မြေလတ်အသံ

စလင်း၊ ဧပြီ ၂၄၊ ၂၀၂၆။

မကွေးတိုင်း၊ စလင်းမြို့နယ်၊ စိဇွဲကျေးရွာအနီးမှာ မန်ကျည်းရွက်သွားခူးတဲ့ အမျိုးသမီး ၁ ဦးမိုင်းထိပြီး ခြေထောက်ပြတ်သွားတယ်လို့ ဒေသခံတွေဆီက သိရပါတယ်။

မိုင်းထိသူဟာ အသက် ၅၀ ကျော်အရွယ်ရှိသူ ဒေါ်မြင့်မြင့်ဝေ ဆိုသူဖြစ်ပြီး ဧပြီ ၂၂ ရက်မနက် ၁၀ နာရီခန့်မှာ ကျေးရွာအနောက်ဘက်ခြမ်းကိုသွားချိန် မိုင်းနင်းမိခဲ့တာလို့ဆိုပါတယ်။

“သူက မန်ကျည်းရွက်ခူးဖို့ ရွာအနောက်ဘက်ကိုသွားရင်းထိတာလို့တော့ သိရတယ်။ ဘယ်ဘက် ခြေကျင်းဝတ်အောက်ဘက်ကတော့ တော်တော်ဒဏ်ရာများတယ်”လို့ ကူညီဆောင်ရွက်ပေးခဲ့သူတဦးက ပြောပါတယ်။

လက်ရှိမှာ ဆင်ဖြူကျွန်းဆေးရုံကို ပို့ဆောင်ပေးခဲ့ရပြီး ဘယ်ခြေကျင်းဝတ်အောက်ပိုင်း ဒဏ်ရာပြင်းထန်လို့ ဖြတ်လိုက်ထားရကာ ဧပြီ ၂၄ ရက် ဒီမနက်ပိုင်းအထိ ဆေးကုသမှုဆက်လက်ခံယူနေရတယ်လို့ ဆိုပါတယ်။

စလင်းမြို့နယ်အတွင်းမှာ စစ်ကော်မရှင်တပ်တွေနဲ့ဒေသကာကွယ်ရေးတပ်တွေအကြား မကြာခဏ တိုက်ပွဲဖြစ်ပြီး နှစ်ဖက်စလုံးက မိုင်းတွေလည်းထောင်ကြတာကြောင့် အခုနင်းမိတဲ့မိုင်းဟာ ဘယ်အဖွဲ့အစည်းဘက်ကထောင်တဲ့မိုင်းလဲဆိုတာ မသိရဘူးလို့ အထက်ပါ ကူညီဆောင်ရွက်ပေးခဲ့သူကပြောပါတယ်။

ပြီးခဲ့တဲ့ ဖေဖော်ဝါရီ ၂၆ ရက်ကလည်း စလင်းမြို့နယ်၊ မြောင်းဘောင်ကျေးရွာအနီး တောစပ်မှာ ပျားဖွတ်သွားတဲ့ လင်မယား ၂ ဦး မိုင်းထိပြီး ဒဏ်ရာရခဲ့သေးတယ်လို့သိရပါတယ်။

စာတည်း – လင်း

ဝက်လက်၊ ဧပြီ ၂၃၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်က မုဆိုးခြုံရွာစာသင်ကျောင်းကို စစ်ကော်မရှင်တပ်က လေကြောင်းတိုက်ခိုက်မှု ပြုလုပ်ခဲ့တာကြောင့် အမျိုးသမီး ၁ ဦး သေဆုံးပြီး ကျောင်းဆရာမတွေနဲ့ ကျောင်းသား၊ ကျောင်းသူတွေ ထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဧပြီ ၂၃ ရက် ဒီကနေ့မနက်ပိုင်းမှာ ရွှေဘိုမြို့အခြေစိုက် ခလရ ၄၂ တပ်ရင်းကနေ ၈ မိုင်ခန့်အကွာမှာရှိတဲ့ မုဆိုးခြုံရွာကို အသေခံဒရုန်း ၃ စီးနဲ့တိုက်ခိုက်ခဲ့ရာ စာသင်ကျောင်ဆောင်ပေါ် နဲ့ ကျောင်းနံဘေးတွေကို ကျရောက်ပေါက်ကွဲခဲ့တယ်လို့ ဆိုပါတယ်။

