ဆင်ဖြူကျွန်း၊ ဧပြီ ၁၀၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့၊ မြောက်ချောင်းဖြူအုပ်စု၊ တောင်ဘိုရွာကို စစ်ကောင်စီ တပ်ဖွဲ့ဝင်တွေကမီးရှို့ပြီး ရွာကနေဖမ်းဆီးသွားတဲ့ ရွာခံအမျိုးသား ၁ ဦးကိုလည်းသတ်ခဲ့တယ်လို့ ဒေသခံတွေဆီက သိရပါတယ်။

ဧပြီ ၆ ရက်ညနေ ၄ နာရီခွဲမှာ ရွာကိုမီးရှို့ပြီးနောက် စစ်ကောင်စီတပ်ဖွဲ့ဝင်တွေရွာကပြန်ထွက်ချိန် အသက် ၂၄ နှစ် အရွယ် ကိုကောင်းခန့်ငြိမ်းကို ဖမ်းဆီးသတ်ဖြတ်ခဲ့တာဖြစ်ပြီး အလောင်းကိုတော့ ဧပြီ ၁၀ ရက်ဒီမနက် ၈ နာရီလောက်မှာ ပြန်တွေ့ခဲ့ရတာလို့ ဆိုပါတယ်။

“တောင်ဘိုရွာအရှေ့ဘက် ရေကန်ကြီးအနားက ချောက်ထဲမှာ တကိုယ်လုံးကိုဓါးတွေနဲ့မွှန်းပြီးတော့ မျက်လုံးတွေကကော်ထုတ်ပြီး သတ်ဖြတ်ခံထားတာကို တွေ့ရပါတယ်၊” လို့ ဒေသခံအမျိုးသမီးတဦးက ပြောပါတယ်။

ဒါ့အပြင် အလောင်းမှာလည်း ကာကွယ်ရေးတပ်ဖွဲ့ဝင်တွေရဲ့အဝတ်အစားတွေဝတ်ဆင်ပေးခဲ့တာကို တွေ့ရတယ်လို့ ဆိုပါတယ်။

“တပ်ရင်းတပ်ဖွဲ့တွေရဲ့ ဘောင်းဘီကိုဝတ်ဆင်ပေးခဲ့ပြီးတော့ သူတို့တတွေကလိမ်ညာဖို့အတွက် PDF စစ်သားကို သတ်ဖြတ်တယ်ဆိုပြီး ဓါတ်ပုံရိုက်သွားခဲ့ပါတယ်၊ PDF စစ်သားဆိုရင် ဖိနပ်တွေ စနစ်တကျ ဝတ်ဆင်ပြီးတော့မှ တိုက်ပွဲဝင်ကြတာပါ၊ အခုဒီကလေးမှာဆိုလို့ရှိရင် ဖိနပ်ဝတ်ဆင်ထားတာ မတွေ့ ရပါဘူး”လို့ ဒေသခံအမျိုးသမီးတဦးက ပြောပါတယ်။

ကိုကောင်းခန့်ငြိမ်းဟာ ရွာကနေတိမ်းရှောင်ဖို့ပြင်ချိန်မှာဖမ်းဆီးခံခဲ့ရတာဖြစ်ပြီး သူနဲ့ပါသွားတဲ့ ငွေနဲ့ ရွှေထည်ပစ္စည်းတွေကိုလည်း စစ်ကောင်စီတပ်တွေကယူသွားတယ်လို့ ဆိုပါတယ်။

ပခုက္ကူအခြေစိုက် တပ်မ ၁၀၁ ကအင်အား ၁၀၀ ကျော်ပါ အဲ့ဒီစစ်ကြောင်းဟာ တောင်ဘိုရွာက နေအိမ်တွေကိုမီးရှို့ခဲ့တာကြောင့် နေအိမ် ၂၂ လုံးမီးလောင်ပျက်စီးခဲ့ပြီး ကျေးရွာအတွင်း ပစ်ခတ်မှုတွေ လုပ်တဲ့အတွက် ဒေသခံအမျိုးသား ၂ ဦးနဲ့ အမျိုးသား ၁ ဦးဒဏ်ရရှိခဲ့ပါတယ်။

