှိလာသူဖြစ်ပြီး တပ်ကြပ် ဇော်ကြီး ကတော့ စစ်အာဏာမသိမ်းခင်ကတည်းက စစ်တပ်ထဲရောက်ရှိနေသူဖြစ်တယ်လို့ ဆိုပါတယ်။

အဆိုပါဘက်ပြောင်းလာသူ ၂ ဦးစလုံးဟာ လက်နက်တွေယူလာနိုင်တာကြောင့် ၁ ဦးကိုကျပ်သိန်း ၂၀ ဆုငွေချီးမြှင့်သွားမယ်လို့ ဆိုပါတယ်။

၂၀၂၁ စစ်အာဏာသိမ်းပြီးနောက်ပိုင်း နဂါးနီပြည်သူ့ကာကွယ်ရေးတပ်ဖွဲ့ဆီ ဘက်ပြောင်းလာတဲ့ စစ်ကော်မရှင်တပ်ဖွဲ့ဝင် စုစုပေါင်း ၇ ဦးထိရှိခဲ့ပြီး ၄ ဦးကတော့ တပ်ဖွဲ့နဲ့အတူ စစ်ကော်မရှင်ကို ပြန်လည်တိုက်ခိုက်နေတယ်လို့ သိရပါတယ်။

စာတည်း – လင်း

ဖြူး၊ နိုဝင်ဘာ ၁၆၊ ၂၀၂၅။

ပဲခူးတိုင်း၊ ဖြူးမြို့နယ်အခြေစိုက် စစ်ရေးလှုပ်ရှားနေတဲ့ အမှတ် ၂ စစ်ဒေသ တောင်ပိုင်းတိုင်း၊ ၃၅၀၃ တပ်ရင်းဆီကို စစ်ကော်မရှင်တပ်သားတဦး ဘက်ပြောင်းလာခဲ့တယ်လို့ တပ်ရင်းတာဝန်ရှိသူတွေဆီက သိရပါတယ်။

ဘက်ပြောင်းလာသူက ဖြူး၊ ညောင်ပင်သာ အခြေစိုက် ခလရ ၅ မှ ပြည်သူစစ်မှုထမ်းအပတ်စဥ် ၉ ဆင်း၊ အသက် ၃၃ နှစ်အရွယ် တပ်သား ကိုဇာလင်းအောင် ဆိုသူဖြစ်ပြီး နိုဝင်ဘာ ၁၃ ရက်မှာ တပ်ရင်းအနီးကင်းပတ်ထွက်ရင်း ထွက်ပြေးလာခဲ့တာလို့ ဆိုပါတယ်။

“သူ့အပြောအရတော့ ကျနော်တို့နဲ့အတူလက်တွဲပြီး တော်လှန်ရေးထဲမှာပါဝင်မယ်လို့ပြောတယ်။ သူက ဒီကြားထဲမှာလည်း (စစ်ကော်မရှင်တပ်ကနေ) ထွက်ပြေးဖို့အကြိမ်ကြိမ်ကြိုးစားသေးတယ်။ သူထွက်ပြေးတဲ့အချိန် လိုက်ပစ်လို့ သူကပြန်ပစ်ခဲ့ပြီးမှရောက်လာတာဆိုတော့ အဲ့ဒါလည်းပါမယ်”လို့ အမှတ် ၂ စစ်ဒေသ တောင်ပိုင်းတိုင်း၊ ၃၅၀၃ တပ်ရင်းမှ တပ်မဟာပူးပေါင်းညှိနှိုင်းရေးကော်မတီ – BCT အဖွဲ့ဝင် ဦးသိန်းမြင့်က ပြောပါတယ်။

အဆိုပါ ဘက်ပြောင်းလာသူ စစ်ကော်မရှင်တပ်သားက MA 1 သေနတ် ၁ လက်၊ ကျည်ဘောက် ၄ ခုနဲ့ အတူကျည်အချို့ယူဆောင်လာတာကြောင့် သူ့ကို ငွေကျပ်သိန်း ၃၀ ချီးမြှင့်သွားမယ်လို့ ဆိုပါတယ်။

