စစ်ကောင်စီစစ်ကြောင်း

ဆော၊ စက်တင်ဘာ ၃၀၊ ၂၀၂၆။

မကွေးတိုင်း၊ ဆောမြို့နယ်၊ တောင်ဘိုကြီးကျေးရွာမှာ စစ်တပ်စစ်ကြောင်းက ပြည်သူနေအိမ် ၁၅ လုံးထက်မနည်း မီးရှို့ဖျက်စီးခဲ့တယ်လို့ ဒေသခံတွေဆီက သိရပါတယ်။

စက်တင်ဘာလ ၂၉ ရက်နေ့ နေ့လယ် ၁၂ နာရီခန့်ကစတင်ပြီး အာဏာသိမ်းစစ်တပ် စစ်ကြောင်းဟာ ကျေးရွာဘုန်းကြီးကျောင်း မြောက်ဘက်ခြမ်းက ပြည်သူတွေရဲ့ နေအိမ်တွေကို အကြောင်းမဲ့ မီးရှို့ခဲ့တာလို့ ဆိုပါတယ်။

“တောင်ဘို့ကြီးက မီးရှို့ခံရတာ ပထမဆုံး အကြိမ်ပါပဲ။ ရွာမှာက စစ်ကြောင်းရောက်ကတည်းက အများစုက ရှောင်ရတာ။ မနေ့က မီးရှို့ပြီး တနာရီလောက်အကြာမှာ နေအိမ် ၁၀ လုံးကျော် ကုန်သွားပြီး။ မီးကလောင်စာကုန်သွားလို့ ညနေပိုင်းလောက်မှ ငြိမ်းသွားတာ။ သူတို့ရှိနေတော့ ဘယ်သူမှလည်း မငြိမ်းရဲကြဘူးလေ”လို့ ဒေသခံတဦးက ပြော​ပါတယ်။

စစ်တပ်မီးရှိူ့လို့ အနည်းဆုံးနေအိမ် ၁၅ လုံး မီးလောင်ပျက်စီးနိုင်ပြီး ကျေးရွာပြင်ပကနေ မီးလောင်မှုအခြေနေကို စောင့်ကြည့်နေသူတွေရဲ့ ပြောပြချက်အရ မီးလောင်အိမ်ခြေ ပိုများနိုင်တယ်လို့ ဆိုပါတယ်။

နေအိမ်တွေကို မီးရှို့ခဲ့တဲ့ စစ်တပ်အဖွဲ့ဝင်တွေဟာ စက်တင်ဘာလ ၂၀ ရက်နေ့က ကျေးရွာထဲကို အင်အား ၈၀ ခန့်နဲ့ရောက်လာပြီး ကျေးရွာဘုန်းကြီးကျောင်းမှာ တပ်စွဲနေတာလို့ ဆိုပါတယ်။

စစ်ကြောင်းဟာ စက်တင်ဘာလ ၃၀ ရက်နေ့အထိ ကျေးရွာထဲမှာ ဆက်လက်ရှိနေသေးတာကြောင့် မြေပြင်အပျက်အစီး အတိအကျသိရဖို့ စုံးစမ်းနေဆဲလို့ သိရပါတယ်။

စက်တင်ဘာလ ၂၆ ရက်နေ့ကလည်း ဆောမြို့နယ်၊ သီးကုန်းကျေးရွာ အထိုင်ချ တပ်စွဲထားတဲ့ စစ်တပ်က ကျေးရွာထဲက နေအိမ်တွေကို မီးရှို့လို့ နေအိမ် ၃ လုံးမီးလောင်ပျက်စီးခဲ့တယ်လို့ သိရပါတယ်။

Photo – Google Earth

◾️တောင်းတဲ့ပိုက်ဆံမပေးလို့ အမျိုးသမီးတဦးကို ရိုက်နှက်လို့ ပြင်းထန်ဒဏ်ရာရ

ကျောက်ပန်းတောင်း၊ ဩဂုတ် ၁၇၊ ၂၀၂၆။

မန္တလေးတိုင်း၊ ကျောက်ပန်းတောင်းမြို့နယ်၊ ပုပ္ပါးတောင်အရှေ့ဘက်က ကျေးရွာတွေကို စစ်ကောင်စီစစ်ကြောင်းက နေ့စဉ်ဆိုသလို မီးရှို့ကာ ပြည်သူတွေရဲ့ ပစ္စည်းတွေကို သိမ်းယူနေပြီး၊ အမျိုးသမီးတဦးကိုလည်း ရိုက်နှက်ခဲ့တဲ့အတွက် ဒဏ်ရာပြင်းထန်စွာ ရရှိခဲ့တယ်လို့ ဒေသခံတွေဆီက သိရပါတယ်။