“ငွေနဲ့ ရွှေတွေ အလောင်းနဲ့အတူမတွေ့ရတဲ့အတွက် အကြမ်းဖက်စစ်တပ်ကနေ လုယူပြီးတော့ သတ်ဖြတ်သွားတာပါ၊ အရပ်သား ၃ ဦးကတော့ လက်‌မောင်းတွေကိုကျည်ထိတယ်၊ လူငယ်တွေပဲ ဖြစ်ပါတယ်၊ အသက်တွေတော့ မသိရပါဘူး၊ အဲ့ဒီ ၃ ဦးကို ရွာတရွာမှာ ဆေးကုသမှုပေးနေပါတယ်”လို့ သူက ဆက်ပြောပါတယ်။

အဲ့ဒီစစ်ကြောင်းဟာ ဧပြီ ၆ ရက်မှာ တောင်ဘိုရွာကနေဆုတ်ခွာသွားပြီး စလင်းမှာ ပြန်တပ်စွဲနေကာ ဒီကနေ့နေ့လယ် ၁၁ နာရီခွဲမှာတော့ စလင်းရဲစခန်းကနေထွက်ခွာလာပြီး ပေါင်လောင်ရွာဘက်မှာ စစ်ကြောင်းထိုးနေတယ်လို့ ဆိုပါတယ်။

အဆိုပါစစ်ကြောင်းဟာ အခုဧပြီလပထမပတ်အတွင်းကစလို့ ဆိပ်ဖြူမြို့နယ်၊ ကမ္ဘာကြီးရွာဘက်ကနေ စလင်းမြို့နယ်ထဲကို စစ်ကြောင်းထိုးလာပြီး တညောင်ရွာနဲ့ မြောင်းဖျားရွာတွေကတဆင့် တောင်ဘိုရွာကို စစ်ကြောင်းထိုးဝင်ရောက်နေတာလည်းဖြစ်ပါတယ်။

သတင်း – ဒိန်းဂျား၊ စာတည်း – လင်း

ပခုက္ကူ၊ ဧပြီ ၈၊ ၂၀၂၅။

မကွေးတိုင်း၊ ပခုက္ကူမြို့က စစ်ကောင်စီတပ်ဖွဲ့ဝင်တွေဆက်ကြေးကောက်တဲ့နေရာကိုဝင်စီးချိန် သေနတ် ၁ လက် သိမ်းဆည်းရရှိခဲ့တယ်လို့ Burma Revolution Rangers တပ်ဖွဲ့ ဆီက သိရပါတယ်။

ဧပြီ ၆ ရက် နေ့လယ် ၁၀ နာရီခွဲလောက်မှာ Burma Revolution Rangers တပ်ဖွဲ့ဝင် ၂ ဦးက အဆိုပါစခန်းကို ပစ်ခတ်ဖို့သွားချိန် စခန်းတွင်းဘယ်သူမှမရှိတော့ဘဲ MA 1 သေနက် ၁ လက် သိမ်းဆည်းရခဲ့တယ်လို့ Burma Revolution Rangers တပ်ဖွဲ့ဝင် ဒီမိုက ပြောပါတယ်။

“သူတို့အထိုင်ချနေတဲ့ နေရာကိုပတ်ရှာတော့လည်း မရှိဘူး၊ နောက်ထပ်ဘန်ကာဝင်ရှာတော့ အဲ့ဒီအထဲကနေမှ MA 1 သေနတ် ၁ လက်က ကျည်ဘောက်မပါဘူး၊ ထောင်ထားတာတွေ့တာနဲ့ ယူပြီးပြန်ဆုတ်လာတာ”လို့ တပ်ဖွဲ့ဝင် ဒီမိုက ဆက်ပြောပါတယ်။

အဲ့ဒီစခန်းဟာ ပခုက္ကူမြို့ တပ်မ ၁၀၁၊ ခလရ ၂၅၃ တို့ရဲ့အနောက်ဘက်မှာတည်ရှိပြီး ပုံမှန်အားဖြင့် အင်အား ၂၀ ဝန်းကျင်လောက်ရှိပေမယ့် တိုက်ခိုက်ဖို့သွားချိန်မှာတော့ ဘယ်သူမှမတွေ့ခဲ့ရဘူးလို့ ဆိုပါတယ်။

