ပဲခူး

သာယာဝတီ၊ မတ် ၃၊ ၂၀၂၃။

ပဲခူးတိုင်းဒေသကြီး၊ သာယာသတီခရိုင်၊ သာယာဝတီမြို့နယ်အတွင်းက လုပ်ငန်းရှင်သူဌေးတွေပိုင်ဆိုင်တဲ့ ကားတွေကို စစ်ကောင်စီက စတင်ချောဆွဲယူနေတယ်လို့ သိရပါတယ်။

မတ်လ ၃ ရက်နေ့က စတင်ပြီး ပဲခူးရိုးမအတွင်း PDF တွေရှိနေတဲ့နေရာတွေကို စစ်ကြောင်းထိုးတဲ့နေရာမှာ အသုံးပြုဖို့ သာယာဝတီခရိုင် စီမံကောင်စီဥက္ကဌ အမိန်နဲ့ မြို့နယ် စီမံကောင်စီဥက္ကဌတွေက ချောဆွဲနေတာဖြစ်တယ်လို့ သာယာဝတီ ဂဠုန်တပ်ဖွဲ့တာဝန်ရှိသူကပြောပါတယ်။

“စကစ စစ်ဆင်ရေးမှာ သုံးနေတဲ့ ကားတွေက အစုတ်အပြတ်တွေဆိုတော့ ပြီးခဲ့တဲ့ ရက်ကပဲ ရိုးမအတက်မှာ ကားမှောက်သေထားတာဆိုတော့ ကားကောင်းတဲ့ အရပ်သားကားတွေကို အသုံးပြူဖို့အတွက် ချောဆွဲနေတာဖြစ်တယ်။ သိရတဲ့သတင်းအရတော့ သာယာဝတီခရိုင်တခုလုံးက ကားတွေကို ချောဆွဲမယ်လို့ သိရတယ်” လို့ ပြောပါတယ်။

စစ်ကောင်စီတ​ပ်တွေက အရပ်သားကားနဲ့လာချိန် PDF တွေက ပစ်ခတ်ပါက PDF တွေက အရပ်သားကားတွေကို ပစ်မှတ်ထားတိုက်ခိုက်တယ်ဆိုပြီး သတင်းမှား​ဖြန့်ရန် လုပ်ဆောင်နေတယ်လို့လည်း ဆိုပါတယ်။

“ပြည်သူတွေကို သတိပေးချင်တာက စကစ ကားတွေနဲ့ နီးကပ်စွာ မလိုက်ဖို့။ သူတို့ကားတွေနဲ့ မလိုက်လာဖို့။ သူတို့ရဲ့လှုပ်ရှားမှုတွေကို မပြတ်စုံစမ်းနေတာဖြစ်လို့ စကစနဲ့အတူ လိုက်ပါလာမယ်ဆိုရင် စကစ ဘက်တော်သားလို့ ယူဆပြီး စစ်ရေးအရ တိုက်ခိုက်ရမှာပဲ” လို့ ပြောပါတယ်။

ယနေ့ မတ်လ ၃ ရက်နေ့မှာပဲ သာယာဝတီမြို့နယ် စီမံကောင်စီအမိန့်နဲ့ သာယာဝတီမြို့နယ်ထဲက သူဌေးလု​ပ်ငန်းရှင်တွေ သုံးတဲ့ Extra Cab၊ Double Cap၊ 4Wheel ကား ၁၀ စီးခန့်ကို ချောဆွဲထားတယ်လို့ ဆိုပါတယ်။

မတ်လ ၂ ရက်နေ့ မနက် ၄ နာရီကျော်ခန့်က မင်းလှမြို့နယ်၊ စိန်ကန့်လန့်ကျေးရွာနဲ့ မြို့ချောင်းကျေးရွာကြား ခါချဥ်တောင်လမ်းမှာ PDF တွေကို စစ်ကြောင်းထိုးဖို့လာတဲ့ စစ်ကောင်စီကား မှောက်လို့ ၅ ဦး သေဆုံးပြီး ဒဏ်ရာရသူတွေလည်းရှိတယ်လို့ သိရပါတယ်။