ရွာစဉ်ပတ် မီးလိုက်ရှို့နေ့တဲ့ စစ်ကြောင်းဟာ ဒီဒုတ်ကုန်းရွာမှာ ညအိပ်ရပ်နားခဲ့ပြီး သြဂုတ် ၁၆ ရက် မနေ့ မနက်ပိုင်းမှာတော့ အဲ့ဒီကနေ ၁ မိုင်ခန့်ဝေးတဲ့ လေးပင်ရွာကို ဝင်ရောက်ကာ အဲဒီကမှတဆင့် ဒေသအခေါ် ဖလံကျင်းတောတိုက် (လယ်တော) ထဲက နေအိမ် ၃ လုံးနဲ့ ကမ္ဘားတဲရွာက နေအိမ်တွေကို မီးရှို့ခဲ့တာလို့ ပြောပါတယ်။

အဆိုပါစစ်ကြောင်း လေးပင်ရွာကို ဝင်လာချိန်မှာတော့ ရွာကျောင်းဆရာတော်က တောင်းပန်ခဲ့တဲ့အတွက် နေအိမ်တွေကို မီးမရှို့ပေမယ့် လိုက်ထရပ်ကား ၁ စီး၊ ငွေကျပ် ၄ သိန်း၊ ဖုန်း ၁ လုံးနဲ့ အခြားအဖိုးတန် ပစ္စည်းတွေကို သိမ်းယူသွားတယ်လို့ ဆိုပါတယ်။

“ဘုန်းကြီးက အိမ်တွေကို မီးမရှို့ဖို့တားတာ စစ်သားက မီးမရှို့လို့မရဘူးဆိုပြီး ပြောတာ၊ နောက်ဆုံးမှ မီးမရှို့ပဲနဲ့ ရွာထဲက ပစ္စည်းတွေကိုယူသွားတာ။ မီးဖွားထားတဲ့ အမျိုးသမီးဆီက ပိုက်ဆံ သုံးသိန်းကိုလည်း ယူသွားတယ်။ မီးဖွားသူကို ကူလုပ်ပေးနေတဲ့ အမျိုးသမီးငယ်လေးကိုလည်း ငွေတောင်းတာကို ပေးတာနည်းလို့ဆိုပြီး ရိုက်လို့ခြောက်ချက် ချုပ်လိုက်ရတယ်။ အမျိုးသမီး ၂ ဦးဆီက ငွေ ၄ သိန်းရယ် ဖုန်း ၁ လုံးရယ် ယူသွားတာ” လို့ ဒေသခံတဦးက ပြောပါတယ်။

အဲဒီစစ်ကြောင်းက ကမ္ဘားတဲ(မြောက်)နဲ့ တောင်ရွာက နေအိမ်တွေကိုမီးရှို့ခဲ့တယ်လို့ ကြားရပေမယ့် တရွာလုံးရဲ့ပျက်ဆီးတဲ့ နေအိမ်အရေအတွက်ကိုတော့ စုံစမ်းနေဆဲဖြစ်ပြီး၊ စစ်သားနဲ့ ရဲ အင်အား ၇၀၀ ခန့်နဲ့ လှည့်လည်နေတဲ့ အဲ့ဒီစစ်ကြောင်းထဲကို လိုက်ပါလာသူတွေဟာ ဆိုင်ကယ်တွေ၊ ကားတွေအပြင် ခြေလျှင်လိုက်ပါသူတွေနဲ့အတူ ကူလည်ရွာက နေအိမ် ၁ လုံးနဲ့ ချောင်းခြားရွာက နေအိမ် ၂ လုံးကို လွန်ခဲ့တဲ့ ၂ ရက်က မီးရှို့ခဲ့ ပါတယ်။

