တိုက်ခိုက်

တောင်သာ၊ ဩဂုတ် ၁၊ ၂၀၂၆။

မန္တလေးတိုင်း၊ မြင်းခြံခရိုင်၊ တောင်သာမြို့အဝင်ရှိ စစ်တပ်ဂိတ် ၃ ခုကိုစီးနင်းတိုက်ခိုက်ခဲ့ပြီး ၂ ခုကိုသိမ်းပိုက်နိုင်ခဲ့ကာ တိုက်ပွဲတွင်း စစ်ကော်မရှင်တပ်သား ၂ ဦးသေဆုံးခဲ့တယ်လို့ ဩဂုတ်လ ၁ ရက်မှာ မြင်းခြံခရိုင်တပ်ရင်း ၁ က သတင်းထုတ်ပြန်ပါတယ်။

ဇူလိုင် ၂၈ ရက်မနက် ၅ နာရီခန့်မှာ စုစုပေါင်းအင်အား ၅၀ ခန့်ရှိနေတဲ့ တောင်သာမြို့အရှေ့ဘက်ရှိ မန်ကျည်းရိုး စစ်ဆေးရေးဂိတ်၊ ဗိဿနိုးအထိုင်ဂိတ်နဲ့ ဗိဿနိုးရွာဘုန်းကြီးကျောင်းတောင်ပေါ်စခန်းတို့ကို တပြိုင်နက်တည်းဝင်ရောက်တိုက်ခိုက်ခဲ့တာလို့ ဆိုပါတယ်။

“စခန်း ၃ ခုကတော့ တဆက်တည်းပဲ။ သိပ်မဝေးဘူး။ ၃ နေရာတပြိုင်တည်းဝင်စီးတယ်။ အဓိကဦးစားပေးက မန်ကျည်းရိုးဂိတ်ပေါ့။ မန်ကျည်းရိုးဂိတ်က ၁၅ မိနစ်ဝန်းကျက်လောက်နဲ့ရတယ်။ ဗိဿနိုးဂိတ်က နာရီဝက်လောက်ကြာတယ်။ ဘုန်းကြီးကျောင်းတောင်ပေါ်ဂိတ်က တောင်ပေါ်ဖြစ်နေလို့မရလိုက်ဘူး”လို့ မြင်းခြံခရိုင်တပ်ရင်း ၁ တပ်ရင်းမှူးက ပြောပါတယ်။

တိုက်ပွဲအတွင်းမှာ မန်ကျည်ရိုးဂိတ်နဲ့ ဗိဿနိုးဂိတ်တို့ကို သိမ်းပိုက်မီးရှို့နိုင်ခဲ့ပြီး မန်ကျည်ရိုးဂိတ်ရှိ စစ်ကော်မရှင်တပ်သား ၂ ဦးသေဆုံးပြီး သေနတ် ၂ လက်နဲ့ စစ်အသုံးအဆောင်ပစ္စည်းအချို့သိမ်းဆည်းရရှိခဲ့တယ်လို့ ဆိုပါတယ်။

ဒီစစ်ဆေးရေးဂိတ်တွေက စစ်ကော်မရှင်တပ်ဖွဲ့ဝင်တွေဟာ ပြည်သူတွေကို မတရားဖမ်းဆီးငွေညှစ်တာတွေ ပြုလုပ်နေတာကြောင့် အဖွဲ့စုံနဲ့ဝင်ရောက်တိုက်ခိုက်ခဲ့တာလို့ မြင်းခြံခရိုင်တပ်ရင်း ၁ တပ်ရင်းမှူးက ပြောပါတယ်။

တိုက်ပွဲဖြစ်ပြီး နေ့လယ်ပိုင်းမှာတော့ တောင်သာမြို့တွင်းက စစ်ကော်မရှင်တပ်ဖွဲ့တွေရောက်လာပြီး ပျက်စီးသွားတဲ့နေရာတွေကိုပြန်လည်ပြုပြင်ကာ တနေရာမှာ အင်အား ၅၀ ခန့်ချထားပြီး စစ်ဆေးရေးဂိတ်တွေပြန်ဖွင့်ထားတယ်လို့ သိရပါတယ်။

