မင်းလှ

မင်းလှ၊ ဇွန် ၁၈၊ ၂၀၂၆။

ပဲခူးတိုင်း၊ မင်းလှမြို့နယ်၊ စမ်းဘုတ်ကျေးရွာမှာ ဒေသအခြေစိုက်လက်နက်ကိုင်အဖွဲ့က ရွာသား ၁ ဦးကို သတ်ဖြတ်ပြီး ၄ ဦးကိုဖမ်းဆီးထားတယ်လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တွေဆီက သိရပါတယ်။

မေ ၃၀ ရက်မှာ အသက် ၁၈ နှစ်အရွယ် မနွယ်နီဝင်း၊ အသက် ၃၄ နှစ်အရွယ် ဒေါ်ပူစူး၊ အသက် ၅၀ နှစ်အရွယ် ဦးကျော်လွင်စိုးတို့ကို ဖမ်းဆီးခဲ့သလို ဇွန် ၁၁ ရက်ညမှာ အသက် ၄၀ ကျော်အရွယ် ကိုငမျိုး၊ ဇွန် ၁၂ ရက်မှာ အသက် ၅၂ နှစ်အရွယ် ဒေါ်မိစန်းအေးတို့ကို နေအိမ်တွေကနေ ဖမ်းဆီးခဲ့တာလို့ ဆိုပါတယ်။

“ဘယ်အဖွဲ့လုပ်တာတော့ သိတယ်။ ပြောဖို့အဆင်မပြေသေးလို့။ ခုက ပြည်သူတွေခံရတာဖြစ်နေလို့။ ဒေသခံ ၃ ယောက်ကို အရင်ဖမ်းတယ်။ နောက်ရက်မှာ ကိုမျိုးကိုဖမ်းတယ်။ နောက်တရက်မှာ သတ်ပစ်တယ်။ လည်ဖြတ်ပြီးသတ်ဖြတ်ခံရတယ်။ သူခေါင်းတောင် ခြံစည်းရိုးပေါ်မှာ ချိတ်ခဲ့တာ။ လူမြင်ကွင်းမှာသတ်လိုက်တာ”လို့ ဖြစ်စဥ်ကိုသိတဲ့ ဒေသကာကွယ်ရေးအဖွဲ့ဝင်တဦးက ပြောပါတယ်။

သတ်ဖြတ်ဖမ်းဆီးခံရသူတွေထဲက ဦးကျော်လွင်စိုး ၁ ဦးသာ စစ်အာဏာမသိမ်းခင်က ကြံ့ခိုင်ရေးပါတီဝင်တဦးဖြစ်ခဲ့ပြီး စစ်အာဏသိမ်းပြီးနောက် ပါတီကနှုတ်ထွက်ပြီး စျေးဆိုင်ဖွင့်ထားသူဖြစ်ပြီး ကျန်သူတွေက လယ်လုပ်၊ စျေးရောင်းနဲ့ ကျပန်းလုပ်ကိုင်သူတွေဖြစ်ပြီး စစ်ကော်မရှင်အဖွဲ့ဝင်တွေနဲ့ ပတ်သက်တာမရှိတဲ့အရပ်သားတွေသာ ဖြစ်တယ်လို့ အထက်ပါအဖွဲ့ဝင်က ပြောပါတယ်။

ဖမ်းခံရသူ ၅ ဦးထဲမှာ ကိုငမျိုးဟာ အသတ်ခံခဲ့ရပြီး ကျန် ၄ ဦးမှာလည်း ဇွန်လ ၁၈ ရက်အထိ ပြန်မလွတ်လာသေးသလို ဘယ်မှာဖမ်းဆီးချုပ်နှောင်ထားတယ်ဆိုတာ မသိရသေးတာကြောင့် သူတို့ရဲ့အန္တရာယ်ကိုလည်း စိုးရိမ်နေကြရတယ်လို့ ဆိုပါတယ်။

