ရွှေဘို၊ မေ ၁၉၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ညောင်ပင်သာ စိုက်သိပ္ပံတက္ကသိုလ်နဲ့ ပန်းရံကျေးရွာသွားလမ်းပေါ်မှာ ဒုရဲအုပ်အပါအဝင် ၂ ဦးပစ်ခတ်ပြီး သေနတ် ၂ လက်သိမ်းဆည်းရမိခဲ့တယ်လို့ မေ ၁၉ ရက်မှာ ရွှေဘိုခရိုင်အမှတ် ၄ တပ်ရင်းကသတင်းထုတ်ပြန်ပါတယ်။

မေ ၁၅ ရက်မနက် ၇ နာရီခန့်မှာ စိုက်သိပ္ပံတက္ကသိုလ်ကနေ ပန်းရံကျေးရွာဘက်ကို ဆိုင်ကယ်နဲ့ လာတဲ့ ရဲ ၂ ဦးကို ပစ်ခတ်ခဲ့ရာမှာ ၂ ဦးစလုံးနေရာတင်သေဆုံးသွားတယ်လို့ ဆိုပါတယ်။

“အရပ်ဝတ်နဲ့သွားတာကို ကြားဖြတ်တိုက်ခိုက်တာပါ။ သူတို့ပြန်ပစ်နိုင်တာမရှိဘူး။ ၂ ဦးတည်း ဆိုင်ကယ်တစီးနဲ့ လာတာပါ။ မြေပြင်အခြေအနေအရ သတင်းလုံခြုံမှုကို ပထမ ဦးစားပေးတာကြောင့် သတင်းကို ဒီနေ့မှထုတ်ပြန်ရတာဖြစ်တယ်။ “လို့ ရွှေဘိုခရိုင်အမှတ် ၄ တပ်ရင်းတာဝန်ရှိသူက ပြောပါတယ်။

ပစ်ခတ်ခံရတာကြောင့် ဒုရဲအုပ် ၁ ဦး၊ ရဲတပ်သား ၁ ဦး စုစုပေါင်း ၂ ဦးစလုံးနေရာမှာပင်သေဆုံးသွားပြီး သူတို့ရဲ့ရာထူးတွေကိုတော့ သိမ်းဆည်းရမိတဲ့သက်သေခံကပ်ပြားတွေကနေ အတည်ပြုထားနိုင်တာလို့ ဆိုပါတယ်။

သူတို့ဟာ မြစ်ကြီးနားအခြေစိုက် ရဲတပ်ရင်း ၃၀ ကရဲတပ်ဖွဲ့ဝင်တွေဖြစ်ပြီး စိုက်သိပ္ပံတက္ကသိုလ်မှာ တာဝန်ကျနေသူတွေဖြစ်တယ်လို့လည်း သိရပါတယ်။

ပစ်ခတ်ပြီးနောက် ၃၅ ဗို့ခြောက်လုံးပြူး သေနတ် ၁ လက်၊ G-3 သေနတ် ၁ လက်၊ ကျည်ဘောက် ၂ ခု၊ ကျည်ဆံ ၃၃ တောင့်တို့ကို သိမ်းဆည်းရမိခဲ့တယ်လို့ ရွှေဘိုခရိုင်အမှတ် ၄ တပ်ရင်းရဲ့ ထုတ်ပြန်ချက်မှာ ဖော်ပြပါတယ်။

ဒီတိုက်ခိုက်မှုကို ရွှေဘိုခရိုင်အမှတ်(၄) တပ်ရင်းနဲ့ နယ်မြေခံပကဖ တို့ ပူးပေါင်းတိုက်ခိုက်ခဲ့တာလို့ ဆိုပါတယ်။

