ပဲခူး

ပဲခူး၊ ဇွန် ၅၊ ၂၀၂၃။

ပဲခူးတိုင်း၊ ရေတာရှည်မြို့နယ်မှာ စစ်ကောင်စီတပ်က လက်နက်ကြီးနဲ့ အကြောင်းမဲ့ပစ်ခတ်တာကြောင့် အသက် ၄ နှစ်အရွယ်ကလေးငယ်အပါ ၃ ဦးထိခိုက်ဒဏ်ရာရရှိခဲ့တယ်လို့ သိရပါတယ်။

ဇွန်လ ၃ ရက်ည ၁၀ နာရီလောက်မှာ ခလရ ၈၄ (ဆွာ) တပ်က ၁၂၀ မမလက်နက်ကြီး ၃ ချက် ရမ်းသမ်းပစ်ခတ်ရာက ဒေါင့်အင်းကုန်းအုပ်စု၊ ဒေါင့်အင်းကုန်းရွာက နေအိမ် ၂ လုံးနဲ့ ဂွေးသဲကျေးရွာက နေအိမ် ၁ လုံးကို ထိမှန်ခဲ့တာလို့ ဆိုပါတယ်။

“ဒေါင့်အင်းကုန်းရွာက ကိုအောင်ထွန်းဝင်း အိမ်ပေါ်ကိုကျပြီး သူ့အမျိုးသမီးရယ် သူ့သမီးတယောက်ရယ် အငယ်ဆုံးသားလေးရယ်ကို လက်နက်ကြီးကျည်စမှန်တာ အခု ဆွာဆေးရုံကိုပို့ထားတယ် အသက်အန္တရာယ်တော့မစိုးရိမ်ရဘူး” လို့ ဒေသခံတဦးက ပြောပါတယ်။

အခြားနေအိမ် ၂ လုံးပေါ်ကို လက်နက်ကြီး ကျည်စထိမှန်ခဲ့ပေမယ့် အဲဒီအိမ်တွေဟာ လူမနေကြဘူးလို့ သူကဆက်ပြောပါတယ်။

ကိုအောင်ထွန်းဝင်းရဲ့ အမျိုးသမီးမမလေး(အသက် ၄၀ အရွယ်ခန့်)မှာ ဗိုက်နဲ့ညာဘက်တံတောင်အောက်၊ အသက် ၁၂ နှစ်အရွယ် သမီးဖြစ်သူ မယမင်းမှာ ပေါင်နဲ့ဒူးအောက်၊ အသက် ၄ နှစ်အရွယ် မောင်သုတဇော်မှာ ဘယ်ဘက်လက်ပြင်တို့ ဒဏ်ရာရရှိခဲ့တယ်လို့ ဆိုပါတယ်။

လက်ရှိမှာ ဒေါင့်အင်းကုန်းရွာနဲ့ ဂွေးသဲရွာဝန်းကျင်တို့မှာ စစ်ကောင်စီတပ်က မြေပြင်လှုပ်ရှားမူတွေ ပြုလုပ်နေတယ်လို့ လည်းပြောပါတယ်။

ဇွန်လ ၃ ရက် အဲဒီညနေ ၃ နာရီမှာပဲ ရေတာရှည်မြို့နယ် ဘုရားလေးကုန်းရွာအနီးမှာ စစ်ကောင်စီတပ်နဲ့ ဒေသခံ သံတောင်မြောက်ပိုင်း(အထူးဒေသ)၊ ပြည်သူ့ကာကွယ်ရေးတပ်မတော် တောင်ငူခရိုင် PDF တပ်ရင်း ၃၅၀၁၊ တပ်ခွဲ ၃၊ တပ်ခွဲ ၄ ၊ တပ်ခွဲ ၆ တို့ နှစ်ဖက်ထိတွေ့တိုက်ပွဲ ၂ နာရီကြာ ဖြစ်ပွားခဲ့ပါသေးတယ်။