အဆိုပါ လက်နက်ကိုင်အဖွဲ့ဟာ ဇွန် ၁၀ ရက်မှာ လက်ပံတန်းမြို့နယ်၊ ရေနောက်ရွာက အမျိုးသား ၂ ဦး၊ အမျိုးသမီး ၃ ဦးနဲ့ ဇွန် ၁၁ ရက်ညမှာ မင်းလှမြို့နယ်၊ စီတုန်းရွာက အမျိုးသား ၁ ဦးတို့ကိုလည်း သတ်ဖြတ်ခဲ့သေးတယ်လို့ ဖြစ်စဥ်ကိုသိတဲ့ဒေသကာကွယ်ရေးအဖွဲ့ဝင်တဦးဆီက သိရပါတယ်။

အဲ့ဒီသတ်ဖြတ်မှုတွေကို စုံစမ်းဖော်ထုတ်ပေးဖို့ အထက်အဆင့်ဆင့်ကိုတင်ပြထားတယ်လို့လည်း ရွှေတန်းမြေ ပြည်သူ့ကာကွယ်ရေးအဖွဲ့က ဇွန် ၁၄ ရက်စွဲနဲ့ ထုတ်ပြန်ထားခဲ့ပါတယ်။

■ သတ်ဖြတ်ခဲ့သူတွေကို စုံစမ်းဖော်ထုတ်ဖို့တင်ပြထားဟု ရွှေတန်းမြေပြည်သူ့ကာကွယ်ရေးတပ်ဖွဲ့ ပြော

သာယာဝတီ၊ ဇွန် ၁၅၊ ၂၀၂၆။

ပဲခူးတိုင်း၊ သာယာဝတီခရိုင်၊ မင်းလှနဲ့ လက်ပံတန်းမှာ အရပ်သား ၆ ဦး အသတ်ခံခဲ့ရပြီး သတ်ဖြတ်ခဲ့သူတွေကို စုံစမ်းဖော်ထုတ်ဖို့တင်ပြထားတယ်လို့ ရွှေတန်းမြေပြည်သူ့ကာကွယ်ရေးတပ်ဖွဲ့ တာဝန်ခံ ကပြောပါတယ်။

အဲ့ဒီသတ်ဖြတ်မှုတွေနဲ့ပတ်သက်ပြီး စုံစမ်းဖော်ထုတ်ပေးဖို့ ပဲခူးတိုင်းပကဖ၊ ပဲခူးတိုင်းစစ်ဒေသတာဝန်ရှိသူတွေဆီ တင်ပြထားတာလို့ ဆိုပါတယ်။

“အရပ်သားပြည်သူတွေကို ဒလန်လို့စွပ်စွဲပြီး သတ်ဖြတ်ထားတယ်။ အဲ့ဒီအတွက် ကျူးလွန်တဲ့အဖွဲ့ကို ကျူးလွန်သလို အပြစ်ပေးအရေးယူဖို့တင်ပြထားတယ်။ ဘယ်အဖွဲ့တွေကသတ်တယ်ဆိုတာကိုပါ တင်ပြထားပါတယ်။ ဘယ်အဖွဲ့လုပ်တယ်ဆိုတာ မှန်တော့မှန်ကန်နေပြီ။ သို့သော်လည်း အပေါ်က ဘာအမိန့်မှမကျသေးလို့ အဖွဲ့နာမည်မပြောသေးဘူး”လို့ ရွှေတန်းမြေပြည်သူ့ကာကွယ်ရေးတပ်ဖွဲ့ တာဝန်ခံက ပြောပါတယ်။

ဇွန် ၁၁ ရက်ည ၁၀ နာရီမှာ မင်းလှမြို့နယ်၊ စီတုန်းကျေးရွာနေ အသက် ၃၀ အရွယ် ကိုလင်းလင်းကို လက်နက်ကိုင်အဖွဲ့ ၁ ခုက နေအိမ်ပေါ်ကနေခေါ်ထုတ်ပြီး နေအိမ်ရှေ့မှာပစ်သတ်ခဲ့တယ်လို့ ဆိုပါတယ်။

