သေဆုံး

ဆော၊ ဇွန် ၆ ၊၂၀၂၅။

မကွေးတိုင်း၊ ဆောမြို့နယ်၊ ညောင်ကန်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၃ ဦးသေဆုံး၊ ၆ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဇွန် ၅ ရက် နေ့လယ် ၂ နာရီခန့်မှာ ညောင်ကန်ကျေးရွာက ရခိုင်ပြည်နယ်ကိုထွက်ခွာမယ့် ကုန်တင်ကားတွေရပ်နားထားတဲ့နေအိမ်ကို တိုက်ခိုက်ရေးလေယာဥ် ၁ စီးနဲ့ ဗုံး ၁ လုံးကြဲချခဲ့ရာ နေအိမ်ပေါ်ကျရောက်ပေါက်ကွဲခဲ့တယ်လို့ ဆိုပါတယ်။

” (ကုန်တင်)ကားတွေထားတဲ့ အိမ်ပေါ်တည့်တည့်ကြီးကိုကျတာ။ အဲ့ဒီအိမ်မှာကကုန်သည်တွေပဲ စုနေကြတာ။ ရခိုင်ကိုထွက်မယ့်ကားတွေ”လို့ ဆောမြို့ခံတဦးက မြေလတ်အသံကို ပြောပါတယ်။

လေယာဥ်ဗုံးကြောင့် (အမည်စိစစ်ဆဲ) ရခိုင်ကုန်သည်အမျိုးသား ၁ ဦး၊ ကုန်ကားမောင်းနှင်သူ ကိုဝင်းစိုး၊ ကုန်တင်ကုန်ချလုပ်သား ကိုကျော်သက် တို့ ၃ ဦးနေရာမှာ သေဆုံးခဲ့ကြကာ နောက်ထပ်အမျိုးသား ၆ ဦး ဒဏ်ရာရရှိခဲ့ပြီး အဲ့ဒီထဲက ၅ ဦးမှာ ဒဏ်ရာပြင်းထန်တယ်လို့ သိရပါတယ်။

ဒါ့အပြင် ဗုံးပေါက်ကွဲမှုကြောင့် နေအိမ်ဝန်းအတွင်းရှိ ကုန်ပစ္စည်းတွေတင်ဆောင်တဲ့ ၆ ဘီးကား ၂ စီးနဲ့ ဂျက်ပလူးအမျိုးအစား ကား ၁ စီး မီးလောင်ပျက်စီးခဲ့သလို နေအိမ်ပါပြိုကျပျက်စီးခဲ့တယ်လို့ အထက်ပါအမျိုးသားက ဆိုပါတယ်။

သေဆုံး ရခိုင်ကုန်သည်အမျိုးသားရဲ့ ရုပ်အလောင်းကို အခင်းဖြစ်နေရာကနေ ရခိုင်ပြည်နယ်ကို သယ်ယူသွားတယ်လို့ သူက ဆိုပါတယ်။

ပြီးခဲ့တဲ့မေ ၁ ရက်ကလည်း အညာကတင်းကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက် ခိုက်ခဲ့တာကြောင့် ၈ နှစ်အရွယ်ကလေး ၁ ဦးအပါ အမျိုးသမီး ၄ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ

ယင်းမာပင်၊ ဇွန် ၅၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်၊ ဘန့်ဘွေးရွာကထွက်လာတဲ့ စစ်ကောင်စီစစ်ကြောင်းက ပစ်ခတ်လို့ အမျိုးသား ၁ ဦးနဲ့ အမျိုးသမီး ၁ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ဇွန် ၅ ရက်မနက်ပိုင်းမှာ ဘန့်ဘွေးရွာကထွက်လာတဲ့ အင်အား ၃၀ ပါစစ်ကြောင်းက ရွာကွင်းလမ်းက မောင်းလာတဲ့ Forland အမျိုးအစား ကုန်ကား ၂ စီးကိုပစ်ခတ်ရာမှာ ၃ ဦးကိုထိမှန်ခဲ့ပြီး အဲ့ဒီထဲက ၂ ဦးသေဆုံးခဲ့တာပါ။

