ကြို့ပင်ကောက်၊ စက်တင်ဘာ ၂၉၊ ၂၀၂၅။

ပဲခူးတိုင်း၊ ကြို့ပင်ကောက်မြို့နယ်၊ ဥယျာဥ်ကြီးကျေးရွာမှာ စစ်ကော်မရှင်တပ်ကပစ်ခတ်တဲ့ ဗုံးသီးက နေအိမ်ပေါ် ကျရောက်ပေါက်ကွဲပြီး စာကျက်နေတဲ့ ၁၀ တန်းကျောင်းသားသေဆုံးသွားတယ်လို့ သာယာဝတီခရိုင် ၃၈၀၁ တပ်ရင်း၊ တပ်ခွဲ ၁ တာဝန်ရှိသူတွေဆီက သိရပါတယ်။

စက်တင်ဘာ ၂၈ ရက် ညနေ ၅ နာရီခန့်မှာ ကြို့ပင်ကောက်မြို့ပေါ်ကနေ အလယ်ကုန်းကျေးရွာ ရဲစခန်းမှာရောက်နေတဲ့ စစ်ကော်မရှင်တပ်က ဥယျာဥ်ကြီးကျေးရွာထဲကို ဒရုန်းနဲ့ ဗုံး ၂ လုံးချခဲ့ရာ ၁ လုံးက လယ်ကွင်းထဲကျပြီး ၁ လုံးက ကျေးရွာအရှေ့ဘက် ပြည်သူနေအိမ်ပေါ်ကျရောက် ပေါက်ကွဲခဲ့တယ်လို့ ဆိုပါတယ်။

“သူက ဆယ်တန်း(G-10) စာမေးပွဲဖြေနေတော့ အိမ်ပေါ်မှာတက်ပြီးစာကျက်နေတာ။ အဲ့ချိန်မှာ တည့်တည့်ကျတာ။ သူ့ကိုထိမှန်သွားတာ။ သူ့အိမ်မှာလည်း မိသားစုအားလုံးက ၄ ယောက်ရှိတာ။ ကျန်တဲ့မိသားစုတွေက အဖေရယ်၊ အမေရယ်၊ အကိုရယ်က အိမ်အောက်မှာ။ သူကအိမ်ပေါ်တက်ပြီး စာကျက်နေတာ။ ပြောရင်တော့နေရာမှတင်ထိမှန်ပြီးသေတာ”လို့ သာယာဝတီခရိုင် ၃၈၀၁ တပ်ရင်း၊ တပ်ခွဲ ၁ တပ်ခွဲမှူး ကိုကရင်လေးကပြောပါတယ်။

သေဆုံးသူဟာ ရွှေပန်းတောရွာ အထကကျောင်းမှာ ၁၀ တန်းတက်နေတဲ့ အသက် ၁၈ နှစ်အရွယ် မောင်အိုင်စတိုင်းဖြစ်ပြီး ဘယ်ဘက်နို့အုံအောက် အစဖောက်ဝင်ပြီး နှလုံးထိမှန်သေဆုံးသွားခဲ့ကာ သူနေထိုင်တဲ့အိမ်လည်း ပျက်စီးသွားခဲ့တယ်လို့ ဆိုပါတယ်။

ဒါ့အပြင် ပေါက်ကွဲမှုပြီးချိန်မှာလည်း နောက်ထပ် ဗုံး ၂ လုံးထပ်မံကြဲခဲ့ရာ ဗုံးသီးတွေက အိမ်ရှေ့တွေ ကျခဲ့ပေမယ့်ပေါက်ကွဲတာမျိုးမရှိတာကြောင့် ရှင်းလင်းခဲ့ရသေးတယ်လို့ သူကဆက်ပြောပါတယ်။

ဒရုန်းဗုံးချပြီးနောက် စစ်ကော်မရှင်တပ်အင်အား ၁၀၀ ခန့်ဟာ အလယ်ကုန်းရွာကို ထပ်ရောက်လာပြီး နောက် ဥယျာဥ်ကြီးကျေးရွာကို စစ်ကြောင်းထိုးမယ့်သတင်းထွက်လာတာကြောင့် ဥယျာဥ်ကြီးကျေးရွာက ရွာလုံးကျွတ်ထွက်ပြေးနေရပြီး ဗုံးထိမှန်သေဆုံးခဲ့တဲ့ မိသားစုဝင်တွေသာ ရွာမှာကျန်ခဲ့တယ်လို့ ဆိုပါတယ်။