ဒါ့အပြင် ဇွန်လ ၁၀ ရက်ညပိုင်းမှာလည်း လက်ပံတန်းမြို့နယ်၊ ရေနောက်ကျေးရွာနေ အသက် ၅၀ ကျော်အရွယ် ဦးတင်သိန်း၊ ဇနီးဖြစ်သူ အသက် ၄၅ နှစ်အရွယ် ဒေါ်ခင်ဦး၊ အသက် ၅၅ နှစ်အရွယ် ဦးလွန်းခိုင်နဲ့ဇနီးဖြစ်သူ အသက် ၅၀ အရွယ် ဒေါ်မိချို၊ အသက် ၅၇ နှစ်အရွယ် ဒေါ်အေးမြင့်တို့ နေအိမ်တွေမှာပဲ ပစ်သတ်ခံခဲ့ရတာပါ။

ပစ်သတ်ခံရသူတွေဟာ မျှစ်ချိုး၊ ဝါးခုတ်၊ လက်သမား၊ ကြုံရာကျပန်းလုပ်ကိုင်သူတွေဖြစ်ပြီး အဲဒီအထဲက ကိုလင်းလင်းဟာ PDF ထောက်ပို့ဆိုပြီး သတင်းထွက်တာကြောင့် စစ်ကော်မရှင်ကလိုက်လံဖမ်းဆီးတဲ့အတွက် ရွာကနေ ၅ လကျော်ကြာ ထွက်ပြေးတိမ်းရှောင်ရပြီးနောက် ကျေးရွာကိုပြန်ရောက်လာတာမကြာသေးဘူးလို့ ဆိုပါတယ်။

ဧပြီ ၂၅ ရက်ကလည်း အုတ်ဖိုမြို့နယ်၊ သုံးပွင့်ဆိုင်ကျေးရွာအနီးတောစပ်မှာ သစ်ကယ်ရီသမား ၁ ဦးကို လက်နက်ကိုင်အဖွဲ့တွေက ပစ်ခတ်ရာသေဆုံးခဲ့သေးတယ်လို့ သိရပါတယ်။

စာတည်း – လင်း

မင်းလှ၊ ဇွန် ၂၊ ၂၀၂၆။

ပဲခူးတိုင်းအနောက်ခြမ်း၊ မင်းလှမြို့နယ်မှာ အသွင်ပြောင်းအစိုးရနဲ့စစ်တပ်က ဈေးအရောင်းပွဲတော်‌တွေကျင်းပနေပြီး ပွဲကအပြန်လူငယ်တွေကို ပေါ်တာဆွဲဖမ်းဆီးနေတယ်လို့ ဒေသခံတွေဆီကသိရပါတယ်။

စစ်ကွင်းမြို့မှာ မေလ ၂၇ ရက်ကစတင်ကာ ဒီကနေ့အထိ စျေးအရောင်းဆိုင်ခန်းတွေအများအပြားနဲ့ အပျော်စီးစရာနေရာတွေပါဝင်တဲ့ စျေးပွဲတော်ကျင်းပနေပြီး၊ ပြီးခဲ့တဲ့ ဧပြီလအတွင်းက မင်းလှမြို့၊ အထက်တန်းကျောင်းဘောလုံးကွင်းအတွင်းပြုလုပ်ခဲ့တဲ့ စျေးပွဲတော်မှာ လူငယ် ၂၀ ဦးထက်မနည်း ဖမ်းဆီးခံခဲ့ရတယ်လို့ မြို့ခံတဦးက မြေလတ်အသံကို ပြောပါတယ်။

” ပွဲမပါဘူး။ ဈေးဆိုင်တွေနဲ့ ကလေးဆော့လို့ရတဲ့နေရာတွေလေ။ ည‌ဘက်ပြန်တဲ့အချိန် ပေါ်တာဆွဲတာတွေရှိတယ်။ သတင်းတွေလည်း မတက်တော့ လုပ်ချင်တိုင်းလုပ်ရနေတဲ့သဘော။ ပွဲကအပြန် အဖမ်းခံရတာရှိတယ်။ ပေါ်တာပေါ့။ တိုင်လည်းမရ ပိုက်ဆံရှိတဲ့လူကတော့ သိသိချင်းပြန်ရွေးထုတ်ရတယ်။ ကြာသွားရင်‌‌ ငွေရှိလည်းရွေးမရ။ ရွာဘက်တွေက အဖမ်းခံရတာများတယ်၊ စစ်ကွင်းပွဲကတော့ ခုထိဘာအသံမှမကြားဘူး”လို့ စစ်ကွင်းဒေသခံတဦးက မြေလတ်အသံကိုပြောပါတယ်။