ပြီးခဲ့တဲ့ဩဂုတ် ၁၄ ရက်နေ့ကလည်း သုံးအိမ်ကုန်းရွာက နေအိမ် ၁၇ လုံးခန့်နဲ့ သီးကုန်းရွာက နေအိမ် ၃၀ လာက်အပြင် ဒီးဒုတ်ကုန်းရွာက နေအိမ် ၁၆ လုံး၊ နွားစာတိုက်နဲ့ လယ်ယာသုံးပစ္စည်းတွေကိုလည်း မီးရှို့ဖျက်စီးခဲ့သလို သယ်ယူလို့ လွယ်ကူမယ့် လယ်ယာသုံးပစ္စည်းတွေနဲ့ အခြားအဖိုးတန် ပစ္စည်းတွေကိုလည်းသိမ်းယူသွားတယ်လို့ ဒေသခံတွေက ပြောပါတယ်။

ဒီကနေ့ မနက်ပိုင်းမှာတော့ စစ်ကြောင်းဟာ ကမ္ဘားတဲရွာကနေ သရက်ချိုကုန်းရွာကို ဝင်ရောက်ကာ လက်နက်ကြီး/ငယ်တွေနဲ့ပစ်ခတ်ပြီး၊ တောင်သာမြို့နယ် စွန်းလွန်းရွာဘက်ကနေ၊ မလှိုင်မြို့နယ်၊ တောင်ရိုးတဲရွာဘက်ကို ထွက်ခွါသွားတယ်လို့ မလှိုင်အခြေစိုက် လူထုသတင်းကွန်ယက်ရဲ့ တာဝန်ရှိသူတဦးဆီက သိရပါတယ်။

သတင်း – သော်တာအောင်

ကြို့ပင်ကောက်၊ ဩဂုတ် ၁၀၊ ၂၀၂၆။

ပဲခူးတိုင်းအနောက်ခြမ်း၊ ကြို့ပင်ကောက်မြို့နယ်ထဲက စစ်ရှောင်ပြည်သူ ၈ ဦးကို စစ်ကော်မရှင်တပ်က ဖမ်းဆီးသွားတယ်လို့ ဒေသခံတဦးဆီက သိရပါတယ်။

ကြို့ပင်ကောက်မြို့နယ်ထဲမှာ လှည့်ပတ်သွားလာနေတဲ့ စစ်ကောင်စီစစ်ကြောင်းရဲ့ရန်ကိုကြောက်လို့ လွတ်ကင်းတဲ့နေရာတွေမှာ ရှောင်တိမ်းနေကြတဲ့ ပြည်သူ ၈ ဦးကို သူတို့ခိုလှုံနေတဲ့ မြို့ကိုင်းဘုန်းကြီးကျောင်းရဲ့ စစ်ရှောင်စခန်းမှာ စစ်ကောင်စီ စစ်ကြောင်းက ဖမ်းဆီးသွားတာလို့ ဒေသခံတဦးဆီက သိရပါတယ်။

ကြို့ပင်ကောက်မြို့နယ် မြို့ကိုင်းရွာတောင်ကျောင်း ဘုန်းတော်ကြီးကျောင်းမှာ စစ်ရှောင်နေတဲ့ အမျိုးသမီး ၂ ဦးနဲ့ အမျိုးသား ၆ ဦးတို့ကို ဩဂုတ် ၉ ရက် မနေ့ကမနက်ပိုင်းမှာ စစ်ကောင်စီစစ်ကြောင်းက ဖမ်းဆီးသွားတာလို့ ဆိုပါတယ်။

ဖမ်းဆီးခံရသူတွေဟာ မြို့ကိုင်းရွာက အသက် ၄၀ ဝန်းကျင် အမျိုးသမီး၂ ဦးနဲ့ အမျိုးသား၂ ဦး၊ အသက် ၁၈ နှစ်နဲ့ ၃၃ နှစ်ကြား အမျိုးသား လူငယ် ၄ ဦးတို့ဖြစ်တယ်လို့ ဆ်ိုပါတယ်။

