ပျူစောထီး

စဉ့်ကူး၊ ဇူလိုင် ၁၁၊ ၂၀၂၆။

မန္တလေးတိုင်း၊ စဉ့်ကူးမြို့နယ်နဲ့ မကွေးတိုင်း၊ အောင်လံမြို့နယ်တွေမှာ အုပ်ချုပ်ရေးမှူးအပါအဝင် ၄ ဦးသေနတ်နဲ့ပစ်ခံရပြီး သေဆုံးခဲ့တယ်လို့ ဒေသကာကွယ်ရေးအဖွဲ့တာဝန်ရှိသူတွေဆီက သိရပါတယ်။

ဇူလိုင် ၈ ရက်မနက် ၆ နာရီကျော်မှာ စဉ့်ကူးမြို့နယ်၊ ရွှေဂုံတိုင်ကျေးရွာရှိ “လပြည့်ဝန်း” လက်ဖက်ရည်ဆိုင်မှာထိုင်နေတဲ့ ကျေးရွာအုပ်ချုပ်ရေးမှူး အသက် ၅၃ နှစ်အရွယ် ဦးအောင်ဆန်းဝင်း (ခ) မင်းမင်းနဲ့ ရွှေဒုံးကျေးရွာတာဝန်ခံ အသက် ၄၅ နှစ်အရွယ် ကိုသန်းဇော်တို့ကို သေနတ်သမားတွေက ဆိုင်ထဲဝင်လာပြီး ပစ်ခတ်ခဲ့တာလို့ ဆိုပါတယ်။

“ပစ်တာကတော့ တပ်ရင်းတွေဘက်က ပစ်တယ်လို့တော့သိရတယ်။ လက်ဖက်ရည်ဆိုင်ထဲထိ ဝင်ပစ်တာပေါ့။ အဲ့ဒါဖြစ်ပြီး ရွာခံတွေဖမ်းဆီးခံရတာတော့မရှိဘူး။ အလောင်းတွေတော့ စဉ့်ကူးဘက် သယ်သွားကြတယ်။ “လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

အုပ်ချုပ်ရေးမှုးနဲ့ ကျေးရွာတာဝန်ခံတို့ဟာ စစ်တပ်လက်အောက်ခံဖြစ်သလို ပြည်သူတွေဆီက စစ်မှုထမ်းအကြောင်းပြငွေညှစ်တာနဲ့ သတင်းပေးလုပ်နေတာကြောင့် ပစ်ခတ်ရှင်းလင်းခံရတာလို့ ဆိုပါတယ်။

အလားတူ ဇူလိုင် ၈ ရက်ည ၁၀ နာရီကျော်ခန့်မှာလည်း အောင်လံမြို့နယ်၊ ဥယျာဥ်ကျေးရွာနေ ပျူစောထီးအဖွဲ့ဝင် အသက် ၃၆ နှစ်အရွယ် သက်နိုင်စိုး (ခ) ကြွက်နီရဲ့နေအိမ်ကို ဝင်ရောက်ပစ်ခတ်ခဲ့တယ်လို့ ပစ်ခတ်မှုပြုလုပ်ခဲ့တဲ့ ဒေသကာကွယ်ရေးအဖွဲ့တာဝန်ရှိသူက ပြောပါတယ်။

“ကြွက်နီက မြို့ပေါ်နေတာများတယ်။ သူအိမ်ပြန်ရောက်လာချိန်စောင့်ပြီး နေအိမ်ထဲဝင်ပစ်တာ။ အိမ်ထဲဝင်ပစ်ချိန်မှာတော့ သူတို့လင်မယားနဲ့ သူ့ယောက္ခမလင်မယားရှိနေတာ။ ပစ်ခတ်ပြီးတဲ့နောက်မှာလည်း ရွာထဲကအခြားပျူစောထီးတွေက သေနတ်ပစ်ဖောက်တဲ့ ဖြစ်စဉ်တွေ ရှိခဲ့တယ်။ ပျူခေါင်းဆောင် အတာအိမ်ကိုလည်းဝင်ဖို့လုပ်သေးတယ် သူမရှိလို့ ဘာမှမလုပ်ခဲ့ရဘူး”လို့ ပစ်ခတ်မှုပြုလုပ်ခဲ့တဲ့ အဖွဲ့တာဝန်ရှိသူက ပြောပါတယ်။

