ပဲခူး

ညောင်လေးပင်၊ ‌မေ ၁၊ ၂၀၂၃။

ပဲခူးတိုင်း၊ ညောင်လေးပင်မြို့နယ်၊ အင်ဝိုင်းကျေးရွာအနီးရှိ ညောင်လေးပင်-မဒေါက်သွားလမ်းက ရေကြည်ချောင်းတံတား မိုင်းဖောက်ခွဲခံရပြီး ပျက်စီးသွားတယ်လို့ ဒေသခံတွေဆီက သိရပါတယ်။

မေလ ၁ ရက် ဒီကနေ့မနက်အစော ၁ နာရီဝန်းကျင်မှာ မိုင်းထောင်ဖောက်ခွဲခံရတာကြောင့် တံတားပြိုကျပျက်စီးခဲ့ကာ အသုံးပြုလို့မရတော့ဘူးလို့ ဒေသခံတဦးက မြေလတ်အသံကို ပြောပါတယ်။

“အဲဒီတံတားက လမ်းသွားလမ်းလာတွေ အသုံးပြုများတဲ့တံတားလို့ ပြောရမှာပေါ့။ လမ်းမကြီးပေါ်က တံတားပါ။ တံတားကတော့ ပေ ၁၂၀ ကျော်တယ်။ ခုတံတားမိုင်းခွဲခံရတော့ လောလောဆယ် သွားမရတော့ဘူးလို့ သိရတယ်” လို့ ပြောပါတယ်။

ဒါ့အပြင် အဲ့ဒီလမ်းပိုင်းဟာ ညောင်လေးပင်မြို့နယ်ကနေ ရွှေကျင်မြို့နယ်အထိ ရောက်ရှိတာဖြစ်ပြီး စစ်ကောင်စီဘက်ရော တော်လှန်ရေးအင်အားစုတွေကပါ စစ်ရေးအရအသုံးပြုနေတဲ့ လမ်းပိုင်းဖြစ်တယ်လို့ ဒေသခံတွေက ပြောပါတယ်။

တံတားမိုင်းခွဲခံရလို့ အလျားပေ ၆၀ လောက် ပြိုကျပျက်စီးသွားပြီး အဲ့ဒီတံတားမိုင်းခွဲတာကိုတော့ ဘယ်အဖွဲ့က လုပ်ဆောင်တယ်ဆိုတာတော့ မသိရသေးပါဘူး။

ဇန်နဝါရီလ ၁၀ ရက်က ညောင်လေးပင်မြို့နယ်၊ ခင်ကန့်လန့်ရွာနဲ့ ကညင်ကျိုးရွာကြားက တံတား ၂ စင်းနဲ့ ဖေဖော်ဝါရီလ ၉ ရက်မှာ ရန်ကုန်-မန္တလေးလမ်းဟောင်းပေါ်က တောင်ဘို့သုံးလုံးတံတားလည်း မိုင်းဖောက်ခွဲခံရလို့ ပျက်စီးခဲ့သေးတယ်လို့ သိရပါတယ်။

စာတည်း-ရင်ငြိမ်း

ပဲခူး၊ ဧပြီ ၂၈၊ ၂၀၂၃။

ပဲခူးတိုင်းဒေသကြီး၊ ဖြူးမြို့နယ်၊ တောင်ဂုံးတဲကျေးရွာအနီးမှာ ကညွှတ်ကွင်းမြို့လျှပ်စစ်အင်ဂျင်နီယာ သေနတ်နဲ့ပစ်ခံရပြီး သေဆုံးသွားတယ်လို့ သိရပါတယ်။

ဧပြီလ ၂၇ ရက်ညနေ ၅ နာရီခန့်မှာ ကညွတ်ကွင်းမြို့လျှပ်စစ်အင်ဂျင်နီယာ အသက် ၅၂ နှစ်အရွယ် ဦးကျော်စံလင်းဟာ ကညွှတ်ကွင်းမြို့ကနေ ကျောက်တံခါးမြို့ဘက်ကို ဆိုင်ကယ်နဲ့အပြန် ရန်ကုန်-မန္တလေး (ကားလမ်းဟောင်း)ဘေးရှိ ကွင်းနောက် (၁) ရပ်ကွက်၊ မိုင်တိုင်အမှတ်-၁၁၄/၁ အရောက်မှာ သေနတ်နဲ့ပစ်ခံရပြီး သေဆုံးသွားတာလို့ ဒေသခံတဦးက ပြောပါတယ်။