ဒရုန်းဗုံးတွေ ကျရောက်ပေါက်ကွဲတာကြောင့် ကျောင်းဝန်းနံဘေးရေမြောင်းအတွင်း ရေချိုးနေတဲ့ အသက် ၃၀ အရွယ် မခိုင်မာစိုး ဆိုသူ အမျိုးသမီး ၁ ဦး ဒရုန်းဗုံးစထိမှန်သေဆုံးခဲ့တယ်လို့ သိရပါတယ်။

ဒါ့အပြင်ဒရုန်းဗုံးတွေဟာ စာသင်ကျောင်း Grade – 8 စာသင်ခန်းပေါ် ကျရောက်ပေါက်ကွဲတာကြောင့် စာသင်ခန်းအတွင်းရှိနေတဲ့ ကျောင်းဆရာမ ၁ ဦးနဲ့ ကျောင်းသား ၃ ဦး၊ ကျောင်းသူ ၇ ဦး စုစုပေါင်း ၁၁ ဦး ထိခိုက်ဒဏ်ရာတွေရရှိခဲ့ကာ အဲ့ဒီထဲက ဆရာမဖြစ်သူမှာ ဒဏ်ရာပြင်းထန်တယ်လို့ ဝက်လက်ဒေသခံတဦးက မြေလတ်အသံကို ပြောပါတယ်။

” ဆရာမက နောက်ကျောကို ထိတာ၊ အသက်အန္တရာယ်စိုးရိမ်ရတယ်၊ ကျောင်းသား ၁ ယောက်လည်း ဒဏ်ရာ ပြင်းထန်တယ်” လို့ ပြောပါတယ်။

ဒရုန်းဗုံးကျရောက်ပေါက်ကွဲမှုကြောင့် စာသင်ဆောင် ၁ ခု ပျက်စီးခဲ့ပြီး ထိခိုက်ဒဏ်ရာရသူတွေကို ဆေးကုသမှုပေးနေတယ်လို့ ဆိုပါတယ်။

ဧပြီ ၃ ရက် ညပိုင်းကလည်း ဝက်လက်မြို့နယ်၊ ဘုရားပျံရွာကို စစ်တပ်က လေကြောင်းတိုက်ခိုက်ခဲ့တာကြောင့် ကလေးငယ် ၁ဦးနဲ့ အမျိုးသမီး ၁ဦး ဒဏ်ရာရခဲ့ပါသေးတယ်။

မြေလတ်အသံ၊ ဧပြီ ၂၃၊ ၂၀၂၆။

အရှေ့အလယ်ပိုင်းဒေသစစ်ပွဲကြောင့် လောင်စာဆီနဲ့ ထောက်ပံ့ရေးကွင်းဆက်ပြတ်တောက်မှုတွေက အိန္ဒိယရှိစက်ရုံအများအပြားကို ထိခိုက်စေခဲ့ပေမယ့် အိန္ဒိယချည်မျှင်ထုတ်လုပ်ရေးလုပ်ငန်းတွေကတော့ တရုတ်နိုင်ငံရဲ့ မှာယူမှု အဆမတန်မြင့်တက်လာကြောင့် အကျိုးအမြတ်ရရှိနေတယ်လို့ ရိုက်တာသတင်းဌာနက ဖော်ပြပါတယ်။

တရုတ်နိုင်ငံဟာ ကမ္ဘာ့ဂွမ်းထုတ်လုပ်မှုအများဆုံး အဆင့် ၁ နိုင်ငံဖြစ်ပေမယ့် ၎င်းတို့ရဲ့ ဝယ်လိုအားကို ဖြည့်တင်းနိုင်ရေးအတွက် ဂွမ်းအကြမ်းထည် ၁၅ ရာခိုင်နှုန်းနဲ့ ချည်မျှင် ၂၀ ရာခိုင်နှုန်းခန့်ကို ပြည်ပတင်သွင်းမှုကနေ မှီခိုနေရတာလည်း ဖြစ်ပါတယ်။

