မင်းလှ၊ မေ ၂၂၊ ၂၀၂၅။

ပဲခူးတိုင်း၊ မင်းလှမြို့နယ်က စစ်ကောင်စီတပ်သတင်းပေး ၁ ဦး မေ ၂၂ ရက် ဒီမနက် ၇ နာရီမှာ ပစ်ခတ်ခံရပြီး သေဆုံးခဲ့တယ်လို့ သာယာဝတီခရိုင်တပ်ရင်း ၃၈၀၂ တပ်ခွဲ ၅ က ထုတ်ပြန်ပါတယ်။

သေဆုံးသူဟာ စိန်ကန့်လန့်ရွာ၊ ရွှေကြီးမြင့်ရပ်ကွက်နေ အသက် ၅၀ အရွယ် ကိုစန်းဌေးဖြစ်ပြီး သူ့ကို မေ ၁၉ ရက်ညနေ ၅ နာရီကျော်က စိန်ကန့်လန့်-မြို့ချောင်း ရိုးမဖြတ်ကျော်လမ်းဘေးရှိ ပျဥ်းကတိုးခင်းရွာအနီးမှာ ကျည် ၉၂ တောင့်၊ မိုလ်ဘိုင်းဖုန်း ၁လုံး၊ ဆိုင်ကယ် ၁ စီးနဲ့အတူဖမ်းဆီးခဲ့တာပါ။

အဲ့ဒီနောက် ကာာကွယ်ရေတပ်တွေက ဖမ်းဆီးချုပ်နှောင်ထားကာ ဒီမနက်ပိုင်းမှာ ကင်းတာဝန်ကျတပ်ဖွဲ့ဝင်တွေက စစ်ဆေးမေးမြန်းဖို့အချုပ်ထဲမှခေါ်ထုတ်ချိန် တပ်ဖွဲ့ဝင်တွေကို ခုခံထွက်ပြေးတာကြောင့် လိုက်လံပစ်ခတ်ဖမ်းဆီးခဲ့တာလို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ မှ သတင်းနဲ့ ပြန်ကြားရေးတာဝန်ခံ ရိုးမမြေက ဆိုပါတယ်။

“သူ့(စန်းဌေး)ကို ကြိုးချည်ထားတာမရှိတော့ အထဲကနေ အပြင်ကိုခေါ်ရော။ ရဲဘော်တွေကို တွန်းပြီး ထွက်ပြေးတာ။ သူဖမ်းဆီးခံရလို့ အခုမနက် စကစအင်အား ၁၀၀ ကျော်လည်း စစ်ကြောင်းထိုးဖို့ ဘန့်ဘွေးကုန်းကိုရောက်နေတယ်ကြားလို့ အသေပဲပစ်လိုက်ရတာ။”လို့ ဆိုပါတယ်။

ကိုစန်းဌေးဟာ ၂၀၂၃ ကစတင်ကာ စစ်ကောင်စီတပ်ရဲ့သတင်းပေးလုပ်နေပြီး လက်လုပ်သေနတ် (တတောင့်ထိုး) ၁ လက်ရရှိကိုင်ဆောင်နေသူဖြစ်တယ်လို့ သိရပြီး ဖမ်းဆီးချိန်မှာတော့ သေနတ်ကို မတွေ့ရှိခဲ့ဘူးလို့ ရဲဘော်ရိုးမမြေက ပြောဆိုပါတယ်။

၂၀၂၃ ဧပြီလထဲမှာ သာယာဝတီခရိုင်တပ်ရင်း ၃၈၀၂၊ တပ်ခွဲ ၃ ရဲ့ စခန်းကို စစ်ကောင်စီတပ်ကဝင်ရောက်သိမ်းချိန်မှာလည်း ကိုစန်းဌေးပါဝင်ခဲ့ပြီး အဲ့ဒီအချိန်တုန်းက လက်နက်၊ ခဲယမ်း၊ ဆိုင်ကယ်၊ မီးစက်တွေပါအဝင် ငွေကျပ်သိန်း ၃၀၀ ကျော်ဖိုး ဆုံးရှုံးခဲ့ရတယ်လို့ သိရပါတယ်။

