ရွှေကျင်၊ မေ ၂၆၊ ၂၀၂၅။

ပဲခူးတိုင်း၊ ရွှေကျင်မြို့နယ်၊ ကျွန်းကြီးကျေးရွာမှာ စစ်ကောင်စီဗုံးကြဲခဲ့တဲ့ မင်္ဂလာဆောင် သေဆုံးသူ ၁၂ ဦးထိရှိလာပြီး ၃၇ ဦးဒဏ်ရာရတယ်လို့ KNU ဗဟိုက မေ ၂၆ ရက်မှာ သတင်းထုတ်ပြန်ပါတယ်။

မေ ၂၅ ရက် မနက် ၉ နာရီကျော်ခန့်မှာ စစ်ကောင်စီဘက်က ဂျက်ဖိုက်တာ ၁ စီးနဲ့ မင်္ဂလာဆောင် ပြုလုပ်နေတဲ့နေရာကို ဗုံးနှစ်လုံးကြဲချခဲ့ရာမှာ မင်္ဂလာဆောင်အတွင်းရှိနေသူတွေအနက် ၈ ဦးမှာ နေရာတင်သေဆုံးသွားပြီးနောက် ၄၁ ဦးဒဏ်ရာရခဲ့ကာ ဒဏ်ရာရသူတွေကို ဆေးကုသမှုပြုလုပ်ဖို့ ကြိုးစားနေစဥ်မှာပင် နောက်ထပ် ၄ ဦးသေဆုံးခဲ့တာလို့ ဆိုပါတယ်။

“လက်ရှိလည်းစိုးရိမ်ရသူ ၁၀ ဦးထက်မနည်းရှိနေသေးတယ်။ မနေ့ကလည်း သေတာက ၈ ဦးဘဲ။ နီးစပ်ရာဆေးရုံဆေးခန်းပို့နေချိန်မှာဘဲ နောက်ထပ် ထပ်သေတဲ့လူတွေရှိတယ်။ အဲဒါနဲ့ပတ်သက်ပြီး ဒီဘက်ကနေပြီး အကောင်းဆုံးဖြစ်အောင်စီစဥ်ဆောင်ရွက်နေတာရှိပါတယ်။”လို့ KNU ညောင်လေးပင်ခရိုင်ပြောရေးဆိုခွင့်ရှိသူ စောဟဲဂေကပြောပါတယ်။

လေကြောင်းကနေ ဗုံးကြဲခံရလို့ ကျွန်းကြီးကျေးရွာနေ သတို့သမီး အသက် ၂၂ နှစ်အရွယ် နေယ်ကမွီးဖော အပါအဝင် ကျွန်းကြီးကျေးရွာ၊ ကောက်မယ်သူကျေးရွာ၊ ဘုရားကြီးကျေးရွာတွေက ၁၉ နှစ်အရွယ် မောင်သုသု၊ ၁၄ နှစ်အရွယ် မောင်မြင့်မြတ်ဟိန်း၊ ၅၂ နှစ်အရွယ် နော်ဘူးလာဖော၊ ၁၇ နှစ်အရွယ် နော်စေးကဘိုဖော၊ ၄၀ အရွယ်နော်အယ်လားဖော၊ ၃၈ နှစ်အရွယ် နော်ဖောတာရှု၊ ၃၅ နှစ်အရွယ် နော်ဖောသဒါးဝါး၊ ၅ နှစ်အရွယ် စောနေဘလူမူး၊ ၄၆ နှစ်ရွယ် နော်ဂျူးပလီ၊ ၅ နှစ်အရွယ် နော်စုထူးထူးအောင်၊ ၄၄ နှစ်အရွယ် စောပုလဲတို့ ၁၂ ဦးသေဆုံးသွားပါတယ်။

အဲဒီအပြင် အသက် ၁၂ နှစ်ကနေ ၆၀ ကြားရှိ အမျိုးသမီး ၂၃ ဦး၊ အမျိုးသား ၁၄ ဦးဒဏ်ရာရသွားကြပြီး မေ ၂၆ ရက်အထိ နီးစပ်ရာမှာ ဆေးကုသမှု ခံယူနေရပါတယ်။