ဗုံးထိမှန်သေဆုံးသွားတဲ့ မောင်အိုင်စတိုင်းရဲ့နာရေးကိုတော့ စက်တင်ဘာ ၂၉ ရက် ဒီကနေ့မှာ ကျေးရွာမှာတင် သင်္ဂြိုဟ်သွားမယ်လို့ သိရပါတယ်။

အလားတူ စက်တင်ဘာ ၂၇ ညနေပိုင်းမှာလည်း စစ်ကော်မရှင်တပ်တွေက ဖလံပင်ရွာကို ဒရုန်းနဲ့ဗုံးကြဲ တိုက်ခိုက်တဲ့အပြင် အလယ်ကုန်းတိုက်နယ် ရဲစခန်းကနေ လက်နက်ကြီးတွေနဲ့ ပစ်ခတ်တာတွေလည်း ရှိခဲ့ပါသေးတယ်။

စာတည်း – လင်း

ပဲခူး၊ စက်တင်ဘာ ၃၊ ၂၀၂၅။

ပဲခူးမြို့ရှိ ဟံသာဝတီမြို့ဟောင်း ကမ္ဘောဇသာဒီနန်းတော်ကျုံးနဲ့မြို့ရိုးကို ပြန်လည်တူးဖော်ဖို့ဆိုကာ စစ်ကော်မရှင်ပဲခူးမြို့အထွေထွေအုပ်ချုပ်ရေးဌာနက နေအိမ်တွေကိုဖယ်ရှားခိုင်းထားတယ်လို့ အုပ်ချုပ်ရေးပိုင်းနဲ့နီးစပ်တဲ့ဒေသခံတွေဆီကသိရပါတယ်။

ဖယ်ရှားခံရမယ့်နေအိမ်တွေဟာ ကျုံးပတ်လည်နေရာတွေဖြစ်တဲ့ ပုဏ္ဏားစု၊ ဆိုရှယ်လစ်၊ မှော်ကန်၊ စင်္ကြာခြံ၊ အလင်းရောင်၊ ပန်းလှိုင်၊ ကျောက်ကြီးစုရပ်ကွက်တွေက တူးဖော်မယ့်နေရာတွေနဲ့မလွတ်ကင်းတဲ့ နေအိမ်၊ အဆောက်အဦနဲ့ ခြံစည်းရိုးတွေဖြစ်ပြီး နေအိမ် ၁,၀၀၀ ဝန်းကျင်ပါဝင်တယ်လို့ ဆိုပါတယ်။

” ဘယ်လမ်းတွေ ပါတယ်ဆိုတာတော့မသိရပေမယ့် ရပ်ကွက်တွေတော့သိရတယ်။ ဖျက်ရမယ့် ဧရိယာတွေကို မှင်နီတားထားတာ။ ဖျက်ရမယ့် ဧရိယာဆိုရင် တိုက်တွေအိမ်ကြီးအိမ်ကောင်းတွေ များတယ်။ အသနားခံစာတွေတော့ တင်ထားကြတယ်။ ရမယ်မထင်ပါဘူး”လို့ အုပ်ချုပ်ရေးပိုင်းနဲ့ နီးစပ်တဲ့မြို့ခံတဦးက မြေလတ်အသံကို ပြောပါတယ်။

ဖယ်ရှားခံရမယ့် နေအိမ်၊ အဆောက်အဦတွေဟာ ပြန်လည်တူးဖော်မယ့် ဧရိယာအတွင်းပါရှိမှုအပေါ် မူတည်ကာ တစိတ်တပိုင်းဖျက်ရတာနဲ့ အဆောက်အဦတခုလုံး ဖျက်ရတာမျိုးတွေရှိလာနိုင်တယ်လို့ ဆိုပါတယ်။