ဒီစစ်ဆင်ရေးကို မြင်းခြံခရိုင် အမှတ် ၁၊ ၂၊ ၃၊ ၇ နဲ့ ၈ တပ်ရင်းများ၊ မြင်းခြံခရိုင် ပြည်သူ့ကာကွယ်ရေး အဖွဲ့၊ နွားထိုးကြီးမြို့နယ် ပကဖ၊ တောင်သာမြို့နယ် ပကဖနဲ့ စဉ့်ကိုင်မြို့နယ် ပကဖတို့ ပူးပေါင်းတိုက်ခိုက်ခဲ့တာလို့ ဆိုပါတယ်။

ပြီးခဲ့တဲ့ ဇူလိုင် ၂ ရက်ကလည်း မန္တလေးတိုင်း၊ မလှိုင်မြို့နယ်၊ အိမ်ကြီးတောကျေးရွာဘက်ကို စစ်ကြောင်းထိုးလာတဲ့ ရဲတပ်ရင်း ၈ စစ်ကြောင်းတိုက်ခိုက်ခံရပြီး ၇ ဦးသေ၊ ရဲအုပ်အပါအဝင် သုံ့းပန်း ၁၀ ဦးမိခဲ့တယ်လို့ သိရပါတယ်။

စစ်ကိုင်း၊ ဇွန် ၂၆၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်နဲ့ မြောင်မြို့နယ်တို့မှာ အသေခံဒရုန်းနဲ့တိုက်ခိုက်ခံရလို့ ပြည်သူ ၁ ဦး ဒဏ်ရာရပြီး နေအိမ် ၆ လုံး မီးလောင်ခဲ့တယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ဇွန် ၂၅ ရက်မနက် ၁၁ နာရီကျော်မှာ ရွှေဘိုမြို့နယ်၊ ဘိုတဲကုန်းကျေးရွာကို ရွှေဘိုလေ့ကျင့်ရေး ၈ က လွှတ်တင်လိုက်တဲ့ အသေခံဒရုန်း ၂ စီးက ကျရောက်ပေါက်ကွဲခဲ့တာလို့ ဆိုပါတယ်။

“ရွာထိပ် သံတိုသံစရောင်းဝယ်ရေးလုပ်တဲ့ ဆိုင်ပေါ်ကျတယ်။ ပြီးတော့ စိုက်ပျိုးရေးရုံးထဲ တစီးကျတယ်။ သံတိုသံစဆိုင်ကို ဒရုန်းကျချိန်တော့လူထိတာရှိတယ်”လို့ ရွှေဘိုမြို့နယ်ပကဖတာဝန်ရှိသူက ပြောပါတယ်။

ဒရုန်းထိမှန်တာကြောင့် အသက် ၄၀ ကျော်အရွယ် အမျိုးသမီး ၁ ဦးလက်မောင်းထိခိုက်ဒဏ်ရာရပြီး ဆိုင်နဲ့ ရုံးအဆောက်အဦ: ပျက်စီးမှုရှိခဲ့တယ်လို့ ဆိုပါတယ်။

အလားတူ ည ၇ နာရီကျော်မှာ နမခကနေ လွှတ်တင်လိုက်တဲ့ အသေခံဒရုန်း ၄ စီးဟာ မြောင်မြို့နယ်၊ နဘတ်ကျေးရွာထဲက ပြည်သူနေအိမ်တွေပေါ်ကို ကျရောက်ပေါက်ကွဲခဲ့တယ်လို့ နဘတ်တိုက်နယ် တာဝန်ခံက ပြောပါတယ်။

