ပဲခူး

သာယာဝတီ၊ မတ် ၂၅၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ သာယာဝတီမြို့နယ်၊ သာယာအေးကျေးရွာအုပ်စုအတွင်းက မူရင်းပိုင်ရှင် တောင်သူတွေဆီ စွန့်လွှတ်ပြီးဖြစ်တဲ့ တပ်ပိုင်မြေတွေရဲ့ ပိုင်ဆိုင်မှု ပုံစံ-၇ တွေကို စစ်ကောင်စီကျေးရွာအုပ်စု အုပ်ချုပ်ရေးမှူးက မတ်လ ၂၁ ရက်နေ့ကစတင်ကာ လော်စပီကာနဲ့အော်ပြီး ပြန်အပ်ခိုင်းနေတယ်လို့ သိရပါတယ်။

သာယာဝတီမြို့အခြေစိုက် ခလရ ၃၅ တပ်က ယခင်စစ်အစိုးရလက်ထက်မှာ သိမ်းဆည်းထားတဲ့ သာယာအေးကျေးရွာအုပ်စုအတွင်းက လယ်မြေဧက ၃၀၀ ကို ၂၀၁၃ ခုနှစ်မှာ တပ်ပိုင်မြေအဖြစ်ကနေ စွန့်လွှတ်ခဲ့ရတာဖြစ်ပြီး လက်ရှိမှာ အဲ့ဒီမြေ ပိုင်ဆိုင်ထားသူတွေဆီက ပိုင်ဆိုင်မှု ပုံစံ-၇ စာချုပ်တွေကို ရပ်၊ကျေးလယ်ယာမြေစီမံခန့်ခွဲရေးကော်မတီထံ အပ်နှံခိုင်းနေတာလို့ ဒေသခံတဦးက မြေလတ်အသံကို ပြောပါတယ်။

“ဒီမြေတွေက ဦးသိန်းစိန်လက်ထက်မှာ တောင်သူတွေ အမှန်တကယ် စိုက်ပျိုးမြေတွေဖြစ်လို့ တပ်ပိုင်မြေအဖြစ်ကနေ စွန့်လွှတ်ခဲ့ပြီး သူ့မူရင်းပိုင်ရှင်တွေကို တရားဝင်ပြန်လွှဲထားတဲ့ မြေတွေ။ ခုလို ပုံစံ ၇ ပြန်အပ်ခိုင်းတာက တပ်ပိုင်မြေအဖြစ် ပြန်သိမ်းဖို့ ပြင်ဆင်နေတာလို့ ယူဆပါတယ်” လို့ ပြောပါတယ်။

အရပ်သားအစိုးရလက်ထက်တုန်းကလည်း စစ်ကောင်စီတပ်က အဲ့ဒီမြေဧက ၃၀၀ နဲ့ပတ်သက်လို့ မူရင်းပိုင်ရှင်တွေကို ပြန်လည်လွှဲပြောင်းပေးရာမှာ အငြင်းပွားမှုတွေရှိခဲ့တယ်ဆိုပြီး အကြောင်းပြကာ ပြန်လည်သိမ်းယူဖို့ ကြိုးစားခဲ့ဖူးတယ်လို့ ဆိုပါတယ်။

“NLD လက်ထက် ၂၀၁၇ လောက်မှာ အဲ့ဒီမြေတွေနဲ့ပတ်သက်ပြီးတော့ ဒီမူရင်းပိုင်ရှင်တွေကြားမှာ အငြင်းပွားတာတွေဖြစ်လို့ ၃၅ တပ်က ပြန်သိမ်းဖို့ လုပ်သေးတယ်။ NLD ခံနေလို့ သူတို့မအောင်မြင်တာ” လို့ သူကဆက်ပြောပါတယ်။

အဲ့ဒီမြေဧက ၃၀၀ ရဲ့ ပိုင်ဆိုင်မှုစာချုပ်ပုံစံ ၇ တွေ စစ်ကောင်စီရပ်/ကျေးလယ်ယာမြေစီမံခန့်ခွဲရေးကော်မတီကို ပြန်လည်အပ်နှံဖို့ ခလရ ၃၅ တပ်က တပ်ကြပ်ကြီး သိန်းဦးနဲ့ သာယာအေးရွာအုပ်စု အုပ်ချုပ်ရေးမှူးတို့က ဦးစီးလုပ်ဆောင်နေတာလို့ ဆိုပါတယ်။

