မြေလတ်အသံ၊ စက်တင်ဘာ ၁၆၊ ၂၀၂၅။

မန္တလေးတိုင်း၊ မတ္တရာမြို့နယ်ကို စစ်ကော်မရှင်တပ်က စက်တင်ဘာ ၁၅ ရက်နေ့လယ် ၁ နာရီကျော်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေး ၂ ဦးအပါအဝင် ၆ ဦးသေဆုံးခဲ့တယ်လို့ဒေသခံတွေက ပြောပါတယ်။

မတ္တရာမြို့နယ်၊ အရှေ့မြောက်ခြမ်းရှိ ဒီယာနဲ့ ဥက္ကံစတဲ့ကျေးရွာ ၂ ရွာအနီး ကားလမ်းမကို တိုက်ခိုက်ရေးလေယာဥ် ၂ စီး၊ ပေါင် ၅၀၀ နဲ့ ၃၀၀ ဗုံးသီး ၃ လုံးကြဲချခဲ့တာလို့ ဆိုပါတယ်။

“တိုက်ပွဲဖြစ်တာလုံးဝမရှိပါဘူး။ ဥက္ကံနဲ့ ဒီယာရွာက ၂ မိုင်လောက်ပဲဝေးပါတယ်။ ဗုံးသီးက နေအိမ်ပေါ်ကျလားဆိုတော့ ကားလမ်းဘေးဝန်းကျင်ကျတာ။ ကားလမ်းဘေးက ပြည်သူတွေသေရတာပါဗျ”လို့ Wetlet Informational Network မှ တာဝန်ရှိသူ အမျိုးသားတဦးကပြောပါတယ်။

သေဆုံးသူ ၆ ဦးမှာ ဥက္ကံကျေးရွာမှ အမျိုးသား ၃ ဦး နဲ့ ဒီယာကျေးရွာမှ အမျိုးသား ၃ ဦးတို့ဖြစ်ပြီး အဲဒီထဲမှာ အသက် ၁၀ ကျော်အရွယ်အမျိုးသား ၂ ဦးပါဝင်ပြီး အသေးစိတ်အချက်အလက်တွေကိုတော့ ဆက်သွယ်ရေးအခက်အခဲကြောင့် လောလောဆယ် မသိရှိရသေးဘူးလို့ အထက်ပါအမျိုးသားက ပြောပါတယ်။

ပြီးခဲ့တဲ့စက်တင်ဘာ ၁၃ ရက်ကလည်း မတ္တရာမြို့နယ်အရှေ့ခြမ်းရှိ အင်ကြင်းမြိုင် ကျေးရွာအနီးကို စစ်ကော်မရှင်တပ်က Y12 လေယာဥ်နဲ့ ဗုံးကြဲတိုက်ခိုက်ခဲ့ရာ ဘုန်းကြီးကျောင်းနဲ့ သီလရှင်ကျောင်းတွေကို ကျရောက်ပေါက်ကွဲခဲ့တာကြောင့် ကိုရင် ၁ ပါးအပါအဝင် ၃ ဦးသေဆုံးတယ်လို့ သိရပါတယ်။

စာတည်း – လင်း

ဝက်လက်၊ ဩဂုတ် ၂၈၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်အရှေ့တောင်ခြမ်းက ရုံးပင်ကုန်းကျေးရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၄ ဦး သေဆုံးပြီး ၆ ဦးဒဏ်ရာရခဲ့တယ်လို့ ဒေသခံတွေဆီကသိရပါတယ်။

ဩဂုတ် ၂၇ ရက် ယမန်နေ့ညနေ ၅ နာရီကျော်မှာ တိုက်လေယာဥ် ၁ စီးဟာ ရုံးပင်ကုန်းကျေးရွာကို ဗုံးကြဲချတိုက်ခိုက်ခဲ့ရာ ကျေးရွာ ရေကန်အနီး၊ ဆေးရုံနဲ့ နေအိမ်တွေပေါ်ကို ဗုံးကျရောက်ပေါက်ကွဲခဲ့တာလို့ ဆိုပါတယ်။

