ဘက်ပြောင်းခိုလှုံ

မြေလတ်အသံ၊ မတ် ၅၊ ၂၀၂၅။

မကွေးတိုင်း၊ ပခုက္ကူမြို့အခြေစိုက် တပ်မ ၁၀၁ က စစ်ကောင်စီတပ်သား ၂ ဦး မတ် ၄ ရက် မနက်ပိုင်းမှာ တပ်ထဲကထွက်ပြေးပြီး ဘက်ပြောင်းခိုလှုံလာတယ်လို့ Burma Revolution Rangers အဖွဲ့ဆီက သိရပါတယ်။

ဘက်ပြောင်းခိုလှုံလာသူတွေဟာ အသက် ၂၅ နှစ်အရွယ် တပ်သား ချစ်ဆန်းနိုင်နဲ့ ၂၇ နှစ်အရွယ် တပ်သား ချစ်ကိုတို့ဖြစ်ပြီး သူတို့ကိုဒေသခံကာကွယ်ရေးတပ်ဖွဲ့ဝင်တွေက သွားရောက်ခေါ်ဆောင်ခဲ့ရတာလို့ ဆိုပါတယ်။

“သူတို့ပြေးလာတာကတော့ မနက်အစောကြီး ၄ နာရီခွဲ၊ ၅ နာရီလောက်က။ ကျနော်တို့သွားခေါ်တဲ့အခါကျတော့ ၈ နာရီခွဲလောက်တော့ရှိပြီ။ လက်နက်ခဲယမ်းကတော့ ဘာမှမပါဘူး၊ သူတို့လည်း ကိုယ်လွတ်ရုန်းလာရတာ။” လို့ Burma Revolution Rangers တာဝန်ခံ ရဲဘော်ဒီမိုက ပြောပါတယ်။

တပ်သားချစ်နိုင်ဟာ မန္တလေးမှာဖမ်းဆီးခံခဲ့ရပြီး တပ်သားချစ်ကိုကတော့ မုံရွာမှာဖမ်းဆီးခံခဲ့ရတာလို့ ဆိုပါတယ်။

အဲ့ဒီနောက် ၂ ဦးစလုံးက ရပ်စောက် ဗထူးသင်တန်းကျောင်းမှာ ၂ လခွဲစစ်သင်တန်းတက်ခဲ့ရပြီး သင်တန်းဆင်းတဲ့အခါ မိတ္ထီလာတပ်ရင်းတခုကို ရောက်ရှိကာ အဲ့ဒီကနေတဆင့် အခုနှစ် မတ် ၂ ရက်မှာ တပ်မ ၁၀၁ ကို ရောက်ရှိလာတာလို့ ဆိုပါတယ်။

လက်ရှိမှာသူတို့ကို Burma Revolution Rangers ရဲ့မဟာမိတ်တပ်ဖွဲ့တဖွဲ့ဆီကို ပို့ဆောင်ထားပြီး နေထိုင်စားသောက်ရေးအတွက် စီစဥ်ပေးထားတယ်လို့ ပြောပါတယ်။

Burma Revolution Rangers အဖွဲ့ဟာ မကွေးတိုင်း၊ ပခုက္ကူမြို့မြို့နယ်အခြေစိုက် တပ်ဖွဲ့တခုဖြစ်ပြီး ဘက်ပြောင်းခိုလှုံတဲ့စစ်ကောင်စီတပ်ဖွဲ့ဝင် ၈ ဦးထိ ရှိပြီလို့ သိရပါတယ်။

စာတည်း – လင်း

ပခုက္ကူ၊ မတ် ၃၊ ၂၀၂၅။

မကွေးတိုင်း၊ ပခုက္ကူမြို့နယ်၊ မြောက်လုကန်ကျေးရွာစစ်ကောင်စီစခန်းက တပ်ဖွဲ့ဝင် ၁ ဦး လက်နက်၊ ခဲယမ်းတွေနဲ့အတူ တော်လှန်ရေးတပ်ဖွဲ့တွေဘက်ကို ဘက်ပြောင်းခိုလှုံလာတယ်လို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ်ဆီက သိရပါတယ်။