သာယာအေးကျေးရွာအုပ်စုထဲမှာ သင်တောရိုး၊ ကညင်ကောက်၊ သာယာအေး၊ ဂွေးချောင်းစတဲ့ရွာတွေ ပါဝင်တာဖြစ်ပြီး စစ်ကောင်စီတပ်က အဲ့ဒီရွာတွေထဲ လယ်မြေဧက ၃၀၀ ကို ၁၉၉၃ ခုနှစ် စစ်အစိုးရခေတ်မှာ တပ်ပိုင်မြေအဖြစ် သိမ်းဆည်းခဲ့တာဖြစ်ကာ ၂၀၁၃ ခုနှစ်မှာ တပ်ပိုင်မြေအဖြစ်ကနေ ပြန်လည်စွန့်လွှတ်ခဲ့ရတာလို့ သိရပါတယ်။

ပဲခူး၊ မတ် ၂၄၊ ၂၀၂၃။

ပဲခူး ရွှေမော်ဓောဘုရားဗုဒ္ဓပူဇနိက (၂၆၀၅) ကြိမ်မြောက် ပွဲတော်မှာ စျေးရောင်းချတဲ့သူတွေ နည်းပါးနေတယ်လို့ မြို့ခံတွေဆီက သိရပါတယ်။

မတ်လ ၂၀ ရက်နေ့ကနေ ဧပြီလ ၁၈ ရက်နေ့အထိ ပွဲတော်ကိုကျင်းပနေပေမဲ့လည်း အခုချိန်ထိ စျေးတန်းနဲ့ကစားကွင်းတွေကို ဆောက်လုပ်နေဆဲဖြစ်သလို၊ လာရောက်ရောင်းချတဲ့ ဆိုင်တွေလည်း နည်းပါးလာတယ်လို့ ပဲခူးမြို့ခံတဦးက ပြောပါတယ်။

“ကစားကွင်းနဲ့ စျေးတန်းတွေက ဆောက်နေတုန်းပဲ။ ဇာတ်ပွဲက ၃၀ ရက်နေ့မှာ ဝင်မယ်လို့ပြောတယ်။ အခုချိန်ထိ ဇာတ်စင်တောင် မဆောက်ရသေးဘူး။ ဝန်းထဲမှာတော့ ရဲတယောက်နှစ်ယောက်ကို လုံခြုံရေးချထားတယ်။ ဆိုင်တန်းပေါင်း ၃၀ ဆယ်လောက်ပဲ ရှိမယ်။ ဈေးရောင်းတဲ့သူ‌တွေလည်း သိပ်မရှိဘူး” လို့ ဆိုပါတယ်။

ပြီးခဲ့တဲ့နှစ်တွေမှာ ဆိုင်တန်း(၁၅ ခန်းခန့်ပါ) ၁၀၀ ကျော် ဆောက်လုပ်ကျင်းပနိုင်ခဲ့သော်လည်း ယခုနှစ်တွင်တော့ ဆိုင်တန်း(၃၀)သာ ထိုးထားပြီး အပြည့်မလာသေးဘူးလို့ ဆိုပါတယ်။ ယခင် ဗိမ္မာန်အနောက်တွင် ဆိုင်ခန်း ၃၀ ခန့်ရှိခဲ့သော်လည်း ယခုနှစ်တွင် ၃ ဆိုင်သာ ရှိတယ်လို့ ဆိုပါတယ်။

ယခင်နှစ်တွေမှာ ဗုဒ္ဓပူဇနိယပွဲတော်ကို ၄ လပိုင်းလောက်မှ ကျင်းပလေ့ရှိပေမဲ့လည်း ဒီနှစ်မှာတော့ ပွဲတော်ကို မတ်လ အတွင်းမှာ ကျင်းပနေတာပါ။

“ရပ်ကွက်လူကြီးတွေ ဂေါ်ပကတွေ ပေါင်းပြီး ဒီနှစ်ကတော့ ပွဲကိုစောစောကျင်းပတယ်။ ဘာဖြစ်လို့လဲတော့ မသိပါဘူး။ ပွဲတော်ရက် ၂၀ ရက်ကနေ ၃၀ ရက်နေ့အထိက စျေးရောင်းပွဲတော်လုပ်မှာ။ ပွဲတော်မှာ ကပြမယ့်သူတွေ သီချင်းဆိုမယ့်သူတွေအတွက် ဇာတ်ခုံဆောက်ဖို့ လုံခြုံရေးက ၁၀၀ ကျော်ချမယ်လို့တော့ ကြားနေရတယ်’’ လို့ ဆိုပါတယ်။