“သူက ကျောက်တံခါးသားပါ။ တခါတလေ ကညွှတ်ကွင်းကနေ သူ့အိမ်ကို ဆိုင်ကယ်နဲ့ပြန်လေ့ရှိတယ်။ ခုလည်း သူအပြန်ကို စောင့်ပြီးပစ်သွားတာနေမယ်။ ဒီဘက်ခြမ်းမှာက ရွာတွေက လျှပ်စစ်မီးကိစ္စ မီတာခမပေးလို့ မီးဖြတ်ခံရတာတွေ ရှိတယ်။ အဲဒီပြသနာတွေကြောင့်ပဲလား ဘာကြောင့်လဲဆိုတာတော့မသိရဘူး”လို့ ပြောပါတယ်။

ခုလိုပစ်ခတ်ခံရတာကြောင့် ဦးကျော်စံလင်းဟာ ရင်ဘတ်နဲ့မေးစေ့အောက်တွမှာ ကျည်ထိဒဏ်ရာတွေနဲ့ သေဆုံးခဲ့တာလို့ ဆိုပါတယ်။

ပစ်ခတ်ခံရပြီးနောက် သူ့ရဲ့အလောင်းကို ဒေသလူမှူကူညီရေးအသင်းတွေက ကညွှတ်ကွင်းဆေးရုံကို သယ်ဆောင်သွားပြီး ဧပြီလ ၂၈ ရက်ဒီနေ့မှာတော့ ကျောက်တံခါးမြို့ရှိ မိသားစုတွေက ပြန်သယ်သွားပြီလို့ သိရပါတယ်။

ဒီပစ်ခတ်မှုကို ဘယ်အဖွဲ့အစည်းက ဘာကြောင့်လုပ်ဆောင်ခဲ့လဲဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

ဧပြီလ ၁၅ ရက်ညနေပိုင်းကလည်း သင်္ကန်းပင်ကျေးရွာက စစ်ကောင်စီသတင်းပေး မြင့်နိုင်ဆိုသူကို ဖြူးမြိုနယ် ပကဖက ပစ်ခတ်ရှင်းလင်းခဲ့သေးတယ်လို့ သိရပါတယ်။

စာတည်း – လင်း

ရေတာရှည်၊ ဧပြီ ၂၇၊ ၂၀၂၃။

ပဲခူးတိုင်းဒေသကြီး၊ ရေတာရှည်မြို့နယ်၊ ရန်ကုန်-မန္တလေး လမ်းဟောင်း မိုင်တိုင်အမှတ် (၁၈၀/၃) မှာ ကားပေါ်တင်လာတဲ့ ကတ်ထူစက္ကူတွေ မီးလောင်လို့ ကားပေါ်က ခုန်ချတဲ့ အမျိုးသမီးတဦး သေဆုံးသွားတယ်လို့ သိရပါတယ်။

ဧပြီလ ၂၇ ရက်ဒီမနက် ၇ နာရီခွဲခန့်မှာ ဆွာမြို့ဘက်ကနေ မြို့သစ်ဘက်ကို ကတ်ထူစက္ကူဖာ အဟောင်းတွေ တင်လာတဲ့ ကားဟာ လမ်းအတိုင်း မောင်းလာချိန် ဆေးလိပ်မီးပွားကတဆင့် စက္ကူတွေ မီးလောင်ခဲ့တဲ့အတွက် ကားပေါ်ပါ အမျိုးသမီးက ခုန်ချရာမှ သေဆုံးခဲ့တာလို့ ဒေသခံတဦးက ပြောပါတယ်။