မတ် ၁၄ ရက်ကလည်း ရွှေဘိုမြို့နယ်၊ ဥသျှစ်ကန်ကျေးရွာ သုသာန်အနီး၊ ကျွန်းတောကွေ့ ရွှေဘို-ရေဦးလမ်းပိုင်းမှာ ပျူစောထီးရိက္ခာသယ်ကားကို ကြားဖြတ်တိုက်ခိုက်ခံရပြီး ၂ ဦးသေဆုံးကာ ကားကိုလည်း ဒေသကာကွယ်ရေးအဖွဲ့တွေက မီးရှို့ခဲ့သေးတယ်လို့ သိရပါတယ်။

စာတည်း – လင်း

ဒေသတွင်းဖုန်းလိုင်းတွေပြတ်တောက်နေ

ပုလဲ၊ မေ ၁၉၊ ၂၀၂၅။

စစ်ကိုင်းတိုင်း၊ ပုလဲမြို့နယ်၊ နွယ်အင်းကျေးရွာကို မေ ၁၈ ရက်နေ့လယ် ၁၂ နာရီဝန်းကျင်မှာ စစ်ကောင်စီတပ်က လေကြောင်းကဗုံးကြဲတိုက်ခိုက်လို့ ကျောင်းသား၊ ကျောင်းသူတွေအပါ ၅ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

ဗုံးကြဲတိုက်ခိုက်မှုကြောင့် Grade 6 ကျောင်းသားမောင်ဖုန်းမင်းသန့်၊ Grade 12 ကျောင်းသူ မကြယ်ဇင်ဦး၊ ဒေါ်မရီ၊ မသင်းမြတ်သူနဲ့ နောက်ထပ်ဒေသခံ ၁ ဦးတို့သေဆုံးခဲ့ပြီး သူနဲ့ပတ်သက်တဲ့ အချက်အလက်ကိုတော့မသိရသေးဘူးလို့ ဆိုပါတယ်။

“ပုလဲမြို့နယ်က စစ်ရေးအရကငြိမ်နေတာကြာပါပြီ။ အကြောင်းမဲ့ကို ဂျက်ဖိုက်တာနဲ့ ၃ ကြိမ်လာပစ်သွားတာ။ အလုံးရေတော့မသိရဘူး။ အရပ်သားပြည်သူနေအိမ်တွေပေါ်ကျတာ”လို့ ဒေသခံတဦးက ပြောပါတယ်။

မသင်းမြတ်သူနဲ့ ဒေသခံတဦးတို့မှာ ဗုံးစထိမှန်ဒဏ်ရာနဲ့ ဆေးကုသနေချိန်အတွင်းသေဆုံးခဲ့ပြီး ကျန် ၃ ဦးကတော့ ပွဲချင်းပြီးသေဆုံးခဲ့တာလို့ သူကဆက်ပြောပါတယ်။

နွယ်အင်းကျေးရွာမှာ ကာကွယ်ရေးတပ်ဖွဲ့တွေ သွားလာလှုပ်ရှားတာလည်းမရှိသလို တိုက်ပွဲဖြစ်တာတွေလည်းမရှိဘဲ အကြောင်းမဲ့လာရောက်ပစ်ခတ်သွားတာလို့ အထက်ပါဒေသခံက ဆက်ပြောပါတယ်။

“အဓိကကတော့အရပ်သားတွေကြီးပါပဲ ကာကွယ်ရေးတပ်ဖွဲ့တွေလဲမရှိပဲနဲ့ကို အရပ်သားနေအိမ်တွေ ပေါ် ကြဲသွားတာပဲ။ တကယ့်ကို ကျေးရွာနေပြည်သူတွေ အေးအေးဆေးဆေး နေထိုင်နေတဲ့လူတွေရဲ့ အပေါ်မှာ လူမဆန်တဲ့လုပ်ရပ်တွေပေါ့နော်။ တောက်လျှောက်စစ်ရာဇဝတ်မှုတွေပါပဲ။” လို့ ဒေသေခံတဦးက ပြောပါတယ်။