ဘုရားပွဲတော်မှာ ကျင်းပမဲ့ ဇာတ်ပွဲတွေကတော့ ချစ်ရဲမင်းဇာတ်သဘင်ပွဲ၊ ချစ်ပန်းဆုဝေဇာတ်သဘင်ပွဲ၊ ရန်ကုန်ရွှေမေတ္တာဇာတ်သဘင်ပွဲနဲ့အတူ ရုပ်ရှင်နဲ့ ဂီတအနုပညာရှင်များကလည်း (၁၀) ည အခမဲ့ဖျော်ဖြေတင်ဆက်သွားမယ်လို့လည်း လက်ကမ်းစာစောင်တွေမှာ ကြေညာထားပါတယ်။

ပြီးခဲ့တဲ့ ၂၀၂၂ ခုနှစ်မှာတော့ ရွှေမော်ဓောဘုရားပွဲကို ဧပြီလ (၁၀) ရက်ကနေ (၁၉ ) ရက်နေ့အထိသာ ကျင်းပခဲ့တယ်လို့လည်း ဆိုပါတယ်။

စာတည်း – 007

ဝေါ၊ မတ် ၂၄၊ ၂၀၂၃။

ပဲခူးတိုင်း၊ ပဲခူးခရိုင်၊ ဝေါမြို့နယ်အတွင်းက စစ်ကောင်စီလက်အောက် ရပ်ကွက်၊ ကျေးရွာ အုပ်ချုပ်ရေးအဖွဲ့ တွေ အမြန်ဆုံးနုတ်ထွက်ကြဖို့နဲ့ မလိုက်နာရင် စစ်ရေးပစ်မှတ်အနေနဲ့ တိုက်ခိုက်သွားမယ်လို့ ဝေါမြို့နယ်ပြည်သူ့ကာကွယ်ရေးတပ်ဖွဲ့က မတ်လ ၂၄ ရက် ဒီကနေ့မှာ ထုတ်ပြန်ပါတယ်။

စစ်ကောင်စီခန့် ရပ်ကွက်၊ကျေးရွာအုပ်စု အုပ်ချုပ်ရေးမှူး၊ ရာအိမ်မှူး၊ ဆယ်အိမ်မှူး အားလုံးပါဝင်မှာဖြစ်ပြီး မတ်လ ၃၁ ရက်နေ့ နောက်ဆုံးထားနုတ်ထွက်ရမယ်လို့ ဝေါပကဖ တာဝန်ရှိသူက ပြောပါတယ်။

“ခုကာလက နောက်ဆုံးအခြေနေကို ရောက်နေပြီ။ တချို့အုပ်ကြီးတွေက အရင်လက်ထက်ကတည်းက အုပ်ကြီးတွေကို အတင်းပြန်ခန့်ထားတာဆိုတော့ သူတို့ကမလုပ်ချင်ပေမယ့် လုပ်နေရတာ ရှိတယ်။ ဒီလိုလူတွေအတွက် အခွင့်အရေးပေးပြီး နောက်ဆုံးစာထုတ်တာပါ။ စကစလက်ထက်မှာ လိုလိုချင်ချင်နဲ့ အုပ်ကြီးလုပ်ထားတဲ့သူတွေကတော့ သူတို့သဘောပါ” လို့ ပြောပါတယ်။

နောက်ဆုံးသတ်မှတ်ပေးထားတဲ့ ရက်အတွင်း နုတ်ထွက်တာမရှိတဲ့သူတွေကို စစ်ကောင်စီနဲ့ ပူပေါင်းဆောင်ရွက်သူတွေအဖြစ် သတ်မှတ်ရှင်းလင်းသွားမှာဖြစ်ပြီး အခုလအတွင်းမှာပဲ စစ်ကောင်စီက သူတို့ လက်အောက် အုပ်ကြီးနဲ့ပျူစောထီးတွေကို လက်နက်တပ်ဆင်ပေးထားကြောင်း သတင်းရရှိထားတယ်လို့ ဆိုပါတယ်။