“ရွာထဲကို စစ်ကြောင်းဝင်လာလို့ မိုင်ဝက်လောက်ဝေးတဲ့ ဘုန်းကြီးကျောင်းမှာ ရှောင်အိပ်နေတာ နောက်ထပ်ဝင်လာတဲ့ စစ်ကြောင်းနဲ့ တိုးပြီး ဖမ်းသွားတာ” လို့ ဒေသခံတဦးက ပြောပါတယ်။

လက်ရှိအချိန်အထိ ဖမ်းဆီးခံရသူတွေကို ဆက်ခေါ်သွားလား ပြန်လွှတ် သလားဆိုတာကိုတော့ မသိရသေးဘူးလို့ သူကဆက်​ပြောပါတယ်။

ကြို့ပင်ကောက်မြို့နယ်အတွင်းမှာ စစ်ကောင်စီတပ်ဟာ အလယ်ကုန်းရွာနယ်မြေရဲကင်းစခန်းမှာ အထိုင်ချထားပြီး ကံဦး၊ ရင်းတိုက်ကွင်း၊ လိပ်ဥကုန်းနဲ့ ကြာတန်းကြီးတို့မှာ တပ်ဖြန့်ထားပေမယ့် မြေပြင်လှုပ်ရှားတာမျိုးတော့ မတွေ့ရသေးသလို ဒီကနေ့မှာတော့ လေယာဥ်ပျံသန်းမှု သုံးကြိမ်ထက်မနည်းရှိပြီလို့ အဲဒီဒေသမှာရှိတဲ့ ပြည်သူ့ကာကွယ်ရေးတပ်ဖွဲ့ဝင်တဦးက ပြောပါတယ်။

အခုလ ဩဂုတ်လ ၅ ရက်ကလည်း ကြို့ပင်ကောက်မြို့နယ် အင်တိုင်းကုန်းရွာကို မှော်ဘီလေတပ်ကနေ တက်လာတဲ့ လေယာဉ်နဲ့ ဗုံးကြဲလို့ ကလေး ၂ ဦးအပါ အဝင် ပြည်သူ ၆ ဦး ဒဏ်ရာရခဲ့ပါသေးတယ်။

ဒါ့အပြင် ပြီးခဲ့တဲ့ ဇူလိုင် ၂၅ ရက်ကလည်း ကံဦးရွာက လူငယ် ၂ ဦး မြစ်ချိုးပြန်လာချိန် စစ်ကောင်စီတပ်က ဖမ်းဆီးခဲ့သလို ဇူလိုင် ၃၀ ရက်ကလည်း ရုံးချောင်းအုပ်စုထဲက မသန်စွမ်းလင်မယားကိုလည်း ဖမ်းဆီးစစ်ဆေးရိုက်နှက်တာတွေ ပြုလုပ်ခဲ့ပါတယ်။

စစ်ကောင်စီတပ်ဟာ ကြို့ပင်ကောက်မြို့နယ်အတွင်း ဇူလိုင် ၈ ရက်ကနေ ၃၁ ရက်အတွင်းကလည်း စစ်ကြောင်းထိုးမီးရှို့တာနဲ့ လေကြောင်း တိုက်ခိုက်တာတွေ ပြုလုပ်ခဲ့လို့ အမျိုးသမီး ၁ ဦးပါ ပြည်သူ ၃ ဦးသေဆုံးပြီး နေအိမ် ၆၀ ကျော်ပျက်စီးကာ ဖမ်းဆီးခံရသူနဲ့ ဒဏ်ရာရခဲ့သူတွေရှိကြောင်း ဒေသခံတွေဆီက သိရပါတယ်။

သတင်း – သော်တာအောင်

ကြို့ပင်ကောက်၊ ဩဂုတ် ၅၊ ၂၀၂၆။

ပဲခူးတိုင်း၊ ကြို့ပင်ကောက်မြို့နယ်၊ မြို့ကိုင်းကျေးရွာမှာ ဘုန်းကြီးကျောင်းမှာ ညအိပ်ပြီးပြန်လာတဲ့ အမျိုးသား ၃ ဦးကိုစစ်တပ်က သေနတ်နဲ့လိုက်ပစ်လို့ ၁ ဦးသေတယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဩဂုတ်လ ၄ ရက်နေ့ မနက် ၅ နာရီကျော်ခန့်က အသက် ၃၃ နှစ်အရွယ် ကိုပေါက်စ၊ ဦးစန်းမြင့်ပါ ၃ ဦးဟာ ကျေးရွာဘုန်းကြီးကျောင်းကနေ နေအိမ်အပြန် စစ်ကော်မရှင်စစ်ကြောင်းနဲ့တိုးပြီး ပစ်ခတ်ခံရတာလို့ ဆိုပါတယ်။