စာတည်း – လင်း

ကန့်ဘလူ၊ မေ ၂၂၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်ထဲက ကျေးရွာ ၄ ရွာကို စစ်ကောင်စီတပ်က မေ ၂၁ ရက် တရက် တည်းမှာပဲ လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၂ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

ချပ်ကြီး၊ သင်တော၊ ပေါက်ဆိန်ကုန်း၊ ဇော်ချောင်း စတဲ့ကျေးရွာ ၃ ရွာကို Y12 ၁ စီးနဲ့ နေ့လယ် ၁၂ နာရီကနေ ၁ နာရီအတွင်း တိုက်ခိုက်ခဲ့တာလို့ဆိုပါတယ်။

“ဗုံးကြဲတာက သင်တောရွာအနီးပတ်ဝန်းကျင်ကိုအလုံး ၁၀ ကျော်မယ်။ ပေါက်ဆိန်ကုန်းကို ၈ လုံးကြဲတယ်။ ဇော်ချောင်းကိုတော့ ၃ လုံးပါ။ ချပ်ကြီးကို ၂ လုံးကြဲတယ်။ ပျက်စီးမှုအခြေအနေတွေကိုတော့ ဖုန်းလိုင်းမရလို့အသေးစိတ်မသိရပေမယ့် တော်တော်များမှာပါ”လို့ မြေပြင်အခြေအနေကိုသိရှိထားတဲ့ ကန့်ဘလူဒေသခံ အမျိုးသားတဦးကပြောပါတယ်။

သေဆုံးသူ ၂ ဦးဟာ ပေါက်ဆိန်ကုန်းရွာခံ အသက် ၅၀ အရွယ်အမျိုးသားနဲ့ ချပ်ကြီးရွာခံ အသက် ၃၀ အရွယ်အမျိုးသားတို့ဖြစ်ပြီး သင်တောကျေးရွာက အသက် ၅၀ အရွယ်အမျိုးသမီး ၁ ဦးလည်း ဒဏ်ရာရရှိခဲ့တယ်လို့ဆိုပါတယ်။

မေ ၁၈ ရက်မှာ ကိုးတောင်ဘို့နဲ့ ချပ်ကြီးကျေးရွာကထွက်လာကြတဲ့ အင်အား ၂၀၀ ကျော်ရှိတဲ့ စစ်ကောင်စီစစ်ကြောင်းဟာ သင်တောရွာကိုဝင်ရောက်တပ်စွဲနေခဲ့ပြီး အဲ့ဒီနေရာကို တော်လှန်ရေးတပ်ဖွဲ့တွေက တိုက်ခိုက်လာမှာကိုစိုးရိမ်တဲ့တွက် အခုလိုဗုံးကြဲတာဖြစ်နိုင်တယ်လို့ အထက်ပါ အမျိုးသားကခန့်မှန်းပါတယ်။

အခုလို ဗုံးကြဲတိုက်ခိုက်ခံရတဲ့ကျေးရွာတွေဟာ စစ်ကောင်စီတပ်စွဲထားတဲ့ သင်တောကျေးရွာ အနီးဝန်းကျင်ကကျေးရွာတွေဖြစ်ပါတယ်။

လေကြောင်းတိုက်ခိုက်ခံရပြီးနောက် ချပ်ကြီး၊ သင်တော၊ပေါက်ဆိန်ကုန်း၊ ဇော်ချောင်း၊ အောက်တင်း စတဲ့ကျေးရွာတွေက ဒေသခံတွေလည်း ရွာလုံးကျွတ်ထွက်ပြေးနေကြရတယ်လို့ သိရပါတယ်။