စာတည်း – 007

မင်းလှ၊ မတ် ၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်အတွင်းက ပဲခူးရိုးမပေါ်ကို စစ်ကြောင်းထိုးဖို့ စစ်ကား ၁၀ စီးကျော်နဲ့ အင်အားအများအပြား တင်ဆောင်ပြီး မတ်လ ၃ ရက် ဒီကနေ့မနက်ပိုင်းမှာ ထပ်တက်သွားတယ်လို့ သိရပါတယ်။

ပဲခူးရိုးပေါ်က PDF တွေ ခိုအောင်းနိုင်တဲ့နေရာတွေကို စစ်ကြောင်းထိုးဖို့ သွားရောက်တာ ဖြစ်ပြီး မတ်လ ၂ ရက် မနေ့က မနက်အစောပိုင်းကလည်း စစ်ကား ၃ စီးနဲ့ သွားရောက်တာမှာ ပဲခူးရိုး၊ ခါချဉ်တောင်အတက်မှာ ကားမှောက်ခဲ့လို့ ဗိုလ်မှူးအဆင့်အပါအဝင် စစ်သား ၅ ဦးကျော် သေဆုံး၊ ဒဏ်ရာရခဲ့တာကြောင့် နောက်ကြောင်းပြန်ဆုတ်လာခဲ့ရပါတယ်။

“မနေ့က ကားမှောက်လို့သေတဲ့ စကစ ဗိုလ်မှူးက ဒီမင်းလှ၊ သရက်တပင်တာဆုံမှာ KTV မယ်တွေနဲ့ အတူနေပျော်ပါးပြီး မနက် ၄ နာရီလောက်ကြီး ထသွားတာ။ ကားပေါ်မှာလည်း ဘီယာ၊ အရက်တွေအကုန် တင်သွားတာ။ အဲ့ဒီပဲခူးရိုးက ကရင်မောင်နှမဆိုတာ ရှိတယ်။ နတ်ကြီးတယ်။ အမှားမခံဘူး။ အဲ့ဒီနေရာက အရင်ကတည်းက ကားခဏခဏမှောက်လို့ အသေအပျောက် များတဲ့နေရာ။ ဒီနေ့မနက်လည်း ထပ်တက်သွားပြန်ပြီ” လို့ မင်းလှမြို့ခံ တဦးက မြေလတ်အသံကို ပြောပါတယ်။

စစ်ကောင်စီတပ်တွေ ပဲခူးရိုးပေါ်တက်ရောက် စစ်ကြောင်းထိုးဖို့ ရောက်ရှိနေလို့ ဒေသခံပြည်သူတွေအနေနဲ့ ရိုးမအတွင်းကို သတိထားသွားလာကြဖို့ သာယာ၀တီခရိုင် PDF တာဝန်ရှိသူတဦးက ပြောပါတယ်။

“ဒီမနက် ထပ်တက်လာတယ်ဆိုတာ ကျနော်တို့လည်း သတင်းရထားတယ်။ လောလောဆယ် ရိုးပေါ်ကို ရှေ့ပြေးအနေနဲ့ စစ်ကား ၄ စီး‌ ရောက်နေတာ တွေ့တယ်။ ကျန်တဲ့ကားတွေတော့ ဘယ်မှာထားခဲ့ပြီး စောင့်နေလည်း မသိဘူး။” လို့ သူက ပြောပါတယ်။

ပဲခူးရိုးပေါ်ကို စစ်ကြောင်းထိုးနေတဲ့ စစ်ကောင်စီတပ်တွေဟာ ပဲခူးအနောက်ခြမ်းကို အခြေပြုထားတဲ့ တပ်မ ၆၆ လက်အောက်ခံတပ်ရင်းတွေရဲ့ နောက်ချန်အင်အားတွေကို စုဖွဲ့ထားတာဖြစ်ပြီး မင်းလှမြို့နယ် စိန်ကန့်လန့်ရွာအခြေစိုက် ခလရ ၁ မှာ စစ်အင်အား ၂၀၀ ကျော် စုဖွဲ့အင်အား ဖြည့်တင်းထားတယ်လို့ သိရပါတယ်။

