မြေလတ်အသံ၊ မတ် ၃၁၊ ၂၀၂၅။

မကွေးတိုင်း၊ မြိုင်မြို့နယ်အတွင်းမှာ သင်္ကြန်နှစ်ကူးကာလအတွင်း လူစုလူဝေးနဲ့ အသံချဲ့စက် Bluetooth box ဖွင့်တာ၊ မဏ္ဍပ်ထိုးပျော်ပါးတာတွေ အပါအဝင် ပျော်ပွဲရွှင်ပွဲတွေမပြုလုပ်ကြဖို့ ပြည်သူ့ကာကွယ်ရေးတပ်ဖွဲ့- မြိုင်က မတ် ၃၀ ရက် မနေ့ကရက်စွဲနဲ့ သတိပေးထုတ်ပြန်လိုက်ပါတယ်။

မြိုင်မြို့နယ်အတွင်း လူစုလူဝေးပြုလုပ်တဲ့နေရာတွေကို စစ်ကောင်စီက အသွင်အမျိုးမျိုးယူကာ သတင်းရယူနေတဲ့အပြင် လေကြောင်းကင်းထောက်ယာဥ်တွေနဲ့ ထောက်လှမ်းတာတွေလုပ်ဆောင်ပြီး ပစ်မှတ်ထားတိုက်ခိုက်နေလို့ အခုလို တားမြစ်ထုတ်ပြန်တာလို့ ဆိုပါတယ်။

“ မြိုင်မြို့နယ်အတွင်းနဲ့ပေါက်မြိုင်အစပ်တွေမှာ အခုလပိုင်းထဲတင် လေကြောင်းတိုက်ခိုက်မှု အကြိမ်ရေ ၂၀ ကျော် ၃၀ နားရှိမယ်”လို့ မြို့နယ်တာဝန်ရှိသူတဦးက ပြောပါတယ်။

စစ်ကောင်စီက လူစုလူဝေးပြုလုပ်တဲ့နေရာတွေ၊ ဘုန်းကြီးကျောင်း၊ စာသင်ကျောင်း၊ စျေးနဲ့ခရီးအသွားအလာများတဲ့နေရာတွေကို ပစ်မှတ်ထားတိုက်ခိုက်နေတာကြောင့် လေကြောင်းအန္တရာယ်စိုးရိမ်ရတဲ့နေရာတွေကနေ ဘေးလွတ်ရာကို ရှောင်ရှားနေထိုင်ကြဖို့နဲ့ ကတုတ်ကျင်းတွေတူးထားကြဖို့လည်း မြို့ နယ်တာဝန်ရှိသူတွေက ညွှန်ကြားထားတယ်လို့လည်း ဆိုပါတယ်။

ဒါ့အပြင် ယခုကာလမှာ မတ် ၂၈ ရက်က လှုပ်ခတ်သွားတဲ့ အင်အားပြင်းငလျင်ကြောင့် နိုင်ငံတဝန်း အသက်အိုးအိမ်စည်းစိမ်တွေ များစွာပျက်စီး ဆုံးရှုံးခဲ့ရလို့ ပူဆွေးသောကရောက်ရှိနေချိန်လည်းဖြစ်တာကြောင့် အခြေအနေအရပ်ရပ်ကို ထောက်ရှုကာ ထုတ်ပြန်တားမြစ်ခဲ့တာလို့ ဖော်ပြပါတယ်။

သတိပေးထုတ်ပြန်တာကို မလိုက်နာဘဲ ပျော်ပွဲရွှင်ပွဲတွေလုပ်ဆောင်ပါက ဦးဆောင်ပြုလုပ်သူနဲ့အပေါင်းအပါတွေကို လူပုဂ္ဂိုလ်အဆင့်အတန်းခွဲခြားခြင်းမရှိပဲ ပြင်းပြင်းထန်ထန်အပြစ်ပေး အရေးယူဆောင်ရွက်သွားမယ်လို့လည်း ထုတ်ပြန်ချက်က ဆိုပါတယ်။

မြိုင်မြို့နယ်အတွင်းက ဇုန်တိုက်နယ်ကျေးရွာအသီးသီးမှတာဝန်ရှိသူတွေအနေနဲ့လည်း ပျော်ပွဲရွှင်ပွဲလူစုလူဝေးကြောင့် မလိုလားအပ်တဲ့ အကျိုးဆက်တွေ မဖြစ်ပေါ်လာစေဖို့ နှစ်သစ်ကူးကာလမတိုင်ခင်အမှာ ကြိုတင်အသိပေးတားမြစ်ကြဖို့ ထပ်ဆင့်ဖော်ပြထားပါတယ်။