နေအိမ် ၁၁ လုံး၊ ဈေးဆိုင် ၁ လုံး၊ တဲ ၁ လုံး၊ ဝက်တဲ ၁ လုံး၊ လယ်ထွန်စက် ၁ စီး၊ အိမ်သာ ၂ လုံးနဲ့ စာသင်ကျောင်းခြံ ပျက်စီးခဲ့ရတယ်လို့ သိရပါတယ်။

လေကြောင်းဗုံးကြဲခံရလို့ ထိခိုက်ပျက်စီးသွားတဲ့အပျက်အစီးတွေကိုတော့ ဒေသခံတွေက ဝိုင်းဝန်းရှင်းလင်းနေကြပြီး သေဆုံးသူတွေရဲ့နာရေးကို မေ ၂၆ ရက်မှာပြုလုပ်ခဲ့တယ်လို့ ဆိုပါတယ်။

သတင်း – ကျော်ကြီး၊ စာတည်း – လင်း

မန္တလေး၊ မေ ၂၆၊ ၂၀၂၅။

မန္တလေးမြို့၊ အောင်မြေသာစံမြို့နယ်ရှိ အင်းဝဘဏ်မှာ လုံခြုံရေးတာဝန်ကျတဲ့ စစ်ကောင်စီတပ်ဖွဲ့ဝင် အချင်းချင်း ပစ်ခတ်မှုဖြစ်ခဲ့ပြီး တပ်ကြပ်ကြီး ၁ ဦးသေဆုံးကာ ၁ ဦးဒဏ်ရာရခဲ့တယ်လို့ စစ်ကောင်စီရဲ့ အလယ်ပိုင်းတိုင်းစစ်ဌာနချုပ်နဲ့ နီးစပ်သူဆီက သိရပါတယ်။

မေ ၂၅ ရက်မနေ့ကနေ့လယ် ၁၂ နာရီဝန်းကျင်မှာ မန္တလေးမြို့၊ ဈေးချိုနာရီစင်အနီး ၂၆ လမ်းနဲ့ ၈၄ လမ်းထောင့်ရှိ အင်းဝဘဏ်မှာလုံခြုံရေးစောင့်နေကြချိန် ပစ်ခတ်မှုဖြစ်ခဲ့ကြတာလို့ ဆိုပါတယ်။

“ပြင်ဦးလွင်ကလာတဲ့ လုံခြုံရေးကားလို့ပြောတာပဲ။ တပ်ကြပ်ကြီးကိုတပ်သားကပစ်တာ။ တပ်မှာ ကိုယ့်ထပ်ရာထူးကြီးတဲ့ သူကိုအဲဒီလိုအာခံလို့မှမရတာ။ ဒုတပ်ကြပ်ကလည်း တပ်ကြပ်ကြီးဘက်က ဝင်ပြောပုံပဲ။ ဒုတပ်ကြပ်ကဒဏ်ရာရတယ်။ တပ်ကြပ်ကြီးကတော့သေတယ်”လို့ အလယ်ပိုင်းတိုင်း စစ်ဌာနချုပ်နဲ့ နီးစပ်သူတဦးကပြောပါတယ်။

သေဆုံးသူတွေဟာ ဘယ်တပ်တွေကလဲဆိုတာကိုတော့ သီးခြားအတည်မပြုနိုင်သေးပါဘူး။

ဒီပစ်ခတ်မှုကကြားရတဲ့ သေနတ်သံတွေကြောင့် မန္တလေးဈေးချိုထဲကဆိုင်တချို့လည်း ကြောက်လန့်ပြီး ပိတ်ခဲ့ကြတယ်လို့ မန္တလေးမြို့ခံတဦးက ပြောပါတယ်။

“ဘ‌‌ဏ်ပိတ်ရက်ဖြစ်တာ။ သေနတ်သံကတော့အချက်ရေတော်တော်များတယ်။ အဲ့တာကြောင့် ဆိုင်တချို့ကပိတ်သွားကြတာ။ ဒီနေ့တော့ပုံမှန်ပါပဲ”လို့ မြို့ခံတဦးက ပြောပါတယ်။

