လက်နက်ကြီးပစ်ခတ်

စစ်ကိုင်း၊ မေ ၉၊ ၂၀၂၆။

စစ်ကိုင်းတိုင်း၊ မော်လိုက်ခရိုင်၊ ဖောင်းပြင်မြို့နယ်ရှိ ကျေးရွာ ၂ ရွာကိုစစ်ကော်မရှင်တပ်က ဒရုန်း၊ လက်နက်ကြီးတွေနဲ့ ပစ်ခတ်တိုက်ခိုက်ခဲ့တာကြောင့် သက်ကြီးပိုင်းအမျိုးသမီး ၂ ဦးသေဆုံးပြီး ထိခိုက်ဒဏ်ရာရရှိ‌သူ‌တွေနဲ့ နေအိမ်ပျက်စီးမှုတွေရှိခဲ့တယ်လို့ ဖောင်းပြင်မြို့နယ်ပကဖဆီက သိရပါတယ်။

မေလ ၈ ရက် နေ့လယ် ၃ နာရီ ၂၅ မိနစ်ခန့်မှာ ဖောင်းပြင်မြို့နယ်၊ မင်းယာရွာကို ၁၂၀ မမလက်နက်ကြီးနဲ့ ၁ ချက်ခန့်ပစ်ခတ်ခဲ့ပြီး နေ့လယ် ၃ နာရီမှ ၄ နာရီအထိ နောင်ရင်းရွာကို ဒရုန်းဗုံးနဲ့ ၄ ကြိမ်တိုက်ခိုက်ခဲ့တဲ့ အပြင် ၆၀ မမ ၆ လုံး၊ ၁၂၀ မမ ၁ လုံးတို့နဲ့လည်း ပစ်ခတ်ခဲ့တာလို့ ဆိုပါတယ်။

“မနေ့တုန်းက တိုက်ပွဲဖြစ်တာလည်းမရှိဘူး။ တော်လှန်ရေးရဲဘော်တွေ အင်အားစုဖွဲ့မှု လုပ်နေတာမျိုးလည်းမရှိဘူး။ မင်းယားက ဒေါ်မယ်စိန်တို့ နေအိမ်တည့်တည့်ကိုတော့ ၁၂၀ နဲ့ ခမရ ၃၆၇ ကနေ ပစ်တယ်။ နေအိမ်ပေါ်မှာရှိတဲ့အမျိုးသမီး ၂ ဦးကတော့ ဆုံးသွားတယ်”လို့ ဖောင်းပြင်မြို့နယ် ပကဖရဲ့ ဆက်သွယ်ရေးတာဝန်ခံ ကိုဆင်ပေါက်ကြီးက မြေလတ်အသံကိုပြောပါတယ်။

အဆိုပါ ပစ်ခတ်မှုတွေကြောင့် ‌မင်းယားရွာက နေအိမ်ပေါ် လက်နက်ကြီးကျရောက်ပေါက်ကွဲပြီး နေအိမ်ထဲမှာရှိနေတဲ့ အသက် ၇၈ နှစ်အရွယ် ဒေါ်မယ်စိန်နဲ့ အသက် ၅၇ နှစ်အရွယ် ဒေါ်မြသိန်းတို့သေဆုံးကာ နေအိမ် ၂ လုံးပျက်စီးခဲ့တယ်လို့ ဆိုပါတယ်။

ဒါ့အပြင် နောင်ရင်းရွာကိုတိုက်ခိုက်မှုမှာတော့ အသက် ၂၀ ကနေ ၃၀ အကြား ရပ်ကျေးပကဖအဖွဲ့ဝင် ၃ ဦး ထိခိုက်ဒဏ်ရာရရှိခဲ့ပြီး နေအိမ် ၃ လုံးပျက်စီးသွားတယ်လို့အထက်ပါ ဆက်သွယ်ရေးတာ၀န်ခံက ဆိုပါတယ်။

အဲ့ဒီတိုက်ခိုက်မှုတွေကို ဖောင်းပြင်မြို့မှာရှိတဲ့ အမှတ် ၃၆၇ ခြေမြန်တပ်ရင်း (ခမရ ၃၆၇) က လုပ်ဆောင်ခဲ့တာလို့သိရပြီး ပြည်သူ့စစ်အဖွဲ့‌၀င်တွေထိန်းချုပ်ထားတဲ့ ပိုးစားကုန်းရွာနဲ့ တော်လှန်ရေးတပ်ဖွဲ့တွေထိန်းချုပ်ထားတဲ့ နောင်ရင်းရွာတို့ဟာ မီတာ ၁၀၀ ကျော်အကွာအဝေးမှာ ရှိတယ်လို့သိရပါတယ်။