ကျုံးနဲမြို့ရိုးနယ်နိမိတ်အတွင်းပိုင်ဆိုင်မှုမရှိဘဲ ကျူးကျော်ဆောက်လုပ်ထားတဲ့ နေအိမ်အဆောက်အဦ၊ ခြံစည်းရိုးအကာအရံတွေကို စက်တင်ဘာ ၃ ရက် နောက်ဆုံးထားဖယ်ရှားပေးဖို့ ရပ်ကွက်အုပ်ချုပ်ရေးအဖွဲ့တွေက စာပို့အကြောင်းကြားထားပြီး သတ်မှတ်ရက်အတွင်းဖယ်ရှားမပေးရင် ရှင်းလင်းရေးအဖွဲ့နဲ့ လာရောက်ရှင်းလင်းသွားမယ်လို့ အဲ့ဒီအကြောင်းကြားစာမှာ ဖော်ပြထားပါတယ်။

ပဲခူးမြို့စစ်ကော်မရှင်အုပ်ချုပ်ရေးဌာနရဲ့ အကြောင်းကြားစာအရ ပိုင်ဆိုင်မှုမရှိတဲ့အိမ်တွေ ရွှေ့ပြောင်းပေးဖို့သာပြောဆိုထားပေမယ့် ပိုင်ဆိုင်မှုရှိပြီး ကျုံး၊ မြို့ရိုးတူးဖော်မယ့်နယ်နိမိတ်နဲ့မလွတ်ကင်းတဲ့ အဆောက်အဦတွေနဲ့ပတ်သက်လို့ ရှင်းရှင်းလင်းလင်း မသိရသေးပါဘူး။

” မတရားတာ တရားတာကနောက်ထား လက်ရှိက ဖယ်ဆိုဖယ်ရမှာ။ ဖျက်ခိုင်းတာဆိုတော့ ဘယ်သူဖြစ်ဖြစ်ဒုက္ခတော့ရောက်မှာဘဲ။ အိမ်ငှားတွေ အိမ်ရာမရဘယ်လိုလုပ်မလဲ။ ဘယ်လောက်ကုန်ကုန် ဒုက္ခတော့ရောက်ကြတာဘဲ။ ကြိုတင်စီစဥ်ထားတာမရှိရင် ဒုက္ခရောက်မှာဘဲ”လို့ မြို့ခံအမျိုးသမီးတဦးကပြောပါတယ်။

နေအိမ်ဖယ်ရှားမှုတွေအပေါ် စစ်ကောင်စီဘက်က လျော်ကြေးပေးမယ့်အခြေနေမရှိဘူးလို့သိရပြီး လတ်တလောမှာတော့ ပုဏ္ဏားစုရပ်ကွက်တခုတည်းက မလွတ်တဲ့နေအိမ်တွေကို စတင်ဖျက်ခိုင်းနေကာ ကျန်မလွတ်တဲ့ရပ်ကွက်ကနေအိမ်တွေလည်း နောက်ဆက်တွဲအနေနဲ့ ဖယ်ရှားပေးရမှာဖြစ်တယ်လို့ သိရပါတယ်။

စစ်ကော်မရှင်ဘက်က မြေနေရာမလွတ်ကင်းတဲ့နေအိမ်အဆောက်အဦတွေဖယ်ရှားပေးဖို့ စာပို့ထားပေမယ့် နေအိမ်ပိုင်ရှင်တွေဘက်တော့ စက်တင်ဘာ ၃ ရက်အထိဖယ်ရှားပေးတာမျိုးတွေ မရှိသေးဘူးလို့ သိရပါတယ်။

ဟံသာဝတီမြို့ဟောင်း ကမ္ဘောဇသာဒီနန်းတော်ကျုံးနဲ့မြို့ရိုးဧရိယာအတွင်း တည်ဆောက်ထားတဲ့ နေအိမ်အဆောက်အဦတွေကို ၁၉၉၀ ဝန်းကျင်က စစ်အစိုးရက တကြိမ်ဖယ်ရှားခိုင်းခဲ့ပြီး ဖယ်ရှားခံရတဲ့နေအိမ်တွေအတွက် အဲ့ဒီအချိန်က ပဲခူးမြို့သစ် ၁၉ ရပ်ကွက်မှာ ပေ ၄၀×၆၀ မြေကွက် မြေနေရာအစားခဲ့ကာ ပြောင်းရွေ့စရိတ် ကျပ် ၅ သိန်းလည်းပေးခဲ့တယ်လို့ ပြောင်းရွေ့ပေးခဲ့ရသူ အသက် ၅၇ နှစ်အရွယ် ပဲခူးမြို့ခံတဦးဆီက သိရပါတယ်။