ပစ်ခတ်မှုဖြစ်ပြီးနောက် စစ်ကောင်စီဘက်က ရှာဖွေစစ်ဆေးမှုတွေလုပ်ခဲ့ပြီး ပစ်ခတ်ခဲ့တဲ့ စစ်ကောင်စီတပ်သားက လက်ရှိအချိန်ထိထွက်ပြေးလွတ်မြောက်နေဆဲဖြစ်တယ်လို့ သိရပါတယ်။

စာတည်း – လင်း

တောင်တွင်းကြီး၊ မတ် ၁၃၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ ပရပ်ကြယ်တိုက်နယ်၊ ညာတောအုပ်စု၊ ညာတောရွာ အုပ်ချုပ်ရေးမှူးဟောင်း ပစ်ခတ်ခံရပြီးသေဆုံးခဲ့တယ်လို့ Magway Guerrilla Warfare – မကွေးပြောက်ကျားတပ်ဖွဲ့ဆီက သိရပါတယ်။

အုပ်ချုပ်ရေးမှူးဟောင်း အသက် ၅၀ အရွယ် အောင်လွင် ကို မတ် ၁၁ ရက်မနက် ၈ နာရီခန့်က ညာတောရွာအထွက်မှာ ဒေသခံကာကွယ်ရေးတပ်ဖွဲ့ဝင်တွေကပစ်ခတ်ခဲ့တာလို့ ဆိုပါတယ်။

“ညာတောကျေးရွာကနေ ဆပ်သွားရွာကိုအသွား ရွာအထွက်မြေနီလမ်းဖွင့်ဖြိုးရေးလမ်းပေါ်မှာ ရှင်းလင်းခဲ့တာ၊ ဦးခေါင်းကိုပဲ ၂ ချက်ပစ်ခတ်ခဲ့တာ။”လို့ မကွေးပြောက်ကျားတပ်တာဝန်ခံ ကံကြီးမောင်က ပြောပါတယ်။

ဦးအောင်လွင်ဟာ စစ်အာဏာမသိမ်းခင်က အုပ်ချုပ်ရေးမှူးလုပ်ခဲ့သူဖြစ်ပြီး အာဏာသိမ်းပြီးနောက် သူ့နေရာမှာတခြားတဦးအစားထိုးဝင်ရောက်လာပေမယ့် လက်ရှိမှာစစ်ကောင်စီနဲ့ပေါင်းပြီး စစ်မှုထမ်းကြေးကောက်တာတွေ လုပ်ပေးနေသူဖြစ်တယ်လို့ ဆိုပါတယ်။

“လက်ရှိမြို့နယ်ရဲ့ အထွေထွေအုပ်ချုပ်ရေးအောက်မှာ တာဝန်ထမ်းဆောင်နေတဲ့ ကျော်သူက သူ့ (ဦးအောင်လွင်)ရဲ့တူတော်စပ်တာ၊ မိန်းမနဲ့ပတ်သက်ပြီး တော်တာ။ ရှင်းတုန်းကတော့ ၂ ဦးစလုံးကိုရှင်းတာ၊ ထွေအုပ်စာရေးကျော်သူနောက်ကို ကျနော်တို့ ရွာထဲလိုက်တဲ့အလိုက်မှာ အကြောင်းတခုခုကြောင့် လွတ်မြောက်သွားခဲ့တာ။” လို့ မကွေးပြောက်ကျားတပ်တာဝန်ခံ ကံကြီးမောင်က ပြောပါတယ်။

ဒီပစ်ခတ်မှုကို Magway Guerrilla Warfare မကွေးပြောက်ကျားတပ်၊ Dragon King People’s Defence Force၊ နဂါးမင်းပြည်သူ့ကာကွယ်ရေးအဖွဲ့တောင်တွင်းကြီးနဲ့ Taungdwingyi Fighter Force တို့က ပူးပေါင်းလုပ်‌ဆောင်ခဲ့တာဖြစ်ပြီး ပစ်ခတ်ပြီးနောက် ဦးအောင်လွင်ဆီကနေ ဖုန်း ၁ လုံး သိမ်းဆည်းခဲ့တယ်လို့ ဆိုပါတယ်။