“ဘုန်းကြီးကျောင်းမှာ ညညဆို သူတို့ကသွားအိပ်တယ်။ အိမ်မှာ မအိပ်ကြဘူး။ မနက်ကျ ထပြန်ချိန် စစ်ကြောင်းနဲ့တိုးတော့ ပေါ်တာဆွဲတော့ ပြေးကြတာ။ ကိုပေါက်စက ခေါင်းကျည်ထိပြီး သေတယ်။ ဦးစန်းမြင့်က ဖမ်းခံရတယ်။ ဟိုတယောက်ကတော့ ပြေးတော့လွတ်သွားတယ်”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဦးခေါင်းကျည်ထိသေဆုံးခဲ့တဲ့ ကိုပေါက်စရဲ အလောင်းကိုတော့ စစ်ကော်မရှင်အဖွဲ့တွေက ကျေးရွာထိပ် ဆည်ဘောင်တံတားဘေးက အုတ်တိုက်အပြာအနီးမှာ ​မြေမြုပ်သွားပါတယ်။

ဖမ်းဆီးခံထားရတဲ့ ဦးစန်းမြင့်ကိုတော့ စစ်ကော်မရှင်အဖွဲ့က သူတို့အထိုင်ချတပ်စွဲထားတဲ့ မင်းဝနဲ့ ကျခတ္တန်းကြီးကျေးရွာကိုခေါ်သွားပြီး ဩဂုတ်လ ၅ ရက်နေ့အထိ ပြန်မလွှတ်သေးပါဘူး။

ပြီးခဲ့တဲ့ ဇူလိူင်လ ၈ ရက်နေ့ကစတင်ပြီး ကြို့ပင်ကောက်မြို့နယ်အတွင်း စစ်ကောင်စီစစ်ကြောင်းရဲ့ သတ်ဖြတ်ခြင်းခံရသူ ၄ ဦးအထိ ရှိလာပြီး၊ သေဆုံးသွားသူတွေကတော့ ရုံးချောင်းကျေးရွာက မသီတာမိုး၊ ကျခတ္တန်းကြီးကျေးစွာက ဦးကြည်စိုး၊ မြို့ကိုင်းကျေးရွာက ဦးစိန်ရွှေနဲ့ မနေ့ကမှ ပစ်သတ်ခံလိုက်ရတဲ့ ကိုပေါက်စတို့ဖြစ်ပါတယ်။

ချောက်၊ ဩဂုတ် ၄၊ ၂၀၂၆။

မကွေးတိုင်း၊ ချောက်မြို့နယ်၊ နရွဲတောရွာကို စစ်ကောင်စီတပ်က ဒုတိယအကြိမ် ထပ်မံမီးရှို့နေပြီး အပျက်အစီးများနိုင်တယ်လို့ ရွာခံတွေဆီက သိရပါတယ်။

ဩဂုတ်လ ၂ ရက်နေ့ ညနေပိုင်းကတည်းက စစ်ကောင်စီစစ်ကြောင်း အင်အား ၂၀၀ ခန့်နဲ့ ကျေးရွာထဲကို ဝင်ရောက်လာပြီး ဩဂုတ်လ ၃ ရက်နေ့မနက်ပိုင်းကစတင်ကာ ကျေးရွာထဲက နေအိမ်တွေကို မီးတင်ရှို့နေတာလို့ ဆိုပါတယ်။

“နရွဲတောက ၃ ရွာရှိတာ။ ၃ ရွာလုံးရှို့တာ။ ရွာက အရှေ့၊ အနောက်၊ တောင်ရွာလို့ခေါ်တာ။ မီးရှို့ခံရတာတော့ များတယ်။ ရွာထဲမှာလည်း လူတွေမရှိတော့ အပျ​က်အစီး အတိအကျ မသိရသေးဘူး။ ရှို့ခံရတာ တော်တော်များ ပုံရတယ်။ အရင်တခါရှို့ခံရတာ ၃၀ ကျော်။ ကျန်တာက ၃၀၀ လောက်ကျန်သေးတာ။ ကျနော်တို့က စစ်ကြောင်းမဝင်ခင်တရက် ကြိုထွက် လာကြတာ”လို့ ရွာခံအမျိုးသား ၁ ဦးက ပြောပါတယ်။