အရှေ့အလယ်ပိုင်းစစ်ပွဲကြောင့် ကုန်သွယ်ရေးလမ်းကြောင်းတွေခက်ခဲလာလို့ ယခင်ဝယ်ယူနေကျ အမေရိကန်နဲ့ဘရာဇီးနိုင်ငံတို့ကနေ တင်ပို့မှုကြန့်ကြာနေခြင်းက အိန္ဒိယနိုင်ငံက ချည်မျှင်တွေကို ပိုမိုဝယ်ယူဖို့ဖြစ်လာပြီး ကမ္ဘာ့ဂွမ်းထုတ်လုပ်မှုဒုတိယအများဆုံး အိန္ဒိယနိုင်ငံအနေနဲ့ လက်ရှိမှာ တရုတ်နိုင်ငံအတွက် အဓိကအားထားရာ ဖြစ်လာပါတယ်။

ဒါ့အပြင် အိန္ဒိယရူပီးငွေဟာ တရုတ်ယွမ်ငွေနဲ့နှိုင်းယှဉ်ပါက ယခုနှစ်အတွင်း ၇ ရာခိုင်နှုန်းခန့် တန်ဖိုးကျဆင်းသွားတာကလည်း တရုတ်ဝယ်ယူသူတွေအတွက် ဈေးနှုန်းသက်သာတဲ့အားသာချက်တစ်ခု ဖြစ်လာပါတယ်။

အခြား ကုန်ထုတ်လုပ်မှုကဏ္ဍတွေမှာ လုပ်ငန်းသုံးဓာတ်ငွေ့နဲ့ ကုန်ကြမ်းဈေးနှုန်းမြင့်တက်မှုဒဏ်ကို ခံနေရပေမယ့် ချည်မျှင်စက်ရုံတွေအနေနဲ့ လျှပ်စစ်နဲ့ နေရောင်ခြည်စွမ်းအင်ကို အဓိကသုံးစွဲရတာကြောင့် လောင်စာဆီပြတ်တောက်မှုဒဏ်ကနေ ကင်းလွတ်နေတာပါ။

ဂူဂျာရတ်ကုန်သည်ကြီးများအသင်းရဲ့ အဆိုအရ နိုဝင်ဘာလကစပြီး အိန္ဒိယကနေတရုတ်ကို ၁ လလျှင် ချည်မျှင်တန်ချိန် ၃၀,၀၀၀ ခန့် တင်ပို့နေရပြီး အဆိုပါပမာဏဟာ ယခင်ကထက် ၅ ဆခန့် မြင့်တက်လာတာဖြစ်တယ်လို့ ဆိုပါတယ်။

အထူးသဖြင့် ဆိပ်ကမ်းနဲ့ ဂွမ်းစိုက်ပျိုးရာဒေသအနီးမှာရှိတဲ့ အိန္ဒိယအနောက်ပိုင်း ဂူဂျာရတ်ပြည်နယ်ရှိ စက်ရုံတွေဟာ သယ်ယူပို့ဆောင်ရေးစရိတ်သက်သာတာကြောင့် အကျိုးအမြတ် အများဆုံးရရှိနေတာဖြစ်ပြီး အိန္ဒိယတောင်ပိုင်း တမီးလ်နာဒူးပြည်နယ်ရှိ ထောင်ပေါင်းများစွာသော ချည်မျှင်စက်ရုံတွေကတော့ ဂွမ်းအကြမ်းထည်ကို နိုင်ငံအနောက်ပိုင်းနဲ့အလယ်ပိုင်းက ဝယ်ယူရတာကြောင့် သယ်ယူပို့ဆောင်ရေးစရိတ် ပိုမိုမြင့်မားလာမှုကို ရင်ဆိုင်နေရတာလည်း ဖြစ်ပါတယ်။

Ref – Reuters.