“၁ ယောက်က ပျူရွာနားကရွာမှာပဲ ဆုံးသွားတာ၊ နောက် ၂ ယောက်က ဆေးခန်းသွားတာ၊ ၁ ယောက်ကကျတော့ ဆေးခန်းရောက်တော့ဆုံးတာပေါ့၊ အခုနောက် ၁ ယောက်ကလည်း ဒီဘက်တင်မနိုင်လို့ ဒီပြင် (အခြားနေရာကို)ပို့လိုက်ရတယ်၊ ” လို့ ဖြစ်စဉ်ကိုသိရှိထားတဲ့ဒေသခံတဦးက မြေလတ်အသံကို ပြောပါတယ်။

ခရီးသည် ၁၅ ဦးစီလိုက်ပါလာတဲ့ အဆိုပါကား ၂ စီးကို ချင်းတွင်းမြစ်တဖက်ကမ်း မုံရွာမြို့ကနေ ကနီမြို့နယ်အထက်ပိုင်း ပါဟဲရွာကို ဈေးဝယ်ပြီးပြန်လာချိန်ပစ်ခတ်ခံရတာဖြစ်ပြီး လက်ရှိမှာ ကားတွေကတော့လုံခြုံတဲ့နေရာကိုရောက်နေပြီလို့ သိရပါတယ်။

သေဆုံးသူတွေဟာ အသက် ၅၀ အရွယ်အမျိုးသမီး ၁ ဦး၊ ၂၇ နှစ်အရွယ်အမျိုးသား ၁ ဦးဖြစ်တယ်လို့ ဒေသတွင်းပြည်သူ့ ကာကွယ်ရေးတပ်ဖွဲ့ဝင်တဦးက အတည်ပြုပြောပါတယ်။

ယခုမနက်ပိုင်းမှာပဲ အဆိုပါစစ်ကြောင်းဟာ ဘန့်ဘွေးရွာအပြင်ကနေ ၄၀ မမ လက်နက်ကြီး၊ လက်နတ်ငယ်နဲ့ ပစ်ခတ်တာတွေရှိပေမယ့် အနီးအနားကျေးရွာတွေကိုတော့ ကျရောက်တာမရှိဘူးလို့ သိရပါတယ်။

ယင်းမာပင်မြို့နယ်၊ ဘန့်ဘွေးရွာမှာ စစ်ကောင်စီလက်အောက်ခံ ပျူစောထီးတွေက ၂၀၂၁ နှစ်လည်လောက်ကတည်းက အထိုင်ချကာ လမ်းပိုင်းကိုဖြတ်သန်းသွားလာနေတဲ့ ခရီးသွားပြည်သူတွေဆီက ငွေကြေးတောင်းယူတာ၊ ပစ္စည်းသိမ်းထားတာတွေ ပြုလုပ်လေ့ရှိတဲ့အပြင် ကျေးရွာနဲ့နီးတဲ့ ပြည်သူပိုင်ယာခင်းတွေကို ထွန်ယက်စိုက်ပျိုးတာ၊ ရွာသားတွေနဲ့ ကျေးရွာဘုန်းကြီးကျောင်းမှာ မွေးထားတဲ့ တိရစ္ဆာန်တွေကိုလည်း သတ်ဖြတ်စားသောက်လေ့ရှိတယ်လို့ ရွာခံစစ်ရှောင်တွေဆီက သိရပါတယ်။

စစ်အာဏာသိမ်းချိန်ကနေ ၂၀၂၅၊ ဇွန် ၄ ရက်အထိ စစ်ကောင်စီတပ်တွေနဲ့ ၎င်းတို့ရဲ့လက်အောက်ခံတွေကြောင့် သေဆုံးခဲ့တဲ့ပြည်သူစုစုပေါင်း ၆,၇၇၂ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP ရဲ့အစီရင်ခံစာအရသိရပါတယ်။

စာတည်း – လင်း

စလင်း၊ ဇွန် ၃၊ ၂၀၂၅။

မကွေးတိုင်း၊ စလင်းမြို့နယ်၊ ဆွယ်တည်ရွာသစ်နဲ့ ဆွယ်တည်ရွာမကျေးရွာတွေက စာသင်ကျောင်းတွေ လေယာဥ်နဲ့ဗုံးကြဲတိုက်ခိုက်ခံရပြီး အမျိုးသား ၁ ဦး သေဆုံးကာ အမျိုးသမီး ၁ ဦးထိခိုက်ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

