ကနီ၊ ဇွန် ၁၆၊ ၂၀၂၆။

စစ်ကိုင်းတိုင်း၊ ကနီမြို့နယ်က စတားလင့်ခ်အင်တာနက်ဆိုင်တွေအနေနဲ့ ဇွန်လဒုတိယပတ်ကစတင်ကာ ၁ နှစ်အတွက် အခွန်ငွေကျပ် ၁၀ သိန်း ပေးဆောင်ရမှာဖြစ်ပြီး အင်တာနက်သုံးစွဲခတွေလည်း တိုးမြှင့်ကောက်ခံရမှုတွေကြောင့် အသုံးပြုသူနည်းပါးလာတယ်လို့ စတားလင့်ခ်ဆိုင်ပိုင်ရှင်တချို့ဆီက သိရပါတယ်။

ကနီမြို့နယ်ပြည်သူ့အုပ်ချုပ်ရေးအဖွဲ့(ပအဖ)ညွှန်ကြားချက်အရ မြို့နယ်အတွင်းစတားလင့်ခ်ဆိုင်တွေအနေနဲ့ စတားလင့်ခ်စက်တလုံးအတွက် ၆ လစာ အခွန်ငွေကျပ် ၅ သိန်းပေးဆောင်ကာ စက်မှတ်ပုံတင်ရမှာဖြစ်ပြီး အဲ့ဒီပေးဆောင်မှုမှာ လက်ခွဲစက်(စတားလင့်ခ်ပွိုင့်) ၂ ခုသာ အကျုံးဝင်မယ်လို့ ဆိုပါတယ်။

“စတားလင့်ခ်စျေးတွေ တက်တယ်၊ အရင်ကသုံးတဲ့လူတွေလည်း သိပ်မသုံးနိုင်ကြတော့ဘူး၊ ဆိုင်တွေမှာ လူပါးလာတယ်၊ ဆိုင်ပိုင်ရှင်တွေဖက်ကလည်း စတားလင့်ခ်ဘေလ်ဆောင်တာအပြင် ဆက်သွယ်ရေးဝန်ကြီးဌာနကိုလည်း ၆ လ ၅ သိန်း အခွန်ဆောင်ရတယ်” လို့ ကနီမြို့နယ်အတွင်း စတားလင့်ခ်အင်တာနက်ဆိုင် ဖွင့်လှစ်ထားသူအမျိုးသားတဦးက မြေလတ်အသံကို ပြောပါတယ်။

လက်ခွဲစက်(စတားလင့်ခ်ပွိုင့်) ၂ ခုထက် ပိုမိုဖြန့်ခွဲထားပါက နောက်ထပ်စတားလင့်ခ်စက် တလုံးစာ အခွန်ငွေထပ်မံပေးဆောင်ရမယ်လို့ သတ်မှတ်ထားတာကြောင့် ဆိုင်ရှင်တွေအနေနဲ့ အခက်ကြုံနေရတာပါ။

ယခင်က ကနီမြို့နယ်အတွင်း စတားလင့်ခ်ဆိုင်တွေမှာ အသုံးပြုခ ၁ နာရီ ၅၀၀ ကျပ်၊ ၁ ရက် ၂,၀၀၀ ကျပ် ၊ ၁ လ ၂ သောင်းကျပ်သာ ကျသင့်တာဖြစ်ပြီး အခွန်ကောက်ခံပြီးနောက် စတားလင့်ခ်ဆိုင်တွေအနေနဲ့ အသုံးပြုခအနိမ့်ဆုံး ၁ နာရီ ၁၀၀၀ ကျပ်၊ ၁ ရက် ၅,၀၀၀ ကျပ်၊ ၁ လ ၅၀,၀၀၀ ကျပ် တိုးမြှင့်ကောက်ခံဖို့ မြို့နယ်ပအဖက သတ်မှတ်လိုက်တာပါ။

အခုလို စတားလင့်ခ်အသုံးပြုခတွေ တိုးမြှင့်ကောက်ခံလိုက်တာကြောင့် အင်တာနက်အသုံးပြုသူတွေ သိသိသာသာ လျော့နည်းလာတယ်လို့ သိရပါတယ်။