စစ်ကွင်းဈေးပွဲတော်ကာလအတွင်း လူငယ်တွေပေါ်တာဆွဲဖမ်းဆီးခံရမှုအခြေအနေတွေကို မသိရသေးပေမယ့် မင်းလှဈေးပွဲတော်ရက်တွေမှာ လူဆယ်နဲ့ချီ ဖမ်းဆီးခံရတာကြောင့် သတိထားသွားလာနေ ထိုင်ကြဖို့ မင်းလှဒေသခံတဦးက အခုလိုပြောပါတယ်။

“တချို့လည်းပါသွားတယ်။ ပိုက်ဆံရှိမှပဲ။ မရှိရင်တော့ ပါတယ်။ ချက်ချင်း‌ ရွေးရတာ။ ညဘက်ပွဲကအပြန်လမ်းဆုံ(သရက်တပင်ရွာတာဆုံ)မှာရယ်၊ ထောက်ကြံ့ကွင်းနားရယ်၊ ကြို့ကုန်းထိပ်ရယ် နောက်ပိတ်ဆုံးပြန်တဲ့ကလေးတွေ အဆွဲခံရတာ” လို့ ဆိုပါတယ်။

အသွင်ပြောင်းအစိုးရနဲ့ စစ်တပ်က ပြည်သူ့စစ်မှုထမ်းသင်တန်းတွေကို လစဥ်ဖွင့်လှစ်နေပြီး အဲ့ဒီသင်တန်းတွေမှာ သင်တန်းသားလူဦးရေပြည့်မီဖို့အတွက် စစ်တပ်ထိန်းချုပ်မြို့နယ်တွေက လူငယ်တွေကို ပစ်မှတ်ထား ပေါ်တာဆွဲဖမ်းဆီးနေတာလည်း ဖြစ်ပါတယ်။

မင်းလှ၊ မတ် ၂၃၊ ၂၀၂၆။

ပဲခူးတိုင်း၊ မင်းလှမြို့နယ်မှာ စစ်ကော်မရှင်လက်အောက် ရပ်ကျေးအုပ်ချုပ်ရေးမှူး ၁ ဦး သေနတ်ပစ်ခံရပြီး သေဆုံးခဲ့တယ်လို့ ရွှေတန်းမြေပြည်သူကာကွယ်ရေးတပ်ဖွဲ့တာဝန်ရှိသူတွေထံက သိရပါတယ်။

သေဆုံးသူဟာ မင်းလှမြို့နယ်၊ ဝက်လှကြီးကျေးရွာအုပ်ချုပ်ရေးမှူး အသက် ၄၅ နှစ်အရွယ် ဦးအောင်ကျော်မိုးဆိုသူဖြစ်ပြီး ၎င်းကို မတ်လ ၂၂ ရက် ယမန်နေ့ ညနေ ၄ နာရီခန့်မှာ နေအိမ်အတွင်းအထိဝင်ရောက်ပစ်ခတ်ခဲ့တာလို့ ဆိုပါတယ်။

” သူက ထွေအုပ်ကပြန်တာလား စစ်ကွင်းတာဆုံဂိတ်က ပြန်လာတာလားတော့ မသိဘူး။ သူပြန်လာတဲ့အချိန်ကို ရဲဘော်တွေက သွားစောင့်တာ။ သူကအိမ်ကိုရောက်နှင့်နေတုန်းပဲရှိသေးတယ်။ လွယ်အိတ်တွေတောင်မချရသေးဘူး။ အဲ့ဒီအချိန်မှာရဲဘော်တွေက သူ့နာမည်ခေါ်ပြီးဝင်သွားချိန် ထွက်ပြေးဖို့လုပ်လို့ ၂ ချက်ပစ်ခတ်ခဲ့တာ”လို့ ရွှေတန်းမြေပြည်သူ့ကာကွယ်ရေးတပ်ဖွဲ့တာဝန်ရှိသူက မြေလတ်အသံကို ပြောပါတယ်။