“အဲ့ဒီဂိတ်မှာ သတင်းရတာက လူဦးရေ ၂၀ လောက်ရှိတယ်လို့ ကြားတာ၊ သေနတ်အင်အားက အဲ့လောက်မရှိဘူး၊ ဒီကောင်တွေဆီမှာ ဒရုန်းတွေလည်းရှိတယ်လို့ကြားလို့ ဒရုန်းလည်း လိုချင်တာကြောင့် သွားတိုက်တာ၊ ကျနော်တို့လည်း အဲ့ဒီရောက်တော့ ဒီကောင်တွေ ဘန်ကာမှာလည်း စစ်ကောင်စီတပ်သားတွေက မရှိဘူး၊” လို့ တပ်ဖွဲ့ဝင်ဒီမိုက ပြောပါတယ်။

ရရှိခဲ့တဲ့သေနတ်ကလည်း ကောင်းမွန်ပြီး ပြန်လည်အသုံးပြုလို့ရတယ်လို့ ဆိုပါတယ်။

ပြီးခဲ့တဲ့ဧပြီ ၆ ရက်နေ့ညနေ ၅ နာရီကျော်မှာလည်း မကွေးတိုင်း၊ ပခုက္ကူမြို့နယ်၊ မြစ်ခြေတိုက်နယ်၊ အောင်သာရွာက ပျူစောထီးနဲ့စစ်ကောင်စီတပ်ဖွဲ့ဝင်တွေကို ဒရုန်းနဲ့ဗုံးသီး ၂ လုံးချခဲ့ရာ စစ်ကောင်စီတပ်ဖွဲ့ဝင် ၁ ဦးအပါအဝင် ၃ ဦးဒဏ်ရာရသွားတယ်လို့ ပခုက္ကူခရိုင် ပကဖ တပ်ဖွဲ့ ၅ ဧရာဒေါင်း ပြည်သူ့ကာကွယ်ရေးတပ်ဖွဲ့ဆီက သိရပါတယ်။

စာတည်း – လင်း

ဆင်ဖြူကျွန်း၊ ဧပြီ ၇၊ ၂၀၂၅။

မကွေးတိုင်း၊ စလင်းမြို့နယ်၊ တောင်ဘိုရွာကို စစ်ကောင်စီတပ်ဖွဲ့ဝင်တွေကမီးရှို့ပြီး ဒေသခံအမျိုးသား ၁ ဦးကိုလည်းဖမ်းဆီးသွားတယ်လို့ ဒေသခံတွေဆီကသိရပါတယ်။

ဧပြီ ၆ ရက်ညနေ ၄ နာရီခွဲမှာ ပခုက္ကူအခြေစိုက် တပ်မ ၁၀၁ ကအင်အား ၁၀၀ ကျော်ပါ စစ်ကောင်စီစစ်ကြောင်းဟာ တောင်ဘိုရွာက နေအိမ်တွေကိုမီးရှို့ခဲ့ရာ နေအိမ် ၂၁ လုံး မီးလောင်ပျက်စီးခဲ့တယ်လို့ ဆိုပါတယ်။

“ညနေပိုင်းမှာ သူတို့မီးရှို့ပါတယ်၊ ၄ နေရာခွဲပြီးရှို့ပါတယ်၊ ကနဦးသိရတာက လူ ၁၀ ဦးကို ဖမ်းသွားတယ်လို့ သိရတယ်၊ အခုတော့ ၁ ဦးဖမ်းသွားတာလို့ သိရတယ်၊ အမျိုးသား ၁ ဦးကို ဖမ်းသွားတာ၊ တိရစ္ဆာန်တွေလည်း ထိခိုက်ဒဏ်ရာရတာရှိတယ်။”လို့ ဒေသခံအမျိုးသမီးတဦးက ပြောပါတယ်။

အဲ့ဒီစစ်ကြောင်းဟာ အခုဧပြီလပထမပတ်အတွင်းမှာ ဆိပ်ဖြူမြို့နယ်၊ ကမ္ဘာကြီးရွာဘက်ကနေ စလင်းမြို့နယ်ထဲကို စစ်ကြောင်းထိုးလာပြီး တညောင်ရွာနဲ့ မြောင်းဖျားရွာတွေကတဆင့် တောင်ဘိုရွာကိုဝင်ရောက်လာတာလို့ ဆိုပါတယ်။