ပြီးခဲ့တဲ့ မေ ၁၈ ရက်နေ့လယ် ၁၂ နာရီဝန်းကျင်မှာလည်း စစ်ကိုင်းတိုင်း၊ ပုလဲမြို့နယ်၊ နွယ်အင်းကျေးရွာကို ဗုံးကြဲတိုက်ခိုက်လို့ ကျောင်းသား၊ ကျောင်းသူတွေအပါ ၅ ဦး သေဆုံးခဲ့ပါသေးတယ်။

ဉာဏ်လင်းသစ်သုသေသနအဖွဲ့ရဲ့ အစီရင်ခံစာအရ အခုနှစ် မေ ၉ ရက်ကနေ ၁၅ ရက်အတွင်း မန္တလေး၊ စစ်ကိုင်းနဲ့ ပဲခူး(အရှေ့) ဒေသများအပါအဝင် ဒေသ ၁၄ ခုမှာ အရပ်သားတွေအပေါ်ပစ်မှတ်ထားတဲ့ လေကြောင်းတိုက်ခိုက်မှု ၆၁ ခုရှိခဲ့ပြီး ဒီတိုက်ခိုက်မှုတွေကြောင့် အရပ်သား ၉၄ ဦးသေဆုံးကာ ၂၄၅ ဦးထိခိုက်ခဲ့တယ်လို့ သိရပါတယ်။

စာတည်း – လင်း

သပိတ်ကျင်း၊ မေ ၂၀၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ လိပ်ကျရွာအနီးရှိရွှေလုပ်ကွက်ကို စစ်ကောင်စီက လေယာဥ်နဲ့ ဗုံးကြဲတိုက်ခိုက်လို့ အမျိုးသား ၁ ဦးသေဆုံးပြီး ၂ ဦးဒဏ်ရာရရှိခဲ့တယ်လို့ ပြင်ဦးလွင်ခရိုင်ပြည်သူ့ကာကွယ်ရေးအဖွဲ့ဆီကနေ သိရပါတယ်။

မေ ၁၉ ရက် မနက် ၁၀ နာရီ ၂၀ မိနစ်အချိန်မှာ စစ်ကောင်စီတပ်တိုက်လေယာဥ် ၁ စီးနဲ့ ရွှေလုပ်ကွက်ပေါ်ကို ပေါင် ၃၀၀ ဗုံး ၂ လုံးကို ကြဲချခဲ့ပြီး ရွှေလုပ်ကွက်အတွင်းရှိ နေအိမ်ပေါ် ကျရောက်ပေါက်ကွဲခဲ့တာလို့ ဆိုပါတယ်။

” ရွှေလုပ်ကွက်ထဲက အိမ်ပေါ်ကိုကျတာ။ ဒဏ်ရာရသူနှစ်ယောက်က တစ်ယောက်က လက်ထိတယ်။ တစ်ယောက်က ပေါင်ထိတယ်ဗျ။ လက်နဲ့ပေါင် ထိထားတာဆိုတော့ အရမ်းကြီး သေစေနိုင်လောက်ထိတော့ မစိုးရိမ်ရဘူး” လို့ ပြင်ဦးလွင်ခရိုင်ပြည်သူ့ကာကွယ်ရေးအဖွဲ့သတင်းတာဝန်ခံတဦးက မြေလတ်အသံကို ပြောပါတယ်။

ဗုံးကြဲတိုက်ခိုက်မှုကြောင့် ရွှေလုပ်ကွက်က လုပ်သားတွေဖြစ်တဲ့ အသက် ၁၅ နှစ်အရွယ် အမျိုးသား ၁ ဦးနေရာမှာဘဲ သေဆုံးခဲ့ပြီး အသက် ၁၅ နှစ်နဲ့ အသက် ၃၀ အရွယ် အမျိုးသား ၂ ဦးတို့ ဒဏ်ရာရခဲ့တယ်လို့ ဆေးကုသမှုပေးနေကာ သေဆုံးအမျိုးသားရဲ့ ရုပ်အလောင်းကိုတော့ မေ ၁၉ ရက်နေ့ ညနေပိုင်းမှာဘဲ သင်္ဂြိုဟ်လိုက်ပြီလို့ သိရပါတယ်။