“လေယာဉ်နဲ့ မတ္တရာဘက်က ဟောင်ဝစ်ဇာတွေက တပြိုင်တည်းလိုလိုလာတာ။ လေယာဉ်ကလည်း ရော့ကတ်အကြီး၊ အသေးတွေနဲ့ပစ်တယ်။ ပြီးမှ စက်လတ်နဲ့ ကုတ်သွားတာ” လို့ ရုံးပင်ကုန်းရွာဒေသခံတဦးက ပြောပါတယ်။

လေကြောင်းကနေ ဗုံးကြဲခံရတာကြောင့် နေအိမ်အတွင်းရှိနေတဲ့ အသက် ၅၀ ကျော်အရွယ် ဒေါ်စန်း၊ ဆေးရုံမှာရှိနေတဲ့ အသက် ၄၅ နှစ် ဦးအောင်မြင့်စန်းနဲ့ နောက်ထပ်အမျိုးသား ၂ ဦး စုစုပေါင်း ၄ ဦး သေဆုံးပြီး ၆ ဦးဒဏ်ရာရခဲ့ကာ လေကြောင်းတိုက်ခိုက်ခံရတာကြောင့် ရွာခံတွေလည်း ဘေးလွတ်ရာတိမ်းရှောင်နေကြတယ်လို့ သိရပါတယ်။

ယခုလအတွင်း စစ်တပ်က ဝက်လက်မြို့နယ်ကို လေကြောင်းတိုက်ခိုက်မှုဆက်တိုက် ပြုလုပ်နေပြီး ဩဂုတ် ၁၁ ရက် ကလည်း အမှတ် ၃ ခရိုင်ချင်းဆက်လမ်း(ဗျူဟာလမ်း)ကို စစ်တပ်က လေကြောင်းတိုက်ခိုက်မှုပြုလုပ်ခဲ့လို့ ကားသမားတွေအပါအဝင်ပြည်သူ ၇ ဦး သေဆုံးကာ ၁၀ ဦးကျော်ဒဏ်ရာရခဲ့တယ်လို့ သိရပါတယ်။

စာတည်း – မြတ်

မြေလတ်အသံ၊ သြဂုတ် ၂၆၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်ကို စစ်ကော်မရှင်တပ်က တိုက်လေယာဥ်၊ ပါရာမော်တာတွေနဲ့ ဗုံးကြဲချ တိုက်ခိုက်ခဲ့တာကြောင့် G-12 ကျောင်းသူ ၁ ဦးနဲ့ အသက် ၂၀ ဝန်းကျင် အမျိုးသား ၂ ဦး ဗုံးစထိမှန်သေဆုံးခဲ့တယ်လို့ ဒေသခံတွေကဆီက သိရပါတယ်။

ဩဂုတ် ၂၆ ရက် ဒီကနေ့ နေ့လယ် ၃ နာရီခန့်မှာ မုံရွာ(နမခ)က ပျံသန်းလာတဲ့ စက်တပ်လေထီး(ပါရာမော်တာ)၁ စီးဟာ ဘုတလင်-အရာတော်လမ်းပိုင်းနံဘေးရှိ တောင်ကလပ်ဘုန်းကြီးကျောင်းအနီးကို ဗုံးကြဲတိုက်ခိုက်ခဲ့ရာ စစ်ရှောင်နေတဲ့ အသက် ၂၀ ဝန်းကျင် မိန်းကလေး သေဆုံးခဲ့တာလို့ ဆိုပါ တယ်။

“ပါရာမော်တာက ညနေ ၃ နာရီမှာ လာပစ်တယ် အသက် ၂၀ အရွယ်အမျိုးသမီးလေး ဆုံးတယ်။ ဘုတလင်နဲ့ အရာတော်လမ်းအနီး ဘုန်းကြီးကျောင်းတကျောင်းမှာစစ်ရှောင်ရင်း သေဆုံးသွားတာ”လို့ ဘုတလင်မြို့နယ်ရပ်ကျေးပအဖအဖွဲ့ဝင်တဦးက မြေလတ်အသံကို ပြောပါတယ်။