လက်ပံတန်း၊ ဧပြီ ၂၃၊ ၂၀၂၆။

ပဲခူးတိုင်း၊ လက်ပံတန်းမြို့နယ်၊ သဲကောဆည်အနီး ဆားချောင်းရွာတဝိုက်ကို စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့တာကြောင့် လူငယ်အမျိုးသား ၄ ဦးသေဆုံးခဲ့တယ်လို့ လက်ပံတန်းမြို့နယ် ပြည်သူ့ကာကွယ်ရေးအဖွဲ့တာဝန်ရှိသူတွေဆီက သိရပါတယ်။

ဧပြီ ၂၂ ရက်မနက် ၁၀ နာရီခန့်မှာ ဆည်ဘောင်ပေါ်နဲ့ ဆားချောင်းရွာအနီးတဝိုက်ကို ဂျက်ဖိုက်တာနဲ့ ဗုံး ၁၀ လုံးကြဲချခဲ့တယ်လို့ ဆိုပါတယ်။

“အဲဒီမှာက ပြည်သူတွေက ငါးဖားရှာနေတာရှိတယ်။ ဝါးခုတ်တဲ့ပြည်သူတွေရှိတယ်။ ကျနော်တို့ဘက်က လေကြောင်းအန္တရာယ်ရှိလို့ ဗုံးခိုကျင်းတူးပြီးနေကြဖို့ သတိပေးထားတာရှိတယ်။ ဗုံးခိုကျင်းတူးထားတဲ့ ပြည်သူတွေက လေကြောင်းလာတော့ လွတ်ကြတယ်။ မတူးထားတဲ့သူတွေက ထိကြတာ။ ဗုံးက သူတို့ပေါ်ထိတာ မဟုတ်ဘူး။ (ဗုံး)ကျတော့ အစတွေလာမှန်တာ။ ဗုံးက အလုံးရေများတော့ မလွတ်တော့တာ”လို့ လက်ပံတန်းမြို့နယ်ပကဖတာဝန်ရှိသူက ပြောပါတယ်။

ဗုံးစထိမှန်လို့ အသက် ၁၅ နှစ်ကနေ ၂၀ကြား အမျိုးသား ၄ ဦးသေဆုံးပြီး အသက် ၄ နှစ်အရွယ် မိန်းကလေးငယ်အပါအဝင် အသက် ၂၀ ကနေ ၄၀ ကြားအမျိုးသား ၄ ဦးဒဏ်ရာရခဲ့တယ်လို့ ဆိုပါတယ်။

ဒါ့အပြင် လူနေအိမ် ၄ လုံးနဲ့ တဲတိုက် ၅ လုံးထက်မနည်းပျက်စီးခဲ့ပြီး ဗုံးကြဲခံရပြီးနောက် တဲတိုက်တွေမှာနေထိုင်တဲ့ ဒေသခံ ၁၀၀ ဝန်းကျင် ဘေးလွတ်ရာကို တိမ်းရှောင်နေကြရတယ်လို့ ဆိုပါတယ်။

ဧပြီ ၉ ရက်ကလည်း နတ်တလင်းမြို့နယ်ထဲက ကျောက်ခွက်၊ ကျွန်းလေးပင်၊ မကျီးပင်ကျေးရွာတွေကို စစ်ကော်မရှင်ဘက်က လေကြောင်းကနေ ဗုံးကြဲခံရလို့ ပြည်သူ ၁ ဦးသေ ၃ ဦးဒဏ်ရာရခဲ့ပြီး နေအိမ် ၄၀ နီးပါး မီးလောင်ခဲ့တယ်လို့ သိရပါတယ်။

စာတည်း – လင်း

ရွှေဘို၊ ဧပြီ ၂၂၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်၊ ဆောင်နန်းကျေးရွာအနီး လေကြောင်းကနေဗုံးကြဲခဲ့တာကြောင့် အမျိုးသမီး ၁ ဦးသေဆုံးပြီး ၃ ဦးဒဏ်ရာရတယ်လို့ ကျေးရွာနဲ့နီးစပ်သူတွေဆီက သိရပါတယ်။