ပုံစာ – ဖေဖော်ဝါရီ ၂၅ ရက်က မြိုင်နဲ့ပေါက်မြို့နယ်အစပ် ဆုံကုန်းကျေးရွာဘုန်းကြီးကျောင်းမှာ ပြုလုပ်နေတဲ့ PDF ရဲဘော်မင်္ဂလာဆောင်ကို စစ်ကောင်စီတပ်ရဲ့ ပေါင် ၅၀၀ ဗုံးနဲ့ လေယာဥ်ဗုံးကြဲချတိုက်ခိုက်ခံခဲ့ရစဥ်။

သတင်း – ဟယ်သာ၊ စာတည်း – ဟိန်းစံ

အောင်လံ၊ မတ် ၂၆၊ ၂၀၂၅။

မကွေးတိုင်း၊ အောင်လံမြို့နယ်၊ ရွာမထုံရွာနဲ့အောင်မြင်ကုန်းရွာကြားမှာ ကပစ ၁၅ က စစ်ကောင်စီတပ်ဖွဲ့ဝင် ၁ ဦးနဲ့ ပျူသင်တန်းတက်ထားသူ ၁ ဦးတို့ကို ပစ်ခတ်ရှင်းလင်းခဲ့တယ်လို့ အောင်လံမြို့နယ်ပကဖ တာဝန်ရှိသူထံက သိရပါတယ်။

မတ် ၂၆ ရက်မနက် ၇ နာရီခန့်မှာ အောင်မြင်ကုန်းရွာကနေ ကပဖ ၁၅ ဘက်ကို ဆိုင်ကယ်နဲ့ထွက်လာတဲ့အသက် ၄၀ ကျော်အရွယ်ရှိ တပ်ကြပ် ရဲဝင်းခိုင် (ခ) အဲဗာကြီးနဲ့ ရွာမထုံရွာသား ပျူစောထီးသင်တန်းတက်ထားသူ အသက် ၄၀ ဝန်းကျင်အရွယ် အောင်သန်းဦးတို့ကို ပစ်ခတ်ခဲ့တာလို့ဆိုပါတယ်။

“အဲဗာကြီးကို ပစ်ဖို့လုပ်တဲ့အချိန်မှာ ပစ်တဲ့နေရာက မျက်ကွယ်လိုဖြစ်နေတာ။ အဲဗာကြီးကို လှမ်းပစ်တဲ့အချိန်မှာ အောင်သန်းဦးက ဆိုင်ကယ်နဲ့ကျော်တက်လာတော့ အောင်သန်းဦးကိုအရင်ပစ်ခတ်ရှင်းလင်းလိုက်တယ်။ ပြီးမှာ အဲဗားကြီးကို လိုက်ပစ်ရတာ။ “လို့ အောင်လံမြို့နယ်ပကဖ တာဝန်ရှိသူက ပြောပါတယ်။

အဆိုပါ ပစ်ခတ်မှုကြောင့် ၂ ဦးစလုံးနေရာတင်သေဆုံးခဲ့ပြီး တပ်ကြပ် ရဲဝင်းခိုင်ဆီကနေ သေနတ် ၁ လက်၊ ကျည်ဘောက် ၁ ခုနဲ့ကျည်ဆံအချို့ကို သိမ်းဆည်းခဲ့တယ်လို့ ဆိုပါတယ်။

တပ်ကြပ် ရဲဝင်းခိုင်ဟာ ကပဖ ၁၅ အရှေ့ကနေ ဒေသခံတွေသယ်ဆောင်လာတဲ့ ဆန်တွေအပါအဝင် ကုန်စည်တွေကို တားဆီးဖမ်းဆီးငွေညစ်တာ၊ မိန်းမဖြစ်သူနေထိုင်တဲ့ အောင်မြင်ကုန်းရွာမှာ နေချိန်လည်း သေနတ်တွေပစ်ဖောက်တတ်တာ၊ လောင်းကစားဝိုင်းတွေကို အခကြေးငွေယူပြီး ဖွင့်လှစ်ခွင့်ပေးထားသလို အောင်သန်းဦးမှာလည်း ပျူစောထီးသင်တန်းတက်ထားသူဖြစ်တာကြောင့် ပစ်ခတ်တာလို့ သူကဆက်ပြောပါတယ်။