ဒါ့အပြင် စတားလင့်ခ်အထိုင်စက်ရဲ့အကောင့်ကို မြို့နယ်ပအဖလက်အောက် ဆက်သွယ်ရေးဌာနဆီ ပေးထားရပေမယ့် နည်းပညာအကူအညီပေးတာမျိုးလည်းမရှိဘူးလို့ ဆိုပါတယ်။

“ အကောင့်တွေ ပေးထားရပေမယ့် ဘေလ်ဆောင်တဲ့အခါတော့ ကိုယ်တိုင်ဆောင်ရတာ၊ အကောင့်တွေပေးထားရတော့ ကိုယ်ရေးကိုယ်တာတွေ ကျိုးပေါက်တာပေါ့။ နည်းပညာအကူအညီလည်း ဘာတခုမှမပေးဘူး၊ ကိုယ့်စက်ပျက်ရင် ကိုယ်ပြင်ပဲ” လို့ အထက်ပါဆိုင်ရှင်က ပြောပါတယ်။

မေ ၈ ရက်မှာ ကနီမြို့နယ်ပအဖက မြို့နယ်အတွင်းစတားလင့်ခ်စက်တွေ အသုံးပြုခွင့်စတင်ပိတ်လိုက်ပြီးနောက် ၁ လနီးပါးအကြာ ဇွန်လဒုတိယအပတ်မှာအခွန်ငွေကောက်ခံပြီး ပြန်လည်ဖွင့်လှစ်ဖို့ ခွင့်ပြုခဲ့တာလည်း ဖြစ်ပါတယ်။

ကနီမြို့နယ်အတွင်း စတားလင့်ခ်စက်တွေအပေါ် အခွန်ကောက်ခံပြီး ပြန်လည်ဖွင့်ခွင့်ပေးတဲ့အခြေအနေတွေနဲ့ပတ်သက်ပြီး မြို့နယ်ပြည်သူ့အုပ်ချုပ်ရေးအဖွဲ့ကို မြေလတ်အသံက ဆက်သွယ်မေးမြန်းခဲ့ပေမယ့် ဆက်သွယ်လို့မရသေးပါဘူး။

စစ်ကိုင်း၊ ဇွန် ၁၄၊ ၂၀၂၃။

စစ်ကိုင်းကိုင်း၊ မုံရွာမြို့နယ်၊ မုံရွာ-အမြင့်လမ်းဘေးရှိ ကျေးရွာတရွာမှာ ပြည်သူလူထုနဲ့တွေ့ ဆုံပြီး၊ တော်လှန်ရေးနဲ့ ပတ်သက်လို့ သိသင့်တာတွေကို ဟောပြောခဲ့တယ်လို့ မုံရွာ-အမြင့်လမ်းသပိတ် ဦးဆောင်ကော်မတီ(မုံရွာ) အဖွဲ့ထံက သိရပါတယ်။

မုံရွာ-အမြင့်လမ်းမှာ နယ်မြေမအေးချမ်းတဲ့အတွက် ကာကွယ်ရေးတပ်ဖွဲ့ဝင်တွေက လုံခြုံ ရေးယူပြီး၊ ဇွန်လ ၁၃ ရက်နေ့မှာ လူထုကိုဟောပြောခဲ့တယ်လို့ မုံရွာ-အမြင့်လမ်းသပိတ်ဦးဆောင်ကော်မတီဝင် ကိုကောက်ကောက် က မြေလတ်အသံကို ပြောပါတယ်။

“နယ်မြေမအေးချမ်းတော့ သပိတ်စစ်ကြောင်းတွေ မထွက်ဖြစ်လို့လုပ်တာပါ။ ပြည်သူတွေသိဖို့လိုတဲ့ လက်ရှိနိုင်ငံရေး၊ တော်လှန်ရေးနဲ့ ဖက်ဒရယ်ဒီမိုကရေစီ သဘောတရားတွေကို ပြောပြတာဖြစ်တယ်။ ပြည်သူတွေနားလည်ပါဝင်လာမှ တော်လှန်ရေးက ပိုအားကောင်းလာမှာပါ” လို့ ကိုကောက်ကောက် ကပြောပါတယ်။