အဆိုပါပစ်ခတ်မှုအတွင်း ပျူစောထီးအဖွဲ့ဝင် သက်နိုင်စိုး (ခ) ကြွက်နီ၊ ယောက္ခမဖြစ်သူ အသက် ၄၃ နှစ်အရွယ် ဒေါ်စန်းစန်းအေးတို့သေဆုံးခဲ့ပြီး ကြွက်နီရဲ့ မိန်းမဖြစ်သူ အသက် ၂၇ နှစ်အရွယ်နဲ့ ယောက္ခထီးဖြစ်သူ အသက် ၄၈ နှစ်အရွယ်တို့ ဒဏ်ရာရခဲ့တယ်လို့ ဆိုပါတယ်။

ကြွက်နီရဲ့နေအိမ်ကို ဝင်ရောက်ပစ်ခတ်ချိန် သူကိုင်ဆောင်တဲ့ အူဇီသေနတ် ၁ လက်နဲ့ ကျည်ဆန်အချို့ကိုလည်း သိမ်းဆည်းရမိခဲ့တယ်လို့ သိရပါတယ်။

ဇူလိုင် ၅ ရက်ကလည်း အောင်လံမြို့၊ ပြလို့တိုက်နယ်၊ ကွမ်းလောင်းကျေးရွာအဝင်အနားမှာ အုပ်ချုပ်ရေးမှူး ဦးအေးဟန် ဓားခုတ်ခံရပြီးသေဆုံးခဲ့တဲ့ဖြစ်စဥ် ရှိခဲ့ပါသေးတယ်

မန္တလေး၊ ဇူလိုင် ၇၊ ၂၀၂၆။

မန္တလေးမြို့မှာ ဆက်တိုက် ပေါ်တာဆွဲမှု တွေဖြစ် နေပြီးမေလအတွင်း အမျိုးသား ၁၅၀ ကျော် ပေါ်တာဆွဲခံရကာ၂၀ ခန့်သာ ပိုက်ဆံ ပေးပြီးပြန်လွတ်ခဲ့တာလို့ မြို့ခံတွေက ပြောပါတယ်။

“၅ လပိုင်း ၁ လအတွင်းကို လူအယောက် ၁၅၀ ကျော် ပါတယ်။ ပြန်လိုက်ရွေးနိုင်တာက ၂၀ လောက်ပဲ ရှိတာ။ အခုဆွဲနေတာက တရားဝင်ပေါ်တာ မဟုတ်ဘူး။ ပြန်ရွေးလို့ အထက်လူကြီးနဲ့ဆို (ကျပ်သိန်း) ၅၀ လောက်ဆို ရတယ်။ တချို့ကတော့ ပေးရတာတွေရောဆို ၇၀ လောက်တော့ ကုန်တယ်။” လို့ မြို့ခံတဦးက ဆိုပါတယ်။

မန္တလေးမြို့မှာ ပျူစောထီးအုပ်စုများစွာရှိပြီး ပျူတွေက ပေါ်တာဆွဲကာ လူရောင်းချမှုရှိသလို စစ်မှုထမ်းကြေး လစဉ်ငွေကောက်ခံတဲ့ ရပ်ကွက်တွေက ဒီလူ တွေကို အစားထိုး ဝယ်ယူတာ တွေရှိပြီး တရားဝင် လူကုန်ကူး ဈေးကွက်တခုလိုဖြစ်နေတာလို့ မြို့ခံတွေက ပြောပါတယ်။

မေလ ၁၈ ရက်နေ့ ၊ နေ့လည် ၁၂ နာရီခွဲမှာ မန္တလေးမြို့မှာ ပေါ်တာဆွဲမှုနာမည်ကြီးတဲ့ စက်မှုထဲမှာအမျိုးသားတဦး ပေါ်တာဆွဲခံခဲ့ရပြီး မတ္တရာမြို့နယ်၊ စစ်သားစုဆောင်းရေးတပ် (ထီးတော်မိုး)ထဲကို ရောင်းစားခံခဲ့ရတယ်လို့မိသားစုဝင်တဦးက ပြောပါတယ်။