“၆ နာရီလောက်ကတည်းက မိုက်နဲ့လိုက်အော်ပြီး လူတွေကိုရွာပြင်ထုတ်လိုက်နိုင်တယ်။ သတင်းကြိုရလို့ပါ။ အိမ်တွေတော့ မီးလောင်ပျက်စီးတာရှိတယ်”လို့ ဆိုပါတယ်။

ဒီတိုက်ခိုက်မှုကြောင့် နေအိမ် ၆ လုံးမီးလောင်ပျက်စီးခဲ့ပြီး ဒေသခံတွေကတော့ ဘေးလွတ်ရာမှာ တိမ်းရှောင်နေကြရတယ်လို့ ဆိုပါတယ်။

ဧပြီ ၃ ရက်နေ့ကလည်း မြောင်မြို့နယ်၊ နဘက်ကျေးရွာကို ဗုံးကြဲခံရလို့ မိန်းကလေးငယ် ၁ ဦး သေဆုံးပြီး မိဘနှစ်ဦးဒဏ်ရာရခဲ့ပါသေးတယ်။

စာတည်း – လင်း

စစ်ကိုင်း၊ ဇွန် ၂၅၊ ၂၀၂၆။

စစ်ကိုင်းတိုင်း၊ မုံရွာ၊ မြင်းမူ၊ ချောင်းဦး၊ စစ်ကိုင်း၊ ဘုတလင်မြို့နယ်တွေမှာ တိုက်ပွဲဖြစ်ခဲ့ပြီး စစ်ကော်မရှင်တပ်ဖွဲ့ဝင် ၃၃ ဦးသေဆုံးတယ်လို့ ဇွန် ၂၄ ရက်မှာ ပြည်သူ့ကာကွယ်ရေးတပ်မတော် – PDF က သတင်းထုတ်ပြန်ပါတယ်။

မေ ၅ ရက်မှာ မုံရွာမြို့နယ်၊ မုံရွာ-ယာကြီး-ကလေးဝလမ်းပေါ် သင့်ငံရွာမှာရောက်ရှိနေတဲ့ တပ်မ ၉၉ လက်အောက်ခံ ခမရ-၁၄ မှ အင်အား ၂၀၀ ပါစစ်ကြောင်းကို ယင်းမာပင်ခရိုင်စစ်ဌာနကွပ်ကဲမှုနဲ့ မိုင်းခွဲ တိုက်ခိုက်ခဲ့ရာ စစ်ကော်မရှင်တပ်ဖွဲ့ဝင် ၆ ဦး သေဆုံးပြီး ထိခိုက်ဒဏ်ရာရသူအများအပြားရှိတယ်လို့ ဆိုပါတယ်။

အဲ့ဒီနောက် မေ ၆ ရက်မှာ အဲ့ဒီစစ်ကြောင်းကခွဲထွက်လာတဲ့ အင်အား ၅၀ ပါ စစ်ကြောင်းဟာ ချောင်းမရွာကိုရောက်လာစဥ် သေဆုံးတပ်သား ၁ ဦးရဲ့ ရုပ်အလောင်းကိုမြှုပ်ကာ ကျန်ဒဏ်ရာရ တပ်သားတွေနဲ့ ဘန့်ဘွေး(ပျူရွာ)ကိုဝင်ရောက်သွားတယ်လို့ ထုတ်ပြန်ချက်မှာဖော်ပြထားပါတယ်။

ဒါ့အပြင် မေ ၁၉ ရက်မှာလည်း မြင်းမူမြို့နယ်၊ အလ္လကပ္ပရွာအရှေ့ထိပ် စစ်ကော်မရှင်ဂိတ်က ထွက်လာတဲ့ စစ်ကော်မရှင်တပ်သားတွေကို လက်လုပ်မိုင်း ၃ လုံးနဲ့ မိုင်းဆွဲတိုက်ခိုက်ခဲ့ရာ ၃ ဦး သေဆုံးပြီး ၃ ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။