ဘက်ပြောင်းခိုလှုံလာသူမှာ ခြေမြန်တပ်မဌာနချုပ် ၁၀၁ က အသက် ၂၆ နှစ်အရွယ် တပ်သား မျိုးမင်းအောင် ဖြစ်ပြီး မတ် ၁ ရက်မှာ ၎င်းအထိုင်စခန်းကနေ တော်လှန်ရေးပူးပေါင်းတပ်ဖွဲ့တွေဆီ ထွက်ပြေးခိုလှုံလာတာလို့ ဆိုပါတယ်။

“ ကျနော်တို့က တခြားတပ်နဲ့ဆက်သွယ်ပြီးတော့ သူ့ကိုခေါ်ထုတ်ရတာ။ သူတို့အထိုင်ချထားတဲ့ အနီးနားအထိ သွားပြီး ခေါ်ထုတ်ခဲ့ရတာ။” လို့ မြိုင်မြို့နယ်ပကဖတာဝန်ရှိသူတဦးက ပြောပါတယ်။

၎င်းဟာ စစ်ကောင်စီတပ်ရဲ့ပေါ်တာဆွဲဖမ်းဆီးမှုမခံရမီက စစ်ကိုင်းမြို့တွင်းပြေးဆွဲတဲ့ ခရီးသည်တင်လိုင်းကားမောင်းနှင်သူဖြစ်ပြီး ၂၀၂၄ ဒီဇင်ဘာ ၁၂ ရက်က လိုင်းကားမောင်းနှင်နေစဉ် စစ်ကိုင်းတံတားပေါ်မှာ စစ်ကောင်စီတပ်မ ၃၃ ရဲ့ ပေါ်တာဆွဲဖမ်းခံခဲ့ရပြီး ရှမ်းပြည်နယ်(တောင်ပိုင်း)၊ ဟိုပုံးမြို့ရှိ တကန သင်တန်းကျောင်းကို ပို့ဆောင်ခံခဲ့ရသူဖြစ်ပါတယ်။

စစ်သင်တန်း ၂ လခွဲကြာတက်ရောက်ပြီးနောက် ပခုက္ကူအခြေစိုက် တပ်မ ၁၀၁ ဌာနချုပ်ကတဆင့် မြောက်လုကန်ရွာစစ်ကောင်စီစခန်းကို ပို့ဆောင်ခံခဲ့ရကာ အဆိုပါစခန်းကိုရောက်ပြီး ၄ ရက်အကြာမှာ လက်နက်နဲ့အတူထွက်ပြေးလာနိုင်ခဲ့တာလို့ ဆိုပါတယ်။

ဘက်ပြောင်းခိုလှုံလာတဲ့ တပ်သား မျိုးမင်းအောင်ဟာ MA 1 သေနတ် ၁ လက်၊ MA ကျည် ၆၀ တောင့်၊ ကျည်ဘောက် ၃ ခု ကို ယူဆောင်လာနိုင်လို့ ၎င်းကို ဒေသတော်လှန်ရေးတပ်ဖွဲ့ဝင်တွေဘက်က ငွေကျပ် သိန်း ၃၀ ချီးမြှင့်ခဲ့တယ်လို့ သိရပါတယ်။

စာတည်း – ဟိန်းစံ

ရွှေဘို၊ ဖေဖော်ဝါရီ ၂၁၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ပျူစောထီးနဲ့ပူးပေါင်းတပ်ဖွဲ့တွေထိန်းချုပ်ထားတဲ့ ညောင်ကိုင်းရွာက ရဲတပ်သားတဦး လက်နက်နဲ့အတူ ဘက်ပြောင်းခိုလှုံလာတယ်လို့ တောင်သူဦးကြီးများအဖွဲ့-LDF ဆီက သိရပါတယ်။