“တံတားဦးဘက်က စစ်သားနဲ့ လူမိုက်ပေါင်းပြီး စက်မှုထဲကို ကားနဲ့ PDF လားဆိုပြီး တခါတည်းဆွဲတင်ပြီး မတ္တရာနားက ထီးတော်မိုးတပ်ထဲ ရောင်းစားတာ၊ လူပြတ်တဲ့လမ်းမှာ ကားနဲ့အသင့်စောင့်ပြီး တခါတည်းခေါ်ပြီး ရောင်းစားတာ။” လို့ မိသားစုဝင်က ပြောပါတယ်။

ပြီးခဲ့တဲ့ ဖေဖော်ဝါရီလအတွင်းမှာလည်း ထီး တော်မိုးတပ်က စစ်သား ၂ ဦးနဲ့ မန္တလေးမြို့ခံ ပျူစောထီး တွေပေါင်းပြီး နည်းပညာကျောင်းသားတဦးကို ပေါ်တာဆွဲကာ ငွေညစ်ခဲ့တာမို့ ရဲတွေဖမ်းမိတဲ့ဖြစ်စဉ် ရှိခဲ့သေးတယ်လို့ မြို့ခံ တဦးကလည်း ပြောပါတယ်။

ဒါ့အပြင်ပျူစောထီးတွေနဲ့ စစ်သားတွေပေါင်းပြီး လမ်းသွားလမ်းလာပြည်သူတွေကို ပေါ်တာဆွဲဖမ်းဆီးနေတာကြောင့် မြို့နေပြည်သူတွေ အထိတ်တလန့်ဖြစ်နေတယ်လို့ မြို့ခံတွေက ပြောပါတယ်။

အခုလို ပေါ်တာဆွဲ ဖမ်းဆီးရောင်းစားတာတွေကြောင့် ဆိုင်ကယ် ကယ်ရီသမား၊ လမ်းမတွေပေါ်မှာ လိုက်ပြင်ပေးရတဲ့ ကားပြင်သမား စတဲ့ လမ်းမပေါ်မှာ အလုပ်လုပ်နေရတဲ့ အမျိုးသားတွေအတွက် အခက်တွေ့နေပြီး အလုပ်လုပ်ဖို့တောင် ကြောက်လန့်နေရတယ်လို့ ဆိုပါတယ်။

မန္တလေးမြို့၊ ပြည်ကြီးတံခွန်မြို့နယ်ထဲက စက်မှုဇုန်မှာ ပေါ်တာဆွဲဖမ်းဆီးမှုတွေကို အများဆုံးကြုံနေရပြီး ပေါက်ကိုယ် တော်ရဲ့ ပျူစောထီး အဖွဲ့ရှိသလို လူမိုက်ဂိုဏ်းအများဆုံးရှိတဲ့နေရာ ဖြစ်တယ်လို့လည်း မြို့ခံတွေက ခန့်မှန်းပါတယ်။

“တချို့က စက်မှုနယ်ဘက် တဝိုက်လူမိုက်တွေကခေါ်ပြီး စစ်မှုထမ်းအတွက် ရောင်းစားတာ၊ ကားအမျိုးအစားက Honda Insight၊ Honda Fit၊ Mark II (ကားတွေနဲ့) လူမိုက်တွေက (စစ်သားတွေ)ပေါင်းပြီး စောင့်တာ။” လို့ ပြောပါတယ်။

ဒါ့အပြင် နေအိမ်ပေါ်အထိတက်ကာ ပေါ်တာဆွဲမှု တွေရှိပေမယ့် ယနေ့အထိ စစ်တပ်က အရေးယူတာမျိုးလည်း မရှိဘူးလို့သိရပါတယ်။