အခုလို ပြည်သူလူထုနဲ့တွေ့ဆုံဟောပြောတာကို မတ်လ ၁၃ ရက်က စတင်ပြုလုပ်ခဲ့ရာ ၇ ပွဲမြောက်ဖြစ်ပြီး၊ မုံရွာမြို့နယ် ပအဖ၊ ပကဖ၊ ပလဖ တပ်ဖွဲ့တွေက ကူညီစောင့်ရှောက်ပေးခဲ့တယ်လို့ သိရပါတယ်။

စာတည်း – 007

စစ်ကိုင်း၊ မေ ၂၇၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်၊ နှောကန်ကျေးရွာက မီးဘေးသင့်ပြည်သူတွေဆီ အလှူရှင်ပြည်သူတွေကလှူဒါန်းထားတဲ့ပစ္စည်းတွေကို မေလ ၂၆ ရက်နေ့က သွားရောက်ပေးအပ်ခဲ့တယ်လို့ ပုလဲမြို့ပြည်သူ့အုပ်ချုပ်ရေးအဖွဲ့ထံကသိရပါတယ်။

မီးဘေးသင့်ပြည်သူတွေအတွက် သိန်း ၄၀ခန့်တန်ဖိုးရှိ ဆန် ၊ ဆီ ၊ အဝတ်အထည် ၊ ကျောင်းသုံးဗလာစာအုပ် ၊ တာပေါ်လင်မိုးကာစ စတဲ့ပစ္စည်းတွေလှူဒါန်းပေးခဲ့တာဖြစ်ပြီး အလှူရှင်တွေကိုယ်စား ပုလဲမြို့ နယ်ပအဖခေါင်းဆောင်နဲ့အဖွဲ့ဝင်များ၊ လူသားချင်းစာနာမှုကူညီရေးတာဝန်ခံတို့က သွားရောက်လှူဒါန်းပေးခဲ့တာလို့ ဆိုပါတယ်။

“ကျနော်က နှောကန်ရွာမီးရှို့ဒဏ်ခံခဲ့ရတဲ့ပြည်သူတယောက်ပါ။ ရွာကို စစ်**တွေလာပြီးတော့ တရွာလုံး နီးပါးပြာကျအောင်မီးရှို့သွားခဲ့တာ။ပုလဲမြို့နယ်ပအဖ၊ပကဖနဲ့အလှူရှင်တွေကဝိုင်းဝန်း ကူညီလှူဒါန်းပေး ထားလို့ လောလောဆယ်ကျနော်တို့စားဝတ်နေရေးအဆင်ပြေနေပါတယ်” လို့ မီးဘေးသင့်ရွာခံ အမျိုးသားတဦးကပြောပါတယ်။

နှောကန်ကျေးရွာမှာ အိမ်ထောင်စု ၁၃၆ စုရှိပြီး ဧပြီလ ၂ ရက်၊ နေ့လည်ပိုင်းမှာ စစ်ကောင်စီတပ်ဖွဲ့ဝင်တွေက မီးရှို့ဖျက်စီးခဲ့လို့ အိမ်ထောင်စု ၁၀၄ စု မီးဘေးသင့်ခဲ့ရတာဖြစ်ကာ ဧပြီလ ၂၄ ရက်နဲ့ မေလ ၁၂ ရက်နေ့တွေမှာလည်း ၂ ကြိမ်သွားရောက်လှူဒါန်းပေးထားတယ်လို့ သိရပါတယ်။

မေလ ၁၂ ရက်နေ့မှာဘဲ ပုလဲမြို့နယ်အတွင်း မီးဘေးသင့်တဲ့ရွာတွေဖြစ်တဲ့ မင်းတိုင်ပင် ၊ နှောရိုး ၊ ကိုင်းတွင်း ၊ တုံးကန် ၊နွယ်အင်း ကျေးရွာတွေအတွက် အမျိုးသားညီညွတ်ရေးအစိုးရ NUG လက်အောက်ခံ လူသားချင်းစာနာထောက်ထားခြင်းနဲ့ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာနတို့က တရွာကို ၄ သိန်းကျပ်နှုန်း ထောက်ပံ့ပေးခဲ့တယ်လို့သိရပါတယ်။