ဘက်ပြောင်းလာသူမှာ ညောင်ကိုင်းရွာမှာတပ်စွဲနေတဲ့ အသက် ၂၅ နှစ်အရွယ် ရဲတပ်သား စိန်သောင်း ဖြစ်ပြီး ဖေဖော်ဝါရီ ၁၆ ရက် နေ့လယ် ၁၂ နာရီခန့်မှာ ၎င်းတပ်စွဲနေရာကနေ ထွက်ခွာလာတာလို့ ဆိုပါတယ်။

“ သူကလည်း သတ်မှတ်ထားတဲ့ နယ်မြေတနေရာရောက်အောင်လာပြီးတော့ ကျနော်တို့ကလည်း သတ်မှတ်ထားတဲ့‌နေရာအထိ သွားပြီးခေါ်ထုတ်တာ။” လို့ တောင်သူဦးကြီးများအဖွဲ့-LDF တာဝန်ခံအမျိုးသမီးက ပြောပါတယ်။

ရဲတပ်သား စိန်သောင်း ဟာ ကရင်နီပြည်နယ်ဇာတိဖြစ်ပြီး စစ်အာဏာသိမ်းပြီးနောက် ရွှေဘိုမြို့ကတဆင့် ညောင်ကိုင်းရွာကိုပို့ဆောင်ခံရတာ ၁ နှစ်ခန့်ရှိပြီဖြစ်ကာ ဘက်ပြောင်းလာဖို့ ယမန်နှစ်အောက်တိုဘာလက စတင်ဆက်သွယ်လာတာဖြစ်တယ်လို့ ဆိုပါတယ်။

ဘက်ပြောင်းလာသူရဲတပ်သားနဲ့အတူ BA 94(အူဇီ)သေနတ် ၁ လက်၊ ကျည်ဘောက် ၂ ခု၊ လက်ပစ်ဗုံး ၁ လုံးယူဆောင်လာတာကြောင့် တောင်သူဦးကြီးများအဖွဲ့-LDF က ငွေ ၁၀ သိန်းကျပ် ဆုချီးမြှင့်ခဲ့တယ်လို့ သိရပါတယ်။

စာတည်း – ဟိန်းစံ

ပဲခူး၊ ဖေဖော်ဝါရီ ၁၈၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်၊ ထန်းပင်ကုန်းရွာစစ်ဆေးရေးဂိတ်က စစ်ကောင်စီတပ်သားတဦး ဘက်ပြောင်းခိုလှုံလာတယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ ဆီက သိရပါတယ်။

စစ်ကောင်စီတပ်သားအောင်တင်မြင့်ဟာ ထန်းပင်ကုန်းရွာစစ်ဆေးရေးဂိတ်ကိုရောက်ရှိပြီး ၄ ရက်အကြာ ဖေဖော်ဝါရီ ၁၇ ရက် မနက် ၁၀ နာရီလောက်မှာ ထွက်ပြေးအလင်းဝင်ခဲ့တာလို့ ဆိုပါတယ်။

“သူ့ကို ကင်းမှူးအနေနဲ့တာဝန်ပေးထားပြီး မနက် ၆ နာရီကနေ ညနေ ၁၀ နာရီအထိကင်းစောင့်ရတာ။ တောထဲမှာ ကျနော်တို့ရှိတယ်ဆိုပြီး ထွက်ပြေးလာရင်းကနေ ရဲဘော်တွေနဲ့တွေ့လို့ အလင်းဝင်လာတာပါ၊ သူ့အနေနဲ့ တော်လှန်ရေးမှာပါဝင်သွားဖို့ဆန္ဒရှိနေပါတယ်။ AA နဲ့ ချိတ်ဆက်ရရင် အဲ့ကိုသွားချင်ပါတယ် ပြောပါတယ်။” လို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ မှ တာဝန်ရှိသူက ပြောပါတယ်။