“ယာဥ်ပေါ်မှာ ယာဥ်မောင်းရယ် အမျိုးသမီး ၂ ဦးရယ် ပါတယ်။ ယာဥ်မောင်းက ဆေးလိပ်သောက်လို့ မီးပွားက စက္ကူတွေပေါ် ကျသွားရာကနေ မီးလောင်တာ။ စက္ကူမီးလောင်တာကို လန့်ပြီး ကားမောင်းနေတဲ့အချိန်မှာပဲ ကောင်မလေးက ကားပေါ်ကနေ ခုန်ချလိုက်တာ။ စက္ကူတွေ မီးလောင်တာကိုတော့ လမ်းသွားလမ်းလာတွေက ကားပေါ်ကနေ ဆွဲချပြီး ငြိမ်းသတ်ပေးလိုက်လို့ ငြိမ်းသွားတယ်။ ကားမီးလောင်တာ မဟုတ်ပါဘူး” လို့ ပြောပါတယ်။

၆ ဘီးကား (ဖောကား) နောက်ခန်းမှာ အပြည့်နီးပါးတင်လာတဲ့ကတ်ထူစက္ကူတွေနဲ့အတူ အမျိုးသမီး ၂ ဦး လိုက်ပါလာတာဖြစ်ပြီး၊ အဲ့ဒီထဲကမှ ကေတုမတီမြို့သစ်မှာ နေထိုင်တဲ့ အသက် ၂၀ အရွယ် မစန်းစန်းနွယ်မှာ ကြောက်လန့်ခုန်ချရာမှ သေဆုံးခဲ့တာလည်း ဖြစ်ပါတယ်။

အဆိုပါ လမ်းပိုင်းမှာ ယာဥ်မတော်တဆမှုကြောင့် လူသေဆုံးတာတွေရှိပေမယ့် အခုလိုဖြစ်စဥ်က ပထမဆုံးအကြိမ် ဖြစ်ကာ၊ သေဆုံးသူရဲ့ အလောင်းကိုတော့ ဒေသခံတွေက ရေတာရှည်ဆေးရုံကို ပို့ဆောင်ပေးထားပြီး၊ ရင်ခွဲစစ်ဆေးတာတွေ လုပ်နေတယ်လို့ သိရပါတယ်။

စာတည်း – လင်း

သာယာဝတီ၊ ဧပြီ ၂၇၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီမြို့နယ်၊ ရေမီးနင်းကျေးရွာက ပြည်သူ ၇ ဦးအပါအဝင် ကျေးရွာ ၅ ရွာက လူ ၃၀ ကျော်ကို သမချေးငွေ ပြန်မဆပ်လို့ဆိုကာ စစ်ကောင်စီတပ်ဖွဲ့ဝင်တွေ ဖမ်းဆီးထားတယ်လို့ သိရပါတယ်။

ဧပြီလ ၂၆ ရက်မနက် ၁၀ နာရီလောက်မှာ စစ်ကောင်စီလက်အောက် သမဝါယမဦးစီးမှူးတွေနဲ့ ရဲတပ်ဖွဲ့ဝင်တွေဟာ ရေမီးနင်းကျေးရွာ အုပ်ချုပ်ရေးမှူးနေအိမ်မှာ သမချေးငွေ ယူထားတဲ့သူတွေကို ခေါ်ယူပြီးနောက် ချေးငွေဆပ်ခိုင်းကာ မပေးနိုင်သူတွေကို ဖမ်းဆီးခေါ်ဆောင်သွားတာလို့ ဒေသခံတဦးက မြေလတ်အသံကို ပြောပါတယ်။

“သူတို့လာတဲ့အချိန် အလုပ်တွေ သွားနေကြလို့ မရှိကြတာ များတယ်။ ၁၀ ယောက်လောက်ပဲ သွားတာ။ အဲဒါကို ရောက်တာနဲ့ ချက်ချင်း ချေးငွေဆပ်။ မဆပ်နိုင်တဲ့သူတွေကို ထော်လာဂျီပေါ်တင်ပြီး ဖမ်းသွားတာ။ ငွေချက်ချင်း မပေးနိုင်တဲ့သူ ၇ ယောက် ပါသွားတယ်။ အခြားရွာကသူတွေကိုလည်း ရှေ့ရက်တွေမှာ အဲလိုပဲလုပ်ပြီး ဖမ်းဆီးထားတာမျိုးလည်း ရှိတယ်” လို့ ပြောပါတယ်။