အလားတူ ဇွန် ၂ ရက်မှာ ချောင်းဦးမြို့နယ်၊ ငါးယှန်ကျေးရွာကထွက်လာတဲ့ တပ်မ ၃၃ လက်အောက်ခံ ခလရ – ၇၆)၊ ခမရ – ၁၃၊ ရတဖ – ၁၆၊ ပြည်သူ့စစ်ပူးပေါင်းအင်အား ၁၀၀ ပါစစ်ကြောင်းကို ချောင်းဦး – ပခုက္ကူ လမ်းပိုင်းပေါ်ရှိ ဆင်မြေကျေးရွာကိုထွက်လာချိန် ထပ်မံတိုက်ခိုက်ခဲ့ပါတယ်။

ဒီတိုက်ခိုက်မှုအတွင်း စစ်ကော်မရှင်တပ်ဖွဲ့ဝင် ၂၃ ဦးသေဆုံး၊ ၉ ဦးဒဏ်ရာရကာ စစ်သုံ့ပန်း ၂ ဦးဖမ်းမိပြီး လက်နက်မျိုးစုံ ၁၆ လက်လည်းသိမ်းဆည်းနိုင်ခဲ့တယ်လို့ ဆိုပါတယ်။

အလားတူ ဇွန် ၅ ရက်မှာလည်း စစ်ကိုင်းမြို့နယ်၊ ကျောက်ဆည်ရွာနဲ့ အုန်းတောရွာကြားမှာ နမခ က ထွက်လာတဲ့ သံပြားကာ ကား ၈ စီး၊ ဆီဘောက်ဆာ ကား ၁၄ စီးကို စစ်ကိုင်းခရိုင်စစ်ဌာနကွပ်ကဲမှုနဲ့ မိုင်း ၆ လုံးသုံးတိုက်ခိုက်ရာ ကား ၁ စီးပျက်စီးပြီး ထိခိုက်ဒဏ်ရာရသူ အများအပြားရှိခဲ့တယ်လို့ ဆိုပါတယ်။

အဲ့ဒီနေ့မှာပဲ မြင်းမူမြို့နယ်၊ ထီးဆောင်းရွာ အရှေ့ဘက် စစ်ကိုင်း တမခ -၃၃ မှ ထွက်ခွာလာတဲ့ သံပြားကာ ကား ၈ စီး၊ ၁၂ ဘီးကား ၂ စီး နဲ့ ၆ ဘီးကား ၅ စီးကို စစ်ကိုင်းခရိုင်စစ်ဌာနကွပ်ကဲမှုနဲ့ ကြားဖြတ်မိုင်းဆွဲတိုက်ခိုက်ခဲ့သေးတယ်လို့ ထုတ်ပြန်ချက်မှာ ဖော်ပြပါတယ်။

ဇွန် ၁၅ ရက်မှာလည်း မြင်းမူမြို့နယ်၊ ဂွေးပင်တောရွာအထိုင်ချစစ်ကော်မရှင်တပ်သား အင်အား ၂၅ ဦးခန့်နဲ့ မြောင်လမ်းခွဲနဲ့ ဂွေးပင်တောရွာကြား ကင်းပုန်းဝပ်ဖို့ထွက်လာချိန် မိုင်းဆွဲတိုက်ခိုက်ခဲ့တယ်လို့ ဆိုပါတယ်။