အဲ့ဒီနောက်ပိုင်းမှာ ဖယ်ရှားခိုင်းထားတဲ့နေရာတွေမှာ ပြန်လည်ဝင်ရောက်နေထိုင်ကြပြီး အဆင့်ဆင့်လက်ပြောင်းလက်လွှဲပြန်ရောင်းချမှုတွေရှိခဲ့တယ်လို့ ဆိုပါတယ်။

စစ်ခေါင်းဆောင် မင်းအောင်လှိုင် ဩဂုတ် ၃ ရက်က ပဲခူးမြို့ကိုလာရောက်ချိန် ဟံသာဝတီမြို့ဟောင်းနေရာကို ပြန်လည်ဖော်ထုတ်ဖို့၊ ကမ္ဘောဇသာဒီနန်းတော်ရဲ့ကျုံးကိုလည်း တဆက်တည်းဖြစ်အောင်လုပ်ဆောင်ဖို့ ညွှန်ကြားခဲ့ပြီးနောက် အခုလို ကျုံးပတ်လည်နေအိမ်တွေကို ဖိအားပေးဖယ်ရှားခိုင်းလာတာလည်း ဖြစ်ပါတယ်။

စာတည်း – လင်း

ပေါက်၊ ဩဂုတ် ၂၅၊ ၂၀၂၅။

မကွေးတိုင်း၊ ပေါက်မြို့နယ်အရှေ့ပိုင်း၊ ပေခုနှစ်ပင်ရွာကို ဩဂုတ် ၂၅ ရက် ဒီမနက် ၉ နာရီကျော်မှာ စစ်ကော်မရှင်စီစစ်ကြောင်းက ဝင်ရောက်မီးရှို့ပြီး တည်ပင်ကန်ရွာက အမျိုးသား ၁ ဦးကို ဖမ်းဆီးသွားတယ်လို့ ပေါက်မြို့ခံတွေဆီက သိရပါတယ်။

ကပစ ၂၄ တပ်ကနေ ပြန်ထွက်လာတဲ့ အင်အား ၂၀၀ ဝန်းကျင်ပါစစ်ကောင်စီစစ်ကြောင်းက အိမ်ခြေ ၁၀၀ ကျော်၊ အိမ်ထောင်စု ၉၀ စု၊ လူဦးရေ ၁,၀၀၀ ကျော်နေထိုင်တဲ့ ပေခုနှစ်ပင်ရွာကို မီးရှို့ဖျက်ဆီးခဲ့တဲ့ အတွက် နေအိမ် ၆ လုံးကျော်ပျက်စီးခဲ့တာလို့ ဆိုပါတယ်။

“နေအိမ် ၆ လုံးကျော် မီးရှို့ခံရတာ၊ ပြည်သူ ၁ ဦးကောဖမ်းသွားတယ်၊ ယာကြီးပြင်ရွာအနီးတဝိုက်ကပါ၊ တည်ပင်ကန်ရွာက အသက် ၄၀ ကျော် အမျိုးသား အဖမ်းခံရတာပါ၊ ရိက္ခာယာဉ်တန်းစစ်ကြောင်းနဲ့ ဒီးဒုတ်ကွင်းရွာက ပျူစောထီးတွေနဲ့ ပေါင်းပြီးရှို့တာ၊ ဒေသခံပြည်သူတွေက အရင်ကတည်းက တိမ်းရှောင်နေရတာ”လို့ ပေါက်မြို့ခံ ကိုလရောင်က ပြောပါတယ်။

အဲ့ဒီရိက္ခာယာဉ်တန်း ၁၀၇ စီး၊ အင်အား ၂၀၀ ပါ စစ်ကြောင်းနဲ့ ဒီးဒုတ်ကွင်းရွာက ပြည်သူ့စစ်တွေဟာ လက်ရှိအချိန်ထိ ပေါက်မြို့နယ်၊ တည်ပင်ကန်ရွာမှာရှိနေတယ်လို့ သိရပါတယ်။

ဩဂုတ် ၂၂ ရက် နေ့လယ် ၁၂ နာရီကျော်ကလည်း မိတ္ထီလာဘက်ကလာတဲ့ ဂျက်ဖိုက်တာ ၁ စီးဟာ ဆယ်ဝကျေးရွာကို လေကြောင်းကနေ ဗုံးကြဲခဲ့တာကြောင့် ကလေးငယ် ၁ ဦးအပါအဝင် ၂ ဦးသေဆုံးပြီး ၆ ဦးဒဏ်ရာရခဲ့ပါသေးတယ်။