တပ်သား ကိုဇာလင်းအောင်ဟာ ကျောက်ဆည်ဇာတိဖြစ်ပြီး အမျိုးသမီးဖြစ်သူနေထိုင်တဲ့ ပျော်ဘွယ်မြို့နယ်မှာနေထိုင်ချိန် ၂၀၂၅ ဇန်နဝါရီလမှာ ပေါ်တာဆွဲဖမ်းဆီးတာခံရပြီး ပြည်သူစစ်မှုထမ်းအပတ်စဥ် ၉ ကို တက်ရောက်ခဲ့ရသူဖြစ်တယ်လို့ သိရပါတယ်။

သင်တန်းဆင်းပြီးချိန်မှာ ရှမ်းပြည်နယ်ရှိ တပ်ရင်း ၁ ရင်းမှာ ၁ လတာ တာဝန်ထမ်းဆောင်ပြီးနောက် ဖြူးအခြေစိုက် ခလရ ၅ တပ်ရင်းကိုရောက်ရှိလာသူပါ။

စစ်အာဏသိမ်းပြီး ၄ နှစ်ကျော်ကာလအတွင်း အမှတ် ၂ စစ်ဒေသ တောင်ပိုင်းတိုင်း၊ ၃၅၀၃ တပ်ရင်းထံ ဘက်ပြောင်းခိုလှုံလာတဲ့ စစ်ကော်မရှင်တပ်သား ၃ ဦးရှိပြီလို့ သိရပါတယ်။

ပြည်သူ့ပန်းတိုင်က ကောက်ယူထားတဲ့ မှတ်တမ်းတွေအရ ၂၀၂၅၊ ဇန်နဝါရီလကနေ အောက်တိုဘာလအထိ တော်လှန်ရေးတပ်ဖွဲ့တွေဆီကို အလင်းဝင်ဘက်ပြောင်းတာ၊ လက်နက်ချသူနဲ့ ဖမ်းမိတဲ့စစ်သုံ့ပန်း စုစုပေါင်း ၂,၂၆၄ ဦးထိ ရှိခဲ့တယ်လို့ သိရပါတယ်။

စာတည်း – လင်း

ငဖဲ၊ စက်တင်ဘာ ၁၈၊ ၂၀၂၅။

မကွေးတိုင်း၊ မင်းဘူးခရိုင်၊ ငဖဲမြို့အခြေစိုက် အမှတ် ၁၄ ကာကွယ်ရေးပစ္စည်းစက်ရုံ (ကပစ ၁၄) ကထွက်ပြေးလာတဲ့ စစ်ကော်မရှင်တပ်ဖွဲ့ဝင် ၄ ဦး မင်းဘူးခရိုင် အမှတ် ၆ တပ်ရင်းဆီကို ဘက်ပြောင်းခိုလှုံလာတယ်လို့ တပ်ရင်းတာဝန်ရှိသူတွေဆီက သိရပါတယ်။

အဆိုပါစစ်ကော်မရှင်တပ်ဖွဲ့ဝင် ၄ ဦးဟာ စက်တင်ဘာ ၄ ရက် ကပစ ၁၄ ကထွက်ပြေးလာချိန် ငဖဲမြို့နယ်အတွင်းမှာ တော်လှန်ရေးတပ်ဖွဲ့ဝင်တွေနဲ့တွေ့ပြီး ဘက်ပြောင်းလိုက်ပါလာခဲ့တာလို့ ဆိုပါတယ်။

“သူတို့အလင်းဝင်လာတဲ့အကြောင်းကတော့ သူတို့က ပေါ်တာအဆွဲခံရတာ၊ စစ်တိုက်တာ၊ သေနက်ကိုင်တာတွေ သိလည်းမသိခဲ့ဘူး၊ သူတို့ကအချိန်ပြည့်ထွက်ပြေးဖို့ ကြိုးစားနေတဲ့သူတွေပါ၊ သူတို့ရဲ့ စိတ်ထဲမပါတဲ့ အလုပ်မဟုတ်လို့ ထွက်ပြေးလာကြတာ”လို့ မင်းဘူးခရိုင်အမှတ် ၆ တပ်ရင်း တာဝန်ရှိသူက ပြောပါတယ်။