စစ်အာဏာသိမ်းပြီးတဲ့နောက် ဝေါမြို့နယ်အတွင်းက စစ်ကောင်စီရပ်/ကျေးအုပ်ချုပ်ရေးအဖွဲ့တွေကို ပစ်မှတ်ထား ရှင်းလင်းတာမျိုးမရှိသေးဘဲ ကြံခိုင်ရေးစည်းရုံးရေးမှူး ၁ ဦး၊ စစ်ကောင်စီသတင်းပေး ၁ ဦးနဲ့ ဒုရဲအုပ် ၁ ဦးကိုသာ ရှင်းလင်းခဲ့တာဖြစ်ပြီး၊ ဝေါမြို့နယ်မှာ ရပ်ကွက်/ကျေးရွာအုပ်စု အုပ်ချုပ်ရေးမှူး ၆၁ ဦးနဲ့ ရာအိမ်မှူး၊ ဆယ်အိမ်မှူး ၁၀၀ ကျော် ရှိတယ်လို့ ဝေါပကဖဆီက သိရပါတယ်။

စာတည်း – ရင်ငြိမ်း

ကြို့ပင်ကောက်၊ မတ် ၂၄၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ ကြို့ပင်ကောက်မြို့နယ်မှာ မတ်လ ၂၄ ရက် ဒီမနက်အစောပိုင်းက အမျိုးသားတဦး ကြိုးဆွဲချသေဆုံးခဲ့တယ်လို့ ဒေသခံတဦးဆီက သိရပါတယ်။

သေဆုံးသူဟာ ကြို့ပင်ကောက်မြို့နယ်၊ ဂုမ္မကွင်းအုပ်စု၊ ကြို့ကုန်းရွာမှာနေထိုင်တဲ့ အသက် ၄၃ နှစ်အရွယ် ကိုရဲထွန်းဖြစ်ပြီး ရွာထိပ်ရှိတံတားအောက်ခံတန်းမှာ လည်ပင်းကိုကြိုးချည်လျက် သေဆုံးနေတာလို့ ဒေသခံတဦးက မြေလတ်အသံကို ပြောပါတယ်။

“ရွာထိပ်တံတားအောက်က အောက်ခံယက်မတန်းကို ကြိုးချည်ပြီး ကြိုးဆွဲချတာပါ။ ရွာသားတချို့မြင်ပြီး ရဲကိုအကြောင်းကြားလိုက်တာ။ ဘာလို့လုပ်တာလဲတော့ မသိဘူး။ သူက အရက်တော့ တအားသောက်တယ်” လို့ ပြောပါတယ်။

သေဆုံးသူရဲ့ရုပ်အလောင်းကိုတော့ ဒေသတွင်း ပရဟိတအသင်းကားနဲ့ ကြို့ပင်ကောက်ဆေးရုံကို ပို့ဆောင်လိုက်တယ်လို့ သိရပါတယ်။

မတ်လ ၁၅ ရက်နေ့ကလည်း သဲကုန်းကြီးရွာက အသက် ၂၄ နှစ်အရွယ် အမျိုးသားတဦး ကြိုးဆွဲချသေဆုံးခဲ့တာကြောင့် မတ်လတတိယအပတ်နဲ့ နောက်ဆုံးအပတ်အတွင်း ကြို့ပင်ကောက်မြို့နယ်မှာ ကြိုးဆွဲချသေဆုံးသူ ၂ ဦးရှိခဲ့တာ ဖြစ်ပါတယ်။

စာတည်း – ရင်ငြိမ်း

ပေါင်းတည်၊ မတ် ၂၄၊ ၂၀၂၃။

ပဲခူးတိုင်း၊ ပြည်ခရိုင်၊ ပေါင်းတည်မြို့မှာ စစ်ကောင်စီက လယ်သမား ၇ ဦးကို ဖမ်းဆီးကာ စိုက်ပျိုးစရိတ်ချေးငွေ အဓမ္မဆပ်ခိုင်းခဲ့တယ်လို့ ဒေသခံတွေဆီက သိရပါတယ်။