ပစ်ခတ်မှုဖြစ်ပြီးနောက် ပရပ်ကြယ်ရဲစခန်းနဲ့ ဆပ်သွားရဲစခန်းက ရဲ ၁၂ ဦးလောက်က အလောင်းစစ်ဆေးပြီးတော့ ပြန်သွားကြတယ်လို့ သိရပါတယ်။

ပြီးခဲ့တဲ့ မတ် ၆ ရက်ကလည်း တောင်တွင်းကြီးမြို့နယ်၊ ပရပ်ကြယ်အုပ်စု၊ ကန်ကြီးကုန်းကျေးရွာက ပြည်သူတွေဆီက စစ်မှုထမ်းကြေးကောက်နေတဲ့ အုပ်ချုပ်ရေးမှူးကိုလည်း Magway Guerrilla Warfare မကွေးပြောက်ကျားတပ်က ပစ်ခတ်ရှင်းလင်းခဲ့ပါသေးတယ်။

စာတည်း – လင်း

ညောင်ဦး၊ မေ ၂၅၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ မြေနီကျေးရွာမှာ စစ်ကောင်စီတပ်နဲ့ပေါင်းပြီး အမှုပွဲစားလုပ်နေသူ အမျိုးသား ၁ ဦး ပစ်သတ်ခံရတယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ပစ်သတ်ခံရသူက မြေနီကျေးရွာနေ အသက် ၅၈ နှစ်အရွယ် ဦးပေါစံဆိုသူဖြစ်ပြီး မေ ၂၄ ရက် နေ့လယ် ၁၂ နာရီခန့်က နေအိမ်မှာထမင်းစားနေချိန် ပစ်ခတ်ခံရတာလို့ ဆိုပါတယ်။

“သူကစစ်တပ်နဲ့ပေါင်းပြီး အမှုပွဲစားလုပ်တာ။ စစ်တပ်က ဖမ်းထားတဲ့သူတွေကို သူက ဘယ်လောက်နဲ့ ပြန်ရွေးရမယ်ဆိုပြီး တယောက်တဝက်စားတာပေါ့။ ပြည်သူတွေနဲ့ ငွေကြေးအရှုပ်အရှင်းကိစ္စတွေ ရှိတယ်။ ထမင်းစားရင်းပစ်ခံရတာလို့ သိရတယ်”လို့ ဖြစ်စဉ်ကိုသိထားတဲ့ ဒေသကာကွယ်ရေးအဖွဲ့ဝင်တဦးက ပြောပါတယ်။

ပစ်ခတ်ခံရတဲ့အတွက် ဦးပေါစံမှာ ဦးခေါင်းကျည်ထိဒဏ်ရာနဲ့သေဆုံးခဲ့ပြီး ဒီပစ်ခတ်မှုကို လုပ်ခဲ့တဲ့အဖွဲ့တွေဘက်ကတော့ ထုတ်ပြန်ကြေညာတာမရှိသေးပါဘူး။

ဧပြီ ၁၉ ရက်ကလည်း ညောင်ဦးမြို့နယ်၊ မြေနီကျေးရွာမှာ ကျေးရွာအုပ်ချုပ်ရေးမှူးနဲ့သမက်ဖြစ်သူတို့ ပစ်သတ်ခံရလို့ သေဆုံးသွားတယ်လို့ သိရပါတယ်။

သတင်း – ကျော်ကြီး၊ စာတည်း – လင်း

အောင်စိုး ၊ ကျော်ကြီး

ရွှေကျင်၊ မေ ၂၄၊ ၂၀၂၅။

ပဲခူးတိုင်း၊ ရွှေကျင်မြို့နယ်မှာ ရွှေကျင်မြို့နယ် အမှတ် ၁ ဒေသမှူးအပါအဝင် ၃ ဦးကို စစ်ကောင်စီတပ်ဖွဲ့ဝင်တွေက ပစ်သတ်ခဲ့တယ်လို့ မျက်မြင်တွေ့ရှိခဲ့တဲ့ ရွှေကျင်ဒေသခံတဦးဆီက သိ ရပါတယ်။