မေလပထမပတ်လောက်ကစလို့ လက်ရှိအချိန်ထိ နွယ်အင်းကျေးရွာအနီးမှာ ဖုန်းလိုင်းပြတ်တောက်မှုတွေရှိနေတယ်လို့လည်း သိရပါတယ်။

“ဒီရွာကပြောရရင်အရင်ကလဲကြဲထားတာလဲရှိတယ်။ ထိခိုက်ဒဏ်ရာတွေလဲရခဲ့တယ်။ အခုလည်း စစ်ရေးလည်းမရှိပါဘူး။ ဘာကနေဘယ်လိုလာကြဲလဲတော့မသိပါဘူး။ အခုတလောသူတို့တွေက အတော်များများဟုတ်ဟုတ်မဟုတ်ဟုတ် လုပ်နေတာချည်းပါပဲ” လို့ ဒေသခံအမျိုးသမီးတဦးက ဆိုပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ မေ ၁၆ ရက်အထိ နိုင်ငံတဝန်း စစ်ကောင်စီနဲ့ ၎င်းတို့ရဲ့လက်ပါးစေတွေကြောင့် သေဆုံးခဲ့တဲ့ပြည်သူစုစုပေါင်း ၆,၆၈၇ ဦးရှိပြီလို့ နိုင်ငံရေးအကျဥ်းသားများကူညီစောင့်ရေးအသင်း – AAPP ရဲ့အစီခံစာအရ သိရပါတယ်။

စာတည်း – လင်း

ချောင်းဦး၊ မေ ၁၆၊ ၂၀၂၅။

တိုက်ပွဲမရှိဘဲ စစ်ကိုင်းတိုင်း၊ ချောင်းဦးမြို့ပေါ်ရှိ စစ်ကောင်စီတပ်က ၂ ရက်ဆက်တိုက် လက်နက်ကြီးတွေ ပစ်ခတ်ခဲ့တာကြောင့် ဒေသခံ ၆ ဦးသေဆုံးခဲ့တယ်လို့ ဒေသခံတွေကပြောပါတယ်။

ချောင်းဦးမြို့နယ် အထွေထွေအုပ်ချုပ်ရေးရုံးမှာ တပ်စွဲထားတဲ့ စစ်ကောင်စီတပ်က မေ ၁၅ ရက်ည ၉ နာရီမှာ လက်နက်ကြီး ၃ လုံးပစ်ခတ်ခဲ့ရာ ၂ လုံးမှာ ငါးလုံးတင်ကျေးရွာကို ကျရောက်ပေါက်ကွဲခဲ့တာကြောင့် ဒေသခံ ၅ ဦးသေဆုံးခဲ့တယ်လို့ဆိုပါတယ်။

“သေဆုံးသူတွေရဲ့အသေးစိတ်အချက်အလက်ကို မသိရဘူးဗျ။ အမျိုးသား ၂ ယောက်နဲ့ အမျိုးသမီး ၃ ယောက်လို့ပဲသိရတယ်။ နွား ၁ ကောင်လည်းသေတယ်ဗျ။ နေအိမ် ၁၀ လုံးလည်းမီးလောင်သွားတယ်”လို့ ချောင်းဦးမြို့နယ်မှတော်လှန်ရေးတပ်ဖွဲ့ဝင်တဦးက ပြောပါတယ်။

လက်နက်ကြီးကျရောက်ပေါက်ကွဲခဲ့တဲ့ ငါးလုံးတင်ကျေးရွာဟာ အိမ်ခြေစုစုပေါင်း ၁,၀၀၀ ခန့်ရှိပြီး ချောင်းဦးမြို့နယ်၊ တောင်ဘက်မှာတည်ရှိကာ မြို့နဲ့ ၆ မိုင်ကျော်ဝေးတယ်လို့ သိရပါတယ်။