ဘက်ပြောင်းလာသူ ၄ ဦးဟာ အသက် ၂၅ နှစ်အရွယ် ချင်းပြည်နယ်က ၁ ဦး၊ စစ်ကိုင်းက ၂ ဦးနဲ့ နေပြည်တော်က ၁ ဦး တို့ဖြစ်ပြီး အခုနှစ်ဧပြီလ သက်ဆိုင်ရာမြို့နယ်တွေကနေ ပေါ်တာဆွဲဖမ်းဆီးပြီးနောက် မိတ္ထီလာဘက်ကစစ်သင်တန်းကျောင်းတခုမှာ စစ်မှုထမ်းအပတ်စဥ် ၁၄ တက်ပြီးနောက် အဲ့ဒီကနေမှ ကပစ ၁၄ ကိုပို့ဆောင်ခံခဲ့ရတာလို့ ဆိုပါတယ်။

လက်ရှိမှာတော့ ၄ ဦးစလုံးကို တပ်ရင်းကစောင့်ရှောက်ထားပြီး မိသားစုဝင်တွေနဲ့လည်း ပြန်တွေ့ဆုံချင်ကြတာကြောင့် ပြန်တွေ့နိုင်ဖို့ ပြင်ဆင်နေတယ်လို့ အထက်ပါတာဝန်ရှိသူကပြောပါတယ်။

မင်းဘူးမြို့နယ်အခြေစိုက် မင်းဘူးခရိုင်အမှတ် ၆ တပ်ရင်းဆီကို အထက်ပါ ၄ ဦးအပါအဝင် ဘက်ပြောင်းခိုလှုံလာသူ စစ်ကော်မရှင်တပ်ဖွဲ့ဝင် စုစုပေါင်း ၁၅ ဦးကျော်ရှိပြီလို့ သိရပါတယ်။

စာတည်း – လင်း

မြေလတ်အသံ၊ စက်တင်ဘာ ၁၇၊ ၂၀၂၅။

စစ်ကိုင်းတိုင်း၊ ကလေးမြို့နယ်၊ ကလေး-တီးတိန်လမ်းပိုင်းမှာ တပ်စွဲနေတဲ့စစ်ကြောင်းက စစ်ကော်မရှင်တပ်သား ၁၄ ဦး လက်နက်ခဲယမ်းတွေနဲ့အတူ ဘက်ပြောင်းခိုလှုံလာတယ်လို့ ကလေးခရိုင်ပြည်သူ့ကာကွယ်ရေးအဖွဲ့က စက်တင်ဘာ ၁၇ ရက် ဒီကနေ့မှာ ​ထုတ်ပြန်ပါတယ်။

ဘက်ပြောင်းလာသူတွေဟာ ကလေးမြို့နယ်မှာ လှုပ်ရှားနေတဲ့ Wing of Kalay ဒရုန်းတပ်ဖွဲ့ထံ ချိတ်ဆက်ကာ ဇူလိုင်လမှာ ၆ ဦး၊ ဩဂုတ်လမှာ ၈ ဦး ခိုလှုံလာတာဖြစ်ပြီး ကလေး-တီးတိန်လမ်းပိုင်းမှာ ဖြန့်ခွဲတပ်စွဲနေတဲ့ အင်အား ၃၀၀ ခန့်ရှိ စစ်ကြောင်းကနေ ထွက်ခွာလာကြတာလို့ ဆိုပါတယ်။

” သူတို့နောက်ကွယ်မိသားစုလုံခြုံရေးအရ လွတ်မြောက်ရာတွေအရွှေ့အပြောင်းလုပ်နေဆဲအချိန်တွေမို့ ဘယ်တပ်ဆိုတာမျိုးကို မထုတ်ပြန်တာပါ။ မိဘတွေနဲ့ ပြောဆိုပြောင်းရွှေ့ဖို့ သူတို့မိသားစုများကို မှာကြားနေဆဲတွေမို့ပါ။ တပ်အမည်တွေ ကျနော်တို့ဖက်က ရေးသားတင်လိုက်တာနဲ့ စကစမှနောက်ချန်မိသားစုတွေ ချက်ချင်းလိုက်ပြီး ထိန်းသိမ်းမှုတွေရှိတဲ့အတွက်ပါ” လို့ ကလေးခရိုင်ပြည်သူ့ကာကွယ်ရေးအဖွဲ့တာဝန်ရှိသူတဦးက မြေလတ်အသံကို ပြောပါတယ်။

