ရွှေဘို၊ မေ ၂၇၊ ၂၀၂၅။

စစ်ကိုင်းတိုင်း၊ ရွှေဘိုမြို့၊ အမှတ် ၅ ရပ်ကွက်ရှိ ရွှေပလောင်ပုဂ္ဂလိကဆေးရုံဝန်းအတွင်း ပစ်ခတ်မှုတွေဖြစ်ပြီး ပျူစောထီး ၂ ဦးနဲ့ အရပ်သား ၂ ဦးဒဏ်ရာရခဲ့တယ်လို့ ဒေသခံတွေထံက သိရပါတယ်။

မေ ၂၆ ရက် မနေ့မနက် ၈ နာရီကျော်မှာ မေခွန်ရွာပျူစောထီးခေါင်းဆောင် ပေါသိန်းနဲ့အင်အား ၁၀ ဦးခန့်ပါ ပျူစောထီးအဖွဲ့က ရွှေပလာင်ဆေးရုံမှာ လာရောက်ကုသနေစဥ် လက်နက်ကိုင်အဖွဲ့တခုက လာရောက်ပစ်ခတ်ခဲ့ရာ အပြန်အလှန် ပစ်ခတ်မှုတွေဖြစ်ပွားခဲ့တယ်လို့ ဆိုပါတယ်။

” ပေါသိန်းက ခြေထောက်ကျိုးလို့ ဆေးရုံလာတက်တာ။ အဲ့ဒါက ပုဂ္ဂလိက ဆေးရုံလေ။ ခုက ဒုတိယအကြိမ်ခြေထောက်ကျိုးတာ။ ချော်လဲလို့ကျိုးတာ။ ပထမတခေါက်ကလည်း ကျိုးထားသေးတာ။ အသက်တောင်မပါတာကံကောင်းတယ်” လို့ ဖြစ်စဥ်ကိုသိရှိထားတဲ့ဒေသခံတဦးက မြေလတ်အသံကို ပြောပါတယ်။

အပြန်အလှန်ပစ်ခတ်မှုတွေကြောင့် ဆေးရုံလုံခြုံရေးဝန်ထမ်း အသက် ၄၀ ကျော်အရွယ် အမျိုးသား ၁ ဦးနဲ့ ပစ်ခတ်မှုဖြစ်ချိန် စက်ဘီးနဲ့ဖြတ်သန်းသွားတဲ့ လမ်းသွား၊ လမ်းလာ အသက် ၃၀ ကျော်အရွယ် အမျိုးသမီး ၁ ဦးတို့( မစိုးရိမ်ရ)ဒဏ်ရာရသွားကာ ပျူစောထီးတွေဘက်ကလည်း ၂ ဦးဒဏ်ရာရတယ်လို့ ၎င်းဒေသခံထံက သိရပါတယ်။

ဆေးရုံဝန်းအတွင်း ကင်းလာစောင့်ပေးတဲ့ ပျူစောထီးတွေကို ရွှေဘိုတိုက်နယ် ၅ ပကဖတပ်ဖွဲ့က သွားရောက်ပစ်ခတ်တိုက်ခိုက်ခဲ့တာဖြစ်ပြီး တိုက်ခိုက်မှုအတွင်း ပျူစောထီး ၂ ဦး ထိခိုက်ခဲ့တယ်လို့ ရွှေဘိုမြို့နယ်ပကဖတာဝန်ရှိသူတဦးက အတည်ပြုပြောပါတယ်။

“ မျက်မြင်တော့ ၂ ကောင်လဲကျသွားတာရှိတယ်။ သူတို့စီးလာတဲ့ ပါဂျဲရိုးကားကလည်း ပျက်စီးတာရှိတယ်။ အတွင်းထဲက လူထိ၊ မထိတော့မသိရဘူး” ၎င်းက ပြောပါတယ်။

ပစ်ခတ်မှုအတွင်း ပျူစောထီးတွေထိခိုက်တာကြောင့် ယမန်နေ့ ညနေပိုင်းထိ စစ်ကောင်စီအဖွဲ့တွေဟာ ရွှေဘိုမြို့အဝင်အထွက်နေရာတွေမှာ ပိတ်ဆို့စစ်ဆေးခဲ့တယ်လို့ သိရပါတယ်။