၂၀၂၆ ခုနှစ် ဇွန်လနောက်ဆုံးပတ်နဲ့ ဇူလိုင်လထဲမှာတော့ စစ်ကော်မရှင်တပ်ရဲ့ ရပ်ကွက်အုပ်ချုပ်ရေးမှူး၊ ဆယ်အိမ်မှူး၊ ရာအိမ်မှူး စတဲ့ လူကြီးရွေးပွဲတွေရှိတာကြောင့် ပေါ်တာဆွဲတာ အနည်းငယ် လျော့နေပေမယ့် မြို့ခံတွေရဲ့ စိတ်မလုံခြုံတာတွေ၊ အထိတ်တလန့်ဖြစ်နေတာတွေကတော့ လျော့မသွားဘဲ ဆက်ဖြစ်နေတယ်လို့ သိရပါတယ်။

စာတည်း – နိုင်းဝမ်း

အုတ်ဖို၊ မတ် ၂၈၊ ၂၀၂၆။

ပဲခူးတိုင်း၊ အုတ်ဖိုမြို့နယ်၊ တိမ်မြုပ်ကျေးရွာ၊ အောင်သုခရပ်ကွက်နေ ပျူစောထီး ၁ ဦးပစ်ခတ်ခံရပြီး သေဆုံးခဲ့တယ်လို့ မတ်လ ၂၇ ရက်မှာ သာယာဝတီခရိုင် တပ်ရင်း ၂၊ တပ်ခွဲ ၅ က သတင်းထုတ်ပြန်ပါတယ်။

ပစ်သတ်ခံရသူဟာ အသက် ၄၅ နှစ်အရွယ် မောင်ဆန်းဆိုသူဖြစ်ပြီး မတ်လ ၂၀ ရက်ည ၁၀ နာရီခွဲမှာ ဒေသခံကာကွယ်ရေးတပ်ဖွဲ့ဝင်တွေက ဝင်ရောက်ပစ်ခတ်ခဲ့တာလို့ ဆိုပါတယ်။

“ကျနော်တို့လည်းအိမ်ထဲအဝင် အသံကြားတာနဲ့(သူတို့က)ပြေးတာ။ သူနဲ့ ပျူခေါင်းဆောင်က အဲ့အိမ်မှာအတူရှိတာ။ တခြားသူတော့မတွေ့ဘူး။ သူတို့ပြေးတာမြင်တော့ နောက်ကလိုက်ဖမ်းရင်း တောစပ်နားမှာ ခေါင်းကိုပစ်ဖမ်းရင်း ကျည်ထိသေတာ”လို့ သာယာဝတီခရိုင် တပ်ရင်း ၂၊ တပ်ခွဲ ၅ သတင်းနဲ့ပြန်ကြားရေးတာဝန်ခံက ပြောပါတယ်။

ဒီပစ်ခတ်မှုအတွင်း မောင်ဆန်းကတော့ ဦးခေါင်းကျည်ထိဒဏ်ရာနဲ့ နေရာမှာပဲသေဆုံးပြီး ပျူစောထီးခေါင်းဆောင်ဆိုသူကတော့ ထွက်ပြေးလွတ်မြောက်သွားတယ်လို့ ဆိုပါတယ်။

ပစ်ခတ်ခဲ့တဲ့နေရာဟာ တိမ်မြုပ်ကျေးရွာအနီးရှိ ခမရ ၆ တပ်နဲ့နီးတာကြောင့် အမြန်ပစ်ခတ်ပြီး ပြန်လည်ဆုတ်ခွာလာရတယ်လို့ သိရပါတယ်။

ပျူစောထီးမောင်ဆန်းဟာ စစ်ကော်မရှင်တပ်ရဲ့အမာခံထောက်တိုင်ဖြစ်ပြီး ၂၀၂၂ ဇန်နဝါရီ ၁၆ ရက်ကလည်း CDM သူနာပြုဆရာမ မမေဇွန်မိုးကို ခမရ ၆ တပ်ရင်းက စစ်ကော်မရှင်တပ်ဖွဲ့ဝင်အချို့နဲ့အတူ အဓမ္မပြုသတ်ဖြတ်ရာမှာပါဝင်တဲ့အပြင် စစ်တပ်ဆီသတင်းပေးတိုင်ကြာဖမ်းဆီးခိုင်းတာနဲ့ ပေါ်တာဆွဲရာမှာလည်းပါဝင်တဲ့အတွက် ခုလိုပစ်ခတ်ခဲ့တာလို့ ဆိုပါတယ်။