ဘက်ပြောင်းစစ်သားတွေနဲ့အတူ MA-3 ၅ လက်၊ MA – 1 ၂ လက်၊ လက်ပစ်ဗုံး ၉ လုံး၊ အီနာဂါဗုံးသီး ၇ လုံး၊ ကျည်ဘောက် ၁၅ ဘောက်၊ ၅.၅၆ မမ ကျည် ၁,၂၀၀ တောင့်တို့ ယူဆောင်လာတာကြောင့် ၁ ဦးကို ငွေကျပ် သိန်း ၃၀ စီ ပေးအပ်ခဲ့တယ်လို့ အထက်ပါတာဝန်ရှိသူက ပြောပါတယ်။

၎င်းတို့ ၁၄ ဦးဟာ အသက် ၂၀ နဲ့ ၃၀ ကြားရှိ နေပြည်တော်၊ ဧရာဝတီ၊ မန္တလေး၊ ရန်ကုန်ဒေသတွေကနေ စစ်မှုထမ်းအဖြစ်အဓမ္မဖမ်းဆီးစုဆောင်းခံခဲ့ရသူတွေဖြစ်ပြီး ဇာတိနေရပ်ကိုပြန်ချင်သူတွေကိုတော့ သက်ဆိုင်ရာမိဘ၊ တာဝန်ရှိသူတွေနဲ့ ချိတ်ဆက်ပြီး ပို့ပေးထားပြီဖြစ်တယ်လို့ သိရပါတယ်။

ပြီးခဲ့တဲ့ မေ နဲ့ ဇွန်လတွေမှာလည်း ချင်းပြည်နယ်၊ ဖလမ်းမြို့ကိုပြန်လည်သိမ်းပိုက်နိုင်ရေးစေလွှတ်ခံရတဲ့ ဒေသကွပ်ကဲမှုစစ်ဌာနချုပ်(ဒကစ)ကလေးမှ အင်အား ၅၀၀ ကျော် စစ်ကြောင်းကနေ ထွက်ပြေးလာတဲ့ တပ်သား ၂၀ ဦးကို ကလေးမြို့ ပြပြောက်ကျားစီမံချက်အဖွဲ့က ဖမ်းဆီးထိန်းသိမ်းခဲ့တယ်လို့ သိရပါတယ်။

စာတည်း – ဟိန်းစံ

ဆားလင်းကြီး၊ သြဂုတ် ၁၁၊ ၂၀၂၅။

မကွေးတိုင်း၊ ဆားလင်းကြီးမြို့နယ်ပြည်သူ့ကာကွယ်ရေးအဖွဲ့ဆီ စစ်မှုထမ်းသင်တန်းဆင်းတပ်သား ၇ ဦး ဘက်ပြောင်းခိုလှုံလာတယ်လို့ တပ်ဖွဲ့တာဝန်ရှိသူဆီက သိရပါတယ်။

အဆိုပါစစ်ကောင်စီတပ်ဖွဲ့ဝင် ၇ ဦးဟာ MA1 သေနတ် ၂ လက်၊ ကျည် ၃၀၀၊ လက်ပစ်ဗုံး ၃ လုံး၊ နင်းမိုင်း ၂ လုံးတို့နဲ့အတူ ဘက်ပြောင်းခိုလှုံလာတယ်လို့ သိရပါတယ်။

ဘက်ပြောင်းခိုလှုံသူတွေဟာ အမှတ် ၉၂၉ ထောက်ပံ့နှင့်ပို့ဆောင်ရေးတပ်ရင်း (ထပရ ၉၂၉) (မုံရွာ)မှ ၆ ဦး၊ အမှတ် ၉၁၀ စစ်မြေပြင်အင်ဂျင်နီယာတပ်ရင်း (စအရ ၉၁၀) (မန္တလေး) မှ ၁ ဦး၊ စုစုပေါင်း ၇ ဦး ဖြစ်ပြီး အသက် ၂၀ အရွယ်ကနေ ၂၉ ကျော်အရွယ်တွေ ဖြစ်တယ်လို့ ဆိုပါတယ်။