မေခွန်ကျေးရွာအုပ်ချုပ်ရေးမှူးဖြစ်တဲ့ ပျုစောထီး ပေါသိန်းဟာ မြို့နယ်ပျူစောထီးခေါင်းဆောင်တဦးလည်း ဖြစ်ပြီး ကျေးရွာမှာ စစ်မှုထမ်းကြေးကောက်ခံတာ၊ မြေယာတွေသိမ်းဆည်းရောင်းစားတာတွေ လုပ်ဆောင်နေတယ်လို့ ရွှေဘိုမြို့နယ်ပကဖက ပြောပါတယ်။

မေ ၁၅ ရက်ကလည်း ရွှေဘိုမြို့နယ်၊ ညောင်ပင်သာ စိုက်ပျိုးရေးသိပ္ပံတက္ကသိုလ်နဲ့ ပန်းရံကျေးရွာသွား လမ်းပေါ်မှာ ဒုရဲအုပ်အပါအဝင် ၂ ဦးပစ်ခတ်ခံရပြီး သေဆုံးသွားတယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ မေ ၂၅၊ ၂၀၂၅ ။

စစ်ကိုင်းတိုင်း၊ ရွှေဘိုခရိုင်အတွင်းရှိ ဒေသခံပြည်သူတွေကို ရွှေဘိုခရိုင်ပြည်သူ့ကာကွယ်ရေးတပ်ဖွဲ့ တပ်ရင်း ၄ တပ်ဖွဲ့ဝင်တွေက လေကြောင်းအန္တရာယ်နဲ့ ပတ်သက်တဲ့ အသိပညာပေးတာနဲ့ လေကြောင်းတိုက်ခိုက်မှု ကြုံလာချိန်မှာ လုပ်ဆောင်ရမယ့်အချက်တွေကို လက်တွေ့သရုပ်ပြဟောပြောမှု ပြုလုပ်ပေးခဲ့တယ်လို့ အမျိုးသားညီညွတ်ရေးအစိုးရ – NUG ကာကွယ်ရေးဝန်ကြီးဌာနက မေ ၂၅ ရက် ဒီကနေ့မှာ ထုတ်ပြန်ပါတယ်။

ရွှေဘိုခရိုင်အတွင်းက ကျေးရွာတွေကို စစ်ကောင်စီတပ်က လေကြောင်းကနေ မကြာခဏဗုံးကြဲတိုက်ခိုက်နေပြီး အခုမေလအတွင်းမှာပဲ ရွှေဘိုခရိုင်၊ ဝက်လက်မြို့နယ်အတွင်းက ကျေးရွာ ၆ ရွာထက်မနည်း လေကြောင်းတိုက်ခိုက်ခံရတာကြောင့် လူ ၁၁ ဦးသေဆုံးထားပါတယ်။

စစ်ကောင်စီတပ်ဟာ တော်လှန်ရေးတပ်တွေ စိုးမိုးထိန်းချုပ်ထားတဲ့ နယ်မြေတွေကို နေ့စဉ်နီးပါး လေကြောင်းကနေ ဗုံးကြဲတိုက်ခိုက်နေတာဖြစ်ပြီး အဆိုပါဗုံးကြဲတိုက်ခိုက်မှုတွေကို ကာကွယ်နိုင်ဖို့ ဒေသခံပြည်သူတွေအနေနဲ့ ဗုံးခိုကျင်းတွေ အသီးသီးတူးဖော်နေထိုင်နေရတာလည်း ဖြစ်ပါတယ်။

မုံရွာ၊ မေ ၂၃၊ ၂၀၂၅။

စစ်ကိုင်းတိုင်း၊ မုံရွာမြို့နယ်၊ နဂါးတွင်းကျေးရွာမှာ လက်နက်ကြီးကျလို့ ရွာခံ ၂ ဦး သေဆုံးပြီး ၁၀ ဦးဒဏ်ရာရတယ်လို့ မုံရွာမြို့နယ်ပြည်သူ့ကာကွယ်ရေးအဖွဲ့ တိုက်နယ် ၃ တာဝန်ခံဆီက သိရပါတယ်။

မေ ၂၂ ရက်ည ၇ နာရီခန့်မှာ မုံရွာမြို့အဝင် မအူဂိတ်ကနေပစ်ခတ်တဲ့ လက်နက်ကြီးဟာ ကျေးရွာထဲ ကျရောက်ပေါက်ကွဲပြီး ဒေသခံတွေထိခိုက်သေဆုံးခဲ့တာလို့ ဆိုပါတယ်။