စာတည်း – လင်း

ပွင့်ဖြူ၊ ဇူလိုင် ၁၄၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ ညောင်ပင်စောင့်ကျေးရွာက လူငယ် ၂ ဦးကို ပျူစောထီးတွေက နေအိမ်တွေထဲထိဝင်ဖမ်းပြီး စစ်မှုထမ်းပို့လိုက်တယ်လို့ ဒေသခံတွေဆီက သိရပါတယ်။

ဖမ်ဆီးခံရသူတွေက အသက် ၂၂ နှစ်အရွယ် မောင်သက်ကိုကိုနဲ့ အသက် ၂၅ နှစ်အရွယ် မောင်ထက်ဝေလင်းတို့ဖြစ်ပြီး ဇူလိုင် ၉ ရက် ည ၈ နာရီ ၄၀ မိနစ်ခန့်မှာ ကျောင်းကုန်းကြီး ကျေးရွာက ပျူစောထီးရွှေထွန်းနဲ့ ကျော်ထက်ဘို တို့ဦးဆောင်တဲ့ အင်အား ၁၅ ဦးအဖွဲ့က ကားနဲ့ ရောက်လာပြီး နေအိမ်တွေထဲထိ ဝင်ရောက်ဖမ်းသွားတယ်လို့ ဆိုပါတယ်။

“အဲနေ့က ဥပုသ်နေ့ဆိုတော့ လပြည့်နေကြီး တနေကုန်ဥပုသ်စောင့်ပြီး အိမ်မှာအိပ်နေကြတာ။ တံခါးတွေကို ချိုးဖျက်ဝင်ပြီးတော့ ကလေးတွေကို သေနတ်ထောက်ပြီးခေါ်သွားတာ။ “လို့ ဒေသခံတဦးက ပြောပါတယ်။

အဆိုပါ လူငယ် ၂ ဦးကို ညတွင်းချင်း ကျောင်းကုန်းကြီးရွာ ပျုစောထီးစခန်းကို ဖမ်းသွားပြီးနောက် ဇူလိုင် ၁၀ ရက်မှာ ပွင့်ဖြူအခြေစိုက်ဝါစိုက်ပျိုးရေးတပ်ကို ပို့လိုက်တယ်လို့ ဆိုပါတယ်။

လူငယ်တွေဖမ်းဆီးခံရတာနဲ့ပတ်သက်ပြီး မိသားစုဝင်တွေကဝါစိုက်ပျိုးရေးတပ်ကို လိုက်သွားပြီး ငွေနဲ့ပြန်ရွေးယူဖို့ သွားရောက်ခဲ့ပေမယ့် အတွေ့မခံတဲ့အတွက်ပြန်လာရတယ်လို့ အထက်ပါ ဒေသခံကပြောပါတယ်။

အဲဒီနောက် ဇူလိုင် ၁၁ ရက်မှာ မကွေးတိုင်းထဲက စစ်အခြေခံလေ့ကျင့်ရေးကျောင်းတခုကို စစ်မှုထမ်းအပတ်စဥ် ၁၅ အတွက် ပို့ဆောင်လိုက်တယ်လို့သာသိရပြီး ဒီကနေ့အထိ အဆက်အသွယ်မရ ဖြစ်နေတယ်လို့ သိရပါတယ်။

ပြီးခဲ့တဲ့ဇွန် ၁၀ ရက်နဲ့ ၁၁ ရက်မှာလည်း ပွင့်ဖြူမြို့နယ်၊ ကျွဲခြံကျေးရွာနဲ့ ကျောက်ပုံကျေးရွာတွေက အမျိုးသား ၆ ဦးဖမ်းဆီးခံရပြီးနောက် ၂ ဦးက ပြည်သူစစ်မှုထမ်းအပတ်စဥ် ၁၄ တက်ရောက်ဖို့ စစ်သင်တန်းပို့ခံလိုက်ရတယ်လို့ သိရပါတယ်။