ဘက်ပြောင်းခိုလှုံလာသူတွေထဲက အပတ်စဥ် ၈ သင်တန်းဆင်းတပ်သားတဦးကတော့ “ဂျိုးဖြူသင်တန်းကျောင်းမှာ သင်တန်း ၂ လခွဲတက်ခဲ့ပြီး အဲဒီ၂ လခွဲကနေ သင်တန်းကိုပြောင်းခဲ့ပြီး သင်တန်းမှာ (Fatigue)ဖက်ထိပ်လုပ်ဖို့အတွက် ၃ လ သူတို့ခိုင်းတာတွေပဲလုပ်နေရတယ်။ အဲ့ဒါပြီးတော့ စစ်ဆင်ရေးဆိုပြီး ဘာမသိညာမသိနဲ့ ကျနော်တို့ကိုလွှတ်တယ်”လို့ သူကြုံခဲ့ရတဲ့အခြေအနေတွေကို ပြောပြပါတယ်။

ဘက်ပြောင်းလာသူ ၇ ဦးဟာ ရန်ကုန်တိုင်းနဲ့ မကွေးတိုင်းတွေကနေ ဖမ်းဆီးခံခဲ့ရသူတွေဖြစ်ပြီး သူတို့ကို ဩဂုတ် ၁၀ ရက် မနေ့က အခမ်းအနားကျင်းပကာ မြို့နယ်ပြည်သူ့အုပ်ချုပ်ရေးအဖွဲ့က လက်နက်ပါသူ ၁ ဦးကို ကျပ်သိန်း ၅၀ ကျပ်၊ လက်နက်မပါသူ ၁ ဦးကို ၅သိန်းကျပ် ပေးအပ်ခဲ့တယ်လို့လည်း သိရပါတယ်။

စာတည်း – မြတ်

အောင်စိုး၊ ဟယ်သာ

ပခုက္ကူ၊ ဇူလိုင် ၁၇၊ ၂၀၂၅။

မကွေးတိုင်း၊ ပခုက္ကူအခြေစိုက် ခလရ ၂၅၂ နဲ့ ပဲခူးတိုင်း၊ ပေါက်ခေါင်းမြို့နယ်အခြေစိုက် ခလရ ၅၃ က စစ်ကောင်စီတပ်ဖွဲ့ဝင် ၃ ဦးဘက်ပြောင်းခိုလှုံလာတယ်လို့ ဒေသခံကာကွယ်ရေးတပ်ဖွဲ့ဝင်တွေဆီက သိရပါတယ်။

ပခုက္ကူအခြေစိုက် ခလရ ၂၅၂ က စစ်ကောင်စီတပ်ဖွဲ့ဝင် ၁ ဦးဘက်ပြောင်းခိုလှုံလာတယ်လို့ ဆိပ်ဖြူတစ်ကိုယ်တော်ကျားဇိုးအဖွဲ့ဆီက သိရပါတယ်။

အသက် ၂၉ နှစ်အရွယ်စစ်ကောင်စီတပ်ဖွဲ့ဝင် ကိုမျိုးဇင်ဟာ ဇူလိုင် ၁၄ ရက်က ကာကွယ်ရေးတပ်ဖွဲ့ဝင်တွေကိုချိတ်ဆက်ပြီး ဘက်ပြောင်းခိုလှုံလာခဲ့တာလို့ ဆိုပါတယ်။

“စစ်ကိုင်းတံတားပေါ်မှာ ခရီးသွားရင်းအဆွဲခံရတာလို့ပြောတယ်။ စစ်ကိုင်းတံတားကို ဟိုဘက် ဒီဘက်ညှပ်ပြီး ပေါ်တာဆွဲခံလိုက်ရတာလို့ပြောတယ်၊ လွတ်မြောက်တဲ့ဆီ သူရောက်တဲ့နေရာကို မဟာမိတ်နဲ့သွားပြီး ခေါ်ဆောင်ရတာပေါ့။ လက်နက်တော့ပါမလာခဲ့ဘူး၊” လို့ ဆိပ်ဖြူတစ်ကိုယ်တော် ကျားဇိုးအဖွဲ့ရဲ့ တာဝန်ရှိသူတဦးကပြောပါတယ်။

