ခေတ်သဒ္ဒါ

ကညွတ်ကွင်း၊ သြဂုတ် ၂၅၊ ၂၀၂၅။

ပဲခူးတိုင်း၊ ဖြူးမြို့နယ်၊ ကညွတ်ကွင်းအခြေစိုက် ခမရ ၄၃၉ တပ်ရင်းက စစ်ကော်မရှင်တပ်ဖွဲ့ဝင် ၁ ဦး လက်နက်နဲ့ဘက်ပြောင်းလာတယ်လို့ Spring Warriors Column အဖွဲ့ဆီက သိရပါတယ်။

ဘက်ပြောင်းလာသူဟာ စစ်မှုထမ်းအပတ်စဥ် ၈ က စစ်မှုထမ်းသင်တန်းဆင်းထားသူ အသက် ၃၁ နှစ်အရွယ် ကိုအောင်ဆန်းမြင့်ဖြစ်ပြီး သြဂုတ် ၁၃ ရက်မှာ Spring Warriors Columnအဖွဲ့ဆီကို လက်နက်နဲ့ အတူ ဘက်ပြောင်းလာတယ်လို့ ဆိုပါတယ်။

စစ်သင်တန်းဆင်း ကိုအောင်ဆန်းမြင့်ဟာ MA 11 သေနတ် ၁ လက်နဲ့ ကျည်ဘောက် ၃ ခုတို့ကို ယူဆောင်လာပြီး ဘက်ပြောင်းလာခဲ့တယ်လို့ သိရပါတယ်။

“ကျနော်တို့ဆီကို ဇူလိုင်လကုန်လောက်ကတည်းက ချိတ်ဆက်တာဗျ။ အခွင့်အရေးမရသေးတာနဲ့ သူမလာသေးတာဗျ။ အခွင့်အရေးရတာနဲ့ ကျတော်တို့ဆီ ချက်ချင်းပြောပြီး ကျနော်တို့ကလည်း ရတဲ့နေရာထိသွားခေါ်လာခဲ့တာဗျ။ လက်ရှိမှာတော့ ကျနော်တို့တပ်ရင်းမှာပဲ ကျွေးမွေး စောင့်ရှောက်ထားပါတယ်။”လို့ Spring Warriors Columnအဖွဲ့ရဲ့ တာဝန်ရှိသူ တဦးက မြေလတ်အသံကို ပြောပါတယ်။

ကိုအောင်ဆန်းမြင့်ဟာ စစ်ကိုင်းတိုင်း၊ ခန္တီးမြို့နယ်ထဲက ရွှေမျှောတခုမှာ မျှောကျင်းသားသွားရောက်လုပ်စဥ် စစ်မှုထမ်းဖို့ အဓမ္မပေါ်တာဆွဲဖမ်းဆီးခံလိုက်ခဲ့ရတာဖြစ်ပြီး လက်ရှိမှာတော့ သူ့ကို ငွေကျပ် ၁၀ သိန်းဆု ချီးမြှင့်ထားတယ်လို့ ဆိုပါတယ်။

စစ်အာသိမ်းချိန်ကနေ လက်ရှိအချိန်ထိ Spring Warriors Column အဖွဲ့ဆီကို စစ်ကော်မရှင် တပ်သား စုစုပေါင်း ၄ ဦး လက်နက်နဲ့အတူ ဘက်ပြောင်းထားတယ်လို့ သိရပါတယ်။

စာတည်း – လင်း

ချောင်းဦး၊ သြဂုတ် ၂၂၊ ၂၀၂၅။

စစ်ကိုင်းတိုင်း၊ မုံရွာ-ချောင်းဦးလမ်းပိုင်းမှာ ခရီးသည်တင်ကားတွေ မိုင်းထိလို့ ယာဥ်မောင်း ၁ ဦးသေဆုံးကာ ယာဥ်နောက်လိုက် ၁ ဦး ထိခိုက်ဒဏ်ရာရရှိခဲ့တယ်လို့ ကြုံတွေ့ခဲ့ရသူခရီးသည်တွေဆီက သိရပါတယ်။