စစ်ကြောင်းက မီးရှို့နေတာကြောင့် အပျက်အစီးများနိုင်ပြီး ဩဂုတ်လ ၄ ရက်နေ့အထိ စစ်ကော်မရှင်အဖွဲ့က ရွာထဲတပ်စွဲထားသေးတာကြောင့် အပျက်အစီးမသိရသေးဘူးလို့ ဆို​ပါတယ်။

ပြီးခဲ့တဲ့ ၂၀၂၅ အောက်တိုဘာ ၂၇ ရက်နေ့ကလည်း နရွဲတောကျေးရွာကို ပထမအကြိမ် စစ်ကော်မရှင်စစ်ကြောင်းဝင်ရောက် မီးရှို့ခဲ့လို့ နေအိမ် ၃၃ လုံးမီးလောင်ပျက်စီးခဲ့တာ ဖြစ်ပါတယ်။

နရွဲတောရွာကို မီးရှို့နေတဲ့စစ်ကြောင်းဟာ ဇူလိုင်လ ၂၅ ရက်နေ့ကစတင်ထွက်လာတဲ့ စလေအခြေစိုက် ခမရ ၄၁၆ တပ်က စစ်ကြောင်းဖြစ်တယ်လို့ သိရပြီး၊ အဲ့ဒီနေ့မှာပဲ ပခန်းငယ်(ခ)ပုဂံငယ်ရွာကို မီးရှိ့ခဲ့တာ ဖြစ်ပါတယ်။

စစ်ကြောင်းထိုးနေလို့ ပခန်းငယ်(ခ)ပုဂံငယ်၊ နရွဲတော၊ နဘဲတန်း၊ ရွာငယ်ကန်၊ မြင်သာကုန်း၊ ချောင်းပိုက်၊ အုတ်ဖိုနဲ့ ဥယျာဥ်ကျေးရွာတွေအပါအဝင် ကျေးရွာပေါင်း ၂၀ လောက်က ဒေသခံပြည်သူ ၁၀၀၀၀ ကျော်ဘေးလွတ်ရာကို တိမ်းရှောင်နေရတယ်လို့ သိရပါတယ်။

မြိုင်၊ ဩဂုတ် ၄၊ ၂၀၂၆။

မကွေးတိုင်း၊ မြိုင်မြို့နယ်အတွင်း စစ်ကြောင်းထိုးနေတဲ့ စစ်ကောင်စီစစ်ကြောင်းက ပြည်သူနေအိမ် ၂၀၀ ကျော်အထိ မီးရှိူ့ဖျက်ဆီးထားတယ်လို့ အညာမြေအရပ်ဖက်လူမှုအဖွဲ့အစည်း-မြိုင်ရဲ့ ဩဂုတ်လ ၃ ရက်နေ့ထုတ်ပြန်ချ​က်အရ သိရပါတယ်။

ဇူလိုင်လ ၁၃ ရက်နေ့ကစတင်ပြီး ပေါက်မြို့နယ်ဘက်တဆင့် ဝင်လာတဲ့စစ်ကြောင်းက ဩဂုတ်လ ၃ ရက်နေ့ ရက် ၂၀ အတွင်းမှာ ကန်နက်ရွာက နေအိမ် ၃၁ လုံး၊ လက်ခုပ်ပင်ရွာက ၂၉ လုံး၊ ညောင်ကုန်းရွာက ၆ လုံး၊ ကိုင်းတောမရွာက ၂ လုံး၊ ထန်းငယ်တောရွာက ၄ လုံး၊ သင်းမရွာမှ ၄၀ ကျော်နဲ့ ဘောင်ဘက်ရွာက ၉၀ ကျော်ကို မီးရှို့ထားသလို ယာကြီးပြင်ရွာကိုလည်း မီးရှို့ထားပြီး အရေအတွက် စုံစမ်းနေဆဲလို့ ဆိုပါတယ်။