သေဆုံးသူ ဦးအောင်ကျော်မိုးဟာ ဝက်လှကြီးကျေးရွာအုပ်ချုပ်ရေးမှူးအဖြစ်လုပ်ကိုင်တာ ၃ လသာ ရှိသေးပြီး ယခင်ဝက်လှကြီးကျေးရွာအုပ်ချုပ်ရေးမှူးက ကျန်းမာရေးမကောင်းတာကြောင့် အနားယူသွားလို့ အစားထိုးဝင်ရောက်လာတာလို့ ဆိုပါတယ်။

ဦးအောင်ကျော်မိုးဟာ အုပ်ချုပ်ရေးမှူးမဖြစ်ခင်ကတည်းက စစ်ကော်မရှင်တပ်၊ အထွေထွေအုပ်ချုပ်ရေးဌာနတွေနဲ့နီးစပ်သူဖြစ်ပြီး အုပ်ချုပ်ရေးမှုးဖြစ်လာပြီးနောက် စစ်မှုထမ်းကြေးအတင်းအဓမ္မတောင်းခံတာ၊ တောင်းခံလို့မရရင်ဖမ်းဆီးမှုတွေလုပ်ဆောင်မယ်လို့ ခြိမ်းခြောက်မှုတွေရှိလာကြောင်း တိုင်ကြားလာလို့ ပစ်ခတ်ရှင်းလင်းခဲ့တာလို့ သိရပါတယ်။

သေနတ်နဲ့အနီးကပ်ပစ်ခံရလို့ ဦးအောင်ကျော်မိုးမှာ နေရာမှာသေဆုံးသွားပြီး ၎င်းထံကနေ နိုင်ငံသားစိစစ်ရေးကတ်၊ ယာဥ်မောင်းလိုင်စင်၊ စစ်မှုထမ်းကြေးကောက်ယူထားတဲ့စာရွက်စာတမ်းတွေ သိမ်းဆည်း ရရှိခဲ့ကာ ပစ်ခတ်မှုဖြစ်ပြီးနောက် ရန်ကုန်-ပြည်လမ်း စစ်ကွင်းတာဆုံဂိတ်တာဝန်ကျ စစ်ကော်မရှင်တပ်ဖွဲ့ဝင်တွေလာရောက်စစ်ဆေးမှုပြုလုပ်ခဲ့တယ်လို့ သိရပါတယ်။

မတ်လ ၁၄ ရက်ကလည်း မင်းလှမြိုနယ်၊ ဘုရားကွင်းကျေးရွာနေ ပျူစောထီးအဖွဲ့ဝင် ဦးရဲထွန်းဆိုသူဟာ နေအိမ်မှာရှိနေချိန် သေနတ်နဲ့ပစ်ခတ်ခံရပြီး သေဆုံးသွားတယ်လို့ သိရပါတယ်။

မင်းလှ၊ အောက်တိုဘာ ၈၊ ၂၀၂၅။

ပဲခူးတိုင်း၊ မင်းလှမြို့နယ်၊ ဆင်တဲကုန်းအုပ်စု၊ ဆင်တဲကုန်းကျေးရွာမှာ စစ်ကော်မရှင်တပ်က ထုတ်ပြန်ထားတဲ့ မဲစာရင်းတွေကို မီးရှို့ဖျက်ဆီးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ က အောက်တိုဘာ ၇ ရက်မှာ သတင်းထုတ်ပြန်ပါတယ်။