အလားတူ မေ ၁၆ ရက်ဒီနေ့လယ် ၁ နာရီကျော်မှာ မြို့နယ်ထွေအုပ်ရုံးကနေ လက်နက်ကြီး ၃ လုံးပစ်ခတ်ခဲ့ရာ ၂ လုံးမှာ ဘုရင်ဂျီရပ်ကွက်အတွင်းရှိ နေအိမ် ၁ လုံးပေါ်ကို ကျရောက်ပေါက်ကွဲပြီး နေအိမ်ပေါ်ရှိနေတဲ့ မိသားစု ၄ ဦးအနက် အမျိုးသမီး ၁ ဦးသေဆုံးပြီး ကျန် ၃ ဦးက ဒဏ်ရာပြင်းထန်ရရှိခဲ့တယ်လို့ဆိုပါတယ်။

“မြို့နဲ့ပတ်ဝန်းကျင်ကို ၁၂၀ မမတွေနဲ့ ရမ်းသမ်းပစ်နေတာ။ ကြေးနီကားတွေ ဖြတ်မှာမို့ ထင်တယ်။ ဝမ်ပေါင်ကနေ တရုတ်ကိုပို့မယ့်ဟာတွေ။ အရင်တုန်းကလည်း အဲ့လိုမျိုးပဲ။ သူတို့ (စကစကြေးနီကား) ဖြတ်ပြီဆို ရမ်းပစ်တာပဲ။ ကြိုရှင်းတဲ့သဘောမျိုးပဲ”လို့ အထက်ပါ တပ်ဖွဲ့ဝင်က ပြောပါတယ်။

ပြီးခဲ့တဲ့မေ ၁၀ ရက်ကလည်း ချောင်းဦးမြို့နယ်၊ သုံးပန်လှကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ရှင်ပြုအလှူလုပ်တဲ့နေရာကို ကျရောက်ပေါက်ကွဲပြီး မောင်ရှင်လောင်းအပါအဝင် ၃ ဦးသေဆုံးကာ ၃ ဦးဒဏ်ရာရရှိခဲ့ပါတယ်။

စာတည်း – လင်း

ယင်းမာပင်၊ မေ ၁၅၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်၊ ရေကြည်ပင်ရွာကို စစ်ကောင်စီတပ်ဖွဲ့ဝင်တွေပစ်ခတ်တဲ့ လက်နက်ကြီးကျရောက်ပေါက်ကွဲပြီး ဒေသခံကျောင်းသူ ၁ ဦးသေဆုံးခဲ့တယ်လို့ ဒေသခံတဦးက ပြောပါတယ်။

မေ ၁၄ ရက်ည ၉ နာရီခွဲမှာ အောင်ဇေယျမြို့သစ်မှာတပ်စွဲနေတဲ့ စစ်ကောင်စီတပ်ဖွဲ့ဝင်တွေက လက်နက်ကြီးနဲ့ပစ်ခတ်ရာ ၁၈ နှစ်အရွယ် ၁၂ တန်းကျောင်းသူ မယမင်းသိမ့် ကိုထိမှန်သေဆုံးခဲ့ပြီး နေအိမ် ၁ လုံးလည်းမီးလောင်ပျက်စီးခဲ့တယ်လို့ ဆိုပါတယ်။

“သူကစာကျက်နေတာ၊ ဒီအိမ်ပိုင်ရှင် ကိုရင်က ဗိုက်နာလို့ဆိုပြီး ဆေးဘူးသွားယူ‌ပေးတာ၊ အပေါက်ဝ တင်ရှိသေးတာ၊ အပြင်ဘက်ထွက်ပြီးလို့ တံခါးပေါက်ပြန်ပြီးစေ့မလို့ရှိသေးတာ၊ အဲ့ဒါကျသွားတာ။” လို့ ဖြစ်စဉ်အနီးမှာရှိတဲ့ ရွာခံတဦးကပြောပါတယ်။