သေဆုံးသွားတဲ့မိန်းကလေးဟာ ဘုတလင်မြို့နယ်၊ ပဲပြစ်တောအရှေ့ရွာကဖြစ်ပြီး အဲ့ဒီရွာကို ဒီကနေ့ မနက် ၆ နာရီလောက်မှာ အင်အား ၁၀၀ ခန့်ပါ စစ်ကော်မရှင်စစ်ကြောင်းဝင်ရောက်လာတာကြောင့် ကျေးရွာကနေထွက်ပြေးလာစဥ် နေ့လယ်ပိုင်းမှာ လေကြောင်းဗုံးစထိမှန် သေဆုံးခဲ့တာပါ။

ဒါ့အပြင် ဒီကနေ့ ညနေ ၅ နာရီခန့်မှာ ဘုတလင်မြို့နယ်၊ သခွတ္တနယ်ရွာကို တိုက်လေယာဥ် ၂ စီးနဲ့ ထပ်မံဗုံးကြဲခဲ့ရာ ကျေးရွာတွင်းနေအိမ်တွေကို ကျရောက်ပေါက်ကွဲခဲ့လို့ အသက် ၁၈ နဲ့ ၂၂ နှစ်အရွယ် အမျိုးသား ၂ ဦး သေဆုံးခဲ့တယ်လို့ သိရပါတယ်။

” ကလေးတွေက ဆီဆိုင်မှာအလုပ်လုပ်ကြတာ၊ စျေးထဲလာပစ်တာ။ အလောင်းက အစနပဲလိုက်ကောက်ရတဲ့အနေထားထိဖြစ်သွားတာ” လို့ အထက်ပါရပ်ကျေးပကဖအဖွဲ့ဝင်က ဆိုပါတယ်။

ဒီကနေ့မနက်ပိုင်းမှာ ပဲပြစ်တောအရှေ့ရွာကိုဝင်ရောက်လာတဲ့ စစ်ကော်မရှင်စစ်ကြောင်းဟာ လက်ရှိအထိ အဲ့ဒီရွာမှာပဲ ဆက်လက်တပ်စွဲထားကာ စစ်ကြောင်းကြောင့် ပဲမြစ်တောအရှေ့ရွာ၊ အနောက်ရွာ၊ နတ်ရွာ၊ တလိုင်း၊ ရွာသာ၊ အုတ်ဖို၊ မြောက်ကျည်၊ ကျို့ကုန်း၊ ဆိပ်သာကန် စတဲ့ကျေးရွာများက ပြည်သူ ၇,၀၀၀ခန့် နေရပ်စွန့်ခွာထွက်ပြေးနေရတယ်လို့ သိရပါတယ်။

စာတည်း – ဟိန်းစံ

ပေါက်ခေါင်း၊ ဩဂုတ် ၂၀၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်၊ ကျောက်ပြင်သာနဲ့ ဖလန်ပင်ကျေးရွာတို့ကို စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့တာကြောင့် သားအဖ ၂ ဦးသေပြီး ၄ ဦးဒဏ်ရာရတယ်လို့ ဒေသခံတွေဆီက သိရပါတယ်။

ဩဂုတ် ၁၉ ရက် မနက် ၁၁ နာရီကျော်မှာ သဲကုန်းဘက်ကတက်လာတဲ့ စက်တပ်လေထီး ၄ စီးဟာ ကျေးရွာ ၂ ရွာထဲကို ဗုံး ၁၂ လုံးကြဲချခဲ့တယ်လို့ ဆိုပါတယ်။

“ပထမ ၂ စီးလာတယ်။ ကြဲသွားတယ်။ ဒုတိယ ၂ စီးလာတယ်။ ထပ်ကြဲတယ်။ ဖလန်ပင်က အိမ်ထိပေမယ့် လူမထိဘူး။ ကျောက်ပြင်သာ ပြည်သူ ၂ ဦးသေတယ်။ သားအဖ ၂ ယောက်ပေါ့။ ပြည်သူ ၄ ဦးထိတာမှာ စိုးရိမ်ရတဲ့ ၁ ယောက်က သေဆုံးသူကောင်လေးရဲ့အမေပါ”လို့ ပြည်ခရိုင် ၃၆၀၂ တပ်ရင်း သတင်းနဲ့ပြန်ကြားရေးတာဝန်ခံက ပြောပါတယ်။