အောက်တိုဘာ ၆ ရက်ည ၁၁ နာရီမိနစ် ၃၀ ခန့်မှာ ဆင်တဲကုန်းရွာရှိ လူငယ်အားမာန် စာကြည့်တိုက်မှာ ကပ်ထားတဲ့ မဲစာရင်းစာရွက်တွေကို မီးရှို့ခဲ့တာလို့ဆိုပါတယ်။

“တော်လှန်ရေးသမားတွေအနေနဲ့ကတော့ အတုအယောင်ရွေးကောက်ပွဲလုပ်နေတဲ့ အရာမှန်သမျှကို ဖျက်ဆီးမှာဘဲ။ ဒါကတော်လှန်ရေးသမားတွေရဲ့ ရည်ရွယ်ချက်ဘဲ။ မည်သည့်နေရာမှာမဆို စစ်တပ်ဒေါက်တိုင်မှန်သမျှရယ်၊ စစ်တပ်က လုပ်တာမှန်သမျှ ဖျက်ဆီးသွားမှာဖြစ်တယ်။ တွန်းလှန်ပြီးတော့လုပ်သွားမှာ”လို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ တာဝန်ရှိသူတဦးက ပြောပါတယ်။

မီးရှို့ဖျက်ဆီးလိုက်လို့ မဲစာရင်း ၅၆ ရွက်လုံး မီးလောင်ပျက်စီးသွားပြီး ကျေးရွာစာကြည့်တိုက်ကတော့ မီးလောင်တာမရှိဘူးလို့ဆိုပါတယ်။

ဖျက်ဆီးခံရပြီးနောက် အောက်တိုဘာ ၇ ရက်နေ့လယ် ၁ နာရီလောက်မှာ စစ်ကော်မရှင်တပ်ဖွဲ့ဝင် တွေနဲ့ပျူစောထီးတွေက မီးရှို့ခံရတဲ့နေရာကို လာရောက်စစ်ဆေးမှုပြုလုပ်သွားတယ်လို့ သိရပါတယ်။

အဆိုပါ မဲစာရင်းတွေကို စက်တင်ဘာ ၃၀ ကစတင်ကပ်ထားတာဖြစ်ကာ အောက်တိုဘာ ၁၃ ရက်နေ့အထိ ကပ်ထားမှာဖြစ်တယ်လို့ ဆိုပါတယ်။

ဒီဖျက်ဆီးမှုတွေကို ၃၈ဝ၂ တပ်ခွဲ ၂ မြေအောက်ပြောက်ကျား တပ်ဖွဲ့မှ ရဲဘော်များက လုပ်ဆောင်ခဲ့တာဖြစ်ပြီး ပြည်သူများအနေဖြင့်လည်း စစ်ကော်မရှင်တပ်ဖွဲ့ဝင်တွေအနီး သွားလာနေထိုင် မပြုလုပ်ကြဖို့ သတိထားသွားလာနေထိုင်ကြရန် သတိပေးထုတ်ပြန်ထားပါတယ်။

၂၀၂၅၊ ဒီဇင်ဘာ ၂၈ မှာ ပြုလုပ်မယ့်ရွေးကောက်ပွဲအပိုင်း ၁ မှာ မြို့နယ်ပေါင်း ၁၀၂ မြို့နယ်ကျင်းပပြုလုပ်မှာဖြစ်ပြီး အဲ့ဒီအထဲမှာ ပဲခူးတိုင်းဒေသကြီးထဲက ၈ မြို့နယ်ပါဝင်ကာ မင်းလှမြို့နယ်ကတော့ အပိုင်း ၁ ကျင်းပပြုလုပ်မယ့်အချိန်မှာ မပါသေးဘူးလို့ ဩဂုတ် ၂၁ ရက်မှာ စစ်ကော်မရှင်တပ်ရဲ့ ရွေးကောက်ပွဲကော်မရှင် ထုတ်ပြန်ချက်အရသိရပါတယ်။