ပေါင်းတည်၊ မတ် ၃၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့တနေရာမှာ မတ်လ ၃ ရက် ဒီနေ့မနက်အစောပိုင်းကမြို့ခံ ၇/လူငယ်တွေက ဆန္ဒပြခဲ့ကြတယ်လို့ သိရပါတယ်။

ပြီးခဲ့တဲ့ ၂၀၂၁ ခုနှစ် မတ်လ ၃ ရက်က မုံရွာမြို့ ဘုရားနီလမ်းမှာ ကျဆုံးခဲ့တဲ့ ကဗျာဆရာကေဇဝင်း ၂ နှစ်ပြည့် အထိမ်းအမှတ်အနေနဲ့ သူရေးသားခဲ့တဲ့ “ခင်ဗျားတို့နဲ့ ကျနော်ကွဲလွဲခဲ့လည်း ခင်ဗျားတို့အတွက် ကျနော် အသက်ပေးမှာပါပဲ” စာတန်းကိုကိုင်ကာ ဆန္ဒပြကြတာလို့ သိရပါတယ်။

စစ်ကောင်စီရဲ့ယုတ်မာကောက်ကျစ်မှုကြောင့် ကျဆုံးခဲ့သူတွေ ထောင်တွင်းအကျဉ်းချခံထားရသူတွေနဲ့ အိုးအိမ်စွန့်ခွါ ထွက်ခွါသွားရသူတွေအပါ CDM နိုင်ငံ့သူရဲကောင်းဝန်ထမ်းတွေအတွက် ရရာနည်းနဲ့ တော်လှန်ရေးမှာ ဆက်လက်ပါဝင်ကြဖို့နဲ့ မြို့ပေါ်ပြောက်ကျားလူထုသပိတ် လှုပ်ရှားမှုတွေမှာလည်း ပူးပေါင်းပေးကြဖို့ တော်လှန်ရဲဘော် ၇/တွေရဲ့ ထုတ်ပြန်ချက်မှာ ပြည်သူတွေကို တိုက်တွန်းထားပါသေးတယ်။

စာတည်း – 007

ပဲခူး၊ မတ် ၃၊ ၂၀၂၃။

ယခုနှစ် မတ်ပဲစျေးနှုန်းဟာ ယခင်နှစ်များထက် စျေးပိုကောင်းပေမယ့် စိုက်ပျိုးကုန်ကျစရိတ် မြင့်တက်နေပြီး မတ်ပဲစိုက် တောင်သူများအနေနဲ့ တွက်ခြေမကိုက်ဘူးလို့ ပဲခူးတိုင်းအတွင်းရှိ မတ်ပဲစိုက် တောင်သူများထံက သိရပါတယ်။

မျိုးပဲစျေးနှုန်းက ၇၅၀၀၀ ကျပ်ကနေ ၉၀၀၀၀ ကျပ်ဝန်းကျင် ရှိပြီး၊ မြေပြင်ရာမှာ ထွန်စက်နဲ့ထယ်ထိုး၊ ထွန်မွှေစားရိတ် ၆၀၀၀၀ ကျပ်ကနေ ၈၀၀၀၀ ကျပ်၊ ဆေးဖြန်းလုပ်သားခအနေနဲ့ တရက်ကို ၈၀၀၀ ကျပ်ကနေ ၁၀၀၀၀ ကျပ်၊ ပဲနှုတ်ခအနေနဲ့ တဧကကို ၅၀၀၀၀ ကျပ်ခန့်၊ ပဲခြွေခအတွက် တတင်းကို ၂၀၀၀ ကျပ် နှုန်းနဲ့ ကုန်ကျစရိတ် ရှိနေတယ်လို့ ဆိုပါတယ်။