အဆိုပါစစ်ကောင်စီတပ်က လက်နက်ကြီး ၃ လုံးပစ်ခတ်ခဲ့တာဖြစ်ပြီး ရေကြည်ပင်ရွာထဲ၊ ရွာအနီး လယ်ကွင်းတွေထဲနဲ့ မြရိပ်ရွာအပြင်ကို ၁ လုံးစီကျရောက်ပေါက်ကွဲခဲ့တာလို့ ဒေသခံကာကွယ်ရေးတပ်ဖွဲ့ဝင်တွေဆီက သိရပါတယ်။

မယမင်းသိမ့်သေဆုံးမှုနဲ့ပတ်သက်ပြီး နောက်ထပ်အိမ်နီးချင်းတဦးကလည်း “လမ်းအထိ အသက်ပါသေးတယ်၊ ဆေးခန်းရှိတဲ့ရွာရောက်တော့ ဆုံးတာပဲ၊ ကိုရင်နေမကောင်းလို့ ဆေးလာယူပေးတာ၊ လာယူတော့ အထွက်ကိုတံခါးပေါက်တင်ခွေလဲသွားတာ၊ (လက်နက်ကြီးက)အိမ်ရှေ့က ပယက်ပေါ်ပြုတ်ကျတာ။” လို့ ပြောပါတယ်။

လက်နက်ကြီးကျရောက်ပေါက်ကွဲတဲ့ အိမ်မှာတော့ ဆိုင်ကယ် ၂ စီး၊ စက်ဘီး ၂ စီး၊ သိုလှောင်ထားတဲ့ ကြက်သွန်၊ စပါး အစရှိတာတွေ မီးလောင်ဆုံးရှုံးခဲ့ပြီး အနီးအနားကအိမ်တွေမှာလည်း ခေါင်မိုးအပေါက်တွေ၊ နံရံအပေါက်တွေဖြစ်သွားတယ်လို့ ရွာခံတွေဆီကသိရပါတယ်။

မယမင်းသိမ့်ရဲ့ ရုပ်အလောင်းကိုတော့ ဒီနေ့လယ်ခင်းမှာ သင်္ဂြိုဟ်ပေးမယ်လို့ ကူညီဆောင်ရွက်ပေးနေသူတွေကဆိုပါတယ်။

လက်နက်ကြီးကျရောက်ပေါက်ကွဲစဉ် မီးလောင်ခဲ့တဲ့နေအိမ်ကိုတော့ ည ၁၁ နာရီလောက်မှာ ငြှိမ်းသတ်နိုင်ခဲ့ပြီး ရှင်ပြုအလှူပွဲရှိတဲ့အဲဒီရွာမှာ အလှူအောင်ပွဲအဖြစ် ကခုန်နေကြသူတွေလည်း မီးမငြှိမ်းနိုင်ဘဲလွတ်ရာရွာတွေကို ထွက်ပြေးခဲ့ကြတယ်လို့ သိရပါတယ်။

မေ ၁၄ ရက် နေ့လယ်ခင်းကလည်း လုံခြုံရေးတပ်ရင်း ၂၈ (မုံရွာ) ကနေ လက်နက်ကြီးနဲ့ပစ်ခတ်လို့ ထန်းတောကြီးရွာက အသက် ၃ နှစ်အရွယ်ယောက်ျားလေး ၁ ဦးကို လက်နက်ကြီးအစထိမှန်ဒဏ်ရာရခဲ့ပါသေးတယ်။

စာတည်း – လင်း

ချောင်းဦး၊ မေ ၁၅၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ ခင်မွန်ကျေးရွာက ဒေသခံတွေကို စစ်ကောင်စီတပ်ဖွဲ့တွေက မေ ၁၃ ရက်ည ၈ နာရီကျော်မှာ ဝင်ရောက်ဖမ်းဆီးပြီးနောက် အဲဒီထဲကအမျိုးသား ၁ ဦးကို သတ်ဖြတ်ခဲ့တယ်လို့ ဒေသခံတွေဆီက သိရပါတယ်။