စစ်ကောင်စီဟာ ရွှေလုပ်ကွက်ပေါ်ကို လေကြောင်းသုံး ဗုံးကြဲချခဲ့တာကြောင့် ပြည်သူပိုင်လူနေအိမ် ၃ လုံးနဲ့ ကား ၁ စီး၊ ဆိုင်ကယ် ၁ စီးလည်း ဗုံးထိမှန်ပျက်စီးသွားခဲ့တယ်လို့ သိရပါတယ်။

မေ ၁၈ ရက်ညပိုင်းမှာ သပိတ်ကျင်းမြို့နယ်၊ လိပ်ကျရွာကို တိုက်လေယာဥ်နဲ့ ဗုံးကြဲခဲ့လို့ အမျိုးသား ၂ ဦး ဒဏ်ရာရခဲ့ပြီး ဧပြီလအတွင်းမှာလည်း လိပ်ကျရွာလယ်စျေးကို လေယာဥ်နဲ့ ဗုံးကြဲခံရလို့ အရပ်သား ၁၃ ဦးသေဆုံးမှုရှိခဲ့ပါတယ်။

စာတည်း – ဟိန်းစံ

မြင်းခြံ၊ မေ ၂၀၊ ၂၀၂၅။

မန္တလေးတိုင်း၊ မြင်းခြံမြို့နယ်၊ ကန်ဆင့်ကျေးရွာမှာ လေယာဥ်ဗုံးထိမှန်တာကြောင့် ရွာခံအမျိုးသမီး ၂ ဦး သေဆုံးပြီး ၄ ဦးဒဏ်ရာရခဲ့တယ်လို့ ဒေသခံတွေထံက သိရပါတယ်။

မေ ၁၉ ရက် ယမန်နေ့မွန်းတည့် ၁၂ နာရီခန့်မှာ စစ်ကောင်စီတပ် တိုက်လေယာဥ် ၁ စီးက ကန်ဆင့်ရွာအတွင်း ဗုံး ၂ လုံးကြဲချခဲ့ရာ ကျေးရွာအလယ်ဘုန်းကြီးကျောင်းအနီးရှိ ဒေါ်မေရီမြင့်နေအိမ်နဲ့ ဦးမြင့်ခိုင်တို့နေအိမ်တွေပေါ်ကို ကျရောက်ပေါက်ကွဲခဲ့တာလို့ ဆိုပါတယ်။

” ခုထိတဲ့သူတွေကလည်း (လေယာဥ်ကြောက်လို့) ရွာထဲမှာမနေဘူး။ ဒီအချိန်မှာ လုပ်ငန်းချိန်၊ ကြက်သွန်သိမ်းထားတဲ့အချိန်ဆိုတော့ ဂိုဒေါင်တွေထဲမှာ ကြက်သွန်တွေထားတာ။ ကြက်သွန်က ပုပ်တတ်တဲ့သဘောရှိတော့ အဲဒါကိုရှင်းလင်းရေးလာလုပ်တဲ့အချိန် အိမ်မှာရှိနေချိန် ဖြစ်သွားတာ” လို့ ကျေးရွာနဲ့နီးစပ်သူတဦးက မြေလတ်အသံကို ပြောပါတယ်။

စစ်ကောင်စီက ကန်ဆင့်ရွာကို မတ် ၂၀ ရက်မှာ ပထမအကြိမ်လေယာဥ်နဲ့ဗုံးကြဲလို့ အမျိုးသား ၁ ဦးသေဆုံးခဲ့ပြီးနောက် ရွာခံအများစုဟာ ကျေးရွာအနီးတောတောင်တွေနဲ့ ယာခင်းတွေမှာ သွားရောက်နေထိုင်ကြပြီး အလုပ်ကိစ္စတွေရှိမှ ကျေးရွာတွင်းယာယီပြန်လည်နေထိုင်ကြတာပါ။