အောင်လံမြို့နယ်ပကဖ အနေနဲ့ လက်ရှိဖြစ်ပေါ်နေတဲ့ နိုင်ငံရေးအခြေနေအရ မည်သူကိုမဆို သွေးထွက်သံယို ကိစ္စမျိုးမဖြစ်ချင်တာကြောင့် ထိန်းသိမ်းလုပ်ဆောင်နေတာဖြစ်ပြီး စစ်ကောင်စီတပ်သား၊ ရဲနဲ့ပျူစောထီးတွေအနေနဲ့ ပြည်သူတွေကို အနိုင်ကျင့် ငွေညစ်တာ၊ ခြိမ်းခြောက်တာ၊ စစ်မှုထမ်းဖမ်းမတရားဖမ်းဆီးတာမျိုးတွေမလုပ်ဘဲ ၎င်းတို့ တပ်စခန်းတွေမှာသာ အေးဆေးစွာနေထိုင်ကြဖို့နဲ့ ပြည်သူတွေကို အနိုင်ကျင့်တာမျိုးပြုလုပ်လာပါက ပစ်ခတ်သွားမယ်လို့ ဆိုပါတယ်။

ဖေဖော်ဝါရီ ၂၂ ရက်ကလည်း အောင်လံမြို့နယ်၊ သမ္ဘူလကျေးရွာထိပ်ရှိ ဦးလောကြီး စားသောက်ဆိုင်အရှေ့ကွမ်းယာဆိုင်နားမှာ သမ္ဘူလ တိုက်နယ်ရဲစခန်းမှ နယ်ထိန်း ရဲဒုတပ်ကြပ်တဦးပစ်သတ်ခံရပြီးသေဆုံးသွားတယ်လို့ သိရပါတယ်။

စာတည်း – လင်း

မြိုင်၊ မတ် ၂၄၊ ၂၀၂၅။

မကွေးတိုင်း၊ မြိုင်မြို့နယ်၊ လက်ပံတိုရေနံမှော်အနီးရှိ နယ်သတ်ကျေးရွာနဲ့ ဆုံကုန်းကျေးရွာအကြားအနီးတဝိုက်ကို စစ်ကောင်စီတပ်ကလေယာဥ်နဲ့ဗုံးကြဲချသွားလို့ ဒေသခံ ၂ ဦး ထိခိုက်ဒဏ်ရာရခဲ့ပြီး တောမီးလောင်ကျွမ်းနေတယ်လို့ အညာမြေအရပ်ဖက်လူမှုကူညီရေးအဖွဲ့ထံက သိရပါတယ်။

မတ် ၂၄ ရက် ဒီကနေ့လယ် ၁၂ နာရီခွဲဝန်းကျင်ခန့်မှာ တိုက်လေယာဥ် ၂ စီးနဲ့ မီးလောင်ဗုံး ၃ လုံးထက် မနည်းကြဲခဲ့တာဖြစ်ပြီး နယ်သတ်ရွာထိပ်ရှိ နေအိမ် ၁ လုံးပေါ်နဲ့ ကျေးရွာ ၂ ခုအကြားနေရာတွေမှာ ကျရောက်ပေါက်ကွဲခဲ့တယ်လို့ ဆိုပါတယ်။

“ လေယာဉ်က ပထမတခါလာပြီးဝဲသွားတာ တော်တော်ကြာအောင်ဝဲပြီးတော့ ပြန်သွားသေးတာဗျ၊ ခဏလေး(၁၅ မိနစ်ခန့်)ရှိတော့ ပြန်လာပြီး ခဏဝဲနေပြီးမှ ချတာဆိုတော့ လူတွေက ရှောင်တိမ်းချိန် ရသွားတာပါ”လို့ အညာမြေအရပ်ဖက်လူမှုကူညီရေးအဖွဲ့မှ ဆရာထွေးက မြေလတ်အသံကို ပြောပါတယ်။