တောင်ဘိုကျေးရွာကိုစစ်ကြောင်းမဝင်ခင်ကလည်း ဆင်ဖြူကျွန်းမြို့အနီးမှာ ဒေသခံကာကွယ်ရေးတပ်တွေနဲ့ တိုက်ပွဲဖြစ်ခဲ့သေးတယ်လို့ အထက်ပါဒေသခံအမျိုးသမီးက ဆက်ပြောပါတယ်။

ဆင်ဖြူကျွန်းမြို့နဲ့ တောင်ဘိုကျေးရွာဟာ ၃ မိုင်ခန့်ကွာဝေးပြီး မနေ့ညပိုင်းကလည်းတိုက်ပွဲတွေထပ်ဖြစ်နေတယ်လို့သိရကာ အခြေအနေအသေးစိတ်ကိုတော့ မြေလတ်အသံက ဆက်လက်စုံစမ်းနေပါတယ်။

ပြီးခဲ့တဲ့ဇန်နဝါရီ ၃၀ ရက်ကလည်း အင်အား ၂၀၀ ဝန်းကျင်ပါတဲ့ စစ်ကောင်စီတပ်ဖွဲ့ဝင်တွေက ဆင်ဖြူကျွန်းမြို့အနီးက အုန်းတောရွာနဲ့ ကညှပ်ရွာကိုမီးရှို့ဖျက်ဆီးခဲ့ပါသေးတယ်။

စာတည်း – လင်း

သရက်၊ ဧပြီ ၆၊ ၂၀၂၅။

မကွေးတိုင်း၊ သရက်ခရိုင်အတွင်းရှိ ပုသိမ်-မုံရွာလမ်းနဲ့ သရက်-မင်းတုန်းလမ်းပိုင်းမှာ ဧပြီ ၆ ရက် ဒီကနေ့မနက်ပိုင်းက United State Of Burma Army တပ်ဖွဲ့ဝင်တွေ စစ်ဆေးရေးပြုလုပ်ခဲ့တယ်လို့ အဲ့ဒီအဖွဲ့က သတင်းထုတ်ပြန်ပါတယ်။

အဆိုပါလမ်းပိုင်းတွေမှာ စစ်ကောင်စီတပ်ဖွဲ့၀င်တွေက အရပ်သားဟန်ဆောင်ပြီး ခရီးသည်ကားတွေနဲ့ လိုက်ပါလာတတ်တာကြောင့် ခုလိုစစ်ဆေးခဲ့တာလို့ United State Of Burma Army ရဲ့တာဝန်ခံ ဗဟိန်းက ပြောပါတယ်။

“ပြီးတော့ သူတို့တွေရဲ့ လက်နက်ခဲယမ်းပဲဖြစ်ဖြစ် ရိက္ခာပဲဖြစ်ဖြစ် ပို့ဆောင်တဲ့နေရာမှာ အရပ်သားအယောင်ဖျောက်ပြီး ပို့ဆောင်ကြတာတွေရှိပါတယ်။ ဒီနွေဦးတော်လှန်ရေးအတွက် အထောက်အကူ တစုံတရာဖြစ်ဖို့အတွက် ရှေ့ဆက်လုပ်မယ့်ရှေ့ရည်မှန်းချက်တွေအတွက် အကြမ်းဖက်စစ်ကောင်စီကို ဖြတ်တောက်ရေးလုပ်တဲ့အနေနဲ့ လမ်းပိုင်းစစ်ဆေးရေးတွေလုပ်တာပါ။” လို့ သူကပြောပါတယ်။

ဒါ့အပြင် USBA တပ်ဖွဲ့ဝင်တွေအနေနဲ့ ငွေကြေးတောင်းတာ၊ ပြည်သူလူထုကို ရိုင်းရိုင်းစိုင်းစိုင်း ဆက်ဆံတာ၊ အရက်သေစာသောက်စားထားတာ၊ စစ်ဆေးမေးမြန်းဖို့လိုတာထက်ပိုပြီး ခရီးကြန့်ကြာအောင်လုပ်တာတွေရှိခဲ့ရင် ထိရောက်စွာစစ်ဆေးအရေးယူသွားမယ်လို့ ထုတ်ပြန်ချက်မှာ ဖော်ပြထားပါတယ်။

