မြေလတ်အသံ

ချောက်၊ မေ ၂၀၊ ၂၀၂၆။

မကွေးတိုင်း၊ ချောက်မြို့အထွက်၊ အေးရွာအနီး ဓာတ်ဆီဆိုင်အရှေ့မှာ စျေးရောင်းသွားတဲ့ အရောင်းဝန်ထမ်း ၂ ဦးကို စစ်ကော်မရှင်တပ်က ပေါ်တာဆွဲဖမ်းဆီးသွားတယ်လို့ မြို့ခံတွေဆီက သိရပါတယ်။

မေ ၁၉ ရက်မနက် ၁၁ နာရီခန့်မှာ အရပ်ဝတ်နဲ့ လက်နက်ကိုင်ဆောင်ထားတဲ့ စစ်ကော်မရှင်အဖွဲ့ဝင်အင်အား ၁၁ ဦးခန့်ဟာ လမ်းသွားလမ်းလာတွေကို စစ်ဆေးနေစဥ် ချောက်မြို့ဘက်ကနေ ထွက်လာတဲ့ “တိုးကြွယ်” အမွှေးတိုင်၊ ဖယောင်းတိုင် ထုတ်လုပ်ဖြန့်ချီရောင်းချရေး ကုမ္ပဏီက ယာဥ်မောင်း အပါအဝင် ၃ ဦးလိုက်ပါလာတဲ့ ကုမ္ပဏီပိုင်ကားကိုတားဆီးပြီး ဝန်ထမ်း ၂ ဦးကို ဖမ်းဆီးခဲ့တာလို့ဆိုပါတယ်။

“ချောက်မှာစျေးရောင်းပြီး အခြားစျေးကွက်သွားရောင်းဖို့အပြန်မှာ သူတို့(စကမ)တွေက မင်းတို့ ၁၈ နှစ်ပြည့်ပြီဆိုပြီး ခေါ်သွားတယ်။ စုံစမ်းမေးကြည့်တော့ ထွေအုပ်ဝန်ထမ်းတွေကပြောတယ် သူတို့ကတိုင်းခြားဖြစ်နေတော့ စစ်မှုထမ်းခေါ်လို့မရဘူးလည်းပြောတယ်။ မရရင်ပြန်လွှတ်ပေါ့ဗျာ။ ထွေအုပ်ကိုမေးတော့ ခရိုင်ရဲကလွှတ်ပေးမှ။ ရဲကိုမေးတော့လည်း ထွေအုပ်ကလွှတ်ပေးမှဆိုပြီး ပြောနေကြတယ်။ အခုတောင်ဆက်သွယ်လို့မရတော့ဘူးဖြစ်နေတယ်”လို့ မြို့ခံတဦးက ပြောပါတယ်။

ဖမ်းဆီးခံရသူတွေဟာ ဧရာဝတီတိုင်းဇာတိသား အသက် ၂၀ အရွယ် အရောင်းစာရေး မောင်လင်းကောင်းခန့်၊ မောင်အောင်အောင်ဦးတို့ဖြစ်ပြီး ရန်ကုန်ကနေ ချောက်မြို့ကို စျေးရောင်းထွက်လာချိန် ခုလိုဖမ်းဆီးခံရတာလို့ ဆိုပါတယ်။

လက်ရှိမှာတော့ ဝန်ထမ်း ၂ ဦးကို ချောက်မြို့နယ်အထွေထွေအုပ်ချုပ်ရေးဦးစီးဌာနရုံးမှာ ဖမ်းဆီးထားပြီး ကျန်းမာရေးစစ်ဆေးမှုတွေပြုလုပ်နေပြီး ယာဥ်မောင်းကတော့ အသက်အရွယ်ကြီးနေတာကြောင့် ကားနဲ့ယာဥ်မောင်းကိုတော့ ပြန်လွှတ်ပေးထားတယ်လို့ ဆိုပါတယ်။

အခုလို နယ်ထွက်စျေးရောင်းတဲ့ ကုမ္ပဏီဝန်ထမ်းတွေကို စစ်ကော်မရှင်ဘက်က ဖမ်းဆီးပြီး စစ်မှုထမ်းတွေထဲ ထည့်ဖို့ ကြိုးစားလာနေတဲ့အပေါ် ရေရှည်မှာ ဝန်ထမ်းတွေက နယ်ကျော်စျေးရောင်းထွက်ဖို့ ကြောက်လန့်လာနိုင်ပြီး ထုတ်လုပ်ထားတဲ့ကုန်ပစ္စည်းတွေ မရောင်းချမဖြန့်ဖြူးနိုင်ပါက ကုမ္ပဏီတွေ လုပ်ငန်းပြိုလဲသွားနိုင််တယ်လို့ ကုမ္ပဏီနဲ့နီးစပ်သူတွေဆီက သိရပါတယ်။