ပေါင်းတည်မြို့နယ်၊ ထန်းသုံးခွအုပ်စု ထန်းသုံးခွရွာက ဒေသခံလယ်သမားတွေဖြစ်ပြီး ၁၉ ရက်ညက ပေါင်းတည်ရဲစခန်းအချုပ်ထဲထည့်ကာ ချေးငွေဆပ်ပြီးမှ ပြန်လွှတ်ပေးတာလို့ အုပ်ချုပ်ရေးမှူးနဲ့ နီးစပ်သူဆီက သိပါတယ်။

“ညနေပိုင်းဖမ်းသွားတာ ချေးငွေမဆပ်ရင် ပြန်မလွှတ်ဘူးဆိုလို့ အကုန်လုံးချေးငွေဆပ်ပြီး ပေါင်းတည်အချုပ်ထဲ တညအိပ်စေပြီး ချေးငွေဆပ်မှ ပြန်လွှတ်ပေးတာ” လို့ ပြောပါတယ်။

ပေါင်းတည်မြို့နယ်၊ မဲခေါင်းအုပ်စု၊ ကြို့ပင်သာအုပ်စုနဲ့သပြေကြီးစုအုပ်စုက လယ်သမားတွေကိုလည်း လာမယ့်မတ်လ ၂၇ ရက်နေ့ ပေးဆပ်ရန် ခြိမ်းခြောက်တောင်းဆိုတယ်လို့လည်း ဆိုပါတယ်။

“ချေးငွေတွေ ပြန်ဆပ်ရမယ်ဆိုပြီး လယ်သမားတွေကို ရဲနဲ့လိုက်ခေါ်ပြီး အခုလာမဲ့ မတ်လ ၂၇ ရက်နေ့အပြီး ဆပ်ရမယ်ဆိုပြီး လက်မှတ်ထိုးခိုင်းတယ်။ အဓမ္မတောင်းခံတာပေါ့ဗျာ။ ပေးစရာကတော့ မရှိဘူး” လို့ ဒေသခံလယ်သမားတဦးက ပြောပါတယ်။

လက်ရှိမှာ ရပ်ကျေးစိုက်ဘဏ် အချို့ ကျေးရွာအတွင်း ဖိအားပေးတောင်းခံမှုတွေရှိနေပြီး ခြိမ်းခြောက်မှုတွေလည်း ရှိတယ်လို့ သူကဆက်ပြောပါတယ်။

” မြန်မာ့လယ်ယာဖွံ့ဖြိုးရေးဘဏ်က စိုက်ပျိုးစရိတ်ချေးငွေအတွက် တဧကကျပ် ၁ သိန်းခွဲနှုန်းနဲ့ ကိုဗစ်ချေးငွေအတွက် တဧကကျပ် ၅ သောင်း ထုတ်ချေးထားပြီး ကျသင့်ဒဏ်တိုးကျပ် ၄ သောင်းခွဲနဲ့ပေါင်းပါက စုစုပေါင်း ၁ ဧကကို ကျပ် ၂ သိန်းခွဲဝန်းကျင် ပေးဆောင်ခိုင်းတာ” လို့ ​ဆိုပါတယ်။

စိုက်ပျိုးစရိတ်ချေးငွေကို လယ် ၁ ဧကကနေ ၁၀ ဧကအထိ လုပ်ကိုင်သူတွေကို ထုတ်ချေးပေးတာဖြစ်တဲ့အတွက် ပေးဆပ်ရမယ့်သူတွေအနေနဲ့လည်း ကျပ် ၂ သိန်းခွဲကနေ ကျပ် ၂၅ သိန်းအထိ ဖြစ်တယ်လို့ သိရပါတယ်။

ဒါ့အပြင် ပဲခူးတိုင်းအနောက်ခြမ်းက နတ်တလင်း၊ ကြို့ပင်ကောက်၊ မိုးညိုနဲ့ သာယာဝတီမြို့နယ်တွေမှာလည်း စိုက်ပျိုးစရိတ်ချေးငွေကို အဓမ္မတောင်းခံမှုတွေ ရှိနေတယ်လို့ ဒေသခံတွေဆီက သိရပါတယ်။

စာတည်း – 007

မင်းလှ၊ မတ် ၂၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊ စိန်ကန့်လန့်ရွာအခြေစိုက် ခလရ ၁ တပ်က အချုပ်သား ၁ ဦးနဲ့ စစ်ကောင်စီတပ်သား ၂ ဦး မတ်လ ၂၃ ရက် ဒီနေ့မနက် ၃ နာရီလောက်မှာ လက်နက်တွေယူပြီး ထွက်ပြေးသွားတယ်လို့ သိရပါတယ်။