စာတည်း – ရင်ငြိမ်း

စစ်ကိုင်း၊ မေ ၂၃၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်ထဲက ကျေးရွာတချို့မှာ မိုခါမုန်းတိုင်းကြောင့်ပျက်စီးသွားတဲ့လမ်းတွေကို ပအဖ၊ ပကဖနဲ့ ကာကွယ်ရေးတပ်ဖွဲ့တွေအပြင် ဒေသခံတွေကစုပေါင်းပြီး ပြန်လည်ပြုပြင်နေကြပါတယ်။

မေလ ၂၁ ရက်နေ့က စတင်ပြီးပြုပြင်ရာမှာ ပအဖ၊ ပကဖနဲ့ ဒေသကာကွယ်ရေးအဖွဲ့တွေ၊ ဒေသတွင်းပြည်သူလူထုတွေရဲ့ မတည်ငွေနဲ့ပဲ ပြုပြင်နေတယ်လို့ ယင်းမာပင်မြို့နယ် ပြည်သူ့အုပ်ချုပ်ရေးအဖွဲ့ဝင်တဦးက ပြောပါတယ်။

“ယင်းမာပင်နယ်ထဲမှာပဲ မိုခါကြောင့်ပျက်စီးသွားတဲ့ တံတားတွေ၊ လမ်းတွေကို ပြင်ပေးဖြစ်တာပါ။ တံတားကိုလည်း မေ ၁၉ ရက်နေ့မှာ ပြင်လိုက်တယ်။ တော်လှန်ရေးကာလဖြစ်တော့ တံတားကို အပြီးစီးပြီးသွားတာမျိုးတော့မဟုတ်ပေမဲ့ ကြားထဲမှာ သွားလာဖို့အဆင်ပြေအောင် ကျနော်တို့နဲ့ဒေသခံတွေရဲ့ မတည်ငွေနဲ့ ပြန်လည်ပြုပြင်ခဲ့ကြတာပါ။ ဘယ်ပရဟိတအဖွဲ့တွေမှ လာရောက်ကူညီပေးတာမျိုးတော့မရှိပါဘူး ” လို့ ဆိုပါတယ်။

NUG အစိုးရအနေနဲ့လည်း မိုခါဆိုင်ကလုံးမုန်တိုင်းတုံ့ပြန်ရေးအတွက် အရေးပေါ်အခြေအနေစီမံခန့်ခွဲမှုဆိုင်ရာ ပေါင်းစပ်ညှိနှိုင်းရေးကော်မတီအဖွဲ့ကို ဖွဲ့စည်းထားပေမဲ့လည်း မိမိတို့ပြည်သူ့အုပ်ချုပ်ရေးအနေဖြင့် ထောက်ပံ့ကြေးငွေကြေးတွေကို မယူတော့ဘဲကိုယ်ထူကိုယ်ထစနစ်နဲ့ ပြန်လည်ပြုပြင်ခဲ့တယ်လို့လည်း ဆက်ပြောပါတယ်။

“ယင်းမာပင်နယ်ထဲမှာပဲ မိုခါကြောင့်ပျက်စီးသွားတဲ့ တံတားတွေ၊ လမ်းတွေကို ပြင်ပေးဖြစ်တာပါ။ တံတားကိုလည်း မေ ၁၉ ရက်နေ့မှာ ပြင်လိုက်တယ်။ တော်လှန်ရေးကာလဖြစ်တော့ တံတားကို အပြီးစီးပြီးသွားတာမျိုးတော့မဟုတ်ပေမဲ့ ကြားထဲမှာ သွားလာဖို့အဆင်ပြေအောင် ကျနော်တို့နဲ့ဒေသခံတွေရဲ့ မတည်ငွေနဲ့ ပြန်လည်ပြုပြင်ခဲ့ကြတာပါ။ ဘယ်ပရဟိတအဖွဲ့တွေမှ လာရောက်ကူညီပေးတာမျိုးတော့မရှိပါဘူး ” လို့ ဆိုပါတယ်။