ဗုံးကြဲခံရလို့ ကျောက်ပြင်သာကျေးရွာက အသက် ၁၀ နှစ်အရွယ် မောင်သက်ပိုင်ဇော်နဲ့ ဖခင်ဖြစ်သူ အသက် ၃၈ နှစ်အရွယ် ဦးသိန်းဇော်တို့သေဆုံးပြီး နာရေးကိုတော့ အဲ့ဒီနေ့ညနေပိုင်းမှာပဲ ကျေးရွာ သုသာန်မှာ သင်္ဂြိုဟ်ခဲ့တယ်လို့ သူကပြောပါတယ်။

ဒါ့အပြင် ကျောက်ပြင်သာရွာက နေအိမ် ၂ လုံးလည်းပျက်စီးပြီး ဦးသိန်းဇော်ရဲ့ မိန်းမဖြစ်သူ အသက် ၃၆ နှစ်အရွယ် အမျိုးသမီး ဖြစ်သူနဲ့ အသက် ၄၀ အရွယ် အမျိုးသမီး ၃ ဦးဒဏ်ရာရကာ ဆေးဝါးကုသဖို့ အခက်အခဲကြုံနေရတယ်လို့ သူကဆက်ပြောပါတယ်။

ဒါ့အပြင် ဖလန်ပင်ကျေးရွာမှာလည်း နေအိမ် ၃ လုံးပျက်စီးခဲ့ပြီး လူထိခိုက်မှုမရှိခဲ့ဘူးလို့ သိရပါတယ်။

ဩဂုတ် ၁၅ ရက်ကလည်း ကြိမ်ချောင်းကျေးရွာကို ပါရာမိုတာနဲ့ဗုံး ၄ လုံးကြဲချခဲ့ရာ အသက် ၁၃ နှစ်အရွယ်မိန်းကလေးငယ် ၁ ဦးအပါအဝင် ၆ ဦးသေဆုံးပြီး ၁၁ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

စစ်ကိုင်း၊ ဩဂုတ် ၁၁၊ ၂၀၂၅။

စစ်ကိုင်းတိုင်း၊ စစ်ကိုင်းမြို့နယ်၊ တလိုင်းရွာမြောက်ဘက်လမ်းခွဲတနေရာကို စစ်ကောင်စီတပ်ကလေကြောင်းကနေ ဗုံးကြဲတိုက်ခိုက်တဲ့အပြင် စက်လက်တွေနဲ့ပါပစ်ခတ်ခဲ့တာကြောင့် ဆီဘောက်စာကားတွေတွေမီးလောင်ပြီး လူဆယ်နဲ့ချီသေဆုံးခဲ့တယ်လို့ ရွှေဘိုခရိုင်အမှတ် ၁၈ တပ်ရင်း တပ်ခွဲ ၄ Bo Tiger ဆီက သိရပါတယ်။

ဩဂုတ် ၁၁ ရက် ညနေ ၃ နာရီလောက်မှာ အဆိုပါလမ်းခွဲတနေရာကို ဂျက်ဖိုက်တာနဲ့ ပေါင် ၁၅၀ ဗုံး ၃ လုံးကြဲချပြီး စက်လက်တွေနဲ့ပစ်ခတ်တာလို့ ဆိုပါတယ်။