“မီးရှို့ခံထားရတဲ့ရွာတွေမှာ ပြည်သူတွေ အခုထိ ပြန်မဝင်နိုင်ကြသေးဘူး။ အခက်ခဲက အများကြီး။ အမိုးအကာအတွက် ပခုက္ကူဘက်ကနေ သွပ်တို့၊ သစ်တို့က ဝယ်ဖို့ မလွယ်ဘူး။ အရင်လို အခိုင်အခန့် ပြန်ဆောက်နိုင်ဖို့ မလွယ်ဘူး”လို့ အညာမြေအရပ်ဖက်လူမှုအဖွဲ့အစည်း-မြိုင်ရဲ့တာဝန်ခံက ပြောပါတယ်။

မီးရှို့ခံခဲ့ရတဲ့ နေအိမ်ပိုင်ရှင်ပြည်သူတွေအတွက်က အမိုးအကာအပြင် အခြေခံစားနပ်ရိက္ခာတွေ ပါလိုအပ်နေပြီး၊ ကျေးရွာထဲ ပြန်ဝင်ရောက်နေထိုင် ပါကလည်း နေအိမ်တွေ ပြန်ဆောက်နိုင်ဖို့ထက် တဲထိုးပြီးသာ နေရမယ့်အခြေနေမှာ ရှိနေတယ်လို့ ဆိုပါတယ်။

ဒေသခံ နေအိမ်တွေကိုမီးရှို့တဲ့ စစ်ကြောင်းဟာ အင်အား ၈၀၀ ကျော်နဲ့ ဇူလိုင်လ ၁၃ ရက်နေ့ကစတင်ပြီး၊ ပေါက်မြို့နယ်ဘက်ကနေ ဝင်လာကာ ကျေးရွာတွေကို စစ်ကြောင်းပတ်ထိုးနေသလို လူနေအိမ်တွေကို မီးရှို့ပြီး ဒေသခံပြည်သူတွေကို ဖမ်းဆီးသတ်ဖြတ်တာတွေလည်း ပြုလုပ်ထားပါတယ်။

အဆိုပါစစ်ကြောင်းဟာ ဩဂုတ်လ ၄ ရက်နေမှာတော့ ယာကြီးပြင်ကျေးရွာတဝိုက်မှာ တပ်စွဲထားတယ်လို့ သိရပါတယ်။

စစ်ကြောင်းဝင်လာလို့ မြိုင်မြို့နယ်ထဲက ကန်နက်၊ ညောင်းကုန်း၊ ကိုင်းတောမ၊ ထန်းငယ်တော၊ မြင်းကိုးသစ်ကျေးရွာအပါအဝင် ကျေးရွာပေါင်း ၁၀ ရွာကျော်က ပြည်သူ ၁၀၀၀၀ ခန့်စစ်ဘေးရှောင်နေကြရပါတယ်။

ပေါက်ခေါင်း၊ သြဂုတ် ၅၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်၊ ကင်မွန်းခြုံကျေးရွာအုပ်စု၊ နတ္တလင်းစုရွာကို စစ်ကောင်စီတပ်က စစ်ကြောင်းထိုးဝင်ရောက်ပြီး အမျိုးသား ၂ ဦးကို ဖမ်းဆီးသတ်ဖြတ်ခဲ့တယ်လို့ ဒေသခံတွေဆီက သိရပါတယ်။

အသတ်ခံရသူတွေဟာ နတ္တလင်းစုကျေးရွာနေ အသက် ၂၀ နဲ့ ၁၆ နှစ်ရှိ လူငယ်အမျိုးသား ၂ ဦးဖြစ်ပြီး သြဂုတ် ၂ ရက် ည ၇ နာရီကျော်မှာ ကျေးရွာပြင်ပကိုခေါ်ဆောင်ကာ သတ်ဖြတ်ခံခဲ့ရတာလို့ ဆိုပါတယ်။