သြဂုတ် ၂၂ ရက်ဒီကနေ့ မနက် ၉ နာရီလောက်မှာ ချောင်းဦးမြို့နယ်၊ ရေပိုးစားကန်ရွာအနီး မုံရွာ-ချောင်းဦးလမ်းမှာ မုံရွာမြို့ကနေ မန္တလေးကို မောင်းနှင်လာတဲ့ ခရီးသည်တင်ကား ၃ စီးမှာ မိုင်းထိမှန်ခဲ့တာလို့ ဆိုပါတယ်။

“မုံရွာကနေ မန္တလေးဘက်သွားတဲ့ကားတွေ မိုင်းဆွဲခံရတာပါ။ Honda Fit ကားသေးနဲ့ ရွှေမြန်မာကားကတော့ တော်တော် ထိသွားတယ်။ ရှေ့မှန်တွေလည်း အက်ကွဲပြီး ကားဘော်ဒီ တခုလုံးလည်း ရစရာမရှိဘူး။ စစ်သားတွေ ရောက်လာပြီး ရှင်းလင်းရေးတွေတော့ လုပ်နေကြတာ တွေ့ခဲ့တယ်”လို့ ကိုယ်တိုင်ကြုံ တွေ့ခဲ့ရသူ ခရီးသည်တဦးက မြေလတ်အသံကို ပြောပါတယ်။

မိုင်းထိတာကြောင့် ခရီးသည်တင်ယာဥ် Express ၁ စီး၊ Honda Fit ကားသေး(ခရီးသည်တင်) ၁ စီးနဲ့ အံစားတုံးခရီးသည်တင်ယာဥ် ၁ စီးတို့ မိုင်းစထိမှန်ခဲ့ကာ အံစာတုံးကားက ယာဥ်မောင်းအမျိုးသား နေရာမှာသေဆုံးခဲ့ပြီး ယာဥ်နောက်လိုက်မှာ ထိခိုက်ဒဏ်ရာ(ပြင်းထန်) ရရှိခဲ့တာကြောင့် မြင်းမူဆေးရုံမှာ အရေးပေါ် ဆေးကုသနေရပြီး အခြေအနေ စိုးရိမ်ရတယ်လို့ သိရပါတယ်။

ဒါ့အပြင် မိုင်းပေါက်ကွဲမှုကြောင့် Honda Fit ကားမှာ မောင်းနှင်မရတော့တဲ့အထိ အပျက်အစီးများခဲ့လို့ ကရိန်းကားနဲ့ မုံရွာဘက်ကို သယ်ဆောင်သွားကာ ယာဥ်မောင်းနဲ့ ခရီးသည်တွေ အထိခိုက်မရှိ​ခဲ့ဘူးလို့ ဆိုပါတယ်။

” အဲ့ကားသေးလေးပေါ်က ခရီးသည်တွေကိုတော့ သူတို့ကားသေးလိုင်းက ကားတွေကပဲ ကူညီပြီး မုံရွာဘက်ကို ပြန်ခေါ်သွားကြတယ်။ ခရီးသည်တွေအကုန် သူတို့နေအိမ်တွေ ပြန်ရောက်သွားကြပါပြီ။ မဟာနွယ်(Express) ကားကတော့ အထိခိုက်နည်းလို့ မန္တလေးဘက်ကို ဆက်မောင်းသွားတယ်”လို့ ခရီးသည်တင်ယာဥ်မောင်းတဦးက ပြောပါတယ်။

ခရီးသည်ယာဥ်တွေ မိုင်းထိတာကြောင့် အခင်းဖြစ်နေရာအနီး မုံရွာ – မန္တလေးလမ်းပိုင်းမှာ ကားအစီးရေ ၇၀ နီးပါးဟာ ၂ နာရီကျော်ကြာ လမ်းပိတ်ဆို့မှုဖြစ်ပွားခဲ့ပြီးနောက် လက်ရှိမှာတော့ ပုံမှန်အတိုင်းဆက်လက်သွားလာနေကြတယ်လို့ သိရပါတယ်။

ခရီးသည်တင်ကားတွေ မိုင်းထိတာနဲ့ ပတ်သက်ပြီး ဘယ်အဖွဲ့အစည်းတွေကလုပ်ဆောင်တယ်ဆိုတာ ကို မြေလတ်အသံအနေနဲ့ အတည်မပြုနိုင်သေးဘဲ မုံရွာ-ချောင်းဦးလမ်းပိုင်းဟာ စစ်ကော်မရှင်တပ်နဲ့ ကာကွယ်ရေးတပ်ဖွဲ့တွေအကြား တိုက်ပွဲဖြစ်ပွားတာနဲ့ မိုင်းဆွဲတိုက်ခိုက်မှုတွေကြောင့် အရပ်သားသေဆုံးမှုတွေ မကြာခဏဆိုသလို ဖြစ်ပွားလေ့ရှိတာပါ။