စစ်ကောင်စီဟာ ပဲခူးရိုးမအရှေ့ခြမ်းနဲ့ အနောက်ခြမ်းကို နေ့စဥ်ဆိုသလို စစ်ကြောင်းထိုးနေပြီး ပြီးခဲ့တဲ့ဇွန်လ ၃ ရက်နေ့ကလည်း ပဲခူးတိုင်းအနောက်ခြမ်း၊ ပေါင်းတည်မြို့နယ်မှာ စစ်ကောင်စီတပ်ရဲ့စစ်ကြောင်းကို ပေါင်းတည် PDF က ခြုံခိုတိုက်ခိုက်ခဲ့လို့စစ်သား ၁ ဦးသေကာ ၁ ဦးဒဏ်ရာရခဲ့ပါသေးတယ်။

စာတည်း – 007

ပဲခူး၊ ဇွန် ၂၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှ-မြို့ချောင်း-စိန်ကန့်လန့် လမ်းပိုင်းဖြစ်တဲ့ ပဲခူးရိုးမပေါ် ဖြတ်သန်းသွားလာခွင့်ကို စစ်ကောင်စီက ပိတ်လိုက်တယ်လို့ ဒေသခံတွေဆီက သိရပါတယ်။

စစ်ကြောင်းထိုးမယ်ဆိုတဲ့ အကြောင်းပြချက်နဲ့ မေလ ၂၈ ရက်နေ့က စပိတ်လိုက်တာဖြစ်တယ်လို့ မင်းလှဒေသခံတဦးထံက သိရပါတယ်။

“စစ်ကြောင်းထိုးမယ်ဆိုပြီးတော့ ဘယ်သူ့မှ အတက်မခံတော့ဘူး။ မျှစ်ချိုး၊ ဝါးခုတ်၊ ထင်းခုတ်တဲ့သူတွေလည်း မောင်းချတယ်။ ဆိုင်ကယ်နဲ့တနိုင်တင်တာမျိုးရှိတော့ ဘယ်ဆိုင်ကယ်မှအလာမခံဘူး။ လာတာနဲ့ဖမ်းတယ်။ ဆိုင်ကယ်တစီးကို ပိုက်ဆံ တသိန်းခွဲ၊ နှစ်သိန်းတောင်းတယ်” လို့ သူကပြောပါတယ်။

ပဲခူးရိုးမပေါ်ရှိ ခါချဥ်တောင်သစ်တောစခန်းမှာ စစ်ကောင်စီအင်အား ၃၀ ကျော် တပ်စွဲထားပြီး၊ ရိုးမလမ်းပိုင်း ပိတ်တယ်ဆိုကာ ဒေသခံတွေကို ခြိမ်းခြောက်တာ၊ ဆိုင်ကယ်တွေဖမ်းဆီး ငွေတောင်းတာတွေ လုပ်နေတယ်လို့ ဒေသခံတွေဆီက သိရပါတယ်။

ရိုးမအခြေက လူတွေကိုလည်းတက်ခွင့်မပေးသလို ရိုးပေါ်ကလူတွေကိုလည်း ထွက်ခွါခိုင်းနေပြီး တွေ့ရင်ပစ်သတ်မယ်လို့ ခြိမ်းခြောက်ပြောဆိုနေတယ်လို့ ပြောပါတယ်။

“မင်းလှ-မြို့ချောင်း-စိန်ကန့်လန့် ရိုးမဖြတ်တဲ့ကားလမ်းကို ပိတ်လိုက်တာ။ ရိုးမထဲကသစ်တွေ ခုတ်ချင်လို့ ပြည်သူတွေကို တောပိတ်တယ်လို့ပြောတာ။ ဘယ်သူမှမရှိတော့ သူတို့ခိုးချင်သလို ခိုးလို့ရတာပေါ့ဗျာ။” လို့ သာယာဝတီခရိုင်၊ ပြည်သူ့ကာကွယ်ရေးအဖွဲ့၊ ပြန်ကြားရေးတာဝန်ခံက မြေလတ်အသံကို ပြောပါတယ်။

ပြီးခဲ့တဲ့ မတ်လ ၂ ရက်နေ့က ပဲခူးရိုးမပေါ်ကို စစ်ကြောင်းထိုးဖို့တက်လာတဲ့ စစ်ကားတစီးဟာ ခါချဥ်တောင်လမ်း ရေတွင်းကုန်းအဆင်းမှာ ချောက်ထဲကျခဲ့ပြီး၊ ဗိုလ်မှူးတယောက်အပါဝင် ၃ ဦးသေဆုံးခဲ့တယ်လို့ သိရပါတယ်။