ထွက်ပြေးသွားသူတွေဟာ ခလရ ၁ ဗဟိုကင်းတပ်တွင်းအချုပ်မှာ ဖမ်းခံထားရတဲ့ စစ်ကောင်စီတပ်ဖွဲ့ဝင်အချုပ်သား ၁ ဦးနဲ့ တပ်ဗဟိုကင်းအချုပ်စောင့် တပ်သား ၂ ဦးဖြစ်ပြီး သေနတ် ၃ လက်ယူပြီး ထွက်ပြေးနေတာလို့ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

“အချုပ်စောင့်တဲ့ဗဟိုကင်း ကင်းသမား ၂ ယောက်ရယ်၊ အချုပ်သားတယောက်ရယ် မနက် ၃ နာရီလောက်ကြီး ထွက်ပြေးသွားတာ။ ခလရ ၁ က တောအစပ်မှာဆိုတော့ပြေးလို့လွယ်တယ်။ သေနတ်တလက်စီ ပါသွားတယ်” လို့ ပြောပါတယ်။

လက်ရှိမှာ သေနတ်တွေယူဆောင်ထွက်ပြေးသွားတဲ့ စစ်ကောင်စီတပ်သားတွေကို ခလရ ၁ နောက်တန်း စစ်ကောင်စီတပ်ဖွဲ့ဝင်တွေက တောနင်းရှာဖွေနေပြီး တွေ့တဲ့နေရာ ပစ်သတ်ဖို့ ညွှန်ကြားထားတယ်လို့လည်း ဆိုပါတယ်။

“သူတို့သေနတ်တွေကို နိုင်သလောက်သယ်ဖို့လုပ်နေတာလို့ သိရတယ်။ လက်နက်တိုက်ဖောက်နေတာကို ဟိုတလောက မုဒိန်းမှုနဲ့အချုပ်ကျနေတဲ့ ထွန်းနိုင်ကတွေ့လို့ အော်လိုက်လို့တယောက်တလက်စီပဲ ပါသွားတာ။ ခုတပ်ထဲမှာလည်း ဆူညံပွက်လောရိုက်နေတာ။ သူတို့ကို စစ်ကြောင်းထိုး တောနင်းရှာနေတယ်။ ပစ်မိန့်လည်း ပေးထားတယ်။ လူတွေအရှင်မမိရင်နေ သေနတ်တွေပြန်ရအောင် ရှာရမယ်ဆိုပြီး အမိန့်ထုတ်ထားတယ်” လို့ သူကဆက်ပြောပါတယ်။

စစ်ကောင်စီတပ်သားတွေကို ချုပ်နှောင်ထားတဲ့ တပ်တွင်းအချုပ် ဗဟိုကင်းဟာ တပ်ရင်းတခုလုံးရဲ့ လက်နက်၊ ခဲယမ်းတွေကို သိမ်းဆည်းထားရှိတဲ့ လက်နက်တိုက်လည်း ဖြစ်တယ်လို့ သိရပါတယ်။

လက်ရှိအချိန်ထိ ထွက်ပြေးသွားသူတွေကို အောက်ခြေမှာ တောနင်းရှာဖွေနေဆဲဖြစ်ပြီး ဖြစ်စဉ်ဖြစ်ပွားမှုကို ခလရ ၁ နောက်တန်းအရာရှိတွေက တပ်မ ၆၆ နဲ့ ဒကစ(ပြည်)ဌာနချုပ်တွေကို တင်ပြတာမျိုးမရှိသေးဘဲ ကြိတ်ပြီးရှာဖွေနေတယ်လို့ ဆိုပါတယ်။