စာတည်း – လင်း

ညောင်ဦး၊ ဇူလိူင် ၁၃၊ ၂၀၂၅။

မန္တလေးတိုင်း၊ ညောင်ဦးမြို့နယ်မှာ စစ်ကောင်စီစစ်ကြောင်းက ကျေးရွာ ၃ ရွာကို မီးဝင်ရှို့လို့ နေအိမ် ၂၀၀ ခန့်မီးလောင်ပျက်စီးသွားတယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ဇူလိုင် ၁၂ ရက်မနက် ၉ နာရီခန့်မှာ ရွာမကျေးရွာဘက်ကနေလာတဲ့ အင်အား ၁၅၀ ခန့်ပါ စစ်ကြောင်းဟာ မီးလောင်ဖျားတောင်ရွာကို ဝင်ရောက်မီးရှို့ပြီးနောက် မီးလောင်ဖျားမြောက်ရွာ၊ ရွာသစ်ဥယျာဥ်ကျေးရွာတွေကို ဆက်တိုက်မီးရှို့ခဲ့တယ်လို့ ဆိုပါတယ်။

“ရွာပတ်မီးရှို့နေတဲ့ စစ်ကြောင်းက မုန်းတိုင်းကနေတဆင့် စဥ့်ကူး၊ အဲ့ကနေတဆင့် ရွာမဘက်ကနေ မီးလောင်ဖျားတောင်ရွာကို စဝင်တာ။ တောင်ဘက်ရွာတခုတည်းက ၁၅၀ ကျော်တယ်။ မြောက်ဘက်ရွာလည်း ၅၀ ထက်မနည်းဘူး။ ရွာသစ်ဥယျာဥ်ရွာက လူတွေဆွဲသွားပြီးပြန်လွှတ်ပေးခဲ့တယ်။ မီးရှို့တာတော့ မသိရသေးဘူး”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ကျေးရွာတွေကို မီးရှို့ပြီးနောက် စစ်ကောင်စီစစ်ကြောင်းဟာ ညောင်ဦးမြို့ထံရှိ ခလရ ၄၁၅ ထဲ ပြန်ဝင်သွားတယ်လို့ သိရပါတယ်။

အဆိုပါ စစ်ကောင်စီစစ်ကြောင်းဟာ ကျေးရွာတွေကို မီးပတ်ရှို့နေတဲ့ စစ်ကြောင်းဖြစ်ပြီး ဇူလိုင် ၈ ရက်က ချောင်းရှည်၊ အနောက်အုံ၊ ယာတောကြီးကျေးရွာ၊ ဇူလိုင် ၉ ရက်နေ့မှာ ကျောက်ပြင်ကန်၊ ဇီးစမြင်၊ မြောင်ကျေးရွာတွေက နေအိမ် ၅၀ ကျော်ကို မီးရှို့ဖျက်ဆီးခဲ့ပါသေးတယ်။

ကျေးရွာတွေကို စစ်ကောင်စီစစ်ကြောင်းက မီးဝင်ရှို့နေတာကြောင့် အိမ်ခြေ ၁၀၀ ကျော်ကနေ ၅၀၀ ခန့်ရှိတဲ့ ရွာတွေဖြစ်တဲ့ ချောင်းရှည်၊ ယာတောကြီး၊ ဇီးစမြင်၊ ကျောက်ပြင်ကန်၊ ဂျိုးကန်၊ စခါး၊ မြောင်၊ ရွှေကဖြူ၊ ကြအို၊ မြေသန့်တောင်၊ မအူပင်၊ ပျော်ဘွယ်၊ ရွာသာ၊ ညောင်လှ၊ ပြင်းချောင်း၊ လယ်ကန်၊ ကန်သာ၊ ကံကြီးကုန်းရွာ တွေအပါအဝင် ကျေးရွာပေါင်း ၂၀ ကျော်က ဒေသခံ ၂၀,၀၀၀ ကျော်လောက်ထွက်ပြေးနေရပြီး အများစုကတော့ နေရပ်မပြန်ကြရသေးဘူးလို့ သိရပါတယ်။

စာတည်း – လင်း

ချောက်၊ ဇွန် ၁၆၊ ၂၀၂၅။

စစ်ကောင်စီတပ်ရဲ့ပူးပေါင်းစစ်ကြောင်းက မကွေးတိုင်း၊ ချောက်မြို့နယ်၊ ကိုင်းထောက်ကန်ရွာက လူငယ် ၁ ဦးကို သတ်ပြီးနေအိမ်တွေကိုလည်းမီးရှို့ခဲ့တယ်လို့ အာဠာဝကမြို့ပြပြောက်ကျားတပ်ဖွဲ့ ဆီက သိရပါတယ်။