မတ်လ ၂၅ ရက်ကလည်း သဲကုန်းမြို့နယ်၊ ညောင်ဝင်းကျေးရွာအုပ်ချုပ်ရေးမှူး ဇော်မင်း ခ ကုလား နေအိမ်မှာ ပစ်သတ်ခံရလို့သေဆုံးခဲ့သေးတယ်လို့ သိရပါတယ်။

စာတည်း – လင်း

ရွှေတောင်၊ မတ် ၁၆၊ ၂၀၂၆ ။

ပဲခူးတိုင်းအနောက်ခြမ်း၊ ရွှေတောင်မြို့၊ ကျောင်းကြီးကွက်သစ်ရပ်ကွက်မှာနေထိုင်သူ အမျိုးသား ၁ ဦးကို စစ်ကော်မရှင်တပ်လက်အောက် ပြည်သူ့စစ်(ပျူစောထီး)တပ်ဖွဲ့တွေ ဖမ်းဆီးသွားပြီးနောက် ၂ ရက်အကြာမှာ သေဆုံးသွားခဲ့တယ်လို့ သေဆုံးသူရဲ့မိသားစုနဲ့နီးစပ်သူတွေထံက သိရပါတယ်။

သေဆုံးသွားသူဟာ အသက် ၃၅ နှစ်အရွယ် ကိုအောင်ကြီးဆိုသူဖြစ်ပြီး မတ်လ ၁၂ ရက် ည ၉ နာရီခန့်မှာ ပျူစောထီးအင်အား ၇ ဦးလောက်က ၎င်းရဲ့နေအိမ်ကိုရောက်ရှိလာပြီး မေးစရာရှိတယ်ဆိုကာ ဖမ်းဆီးသွားခဲ့တာလို့ ဆိုပါတယ်။

” ဖမ်းသွားပြီး ၂ရက်လောက်ကြာတော့ ရဲစခန်းက မိသားစုကိုအကြောင်းလာကြားတယ်။ အစာအိမ်သွေးကြောပေါက်ပြီးဆုံးသွားလို့ အလောင်းလာပြန်ယူဖို့။ မိသားစုက အလောင်းသွားယူတာတောင်ချက်ချင်းမရဘူး ညနေလောက်မှရတာ။ မနေ့ကမှ သင်္ဂြိုဟ်လိုက်ရတာ။”လို့ မိသားစုနဲ့နီးစပ်သူတဦးက မြေလတ်အသံကို ပြောပါတယ်။

ကိုအောင်ကြီး သေဆုံးပြီဖြစ်ကြောင်းကို ရွှေတောင်မြို့မရဲစခန်းက မတ်လ ၁၄ ရက်မှာ မိသားစုဝင်တွေဆီအကြောင်းကြားခဲ့တာဖြစ်ပြီး အစာအိမ်သွေးကြောပေါက်တာကြောင့် သေဆုံးတယ်လို့ ပြောဆိုပေမယ့် အလောင်းပြန်ရချိန်မှာ မျက်နှာနဲ့ခန္ဓာကိုယ်မှာ အညိုအမဲစွဲဒဏ်ရာ၊ ဖူးယောင်ဒဏ်ရာတွေ တွေ့ရှိရတယ်လို့ ဆိုပါတယ်။

သေဆုံးသူဟာ ကျပန်းအလုပ်လုပ်ကိုင်သူဖြစ်ကာ ဖမ်းဆီးမခံရခင်အချိန်အထိ ကျန်းမာရေးကောင်းမွန်သူဖြစ်ပြီး ရောဂါအခံကြီးကြီးမားမားရှိထားသူမဟုတ်ဘူးလို့ မိသားစုနဲ့နီးစပ်သူတွေထံက သိရပါတယ်။