” သေနတ်သံ သုံး၊ လေးချက် ကြားလိုက်ရတယ်။ သေနတ်သံကြားပြီး မကြာဘူး မီးရှို့တဲ့ မီးခိုးလုံးတွေ တက်လာတယ်။ ဘုန်းကြီးကျောင်းထဲကနေ ခေါ်ထုတ်ပြီး ရွာအပြင်မှာ သွားသတ်တာ။ သတ်တဲ့နားမှာရှိတဲ့ လှည်းတစီး၊ ဆိုင်ကယ်တစီးနဲ့အိမ်က ထရံတွေ၊ သက်ကယ်တွေရယ်ကို ဖျက်ဆီးပြီး လောင်စာအဖြစ်လုပ်တယ်။ အဲ့နားက ကားတစီးထဲက ဓာတ်ဆီတွေကို ထုတ်ပြီး အစဖျောက် မီးရှို့ခဲ့တာပါ” လို့ ဖြစ်စဥ်ကိုသိရှိထားတဲ့ ပေါက်ခေါင်းဒေသခံတဦးက မြေလတ်အသံကို ပြောပါတယ်။

နတ္တလင်းစုရွာကို အင်အား ၂၀၀ ခန့်ပါ စစ်ကောင်စီတပ်ဖွဲ့က ဇူလိုင် ၃၁ ရက်မှာ စတင် စစ်ကြောင်းထိုးဝင်ရောက်ခဲ့တာဖြစ်ပြီး ဩဂုတ် ၁ ရက် မနက်ပိုင်းမှာ ရွာခံ ၆၀ ကျော်ကို ကျေးရွာဘုန်းကြီးကျောင်းအတွင်း ဖမ်းဆီးခဲ့တယ်လို့ သိရပါတယ်။

” အဲ့ဖမ်းခံထားတဲ့သူတွေကို ကောင်လေး ၃ ယောက်က အခြေအနေသွားကြည့်ကြတာ။ ၃ ယောက်ထဲက ၂ ယောက်ကိုတော့ကင်းချထားတဲ့ စစ်သားတွေက ဖမ်းမိလိုက်တယ်။ ၁ ယောက်ကတော့ထွက်ပြေးလွတ်သွားတယ်။ ဖမ်းခံရတဲ့ ၂ ယောက်ကို သတ်ဖြတ်သွားတာ”လို့ အထက်ပါဒေသခံက ပြောပါတယ်။

ဒါ့အပြင် စစ်ကြောင်းဝင်ရောက်ခဲ့စဥ်က လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့လို့ နတ္တလင်းစုရွာခံ အသက် ၅၀ ကျော်အရွယ် ကိုမိုးဝင်းဆိုသူမှာလည်း လက်နက်ကြီးပစ်ခတ်သံတွေကြောင့် နှလုံးရပ်အမောဖောက်ကာ သေဆုံးခဲ့သေးတယ်လို့လည်း သိရပါတယ်။

အဲ့ဒီစစ်ကြောင်းဟာ သြဂုတ် ၄ ရက် ယမန်နေ့ နေ့လယ်ပိုင်းမှာ နတ္တလင်းစုရွာကနေ ထွက်ခွာပြီးကင်မွန်းခြုံရွာဘက်ကို ဆက်လက်စစ်ကြောင်းထိုးဝင်ရောက်နေကြောင်းသိရကာ စစ်ကြောင်းထွက်ခွာချိန်မှာ နတ္တလင်းစုကျေးရွာဘုန်းကြီးကျောင်းအတွင်း ဖမ်းဆီးထားတဲ့ဒေသခံတွေကို ပြန်လွှတ်ပေးခဲ့တယ်လို့ သိရပါတယ်။

အထက်ပါစစ်ကောင်စီစစ်ကြောင်းကြောင့် နတ္တလင်းစုရွာနဲ့အနီးတဝိုက်ရွာတွေဖြစ်တဲ့ ဒွရွာ၊ ယောင်းပြန်ရွာ၊ ကြို့ပင်ရွာနဲ့ ကင်မွန်းခြုံရွာက သက်ကြီးရွယ်အို၊ ကလေးငယ်နဲ့ အမျိုးသမီးတွေအပါအဝင် ဒေသခံ ၂,၀၀၀ ကျော်ဘေးလွတ်ရာ ထွက်ပြေးတိမ်းရှောင်နေရတယ်လို့ သိရပါတယ်။

စာတည်း – ဟိန်းစံ