စစ်ကိုင်းမြို့သားကိုမျိုးဇင်ဟာ အခုနှစ်ဖေဖော်ဝါရီလက ခရီးသွားစဥ် စစ်ကိုင်းတံတားပေါ်မှာ စစ်ကောင်စီတပ်ဖွဲ့ဝင်တွေရဲ့ဖမ်းဆီးတာကိုခံရပြီးနောက် မတ် ၁၇ ရက်ကစပြီး ခလရ ၂၅၂ မှာစစ်သင်တန်းတက်ရောက်ခဲ့ရာက စစ်ကောင်စီတပ်ဖွဲ့ဝင်ဖြစ်လာတာလို့ ဆိုပါတယ်။

လက်ရှိမှာ သူ့ကိုလုံခြုံတဲ့နေရာကို ပို့ဆောင်ပေးထားတယ်လို့ အထက်ပါတာဝန်ရှိသူက ပြောပါတယ်။

ဒါ့အပြင် ပဲခူးတိုင်း၊ ပေါက်ခေါင်းမြို့နယ်အခြေစိုက် ခလရ ၅၃ က စစ်ကောင်စီသား ၂ ဦးလည်း လက်နက်တွေနဲ့ ဘက်ပြောင်းလာခဲ့တယ်လို့ ၃၆၀၁ တပ်ရင်းမှ စစ်ထောက်လှမ်းရေးနဲ့ သတင်းပြန်ကြားရေးတာဝန်ခံ ရဲဘော် Shadow ကပြောပါတယ်။

ဘက်ပြောင်းလာသူတွေဟာ အသက် ၄၀ ကျော်အရွယ် စစ်မှုထမ်းသက်တမ်း ၁၉ နှစ်ရှိသူ ၁ ဦးနဲ့ စစ်မှုထမ်းသက် ၆ လကျော်ရှိသူ ၁ ဦးတို့ဖြစ်ပြီး ၎င်းတို့ဟာ ဇူလိုင် ၉ ရက်မှာ တပ်ထဲကနေ ထွက်ပြေးလာခဲ့တာလို့ ဆိုပါတယ်။

“သူတို့နှစ်ဦးက ကြိုတင်ပြီးချိတ်ဆက်ထားတာမရှိဘူး။ သူတို့က ကျနော်တို့ရိုးပေါ်ကို ကျနော်တို့ ပြည်သူ့ကာကွယ်ရေးဆီမှာ အလင်းဝင်မယ်ဆိုပြီး ရည်ရွယ်ချက်နဲ့ထွက်ပြေးလာတာပါ။ ကျနော်တို့ တပ်ရင်းနဲ့တွေ့တာပါ”လို့ ၃၆၀၁ တပ်ရင်းမှ စစ်ထောက်လှမ်းရေးနဲ့ သတင်းပြန်ကြားရေးတာဝန်ခံ ရဲဘော် Shadow ကပြောပါတယ်။

အဆိုပါတပ်သား ၂ ဦးမှာ MA4-၁လက်၊ MA3-၁ လက်၊ 5.56 ကျည်-၃၈၄တောင့်၊ 40mm ဗုံးသီး-၁၆လုံး၊ လက်ပစ်ဗုံး ၁ လုံး၊ ကျည်ဘောက် ၈ ဘောက်တို့ပါခဲ့တာကြောင့် စုစုပေါင်း ငွေကျပ်သိန်း ၈၀ ချီးမြှင့်လိုက်တယ်လို့ ဆိုပါတယ်။

ဒါ့အပြင် သူတို့ ၂ ဦးကိုကျန်းမာရေးစောင့်ရှောက်မှုအပြည့်အဝပေးကာ ကောင်းမွန်စွာစောင့်ရှောက်ပေးထားပြီး ၎င်းတို့ ၂ ဦးအပါအဝင် တပ်ရင်း ၃၆၀၁ ကိုဘက်ပြောင်းလာခဲ့သူ စုစုပေါင်း ၁၀ ဦးရှိနေပြီလို့လည်း သူကဆက်ပြောပါတယ်။