ပြီးခဲ့တဲ့ မတ် ၄ ရက်က မုံရွာ – ချောင်းဦးလမ်းပိုင်း နတ်ရေကန်အနီးမှာ စစ်ကော်မရှင်တပ်ဖွဲ့ဝင်နဲ့ ဒေသတွင်းကာကွယ်ရေးတပ်ဖွဲ့တွေ နှစ်ဖက် အပြန်အလှန် ပစ်ခတ်မှုအကြားမှာ ခရီးသည်တင်ကားပေါ်က ၁ နှစ်ခွဲအရွယ် ကလေးငယ် အပါအဝင် ၃ ဦးသေဆုံးခဲ့တယ်လို့လည်း သိရပါတယ်။

စာတည်း – မြတ်

မုံရွာစစ်ကော်မရှင်ကဖွင့်လှစ်တဲ့ ကန်သာယာညစျေးမှာ ရောင်းခွင့်ပြုထားပေမယ့် လုံခြုံမှုမရှိလို့ အဆင်မပြေ ဟုဆို

မုံရွာ၊ သြဂုတ် ၁၉၊ ၂၀၂၅။

စစ်ကိုင်းတိုင်း၊ မုံရွာမြို့၊ ကျောက္ကာလမ်းနဲ့ ပြည်ထောင်စုလမ်းမကြီးဘေးတွေမှာ ဖွင့်လှစ်နေတဲ့စျေးဆိုင်တွေကို စစ်ကော်မရှင်နဲ့စည်ပင်က စျေးရောင်းခွင့်ပိတ်သိမ်းလိုက်လို့ စျေးသည်တွေအခက်အခဲကြုံတွေ့နေရတယ်လို့ ဒေသခံတွေဆီက သိရပါတယ်။

မုံရွာမြို့၊ ကျောက္ကာလမ်းမကြီးဘေးမှာ တွန်းလှည်းနဲ့စားစရာတွေရောင်းချနေတဲ့ စျေးဆိုင် ၂၀ ကျော်၊ ပြည်ထောင်စုလမ်းမကြီးဘေးမှာ ၁၃ ဆိုင်ခန့် စုစုပေါင်း စျေးဆိုင် ၃၀ ကျော်ရှိတာဖြစ်ပြီး အဲ့ဒီဆိုင်တွေကို သြဂုတ် ၉ ရက်ကစတင်ကာ စစ်ကော်မရှင်တပ်ကလက်နက်ကိုင်တပ်ဖွဲ့ဝင် ၅ ဦးနဲ့ စည်ပင်ဝန်ထမ်းတွေက စျေးရောင်းခွင့်အပြီးတိုင် ပိတ်သိမ်းလိုက်တာလို့ ဆိုပါတယ်။

” ဒီကြားထဲနေရာတွေရှာပြီး ဖွင့်သေးတယ်။ လမ်းမကြီးဘေးလောက်တော့ အဆင်မပြေဘူး။ ဖောက်သည်တွေလည်း အရင်လိုမပေါတော့ဘူးလေ။ ရပ်ကွက်လမ်းကြားထဲ ဖွင့်ရတော့ လာဝယ်တဲ့သူကလည်းရှားတယ်။ ပထမဖွင့်တဲ့ရက်ကဆို အရင်းပါ ပြုတ်သွားတယ်။ နောက် ၃ ရက်လောက်ဆက်ဖွင့်ပြီး အမြတ်သိပ်မကျန်တော့တာနဲ့ ပိတ်ထားရတာ” လို့ ၃ နှစ်ကျော်ကြာ တုတ်ထိုးရောင်းချလာတဲ့စျေးသည်တဦးက မြေလတ်အသံကို ပြောပါတယ်။