စာတည်း – လင်း

အောင်လံ၊ ဧပြီ ၆၊ ၂၀၂၅

မကွေးတိုင်း၊ အောင်လံမြို့၊ စမ်းချောင်းရပ်ကွက်၊ ၁၈ လမ်းနဲ့ ၁၉ လမ်းအကြား ကားဂိတ်ဝန်းအဟောင်းရှိ လူနေအိမ်ဆိုင်ခန်း ၄၀ ကျော်ကို စစ်ကောင်စီတပ်ဖွဲ့တွေနဲ့ ဌာနဆိုင်ရာအဖွဲ့ဝင်တွေက အင်အားသုံးဖျက်ဆီးနေတယ်လို့ ဒေသခံတွေဆီက သိရပါတယ်။

ဧပြီ ၆ ရက်ဒီမနက် ၉ နာရီခန့်မှာ အောင်လံမြို့နယ်စည်ပင်သာယာအဖွဲ့ဝင်၊ ရဲနဲ့ စစ်ကောင်စီ စုစုပေါင်းအင်အား ၃၀ ကျော်လောက်က ကားဝန်းဟောင်းထဲကိုရောက်လာပြီး ဆိုင်ခန်းတွေကို ဖြိုဖျက်နေတယ်လို့ ဆိုပါတယ်။

“ဘက်ဟိုးနဲ့ အပြင်ဘက်က ဆိုင်ခန်းတွေကို ဖျက်နေတယ်။ အဲ့နားကို လမ်းပိတ်ထားတယ်။ ကားတွေ အဖြတ်မခံဘူး။ ပစ္စည်းသယ်တဲ့သူတွေတောင် အနောက်လမ်းကနေပတ်ပြီး သယ်နေရတယ်။ ပြီးတော့ စည်ပင်က မိုက်နဲ့အော်နေတယ်။”လို့ ဖြစ်စဉ်ကိုမြင်တွေ့ရတဲ့ ဒေသခံအမျိုးသမီးတဦးက ပြောပါတယ်။

လွန်ခဲ့တဲ့ နှစ်ပေါင်း ၃၀ ကျော်ကတည်းက ဆောက်လုပ်ထားတဲ့ အဆိုပါကားဝန်းထဲမှာရှိတဲ့ အဲ့ဒီဆိုင်ခန်းတွေကို အောင်လံမြို့နယ်စည်ပင်သာယာဆီကနေ ဆိုင်ခန်းရှင်တွေက ကျပ်သိန်းရာချီပေး ဝယ်ယူထားတာလို့ ဆိုပါတယ်။

အဆိုပါ ဆိုင်ခန်းတွေကို ယနေ့အပြီးဖြိုချဖို့ စစ်ကောင်စီဘက်က စီစဉ်ထားတဲ့အတွက် ဆိုင်ခန်းရှင်တွေကို ပစ္စည်းချက်ချင်းရွှေ့ပြောင်းဖို့ ပြောထားတယ်လို့လည်းသိရကြောင်း အထက်ပါအမျိုးသမီးက ပြောပါတယ်။

ခုလို ဆိုင်ခန်းတွေကိုဖျက်သိမ်းရာမှာလည်း ဆိုင်ခန်းပိုင်ရှင်တွေကို နစ်နာကြေးပေးတာမရှိဘူးလို့ ဆိုပါတယ်။၊

ပြီးခဲ့တဲ့ ဇန်နဝါရီလက ကားဝန်းအသစ်ကို အောင်လံမြို့ပြင်မှာဖွင့်လှစ်ခဲ့တာကြောင့် ကားဝန်းအဟောင်းကို စည်ပင်သာယာအဖွဲ့ဘက်က ဖျက်သိမ်းဖို့လုပ်ဆောင်လာတာဖြစ်နိုင်တယ်လို့လည်း သူကခန့်မှန်းပါတယ်။