၂၀၂၅ ခုနှစ် ဇန်နဝါရီလမှ ဇူလိုင်လ ပထမပတ်အထိ မြန်မာနိုင်ငံတဝန်းမှာ ဘက်ပြောင်းခိုလှုံ၊ လက်နက်ချ၊ စစ်သုံ့ပန်း စုစုပေါင်း ၁,၆၀၁ ဦးထိရှိခဲ့တယ်လို့ ဇူလိုင် ၁၆ မှာ ပြည်သူ့ပန်းတိုင်အဖွဲ့ရဲ့ ထုတ်ပြန်ချက်အရ သိရပါတယ်။

စာတည်း – လင်း

ငဖဲ၊ ဇူလိုင် ၁၄၊ ၂၀၂၅။

မကွေးတိုင်း၊ ငဖဲမြို့နယ်၊ နတ်ရေကန် ကာကင်းစခန်းကုန်းက စစ်ကောင်စီတပ်သား ၁ ဦး လက်နက်၊ ခဲယမ်းတွေနဲ့ ဘက်ပြောင်းခိုလှုံလာတယ်လို့ အမှတ် ၁ စစ်ဒေသ ပြည်သူ့ကာကွယ်ရေး တပ်မတော် သရက်ခရိုင် အမှတ် ၄ တပ်ရင်း သတင်းနဲ့ ပြန်ကြားရေးတာဝန်ခံ ကိုမြတ်က ပြောပါတယ်။

ဘက်ပြောင်းခိုလှုံလာသူဟာ အသက် ၂၄ နှစ်အရွယ်တပ်သားကိုမောင်ဖြစ်ပြီး ဇူလိုင်ဒုတိယပတ်အတွင်း နတ်ရေကန်ကာကင်းစခန်းရောက်ရှိလာကာ ကင်းကျနေစဥ် ဇူလိုင် ၁၃ ရက်မှာ ကာကွယ်ရေး တပ်ဖွဲ့တွေဆီထွက်ပြေးခိုလှုံလာတာလို့ဆိုပါတယ်။

“သူကတော့ မတရားစစ်မှုထမ်းဖို့အတွက်ပေါ်တာဆွဲခံရတာ၊ အဲ့အတွက်ကို ဒါ သူအခွင့်အရေးရတဲ့အခါ ပြန်ပြီးတော့လူထုဘက်ကိုကူးပြောင်းလာတာပေါ့။ လက်ရှိ သူကတော့ကျနော်တို့အဖွဲ့ထဲမှာ ရှိနေပြီးတော့ စစ်ကောင်စီကို သူနိုင်တဲ့အားနဲ့ ဆက်လက်တွန်းလှန်မယ် တော်လှန်မယ်ပေါ့” လို့ သတင်းနဲ့ပြန်ကြားရေးတာဝန်ခံ ကိုမြတ်ကပြောပါတယ်။

သရက်မြို့နယ်ဇာတိဖြစ်သူကိုမောင်ဟာ အခုအနှစ်မေလက သရက်မြို့မှာသွားလာနေရင်း စစ်ကောင်စီတပ်တွေရဲ့ ပေါ်တာဆွဲဖမ်းဆီးခံရပြီးနောက် ရှမ်းပြည်နယ်တောင်ပိုင်း၊ ကျိုင်းတောင်းမြို့အခြေစိုက် အမှတ် ၃ တပ်မတော်တန်းမြင့်လေ့ကျင့်ရေးကျောင်းမှာ စစ်မှုထမ်းသင်တန်း ၂ လခွဲတက်ရောက်ခဲ့ပြီး နတ်ရေကန် ကာကင်းစခန်းကိုရောက်ရှိလာတာလို့ ဆိုပါတယ်။

သူနဲ့အတူ MA1 ၁ လက်၊ MA ကျည်ဘောက် ၃ ခု၊ 5.56 ကျည် ၁၀၀ တောင့်၊ အီကွေ့မန့် ၁ ခု ပါဝင်လာတာကြောင့် ကျပ်သိန်း ၃၀ ချီးမြှင့်ထားတယ်လို့ ကိုမြတ်ကဆက်ပြောပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ ဇူလိုင်အထိ သရက်ခရိုင် အမှတ် ၄ တပ်ရင်းဆီကို ဘက်ပြောင်းခိုလှုံလာသူ စုစုပေါင်း ၃ ဦးရှိပြီလို့ သိရပါတယ်။