NUG အစိုးရအနေနဲ့လည်း မိုခါဆိုင်ကလုံးမုန်တိုင်းတုံ့ပြန်ရေးအတွက် အရေးပေါ်အခြေအနေစီမံခန့်ခွဲမှုဆိုင်ရာ ပေါင်းစပ်ညှိနှိုင်းရေးကော်မတီအဖွဲ့ကို ဖွဲ့စည်းထားပေမဲ့လည်း မိမိတို့ပြည်သူ့အုပ်ချုပ်ရေးအနေဖြင့် ထောက်ပံ့ကြေးငွေကြေးတွေကို မယူတော့ဘဲကိုယ်ထူကိုယ်ထစနစ်နဲ့ ပြန်လည်ပြုပြင်ခဲ့တယ်လို့လည်း ဆက်ပြောပါတယ်။

“သဘာဝဘေးစီမံကနေပြီးတော့မှ အစည်းအဝေးတွေလည်းခေါ်ပါတယ်။ ခေါ်ပြီးတော့မှ ကိုယ့်မြို့နယ်အလိုက်ပျက်စီးဆုံးရှုံးမှုတွေကို တင်ပြခိုင်းတယ်။ တင်ပြခိုင်းပြီးတော့မှ ပြန်ပြီးပြုပြင်မယ်ဆိုရင် ဘယ်လောက်ကုန်ကျမလဲဆိုတာ ထပ်တင်ပြခိုင်းတယ်။ ကျနော်တို့မြို့နယ်တွေမှာက တိုက်ရိုက်မုန်တိုင်းဒဏ်ခံလိုက်ရတာတော့ မဟုတ်ဘူး။ ကျနော်တို့သည် မိုးများသွားတာရယ် ဆည်ရေကျိုးတာရယ်ကြောင့် ကျနော်တို့က ရေဘေးသင့်ပြည်သူဖြစ်သွားကြတာပါ။” လို့ ပအဖအဖွဲ့ဝင် ကဆိုပါတယ်။

အချို့တံတားတွေနဲ့ လမ်းတွေကိုတော့ မတည်ငွေ သိန်း ဆယ်ဂဏန်းခန့်နဲ့ ဒေသခံတွေထည့်ဝင်ငွေတွေစုပေါင်းပြီး ပြုပြင်နေတာဖြစ်ပြီး ပြုပြင်ရန်လမ်းတံတားတွေ ကျန်ရှိနေသေးတဲ့အတွက် ကုန်ကျမှုအသေးစိတ်ကို လတ်တလောပြောပြလို့ မရနိုင်သေးဘူးလို့ သူက ပြောပါတယ်။

ဆက်လက်ပြီး “နေရာတိုင်းမှာ NUG ကိုပဲ အားကိုးလို့မရဘူးလေ။ ကျနော်တို့ အစိုးရကလည်း ပြည်သူတွေရဲ့လှူဒါန်းပံ့ပိုးမှုတွေနဲ့ ရပ်တည်နေကြတာဆိုတော့ အဲဒါကြောင့် ကျနော်တို့ ပြန်လည်ပြုပြင်ဖို့ကိုတော့တင်ပြတယ်။ ကုန်ကျစရိတ်တွေကို မတင်ပြတော့ဘဲ ကိုယ့်အားကိုယ်ကိုးနဲ့ ကိုယ့်မြို့နယ်ကိုယ် ပြန်ပြီးပြုလုပ်လိုက်တာပါ” လို့ ဆိုပါတယ်။

မိုခါမုန်တိုင်းကြောင့် နေအိမ်အချို့ ရေထဲမျောပါသွားတဲ့ ယင်းမာပင်မြို့နယ်ထဲက ဒေသခံအချို့ကတော့ နီးစပ်ရာကျေးရွာဘုန်းကြီးကျောင်းတွေမှာ သွားရောက်နေထိုင်ခဲ့ကြတယ်လို့ သိရပါတယ်။

ဒါ့အပြင် လက်ရှိမှာတော့ ရေကျသွားပေမဲ့လည်း ယင်းမာပင်မြို့နယ်ထဲက ဒေသခံတချို့ဟာ သောက်သုံးရေတွေလိုအပ်နေသလို၊ စားသောက်ဖို့အတွက် ဆန်၊ ဆီ၊ ဆားနဲ့ ငါးသေတ္တာစတဲ့ ကုန်ခြောက်ပစ္စည်းတွေအတွက် အကူညီတွေလိုအပ်နေတယ်လို့လည်း ဒေသခံတွေဆီက သိရပါတယ်။