“ဒီနှစ် ရာသီဥတု မဆိုးဘူး၊ မျိုးပဲစျေးကလည်း မျိုးအလိုက် စျေးကွာတယ်။ ဒီဘက်နယ်တွေက စာပါးစပ်၊ ပဲကန်ဇွန်း၊ ပဲချဥ်ပေါင်၊ မျိုးတွေ နီးစပ်ရာ ဝယ်ကြဲကျတယ်။ ပဲစျေးကတော့ ခြောက်သိန်းဝန်းကျင်လောက် ရှိတယ်။ ကိုယ်ရောင်းတဲ့ပဲကလည်း သန့်ရမှာပေါ့။ တဧကို ဆယ်လေးငါးတင်းမှ ပဲမထွက်ရင် တောင်သူ အရှုံးပေါ်တာပဲ။ ကုန်ကျစရိတ်တွေကလည်း အကျဘက်မှာ တခုမှမရှိသလောက်ပါပဲ။ ရှုံးလည်း ဒီလုပ်ငန်းပဲရှိတော့ ဒီအလုပ်ပဲ လုပ်နေရတာ” လို့ နတ်တလင်းခရိုင်မှာ နေထိုင်တဲ့ တောင်သူက ပြောပါတယ်။

ငွေကြေးမလုံလောက်လို့ အတိုးနဲ့ချေးငှါးနေရပြီး ပဲအထွက်နှုန်း မကောင်းပါက စိုက်ဧကများတဲ့ တောင်သူကြီးများအနေနဲ့လည်း အရှုံးပေါ်ကြောင်း၊ ပြည်ခရိုင်အတွင်းရှိ တောင်သူများထံက သိရပါတယ်။

စိုက်ပျိုးထားတဲ့ မတ်ပဲခင်းတွေကို တပတ်မှာတကြိမ် စိုက်ပျိုးရေးဆေးများ ဝယ်ယူ ဖြန်းရပြီး၊ ပိုးမွှားရောဂါအပေါ် မူတည်ကာ ဆေးများ နှစ်မျိုး သုံးမျိုးရောစပ် ပက်ဖြန်းနေရကာ ပေါင်းသတ်ဆေး၊ ရွက်ဖြန်းအားဆေး၊ ပိုးသတ်ဆေး၊ မှိုရောဂါသတ်ဆေးများ ဝယ်ယူတဲ့အခါမှာလည်း ကုမ္ပဏီအလိုက် စျေးနှုန်းများက ယခင်နှစ်ထက် စျေးနှုန်းကြီးမြင့်နေကြောင်း၊ တောင်သူကြီး တချို့ထံက သိရပါတယ်။

ယခင်နှစ် မတ်ပဲ ထွန်ယက်စိုက်ပျိုး ရိတ်သိမ်းခြွေလှေ့ရာမှာ တဧကကုန်ကျစရိတ် စုစုပေါင်း ၂၇၀၀၀၀ ကျပ်ခန့် ကုန်ကျပြီး၊ ယခုနှစ်မှာဆိုရင် ၃၆၀၀၀၀ ကျပ်လောက်အထိ ကုန်ကျနိုင်ကြောင်း၊ ဒေသအလိုက် စျေးနှုန်းများ ကွာခြားနိုင်တယ်လို့ သိရပါတယ်။

စာတည်း – 007

မင်းလှ၊ မတ် ၂၊ ၂၀၂၃။

ပဲခူးတိုင်းဒေသကြီး၊ မင်းလှမြို့နယ်၊ စိန်ကန့်လန့်ကျေးရွာနဲ့ မြို့ချောင်းကျေးရွာကြားမှာ PDF တွေကို စစ်ကြောင်းထိုးဖို့လာတဲ့ စစ်ကောင်စီကား မှောက်လို့ ဗိုလ်မှူးအပါ ၅ ဦး သေဆုံးပြီး ဒဏ်ရာရသူတွေလည်း ရှိတယ်လို့ သိရပါတယ်။