မေ ၂၁ ရက်နေ့လယ် ၁ နာရီခန့်က ရွှေကျင်မြို့နယ်၊ ကမ်းနီကျေးရွာအနီးရှိ ရာဘာခြံအနီးမှာ စစ်ကောင်စီကင်းပုန်းနဲ့တိုးပြီး ပစ်သတ်ခံခဲ့ရတာလို့ဆိုပါတယ်။

“ဒေသမှူးနဲ့သူ့ရဲ့ဘတ်စမန်းက ဆိုင်ကယ်တစီးနဲ့ မြို့ကနေလာတာ။ ရာဘာခြံနားအရောက်မှာ စကစတွေနဲ့တိုးတော့ ပစ်ခတ်တာ။ ပြီးတော့ ဓားနဲ့ထိုးကာမျက်နှာကိုစစ်ဖိနပ်နဲ့ကန်တာ။ သူ့နောက်က လာတဲ့ သားမိနှစ်ယောက်ကိုလည်း ပစ်သတ်လိုက်တယ်။ ဒေသမှူးနဲ့က ကျမနဲ့ရင်းနှီးတယ်” လို့ ဖြစ်စဥ်ကို မြင်တွေ့ခဲ့ရတဲ့ ရွှေကျင်ဒေသခံအမျိုးသမီးတဦးကပြောပါတယ်။

သေဆုံးသူတွေဟာ ရွှေကျင်မြို့နယ် KNU အုပ်ချုပ်ရေးအမြဲတမ်းကော်မတီဝင်၊ အမှတ် ၁ ဒေသမှူး အသက် ၅၀ အရွယ် စောအဲစတား၊ ဝိုင်ကျွန်းကျေးရွာက အသက် ၅၄ နှစ်အရွယ် ဦးမင်းအောင်၊ တပင်ချောင်းကျေးရွာက အသက် ၆၂ နှစ်အရွယ်ဒေါ်စန်းဌေးတို့သေဆုံးပြီး သူနဲ့အတူလိုက်ပါလာတဲ့ တပင်ချောင်းကျေးရွာက အသက် ၂၁ နှစ်အရွယ်အောင်ဇေယျာထွန်းမှာဒဏ်ရာရခဲ့တာပါ။

“အဲစတားက ဒေသခံကကားနဲ့ဝါးသွားတင်မှာကို ပွိုင့်သဘောမျိုးနဲ့ဆိုင်ကယ်လေးနဲ့ ဦးမင်းအောင်နဲ့ အတူသွားလိုက်တာ ပစ်သတ်ခံရတာ။ ဒေါ်စန်းဌေးနဲ့ အောင်ဇေယျာထွန်းကတော့ သက်သက် ဆိုင်ကယ်နဲ့လာတာ။ အဲစတားနဲ့ ဦးမင်းအောင်ကိုပစ်ပြီး သူတို့ကိုပါပစ်လိုက်တာ”လို့ KNU ညောင်လေးပင်ခရိုင်ပြောရေးဆိုခွင့်ရှိသူ စောဟဲဂေက ပြောပါတယ်။

မြေလတ်အသံကရရှိထားတဲ့ ဒေသမှူး ဦးအဲစတားရဲ့ ရုပ်အလောင်းပုံမှာတော့ ခန္ဓာကိုယ်အနှံ့အပြားမှာ ဓားထိုးဒဏ်ရာတွေနဲ့ ဘယ်ဖက်နားထင်မှာ သွေးအများအပြားထွက်နေတာကို တွေ့ရှိရပါတယ်။

အလောင်းတွေကိုတော့ အခင်းဖြစ်တဲ့နေရာမှာပဲ စစ်ကောင်စီတပ်ကထားခဲ့ကာ အဲ့ဒီနေ့ညနေပိုင်းမှာ KNU တပ်ဖွဲ့ဝင်တွေကကောက်ယူပြီးနောက် စောအဲစတားရဲ့ နာရေးကို မေ ၂၂ ရက်မှာ ပြုလုပ်ပေးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ မေ ၂၃၊ ၂၀၂၅။