စာတည်း – 007

ပဲခူး၊ မေ ၃၀၊ ၂၀၂၃။

ပဲခူးတိုင်း၊ ပဲခူးမြို့နယ်၊ အုတ်ဖိုကျေးရွာမှာ မေလ ၃၀ ရက် ဒီကနေ့မနက် ၈ နာရီခွဲဝန်းကျင်မှာ အင်အား ၅၀ ခန့်ပါ လူတစုက စစ်ကောင်စီတပ် ထောက်ခံပွဲကို ပြုလုပ်ခဲ့တယ်လို့ ဒေသခံတွေဆီက သိရပါတယ်။

အုတ်ဖိုကျေးရွာရဲ့ရွာစွန်နားမှာ အဲ့ဒီလူတစုက အမေရိကန်နိုင်ငံက မြန်မာစစ်ကောင်စီအပေါ် အရေးယူပိတ်ဆို့နေမှုတွေကို ရှုတ်ချကန့်ကွက်ကြောင်းနဲ့ စစ်ကောင်စီကိုထောက်ခံကြောင်း စတဲ့ ဗီနိုင်းတွေကိုင်ဆောင်ကာ တပ်ထောက်ခံပွဲ လုပ်ဆောင်ခဲ့တာလို့ ပဲခူးနယ်ဒေသခံတဦးက မြေလတ်အသံကိုပြောပါတယ်။

“လုပ်တာကတော့ ပျူစောထီးခေါင်းဆောင်တွေ ဦးဆောင်ပြီး ပျူစောထီးအဖွဲ့ဝင်တွေနဲ့ ကြံခိုင်ရေးပါတီဝင်တွေနဲ့ မိသားစုဝင်တွေဘဲလုပ်သွားတာ“ လို့ ပြောပါတယ်။

စစ်ကောင်စီထောက်ခံတဲ့ တယ်လီဂရမ်ချန်နယ်တွေမှာတော့ ဒီကနေ့မနက်ပိုင်းက ပဲခူးမြို့နယ်၊ အုတ်ဖိုကျုံးကျေးရွာမှာ တပ်မတော်ထောက်ခံသူများက အင်အား ၁၀၀ ခန့်နဲ့ တပ်မတော် ထောက်ခံပွဲပြုလုပ်ခဲ့တယ်လို့ ဖော်ပြထားပါတယ်။

စစ်တပ်ထောက်ခံသူတွေ တပ်ထောက်ခံပွဲလုပ်တာ အလေးထားစရာမဟုတ်ဘူးလို့လည်း ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ရှိသူက မှတ်ချက်ပေး ပြောဆိုပါတယ်။

“တပ်ထောက်ခံပွဲကတော့ လုပ်ကြတာပါဘဲ။ သူတို့ ဘာကြောင့်လုပ်နေလဲဆိုတာ တနိုင်ငံလုံးက ပြည်သူတွေသိသလို ကမ္ဘာကလည်းသိတာဘဲ။ အရပ်စကားနဲ့ ပြောရရင် အရူးချီးပန်း ထထလုပ်တာပေါ့။ သူတို့ ဘာလုပ်နေနေ ကျနော်တို့ဘက်ကတော့ စစ်အာဏာရှင်ပြုတ်ကျရေးကို ဆက်လုပ်သွားရမှာဘဲ” လို့ ပြောပါတယ်။

စစ်အာဏာသိမ်း ၂ နှစ်ပြည့် ပြီးခဲ့တဲ့ ဖေဖော်ဝါရီလ ၁ ရက်နေ့ကလည်း ရန်ကုန်မြို့မှာ စစ်တပ်ထောက်ခံသူတွေနဲ့ ကြံ့ခိုင်ရေးပါတီဝင်တွေပူးပေါင်းပြီး စစ်ကောင်စီတပ်လုံခြုံရေးအပြည့်နဲ့ တပ်ထောက်ခံပွဲ ပြုလုပ်ခဲ့သေးတယ်လို့ သိရပါတယ်။

သတင်း – ရင်ငြိမ်း