ယနေ့မနက် ၄ နာရီခန့်မှာ မင်းလှဘက်ကနေ ကား ၃ စီး အင်အား ၆၀ ကျော်ပါတဲ့ စစ်ကြောင်းဟာ ပဲခူးရိုးမထဲကို လာချိန် ခါချဥ်တောင်လမ်း ရေတွင်းကုန်းအဆင်းအရောက်မှာ စစ်ကားတစ်စီးဟာ လမ်းဘေးချောက်ထဲကို အရှိန်လွန်ပြီး ထိုးကျတိမ်းမှောက်သွားတယ်လို့ သာယာဝတီဂဠုန်တပ်ဖွဲ့ စစ်ရေးတာဝန်ခံ ကိုတံခွန်က ပြောပါတယ်။

“ခုလာတဲ့ အဖွဲ့တွေက မင်းလှက ခလရ ၁၊ သာယာဝတီ ခလရ ၃၅၊ အုတ်ဖိုက ခလရ ၆ က အဖွဲ့တွေ။ သူတို့ တပ်ရင်း ၃ ရင်းပေါင်းပြီး ပဲခူးရိုးမကို PDF တွေ ရှိတဲ့နေရာကို စစ်ကြောင်းထိုးဖို့ တက်လာတာ။ တောင်တွေပေါ် ပတ်တက်နေချိန် သူတို့ဟာ သူတို့မှောက်တာ။ ထိခိုက်သေဆုံးတာတွေ များတယ်” လို့ ပြောပါတယ်။

စစ်ကောင်စီကားမှောက်လို့ ၅ ဦး သေဆုံးပြီး အများအပြား ဒဏ်ရာရသွားတယ်လို့ ဆိုပါတယ်။

ကားမှောက်တဲ့နေရာမှာ စစ်ကောင်စီကား ၂ စီး ရှိနေပြီး သေဆုံးအလောင်းတွေနဲ့ ဒဏ်ရာရသူတွေကို သယ်ယူတာတွေ လုပ်ခဲ့လို့ လမ်းပိတ်ထားတာတွေလည်း ရှိနေတယ်လို့ သိရပါတယ်။

စစ်ကောင်စီတပ်ဟာ ပဲခူးရိုးမထဲကို စစ်ကြောင်းထိုးဖို့ စိန်ကန့်လန့်ရွာထဲက စစ်ကောင်စီတပ်ထဲမှာ အင်အား ၂၀၀ ကျော် ရှိနေပြီး အင်အားဖြည့်နေကြတယ်လို့ သိရပါတယ်။

လက်ရှိမှာ သေဆုံးသူ ဗိုလ်မှူးလောင်းနဲ့ ပြင်းထန်ဒဏ်ရာရသူ စစ်သား၂ ဦးကို ကုတင် ၁၀၀ စစ်ဆေးရုံကို ပို့ဆောင်ထားတယ်လို့ သိရပါတယ်။

စာတည်း – 007

ပဲခူး၊ မတ် ၁၊ ၂၀၂၃။

ပဲခူးမြို့၊ ရွှေမော်ဓော်ဘုရား တောင်ဘက်မုဒ် သနပ်ပင်လမ်းမကြီးဘေးမှာ စစ်ကောင်စီလက်အောက်ခံ တပ်ဖွဲ့ဝင်တွေဟာ အခုရက်ပိုင်း လိုင်စင်မဲ့ကား၊ ဆိုင်ကယ်တွေကို ဖမ်းဆီးပြီး ငွေကြေးတောင်းခံမှုတွေ ပိုမိုပြုလုပ်လာတယ်လို့ မြို့ခံတဦးဆီက သိရပါတယ်။

ရဲ၊ ယာဥ်ထိန်းရဲနဲ့ စစ်ကောင်စီတပ်ဖွဲ့တွေ ပေါင်းပြီး အင်အား ၂၀ နီးပါးနဲ့ ပဲခူးမြို့ပေါ်က ရွှေမော်ဓောဘုရား တောင်ဘက်မုဒ်မှာ ညနေ ၄ နာရီခွဲကနေ ၅ နာရီခွဲထိ ဖမ်းဆီးစစ်ဆေးမှုတွေ ပြုလုပ်လာတာ ၁ လနီးပါးရှိပြီ ဖြစ်တယ်လို့ ဆိုပါတယ်။