လေယာဉ်ကနေ ကြဲချခဲ့တဲ့မီးလောင်ဗုံးတွေ ကျရောက်ပေါက်ကွဲတာကြောင့် အထက်ပါကျေးရွာ ၂ ခုအကြား တောမီးလောင်ခဲ့ပြီး ဒီကနေ့ ညနေ ၃ နာရီဝန်းကျင်အထိ မီးငြှိမ်းသတ်နေရဆဲဖြစ်တယ်လို့ သိရပါတယ်။

“ ဖိုက်တာ(တိုက်လေယာဥ်) ကနေချတာက ၂ ကြိမ်ချတာဗျ။ နောက်ဆုံးအကြိမ်ချလိုက်တဲ့ အသံကြီး တော်တော်ဟိန်းသွားတာ အရင်ခါတွေချတုံးက အဲ့အသံကြီးတွေ မကြားဖူးဘူး။ ခုခါချမှ ကြားဖူးတာပါ”လို့ ၎င်းက ဆိုပါတယ်။

အဆိုပါကျေးရွာတွေအနီးကို စစ်ကောင်စီတပ်က တိုက်ပွဲဖြစ်ပွားတာမရှိဘဲ လာရောက်ဗုံးကြဲတိုက်ခိုက်ခဲ့တာဖြစ်ပြီး ယမန်နေ့ မတ် ၂၃ ရက်ကလည်း မြိုင်နယ်အရှေ့မြောက်ပိုင်းက ကျေးရွာတွေဘက်ကို စက်တပ်လေထီးနဲ့ဗုံးကြဲချခဲ့သေးတယ်လို့ သိရပါတယ်။

သတင်း – ဟယ်သာ၊ စာတည်း – ဟိန်းစံ

ချောက်၊ မတ် ၂၄၊ ၂၀၂၅။

မကွေးတိုင်း၊ ပခုက္ကူမြို့အခြေစိုက် အမှတ် ၁၀၁ ခြေမြန်တပ်မဌာနချုပ်ကို ခဲယမ်းပို့ပြီးပြန်လာတဲ့ ပျူစောထီး ၂ ဦး ပစ်ခတ်ခံရပြီး သေဆုံးခဲ့တယ်လို့ ပခုက္ကူခရိုင်တွင်း စစ်ရေးလှုပ်ရှားနေတဲ့ Bagan Bo Cho PDF က မတ် ၂၄ ရက် ဒီကနေ့မှာ ထုတ်ပြန်ပါတယ်။

သေဆုံးသူပျူစောထီး ၂ ဦးမှာ ဆိပ်ဖြူအခြေစိုက် ကပစ ၂၁ အတွင်းနေထိုင်တဲ့ ပေါက်မြို့နယ်၊ ထန်းတပင်ရွာခံ ဇော်မြင့် နဲ့ ဆူးပုဒ်ကုန်းရွာခံ အောင်စိုးဝင်း တို့ဖြစ်ပြီး မတ် ၂၃ ရက် မနက် ၁၀ နာရီကျော်မှာ ပုဂံ-ညောင်ဦးလမ်းပိုင်းတစ်နေရာမှာ ရှောင်တခင်စစ်ဆေးစဥ် ဖမ်းမိခဲ့တာလို့ဆိုပါတယ်။

” ရှောင်တခင် စစ်ဆေးချိန်မှာ ဖမ်းမိလို့ စစ်ဆေးတယ်။ စစ်ဆေးပြီးတော့ စခန်းတနေရာကို ခေါ်သွားတဲ့အချိန်လမ်းမှာ ရဲဘော်တယောက်က်ဆီကနေ ရုန်းပြီးတော့ ထွက်ပြေးတာ အဲဒီမှာ ပစ်ခတ်လိုက်ရတာ။ နှစ်ယောက်စလုံးသေသွားတယ်”လို့ Bagan Bo Cho PDFမှ သတင်းနဲ့ ပြန်ကြားရေးတာဝန်ခံက မြေလတ်အသံကို ပြောပါတယ်။

ပျူစောထီး ၂ ဦးကို စစ်ဆေးစဥ် ၎င်းတို့ ၂ ဦးမှာ ပျူစောထီးသင်တန်း အပတ်စဥ် ၁ ကို တက်ရောက်ထားကာ ကပစ ၂၁ ထဲမှာ နေထိုင်သူတွေဖြစ်ကြောင်း၊ အိမ်စီးကားနဲ့ တပ်မ ၁၀၁ ကို ကျည်ဆံတွေပို့ဆောင်ပြီးနောက် ကပစ ၂၁ ကို ပြန်လာစဥ် ဖမ်းဆီးခံရခြင်းဖြစ်ကြောင်း ထွက်ဆိုခဲ့တယ်လို့ အထက်ပါတာဝန်ခံကပြောပါတယ်။