“စစ်ကောင်စီစစ်ကြောင်းက စဉ့်ကိုင်မှာရှိတာ၊ စစ်ကြောင်းတွေ ထွက်ပေါက်ရှာပြီးတော့ ပြည်သူတွေရဲ့ ကားတန်းတွေကို ပစ်သွားတာ၊ ဆီကား ၃ စီးမီးလောင်ပျက်စီးသွားတယ်၊ ပြည်သူတွေလည်း တော်တော်များများသေဆုံးမှုတွေနဲ့ ဒဏ်ရာရသူတွေလည်းရှိတယ်၊ ဂျက်ဖိုက်တာနဲ့ ၃ ကြိမ်တိုက်ခိုက်မှုလုပ်ပြီးတော့ စက်လက်နဲ့ကို ပစ်သွားသေးတယ်” လို့ ရွှေဘိုခရိုင်အမှတ် ၁၈ တပ်ရင်း တပ်ခွဲ ၄ Bo Tiger ခေါင်းဆောင် ဗိုလ်ကျားကြီးက ပြောပါတယ်။

ပစ်ခတ်မှုကြောင့် ဆီဘောက်စာကား ၃ စီးမီးလောင်ကာ ခရီးသွား ၁၀ ဦးဝန်းကျင်သေဆုံးပြီး ၄၀ ဦးခန့် ဒဏ်ရာရတယ်လို့ ကနဦးသိရတယ်လို့ ဆိုပါတယ်။

ခုဗုံးကြဲခံရတဲ့နေရာဟာ စစ်ကောင်စီတပ်တွေစစ်ကြောင်းထိုးနေတဲ့ စဥ့်ကိုင်မြို့နယ်နဲ့ ၁ မိုင်ခွဲကွာဝေးပြီး စစ်ကြောင်းကြောင့် ကားတွေပိတ်မိနေတာ ၁၀ ရက်ရှိနေပြီလို့ သိရပါတယ်။

“ခရီးသွားကားသမားတွေ တော်တော်များများဒုက္ခရောက်နေတာ၊ စစ်ရေးကြောင့် ပိတ်ဆို့ခံထားရတာ၊ ကားတွေလည်း စုတ်ပြတ်သတ်လို့ပါ၊ ပိတ်မိနေတဲ့ကားက ၁၀၀ ကျော်လောက်ရှိတယ်၊ စစ်ကိုင်း-မန္တလေး ခရီးသွားပြည်သူတွေပါ၊ တိုက်ပွဲကမရှိဘူး၊ သက်သက်မဲ့ကိုပစ်တာ၊ ၄၀ လောက်ဒဏ်ရာရတာရှိတယ်၊ သေဆုံးတာက ၁၀ ဦးလောက်ရှိတယ်၊ ကားသမားတွေထဲက မိသားစုဝင်တွေသေတာလည်းရှိတယ်”လို့ သူက ဆက်ပြောပါတယ်။

လက်ရှိမှာတော့ ဒဏ်ရာရတဲ့ပြည်သူတွေကို ဆေးဝါးကုသမှုလုပ်ပေးနေပြီး သေဆုံးအလောင်းတွေကိုတော့ တိုက်ခိုက်ခံရတဲ့နေရာမှာပဲသင်္ဂြိုဟ်နေတယ်လို့ သိရပါတယ်။

သတင်း – ဒိန်းဂျား၊ စာတည်း – လင်း

ကျော်ကြီး၊ အောင်စိုး

ကောလင်း၊ ဇူလိုင် ၁၅၊ ၂၀၂၅။

စစ်ကိုင်းတိုင်း(အထက်ပိုင်း) ကောလင်းမြို့နယ်အရှေ့ခြမ်း၊ ဒိုးပင်ကျေးရွာ ရွှေဘို-မြစ်ကြီးနားလမ်းပေါ်ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၄ ဦးဒဏ်ရာပြင်းထန်ရရှိခဲ့တယ်လို့ ကောလင်းခရိုင်အမှတ် ၁ တပ်ရင်းထံက သိရပါတယ်။

ရွှေဘို-မြစ်ကြီးနားလမ်းပေါ်ကို ဇူလိုင် ၁၄ ရက် ညနေ ၄ နာရီ ၃၈ မိနစ်မှာ တိုက်လေယာဥ် ၁ စီးနဲ့ ဗုံး ၃ လုံးကြဲချတိုက်ခိုက်ခဲ့တာဖြစ်ပြီး လမ်းနံဘေးထမင်းဆိုင်နဲ့ ဆိုင်အနီးရပ်နားနေတဲ့ စက်သုံးဆီတင်ကားတွေအနီးကျရောက်ပေါက်ကွဲခဲ့တာလို့ ဆိုပါတယ်။