ဒါ့အပြင် ဖမ်းဆီးသူတွေထဲမှာ စစ်ကောင်စီအဖွဲ့တွေနဲ့အတူ ဆိုင်ကယ် ကယ်ရီသမား တချို့ကလည်း ပါဝင်ကူညီပေးတယ်လို့ ဖမ်းဆီးခံခဲ့ရသူတဦးက ပြောပါတယ်။

“မနေ့က အဖမ်းခံလိုက်ရတဲ့ ဆိုင်ကယ်တွေ စုစုပေါင်း ၂၅ စီးလောက် ရှိမယ်။ ဆန်အိတ်တင်ကား ၂ စီးလည်း အဖမ်းခံရတယ်။ ဖမ်းမိရင် ဆိုင်ကယ်နံပါတ်၊ လိပ်စာတွေ ပြောရမယ်။ အဖေနာမည်တွေ ပြောရတယ်။ ပြောပြီးရင် သူတို့က ချလန်ဖြတ်ပေးတယ်။ စာရင်းစာအုပ်မှာ လက်မှတ်ထိုးရတယ်။ ကျနော်တောင် အဲ့နေ့က တသောင်းပေးလိုက်ရတယ်” လို့ ဆိုပါတယ်။

ဖမ်းဆီးရမိထားတဲ့ ကား၊ ဆိုင်ကယ်တွေကို အနည်းဆုံး ငွေကျပ် တသောင်းကနေ ငွေကျပ် ၅ သိန်းအထိ တောင်းခံလေ့ရှိတယ်လို့လည်း အထက်ပါမြို့ခံက ပြောပါတယ်။

“ပိုက်ဆံက သူတို့ပါးစပ်ဖျားကနေ တောင်းသလောက် ပေးရတယ်။ ဖမ်းဆီးထားတဲ့ ဆိုင်ကယ်တွေ၊ ကားတွေဆို ဖမ်းမိတဲ့နေ့မှာပဲ အပြီးရွေးရတယ်။ နောက်ရက်တွေဆို သိပ့်မသေချာတော့ဘူး” လို့ ဆိုပါတယ်။

ပြီးခဲ့တဲ့ ဖေဖော်ဝါရီလ ၂၄ ရက်ကလည်း ပဲခူးမြို့၊ ရွှေမော်ဓောဘုရား အနောက်ဘက်မှာရှိတဲ့ သီရိဟံသာခန်းမဘေးကို ဖမ်းဆီးထိန်းသိမ်းထားတဲ့ မော်တော်ဆိုင်ကယ် ၁၀ စီးနီးပါးသယ်ဆောင်သွားပြီး အခုချိန်ထိ ပြန်လည်မရရှိသေးဘူးလို့ သိရပါတယ်။

စာတည်း – လင်း

သာယာ၀တီ၊ ဖေဖော်ဝါရီ ၂‌၇၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ နတ်တလင်းမြို့နယ်၊ ညောင်လေးပင်ရွာဟောင်းက ဒေသခံတွေကို စစ်ကောင်စီတပ်က ဖမ်းဆီးသွားတယ်လို့ နတ်စစ်သည်အဖွဲ့ခေါင်းဆောင် ကိုအောင်က ပြောပါတယ်။

ဖမ်းဆီးခံရသူတွေဟာ ပဲခူးရိုးမအစပ်၊ တောင်ညိုဆည်အထက်ပိုင်းမှာရှိတဲ့ အဲ့ဒီရွာဟောင်းက ကိုတင်အောင်၊ ကိုဝင်းနိုင်စိုး၊ ကိုလှမိုး၊ ကိုဇော်ထိုက်နဲ့ ကိုကျော်မျိုးအောင် စတဲ့သူတွေအပြင် အမျိုးသမီးတချို့နဲ့ ကလေးငယ်တွေအပါ ၁၄ ဦး ဖြစ်ပြီး ဖေဖော်ဝါရီလ ၂၀ ရက်ဝန်းကျင်မှာ အင်အား ၁၀၀ လောက်ပါတဲ့ စစ်ကောင်စီစစ်ကြောင်းက ဝင်ရောက်ဖမ်းဆီးခဲ့ကာ သူတို့ကို တောင်ညိုဆည်မှာ စစ်ဆေးမှုတွေ ပြုလုပ်နေတယ်လို့ ဆိုပါတယ်။