“နဂါးတွင်းရွာထဲကို ၆ လုံးကျတယ်။ ရွာတည့်တည့်ဘဲ ရွာလယ်နဲ့ရွာအရှေ့ဘက်ကျတယ်။ ၁၂၀ မမ ချည်းပဲ။ သူတို့ထုတဲ့အချိန်ရှောင်ကြသေးတယ်။ မလွတ်ကြတာ။ အိမ်တိုင်းကလည်း ဗုံးခိုကျင်းမရှိတော့ လက်နက်ကြီးပေါက်ကွဲအားလည်းပြင်းလို့ ထိခိုက်များသွားတာ”လို့ မုံရွာမြို့နယ်ပကဖ တိုက်နယ် ၃ တာဝန်ခံ ကိုမီးပွားကပြောပါတယ်။

လက်နက်ကြီးထိမှန်လို့ အသက် ၅၃ နှစ်အရွယ် ဒေါ်စန်းဘို၊ ၄၅ နှစ်အရွယ် ကိုစိုးတို့ နေရာတင် သေဆုံးသွားပြီး အသက် ၁၄ နှစ်ကနေ ၅၀ ကြား အမျိုးသား ၇ ဦး၊ အသက် ၃၀ ကနေ ၆၀ ကြား အမျိုးသမီး ၃ ဦးထိခိုက်ဒဏ်ရာသွားတယ်လို့ ဆိုပါတယ်။

ထိခိုက်ဒဏ်ရာရသူတွေထဲက ၅ ဦးက စိုးရိမ်ရအခြေအနေမှာရှိနေလို့ နီးစပ်ရာမှာ ဆေးကုသနေရကာ လက်နက်ကြီးကျလို့ နေအိမ် ၁၀ လုံးပျက်စီးပြီး နွား ၂ ကောင်လည်းသေဆုံးသွားတယ်လို့ သိရပါတယ်။

နဂါးတွင်းကျေးရွာဟာ အိမ်ခြေ ၁,၀၀၀ ကျော် လူဦးရေ ၅,၀၀၀ ဝန်းကျင်ရှိတဲ့ကျေးရွာဖြစ်ပြီး လက်နက်ကြီးကျတဲ့အတွက် ဒေသခံတွေလည်းတိမ်းရှောင်ခဲ့ရကာ ဒီမနက်ပိုင်းမှာတော့ ရွာထဲကို ပြန်လည်ဝင်ရောက်နေပြီလို့ ကိုမီးပွားကပြောပါတယ်။

စစ်အာဏာသိမ်းပြီး ၄ နှစ်ကျော်ကာလအတွင်း နဂါးတွင်းရွာကို မုံရွာအခြေစိုက် အနောက်မြောက်တိုင်း စစ်ဌာနချုပ်နဲ့ မအူစစ်ကောင်စီဂိတ်ကနေ လက်နက်ကြီးနဲ့ပစ်ခတ်တာ အကြိမ်ရေ ၅၀ ကျော်ရှိထားပြီး ရွာခံ ၅ ဦးလည်းသေဆုံးထားတယ်လို့ မုံရွာမြို့နယ်ပကဖ တိုက်နယ် ၃ တာဝန်ခံ ဆီကသိရပါတယ်။

ပြီးခဲ့တဲ့ ဧပြီလ စတုတ္ထအပတ်အတွင်းက နဂါးတွင်းကျေးရွာကို မအူဂိတ်စောင့် စစ်ကောင်စီတပ်ဖွဲ့ဝင်တွေက လက်နက်ကြီး ၄ လုံးပစ်ခတ်ခဲ့ရာ ကျေးရွာအနီးကျရောက်ပေါက်ကွဲခဲ့ပေမယ့် လူထိခိုက်မှုမရှိခဲ့ဘူးလို့ သိရပါတယ်။

စာတည်း – လင်း

ကန့်ဘလူ၊ မေ ၂၂၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်ထဲက ကျေးရွာ ၄ ရွာကို စစ်ကောင်စီတပ်က မေ ၂၁ ရက် တရက် တည်းမှာပဲ လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၂ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

ချပ်ကြီး၊ သင်တော၊ ပေါက်ဆိန်ကုန်း၊ ဇော်ချောင်း စတဲ့ကျေးရွာ ၃ ရွာကို Y12 ၁ စီးနဲ့ နေ့လယ် ၁၂ နာရီကနေ ၁ နာရီအတွင်း တိုက်ခိုက်ခဲ့တာလို့ဆိုပါတယ်။