ကချင်ပြည်နယ်၊ ဗန်းမော်မြို့သိမ်းတိုက်ပွဲမှာ ကချင်လွတ်မြောက်ရေးတပ်မတော် – KIA ကပစ်ချလို့ ရဟတ်ယာဉ်ပျက်ကျပြီး သေဆုံးခဲ့ရတဲ့စစ်ကောင်စီဖွဲ့ဝင်တွေထဲမှာ ပဲခူးတိုင်း၊ ပြည်ခရိုင်၊ ရွှေတောင်မြို့နယ်သား စစ်ကောင်စီတပ်ဖွဲ့ဝင်တွေပါဝင်တယ်လို့ ရွှေတောင်မြို့နယ်အတွင်းက ဒေသခံတော်လှန်ရေးတပ်ဖွဲ့ အရာရှိတဦးက ပြောပါတယ်။

MI-17 ရဟတ်ယာဉ်မောင်းသူ ဗိုလ်မှူးမျိုးထက်အောင်နဲ့ တပ်ကြပ်ကြီးသက်ဝေဦးတို့ ဖြစ်ကြပြီး ၎င်းတို့ ၂ ဦးမှာ ရွှေတောင်မြို့နယ်၊ ဖိုးခေါင်နဲ့ ကံပေါက်ကုန်းကျေးရွာက ဖြစ်တယ်လို့ ဆိုပါတယ်။

“မျိုးထက်အောင်က ဖိုးခေါင်(ရွာ)သား။ သက်ဝေဦးက ကံပေါက်ကုန်း(ရွာ)သားဗျ။ သူတို့ ၂ ယောက်ကို ကျနော်တို့ ဖမ်းဆီးတာပဲဖြစ်ဖြစ် ရှင်းလင်းတာပဲဖြစ်ဖြစ်လုပ်ဖို့ စီစဉ်ခဲ့ဖူးတယ်။ ကျနော်ကလည်း ရွှေတောင်သားဆိုတော့ သူတို့အကြောင်းသိတာပေါ့နော်။” လို့ ရွှေတောင်မြို့နယ်အတွင်းက ဒေသခံတော်လှန်ရေးတပ်ဖွဲ့တခုရဲ့ အရာရှိတဦးက ပြောပါတယ်။

ပြီးခဲ့တဲ့မေ ၂၀ ရက်က ဗန်းမော်မြို့ စကခ ၂၁ ကို စစ်ကူ၊ ရိက္ခာ၊ လက်နက်ခဲယမ်းတွေ လာပို့ပေးတဲ့ ထောက်ပို့ရဟတ်ယာဉ် ၃ စီးကို KIA ကပစ်ခတ်ခဲ့ရာ ၁ စီးမှာ ရွှေကူမြို့နယ်၊ မြို့လှမြို့နယ်ခွဲ၊ စည်ငန်းရွာအနောက်ဘက်ရှိ တောထဲမှာပျက်ကျပြီးမီးလောင်ခဲ့တာပါ။

အဲဒီစစ်ရဟတ်ယာဉ်ပျက်ကျမှုအနီးမှာတော့ မီးလောင်ပျက်စီးနေတဲ့ရုပ်အလောင်း ၁၈ လောင်းကို တွေ့ခဲ့တယ်လို့ KIA ကအတည်ပြုပြောဆိုထားပြီး အဲ့ဒီထဲမှာဗိုလ်မှူးမျိုးထက်အောင်နဲ့ တပ်ကြပ်ကြီး သက်ဝေဦးတို့ပါဝင်ခဲ့တာလို့ ရွှေတောင်မြို့နယ်အတွင်းက တော်လှန်ရေးတပ်ဖွဲ့ဝင်တွေက ပြောပါတယ်။

မုံရွာ၊ မေ ၂၃၊ ၂၀၂၅။

စစ်ကိုင်းတိုင်း၊ မုံရွာမြို့နယ်၊ နဂါးတွင်းကျေးရွာမှာ လက်နက်ကြီးကျလို့ ရွာခံ ၂ ဦး သေဆုံးပြီး ၁၀ ဦးဒဏ်ရာရတယ်လို့ မုံရွာမြို့နယ်ပြည်သူ့ကာကွယ်ရေးအဖွဲ့ တိုက်နယ် ၃ တာဝန်ခံဆီက သိရပါတယ်။