” ၁၀၁ ကနေ ကပစ ၂၁ ကိုပြန်တဲ့အချိန်မှာ ဖမ်းမိတာ။ ကားကိုတော့ ထိန်းသိမ်းထားလိုက်တယ်။ သူတို့က အရပ်သားပုံစံမျိုးနဲ့သွားလာကြတာဖြစ်လို့ သေနတ်တွေတော့မပါဘူး”လို့ သူကဆိုပါတယ်။

ပြီးခဲ့တဲ့ မတ် ၁၆ ရက်မှာလည်း ညောင်ဦးမြို့နယ်မှာ စစ်ကူသွားတဲ့ စစ်ကောင်စီတပ်ယာဥ်တန်းကို တမနက်တည်းမှာ မိုင်း ၂ ကြိမ်ဆွဲ တိုက်ခိုက်ခံရတာကြောင့် စစ်သား ၅ ဦးသေဆုံးခဲ့တယ်လို့ သိရပါတယ်။

ပုံစာ – ပုဂံ-ညောင်ဦးလမ်းပိုင်းတနေရာမှာ Bagan Bo Cho PDF အဖွဲ့က စစ်ဆေးမှုပြုလုပ်နေစဥ် ( ပုံဟောင်း)။

စာတည်း – ဟိန်းစံ

ပွင့်ဖြူ၊ မတ် ၁၄၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ မုန်းဇလဲကျေးရွာက မီးဘေးသင့်ပြည်သူ ၁,၄၀၀ ကျော်အတွက် အကူအညီလိုအပ်နေတယ်လို့ ကူညီဆောင်ရွက်ပေးနေသူတွေဆီက သိရပါတယ်။

မီးဘေးသင့်ပြည်သူတွေအတွက် လူမှုကူညီရေးအသင်းအဖွဲ့တွေနဲ့ စစ်ကောင်စီလက်အောက် ဌာနဆိုင်ရာအချို့က လာရောက်လှူဒါန်းမှုတွေရှိပေမယ့် လုံလောက်မှုမရှိဘူးလို့ ဆိုပါတယ်။

“အိမ်သာတွေ လိုမယ်။ စက်ရေတွင်းတွေ ပြန်လည်တူးဖော်ဖို့ လိုမယ်။ တောင်သူသုံးပစ္စည်းတွေ လိုမယ်။ မသန်စွမ်းတွေအတွက် အထောက်ကူပြုပစ္စည်းတွေ လိုမယ်။ ကိုယ်ဝန်ဆောင်မိခင်၊ သက်ကြီးရွယ်အိုတွေနဲ့ကလေးသူငယ်တွေအတွက် လိုအပ်တဲ့ဖြည့်စွက်စာတွေ လိုမယ်။ အခြား ဆန်ဆီဆေးဆားတွေလည်း လိုတယ်။”လို့ မီးဘေးသင့်ပြည်သူတွေကို ကူညီပေးနေသူတဦးက ပြောပါတယ်။

မီးဘေးသင့်ပြည်သူ ၁,၄၄၅ ဦးကတော့ ကျေးရွာအတွင်းရှိ ဘုန်းကြီးကျောင်း ၃ ကျောင်းနဲ့ အခြေခံပညာကျောင်းတွေမှာ ယာယီခိုလှုံနေကြရပါတယ်။

မတ် ၁၂ ရက်နေ့လယ် ၂ နာရီခန့်မှာ မုန်းဇလဲကျေးရွာ အနောက်တောင်အရပ်က နေအိမ် ၁ လုံးမှာ လူကြီးတွေမရှိချိန် ကလေးတွေက ထင်းမီးနဲ့ဟင်းချက်စားရာကနေ နေအိမ်ကိုမီးကူးပြီး မီးလောင်မှုစတင်ဖြစ်ခဲ့တယ်လို့ ဆိုပါတယ်။