ကျောက်ပန်းတောင်း၊ ချောက်နဲ့ စလေမြို့တို့က ထွက်လာတဲ့ အင်အား ၆၀ ပါစစ်ကောင်စီရဲ့ ပူးပေါင်းစစ်ကြောင်းဟာ ဇွန် ၁၄ ရက်မနက်ပိုင်းမှာ ကိုင်းထောက်ကန်ရွာကိုဝင်ရောက်လာခဲ့တာလို့ ဆိုပါတယ်။

“ကိုင်းထောက်ကန်ရွာထဲကိုဝင်ပြီးတော့ အိမ် ၃ လုံးကို မီးရှို့သွားတယ်၊ ဖောကား ၁ စီးမီးရှို့သွားတယ်၊ ကိုင်းထောက်ကန်ရွာက လူငယ် ၂ ဦးကို လမ်းပြခေါ်သွားပြီး ၁ ဦးကိုပြန်လွှတ်ကာ ၁ ဦးကိုတော့ စစ်ကြောင်းက ပစ်သတ်ခဲ့တယ်၊” လို့ အာဠာဝက မြို့ပြပြောက်ကျားတပ်ဖွဲ့ရဲ့ ဒုတာဝန်ခံက ပြောပါတယ်။

အသတ်ခံရသူဟာ အသက် ၁၈ နှစ်အရွယ်ရှိပြီး အလောင်းကိုတော့ အိုင်းကြီးရွာနဲ့ ကိုင်းထောက်ကန်ကျေးရွာ ကြားမှာတွေ့ခဲ့ကာ သူ့ရဲ့စျာပနကို ဇွန် ၁၄ ရက်မှာပဲ ‌ကိုင်းထောက်ကန်ကျေးရွာမှာ ပြုလုပ်ခဲ့တယ်လို့ ဆိုပါတယ်။

ဒါ့အပြင်စစ်ကြောင်းဝင်ရောက်လာချိန်မှာ ဒေသခံကာကွယ်ရေးတပ်ဖွဲ့ဝင်တွေနဲ့ ပစ်ခတ်မှုဖြစ်ခဲ့သေးတယ်လို့ ဒုတာဝန်ခံကဆက်ပြောပါတယ်။

“ကိုင်းထောက်ကန်ကျေးရွာမှာ တိုက်ပွဲဖြစ်ခဲ့တာ၊ ခုခံတိုက်ခိုက်တာမှာ ၄ ဦး‌ပွဲချင်း‌ပြီးသေပြီး ၁၁ ဦးဒဏ်ရာရတယ်” လို့ ဆိုပါတယ်။

ဒီတိုက်ခိုက်မှုကို မကွေးခရိုင် ပကဖ အထူးတိုက်ခိုက်ရေး တပ်ဖွဲ့ တပ်ခွဲ ၁၊ အာဠာဝက မြို့ပြပြောက်ကျားတပ်ဖွဲ့၊ မကွေးတိုင်း ရင်း ၁၊ ချောက်မြို့နယ် ပကဖ နဲ့ ချောက်မြို့နယ် တော်လှန်ရေးတပ်ပေါင်းစု တို့က ပူးပေါင်းတိုက်ခိုက်ခဲ့တာလို့ သိရပါတယ်။

ချောက်မြို့နဲ့ ၁၇ မိုင်အကွာ၊ အိမ်ခြေ ၁၂၀ ရှိတဲ့ကိုင်းထောက်ကန်ကျေးရွာကဒေသခံတွေဟာ စစ်ကြောင်းဝင်ပြီးနောက် ထွက်ပြေးတိမ်းရှောင်နေရတယ်လို့ သိရပါတယ်။

အဲ့ဒီစစ်ကြောင်းကတော့ ကိုင်းထောက်ကန်ကျေးရွာကနေကျွဲတက်ရွာဘက်ကို ဆက်လက်စစ်ကြောင်းထိုးနေပြီး ဇွန် ၁၆ ရက်ဒီနေ့အထိ အဲ့ဒီနေရာမှာရှိနေသေးတယ်လို့ ဒုတာဝန်ခံက ပြောပါတယ်။

စာတည်း – လင်း