မင်းလှအခြေစိုက် ခလရ ၁ တပ်ဟာ တပ်မ ၆၆ လက်အောက်ခံ တပ်ရင်းတခုဖြစ်ပြီး ကရင်နီပြည်နယ်အတွင်း စစ်ဆင်ရေးဝင်ရောက်နေတဲ့တပ်ဖြစ်ကာ၊ ရှေ့တန်းစစ်ဆင်ရေးမှာလည်း ထိခိုက်ကျဆုံး များနေသလို နောက်တန်းမှာလည်း အုပ်ချုပ်မှုလျော့နည်းဖြစ်စဉ် အမှုအခင်းတွေ ဆက်တိုက်ဖြစ်ပွားနေကာ အခုမတ်လအတွင်းမှာပဲ ခလရ ၁ က စစ်ကောင်စီတပ်သား ထွန်းနိုင်ဟာ စိန်ကန့်လန့်ရွာနေ အငြိမ်းစားဗိုလ်ကြီး မျိုးမြင့်ရဲ့သမီးဖြစ်သူ စိတ်ဝေဒနာသည်ကို အကြိမ်ကြိမ်အဓ္ဓမပြုကျင့်မှု ဖြစ်ပွားခဲ့သေးတယ်လို့ တပ်တွင်းသတင်းရင်းမြစ်တွေဆီက သိရပါတယ်။

နတ်တလင်း၊ မတ် ၂၃၊ ၂၀၂၃။

ပဲခူးတိုင်း၊ သာယာဝတီခရိုင်၊ နတ်တလင်းမြို့နယ်မှာ အထိုင်ချတပ်စွဲထားတဲ့ စစ်တပ်အထိုင်စခန်းကို ဝင်ရောက်တိုက်ခိုက်ခဲ့ရာ စစ်သားတဦး သေဆုံးခဲ့တယ်လို့ နတ်တလင်းမြို့နယ် တပ်ရင်း ၃၈၀၁ တပ်ခွဲ ၂ Phoenix DF က သတင်းထုတ်ပြန်ထားပါတယ်။

နတ်တလင်းမြို့နယ်၊ တောင်ညိုဆည်အထက် ကြက်မနက်ရွာမှာ လွန်ခဲ့တဲ့ ၂ ပတ်လောက်ကစပြီး အင်အား ၄၀ ဦးလောက်နဲ့ တပ်စွဲထားတဲ့စစ်သားတွေကို မတ်လ ၁၉ ရက် ညနေ ၆ နာရီလောက်မှာ တိုက်ခိုက်ခဲ့တာလို့ ဆိုပါတယ်။

“သူတို့စခန်းက ရွာရဲ့အရှေ့ဘက်နားမှာ စခန်းချထားတာ၊ ပထမဆုံး စပြီးပစ်ခတ်ခံရတဲ့ကောင်က စခန်းရှေ့မှာတဦးထဲရှိနေတဲ့အချိန် ပစ်နိုင်ခဲ့တာ လဲကျသွားတာကို မြင်လိုက်ရတယ်” လို့ Phoenix DF အဖွဲ့ဝင်တဦးက ပြောပါတယ်။

ဒီသေဆုံးမှုကို ဒေသခံတွေရဲ့ ပြန်လည်ပြောပြချက်အရ အတည်ပြုနိုင်ခဲ့ကာ အလောင်းကိုတော့ ဘယ်ကိုသယ်ဆောင်သွားတယ်ဆိုတာ မသိရဘူးလို့ သူကဆက်ပြောပါတယ်။

Phoenix DF နဲ့အတူ ပြည်ခရိုင်တပ်ရင်း ၃၆၀၁ တပ်ခွဲ ၂ နဲ့ ၃တို့ ပူးပေါင်းတိုက်ခိုက်ခဲ့တာဖြစ်ပြီး၊ အပြန်အလှန်ပစ်ခတ်ချိန် ၁၅ မိနစ်လောက်ရှိခဲ့ကာ တော်လှန်ရေးရဲဘော်တွေဘက်က အထိအခိုက်မရှိ ဆုတ်ခွာနိုင်ခဲ့တယ်လို့ ဆိုပါတယ်။

ပြီးခဲ့တဲ့ မတ်လ ၁၇ ရက်ညကလည်း အဲ့ဒီကြက်မနက်ရွာစခန်းကို ဒေသခံကာကွယ်ရေးတပ်ဖွဲ့တွေ ပူးပေါင်းပြီး လက်နက်မျိုးစုံနဲ့ ပစ်ခတ်ခဲ့သေးတယ်လို့ သိရပါတယ်။