မီးလောင်ချိန်မှာ ရာသီဥတုကပူပြင်းတာနဲ့ လေကလည်းတိုက်နေချိန်ဖြစ်တာကြောင့် မီးစလောင်တဲ့ နေအိမ်က မီးလောင်လက်စဝါးတွေနဲ့သစ်တွေက အခြားနေအိမ်တွေပေါ်ကျရာကနေ ထပ်ဆင့်မီးကူးပြီး ရွာရဲ့ ၇၀ ရာခိုင်နှုန်းနီးပါး မီးလောင်ကုန်တာလို့ဆိုပါတယ်။

မီးလောင်မှုကြောင့် ကျန်းမာရေးမကောင်းတဲ့ အသက် ၆၈ နှစ်အရွယ် ဦးထွေးရင်ဆိုသူ မီးလောင်သေဆုံးပြီး နွား ၃ ကောင်၊ မြင်း ၁ ကောင်၊ ဝက် ၁၀ ကောင်၊ အိမ်ခြေ ၃၇၂ အိမ်၊ လှည်းတွေအပါအဝင် လယ်ယာသုံးစက်ပစ္စည်းတွေနဲ့ အိမ်တွင်းပစ္စည်းတွေ မီးလောင်ပျက်စီးသွားတယ်လို့ သိရပါတယ်။

မီးလောင်အပျက်စီးတွေကိုတော့ မတ် ၁၄ ရက်မနက်ပိုင်းထိ ဒေသခံတွေက ဆက်လက်ရှင်းလင်းနေပြီး မီးဘေးသင့်ပြည်သူတွေကတော့ ဘုန်းကြီးကျောင်းနဲ့စာသင်ကျောင်းတွေမှာ ဆက်လက် ခိုလှုံနေကြရတယ်လို့ သိရပါတယ်။

စာတည်း – လင်း

မကွေး၊ မတ် ၃၊ ၂၀၂၅။

မကွေးမြို့မှာ ဟော့ပေါ့စားဖို့ဂက်စ်မီးဖို့ဖွင့်ရာက ပေါက်ကွဲမှုဖြစ်ပြီး လူငယ်အမျိုးသား ၁ ဦးနဲ့ အမျိုးသမီး ၁ ဦးဒဏ်ရာရခဲ့တယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေထံက သိရပါတယ်။

ဆားစည်ရပ်ကွက်၊ ကမ်းနားလမ်းညစျေးရှိ ဟော့ပေါ့ဆိုင်တဆိုင်မှာ မတ် ၂ ရက် မနေ့ညနေ ၅ နာရီခန့်က စားသုံးသူတွေက အသားပြုတ်ဖို့ဂက်စ်မီးဖိုဖွင့်ချိန်မှာ ပေါက်ကွဲမှုဖြစ်ပေါ်ခဲ့တာလို့ ဆိုပါတယ်။

” ဟော့ပေါ့စားရင်း ဖြစ်တာပါ။ ဂက်စ်ဘူးအသေးကနေ ဆော့ကတ်မလုံတာနဲ့ မီးဖွင့်လိုက်တဲ့အချိန်မှာ ဖြစ်သွားတာ။ ထိတာက ၂ ယောက်ထဲပါ။ ဆိုးဆိုးရွားရွားဖြစ်တာမျိုးတော့ မဟုတ်ပါဘူး။ ၂ ယောက်ကတော့မီးဟပ်တဲ့ဒဏ် များသွားတာပါ။” လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက မြေလတ်အသံကို ပြောပါတယ်။

ဂက်စ်အိုးပေါက်ကွဲတာကြောင့် စားသောက်ဝိုင်းမှာထိုင်နေတဲ့ လူငယ် ၄ ဦးအနက် အသက် ၂၀ အရွယ် အမျိုးသား ၁ ဦးနဲ့အမျိုးသမီး ၁ ဦးတို့ မျက်နှာနဲ့လက်တွေမှာ မီးလောင်ဒဏ်ရာတွေရသွားတယ်လို့ ဆိုပါတယ်။

ဂက်စ်အိုးပေါက်ကွဲလို့ ထိခိုက်ဒဏ်ရာရသွားတဲ့လူငယ်တွေကိုတော့ ဒေသခံလူမှုကူညီရေးအသင်းတွေက မကွေးပြည်သူ့ဆေးရုံကိုပို့ဆောင်ပေးခဲ့ကြပြီး ဆေးကုသမှုခံယူနေကြရတယ်လို့ သိရပါတယ်။

စာတည်း – ဟိန်းစံ