ကျောက္ကာလမ်းမကြီးဘေးမှာ စျေးရောင်းခဲ့စဥ်က တရက်အမြတ်ငွေ ၃၀,၀၀၀ ကျပ်ကနေ ၅၀,၀၀၀ ကျော်အထိ မြတ်ခဲ့ပေမယ့် အခုလို လမ်းဘေးစျေးရောင်းခွင့်ပိတ်သိမ်းမှု တပတ်ကျော်ကြာမြင့်သွားပြီးတဲ့နောက် တွန်းလှည်းစျေးသည်တွေအနေနဲ့ စျေးရောင်းဖို့နေရာရှားပါးသွားတာကြောင့် မိသားစုစားဝတ်နေရေးအခက်အခဲနဲ့ စတင်ရင်ဆိုင်နေရတယ်လို့ ဆိုပါတယ်။

စစ်ကော်မရှင်လက်အောက်မြို့နယ်စည်ပင်သာယာရေးအဖွဲ့က သြဂုတ် ၁၂ ရက်ကစတင်ကာ ကန်သာယာမှာ ညစျေးဖွင့်လှစ်ပြီး စျေးဆိုင်တွေရောင်းချခွင့်ပြုခဲ့ပေမယ့် မုံရွာမြို့ရဲ့လမ်းဘေးစျေးသည်အများစုဟာ ကျောက္ကာလမ်းမကြီးအနီး ထန်းတော၊ သလ္လာ၊ မြဝတီ၊ အေးသာယာ စတဲ့ရပ်ကွက်နေသူတွေဖြစ်လို့ ကျောက္ကာလမ်းမကြီးဘေး ဆိုင်ဖွင့်လှစ်ရတာလွယ်ကူပြီး ကန်သာယာညစျေးဟာ နေထိုင်ရာရပ်ကွက်တွေနဲ့ ဝေးကွာတာ၊ စျေးဝယ်သူနည်းပါးတာအပြင် မြို့တွင်းလုယက်မှုတွေ မကြာခဏရှိနေတာကြောင့် သွားရောက်ရောင်းချဖို့ အဆင်မပြေဘူးလို့ အထက်ပါစျေးသည်က ပြောပါတယ်။

စစ်ကော်မရှင်က လမ်းမကြီး ၂ ခုရဲ့ဘေးရှိ စျေးဆိုင်တွေကို ရောင်းချခွင့်ပိတ်လိုက်တာဟာ ကန်သာယာညစျေးမှာ စည်ကားလိုတာကြောင့်ဖြစ်နိုင်ကြောင်း မြို့ခံတွေကသုံးသပ်ကြပြီး ကန်သာယာညစျေးဟာ ညဘက်စျေးဖြစ်တာကြောင့် ရောင်းချသူနည်းပါးသလို လုံခြုံရေးအခြေအနေတွေကြောင့်လည်း သွားရောက်စားသုံးဖို့ အဆင်မပြေဘူးလို့ မြို့ခံအမျိုးသမီးတဦးက ပြောပါတယ်။

” တကယ်တော့ ဒီကျောက္ကာလမ်းက မြို့အလယ်လို ဖြစ်နေတာလေ။ လူသွားလူလာလည်း စည်ကားတော့ သွားဝယ်စားရတာ အဆင်ပြေတယ်။ ဟိုးဘက် ကန်သာယာထိကျ သွားရလာရတာ မလွယ်ကူတော့ဘူး။ ရိုက်လုတာတွေလည်း ရှိထားတော့ သိပ်မသွားကြဘူး။ ဘယ်လောက်စားချင်နေနေ တကူးတက သွားဝယ်မစားကြဘူး”လို့ သူက ပြောပါတယ်။

ယခင်က မုံရွာမြို့ကို စစ်ကော်မရှင်တပ်နဲ့အစိုးရခေါင်းဆောင်ပိုင်းတွေလာရောက်ချိန် အဲ့ဒီလမ်းမကြီးဘေးတွေက စျေးဆိုင်တွေကို ၃ ရက်ကနေ ၅ ရက်အထိ ယာယီပိတ်ခိုင်းလေ့ရှိပြီး ပြန်လည်ဖွင့်လှစ်ခွင့်ပြုခဲ့ပေမယ့် လက်ရှိမှာ အဲ့ဒီစျေးဆိုင်တွေကို စစ်ကော်မရှင်က အပြီးတိုင်ပိတ်သိမ်းခိုင်းခဲ့တာလို့ သိရပါတယ်။