လေယာဥ်ဗုံးကျရောက်ပေါက်ကွဲတာကြောင့် နေအိမ်တွင်းရှိနေတဲ့ အသက် ၅၅ နှစ်အရွယ် ဒေါ်မေရီမြင့်နဲ့ အမဖြစ်သူ အသက် ၅၆ နှစ်အရွယ် ဒေါ်ခင်ဌေးရီတို့ ၂ ဦးဟာ နေရာမှာ သေဆုံးသွားခဲ့ပြီး အသက် ၃၀ ကနေ ၆၀ ကြား အမျိုးသား ၂ ဦးနဲ့ အမျိုးသမီး ၂ ဦးတို့ ဒဏ်ရာရခဲ့ကာ ဒဏ်ရာရသူတွေအနက် အမျိုးသမီး ၁ ဦးက စိုးရိမ်ရတဲ့အခြေအနေရှိနေတယ်လို့ ၎င်းက ဆိုပါတယ်။

လေယာဥ်ဗုံးကျရောက်ပေါက်ကွဲတဲ့ နေအိမ် ၂ လုံးအပါ နေအိမ် ၄ လုံး ထိခိုက်ပျက်စီးခဲ့ပြီး သေဆုံးအမျိုးသမီး ၂ ဦးကို ယမန့်နေမှာပဲ သင်္ဂြိုဟ်ပေးခဲ့ကာ ဒဏ်ရာရသူ ၄ ဦးကို နီးစပ်တဲ့ ဆေးရုံတခုမှာ ဆေးကုသမှုပေးနေတယ်လို့ သိရပါတယ်။

ကန်ဆင့်ကျေးရွာဟာ အိမ်ခြေ ၂၀၀ ကျော် လူဦးရေ ၁,၀၀၀ ဝန်းကျင်နေထိုင်ပြီး လယ်ယာကိုင်းလုပ်ငန်းကို လုပ်ကိုင်ကြသူတွေအများစုနေထိုင်ကြပြီး အဆိုပါရွာနဲ့အနီးတဝိုက်မှာ တော်လှန်ရေးအင်အားစုတွေ လှုပ်ရှားသွားလာတာရှိပေမယ့် တိုက်ပွဲဖြစ်ပွားတာမရှိဘဲ လေကြောင်းဗုံးကြဲတိုက်ခိုက်မှုပြုလုပ်ခဲ့တာလည်း ဖြစ်ပါတယ်။

ပြီးခဲ့တဲ့ မေလဒုတိယပတ်အတွင်းမှာ မြင်းခြံခရိုင် မြင်းခြံ၊ တောင်သာ၊ နွားထိုးကြီးနဲ့ ငါန်းဇွန်မြို့နယ်တွေအတွင်း နေရာ ၈ ခုထက်မနည်းမှာ တိုက်ပွဲတွေဖြစ်ပွားခဲ့ပြီး အဆိုပါတိုက်ပွဲတွေအတွင်း စစ်ကောင်စီက လေကြောင်းဆက်တိုက်အသုံးပြုဗုံးကြဲခဲ့လို့ တော်လှန်ရေးတပ်ဖွဲ့ဝင်တွေနဲ့ ဒေသခံတွေ ထိခိုက်သေဆုံးခဲ့ပါသေးတယ်။

စာတည်း – ဟိန်းစံ

ဒေသတွင်းဖုန်းလိုင်းတွေပြတ်တောက်နေ

ပုလဲ၊ မေ ၁၉၊ ၂၀၂၅။

စစ်ကိုင်းတိုင်း၊ ပုလဲမြို့နယ်၊ နွယ်အင်းကျေးရွာကို မေ ၁၈ ရက်နေ့လယ် ၁၂ နာရီဝန်းကျင်မှာ စစ်ကောင်စီတပ်က လေကြောင်းကဗုံးကြဲတိုက်ခိုက်လို့ ကျောင်းသား၊ ကျောင်းသူတွေအပါ ၅ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