ဖမ်းဆီးခံရတဲ့ အရောင်းဝန်ထမ်း ၂ ဦးပြန်လည်လွတ်မြောက်လာဖို့ ကုမ္ပဏီဘက်က ကြိုးစားနေပေမယ့် မေလ ၂၀ ရက်အထိ ပြန်လွတ်လာတာမရှိသေးဘူးလို့ သိရပါတယ်။

စာတည်း – လင်း

ဝက်လက်၊ မေ ၂၀၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ မင်းကန်ကျေးရွာအနီးမှာ နွားကျောင်းထွက်တဲ့ အမျိုးသမီး ၁ ဦး မိုင်းထိပြီးဒဏ်ရာရခဲ့တယ်လို့ ရွာခံတွေဆီက သိရပါတယ်။

မိုင်းထိသူဟာ မင်းကန်ရွာမှာနေထိုင်တဲ့ အသက် ၂၃ နှစ်အရွယ် မကလေးလေး (ခ) သူဇာမြင့်ဖြစ်ပြီး မေ ၁၉ ရက် ညနေ ၃ နာရီခန့်မှာ ကျေးရွာအနောက်တောင်ဘက် နွားကျောင်းထွက်ချိန် မိုင်းထိခဲ့တာလို့ ဆိုပါတယ်။

“သူက အဲ့ဘက်မှာနွားကျောင်းတာ။ နဂိုကလည်း သူကနွားကျောင်းနေကျ။ သူထိတာက လက်လုပ်မိုင်း။ ကွန်ကျူးပိုက်တွေနဲ့လုပ်တဲ့မိုင်းပါ” လို့ ရွာခံတဦးကပြောပါတယ်။

မိုင်းထိတဲ့အတွက် အဲ့ဒီအမျိုးသမီးရဲ့တင်ပါးနဲ့လက်ဖျံတို့မှာ မိုင်းစမှန်ဒဏ်ရာရခဲ့ပြီး နွားမ ၁ ကောင်ကတော့နေရာမှာတင် သေဆုံးခဲ့တယ်လို့ ဆိုပါတယ်။

အခုမိုင်းထိတဲ့ကျေးရွာအနီးကို စစ်ကော်မရှင်စစ်ကြောင်းဝင်ရောက်ဖူးတာမရှိဘဲ ပေါက်ကွဲတဲ့မိုင်းဟာ ကာကွယ်ရေးတပ်ဖွဲ့ဝင်တွေထောင်တတ်တဲ့မိုင်းမျိုးဖြစ်တယ်လို့ အထက်ပါရွာခံက ခန့်မှန်းပါတယ်။

ဒဏ်ရာရအမျိုးသမီးကိုတော့ နီးစပ်ရာဆေးခန်းမှာဆေးကုသနေရပြီး ဒဏ်ရာကတော့ မစိုးရိမ်ရဘူးလို့ သိရပါတယ်။

ပြီးခဲ့တဲ့ မတ်လ ၃၁ ရက်ကလည်း ပွင့်ဖြူမြို့နယ်၊ မလယ်ကျေးရွာနေ အသက် ၁၃ နှစ်အရွယ် မိန်းကလေးငယ် ၁ ဦး ကျေးရွာနဲ့ ၁ မိုင်အကွာတောစပ်ကို ထင်းခုတ်သွားချိန် မိုင်းထိပြီး ခြေထောက်ပြတ်ခဲ့သေးတယ်လို့ သိရပါတယ်။

စာတည်း – လင်း

ကဝ၊ မေ ၂၀၊ ၂၀၂၆။

ပဲခူးတိုင်း၊ ကဝမြို့နယ်၊ ခနာကျေးရွာအုပ်စုအုပ်ချုပ်ရေးမှူးက စစ်မှုထမ်းကြေးဆိုကာ လစဥ်ငွေ ခြိမ်းခြောက်ကောက်ခံနေတယ်လို့ ရွာခံတွေဆီက သိရပါတယ်။

အုပ်ချုပ်ရေးမှူး ဦးကျော်ဌေး၊ ရာအိမ်မှူး ဦးစံသိန်းတို့ဟာ လစဥ် ပထမပတ်အတွင်း စစ်မှုထမ်းကြေးဆိုကာ ၁ အိမ် ၂၅,၀၀၀ ကျပ်ကောက်ခံနေပြီး ငွေပေးနောက်ကျသူတွေနဲ့ မပေးနိုင်ဘူးဆိုသူတွေကို ဖမ်းခိုင်းမယ်ဆိုပြီး ခြိမ်းခြောက်နေတယ်လို့ ဆိုပါတယ်။