စာတည်း – ဟိန်းစံ

ဒီပဲယင်း၊ သြဂုတ် ၁၈၊ ၂၀၂၅။

စစ်ကိုင်းတိုင်း၊ ဒီပဲယင်းမြို့နယ်၊ မူးကမ်းကြီးကျေးရွာ ဘုန်းကြီးကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် သံဃာတော် ၁ ပါးအပါအဝင် ၁၁ ဦး သေဆုံးပြီး ဘုန်းကြီးကျောင်းဆောင်လည်း ပျက်စီးသွားခဲ့တယ်လို့ ဒေသခံတွေဆီက သိရပါတယ်။

သြဂုတ် ၁၈ ရက် နေ့လယ် ၁ နာရီခွဲကျော်မှာ ဂျက်ဖိုက်တာနဲ့ မူးကမ်းကြီးရွာ၊ မိုးကောင်းဘုန်းကြီးကျောင်းကို ဗုံး ၁ လုံးကြဲချခဲ့တာကြောင့် သံဃာတော် ၁ ပါး၊ ဒေသခံ ၄ ဦး သေဆုံးခဲ့ပြီး ဆေးကုသစဉ် သေဆုံးသူတွေ အပါအဝင် စုစုပေါင်း ၁၁ ဦး သေဆုံးထားတယ်လို့ သိရပါတယ်။

“ဗုံးတလုံးကြဲချပြီး စက်လက်နက်နဲ့ ဝှေ့ယမ်းသွားတယ်။ ဘုန်းကြီးကျောင်းပေါ်ကို တည့်တည့်ကျတာဗျ။ ဒဏ်ရာရသူတွေလဲ ရှိတယ်။ ဘုန်းကြီးကျောင်းကတော့ ရစရာမရှိဘူး အကုန်ပျက်စီးသွားတယ်။ သေဆုံးသူတွေရဲ့ အချက်အလက်အသေးစိတ်ကိုတော့ အခုထိ အတည်မပြုနိုင်သေးဘူး။”လို့ ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့ရဲ့ တာဝန်ရှိသူတဦးက မြေလတ်အသံကို ပြောပါတယ်။

လေကြောင်းသုံး ဗုံးကြဲချတဲ့အပြင် စက်လက်နက်နဲ့ပါပစ်ခတ်သွားတာကြောင့် ထိခိုက်ဒဏ်ရာရရှိသူတွေလည်းရှိနေပြီး သူတို့ကိုတော့ လိုအပ်တဲ့ဆေးကုသမှုတွေ လုပ်ဆောင်ပေးနေတယ်လို့ သိရပါတယ်။

” ကျောင်းထဲမှာ ဖြစ်ဖြစ်ချင်း သေတာ ၃ ဦး၊ ဆေးကုချိန် သေတာ ၂ ဦး။ဆေးခန်းရောက်တဲ့အချိန် သေဆုံး၊ ဦးနှောက်ထွက်သွားတာ။ အသဲသန်လူနာတွေအများကြီး”လို့ မြေပြင်မှာရှိနေသူတဦးက ပြောပါတယ်။

ဒဏ်ရာရရှိသူတွေထဲမှာ ထိခိုက်မှု ပြင်းထန်တာကြောင့် အသက်အန္တရာယ် စိုးရိမ်ရတဲ့အခြေအနေမှာရှိပြီး သေဆုံးသူဦးရေထပ်တိုးနိုင်တယ်လို့လည်း သိရပါတယ်။

ဒေသခံတွေရဲ့ ပြောကြားချက်အရ အစည်းအဝေးပြုလုပ်နေချိန် ဗုံးကြဲခံရတာဖြစ်ပြီး လွှတ်တော်ကိုယ်စားလှယ်ဟောင်းတဦးလည်း ဒဏ်ရာရထားတယ်လို့ သိရပါတယ်။

စစ်ကောင်စီတပ်က လေကြောင်းတိုက်ခိုက်မှုအပြီးမှာ ဒေသခံတွေလည်း ဘေးလွတ်ရာတွေဆီ ထွက်ပြေးတိမ်းရှောင်နေကြတယ်လို့လည်း ဒေသခံတွေကပြောပါတယ်။