ဗုံးကြဲတိုက်ခိုက်မှုကြောင့် Grade 6 ကျောင်းသားမောင်ဖုန်းမင်းသန့်၊ Grade 12 ကျောင်းသူ မကြယ်ဇင်ဦး၊ ဒေါ်မရီ၊ မသင်းမြတ်သူနဲ့ နောက်ထပ်ဒေသခံ ၁ ဦးတို့သေဆုံးခဲ့ပြီး သူနဲ့ပတ်သက်တဲ့ အချက်အလက်ကိုတော့မသိရသေးဘူးလို့ ဆိုပါတယ်။

“ပုလဲမြို့နယ်က စစ်ရေးအရကငြိမ်နေတာကြာပါပြီ။ အကြောင်းမဲ့ကို ဂျက်ဖိုက်တာနဲ့ ၃ ကြိမ်လာပစ်သွားတာ။ အလုံးရေတော့မသိရဘူး။ အရပ်သားပြည်သူနေအိမ်တွေပေါ်ကျတာ”လို့ ဒေသခံတဦးက ပြောပါတယ်။

မသင်းမြတ်သူနဲ့ ဒေသခံတဦးတို့မှာ ဗုံးစထိမှန်ဒဏ်ရာနဲ့ ဆေးကုသနေချိန်အတွင်းသေဆုံးခဲ့ပြီး ကျန် ၃ ဦးကတော့ ပွဲချင်းပြီးသေဆုံးခဲ့တာလို့ သူကဆက်ပြောပါတယ်။

နွယ်အင်းကျေးရွာမှာ ကာကွယ်ရေးတပ်ဖွဲ့တွေ သွားလာလှုပ်ရှားတာလည်းမရှိသလို တိုက်ပွဲဖြစ်တာတွေလည်းမရှိဘဲ အကြောင်းမဲ့လာရောက်ပစ်ခတ်သွားတာလို့ အထက်ပါဒေသခံက ဆက်ပြောပါတယ်။

“အဓိကကတော့အရပ်သားတွေကြီးပါပဲ ကာကွယ်ရေးတပ်ဖွဲ့တွေလဲမရှိပဲနဲ့ကို အရပ်သားနေအိမ်တွေ ပေါ် ကြဲသွားတာပဲ။ တကယ့်ကို ကျေးရွာနေပြည်သူတွေ အေးအေးဆေးဆေး နေထိုင်နေတဲ့လူတွေရဲ့ အပေါ်မှာ လူမဆန်တဲ့လုပ်ရပ်တွေပေါ့နော်။ တောက်လျှောက်စစ်ရာဇဝတ်မှုတွေပါပဲ။” လို့ ဒေသေခံတဦးက ပြောပါတယ်။

မေလပထမပတ်လောက်ကစလို့ လက်ရှိအချိန်ထိ နွယ်အင်းကျေးရွာအနီးမှာ ဖုန်းလိုင်းပြတ်တောက်မှုတွေရှိနေတယ်လို့လည်း သိရပါတယ်။

“ဒီရွာကပြောရရင်အရင်ကလဲကြဲထားတာလဲရှိတယ်။ ထိခိုက်ဒဏ်ရာတွေလဲရခဲ့တယ်။ အခုလည်း စစ်ရေးလည်းမရှိပါဘူး။ ဘာကနေဘယ်လိုလာကြဲလဲတော့မသိပါဘူး။ အခုတလောသူတို့တွေက အတော်များများဟုတ်ဟုတ်မဟုတ်ဟုတ် လုပ်နေတာချည်းပါပဲ” လို့ ဒေသခံအမျိုးသမီးတဦးက ဆိုပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ မေ ၁၆ ရက်အထိ နိုင်ငံတဝန်း စစ်ကောင်စီနဲ့ ၎င်းတို့ရဲ့လက်ပါးစေတွေကြောင့် သေဆုံးခဲ့တဲ့ပြည်သူစုစုပေါင်း ၆,၆၈၇ ဦးရှိပြီလို့ နိုင်ငံရေးအကျဥ်းသားများကူညီစောင့်ရေးအသင်း – AAPP ရဲ့အစီခံစာအရ သိရပါတယ်။