ခင်မွန်ကျေးရွာအနီးရှိ မြပုလဲဂိတ်စခန်းကထွက်လာတဲ့ အင်အား ၄၀ ပါစစ်ကောင်စီတပ်ဖွဲ့ဝင်တွေက ကျေးရွာအတွင်းကိုဝင်ရောက်လာပြီး ဒေသခံတွေကိုအကြောင်းမဲ့ဖမ်းဆီးခဲ့တာလို့ ဆိုပါတယ်။

“ပြည်သူတွေက လိုင်းသုံးပြန်လာတာ။ အာ့အချိန် **ကားနဲ့တန်းတိုးတာ။ ဓားစာခံက အယောက် ၂၀ လောက်ပါသွားတယ်။ အဲ့ဒီထဲက အသက် ၄၀ ကျော် အသက်ကြီးတဲ့သူ ၆ ယောက်လောက်ပဲပြန်လွှတ်ပေးပြီး ကျန်တဲ့သူတွေတော့ စစ်မှုထမ်းထဲထည့်မယ်ယူဆရတာပဲ”လို့ ဖြစ်စဥ်ကိုသိရှိထားတဲ့ ချောင်းဦးဒေသခံအမျိုးသမီးတဦးက ပြောပါတယ်။

အထက်ပါအဖမ်းခံသူတွေထဲက အသက် ၂၃ နှစ်အရွယ် မျိုးခန့်ကိုကို ကိုစစ်ကောင်စီ တပ်သားတွေက နှိပ်စက်ပြီးသတ်ဖြတ်ခဲ့တယ်လို့ ဆိုပါတယ်။

“မိသမျှကို မှောက်ခိုင်းပြီး စစ်ဆေးနေတုံး အသတ်ခံလိုက်ရတဲ့ကောင်လေးက ထွက်ပြေးတာ။ ပြန်မိသွားတော့ ဓားတွေမွှန်းတယ်။ မျက်နှာတွေရော။ ရုပ်တောင် မပီပြင်တော့ဘူး။ တော်တော်နှိပ်စက်ထားပြီးသတ်ပစ်ခဲ့တာ”လို့ အထက်ပါအမျိုးသမီးကဆိုပါတယ်။

ဖမ်းဆီးခေါ်ဆောင်သွားတဲ့ ၂၀ ဦးထဲက အသက် ၄၀ ကျော်အရွယ်ရှိ ၆ ဦးကို ပြန်လွှတ်ပေးကာ ၁ ဦးကိုသတ်ဖြတ်ခဲ့တာကြောင့် လက်ရှိဖမ်းဆီးခေါ်ဆောင်ခံရသူမှာ ၁၄ ဦးဖြစ်ပြီး သူတို့ကိုချောင်းဦးမြို့ပေါ်ရှိ အထွေထွေအုပ်ချုပ်ရေးရုံးမှာထိန်းသိမ်းထားတယ်လို့ သူမကဆက်ပြောပါတယ်။

ဖမ်းဆီးခေါ်ဆောင်ခံရသူ ၁၄ ဦးမှာ ဘယ်သူဘယ်ဝါဖြစ်တယ်ဆိုတာ ခွဲခြားမသိရသေးဘဲ ၎င်းတို့ကို မေ ၁၅ ရက်ဒီကနေ့ထိ ပြန်လွှတ်ပေးတာမရှိသေးဘူးလို့ ဆိုပါတယ်။

ခင်မွန်ကျေးရွာမှာ အိမ်ခြေ ၁,၀၀၀ ခန့်ရှိပြီး မုံရွာ-မန္တလေး ကားလမ်းမကြီးဘေးမှာရှိတာဖြစ်သလို စစ်ကောင်စီတပ်ရဲ့ မြပုလဲဂိတ်စခန်းနဲ့ ခင်မွန်ဘက်စုံခြံဂိတ်ကြားမှာ ရှိနေတာလည်းဖြစ်ပါတယ်။