စာတည်း – လင်း

မြေလတ်အသံ၊ ဇူလိုင် ၁၃၊ ၂၀၂၅။

နေပြည်တော်၊ ဇေယျာသီိရိမြို့နယ်အခြေစိုက် အမှတ် ၂ အဆင့်မြင့်ဆက်သွယ်မှုတပ်ရင်း (အဆရ ၂) က စစ်ကောင်စီတပ်ဖွဲ့ဝင် ၁ ဦး ဘက်ပြောင်းခိုလှုံလာခဲ့တယ်လို့ ဝက်လက်မြို့နယ်ပကဖထံက သိရပါတယ်။

ခိုလှုံလာသူမှာ အဆရ ၂ မှ အသက် ၂၄ နှစ်အရွယ် တပ်သား မိုးကောင်း ဖြစ်ပြီး သူဟာ ဇွန် ၃၀ ရက်မှာ ဝက်လက်ပကဖထံချိတ်ဆက်ကာ နေပြည်တော်တပ်ကနေ စွန့်ခွာထွက်ပြေးလာခဲ့ပြီးနောက် ဇူလိုင် ၁ ရက်မှာ ရောက်ရှိလာခဲ့တာလို့ ဆိုပါတယ်။

” သူ့မိသားစုတွေက ဝက်လက်မြို့နယ်မှာ နေထိုင်ပါတယ်။ သူ့မိသားစုကနေတဆင့် ကျနော်တို့ ဝက်လက်မြို့နယ်ပကဖကို ချိတ်ဆက်ပြီးတော့ သူအလင်းဝင်မယ်ဆိုတဲ့အကြောင်းကို ချိတ်ဆက်ပြီးတော့ လုပ်ဆောင်တာပါ” လို့ ဝက်လက်မြို့နယ်ပကဖသတင်းတာဝန်ခံ အလင်းရောင်က မြေလတ်အသံကို ပြောပါတယ်။

တပ်သား မိုးကောင်း ဟာ ဝက်လက်မြို့နယ်ဇာတိဖြစ်ပြီး ပြီးခဲ့တဲ့ ၂၀၁၉ မှာ ဝက်လက်ကနေ လားရှိုးမြို့ကိုသွားရောက် အလုပ်လုပ်ကိုင်နေချိန် သူနေထိုင်တဲ့ မန်ဆူဘုန်းကြီးကျောင်းမှာ စစ်ကောင်စီတပ်သားတွေရဲ့ ခေါ်ဆောင်သွားမှုခံရပြီးနောက် စစ်ကောင်စီတပ်အတွင်းရောက်ရှိသွားခဲ့ကာ ၂၀၂၀ မှာ သပိတ်ကျင်းစု ဆောင်းရေးတပ်ကတဆင့် စစ်သင်တန်းကျောင်းကို ပို့ဆောင်ခံခဲ့ရတာဖြစ်တယ်လို့ ၎င်းရဲ့ပြောဆိုမှုတွေကိုကိုးကားပြီး အထက်ပါသတင်းတာဝန်ခံက ပြောပါတယ်။

လက်ရှိမှာ တပ်သား မိုးကောင်းကို စစ်ဆေးမှုတွေဆက်လက်လုပ်ဆောင်နေပြီး မိသားစုနဲ့အတူ လူအခွင့်အရေးနဲ့အညီ ဘေးကင်းလုံခြုံစွာထားရှိထားတယ်လို့ ကိုအလင်းရောင်က ဆိုပါတယ်။

၂၀၂၄ ဒီဇင်ဘာ ၁၂ ရက်ကလည်း ကချင်ပြည်နယ်၊ ကာမိုင်းမြို့မှာ တိုက်ခိုက်ရေးဝင်ရောက်နေတဲ့ စစ်ကိုင်းအခြေစိုက် တပ်မ ၃၃ လက်အောက် နည်းဗျူဟာ ၃၃၂ က ရဲမာန်အောင်စစ်ဆင်ရေးမှာ တာဝန်ထမ်းဆောင်ခဲ့တဲ့ အသက် ၃၀ အရွယ် စစ်ကောင်စီတပ်သားတဦး ဘက်ပြောင်းခိုလှုံလာခဲ့တယ်လို့ သိရပါတယ်။

စာတည်း – ဟိန်းစံ