“တောင်ယာလုပ်ပြီး ယာခုတ်စားနေတဲ့ အစုလေးကို ဖမ်းသွားတာပါ။ ကျနော်တို့သွားကြည့်တော့မှ အဲ့နေရာမှာ လူမရှိတော့ဘူး။ ဘာအဆက်အသွယ်မှ မရဘူး။ လူတွေမရှိတော့ဘူးဆိုတာ သိရလို့ စုံစမ်းမှ ပဲခူးရိုးမထဲက စစ်ကြောင်းနဲ့ တောင်ညိုဆည်မှာ တပ်စွဲနေတဲ့ စစ်ကြောင်းက ဖမ်းသွားတာပါ” လို့ နတ်တလင်း PDF နတ်စစ်သည်အဖွဲ့ခေါင်းဆောင် ဗိုလ်အောင်က မြေလတ်အသံကို ပြောပါတယ်။

ဖမ်းဆီးခံရသူတွေဟာ ဖမ်းဆီးခံရပြီး တပတ်ကျော်အကြာ ဒီကနေ့အထိ အဆက်အသွယ် ပြတ်တောက်နေတယ်လို့လည်း သူက ဆက်ပြောပါတယ်။

ဖမ်းဆီးခံရသူတွေဟာ ပဲခူးရိုးမအစပ်မှာ တောင်ယာ လုပ်ကိုင်နေကြတဲ့သူတွေ ဖြစ်ပြီး သူတို့နေထိုင်တဲ့ ဝါးတဲတွေအတွင်း ဆန်အပါအဝင် စားသောက်ကုန်တွေကို စစ်ကောင်စီတပ်သားတွေက ဖျက်ဆီးခဲ့ကြသလို လူနေတဲတွေအနီးမှာလည်း စစ်ကောင်စီတပ်ဘက်က နင်းမိုင်းတွေ ထောင်ထားတယ်လို့ ပြောပါတယ်။

အဲဒီစစ်ကြောင်းဟာ ပေါက်ခေါင်းဘက်က လာတာဖြစ်ပြီး နတ်တလင်း တောင်ညိုဆည်က စစ်သားတွေနဲ့ ပေါင်းကာ လက်ရှိမှာ တောင်ညိုဆည်ဘောင်မှာ တပ်စွဲထားတယ်လို့ ဆိုပါတယ်။

တောင်ညိုဆည်အထက်က ဒေသခံတွေဟာ ဆည်အတွင်း သွားလာစဥ် စစ်ကောင်စီတပ်ဂိတ်မှာ မှတ်ပုံတင်နဲ့ ဝယ်ယူလာတဲ့ စားသောက်ကုန်တွေကို စစ်ဆေးတာတွေလည်း ပြုလုပ်လေ့ရှိတယ်လို့လည်း ဒေသခံတဦးဆီက သိရပါတယ်။

ပြီးခဲ့တဲ့ ဖေဖော်ဝါရီလ ၁၀ ရက်ကတော့ စစ်ကောင်စီတပ် တောင်ပိုင်းတိုင်း စစ်ဌာနချုပ် (တပခ) တိုင်းမှူး ဗိုလ်ချုပ်ထိန်ဝင်း နတ်တလင်းကို လာရောက်ပြီး PDFတွေကို ထောက်ပံ့ရင်မြို့နာမယ်ဟုဆိုကာ နတ်တလင်းက လုပ်ငန်းရှင်တွေကို ကြိမ်းမောင်းခဲ့ပါသေးတယ်။