နတ်တလင်းမြိူ့နယ်မှာ မကြာခဏထိတွေ့တိုက်ပွဲတွေဖြစ်နေပြီး၊ စစ်တပ်ဘက်ကလည်း ဒေသခံကာကွယ်ရေးတပ်တွေကို ရိက္ခာဖြတ်တဲ့အနေနဲ့ တောင်ညိုဆည်အထက်က ကျေးရွာသားတွေကို လူတဦးလျှင် တနေ့စာ ဆန်နို့ဆီဗူး ၃ လုံးနဲ့ ၇ ရက်စာသာ ဝယ်ယူခွင့်ရတယ်လို့ သိရပါတယ်။

စာတည်း – လင်း

အုတ်ဖို၊ မတ် ၂၂၊ ၂၀၂၃။

ပဲခူးတိုင်းအနောက်ခြမ်း၊ အုတ်ဖိုမြို့နယ်မှာ လောင်းကစားဒိုင်နေအိမ်ကို ပစ်ခတ်တဲ့ ၄၀ မမကျည်က အနီးရှိ ကင်းပုန်းဝပ်နေတဲ့ စစ်သားတွေဆီ ကျရောက်ခဲ့တာကြောင့် ၂ ဦး ပြင်းထန်ဒဏ်ရာ ရရှိသွားတယ်လို့ အုတ်ဖို မြေအောက်ပြောက်ကျားတပ်ဖွဲ့ဆီက သိရပါတယ်။

အုတ်ဖိုမြို့နယ်၊ ကြို့ကိုးပင်ကျေးရွာက လောင်းကစားဒိုင်ပြုလုပ်တဲ့ ကိုဖိုးသဲ နေအိမ်ကို မတ်လ ၂၀ ရက် မနက်အစောပိုင်းမှာ ၄၀ မမနဲ့ပစ်ခတ်ချိန် အနီးရှိစာသင်ကျောင်းဝန်းထဲကို ကျရောက်ခဲ့ရာ အဲ့ဒီနေရာမှာ ကင်းပုန်းဝပ်နေတဲ့စစ်သားတွေကို ထိမှန်ခဲ့တာလို့ အမှတ် ၂၊ ၃၈၀၂ တပ်ရင်းတပ်ခွဲ ၄ မြေအောက်ပြောက်ကျားတပ်ဖွဲ့ (အုပ်ဖို)မှ တပ်ဖွဲ့ဝင်တဦးက ပြောပါတယ်။

“ဖိုးသဲက ချဲဒိုင်လုပ်တယ်။ လောင်းကစားဝိုင်းတွေလည်း ထောင်ပြီးတော့ စစ်ကောင်စီကို ငွေရှာပေးနေတာ။ အဲဒါကြောင့် သတိပေးတဲ့အနေနဲ့ ပစ်ခတ်ခဲ့တာ။ ကံဆိုးချင်တော့ ဖိုးသဲအိမ်နားက စာသင်ကျောင်းနောက်မှာ ကင်းပုန်းဝပ်နေတဲ့ စစ်သားတွေဆီကို ၄၀ မမတလုံးကျပြီး ၂ ဦး ဒဏ်ရာရသွားတာ” လို့ ပြောပါတယ်။

ကိုဖိုးသဲဟာ လောင်းကစားဒိုင်တဦးဖြစ်ကာ ပျူစောထီးခေါင်းဆောင် လုပ်နေသူလည်း ဖြစ်ပြီး စစ်ကောင်စီနဲ့ပတ်သက်ဆက်နွယ်ကာ ငွေရှာပေးနေသူဖြစ်တယ်လို့ သူကဆက်ပြောပါတယ်။

ဒါ့အပြင် အဲ့ဒီနေ့မနက်မှာပဲ အုတ်ဖိုမြို့နယ်၊ အောက်ကိုင်းအုပ်စုက လောင်းကစားဝိုင်း ထောင်ထားတဲ့ အုပ်ချုပ်ရေးမှူး ကိုကြည်မြင့် အိမ်ကိုလည်း သေနတ်နဲ့ဝင်ရောက်ပစ်ခတ်ခဲ့ရာ ထွက်ပြေးသွားခဲ့လို့ ကျည်ထိမှန်မှု ရှိ၊ မရှိကို သေချာမသိရဘူးလို့ မြေအောက်ပြောက်ကျားတပ်ဖွဲ့ (အုတ်ဖို)မှ တပ်ဖွဲ့ဝင်တဦးက ပြောပါတယ်။

စာတည်း – လင်း