တပ်သားအောင်တင်မြင့်ဟာ ပြီးခဲ့တဲ့ ၂၀၂၄ အောက်တိုဘာလမှာ ရခိုင်ပြည်နယ်၊ ပုဏ္ဏားကျွန်းမြို့နယ်ကနေ ရန်ကုန်ကိုလာစဉ် အုတ်ဖိုတာဆုံစစ်ဆေးရေးဂိတ်မှာ ဖမ်းဆီးခံရပြီး စစ်မှုထမ်းအပတ်စဉ် ၆ အတွက် ဂျိုးဖြူ အမှတ် (၂) စစ်သင်တန်းကျောင်းကိုအပို့ခံလိုက်ရပြီးနောက်မှာ စစ်ကောင်စီတပ်သားဖြစ်လာတာလို့ ဆိုပါတယ်။

“သူ့ကို အုတ်ဖိုတာဆုံဂိတ်က စခ တွေဖမ်းတုန်းက စစ်မှုမထမ်းရင် ထောင် ၅ နှစ်ချမယ်ဆိုလို့ တပ်ထဲဝင်တယ်ပြောပါတယ်။ စစ်တပ်ထဲဝင်ရင် ရှေ့တန်းမှာထွက်ပြေးဖို့အဲ့ကတည်းက ဆုံးဖြတ်ထားတယ် ပြောတယ်” လို့ တပ်သားအောင်တင်မြင့်ရဲ့ပြောပြချက်ကို ကိုးကားပြီး အထက်ပါ တာဝန်ရှိသူက ဆက်ပြောပါတယ်။

သာယာဝတီခရိုင်တပ်ရင်း ၃၈၀၂ တပ်ခွဲ ၅ ဟာ ဖေဖော်ဝါရီ ၄ ရက်ကလည်း အုတ်ဖိုမြို့နယ်၊ စင်မြင့်ရွာ အနီးမှာ စစ်ကောင်စီတပ်သားတွေနဲ့ အပြန်အလှန်ပစ်ခတ်မှုဖြစ်ခဲ့တာကြောင့် စစ်ကောင်စီတပ်သား ၆ ဦးသေဆုံးကာ၊ ၁၅ ဦးထိမှန်ဒဏ်ရာရရှိခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဖေဖော်ဝါရီ ၁၀၊ ၂၀၂၅။

ရန်ကုန်တိုင်း၊ လှည်းကူးမြို့နယ်၊ အင်းတိုင်အခြေစိုက် အမှတ် ၇၄ သံချပ်ကာစစ်ဆင်ရေးကွပ်ကဲမှုဌာနချုပ်မှ ဗိုလ်ကြီးတဦး ဘက်ပြောင်းခိုလှုံလာတယ်လို့ ဖေဖော်ဝါရီ ၉ ရက်မှာ ရေဦးမြို့နယ်ပကဖက သတင်းထုတ်ပြန်ခဲ့ပါတယ်။

ဘက်ပြောင်းခိုလှုံလာသူ ဗိုလ်ကြီး ဟိန်းထက်အောင် ၃၇ နှစ်ဟာ ဇန်နဝါရီလ ပထမအပတ်ကတည်းက ၎င်းရဲ့အင်းတိုင်အခြေစိုက် တပ်ရင်းကနေ ရောက်ရှိလာတာဖြစ်ပြီး သူ့ရဲ့မိသားစုဝင်တွေနဲ့ ရဲဘော်အချို့ရဲ့လုံခြုံရေးအခြေအနေအရ ယခုအချိန်မှ သတင်းထုတ်ပြန်ရတာဖြစ်တယ်လို့ ဆိုပါတယ်။