အဲ့ဒီနေ့မှာပဲ စစ်ကိုင်းမြို့နယ်၊ နှုံးတွင်းရွာနဲ့ နတ်ခရိုင်ရွာကြား နမခ ကထွက်လာတဲ့ စစ်ယာဥ်တန်းကို လက်လုပ်မိုင်း ၂ လုံးနဲ့ မိုင်းဆွဲတိုက်ခိုက်ခဲ့ရာ ကား ၂ စီးထိခိုက်ပျက်စီးခဲ့သလို စစ်ကိုင်း တမခ -၃၃ မှ ထွက်လာတဲ့ စစ်ယာဥ်တန်းကို မြင်းမူမြို့နယ်၊ ထီးဆောင်းရွာအရှေ့ဘက်မှာ ထပ်မံပြီး ပဒေသာမိုင်း ၃ လုံးနဲ့ မိုင်းဆွဲတိုက်ခိုက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဇွန် ၁၈ ရက်မှာတော့ ဘုတလင်မြို့နယ်၊ အနောက်ဇီးတောရွာမှ ဘုတလင်မြို့ ထွေ/အုပ်ရုံးကို ထွက်လာတဲ့ နမခ မှ အင်အား ၂၅၀ ခန့်ပါစစ်ကြောင်းကို မုံရွာခရိုင်စစ်ဌာနကွပ်ကဲမှုနဲ့ စောင့်ကြို မိုင်းဆွဲတိုက်ခိုက်ခဲ့ရာ စစ်ကော်မရှင်တပ်ဖွဲ့ဝင် ၅ ဦးခန့် ပြင်းထန်ထိခိုက်ဒဏ်ရာ ရရှိခဲ့တယ်လို့ သိရပါတယ်။

ဒီတိုက်ခိုက်မှုတွေအတွင်း စစ်ကော်မရှင်တပ်ဖွဲ့ဝင် ၃၃ ဦးသေဆုံးကာ ၁၇ ဦး ထိခိုက်ဒဏ်ရာရရှိပြီး စစ်သုံ့ပန်း ၂ ဦး အပါအဝင် လက်နက်မျိုးစုံ ၁၆ လက်နဲ့ ခဲယမ်းပစ္စည်းတွေကို သိမ်းပိုက်ရရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဝက်လက်၊ ဇွန် ၁၇၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ နတ်ကုန်းတလိုင်းရွာသစ်နဲ့ ဝက်လူးအိုင်ကျေးရွာတို့မှာ အသေခံဒရုန်းနဲ့ တိုက်ခိုက်ခံရပြီး အမျိုးသမီး ၁ ဦးသေဆုံးခဲ့တယ်လို့ မြို့မတိုက်နယ်ပကဖ တာဝန်ရှိသူဆီက သိရပါတယ်။

ဇွန် ၁၆ ရက်ညနေ ၃ နာရီခန့်မှာ ရွှေဘိုလေ့ကျင့်ရေး ၈ တပ်ကနေ လွှတ်တင်လိုက်တဲ့ အသေခံဒရုန်း ၃ စီးဟာ နတ်ကုန်းတလိုင်းရွာသစ်ထဲ ၂ စီး၊ ဝက်လူးအိုင်ရွာပြည်သူနေအိမ်ထဲ ၁ စီးကျရောက်ပေါက်ကွဲခဲ့တာလို့ ဆိုပါတယ်။

“နတ်ကုန်းတလိုင်းရွာသစ် ဘုန်းကြီးကျောင်းကပ်လျက် မြောက်ဘက်ကုန်းမှာကျတယ်။ နောက် ပဲမှော်စင်ပေါ်မှာတလုံးကျတယ်။ ဝက်လူးအိုင်မှာကြ ယက္ကန်းခတ်တဲ့နေအိမ်ထဲကျတယ်။ သမီးက ယက္ကန်းခတ်နေတာ။ အမေနဲ့သားက အိမ်ထဲထိုင်နေကြတာ။ “လို့ မြို့မတိုက်နယ်ပကဖ တာဝန်ရှိသူတဦးက ပြောပါတယ်။

ဒရုန်းဗုံးထိမှန်တာကြောင့် ဝက်လူးအိုင်ရွာက အသက် ၆၀ ကျော်အရွယ် အမျိုးသမီး ၁ ဦးနေရာမှာပင် သေဆုံးပြီး သားဖြစ်သူ အသက် ၂၇ နှစ်အရွယ် အမျိုးသားနဲ့အသက် ၂၁ အရွယ် သမီးဖြစ်သူတို့ထိခိုက်ဒဏ်ရာရခဲ့တယ်လို့ ဆိုပါတယ်။