” ထမင်းဆိုင်ရဲ့အနီးလမ်းမပေါ်ရပ်ထားတဲ့ ဆီဘောက်ဆာ ၂ စီးကိုအစမှန်ပြီး မီးလောင်ပျက်စီးတယ်။ ကျတာက ဆီဘောက်ဆာကားတွေရပ်တဲ့ ကွင်းလိုမျိုးမ ဟုတ်ဘူး။ လမ်းမတန်းထမင်းဆိုင်ဘေးကိုချ (ရပ်)ပြီး ထမင်းဝင်စားကြတာ” လို့ ကောလင်းခရိုင်အမှတ် ၁ တပ်ရင်းတာဝန်ရှိသူတဦးက မြေလတ်အသံကို ပြောပါတယ်။

ဗုံးကျပေါက်ကွဲတာကြောင့် စစ်ဘေးရှောင်ရင်း ထမင်းဆိုင်ဖွင့်ထားတဲ့ အသက် ၃၀ ကျော် အမျိုးသမီး ၁ ဦး၊ ၎င်းရဲ့သမီးဖြစ်သူ အသက် ၁၂ နှစ် မိန်းကလေး ၁ ဦး၊ အသက် ၃၀ ကျော် စက်သုံးဆီသယ်တွဲကားမောင်းနှင်သူ ၂ ဦးစုစုပေါင်း ၄ ဦးဒဏ်ရာရရှိခဲ့ပြီး စက်သုံးဆီတင်ကား ၂ စီး မီးလောင်ပျက်စီးခဲ့ကာ ထမင်းဆိုင်နဲ့ အနီးအနားကဆိုင်အချို့လည်းပျက်စီးတယ်လို့ သိရပါတယ်။

စစ်ကောင်စီဘက်က ဗုံးလာချတဲ့ ဒိုးပင်ကျေးရွာအနီးမှာ တိုက်ပွဲဖြစ်ပွားနေတာမရှိဘဲ အရပ်သားပြည်သူထိခိုက်အောင် ရည်ရွယ်ချက်ရှိရှိ ဗုံးလာချတာဖြစ် ကြောင်း အထက်ပါတာဝန်ခံက ဆက်ပြောပါတယ်။

ဒေသတွင်းသတင်းအချက်အလက်တွေကို ဖော်ပြနေတဲ့ Kawlin Information အဖွဲ့ဝင်အမျိုးသားတဦးကလည်း ဗုံးကြဲခံရမှုဖြစ်စဥ်နဲ့ပတ်သက်ပြီးအခုလိုပြောပါတယ်။

” ဗုံးကြဲချိန် မိုးရွာနေတာဖြစ်လို့ လူနည်းတယ်။ အဲ့နေရာက ထမင်းဆိုင်နဲ့ဆီဆိုင်တွေ။ ရွှေဘို-မြစ်ကြီးနားလမ်းဘေးတင် စည်ကားနေတဲ့နေရာပေါ့။ အဲနားမှာဆီကား ၂ စီး။ ပြီးတော့ဆီရောင်းတဲ့ဆိုင် အဲ့တာကို မှန်တယ်။ ဆီကား ၂ စီးပျက်သွားတယ်။ ထိတာ ၄ ဦး၊ ၁ ဦးကတော့သေမယ်ထင်တယ်”လို့ ၎င်းက ပြောပါတယ်။

ဒိုးပင်ကျေးရွာဟာ အိမ်ခြေ ၁၅၀ ကျော် လူဦးရေ ၆၀၀ ခန့်နေထိုင်တဲ့ကျေးရွာဖြစ်ပြီး စစ်ကောင်စီတပ်က ဗုံးကြဲချပြီးနောက် ထပ်မံဗုံးကြဲခံရမှာစိုးရိမ်ပြီး ရွာလုံးကျွတ် ထွက်ပြေးနေရတယ်လို့ ဆိုပါတယ်။