စာတည်း – 007

ပုလဲ၊ ဖေဖော်ဝါရီ ၂၁၊ ၂၀၂၃။

စစ်ကိုင်းတိုင်း၊ ပုလဲမြို့နယ်က စစ်ရှောင်အချို့ကို ဖေဖော်ဝါရီလ ၂၀ ရက် မနေ့ကမနက်ပိုင်းမှာ ပုလဲမြို့နယ် ပြည်သူ့အုပ်ချုပ်ရေးအဖွဲ့ဝင်တွေက ငွေနဲ့ရိက္ခာတွေ လှူဒါန်းထောက်ပံ့ပေးခဲ့တယ်လို့ သိရပါတယ်။

ပုလဲမြို့နယ်၊ ဇီးဖြူကုန်းကျေးရွာကနေ တိမ်းရှောင်နေတဲ့ အိမ်ထောင်စု ၈၀ ကျော်အတွက် ထိုင်းရောက်မြန်မာနိုင်ငံသားများ စည်းလုံးညီညွတ်ရေးအဖွဲ့၊ မြို့နယ် ပ အ ဖ နဲ့ အလှူရှင်အချို့တို့ ပူးပေါင်းပြီး လှူဒါန်းခဲ့တာလို့ ပုလဲမြို့နယ် ပြည့်သူ့အုပ်ချုပ်ရေးအဖွဲ့ခေါင်းဆောင် ကိုဇော်ထက်က ပြောပါတယ်။

“စစ်ကောင်စီက ဇီးဖြူကုန်းရွာကို ပျူရွာလုပ်တာကို လက်မခံပဲ ထွက်ပြေးလာတဲ့ အိမ်ထောင်စု ၈၀ ကျော် လူဦးရေ ၄၀၀ ကျော်ကို ဒီနေ့သွားရောက်လှူဒါန်းခဲ့တာ၊ သူတို့ရွာကို ပျူရွာ အလုပ်ခံလိုက်ရတော့ ပျူလို့ သတ်မှတ်တာကို လက်မခံလို့ ထွက်ပြေးလာကြတာဆိုတော့ ပစ္စည်းတွေလည်း မယူခဲ့နိုင်ကြဘူး။ ရွာမှာ ကျန်ခဲ့တဲ့ သူတို့အိမ်က အသုံးအဆောင်ပစ္စည်းတွေကိုလည်း ရွာခံပျူတွေနဲ့ စစ်ကောင်စီအဖွဲ့က မီးရှို့လိုက်တာ” လို့ ပြောပါတယ်။

မြို့နယ် ပ အ ဖက ဆန် ၁ တင်းခွဲ အိတ် ၂၀၊ ဆီ ၅ ပိဿပုံ ၅ ပုံး၊ ထိုင်းရောက်မြန်မာနိုင်ငံသားများ စည်းလုံးညီညွတ်ရေးအဖွဲ့က ငွေကျပ် ၅ သိန်း ၂ သောင်း၊ ရန်ကုန်အလှူရှင် တဦးက လှူလိုက်တဲ့ အနွေးထည် ၁၂၀နဲ့ ဖိနပ်တွေကို စုပေါင်းပြီး လှူဒါန်းပေးခဲ့ကြတာလည်း ဖြစ်ပါတယ်။

လက်ရှိအချိန်ထိလည်း ဇီးဖြူကုန်းကျေးရွာမှာ စစ်အုပ်စုက ရွာခံပျူစောထီးအချို့နဲ့ ပူးပေါင်းတပ်စွဲနေတာကြောင့် ရွာသားတွေအနေနဲ့ သူတို့ပိုင်ဆိုင်တဲ့ လယ်ယာမြေတွေမှာ မလုပ်ကိုင်ရဲတော့ဘဲ အခြားနီးစပ်ရာကျေးရွာတွေမှာသာ တိမ်းရှောင်ရင်း ကြုံရာအလုပ်တွေကို လုပ်ကိုင်နေကြရတယ်လို့ သိရပါတယ်။