ဖမ်းဆီးခံရသူတွေဟာ ရေမီးနင်းကျေးရွာ ဒေသခံ ဦးလှကြိုင်၊ ဦးဖြူအောင်၊ ဒေါ်စန်းဌေး၊ ဦးဖိုးလုံး၊ ဒေါ်မိုးခိုင်၊ ဒေါမြင့်မြင့်ခိုင်၊ ဒေါ် ကြီးမတို့ ၇ ဦးဖြစ်ပြီး သာယာဝတီ မြို့မရဲစခန်းကို ဖမ်းဆီးသွားလို့ မိသားစုဝင်တွေက ချေးငွေပိုက်ဆံပေးဆပ်ကာ ၆ ဦးကို ပြန်လည်ရွေးထုတ်လာရတယ်လို့ ဆိုပါတယ်။

အလားတူ စံရွေး၊ ရွှေညောင်ပင်၊ ဖားရွှေကျော်ရွာတွေအပါအဝင် ကျေးရွာ ၅ ရွာလောက်က ဒေသခံ ၃၀ ကိုလည်း သမချေးငွေ ပြန်မဆပ်လို့ဆိုကာ အခုဧပြီလထဲမှာပဲ သာယာဝတီ မြို့မရဲစခန်း အချုပ်ထဲမှာ ဖမ်းဆီးထားတယ်လို့ သိရပါတယ်။

“ခု ချေးငွေက ၂၀၁၅ -၂၀၁၆ လောက်ကတည်းက ချေးထားတဲ့ငွေပါ။ တရုတ်နဲ့ ဖက်စပ်လုပ်ထားတဲ့ ချေးငွေပေါ့။ အဲတုန်းကတော့ လတိုင်းသတ်မှတ်နှုန်းနဲ့ ပြန်ဆပ်ကြတယ်။ ကိုဗစ်နဲ့ နိုင်ငံရေးဖြစ်တော့ သူတို့လည်း ရွာလာမကောက်တော့ဘူး။ ခုကျမှ ချက်ချင်းကြီးရောက်လာပြီး ချေးငွေဆပ်ရမယ်။ မပေးရင် ဖမ်းမယ်ဆိုတာ ဖြစ်လာတာ။ သူတို့ကို ပေးဆပ်ဖို့ ကျန်တာက ၇ သောင်းကျော်ပဲ။ ခုက အတိုးနဲ့ဆိုပြီး တသိန်းရှစ်သောင်းကျော်အထိ ဖြစ်သွားတာ” လို့ ပြောပါတယ်။

သမချေးငွေပြန်ဆပ်ဖို့ သက်ဆိုင်ရာဌာနက ချေးငွေယူထားတဲ့ ဒေသခံတွေဆီ စာပို့အကြောင်းကြားတာမျိူးတွေမရှိဘဲ ချေးငွေ ပြန်မဆပ်သူတွေကို ဖမ်းဆီးနေတာကြောင့် ချေးငွေ ပြန်မဆပ်နိုင်သေးတဲ့ ဒေသခံတွေဟာ တိမ်းရှောင်ထွက်ပြေးနေရသူတွေလည်း ရှိနေတယ်လို့ ဆိုပါတယ်။

အဆိုပါ သမချေးငွေကို ကျေးရွာတွေမှာ ဒေသခံတွေ ၅ ဦး၊ ၁၀ ဦးအဖွဲ့တွေ စုပေါင်းကာ ဝိုင်းကြီးချုပ်စနစ်နဲ့ ချေးယူကြပြီး တဦးလျှင် တသိန်းကျပ် ရရှိကာ တနှစ်အတွင်း အတိုးအရင်းပေါင်း ခွဲဆပ်ကြရတယ်လို့ သိရပါတယ်။

စာတည်း – ရင်ငြိမ်း

ကြို့ပင်ကောက်၊ ဧပြီ ၂၆၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ ကြို့ပင်ကောက်မြို့နယ်က စစ်ကောင်စီသတင်းပေးတဦးကို ဧပြီလ ၂၅ ရက် မနေ့ ညနေပိုင်းက သေနတ်နဲ့ပစ်ခတ်ရှင်းလင်းခဲ့တယ်လို့ Black Dragon ,GBKPDF က သတင်းထုတ်ပြန်ပါတယ်။