စာတည်း – လင်း

မြေလတ်အသံ၊ မေ ၁၄၊ ၂၀၂၅။

စစ်ကိုင်းတိုင်း၊ ဒီပဲယင်းမြို့နယ်၊ အိုးထိမ်းတွင်းရွာစာသင်ကျောင်းဗုံးကြဲတိုက်ခိုက်မှုကြောင့် သေဆုံးသူ ၂၄ ဦးရှိလာသည်ဟု မေ ၁၄ ရက်အထိဒေသခံများကောက်ယူထားသည့်စာရင်းအရ သိရသည်။

သေဆုံးသူများသင်္ဂြိုဟ်ထားပြီး ဒဏ်ရာရသူ ၁၀၀ ကျော်ကိုလည်း သက်ဆိုင်ရာနေရာများတွင် ဆေးကုသမှုများပေး‌နေသနေ။

ယခင် စာသင်သံ စာအံသံများနှင့်ပျံ့လွင့်နေတတ်သည့် အိုးထိမ်းတွင်းရွာ စာသင်ကျောင်းဝန်းအတွင်း ယခုအခါ တိတ်ဆိတ်ငြိမ်သက်မှုများကသာ နေရာယူထားလျှက်ရှိသည်။

ခြောက်သွေ့နေသည့် သွေးကွက်၊ ဗုံးစမှန်ဖောက်ထွက်နေသည့် နံရံများ၊ ခေါင်းမိုးမဲ့ပျက်စီးနေသည့် ကျောင်းဆောင်တချို့၊ ဟိုတစ ဒီတစ ပြန့်ကျဲနေသည့် ပိုင်ရှင်မဲ့ဖိနပ်များက အိုးထိမ်းတွင်းရွာတွင် ဖြစ်ခဲ့သည့် ဖြစ်ရပ်ဆိုးကို ညွှန်ပြနေသည်။

ဒဏ်ရာရသူ ၁၀၀ ကျော်အထိရှိနေလို့ ဆေးဝါးအရေးပေါ်လိုအပ်နေပြီး သေဆုံးမှုထပ်တိုးလာမှာ စိုးရိမ်

ဒီပဲယင်း၊ မေ ၁၃၊ ၂၀၂၅။

စစ်ကိုင်းတိုင်း၊ ဒီပဲယင်းမြို့နယ်၊ အိုးထိမ်းတွင်းရွာ စာသင်ကျောင်း လေယာဥ်ဗုံးကြဲချမှုမှာ Grade 7 ကျောင်းသား ၁ ဦးထပ်မံသေဆုံးလို့ သေဆုံးသူ ၂၃ ဦးရှိလာပြီလို့ ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့ထံက သိရပါတယ်။

ထပ်မံသေဆုံးသူမှာ Grade 7 မှာတက်ရောက်နေတဲ့ အသက် ၁၃ နှစ်အရွယ် မောင်စွမ်းကို ကိုဖြစ်ပြီး ဒီကနေ့ မေ ၁၃ ရက် ညနေပိုင်း ၅ နာရီကျော်လောက်မှာ ရရှိထားတဲ့ ဗုံးစထိမှန်ဒဏ်ရာတွေနဲ့ သွေးထွက်လွန် သေဆုံးသွားခဲ့တာလို့ ဆိုပါတယ်။

“မြေပြင်အခက်အခဲ ပေါင်းစုံကနေ ကြိုးစား(ကုသ)နေရတာ။ ဆေးဝါးလိုအပ်ချက်တွေနေရာထိုင်ခင်း အခက်အခဲတွေရှိနေတယ်။ မြေပြင်မှာ ဆေးရုံဆေးခန်းတွေထားပြီး ကုသရတဲ့ အခြေအနေမဟုတ်ဘူးပေါ့ဗျာ။ ဆေးဝါးလုံလောက်မှုတော့မရှိဘူး”လို့ ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့ရဲ့ တာဝန်ရှိသူတဦးက မြေလတ်အသံကို ပြောပါတယ်။