ဆိုင်ခန်းရှင်တွေအနေနဲ့ ၂၀၂၄ ဒီဇင်ဘာ ၃၁ ရက်နဲ့ ၂၀၂၅ ဇန်နဝါရီ ၁၅ ရက်တို့မှာ အပြီးဖယ်ရှားပေးဖို့ စစ်ကောင်စီရဲ့ မကွေးတိုင်းအစိုးရရုံးကညွှန်ကြားပေမယ့် မထွက်ခွာတာကြောင့် ဧပြီ ၆ ရက်မနက် ၉ နာရီနောက်ဆုံးထားထွက်ခွာဖို့နဲ့ မထွက်ခွာရင်ဖယ်ရှားရှင်းလင်းမယ်လို့ ဧပြီ ၄ ရက်ထုတ် အောင်လံမြို့နယ်စည်ပင်သာယာရေးအဖွဲ့ရဲ့ ကြေညာချက်မှာဖော်ပြထားပါတယ်။

လက်ရှိအချိန်မှာ လူမနေတဲ့ဆိုင်ခန်း ၄ ခန်းကို ဘက်ဟိုးနဲ့ဖြိုချထားပြီး ဆိုင်ခန်းပိုင်ရှင်တွေက ငိုယိုတောင်းပန်တာကြောင့် ပစ္စည်းရွှေ့မယ့်အချိန်ကို ခေတ္တပေးထားကာ ပစ္စည်းတွေရွှေ့ပြီးတာနဲ့ဖြိုချဖို့ စစ်ကောင်စီအဖွဲ့ဝင်တွေက စောင့်ဆိုင်းနေကြတယ်လို့ သိရပါတယ်။

စာတည်း – လင်း

စလင်း၊ ဧပြီ ၅၊ ၂၀၂၅။

မကွေးတိုင်း၊ စလင်းမြို့နယ်မှာဝင်ရောက်နေတဲ့ စစ်ကောင်စီစစ်ကြောင်းကထွက်ပြေးလာတဲ့ စစ်ကောင်စီတပ်သား ၁ ဦးကို ဧပြီ ၅ ရက်မှာဖမ်းမိခဲ့တယ်လို့ ဒေါင်းညီနောင်မြို့ပြပြောက်ကျားတပ်ဖွဲ့ဆီက သိရပါတယ်။

ဖမ်းမိသူဟာ ပခုက္ကူတပ်မ ၁၀၁ လက်အောက်ခံ ခလရ ၂၃၅ ကအသက် ၂၁ နှစ်အရွယ် တပ်သားချစ်ဖွေးဖြစ်ပြီး စလင်းမြို့နယ်၊ ပုသိမ်-မုံရွာလမ်းနဲ့ ကံပြား-ကျွန်းတောလမ်းကြားမှာ ကင်းပုန်းဝပ်ကာကွယ်ရေးတပ်ဖွဲ့ဝင်တွေက ဖမ်းမိခဲ့တာလို့ ဆိုပါတယ်။

“သူကဒီဘက် (စလင်း)ကို စစ်ကူလာရတာ၊ ဒီဘက်ကိုရောက်တာ ၄ ရက်ပဲရှိသေးတယ်၊ လက်နက်ခဲယမ်းတွေ မပါဘူးဗျ၊ လူချည်းပဲဖမ်းဆီးမိတာ” လို့ ဒေါင်းညီနောင်မြို့ပြပြောက်ကျားခေါင်းဆောင်ဗိုလ်သတ္တိက ပြောပါတယ်။

ချစ်ဖွေးဟာ ၂၀၂၄ စက်တင်ဘာ ၈ ရက်က ဟုမ္မလင်းလေယာဥ်ကွင်းမှာ ပေါ်တာဆွဲခံခဲ့ရပြီး စစ်သင်တန်း ၁ လတက်ခဲ့ပြီးနောက် စစ်ကောင်စီတပ်သားဖြစ်လာတာလို့ ဆိုပါတယ်။