ဇွန် ၃ ရက် ဒီကနေ့ နေ့လယ် ၁၁ နာရီ ၃၄ မိနစ်လောက်မှာ ဆွယ်တော်ရွာမ စာသင်ကျောင်းကို ဗုံး ၁ လုံး၊ နေ့လယ် ၁၁ နာရီ ၃၅ မိနစ်မှာ ဆွယ်တည်ရွာသစ်စာသင်ကျောင်းကို ဗုံး ၁ လုံး ကြဲချတိုက်ခိုက်သွားတာဖြစ်ပြီး စာသင်ကျောင်းနဲ့ အနီးနားနေအိမ်တွေပေါ်ကျရောက်ပေါက်ကွဲခဲ့တယ်လို့ ဆိုပါတယ်။

“ စာသင်ကျောင်းတွေမှာ စာသင်ကြားနေတာမရှိပါဘူးရှင့်။ ဆွယ်တည်ရွာသစ်နဲ့ ဆွယ်တည်ရွာမက ကပ်နေတဲ့အတွက် ၁ မိနစ်အတွင်းမှာချတာပါ၊ ပေါင်(ဗုံးအမျိုးအစား)ကတော့ ဘယ်လောက်လည်း မသိဘူး၊ အသံကတော့တော်တော်ပြင်းပါတယ်။ လယ်ထဲကနေ မြက်ရိတ်ပြန်လာတဲ့ ဇနီးမောင်နှံ ၂ ဦးထိပါတယ်၊ အမျိုးသမီးကတော့ မြောင်းထဲက ပေါင်း(ဘောင်) အောက်မှာ ခိုလိုက်တဲ့အတွက် ဒဏ်ရာအနည်းငယ်ရပြီးတော့ အမျိုးသားကတော့ သေဆုံးပါတယ်” လို့ စလင်းမြို့ခံအမျိုးသမီးတဦးက မြေလတ်အသံကို ပြောပါတယ်။

ဗုံးပေါက်ကွဲမှုကြောင့် ဆွယ်တည်ရွာမကျေးရွာနေ အသက် ၃၀ နှစ်ဝန်းကျင်ရှိအမျိုးသားသေဆုံးခဲ့ပြီး ၎င်းရဲ့ဇနီးဖြစ်သူ အမျိုးသမီးမှာ ထိခိုက်ဒဏ်ရာရရှိခဲ့ကာ ဆွယ်တည်ရွာသစ် စာသင်ကျောင်းဆောင်တခုလုံး ပျက်စီးခဲ့တယ်လို့ သိရပါတယ်။

လေကြောင်းတိုက်ခံရမှုကြောင့် အိမ်ခြေ ၁၃၅၊ လူဦးရေ ၆၀၀ ကျော်ရှိ ဆွယ်တည်ရွာမ နဲ့ အိမ်ခြေ ၆၀၊ လူဦးရေ ၂၅၀ ရှိ ဆွယ်တည်ရွာသစ်က ဒေသခံတွေဟာ ဘေးလွတ်ရာကိုတိမ်းရှောင်နေကြတယ်လို့ သိရပါတယ်။

စာတည်း – ဟိန်းစံ

ညောင်ဦး၊ ဇွန် ၃၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ ပုဂံမြို့သစ်၊ ဂန့်ဂါရပ်ကွက်ရှိ ဇရပ်မှာထိုင်နေတဲ့ အုပ်ချုပ်ရေးမှူးအဖွဲ့ ပစ်ခတ်ခံရပြီး ၈ ဦးသေဆုံးကာ လက်နက်အချို့ သိမ်းဆည်းရမိခဲ့တယ်လို့ ညောင်ဦးခရိုင်အခြေစိုက် ထနောင်းမြေစစ်ကြောင်းထံက သိရပါတယ်။