ဧပြီ ၂၁ ရက်ည ၁၁ နာရီ ၄၅ မိနစ်မှာ ဂျက်ဖိုက်တာ ၂ စီးကကျေးရွာအနီးတောစပ်ကို ဗုံး ၃ လုံးကြဲချခဲ့တယ်လို့ ဆိုပါတယ်။

“ရွာသူရွာသားတွေ ဆိတ်မွေး၊ နွားမွေးလုပ်နေတဲ့တောတိုက်ကိုမှ ဘယ်သူကဘယ်လိုသတင်းပေးလို့ ကြဲမှန်းမသိဘူး။ တဲပေါ်မီးလောင်ဗုံးကျလို့ မိန်းမက မီးဖုတ်ပြီးသားဖြစ်သွားတယ်။ တလုံးက ဆိတ်ခြံထဲကျတယ်”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးကြဲခံရတာကြောင့် အသက် ၄၅ နှစ်အရွယ် ဒေါ်မဲစိန်ဆိုသူ နေရာတင်သေဆုံးပြီး မိသားစုဝင်တွေဖြစ်တဲ့ အသက် ၂၀ ကနေ ၄၀ ကြား အမျိုးသား ၃ ဦး ဒဏ်ရာရခဲ့တယ်လို့ဆိုပါတယ်။

ဒါ့အပြင် တဲ ၁ လုံးမီးလောင်ပျက်စီးပြီး ဆိတ် ၁၄ ကောင်နဲ့နွား ၃ ကောင်လည်းသေဆုံးသွားတယ်လို့ သိရပါတယ်။

ဧပြီ ၆ ရက်ကလည်း ရွှေဘိုမြို့နယ်၊ ဆင်အင်းကျေးရွာအနီးတောစပ်ကို ဗုံးကြဲခဲ့တာကြောင့် သံဃာ ၁ ပါးအပါအဝင် ၂ ဦးသေဆုံးကာ ၉ ဦးဒဏ်ရာရတယ်လို့ သိရပါတယ်။

စာတည်း – လင်း

တန့်ဆည်၊ ဧပြီ ၂၂၊ ၂၀၂၆။

စစ်ကိုင်းတိုင်း၊ တန့်ဆည်မြို့နယ်၊ ကံထူးမရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံအနည်းဆုံး ၁၀ ဦးဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဧပြီ ၂၁ ရက် နေ့လယ် ၁၂ နာရီ ၁၅ မိနစ်မှာ ၁ ကြိမ်၊ နေ့လယ် ၁၂ နာရီ မိနစ် ၂၀ ခန့်မှာ ၁ ကြိမ်၊ ၁၂ နာရီ ၂၅ မိနစ်ခန့်မှာ ၁ ကြိမ် ရွာထဲနဲ့ ရွာအနီးတဝိုက်ကို ဂျက်ဖိုက်တာနဲ့ ဗုံး ၉ လုံးကြဲချခဲ့တာလို့ ဆိုပါတယ်။

“ရွာထဲကျတယ်။ ရွာပြင်တွေကျတယ်။ ရွာထဲကျတဲ့ဟာမှာ ဆိုင် ၃ ဆိုင်ကတော့ ဘာမှကိုမရတော့တာ။ စက်ပစ္စည်းဆိုင်၊ ဆိုင်ကယ်၊ကားဆိုင်ရယ်၊ အဲလိုဆိုင်မျိုးတွေပျက်စီးတယ်။ ထိတဲ့သူတွေက ကံထူးမ ရွာထဲကတွေပါ”လို့ ဒေသခံတဦးက ပြောပါတယ်။

ဗုံးထိမှန်တာကြောင့် အသက် ၂၀ ကနေ ၅၀ ကြား အမျိုးသား ၁၀ ဦးကျော်ထိခိုက်ဒဏ်ရာရပြီး စိုးရိမ်ရသူ အချို့လည်းရှိပြီး အိမ်နဲ့ ဆိုင်တွဲလျက် ၃ ဆိုင်မီးလောင်ပျက်စီးတာကြောင့်ကျပ်သိန်းပေါင်း ၂၀,၀၀၀ ထက်မနည်း ပျက်စီးဆုံးရှုံးမှုရှိနိုင်တယ်လို့ သိရပါတယ်။