ပြီးခဲ့တဲ့ ဇွန် ၉ ရက်ကလည်း ကောလင်းမြို့နယ်၊ ဖလဲကျေးရွာကိုလေကြောင်းကနေ ဗုံးကြဲတိုက်ခိုက်ခဲ့ရာ ပြည်သူ ၃ ဦးထိခိုက်ဒဏ်ရာရပြီး နေအိမ် ၆ လုံးပျက်စီးခဲ့တယ်လို့ သိရပါတယ်။

စာတည်း – ဟိန်းစံ

ပုလဲ၊ ဇွန် ၆၊ ၂၀၂၅။

စစ်ကိုင်းတိုင်း၊ ပုလဲမြို့နယ်မှာ ဇွန် ၆ ရက်ဒီနေ့လယ်ပိုင်းမှာ စစ်ကောင်စီတပ်ကလေကြောင်းကနေ ဗုံးကြဲတိုက်ခိုက်ခဲ့တဲ့အတွက် အငြိမ်းစားကျောင်းဆရာ ၁ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ပုလဲမြို့နယ်၊ မင်းတိုင်ပင်ရွာကို နေ့လယ် ၁ နာရီဝန်းကျင်မှာ ဗုံးကြဲခဲ့တာကြောင့် ရွာခံ အသက် ၇၀ အရွယ်အငြိမ်းစားကျောင်းဆရာ ဦးမြင့်လွင် သေဆုံးပြီး အဆောက်အဦတချို့လည်းပျက်စီးခဲ့တယ်လို့ ဆိုပါတယ်။

“စာသင်ကျောင်းဆောင်တွေကိုမှ အရှေ့ဖက်ဆုံးအဆောင်ရယ်၊ ဆုံးတဲ့လူကြီးနေတဲ့ အိမ်နားလေးက အဆောင်ရယ် ၂ ဆောင်၊ ၂ ဆောင်ကျတာ၊ အစစင်တာလား ဘယ်လိုဖြစ်လို့လဲတော့ မသိဘူး၊ ခေါင်းပါပြတ်သွားတာ။” လို့ မင်းတိုင်ပင်ရွာခံတဦးက မြေလတ်အသံကိုပြောပါတယ်။

ဦးမြင့်လွင်ရဲ့နေအိမ်က စာသင်ကျောင်းနဲ့ကပ်လျက်ဖြစ်ပြီး ဗုံးသီးက စာသင်ကျောင်းဝန်းထဲက ကုက္ကိုပင်ပေါ်ကို ကျတာလို့ သိရပါတယ်။

“ကလေးမလေး ၁ ယောက်လည်း အစထိသေးတယ်၊ ကလေးမလေးက ၁၁ နှစ်ပဲရှိသေးတယ်၊ သိပ်တော့ မစိုးရိမ်ရဘူးပေါ့၊ ဗုံးစမှန်တာ ကလေးကို၊ သူတို့တွေက ကျောင်းနားအိမ်မှာ နေကြတာကိုး၊ အရင်လိုပဲ ကျော်ပြီးတော့တိုက်ပွဲနေရာပဲ သွားမယ်ထင်ပြီး ဒီတိုင်းနေကြတော့ထိကြတာ။” လို့ ဒေသခံအမျိုးသမီးတဦးက ပြောပါတယ်။

ပုလဲမြို့နယ်၊ ကန့်ဒေါင့်ရွာမှာ တိုက်ပွဲစဖြစ်တဲ့ ဇွန် ၂ ရက်ကစလို့ ယနေ့ ဇွန် ၆ ရက်အထိ ၅ ရက်ဆက် စစ်ကောင်စီဘက်က လေကြောင်းသုံးဗုံးကြဲနေတာကြောင့် ဒေသခံတွေကြောက်လန့်နေပြီး အချို့ကတော့ တိုက်ပွဲနဲ့ဝေးတဲ့နေရာတွေကို ထွက်ပြေးတိမ်ရှောင်နေကြရတယ်လို့ သိရပါတယ်။