ဒါ့အပြင် ဩဂုတ် ၁၈ ရက် ဒီမနက် ၁၀ နာရီလောက်မှာလည်း ဝက်လက်မြို့နယ်၊ နဘဲပင်လှရွာဘုန်းကြီးကျောင်းကို ဂျက်ဖိုက်တာနဲ့ ပေါင် ၃၀၀ ဗုံး ၂ လုံးကြဲချတာကြောင့် ဘုန်းကြီးကျောင်းနဲ့ ဓမ္မာရုံပျက်စီးခဲ့ပြီး သက်တော် ၇၀ အရွယ်သံဃာ ၁ ပါး နဲ့ အမျိုးသား ၁ ဦး၊ ၁၀ နှစ်အရွယ် ကိုရင် ၁ ပါး ထိခိုက်ဒဏ်ရာရခဲ့ပါသေးတယ်။

စာတည်း – လင်း

မုံရွာ၊ သြဂုတ် ၁၀၊ ၂၀၂၅။

စစ်ကိုင်းတိုင်း၊ မုံရွာမြို့မှာ စစ်ကောင်စီလက်အောက် စည်ပင်သာယာဌာနက မြို့တွင်းအမှိုက်သိမ်းနေတဲ့ ကား ၁ စီး၊ ယာဥ်မောင်း ၁ ဦး နဲ့ အမှိုက်သိမ်းဝန်ထမ်း ၃ ဦး ပျောက်ဆုံးနေတယ်လို့ ဒေသခံတွေဆီက သိရပါတယ်။

သြဂုတ် ၉ ရက် ယမန်နေ့ မနက် ၉ နာရီ ၄၅ မိနစ်လောက်က မုံရွာမြို့၊ ကျောက္ကာလမ်းကနေ သာစည်လမ်းအကူးစပ်ကြားမှာ မြို့နယ်စည်ပင်ပိုင် SKAT အမျိုးအစားအမှိုက်ကားနဲ့ ယာဥ်မောင်းဖြစ်သူ ဦးနိုးနိုး၊ ယာဥ်နောက်လိုက် အမှိုက်သိမ်းလုပ်သား ၃ ဦးတို့ ပျောက်ဆုံးသွားပြီး အဆက်အသွယ်မရ ဖြစ်နေတယ်လို့ ဆိုပါတယ်။

” မနေ့က ဖြစ်ဖြစ်ချင်း အဲ့ကားမောင်းသူနဲ့ အလုပ်သမားတွေရဲ့ မိသားစုဝင်တွေကို စစ်စရာရှိတာတော့ စစ်ဆေးပြီးသွားပြီလို့ ကြားတယ်။ သက်ဆိုင်ရာလူကြီးတွေလည်း ရဲတိုင်ရုံးတိုင်တော့ လုပ်ထားကြတာပဲ။ ဘာမှတော့ မထူးသေးဘူး”လို့ မုံရွာမြို့နယ်စည်ပင်နဲ့ နီးစပ်သူတဦးက မြေလတ်အသံကို ပြောပါတယ်။

ပျောက်ဆုံးနေသူတွေရဲ့ မိသားစုဝင်တွေက မနေ့မနက် ၁၁ နာရီလောက်မှာ မုံရွာ၊ အမှတ် ၂ ရဲစခန်းမှာ အမှုဖွင့်တိုင်ကြားခဲ့ပေမယ့် သြဂုတ် ၁၀ ရက် ဒီကနေ့မနက်ပိုင်းအထိ ပျောက်ဆုံးသွားတဲ့ အမှိုက်ကား၊ ယာဥ်မောင်းနဲ့ အလုပ်သမားတွေရဲ့ သတင်းတစုံတရာ မသိသေးရသေးဘူးလို့လည်း ဆိုပါတယ်။

စည်ပင်အမှိုက်ကားပျောက်ဆုံးပြီးနောက် အခင်းဖြစ်ပွားခဲ့တဲ့ မုံရွာမြို့ပေါ် ကျောက္ကာလမ်းမကြီးနဲ့ သာစည်လမ်းမကြီးဘေးက ရပ်ကွက်လမ်းကြားတွေမှာ စစ်ကော်မရှင်ပူးပေါင်းတပ်ဖွဲ့ဝင်တွေက အိမ်စီးကားတွေနဲ့ ကင်းပတ်ရှာဖွေမှုတွေ လုပ်ဆောင်နေတယ်လို့ မြို့ခံတွေက ပြောပါတယ်။