ဒဏ်ရာရရှိသူ ၁၀၀ ကျော်ရှိနေပြီး သွေးတိတ်ဆေး၊ ပတ်တီး၊ အကိုက်အခဲပျောက်ဆေးနဲ့ syringe(အကြောဆေး)ချိတ်ဖို့ ဆေးရည်ဘူးတွေ ကုန်လုနီးပါးဖြစ်နေတာကြောင့် အရေးပေါ်လိုအပ်နေပြီး အခြားဆေးနဲ့ဆေးပစ္စည်းတွေလည်း လိုအပ်တယ်လို့ ဆိုပါတယ်။

လက်ရှိမှာတော့ CDM ဆရာဝန်အချို့နဲ့ စေတနာ့ဆေးဝန်ထမ်းအချို့က ဒဏ်ရာရရှိသူတွေကို ဆေးကုသမှုပေးနေပေမယ့် ဆေးဝါးမလုံလောက်တာကြောင့် သေဆုံးသူဦးရေ ထပ်တိုးလာမှာကို စိုးရိမ်နေတယ်လို့ ၎င်းက ဆက်ပြောပါတယ်။

မေ ၁၂ ရက် မနေ့မနက် ၉ နာရီခွဲလောက်က အိုးထိမ်းတွင်းရွာစာသင်ကျောင်းကို စစ်ကောင်စီတပ်က တိုက်လေယာဥ်နဲ့ ပေါင် ၅၀၀ ဗုံး ၁ လုံး ကြဲချတိုက်ခိုက်ခဲ့ရာ အခင်းဖြစ်နေရာမှာပဲ ကျောင်းသား၊ ကျောင်းသူ ၂၀ ဦးနဲ့ ဆရာမ ၂ ဦး သေဆုံးခဲ့တာပါ။

လက်ရှိအထိစစ်ကောင်စီရဲ့ လေယာဥ်ဗုံးကြဲချမှုကြောင့် Grade 2 အတန်းက မစုလတ်နိုင်၊ မငြိမ်းရွှေရတီမိုး၊ မောင်လွှမ်းပိုင်ထက်၊ မသွန်းစက်ဖြူ၊ မရွှန်းလဲ့ဝေ၊ Grade 3 အတန်းက မောင်စိုးမိုးသွန်း၊ မဖြိုးဝေဖြိုး၊ Grade 4 အတန်းက မောင်ချမ်းမြေ့အောင်၊ မထက်ရတီထွန်း၊ မမွန်မီမီအောင်၊ မမိုးဟေကျော်၊ Grade 5 အတန်းက မောင်ဇေယျာဖြိုး၊ Grade 7 အတန်းက မောင်စွမ်းကိုကို၊ Grade 9 အတန်းက မောင်မြတ်နိုးမောင်မောင်၊ Grade 10 အတန်းက မမို့မို့ဝင်း၊ Grade 11 ဖြစ်တဲ့ မသက်ထားဝေ တို့ ၂၁ ဦးနဲ့ ဆရာမ ဒေါ်ဇင်မာသူ၊ ဒေါ်ပန်းမို့မို့ဝေ စုစုပေါင်း ၂၃ ဦး သေဆုံးထားပါတယ်။

ဒီကနေ့ မေ ၁၃ ရက်မှာ သေဆုံးကလေးတွေကို သင်္ဂြိုဟ်ပေးနေပြီး ညနေပိုင်းအထိ လုပ်ဆောင်နေဆဲဖြစ်တယ်လို့ ဒေသခံတွေထံက သိရပါတယ်။

စာတည်း – ဟိန်းစံ