“သူ့အကိုတယောက်က ကျနော်တို့ ပကဖထဲမှာရှိတယ်။ သူနဲ့ချိတ်ဆက်ပြီးတော့မှ ဝင်လာတာ။ သူကဘာမှ မပါခဲ့ဘူး၊ လူချည်းပဲထွက်လာတာ။ အဝတ်အစားတောင် အပိုမပါဘူး။ သူ့အပြောအရကတော့ အဖွဲ့အစည်းရဲ့လုပ်ရပ်ကို မနှစ်မြို့တော့တာရယ် အတွင်းမှာလည်း ကြီးနိုင်ငယ်ညှင်းလုပ်ပြီး ဂိုဏ်းဂဏကွဲနေတာတွေကြောင့် ထွက်လာတာလို့တော့ ပြောတယ်။”လို့ ရေဦးမြို့နယ်ပကဖ တာဝန်ခံကပြောပါတယ်။

ဘက်ပြောင်းခိုလှုံလာသူ ဗိုလ်ကြီး ဟိန်းထက်အောင်ဟာ စစ်ကောင်စီကို ပြန်လည်တိုက်ခိုက်ဖို့ တောင်းဆိုထားပေမယ့် ခွင့်ပြုသင့်၊ မသင့်ကို အခြေအနေစောင့်ကြည့်နေကာ ကာကွယ်ရေးတပ်ဖွဲ့တွေနဲ့အတူထားရှိ စောင့်ရှောက်ထားတယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၂၃ ရက်ကလည်းရေဦးမြို့မရဲစခန်းက လုပ်သက် ၅ နှစ်ရှိ အသက် ၂၃ နှစ်အရွယ် ရဲတပ်သား အောင်သျှိုင်းကျော် ဆိုသူဟာ ရေဦးမြို့နယ်ပကဖအဖွဲ့ထံ လက်နက်ခဲယမ်းတွေနဲ့အတူ ဘက်ပြောင်းခိုလှုံလာခဲ့သေးတယ်လို့ သိရပါတယ်။

စစ်အာဏာသိမ်းပြီး ၄ နှစ်တာကာလအတွင်း ရေဦးမြို့နယ်ပကဖအဖွဲ့ထံ ဘက်ပြောင်းခိုလှုံလာသူ စစ်ကောင်စီတပ်ဖွဲ့ဝင် ဗိုလ်ကြီး ၂ ဦးအပါအဝင် ၆ ဦး၊ ရဲတပ်သား ၁ ဦး စုစုပေါင်း ၇ ဦးထိရှိနေပြီး ဗိုလ်ကြီး ၁ ဦးအပါအဝင် ၃ ဦးကတော့ ပကဖအဖွဲ့မှာပါဝင်ပြီး စစ်ကောင်စီတပ်ကို ပြန်လည်တွန်းလှန်တိုက်ခိုက်နေတယ်လို့ ပကဖတာဝန်ရှိသူထံက သိရပါတယ်။

စာတည်း – ကိုချမ်း

စစ်ကိုင်း၊ ဖေဖော်ဝါရီ ၈၊ ၂၀၂၅။

စစ်ကိုင်းတိုင်း၊ ရေဦးမြို့မရဲစခန်းက ရဲတပ်သား ၁ ဦး လက်နက်တွေနဲ့အတူ ဘက်ပြောင်းခိုလှုံလာတယ်လို့ ဖေဖော်ဝါရီ ၇ ရက်မှာ ရေဦးမြို့နယ်ပြည်သူ့ကာကွယ်ရေးအဖွဲ့က ထုတ်ပြန်ပါတယ်။

ဘက်ပြောင်းခိုလှုံလာသူက ရေဦးမြို့မရဲစခန်းမှာ လုပ်သက် ၅ နှစ်ရှိ အသက် ၂၃ နှစ်အရွယ် ရဲတပ်သား အောင်သျှိုင်းကျော်ဖြစ်ပြီး ဇန်နဝါရီ ၂၃ ရက်မှာ ရေဦးမြို့နယ်ပြည်သူ့ကာကွယ်ရေးဆီ ဘက်ပြောင်းခိုလှုံလာတာလို့ ဆိုပါတယ်။