စစ်အာဏာသိမ်းပြီးနောက်ပိုင်း မုံရွာမြို့ပေါ်က လူနေရပ်ကွက်တွေအတွင်းကို စည်ပင်အမှိုက်ကားတွေ မလာတော့တာကြောင့် နီးစပ်ရာအမှိုက်ပုံးရှိတဲ့ဆီကိုသာ မြို့ခံတွေက သွားရောက်အမှိုက်ပစ်ကြရပြီး အဲ့ဒီအမှိုက်ပုံးထဲက အမှိုက်တွေကိုပဲ စည်ပင်ကားနဲ့ လာရောက်သိမ်းယူကြတယ်လို့ သိရပါတယ်။

စာတည်း – ဟိန်းစံ

သိုက်ထွန်း၊ ခေတ်သဒ္ဒါ

မုံရွာ၊ သြဂုတ် ၇၊ ၂၀၂၅။

စစ်ကိုင်းတိုင်း၊ မုံရွာမြို့မှာ စစ်ကောင်စီတပ်ဖွဲ့ဝင်တွေက ပေါ်တာဆွဲဖမ်းဆီးတာတွေ ခပ်စိပ်စိပ်လုပ်လာပြီး ဒေသခံ ၄၀ ခန့်ဖမ်းဆီးခံထားရတယ်လို့ မြို့ခံတွေဆီက သိရပါတယ်။

မုံရွာမြို့ရဲ့ ပေ ၈၀ လမ်း၊ ရန်ကင်းမီးပွိင့်၊ ကျောက္ကာလမ်း၊ ကမ်းနားလမ်း၊ မြို့ပေါ်ရပ်ကွက်တွေထဲနဲ့ မြို့အနီးကျေးရွာတွေမှာ ဇူလိုင်နောက်ဆုံးပတ်ကတည်းက စတင်ဖမ်းဆီးနေတာလို့ ဆိုပါတယ်။

“ဇူလိုင် ၂၄ ရက်ပတ်ဝန်းကျင်ကတည်းက ပေါ်တာဆွဲနေတာ။ ခုရက်ပိုင်းပိုကြမ်းလာတယ်။ အချို့နေအိမ် အလုပ်ရုံထဲ ဝင်ဆွဲတယ်ပြောတယ်။ လောလောဆယ်တော့ နေရာတနေရာပြီး တနေရာ ရွှေ့ပြောင်းပြီး အလစ်အငိုက်ဆွဲနေတာ”လို့ ဒေသခံအမျိုးသားတဦးကပြောပါတယ်။

စစ်ကောင်စီတပ်ဟာ စစ်မှုထမ်းသင်တန်း အပတ်စဥ် ၁၆ နဲ့ ၁၇ အတွက် လူမပြည့်မီသေးတာကြောင့် ခုလိုပေါ်တာ ဆွဲဖမ်းဆီး တာဖြစ်နိုင်ပြီး သြဂုတ် ၇ ရက်ဒီကနေ့အထိ ဖမ်းဆီးခံထားရသူ ၄၀ ဝန်းကျင်ရှိကာ အဲ့ဒီထဲက ၅ ဦးကိုသာပြန်လွှတ်လိုက်တယ်လို့ သိရကြောင်း သူကဆက်ပြောပါတယ်။

ဒီအရေအတွက်ဟာ ဒေသခံတွေ လက်လှမ်းမီသလောက်သိရှိတဲ့အရေအတွက်ဖြစ်ကာ မြေပြင်မှာ ဒီထက်ပိုများနိုင်တယ်လို့လည်း ဆိုပါတယ်။

စစ်ကောင်စီတပ်တွေဟာ ယူနီဖောင်းဝတ်နဲ့အပြင် အရပ်ဝတ်တွေနဲ့ပါစောင့်ကြည့်ဖမ်းဆီးနေတာဖြစ်ပြီး ခုလိုဖမ်းဆီးတာတွေ လုပ်နေတာကြောင့်လူငယ်တွေလည်း လမ်းပေါ်ကိုမထွက်ရဲကြဘူးလို့ ဆိုပါတယ်။