“ဗုံးကြဲတာက သင်တောရွာအနီးပတ်ဝန်းကျင်ကိုအလုံး ၁၀ ကျော်မယ်။ ပေါက်ဆိန်ကုန်းကို ၈ လုံးကြဲတယ်။ ဇော်ချောင်းကိုတော့ ၃ လုံးပါ။ ချပ်ကြီးကို ၂ လုံးကြဲတယ်။ ပျက်စီးမှုအခြေအနေတွေကိုတော့ ဖုန်းလိုင်းမရလို့အသေးစိတ်မသိရပေမယ့် တော်တော်များမှာပါ”လို့ မြေပြင်အခြေအနေကိုသိရှိထားတဲ့ ကန့်ဘလူဒေသခံ အမျိုးသားတဦးကပြောပါတယ်။

သေဆုံးသူ ၂ ဦးဟာ ပေါက်ဆိန်ကုန်းရွာခံ အသက် ၅၀ အရွယ်အမျိုးသားနဲ့ ချပ်ကြီးရွာခံ အသက် ၃၀ အရွယ်အမျိုးသားတို့ဖြစ်ပြီး သင်တောကျေးရွာက အသက် ၅၀ အရွယ်အမျိုးသမီး ၁ ဦးလည်း ဒဏ်ရာရရှိခဲ့တယ်လို့ဆိုပါတယ်။

မေ ၁၈ ရက်မှာ ကိုးတောင်ဘို့နဲ့ ချပ်ကြီးကျေးရွာကထွက်လာကြတဲ့ အင်အား ၂၀၀ ကျော်ရှိတဲ့ စစ်ကောင်စီစစ်ကြောင်းဟာ သင်တောရွာကိုဝင်ရောက်တပ်စွဲနေခဲ့ပြီး အဲ့ဒီနေရာကို တော်လှန်ရေးတပ်ဖွဲ့တွေက တိုက်ခိုက်လာမှာကိုစိုးရိမ်တဲ့တွက် အခုလိုဗုံးကြဲတာဖြစ်နိုင်တယ်လို့ အထက်ပါ အမျိုးသားကခန့်မှန်းပါတယ်။

အခုလို ဗုံးကြဲတိုက်ခိုက်ခံရတဲ့ကျေးရွာတွေဟာ စစ်ကောင်စီတပ်စွဲထားတဲ့ သင်တောကျေးရွာ အနီးဝန်းကျင်ကကျေးရွာတွေဖြစ်ပါတယ်။

လေကြောင်းတိုက်ခိုက်ခံရပြီးနောက် ချပ်ကြီး၊ သင်တော၊ပေါက်ဆိန်ကုန်း၊ ဇော်ချောင်း၊ အောက်တင်း စတဲ့ကျေးရွာတွေက ဒေသခံတွေလည်း ရွာလုံးကျွတ်ထွက်ပြေးနေကြရတယ်လို့ သိရပါတယ်။

ပြီးခဲ့တဲ့ မေ ၁၈ ရက်နေ့လယ် ၁၂ နာရီဝန်းကျင်မှာလည်း စစ်ကိုင်းတိုင်း၊ ပုလဲမြို့နယ်၊ နွယ်အင်းကျေးရွာကို ဗုံးကြဲတိုက်ခိုက်လို့ ကျောင်းသား၊ ကျောင်းသူတွေအပါ ၅ ဦး သေဆုံးခဲ့ပါသေးတယ်။

ဉာဏ်လင်းသစ်သုသေသနအဖွဲ့ရဲ့ အစီရင်ခံစာအရ အခုနှစ် မေ ၉ ရက်ကနေ ၁၅ ရက်အတွင်း မန္တလေး၊ စစ်ကိုင်းနဲ့ ပဲခူး(အရှေ့) ဒေသများအပါအဝင် ဒေသ ၁၄ ခုမှာ အရပ်သားတွေအပေါ်ပစ်မှတ်ထားတဲ့ လေကြောင်းတိုက်ခိုက်မှု ၆၁ ခုရှိခဲ့ပြီး ဒီတိုက်ခိုက်မှုတွေကြောင့် အရပ်သား ၉၄ ဦးသေဆုံးကာ ၂၄၅ ဦးထိခိုက်ခဲ့တယ်လို့ သိရပါတယ်။

စာတည်း – လင်း