နတ်ကုန်းတလိုင်းရွာသစ်မှာတော့ ပဲစင်းငုံစင် မီးလောင်ပြီး နေအိမ် ၂ လုံးအနည်းငယ်ပျက်စီးသွားတယ်လို့ အထက်ပါတာ၀န်ရှိသူက ပြောပါတယ်။

ဇွန် ၃ ရက်ကလည်း ဝက်လက်မြို့နယ်၊ ရွှေကျင်ကျေးရွာမှာ လှတောအထိုင်ချ စစ်ကော်မရှင်တပ်ဖွဲ့၀င်တွေက ပစ်ခတ်တဲ့ လက်နက်ကြီးကျပြီး ပြည်သူ ၃ ဦးဒဏ်ရာရခဲ့ပါသေးတယ်။

စာတည်း – လင်း

မုံရွာ၊ ဇွန် ၁၆၊ ၂၀၂၆။

စစ်ကိုင်းတိုင်း၊ မုံရွာမြို့နယ်၊ မုံရွေးကျေးရွာအစွန်ပိုင်းက နေအိမ်တွေကို ဒရုန်းနဲ့တိုက်ခိုက်ခံရပြီး လူငယ်အမျိုးသား ၁ ဦးသေ ၂ ဦးဒဏ်ရာရတယ်လို့ ကျေးရွာပကဖတာဝန်ရှိသူတွေဆီက သိရပါတယ်။

ဇွန် ၁၅ ရက်ညနေ ၃ နာရီခန့်မှာ မုံရွေးတန်ပိုဂိတ်ကနေ လွှတ်တင်လိုက်တဲ့အသေခံဒရုန်းတစ်စီးဟာ ကျေးရွာအပြင်တောတိုက်ရှိ လူနေအိမ်အရှေ့ကို ကျရောက်ပေါက်ကွဲခဲ့တာလို့ဆိုပါတယ်။

“နေအိမ်တလုံးရဲ့အရှေ့ဘက်နားကို ကျတာ။ လူတွေကထိုင်နေကြတာကို အစစင်တာပေါ့။ လူတွေပေါ်တည့်ကျတာတော့မဟုတ်ဘူး။ “လို့ ကျေးရွာပကဖတာဝန်ရှိသူက ပြောပါတယ်။

ဒရုန်းပေါက်ကွဲစ ထိမှန်တာကြောင့် အသက် ၂၅ နှစ်အရွယ်အမျိုးသား ၁ ဦး နေရာတင်သေဆုံးပြီး အသက် ၆၀ ကျော်အရွယ် အမျိုးသားနဲ့ မြေးဖြစ်သူ အသက် ၁၅ နှစ်အရွယ်မိန်းကလေးငယ်တို့ ဒဏ်ရာရသွားတယ်လို့ ဆိုပါတယ်။

ဒါ့အပြင်နေအိမ် ၁ လုံးပျက်စီးပြီးဒရုန်းနဲ့ တိုက်ခိုက်ခံရပြီးနောက် ဒေသခံတချို့ကတော့ ကြောက်လန့်ပြီး ရွာအနီးတောစပ်တွေဆီထွက်ပြေးနေကြရတယ်လို့ ကျေးရွာပကဖတာဝန်ရှိသူက ပြောပါတယ်။

မေ ၉ ရက်ကလည်း မုံရွာမြို့နယ်၊ ဘူးတောင်းကန်ကျေးရွာမှာ စစ်ကော်မရှင်တပ်ကပစ်ခတ်တဲ့ လက်နက်ကြီးထိမှန်ပြီး ကလေးငယ်အပါအဝင် ၂ ဦးသေဆုံးခဲ့ပါသေးတယ်။

စာတည်း – လင်း