“စကစရဲ့ လုပ်ရပ်ကိုလက်မခံနိုင်တော့လို့ ကာကွယ်ရေးအဖွဲ့တွေနဲ့ ပူးပေါင်းချင်တယ်ဆိုလို့ထွက်လာတာ။ သူရဲ့အတွင်းကကိစ္စတွေ၊ မိသားစုလုံခြုံရေးအခြေနေတွေကြောင့် အခုမှ ထုတ်ပြန်ရတာပါ။ ကျနော်တို့ဘက်က မြောက်ပိုင်းပကဖကို ဖုန်းနဲ့ချိတ်ဆက်ပြီး အလင်းဝင်လာတာပါ။”လို့ ရေဦးမြို့နယ်ပြည်သူ့ကာကွယ်ရေးအဖွဲ့ တာဝန်ခံက ပြောပါတယ်။

ရဲတပ်သားရဲ့စိတ်ဆန္ဒအရ တော်လှန်ရေးအဖွဲ့တွေနဲ့အတူ လက်တွဲဆောင်ရွက်လိုပါက အချိန်အတိုင်းအတာတခုထိစောင့်ကြည့်ပြီး ပါဝင်ခွင့်ပေးသွားမှာဖြစ်သလို စီးပွားရေးလုပ်ချင်ရင်လည်း လိုအပ်တဲ့ အကူအညီပေးသွားမှာလို့ ရေဦးမြို့နယ်ပြည်သူ့ကာကွယ်ရေးအဖွဲ့ တာဝန်ခံကပြောပါတယ်။

ဘက်ပြောင်းခိုလှုံလာတဲ့ ရဲတပ်သားဟာ G3 ၁ လက်၊ ကျည်ဆန် ၁၈၀၊ ကျည်အိမ် ၄ ခု၊ ကျည်ကာအင်္ကျီ ၁ ထည်၊ လက်ပစ်ဗုံး ၁ လုံးယူဆောင်လာခဲ့ပြီး သူ့ကို ကျပ်သိန်း ၅၀ ချီးမြှင့်ပေးထားတယ်လို့ သိရပါတယ်။

“ကျနော်က လက်နက်နဲ့စစ်ရေးပြလုပ်လိုပါတယ်။ အဲ့ဒီနေ့က စခန်းကိုသွားရမှာ။ သေနတ်လွယ်သွားလို့ရတယ်ဆိုတော့ တခါတည်းထွက်လာလိုက်တာ။ ပုံမှန်ဆို သေနတ်လွယ်သွားလာလေ့မရှိဘူး။ ကျနော်က မြို့အထွက်ဂိတ်မှ တာဝန်ကျနေတာ။ အဲကနေ စခန်းကိုသွားရမှာကို စခန်းကိုမသွားတော့ဘဲ လမ်းကြားကနေချိုးပြီး ထွက်လာလိုက်တာ။”လို့ ဘက်ပြောင်းခိုလှုံလာတဲ့ ရဲတပ်သား အောင်သျှိုင်းကျော်က ပြောပါတယ်။

စစ်အာဏာသိမ်းကာလ ၄ နှစ်ကျော်အတွင်း ရေဦးမြို့နယ်ပြည်သူ့ကာကွယ်ရေးအဖွဲ့ဆီ ဘက်ပြောင်းခိုလှုံလာသူ စစ်ကောင်စီတပ်ဖွဲ့ဝင် ဗိုလ်ကြီး ၁ ဦးအပါအဝင် ၅ ဦး၊ ရဲတပ်သား ၁ ဦး စုစုပေါင်း ၆ ဦးထိရှိနေပြီး ဗိုလ်ကြီးအပါအဝင် ၃ ဦးကတော့ တပ်ဖွဲ့မှာပါဝင်ပြီး စစ်ကောင်စီတပ်ကို ပြန်လည်တိုက်ခိုက်နေတယ်လို့ ရေဦးမြို့နယ်ပြည်သူ့ကာကွယ်ရေးအဖွဲ့ တာဝန်ခံကပြောပါတယ်။

