မုံရွာ

စစ်ကိုင်း၊ မေ ၁၁၊ ၂၀၂၃။

စစ်ကိုင်းတိုင်း၊ မုံရွာမြို့နယ်အတွင်းက ကျေးရွာတရွာမှာ မုံရွာ – အမြင့်လမ်း သပိတ်ကော်မတီ၊ မုံရွာမြို့နယ် ပြည်သူ့ကာကွယ်ရေးအဖွဲ့နဲ့ မုံရွာမြို့နယ် ပြည်သူအုပ်ချုပ်ရေးအဖွဲ့တို့ ပူးပေါင်းပြီး လူထုဟောပြောပွဲကို ကျင်းပခဲ့ကြပါတယ်။

မေလ ၁၀ ရက် မနေ့ကနေ့လယ် ၁၂ နာရီကနေ ၂ နာရီအထိ ဦးဆောင်သူတွေက NUG ယန္တရား လည်ပတ်ပုံအဆင့်ဆင့်၊ နိုင်ငံရေးအခြေအနေ၊ လူထုတော်လှန်ရေး ပါဝင်ပတ်သက်မှု၊ ဒီမိုကရေစီနဲ့ ဖက်ဒရယ်အခြေခံအကြောင်းတွေကို ဟောပြောခဲ့ကာ ဒီဟောပြောပွဲကို ဒေသခံ ၁၀၀ ကျော်တက်ရောက်ခဲ့တယ်လို့ ဆိုပါတယ်။

“လူဦးရေကတော့ ကျေးရွာတရွာတည်းဆိုတော့ နည်းတာပေါ့။ အခုလို လိုက်ဟောပြောတာက ၆ ရွာ မြောက်ဖြစ်ပါတယ်။ ကျနော်တို့က တရွာချင်းလိုက်ပြီး လူထုဟောပြောပွဲလုပ်တာက အခုရာသီဥတုနဲ့ဆိုတော့ ကျနော်တို့သပိတ်ထွက်ဖို့ အခက်အခဲရှိနေတာကြောင့် ကျေးရွာတရွာချင်းလိုက်ပြီး လူထုကို နိုင်ငံရေးအသိ၊ နိုင်ငံရေးအတွေးအခေါ်တွေ သိရှိနားလည်စေချင်တာရယ် တော်လှန်ရေးမှာ သွေးမအေးဘဲ ဆက်လက်တော်လှန်စေချင်တဲ့ရည်ရွယ်ချက်နဲ့ အခုလိုဟောပြောတာပါ” လို့ မုံရွာ – အမြင့်လမ်း သပိတ်ဦးဆောင်ကော်မတီမှ တာဝန်ရှိသူတဦးက ပြောပါတယ်။

အခုလို ဟောပြောဖို့သွားချိန်မှာလည်း နယ်မြေမတည်ငြိမ်မှုတွေ၊ ရာသီဥတုအပူလွန်ကဲမှုတွေ၊ သွားရေးလာရေး အခက်အခဲတွေနဲ့ ကြုံတွေ့ရပေမယ့် ကျန်ရှိနေသေးတဲ့ကျေးရွာတွေမှာ ဆက်ပြီးလုပ်ဆောင်သွားမယ်လို့ ဆိုပါတယ်။

အလားတူ မေလ ၉ ရက်ကလည်း မုံရွာ – အမြင့်လမ်းသပိတ်ဦးဆောင်ကော်မတီအဖွဲ့ဟာ နယ်မြေမငြိမ်သက်တဲ့ကြားကနေ လူထုပါဝင်မှုနဲ့ သိသင့်သိထိုက်တဲ့ ဖက်ဒရယ်ဒီမိုကရေစီစတဲ့ အကြောင်းအရာတွေကို မုံရွာနယ်က ကျေးရွာတခုမှာ ဟောပြောခဲ့ပါသေးတယ်။

စာတည်း – လင်း

စစ်ကိုင်း၊ မေ ၁၀၊ ၂၀၂၃။

စစ်ကိုင်းတိုင်း၊ မုံရွာခရိုင်ထဲက ကျေးရွာတွေမှာ နယ်မြေမငြိမ်သက်တဲ့အတွက် တော်လှန်ရေးအသိပညာပေး ဟောပြောပွဲကို မေ ၉ ရက်နေ့ ညပိုင်းမှာ ပြုလုပ်ခဲ့ရပါတယ်။

“နယ်မြေအခြေအနေကြည့်ပြီးတော့ ညပိုင်းလုပ်ခဲ့ရတာပါ။ တရက်ကိုတရွာချင်း ပြောဆိုဖြစ်တယ်။ လက်ရှိနိုင်ငံရေးနဲ့ တော်လှန်ရေးအခြေအနေ၊ လူထုပါဝင်လှုပ်ရှားတာ၊ ဖက်ဒရယ်ဒီမိုကရေစီနဲ့ပတ်သက်လို့ သိသင့်သိထိုက်တာတွေကို ပြောဆိုခဲ့တာပါလို့” ပညာပေးပြောဆိုသူ မမေဇင်မွန်က မြေလတ်အသံကို ပြောပါတယ်။

အဲ့ဒီလို အသိပညာပေးပြောဆိုတာကို မေလအတွင်းမှာ စတင်ပြုလုပ်ခဲ့တာ ၄ ရွာမြောက်ဖြစ်ပြီး၊ မုံရွာအမြင့်လမ်း သပိတ်ကော်မတီ၊ မြို့နယ်ပြည်သူ့အုပ်ချုပ်ရေးအဖွဲ့နဲ့ ပြည်သူ့ကာကွယ်ရေးတပ်ဖွဲ့တွေက ပူးပေါင်းလုပ်ခဲ့တာဖြစ်တယ်လို့ သိရပါတယ်။