“စစ်မှုထမ်းစခေါ်ကတည်းက ကောက်နေတာ။ အခုထက်ထိပဲ။ မုဆိုးမလည်းမထားဘူး။ ၁ လ ၁ ခါ ကောက်တယ်။ မပေးရင်ဖမ်းမယ်တို့ စစ်ထဲထည့်မယ်တို့ မိုက်နဲ့အော်ပြီး ခြိမ်းခြောက်တာ။ မပေးရဲဘဲ မနေရဲကြဘူးလေ။ ပေးရတယ်”လို့ ရွာခံတဦးက ပြောပါတယ်။

အဆိုပါ အုပ်ချုပ်ရေးမှူးဟာ ကဝမြို့ပေါ်က စစ်တပ်အရာရှိတွေနဲ့ ပေါင်းပြီး ငွေကြေးကောက်ခံနေတာကြောင့် ရွာခံတွေမှာလည်း မတိုင်ကြားရဲကြဘူးလို့ ဆိုပါတယ်။

ခနာကျေးရွာအုပ်စုမှာ ခနာ၊ ညောင်တပင်၊ ဥက္ကံတဲစု၊ ကျောက်တိုင်ကန်တဲစုကျေးရွာတွေပါဝင်ပြီး အိမ်ခြေ ၆၀၀ ကျော်ရှိတယ်လို့ ဆိုပါတယ်။

အဆိုပါကျေးရွာမှာ နေထိုင်သူတွေဟာ တောင်သူလယ်သမား၊ သာမန်လက်လုပ်လက်စား၊ တံငါလုပ်သူတွေများတာကြောင့် စစ်မှုထမ်းကြေးဆိုပြီး ကောက်ခံတဲ့ ငွေကျပ် ၂၅,၀၀၀ ဟာ ရွာခံတွေအတွက် ဝန်ထုပ်ဝန်ပိုးဖြစ်စေတယ်လို့ အထက်ပါဒေသခံက ပြောပါတယ်။

အုပ်ချုပ်ရေးမှူးရဲ့ ခြိမ်းခြောက်မှုကြောင့် ရွာခံလူငယ်အများစုမှာလည်းကျေးရွာထဲ မနေရဲကြဘဲ ပြည်ပကိုထွက်ခွာကြတာနဲ့ ပြည်တွင်းအခြားအရပ်ဒေသတွေမှာ ပြောင်းရွှေ့အလုပ်လုပ်ကိုင်ကြတာတွေ ပြုလုပ်နေရတယ်လို့ သိရပါတယ်။

စာတည်း – လင်း

ပြင်ဦးလွင်၊ မေ ၁၈၊ ၂၀၂၆။

မန္တလေးတိုင်း၊ ပြင်ဦးလွင်မြို့နယ်၊ ရေချမ်းအိုး (တောင်) ရွာအနီး ဒေသအခေါ် ဖက်ဆွတ်ကန်အတွင်း ရေဆင်းကူးတဲ့ ဆယ်ကျော်သက်အရွယ် ကလေး ၃ ဦး ရေနစ်သေဆုံးတယ်လို့ ကူညီကယ်ဆယ်ရေး လုပ်ဆောင်ပေးခဲ့သူတွေဆီက သိရပါတယ်။

သေဆုံးသူတွေဟာ ခရစ်ယာန်ကျောင်းမှာနေထိုင်တဲ့ အသက် ၁၂ ကနေ ၁၄ နှစ်အရွယ်ကြားရှိ ယောက်ျားလေး ၃ ဦးဖြစ်ပြီး မေလ ၁၇ ရက်ညနေ ၃ နာရီခန့်ကစတင်ရေဆင်းကူးရာမှ ရေနစ်သွားကြတာလို့ ဆိုပါတယ်။

“ဖက်ဆွတ်ကန်က ရေနက်တယ်လေ။ သောက်သုံးရေကန်မဟုတ်ဘူး။ ဒီအတိုင်းရေကန်ကြီးပဲ။ ကျနော်တို့သိတဲ့အချိန်က ညနေ ၅ နာရီလောက်ရှိပြီး။ အဲဒီမှာရှာမှ အလောင်းပြန်တွေ့တာ”လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက ပြောပါတယ်။

ရပ်ကွက်နေသူတွေ၊ လူမှုကူညီရေးအသင်းတွေနဲ့ ရေငုပ်ကျွမ်းကျင်သူတွေရှာဖွေခဲ့ရာ ညနေ ၆ နာရီမထိုးခင်မှာ အလောင်းတွေကိုရှာဖွေတွေ့ရှိပြီး လူမှုကူညီရေးအသင်းတွေက ပြင်ဦးလွင်ဆေးရုံကိုပို့ပေးခဲ့ရတယ်လို့ ဆိုပါတယ်။

အဲ့ဒီရေကန်ဟာ အနက် ၁၀ ပေကျော်ရှိပြီး ဒေသခံတွေအသုံးမပြုတဲ့ရေကန်ဟောင်း ၁ ခုဖြစ်တယ်လို့ သိရပါတယ်။

စာတည်း – လင်း