စာတည်း – လင်း

ပဲခူး၊ ဖေဖော်ဝါရီ ၆၊ ၂၀၂၅။

ပဲခူးတိုင်းအရှေ့ခြမ်း၊ ကျောက်ကြီးမြို့နယ်(လယ်ဒို)ရှိ ကရင်အမျိုးသားလွတ်မြောက်ရေးတပ်မတော်-KNLA တပ်ရင်း ၉ ဆီကို စစ်ကောင်စီရဲ့ ဒုတပ်ကြပ် ၁ ဦးအပါအဝင် ၄ ဦး လက်နက်ခဲယမ်းတွေနဲ့ ဘက်ပြောင်းခိုလှုံလာတယ်လို့ ကရင်အမျိုးသားအစည်းအရုံး-KNU က ဖေဖော်ဝါရီ ၅ ရက်မှာ ထုတ်ပြန်ပါတယ်။

ကျောက်ကြီးမြို့နယ်အတွင်း တိုက်ခိုက်ရေးရောက်ရှိနေတဲ့ ကော့သောင်းမြို့နယ်၊ ခမောက်ကြီးအခြေစိုက် စကခ ၂၀ လက်အောက် ခမရ ၅၈၄ တပ်ရင်းမှ ဒုတပ်ကြပ် ညီညီလွင်၊ တပ်သားမြင့်ဝင်း၊ တပ်သားမျိုးမင်းသက် နဲ့ တပ်သား စောအေးဖရေ တို့ဟာ ဖေဖော်ဝါရီ ၄ ရက်မှာ ဘက်ပြောင်းခိုလှုံလာကြတာပါ။

သူတို့နဲ့အတူ MA-4 တွဲပစ်လောင်ချာ ၁ လက်၊ MA-1 ၂ လက်၊ ကျည် ၇၅ တောင့်နဲ့ ကျည်ဘောက် ၃ ဘောက်ပါဝင်လာတယ်လို့ ထုတ်ပြန်ချက်မှာပါရှိပါတယ်။

အထက်ပါဘက်ပြောင်းခိုလှုံလာသူ ၄ ဦးကို ကျောက်ကြီးမြို့ (လယ်ဒို) တာဝန်ရှိသူတွေနဲ့ တပ်ရင်း ၉ တာဝန်ရှိသူတွေကပူးပေါင်းပြီး ၁ ဦးကို ငွေကျပ် ၁၀ သိန်းစီ ချီးမြှင့်ထားတယ်လို့ ဆိုပါတယ်။

သူတို့ဟာ စစ်ကောင်စီတပ်ဖွဲ့ဝင်တွေရဲ့ ပေါ်တာဆွဲဖမ်းဆီးခံရပြီးနောက် အဓမ္မစစ်မှုထမ်း ခိုင်းခံခဲ့ရသူတွေဖြစ်တယ်လို့ ထုတ်ပြန်ချက်ကဆိုပါတယ်။

ပြီးခဲ့တဲ့ ဇန်နဝါရီ ၅ ရက်ကလည်း ခလရ ၂၈၈ မှ စစ်ကောင်စီတပ်သား ၂ ဦးဟာ MA 1 ၁ လက်၊ MA 3 ၁ လက်နဲ့အတူ ကရင်အမျိုးသားလွတ်မြောက်ရေးတပ်မတော်-KNLA တပ်ရင်း ၉ ဆီကို ဘက်ပြောင်းခိုလှုံလာခဲ့ပါသေးတယ်။