“ဟုမ္မလင်းလေယာဉ်ကွင်းမှာ သူပေါ်တာဆွဲခံရတာ၊ ရမည်းသင်းမှာ သင်တန်းတက်ခဲ့ရတာ၊ အပတ်စဉ် ၆ သင်တန်းဆင်းဗျ၊ ၁ လပဲ သင်တန်းတက်ခဲ့ရတယ်” လို့ တပ်သားချစ်ဖွေးရဲ့ပြောပြချက်ကို ဗိုလ်သတ္တိက ပြန်ပြောပါတယ်။

ဒါ့အပြင် သူဟာပေါ်တာဆွဲမခံရခင်က ဒေသခံကာကွယ်ရေးတပ်ဖွဲ့တွေထဲမှာ တာဝန်ထမ်းဆောင်ဖူးတယ်လို့လည်း ဆိုပါတယ်။

လက်ရှိမှာတော့ တပ်သားချစ်ဖွေးကို ဒေါင်းညီနောင်မြို့ပြပြောက်ကျာ်းတပ်ဖွဲ့မှာ စောင့်ရှောက်ထားကာ သူ့ဇာတိကိုပြန်ဖို့တောင်းဆိုထားတယ်လို့လည်း သိရပါတယ်။

သတင်း – ဒိန်းဂျား၊ စာတည်း – လင်း

ရေစကြို၊ ဧပြီ ၄၊ ၂၀၂၅။

မကွေးတိုင်း၊ ရေစကြိုမြို့၊ အမှတ် ၃၊ ပန်းတော်တင်ရပ်ကွက်က ကုန်စုံဆိုင်ကြီးတဆိုင် မီးလောင်ပျက်စီးခဲ့တယ်လို့ ဒေသခံတွေဆီကသိရပါတယ်။

ဧပြီ ၄ ရက်ဒီညနေ ၃ နာရီလောက်မှာ ပန်းတော်တင်ရပ်ကွက်ရှိ ‘ဒေါ်ဆယ်သန်း’ ကုန်စုံဆိုင်က စတင်ပြီးမီးလောင်ခဲ့ရာ ဘေးချင်းကပ်နေအိမ် ၁ လုံးလည်း မီးကူးစက်ခဲ့တယ်လို့ ဆိုပါတယ်။

“ဒေါ်ဆယ်သန်း ဆီဆိုင်မီးလောင်တာ၊ ပေါ့ဆမီးလို့ပြောတယ်၊ အိမ်မှာတင်ရောင်းတဲ့ ဆီဆိုင်ပါ၊ သူက စားဆီကော ဒီဇယ်၊ ဓါတ်ဆီရောင်းတယ်၊ ကုန်စုံဆိုင်လည်းဖွင့်ထားတယ်၊ ဒေါ်ဆယ်သန်းအိမ်နဲ့ ဘေးကအိမ်လည်း မီးလောင်တာ၊” လို့ ဒေသခံတဦးကပြောပါတယ်။

ဒါ့အပြင်မီးလောင်နေချိန် မီးငြှိမ်းသတ်ဖို့သွားတဲ့အမျိုးသားတဦးကိုလည်း မီးလောင်တဲ့နေရာအနီးမှာ ရောက်နေတဲ့ စစ်ကောင်စီတပ်ဖွဲ့ဝင်တွေက သေနတ်နဲ့ပစ်ခတ်ခဲ့တဲ့အတွက် ဒဏ်ရာရခဲ့တယ်လို့ အထက်ပါဒေသခံကဆက်ပြောပါတယ်။

ရေစကြိုမြို့ မြို့နယ်မီးသတ်တပ်ဖွဲ့နဲ့ မြို့မဈေး အရံမီးသတ်တပ်ဖွဲ့တို့က မီးငြှိမ်းသတ်ခဲ့ကာ မီးလောင်ပြီး နာရီဝက်လောက်အကြာမှာ မီးငြှိမ်းနိုင်ခဲ့တယ်လို့ ဆိုပါတယ်။

ဒီမီးလောင်မှုအတွင်း လူထိခိုက်မှုမရှိဘဲ ငွေကျပ်သိန်း ၁၀၀ ဝန်းကျင်လောက်တော့ ဆုံးရှုံးနိုင်တယ်လို့ ဒေသခံတွေက ခန့်မှန်းထားပေမယ့် မြေလတ်အသံကသီးခြားအတည်မပြုနိုင်သေးပါဘူး။

စာတည်း – လင်း