မေ ၂၂ ရက်ည ၇ နာရီခန့်မှာ မုံရွာမြို့အဝင် မအူဂိတ်ကနေပစ်ခတ်တဲ့ လက်နက်ကြီးဟာ ကျေးရွာထဲ ကျရောက်ပေါက်ကွဲပြီး ဒေသခံတွေထိခိုက်သေဆုံးခဲ့တာလို့ ဆိုပါတယ်။

“နဂါးတွင်းရွာထဲကို ၆ လုံးကျတယ်။ ရွာတည့်တည့်ဘဲ ရွာလယ်နဲ့ရွာအရှေ့ဘက်ကျတယ်။ ၁၂၀ မမ ချည်းပဲ။ သူတို့ထုတဲ့အချိန်ရှောင်ကြသေးတယ်။ မလွတ်ကြတာ။ အိမ်တိုင်းကလည်း ဗုံးခိုကျင်းမရှိတော့ လက်နက်ကြီးပေါက်ကွဲအားလည်းပြင်းလို့ ထိခိုက်များသွားတာ”လို့ မုံရွာမြို့နယ်ပကဖ တိုက်နယ် ၃ တာဝန်ခံ ကိုမီးပွားကပြောပါတယ်။

လက်နက်ကြီးထိမှန်လို့ အသက် ၅၃ နှစ်အရွယ် ဒေါ်စန်းဘို၊ ၄၅ နှစ်အရွယ် ကိုစိုးတို့ နေရာတင် သေဆုံးသွားပြီး အသက် ၁၄ နှစ်ကနေ ၅၀ ကြား အမျိုးသား ၇ ဦး၊ အသက် ၃၀ ကနေ ၆၀ ကြား အမျိုးသမီး ၃ ဦးထိခိုက်ဒဏ်ရာသွားတယ်လို့ ဆိုပါတယ်။

ထိခိုက်ဒဏ်ရာရသူတွေထဲက ၅ ဦးက စိုးရိမ်ရအခြေအနေမှာရှိနေလို့ နီးစပ်ရာမှာ ဆေးကုသနေရကာ လက်နက်ကြီးကျလို့ နေအိမ် ၁၀ လုံးပျက်စီးပြီး နွား ၂ ကောင်လည်းသေဆုံးသွားတယ်လို့ သိရပါတယ်။

နဂါးတွင်းကျေးရွာဟာ အိမ်ခြေ ၁,၀၀၀ ကျော် လူဦးရေ ၅,၀၀၀ ဝန်းကျင်ရှိတဲ့ကျေးရွာဖြစ်ပြီး လက်နက်ကြီးကျတဲ့အတွက် ဒေသခံတွေလည်းတိမ်းရှောင်ခဲ့ရကာ ဒီမနက်ပိုင်းမှာတော့ ရွာထဲကို ပြန်လည်ဝင်ရောက်နေပြီလို့ ကိုမီးပွားကပြောပါတယ်။

စစ်အာဏာသိမ်းပြီး ၄ နှစ်ကျော်ကာလအတွင်း နဂါးတွင်းရွာကို မုံရွာအခြေစိုက် အနောက်မြောက်တိုင်း စစ်ဌာနချုပ်နဲ့ မအူစစ်ကောင်စီဂိတ်ကနေ လက်နက်ကြီးနဲ့ပစ်ခတ်တာ အကြိမ်ရေ ၅၀ ကျော်ရှိထားပြီး ရွာခံ ၅ ဦးလည်းသေဆုံးထားတယ်လို့ မုံရွာမြို့နယ်ပကဖ တိုက်နယ် ၃ တာဝန်ခံ ဆီကသိရပါတယ်။

ပြီးခဲ့တဲ့ ဧပြီလ စတုတ္ထအပတ်အတွင်းက နဂါးတွင်းကျေးရွာကို မအူဂိတ်စောင့် စစ်ကောင်စီတပ်ဖွဲ့ဝင်တွေက လက်နက်ကြီး ၄ လုံးပစ်ခတ်ခဲ့ရာ ကျေးရွာအနီးကျရောက်ပေါက်ကွဲခဲ့ပေမယ့် လူထိခိုက်မှုမရှိခဲ့ဘူးလို့ သိရပါတယ်။

စာတည်း – လင်း