အသတ်ခံရသူဟာ ကြို့ပင်ကောက်မြို့နယ်၊ ဘော်ပင်ဆည်အမှတ် ၁၊ ရုံးချောင်းအုပ်စု၊ ဆည်တော်ဦးရွာက အသက် ၅၀ အရွယ် ကိုမောင်မျိုးဖြစ်ပြီး၊ သူရဲ့နေအိမ်မှာ သေနတ်နဲ့ပစ်ခတ် ရှင်းလင်းခဲ့ကာ သက်သေခံဖုန်းကို သိမ်းဆည်းခဲ့တယ်လို့ ဆိုပါတယ်။

“သေနတ်နဲ့ခေါင်းကို ၁ ချက်၊ ဗိုက်ကို ၂ ချက်၊ တင်ပါးကို ၁ ချက်ပစ်လို့ ပွဲချင်းပြီးသေသွားပါတယ်။ ပစ်ခတ်နေတဲ့အချိန် အိမ်ထဲမှာ သူ့ဇနီးနဲ့မြေးတဦးလည်းရှိနေတယ်။ သူတို့ကိုအန္တရာယ်မပြုခဲ့ဘူး”လို့ Black Dragon အဖွဲ့တာဝန်ခံက မြေလတ်အသံကို ပြောပါတယ်။

ကိုမောင်မျိုးဟာ ပျူစောထီးခေါင်းဆောင်တဦးဖြစ်တဲ့အပြင် သိမ်းဆည်းခဲ့တဲ့သူ့ရဲ့ဖုန်းကို စစ်ဆေးရာမှာ ဖုန်း Call Recoder မှတ်တမ်းမှာလည်း ကျေးရွာအုပ်ချုပ်ချုပ်ရေးမှူးက PDFသတင်းမေးမြန်းမှုကို “တောင်ပေါ်မှာ အခြေအနေမကောင်းကြောင်း၊ သတိဝိရီယနဲ့ နေထိုင်နေရပြီး ထူးခြားသတင်းရှိပါက ပေးပို့သွားမှာဖြစ်တယ်” လို့ ပြောဆိုထားတာတွေကို တွေ့ရှိခဲ့ရတယ်လို့ ဆိုပါတယ်။

စစ်ကောင်စီတပ်ကို သတင်းပေးလုပ်မယ့်သူတွေနဲ့ လုပ်နေတဲ့သူတွေကို သတိပေးအဆင့် ပြီးဆုံးသွားပြီ ဖြစ်တဲ့အတွက် ကိုယ့်အသိနဲ့ကိုယ် နုတ်ထွက်ကြဖို့နဲ့ Black dragon က လုံးဝနယ်မြေရှင်းလင်းရေး လုပ်သွားမှာ ဖြစ်တယ်လို့ဆိုပါတယ်။

အဲဒီတိုက်ခိုက်မှုကို တပ်ရင်းအမှတ် ၃၈၀၁ တပ်ခွဲ ၃ နတ်စစ်သည်လက်အောက်ခံ BLA K Dragon (GBK PDF)နဲ့ Black Wolf – UG ပြောက်ကျားတပ်ဖွဲ့တို့က ရှင်းလင်းခဲ့တာလို့ သိရပါတယ်။

ဧပြီလ ၂၁ ရက်ညနေကလည်း ကြို့ပင်ကောက်မြို့နယ်၊ ပဲခူးရိုးမတောင်ခြေမှာရှိတဲ့ တောင်နှစ်လုံးပေါက်ရွာက စစ်တပ်သတင်းပေးဆိုသူ ကိုတင်ကြိုင်ကို သာယာဝတီခရိုင် တပ်ရင်း ၃၈၀၁ တပ်ခွဲ ၃ လက်အောက်ခံ Black Dragon, GBK PDFက ရှင်းလင်းခဲ့ပါသေးတယ်။

စာတည်း- ရင်ငြိမ်း