စာတည်း – လင်း

၁ ဦးပြန်ဖမ်းခံထားရပြီး စစ်ကောင်စီတပ်ကစစ်ဆေးမှုတင်းကျပ်ရှာဖွေနေ

မြေလတ်အသံ၊ သြဂုတ် ၄၊ ၂၀၂၅။

ပဲခူးတိုင်း၊ မင်းလှမြို့နယ်က ပေါ်တာဆွဲဖမ်းဆီးခံထားရတဲ့ အမျိုးသား ၁၉ ဦးထွက်ပြေးခဲ့တာကြောင့် စစ်ကောင်စီဘက်က မင်းလှမြို့ပေါ်နဲ့အနီးဝန်းကျင်ကိုစစ်ဆေးမှုတွလုပ်နေတယ်လို့ ဒေသခံတွေဆီက သိရပါတယ်။

သြဂုတ် ၂ ရက်ည ၈ နာရီကျော်မှာ မင်းလှမြို့၊ ထွေအုပ်ရုံး ထိန်းသိမ်းခန်းမှာ ဖမ်းဆီးခံထားရတဲ့ အမျိုးသား ၁၉ ဦးစလုံးထွက်ပြေးခဲ့ကြတာဖြစ်ပြီး အဲ့ဒီက ၁၈ ဦးသာလွတ်မြောက်ခဲ့ကာ ၁ ဦးကတော့ မြို့ပေါ်မှာပြန်အဖမ်းခံလိုက်ရတယ်လို့ ဆိုပါတယ်။

“မနေ့(သြဂုတ် ၂)က မြို့ထဲမှာပတ်ရှာနေတာ။ အစစ်အဆေးလည်းကြမ်းတယ်။ ပုံတွေနဲ့တိုက်စစ်နေတာ။ ၂ ရက်နေ့ညက ပြန်မိတာ ၁ ယောက်က။ ဘယ်နေရာမိလည်းတော့အတိအကျမသိရဘူး။ မြို့ထဲမှာပဲ မိတယ်လို့ ပြောတယ်”လို့ မြေပြင်အခြေအနေကိုသိရှိတဲ့ တော်လှန်ရေးတပ်ဖွဲ့ဝင်တဦးကပြောပါတယ်။

ထွေအုပ်ရုံးရှိ စစ်ကောင်စီတပ်ဖွဲ့ဝင်တွေ မင်းလှမြို့၊ အနောက်ခြမ်းရှိကျေးရွာတွေကို ပေါ်တာသွားဆွဲနေတုန်း အလစ်အငိုက်မှာထွက်ပြေးခဲ့ကြတာဖြစ်ပြီး သူတို့နဲ့ပတ်သက်တဲ့ အသေးစိတ်အချက်အလက်တွေကိုတော့ မြေလတ်အသံကအတည်မပြုနိုင်သေးပါဘူး။

သြဂုတ် ၃ ရက်နဲ့ ၄ ရက်ဒီကနေ့မနက်အချိန်ထိ မင်းလှမြို့ပေါ်မှာ စစ်ကောင်စီတပ်က လွတ်မြောက်သွားသူ ၁၈ ဦးရဲ့ဓာတ်ပုံတွေကိုကိုင်ဆောင်ပြီး စစ်ဆေးမှုတွေလုပ်နေသလို မြို့အနီးရှိကျေးရွာတွေကိုပါ စစ်ကြောင်းထိုးပြီး လိုက်လံရှာဖွေနေတယ်လို့ သိရပါတယ်။

ပြီးခဲ့တဲ့ဇူလိုင် ၈ ရက်နဲ့ ၁၂ ရက်ကလည်း မင်းလှမြို့နယ်၊ ညောင်ပင်သာနဲ့ ငလှစမ်းကျေးရွာတို့ကို စစ်ကြောင်းထိုးဝင်ရောက်ပြီး ရွာခံတွေဖြစ်ကြတဲ့ ကိုမိုးဒီ၊ ကိုညီညီမိုးခန့်၊ ကိုဖိုးကုလား၊ ကိုဝင်းထွဋ်နောင်၊ ကိုမင်းဇော်၊ ကိုစန်းမင်းအောင်တို့ကို ဖမ်းဆီးခဲ့တယ်လို့ ဒေသခံတွေဆီက သိရပါတယ်။

စာတည်း – လင်း