စာတည်း – လင်း

ယင်းမာပင်၊ မေ ၁၈၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်၊ အောင်ချမ်းအေးရွာမှ သစ်မြစ်တူးပြန်လာတဲ့ အမျိုးသား ၁ ဦး မေ ၁၇ ရက် ညနေပိုင်းမှာ မိုးကြိုးပစ်ခံရပြီးသေဆုံးခဲ့တယ်လို့ ဒေသခံတွေဆီက သိရပါတယ်။

အသက် ၃၃ နှစ်အရွယ် ကိုချစ်ကိုကိုဟာ လုပ်ဖော်ကိုင်ဖက် ၃ ဦးနဲ့ သစ်မြစ်တူးရာကနေ ရွာကိုခြေလျင်ပြန်လာချိန်လမ်းမှာ မိုးကြိုးပစ်ခံရပြီးသေဆုံးခဲ့တာပါ။

“ကြားထဲကရော သူရော ၃ ယောက်လုံးလဲကျတာ၊ သူကျတော့ တစောင်းမှောက်ကျတာ၊ ဟိုကောင်တွေက ပက်လက်လန်တာ၊ ကျနော်ကတော့ ကုန်းကုန်းလေးပဲ၊ ဘာမှမမြင်ရတော့ဘူး လူကကျင်ထုံသွားပြီ၊ သူ့ကိုနှိုးတဲ့အချိန်ကျ နှိုးလို့မရဘူး၊ ဟန်ဆောင်တာနေမှာဆိုပြီး လက်နဲ့ပုတ်ပြီး နှိုးတဲ့အချိန်ထပြီး မျက်လုံးကတော့ မျက်တောင်ခပ်တယ်၊ ပါးစပ်ထဲက သွေးတွေထွက်လာပြီ။” လို့ အတူပြန်လာတဲ့ လုပ်ဖော်ကိုင်ဖက်က ပြောပါတယ်။

ကိုချစ်ကိုကိုမှာ အလယ်တန်းနဲ့ မူလတန်းအရွယ် သားသမီး ၃ ယောက်ရှိပြီး သူ့အမျိုးသမီးကတော့ နာဂဒေသကို ရောက်နေတယ်လို့သိရပါတယ်။

ကိုချစ်ကိုကိုရဲ့ ဈာပနကိုတော့ ဒီနေ့နေ့ခင်းမှာပဲပြုလုပ်မယ်လို့ ကူညီဆောင်ရွက်နေသူတွေဆီက သိရပါတယ်။

ပြီးခဲ့တဲ့မေ ၁၁ ရက် ညနေပိုင်းကလည်း မကွေးတိုင်း၊ မြို့သစ်မြို့နယ်၊ တလုပ်ပင်အုပ်စု၊ တလုပ်ပင် ကျေးရွာမှာ အမျိုးသား ၅ ဦးမိုးကြိုးထိမှန်ပြီး အဲ့ဒီထဲက ၂ ဦးသေဆုံးခဲ့တယ်လို့ ဒေသခံတွေနဲ့ ကူညီကယ်ဆယ်ရေး လုပ်ပေးခဲ့သူတွေဆီက သိရပါတယ်။

စာတည်း – လင်း

ချောင်းဦး၊ မေ ၁၆၊ ၂၀၂၅။

တိုက်ပွဲမရှိဘဲ စစ်ကိုင်းတိုင်း၊ ချောင်းဦးမြို့ပေါ်ရှိ စစ်ကောင်စီတပ်က ၂ ရက်ဆက်တိုက် လက်နက်ကြီးတွေ ပစ်ခတ်ခဲ့တာကြောင့် ဒေသခံ ၆ ဦးသေဆုံးခဲ့တယ်လို့ ဒေသခံတွေကပြောပါတယ်။