ဒီနေ့အထိ ကန့်ဒေါင့်ရွာမှာ တိုက်ပွဲဆက်လက်တင်းမာနေဆဲဖြစ်ပြီး နှစ်ဖက်အထိအခိုက်ကိုတော့ မြေလတ်အသံက ဆက်လက်စုံစမ်းနေပါတယ်။

စစ်ကောင်စီတပ်က ပုလဲမြို့နယ်ကို ဇွန် ၅ ရက် တရက်ထဲမှာတင် ကန့်ဒေါင့်ရွာအနီးက နေရာတွေကို လေကြောင်းတိုက်ခိုက်မှု ၃၅ ကြိမ်ပြုလုပ်ခဲ့တယ်လို့ ဒေသခံတွေဆီက သိရပါတယ်။

စာတည်း – လင်း

ဆော၊ ဇွန် ၆ ၊၂၀၂၅။

မကွေးတိုင်း၊ ဆောမြို့နယ်၊ ညောင်ကန်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၃ ဦးသေဆုံး၊ ၆ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဇွန် ၅ ရက် နေ့လယ် ၂ နာရီခန့်မှာ ညောင်ကန်ကျေးရွာက ရခိုင်ပြည်နယ်ကိုထွက်ခွာမယ့် ကုန်တင်ကားတွေရပ်နားထားတဲ့နေအိမ်ကို တိုက်ခိုက်ရေးလေယာဥ် ၁ စီးနဲ့ ဗုံး ၁ လုံးကြဲချခဲ့ရာ နေအိမ်ပေါ်ကျရောက်ပေါက်ကွဲခဲ့တယ်လို့ ဆိုပါတယ်။

” (ကုန်တင်)ကားတွေထားတဲ့ အိမ်ပေါ်တည့်တည့်ကြီးကိုကျတာ။ အဲ့ဒီအိမ်မှာကကုန်သည်တွေပဲ စုနေကြတာ။ ရခိုင်ကိုထွက်မယ့်ကားတွေ”လို့ ဆောမြို့ခံတဦးက မြေလတ်အသံကို ပြောပါတယ်။

လေယာဥ်ဗုံးကြောင့် (အမည်စိစစ်ဆဲ) ရခိုင်ကုန်သည်အမျိုးသား ၁ ဦး၊ ကုန်ကားမောင်းနှင်သူ ကိုဝင်းစိုး၊ ကုန်တင်ကုန်ချလုပ်သား ကိုကျော်သက် တို့ ၃ ဦးနေရာမှာ သေဆုံးခဲ့ကြကာ နောက်ထပ်အမျိုးသား ၆ ဦး ဒဏ်ရာရရှိခဲ့ပြီး အဲ့ဒီထဲက ၅ ဦးမှာ ဒဏ်ရာပြင်းထန်တယ်လို့ သိရပါတယ်။

ဒါ့အပြင် ဗုံးပေါက်ကွဲမှုကြောင့် နေအိမ်ဝန်းအတွင်းရှိ ကုန်ပစ္စည်းတွေတင်ဆောင်တဲ့ ၆ ဘီးကား ၂ စီးနဲ့ ဂျက်ပလူးအမျိုးအစား ကား ၁ စီး မီးလောင်ပျက်စီးခဲ့သလို နေအိမ်ပါပြိုကျပျက်စီးခဲ့တယ်လို့ အထက်ပါအမျိုးသားက ဆိုပါတယ်။

သေဆုံး ရခိုင်ကုန်သည်အမျိုးသားရဲ့ ရုပ်အလောင်းကို အခင်းဖြစ်နေရာကနေ ရခိုင်ပြည်နယ်ကို သယ်ယူသွားတယ်လို့ သူက ဆိုပါတယ်။

ပြီးခဲ့တဲ့မေ ၁ ရက်ကလည်း အညာကတင်းကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက် ခိုက်ခဲ့တာကြောင့် ၈ နှစ်အရွယ်ကလေး ၁ ဦးအပါ အမျိုးသမီး ၄ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