တော်လှန်ရေးအဖွဲ့တွေကလည်း လေကြောင်းအန္တရယ် သတိပေးမှုတွေရှိတာကြောင့် ဒေသခံတွေအနေနဲ့သတိထားနေထိုင်နေရတယ်လို့ ဆိုပါတယ်။

ပြီးခဲ့တဲ့ စက်တင်ဘာ ၂၆ ရက် နေ့လယ် ၁၁ နာရီခွဲမှာလည်း ကံထူးမရွာကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် အသက် ၂၀ ဝန်းကျင်လူငယ်တွေအပါအဝင် ၈ ဦးသေဆုံးပြီး ၁၂ ဦးထိခိုက် ဒဏ်ရာရခဲ့ပါသေးတယ်။

စာတည်း – လင်း

■ တပ်ချုပ်အသစ်က စစ်တိုင်းမှူးနေရာတချို့ အချိန်းအပြောင်းစလုပ်

မြေလတ်အသံ၊ ဧပြီ ၂၂၊ ၂၀၂၆ ။

စစ်ကော်မရှင်တပ်ရဲ့ကာကွယ်ရေးဦးစီးချုပ် (လေ) အသစ်အဖြစ် စစ်ဦးစီးအရာရှိချုပ်(လေ) ဒုဗိုလ်ချုပ်ကြီး ထွန်းဝင်း ကို ခန့်အပ်လိုက်တယ်လို့ နေပြည်တော်ကလာတဲ့ သတင်းတွေအရ သိရပါတယ်။

အခုဧပြီလထဲမှာပဲ သမ္မတရာထူးရယူလိုက်သူ စစ်ခေါင်းဆောင်ဟောင်း မင်းအောင်လှိုင်ရဲ့ အစိုးရအသစ်မှာ ယခင်လေတပ်ချုပ် ဗိုလ်ချုပ်ကြီး ထွန်းအောင် က ကာကွယ်ရေးဝန်ကြီးအဖြစ်နဲ့ပါဝင်လာတာကြောင့် ကာကွယ်ရေးဦးစီးချုပ်(လေ) ရာထူးက လစ်လပ်နေခဲ့တာပါ။

လေတပ်ချုပ် အသစ်ဖြစ်လာတဲ့ ဗိုလ်ချုပ် ထွန်းဝင်း ဟာ စစ်အာဏာသိမ်းပြီးနောက် အနောက်ပိုင်းလေတပ်ကွပ်ကဲမှုဌာနချုပ်မှူးအဖြစ် ၂၀၂၁ ကနေ ၂၀၂၃ အထိ ၃ နှစ်ကြာ မြန်မာပြည်အထက်ပိုင်းက လေတပ်တွေကို ကွပ်ကဲခဲ့တာပါ။

အနောက်ပိုင်းလေတပ်ကွပ်ကဲမှုဌာနချုပ်ဟာ မကွေးလေတပ်စခန်းဌာနချုပ်အတွင်းအထိုင်ချကာ မြန်မာပြည်အထက်ပိုင်း စစ်ကိုင်း၊ မန္တလေး၊ မကွေးတိုင်း၊ ချင်းပြည်နယ်တွေထဲက လေကြောင်းဗုံးကြဲတိုက်ခိုက်မှုတွေကို အဓိကအမိန့်ပေးလုပ်ဆောင်နေတာလို့ မကွေးလေတပ်နဲ့ နီးစပ်တဲ့သတင်းရင်းမြစ်တဦးက ပြောပါတယ်။

၂၀၂၃ ဧပြီ ၁၁ ရက်မှာ ဖြစ်ပွားခဲ့တဲ့ စစ်ကိုင်းတိုင်း၊ ကန့်ဘလူမြို့နယ်၊ ပဇီကြီးရွာ လေကြောင်းတိုက်ခိုက်မှုမှာ လူ ၁၆၀ ကျော်အစုလိုက်အပြုံလိုက်သေဆုံးခဲ့ရပြီး အဲ့ဒီကာလ အနောက်ပိုင်းလေတပ်ကွပ်ကဲမှုဌာနချုပ်မှူး ဗိုလ်ချုပ် ထွန်းဝင်း က တိုက်ခိုက်မှုရဲ့အဓိကတာဝန်ရှိသူတဦးလည်း ဖြစ်ပါတယ်။