ချောင်းဦးမြို့နယ် အထွေထွေအုပ်ချုပ်ရေးရုံးမှာ တပ်စွဲထားတဲ့ စစ်ကောင်စီတပ်က မေ ၁၅ ရက်ည ၉ နာရီမှာ လက်နက်ကြီး ၃ လုံးပစ်ခတ်ခဲ့ရာ ၂ လုံးမှာ ငါးလုံးတင်ကျေးရွာကို ကျရောက်ပေါက်ကွဲခဲ့တာကြောင့် ဒေသခံ ၅ ဦးသေဆုံးခဲ့တယ်လို့ဆိုပါတယ်။

“သေဆုံးသူတွေရဲ့အသေးစိတ်အချက်အလက်ကို မသိရဘူးဗျ။ အမျိုးသား ၂ ယောက်နဲ့ အမျိုးသမီး ၃ ယောက်လို့ပဲသိရတယ်။ နွား ၁ ကောင်လည်းသေတယ်ဗျ။ နေအိမ် ၁၀ လုံးလည်းမီးလောင်သွားတယ်”လို့ ချောင်းဦးမြို့နယ်မှတော်လှန်ရေးတပ်ဖွဲ့ဝင်တဦးက ပြောပါတယ်။

လက်နက်ကြီးကျရောက်ပေါက်ကွဲခဲ့တဲ့ ငါးလုံးတင်ကျေးရွာဟာ အိမ်ခြေစုစုပေါင်း ၁,၀၀၀ ခန့်ရှိပြီး ချောင်းဦးမြို့နယ်၊ တောင်ဘက်မှာတည်ရှိကာ မြို့နဲ့ ၆ မိုင်ကျော်ဝေးတယ်လို့ သိရပါတယ်။

အလားတူ မေ ၁၆ ရက်ဒီနေ့လယ် ၁ နာရီကျော်မှာ မြို့နယ်ထွေအုပ်ရုံးကနေ လက်နက်ကြီး ၃ လုံးပစ်ခတ်ခဲ့ရာ ၂ လုံးမှာ ဘုရင်ဂျီရပ်ကွက်အတွင်းရှိ နေအိမ် ၁ လုံးပေါ်ကို ကျရောက်ပေါက်ကွဲပြီး နေအိမ်ပေါ်ရှိနေတဲ့ မိသားစု ၄ ဦးအနက် အမျိုးသမီး ၁ ဦးသေဆုံးပြီး ကျန် ၃ ဦးက ဒဏ်ရာပြင်းထန်ရရှိခဲ့တယ်လို့ဆိုပါတယ်။

“မြို့နဲ့ပတ်ဝန်းကျင်ကို ၁၂၀ မမတွေနဲ့ ရမ်းသမ်းပစ်နေတာ။ ကြေးနီကားတွေ ဖြတ်မှာမို့ ထင်တယ်။ ဝမ်ပေါင်ကနေ တရုတ်ကိုပို့မယ့်ဟာတွေ။ အရင်တုန်းကလည်း အဲ့လိုမျိုးပဲ။ သူတို့ (စကစကြေးနီကား) ဖြတ်ပြီဆို ရမ်းပစ်တာပဲ။ ကြိုရှင်းတဲ့သဘောမျိုးပဲ”လို့ အထက်ပါ တပ်ဖွဲ့ဝင်က ပြောပါတယ်။

ပြီးခဲ့တဲ့မေ ၁၀ ရက်ကလည်း ချောင်းဦးမြို့နယ်၊ သုံးပန်လှကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ရှင်ပြုအလှူလုပ်တဲ့နေရာကို ကျရောက်ပေါက်ကွဲပြီး မောင်ရှင်လောင်းအပါအဝင် ၃ ဦးသေဆုံးကာ ၃ ဦးဒဏ်ရာရရှိခဲ့ပါတယ်။

စာတည်း – လင်း