သြဂုတ် ၃ ရက်မှာလည်း မုံရွာမြို့၊ စက်မှုဇုန်ရပ်ကွက်က ရေဦးဆန်ဆိုင်ဂိတ်၊ ရန်ကင်း ရပ်ကွက်ထဲရှိ အသောကလမ်း၊ ကမ်းနားလမ်း၊ ရေကူးကန်လမ်းနဲ့ ဗိုလ်တေဇလမ်းတွေမှာ လက်နက်ကိုင် စစ်ကောင်စီ အဖွဲ့ဝင် အင်အား ၇ ဦးကျော်နဲ့ လဝကရုံးက ဝန်ထမ်းအချို့ဟာ အံစာတုံးကား ၁ စီး၊ စစ်ကား ၁ စီးနဲ့ လမ်းသွားလမ်းလာအမျိုးသားတွေကို ဖမ်းဆီးခဲ့တယ်လို့ နောက်ထပ်မြို့ခံတဦးက ပြောပါတယ်။

ဖမ်းဆီးခံရသူတွေထဲမှာ မုံရွာမြို့ပေါ်ရှိ ရုံကြီး၊ ဆူးလေကုန်း၊ အောင်ချမ်းသာ၊ စက်မှုဇုန်၊ အင်းရွာသစ်၊ သလ္လာ၊ ချမ်းမြသာစည်စတဲ့ ရပ်ကွက်တွေက အမျိုးသားတွေနဲ့ မုံရွာမြို့အနီးရှိ လယ်ဇင်ကျေးရွာနဲ့ သက္ကယ်ကျင်းရွာက အမျိုးသားတွေလည်းပါဝင်တယ်လို့ ဆိုပါတယ်။

“အဲ့ ၃ ရက်နေ့ကတော့ စစ်ကားပေါ်ကို လူအပြည့်ဘဲ။ ၂၀ ဦးရေ ဝန်းကျင်လောက်တော့ ပါမယ်။ ညနေဘက် ၆ နာရီလောက်ကျ ဗိုလ်ချုပ်လမ်းပေါ်ကနေ အနောက်တန်းတန်း မောင်းချသွားတာ။ အဲ့နေ့က ညနေဘက်လူငယ်တွေ သိပ်မထွက်ကြဘူး။ လမ်းပေါ်မှာ လူကြီးပိုင်းတွေပဲ တွေ့ရတာ။”လို့ မြို့ခံအမျိုးသားတဦးက မြေလတ်အသံကို ပြောပါတယ်။

စစ်မှုထမ်းဖို့ ဖမ်းဆီးသွားသူတွေကို မုံရွာမြို့တော်ခန်းမထဲမှာ ထိန်းသိမ်းထားပြီးနောက် လူဦးရေ အရေအတွက်ပြည့်ပါက မုံရွာမြို့ အနောက်မြောက်တိုင်းစစ်ဌာနချုပ် – နမခဆီကို ပို့ဆောင်တယ်လို့ ဆိုပါတယ်။

သြဂုတ် ၄ ရက်ကနေ ၆ ရက်အထိလည်း မုံရွာမြို့ပေါ် မိုးရွာသွန်းနေပေမယ့် ထန်းတောရပ်ကွက်၊ မုံရွာတောင်၊ စက်မှုဇုန်ရပ်ကွက်၊ မြဝတီရပ်ကွက်နဲ့ အလုံသုံးထောင့်ချွန်းနေရာတွေမှာ လမ်းသွားလမ်းလာ အမျိုးသားတွေကို ဖမ်းဆီးမှုတွေလုပ်ဆောင်ခဲ့တယ်လို့ သိရပါတယ်။

စစ်မှုထမ်းဖမ်းဆီးခံရသူတွေထဲက မြို့ပေါ်နေသူတွေဖြစ်ပါက မှတ်ပုံတင်တွေကို မိသားစုဝင်တွေဆီ ဆက်သွယ်တောင်းခံပြီး လာရောက်မပေးသူတွေကိုတော့ မှတ်ပုံတင်အသစ်ပြန်လည် လုပ်ဆောင် ပေးတယ်လို့လည်း အဓမ္မဖမ်းဆီးခံရသူတဦးရဲ့ မိသားစုဝင်ဆီက စုံစမ်းသိရပါတယ်။

စာတည်း – လင်း