ဇွန် ၁ ရက် နေ့လယ် ၂ နာရီကျော်မှာ ဂန့်ဂါရပ်ကွက်အုပ်ချုပ်ရေးမှူး ပျူစောထီးခေါင်းဆောင် ဇော်ဇော်ဦးစီးအဖွဲ့ဟာ အလှူခံမဏ္ဍပ်ဖွင့်လှစ်ထားတဲ့ အခင်းဖြစ်နေရာမှာ ငွေကြေးကောက်နေကြောင်း သတင်းရတာကြောင့် သွားရောက်ပစ်ခတ်ခဲ့တာဖြစ်ပြီး ပစ်ခတ်ချိန်မှာ ဇရပ်အတွင်း နှစ်ဖက်ခွဲထိုင်နေကြတယ်လို့ ဆိုပါတယ်။

” ကျနော်တို့အထင်ကျည်ထိတာလား၊ သူ(အုပ်ချုပ်ရေးမှူး) ကလစ်ဖြုတ်ပြီး ပြန်ပစ်တဲ့ နာနတ်သီး (လက်ပစ်ဗုံး)ကျကွဲပြီး ထိတာလားဘဲ။ ကျနော်တို့က ကားနဲ့ဖြတ်ပြီး ပစ်သွားတာပဲ။ အဓိက သူ့ကို (အုပ်ချုပ်ရေးမှူး)ပစ်တာ။ သူ့နောက်လိုက်တွေတော့ပါတယ်။ ကားပြန်လှည့်ခါနီးမှာတော့ နာနတ်သီးကွဲသံကြားလိုက်သေးတယ်။ ကားနဲ့လမ်းမပေါ်ကဖြတ်သွားရင်း မစ်ရှင်လုပ်တာ၊ ပြန်လှည့်လာတော့ အကုန်လဲနေကြပြီ “လို့ ထနောင်းမြေစစ်ကြောင်း IO မူတူးက မြေလတ်အသံကို ပြောပါတယ်။

ပစ်ခတ်မှုအတွင်း အုပ်ချုပ်ရေးမှူး ဦးဇော်ဇော်အပါအဝင် ၈ ဦးသေဆုံး၊ ၁ ဦးဒဏ်ရာရထားတာကိုတွေ့ရကာ ပစ်ခတ်မှုဖြစ်ခဲ့တဲ့နေရာကို ဝင်ရောက်ရှင်းလင်းချိန်မှာ ဦးဇော်ဇော်ကိုင်ဆောင်တဲ့ လက်လုပ်သေနတ် ၂ လက်၊ လက်ပစ်ဗုံး ၁ လုံး၊ ဦးဇော်ဇော်ကိုင်ဆောင်တဲ့မှတ်ပုံတင်၊ ကျည်အချို့သိမ်းဆည်းရမိခဲ့တယ်လို့ သိရပါတယ်။

စစ်ကောင်စီထောက်ခံတယ်လီဂရမ်တွေမှာတော့ အုပ်ချုပ်ရေးမှူးနဲ့ရပ်မိရပ်ဖတွေဟာ ဂန့်ဂါရပ်ကွက်ရှိ ဓမ္မာရုံ၌ ရပ်ကွက်အုပ်ချုပ်ရေးမှူးနဲ့ လူ ၁၅ ဦးခန့်ဟာ ပဌာန်းပွဲအတွက် အစည်းအဝေးပြုလုပ်နေချိန် PDF တွေဘက်က ဝင်ရောက်ပစ်ခတ်ခဲ့တာကြောင့် အုပ်ချုပ်ရေးမှူး ဦးဇော်ဇော် (ခ)ဦးမြင့်ဇော် အပါ ဦးတင်မြိုင်၊ ဦးခင်မောင်ဌေး၊ ဦးခင်မောင်သန်း၊ ဦးသန်းထွန်း၊ ဦးစိုးမင်းနှင့် ဦးကြည်ထွန်းတို့ သေဆုံးခဲ့ပြီး ၆ ဦး ဒဏ်ရာပြင်းထန်ရခဲ့တယ်လို့ ရေးသားဖော်ပြကြပါတယ်။

စစ်ကောင်စီတယ်လီဂရမ်ချန်နယ်တွေမှာ ဖော်ပြနေမှုအပေါ် ထနောင်းမြေစစ်ကြောင်း IO မူတူးက အခုလိုတုံ့ပြန်ပါတယ်။