အနောက်ပိုင်းလေတပ်ကွပ်ကဲမှုဌာနချုပ်ဟာ မကွေးလေတပ်စခန်းဌာနချုပ်၊ မိတ္ထီလာလေကြောင်းအတတ်သင်လေတပ်စခန်းဌာနချုပ်၊ တံတားဦးလေတပ်စခန်းနဲ့ ဟုမ္မလင်းလေတပ်စခန်းဌာနချုပ် စတဲ့ လေတပ်စခန်းဌာနချုပ်တွေကို ကွပ်ကဲရတာလို့ လေတပ်သတင်းရင်းမြစ်တွေဆီက သိရပါတယ်။

ဒါ့အပြင်တပ်ချုုပ်အသစ် ဗိုလ်ချုပ်ကြီး ရဲဝင်းဦးလက်ထက် ပထမဆုံးစစ်တိုင်းမှူးနဲ့တပ်မမှူး၊ ဌာနချုပ်မှူးအပြောင်းအရွှေ့တွေလုပ်ဆောင်ခဲ့ပြီး တောင်ငူအခြေစိုက် တောင်ပိုင်းတိုင်းစစ်ဌာနချုပ်နဲ့ ဒေသကွပ်ကဲမှုစစ်ဌာနချုပ်(ပြည်) တိုင်းမှူး၊ ဒကစမှူးတွေ အပြောင်းအလဲဖြစ်ခဲ့ပါတယ်။

ရှမ်းမြောက် နောင်ချိုဒေသတိုက်ပွဲတွေမှာ နာမည်ကောင်းရခဲ့ပြီး တောင်ပိုင်းတိုင်းမှူးဖြစ်လာတဲ့ ဗိုလ်မှူးချုပ် သူရဇော်လွင်စိုး ကို အရှေ့တောင်တိုင်းမှူးအဖြစ် ပြောင်းရွှေ့လိုက်ပြီး အနောက်တောင်တိုင်းမှူး ဗိုလ်ချုပ် စိုးကျော်ထက် က တောင်ပိုင်းတိုင်းမှူး ဖြစ်လာပါတယ်။

လစ်လပ်သွားတဲ့ အနောက်တောင်တိုင်းမှူး နေရာကို ဒေသကွပ်ကဲမှူစစ်ဌာနချုပ်(လွိုင်ကော်) ဌာနချုပ်မှူး ဗိုလ်မှူးချုပ် အောင်ကျော်ခိုင် က ရောက်ရှိလာခဲ့တာပါ။

အလားတူ ဒေသကွပ်ကဲမှုစစ်ဌာနချုပ်(ပြည်) ဌာနချုပ်မှူး ဗိုလ်မှူးချုပ် စိုးဦးဟန် ရဲ့နေရာကို နေပြည်တော်၊ နိုင်ငံတော်ကာကွယ်ရေးတက္ကသိုလ်(နကတ) က နည်းပြအရာရှိ ဗိုလ်မှူးကြီး စိန်ပြည်ဦး နဲ့ အစားထိုးခန့်အပ်လိုက်ပါတယ်။

ဗိုလ်ချုပ်ကြီး ရဲဝင်းဦး တပ်ချုပ်ရာထူးရယူပြီးနောက် စစ်တပ်ထိပ်ပိုင်းရာထူးအပြောင်းအရွှေ့တွေ ပထမဆုံးလုပ်ဆောင်ခဲ့တာပြီး တိုင်းမှူး၊ တပ်မမှူး၊ စကခမှူး၊ ဒကစမှူး လေ့ကျင့်ရေးကျောင်းအုပ်ကြီးနေရာ ၁၅ နေရာထက်မနည်းကို ပြောင်းရွှေ့ခဲ့တာလည်း ဖြစ်ပါတယ်။