စာတည်း – 007

စစ်ကိုင်း၊ မေ ၈၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ မုံရွာ-မန္တလေး ကားလမ်းမကြီးအပေါ် ဖြတ်သန်းသွာလာမှုကို မေလ ၈ ရက်ဒီမနက် ၁၀ နာရီကျော်ကစလို့ ရက် အကန့်အသတ်မရှိ ပိတ်ပင်သွားမယ်လို့ People’s knight Defense Force Myinmuမှ တာဝန်ခံ ဗိုလ်အေးချမ်းက ပြောပါတယ်။

အဆိုပါလမ်းမပေါ်မှာ စစ်ကောင်စီစစ်ကြောင်း တွေရှိနေတာကြောင့် တိုက်ပွဲအချိန်မရွေးဖြစ်လာနိုင်တဲ့အတွက် အခုလိုကန့်သတ်ထားရတာဖြစ်တယ်လို့ သူက ဆိုပါတယ်။

“မနေ့ကဆိုရင် လမ်းမဘေးနားက လက်တုတ်တောရွာ မီးရှို့ခံရတယ်။ အကြောင်းမဲ့ သက်သက်ရှို့သွားတာ။ ပြီးတော့ အဲ့ကောင်တွေက ဒီနေ့မှာ ဂွေးပင်တောရွာထဲမှာ တပ်စွဲထားတယ်။ အင်အားတော်တော် များတယ်။ တိုက်ပွဲက အချိန်မရွေး ဖြစ်လာနိုင်ပါတယ်။ အဲဒါကြောင့် လမ်းသွားဒေသခံတွေအတွက် အန္တရာယ်မဖြစ်အောင် လမ်းကိုပိတ်ရတာပါ”လို့ သူက ဆက်ပြောပါတယ်။

ဒါ့အပြင် ဒီကန့်သတ်မှုမှာ နောက်ထပ်ကြေညာချက် မထုတ်ပြန်တဲ့အထိ အကျုံးဝင်မှာဖြစ်တာကြောင့် ဒီအတောအတွင်းလိုက်နာခြင်းမရှိဘဲ သွားလာနေပါက ထိခိုက်မှုတစုံတရာဖြစ်ပေါ်ခဲ့ရင် မိမိတို့အဖွဲ့အနေနဲ့ တာဝန်ယူဖြေရှင်းသွားမှာမဟုတ်ကြောင်း ဗိုလ်အေးချမ်းက ဆိုပါတယ်။

အရေးပေါ်အခြေအနေနဲ့သွားလာရမည်ဆိုပါကလည်း နေ့ခင်းဆိုရင်ကားတွေကို တံခါးတွေဖွင့်သွားကြဖို့၊ ညအချိန်ဆိုရင်လည်း ကားအတွင်းမီးဖွင့်မောင်းပေးကြဖို့ကို ပြည်သူတွေက လိုက်နာပြီး တော်လှန်ရေးကို ကူညီပေးပါရန် မေတ္တာရပ်ခံအပ်ပါတယ်လို့ သူကဆိုပါတယ်။

ပြီးခဲ့တဲ့ဇန်နဝါရီလအတွင်းမှာ အခုလိုအရေးပေါ်ထုတ်ပြန်ချက်တခုကို ပြည်သူတွေအနေနဲ့ လိုက်နာမှုအားနည်းကြတာကြောင့် တိုက်ပွဲဖော်ဆောင်တဲ့အချိန်မှာ ဒေသခံ ပြည်သူတွေကို ရှောင်ရှားနေရလို့ PDFရဲဘော်တွေ ထိခိုက်မှုတွေရှိခဲ့ကြတယ်လို့ သိရပါတယ်။

စာတည်း – လင်းဇေ

မုံရွာ၊ မေ ၇၊ ၂၀၂၃။

စစ်ကိုင်းတိုင်း၊ မုံရွာမြို့လယ်ကနာရီစင်မှာ မေလ ၇ ရက်ဒီနေ့မနက် ၇ နာရီက စစ်အာဏာရှင်ဆန့်ကျင်ရေးစာတန်းပါ ဘန်နာကို မုံရွာလူငယ်အစည်းအရုံးမှ အဖွဲ့ဝင်လူငယ်တွေက စစ်အာဏာရှင်ဆန့်ကျင်ရေးလှုပ်ရှားမှုအဖြစ် ချိတ်ဆွဲခဲ့တယ်လို့ သိရပါတယ်။

“အခုချိန်ထိ သူတို့က လုံးဝအုပ်ချုပ်လို့မရပါဘူး။ ဒါကိုပြသလိုတာရယ်၊ သူတို့(စစ်တပ်)တွေ မခံမရပ်နိုင် ဖြစ်အောင် “အုပ်ချုပ်လို့တော့မရဘူး၊ ဒုတ်စုပ်လို့တော့ရမယ်”စာသားကို ကင်းပုန်းတွေရှိတဲ့ကြားက မြို့လယ်ခေါင်မှာ ချိတ်ဆွဲခဲ့တာပါ”လို့ မုံရွာလူငယ်အစည်းအရုံးဝင်တဦးက ပြောပါတယ်။

ဒါ့အပြင် စာတန်းချိတ်ဆွဲအပြီးမှာ အဲဒီနာရီစင်နာရီရှေ့မှာပဲ ကားတာယာကွင်းကို မီးရိူ့ဆန္ဒပြခဲ့ကြတယ်လို့ သိရပါတယ်။