ပြည်၊ ဖေဖော်ဝါရီ ၁၆၊ ၂၀၂၆။

ပဲခူးတိုင်း၊ ပြည်မြို့နယ်၊ ပတ္တမြားတောင်ရွာအပြင် ကြက်ဝိုင်းမှာ ပျူစောထီး ၁ ဦးကိုပစ်ခတ်ရာ သေဆုံးခဲ့တယ်လို့ ပြည်ခရိုင်တပ်ရင်း ၂ က ဖေဖော်ဝါရီ ၁၆ ရက် ဒီကနေ့မှာ သတင်းထုတ်ပြန်ပါတယ်။

ပစ်သတ်ခံရသူဟာ ဆီဆုံကုန်းကျေးရွာနေ အသက် ၅၀ ကျော်အရွယ် ငထွန်းဆိုသူဖြစ်ပြီး ဖေဖော်ဝါရီ ၁၁ ရက် နေ့လယ် ၁ နာရီခန့်မှာ ကျေးရွာကြက်ဝိုင်းမှာရှိနေချိန် ဝင်ရောက်ပစ်ခတ်ရာ သေဆုံးခဲ့တာဖြစ်ပြီး သူ့ကိုပစ်ခတ်စဉ် ပြည်သူ ၁ ဦးကိုလည်းထိမှန်ပြီးဒဏ်ရာရခဲ့တယ်လို့ ဆိုပါတယ်။

“ကြက်ဝိုင်းမှာ သူ့ကိုပစ်တာ။ ပြည်သူထိတယ်ဆိုတာက ငထွန်းကိုပစ်ခတ်ပြီးတော့ ငထွန်းခေါင်းကနေ ပေါက်ထွက်သွားတဲ့ကျည်က သွားထိတာ။ အဲဒါကလည်း အဲ့နေ့က ရွာမှာမင်္ဂလာဆောင်ပြုလုပ်နေသူရဲ့ အဖေလို့သိရတယ်။ သူကလည်း ကြက်ဝိုင်းကိုလာပြီး ကြည့်ရှုနေတာ”လို့ ပြည်ခရိုင်အမှတ် ၂ တပ်ရင်း သတင်းနှင့်ပြန်ကြားရေးတာဝန်ခံ Red star က ပြောပါတယ်။

ပစ်ခတ်မှုကြောင့် ပျူစောထီးငထွန်းမှာ ဦးခေါင်းကျည်ထိဒဏ်ရာနဲ့ နေရာမှာတင်သေဆုံးခဲ့ပြီး ပတ္တမြားတောင်ရွာသား အသက် ၅၀ အရွယ် အမျိုးသားမှာ ကျောကုန်းမှာဒဏ်ရာရာခဲ့တယ်လို့ ဆိုပါတယ်။

ပျူစောထီးငထွန်းဟာ ဝက်ထီးကန်နယ်မြေရဲစခန်းက ရဲ၊ စစ်ကော်မရှင်တပ်သားတွေနဲ့ပူးပေါင်းကာ ပေါ်တာဆွဲတာ၊ ဖမ်းမိသူတွေကို ပြန်ထုတ်ပေးမယ်ဆိုပြီး မိသားစုတွေဆီကငွေတောင်းတာ၊ တော်လှန်ရေးအဖွဲ့တွေရဲ့ သတင်းတွေကို စစ်ကော်မရှင်ဆီ သတင်းပေးတာတွေကြောင့် ခုလိုပစ်ခတ်ခဲ့တာလို့ ပြည်ခရိုင်အမှတ် ၂ တပ်ရင်း သတင်းနှင့်ပြန်ကြားရေးတာဝန်ခံ Red star ကပြောပါတယ်။

ဖေဖော်ဝါရီ ၆ ရက်ကလည်း တောင်ငူမြို့နယ်၊ နေပူကုန်းကျေးရွာက စစ်ကော်မရှင်ခန့် အုပ်ချုပ်ရေးမှူး ဦးစိန်မြင့်ဆိုသူနေအိမ်မှာ ပစ်သတ်ခံရပြီး သေဆုံးခဲ့ပါသေးတယ်။

စာတည်း – လင်း