” ပဌာန်းပွဲလုပ်မယ့်သူတွေကလည်း သေနတ်တွေကော လက်ပစ်ဗုံးတွေကပါနေတာဆိုတော့ ဟုတ်၊ မဟုတ်ဆိုတာ စဥ်းစားကြည့်ပါအုန်း”လို့ ၎င်းက ပြောပါတယ်။

အဆိုပါ ပစ်ခတ်မှုကိုတော့ ထနောင်းမြေစစ်ကြောင်း၊ Bagan & Nyaung-U Special Task Force တို့က ပူးပေါင်းတိုက်ခိုက်ခဲ့တာလို့ ဆိုပါတယ်။

ဇွန် ၂ ရက် မနက် ၅ နာရီခန့်မှာလည်း ညောင်ဦးမြို့နယ်၊ စဥ့်ကူးကျေးရွာနေ ရာအိမ်မှူး အသက် ၄၀ ဝန်း ကျင်ရှိ ဦးထွန်းထွန်းနိုင်ဟာ နေအိမ်မှာ ရှိနေချိန်သေနတ်သမားတွေက ဝင်ပစ်သွားလို့ သေဆုံးသွားတယ်လို့ သိရပါတယ်။

စာတည်း – ဟိန်းစံ

ပခုက္ကူ၊ မေ ၃၁၊ ၂၀၂၅။

မကွေးတိုင်း၊ ပခုက္ကူမြို့၊ အမှတ် ၁၂ ရပ်ကွက်၊ လယ်ပြင်ဘုန်းကြီးကျောင်းရေတွင်းမှာ အမှိုက်ဆင်းဆယ်တဲ့အမျိုးသား ၁ ဦးသေဆုံးသွားတယ်လို့ ကူညီကယ်ဆယ်ရေး လုပ်ဆောင်ပေးခဲ့သူတွေထံက သိရပါတယ်။

သေဆုံးသူဟာ အသက် ၃၃ နှစ်အရွယ် ကိုဆန်းထွန်းနိုင်ဆိုသူဖြစ်ပြီး မေ ၃၁ ရက် ဒီမနက် ၇ နာရီခန့်မှာ ဘုန်းကြီးကျောင်းဝန်းအတွင်းရေတွင်းမှာ အမှိုက်ဆင်းဆယ်ရင်း သေဆုံးခဲ့တာလို့ ဆိုပါတယ်။

“သူ့ဟာသူ အမှိုက်ဆင်းဆယ်တာနေမှာ။ အောက်ဆီဂျင်ပြတ်ပြီးတော့ ပြုတ်ကျသေဆုံးတာ ဖြစ်နိုင်တယ်။ ကြာမှသိကြတာ။ ရေတွင်းကလည်း အသုံးမပြုတာကြာပြီလို့တော့ သိရတယ်။ “လို့ ကူညီကယ်ဆယ်ရေးပြုလုပ်ပေးခဲ့သူတဦးက ပြောပါတယ်။

အဲ့ဒီရေတွင်းဟာ အနက် ၂၅ ပေခန့်သာရှိပြီး ကျောင်းဝန်းအတွင်း ယခင်က သုံးရေအတွက်အသုံးပြုနေတဲ့ ရေတွင်းဖြစ်ကာ သေဆုံးသူကလည်း ဘုန်းကြီးကျောင်းမှာနေထိုင်သူမဟုတ်ဘဲ ရပ်ကွက်ထဲနေထိုင်သူဖြစ်ပြီး ကျောင်းဝန်းအတွင်းကို ဝင်ထွက်သွားလာလေ့ရှိတယ်လို့ သိရပါတယ်။

အလောင်းကိုတော့ ဒေသလူမှုကူညီရေးအသင်း၊ မီးသတ်တပ်ဖွဲ့တွေနဲ့ ဒေသခံတွေက ဝိုင်းဝန်းဆယ်တင်ခဲ့ပြီးနောက် ပခုက္ကူဆေးရုံကို ပို့ဆောင်ပေးခဲ့ရပါတယ်။

အဲဒီနောက်ဆေးရုံမှာ လိုအပ်တဲ့စစ်ဆေးမှုပြုလုပ်ပြီး အလောင်းကိုနေအိမ်ပြန်သယ်ကာ နာရေးပြုလုပ်ဖို့စီစဥ်နေကြတယ်လို့ သိရပါတယ်။

စာတည်း – လင်း