စာတည်း – လင်း

စစ်ကိုင်း၊ မတ် ၄၊ ၂၀၂၅။

စစ်ကိုင်းတိုင်း၊ စစ်ကိုင်းမြို့နယ်၊ ညောင်ကုန်းကျေးရွာမှာ စစ်ကောင်စီတပ်ဖွဲ့ဝင်တွေပစ်တဲ့ လက်နက်ကြီးကျည်ထိပြီး အမျိုးသား ၃ ဦးဒဏ်ရာရတယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

မတ် ၃ ရက်မနက် ၆ နာရီကျော်မှာ တဲကြီးကျေးရွာ၊ ငါးထပ်ကြီးဘုရားထဲမှာ အထိုင်ချတပ်စွဲထားတဲ့ စစ်ကောင်စီတပ်ဖွဲ့ဝင်တွေက ညောင်ကုန်းကျေးရွာဘက်ကို လက်နက်ကြီးတွေနဲ့ပစ်ခတ်ခဲ့ရာ ၁ လုံးက ဒေသခံနေအိမ်ပေါ်ကျရောက်ပေါက်ကွဲခဲ့တယ်လို့ ဆိုပါတယ်။

“လက်နက်ကြီးက ရမ်းထုတာပါ။ ငါးထပ်ကြီးထဲက ၈၁ တွေနဲ့ပစ်တာ။ ထိတာက ၃ ယောက်။ ရဲဘော် ၁ ယောက်ပါတယ်။ ပြည်သူ ၂ ဦးပါတယ်။ “လို့ ဒေသကာကွယ်ရေးရဲဘော်တဦးကပြောပါတယ်။

လက်နက်ကြီးထိမှန်လို့ အသက် ၇၄ နှစ်အရွယ် အမျိုးသားရဲ့မျက်နှာနဲ့ ၃၉ နှစ် အရွယ်အမျိုးသားရဲ့ပေါင်မှာ အစထိမှန်ဒဏ်ရာရပြီး အသက် ၂၀ ကျော်ကျေးရွာကာကွယ်ရေးအဖွဲ့ဝင် ၁ ဦးလည်းထိခိုက်ဒဏ်ရာရတဲ့အပြင် နေအိမ် ၁ လုံးလည်းပျက်စီးခဲ့ပါတယ်။

ဒဏ်ရာရသူတွေကတော့ သက်သာတဲ့အခြေအနေမှာရှိတယ်လို့ သိရပါတယ်။

ညောင်ကုန်းကျေးရွာမှာအိမ်ခြေ ၄၀၀ ကျော် ဒေသခံ ၂၀၀၀ ခန့်ရှိပြီး လက်ရှိမှာ ဒေသခံထက်ဝက်နီးပါးဟာဘေးလွတ်ရာကို ထွက်ပြေးတိမ်းရှောင်နေကြရပါတယ်။

ပြီးခဲ့တဲ့နှစ် ဇွန် ၈ ရက်ကလည်း စစ်ကိုင်းမြို့နယ်၊ ထန်းတောဆိပ်ကျေးရွာအုပ်စု၊ သပြေသာကျေးရွာ ဘုန်းကြီးကျောင်းမှာ တော်လှန်ရေးအဖွဲ့တွေအစည်းဝေးလုပ်နေချိန် ဗုံးကြဲခံရလို့ သံဃာ ၂ ပါး အပါအဝင် သေဆုံးသူ ၈ ဦးနဲ့ ဒဏ်ရာရသူ ၅၀ ကျော်ရှိတယ်လို့ သိရပါတယ်။

စာတည်း – လင်း

■ အမျိုးသား ၁ ဦးကိုလည်း တော်လှန်ရေးကင်းထောက်ဟုဆိုကာ သတ်ဖြတ်

ရွှေဘို၊ ဖေဖော်ဝါရီ ၂၇၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ပန်းရံရွာကနေ ခွန်တောင်းကြီးရွာကိုသွားတဲ့ စစ်ကောင်စီတပ်ဖွဲ့ဝင်တွေနဲ့ ပျူစောထီးအဖွဲ့ဝင်တွေဟာ ပေါင်းကောက်(ပေါင်းနုတ်)နေတဲ့ ပြည်သူတွေကို လက်နက်ကြီးနဲ့ ပစ်ခတ်ခဲ့တာကြောင့် အမျိုးသမီး ၃ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဖေဖော်ဝါရီ ၂၅ ရက် မနက် ၁၀ နာရီခန့်မှာ စစ်ကောင်စီတပ်ဖွဲ့ဝင်တွေနဲ့ ပျူစောထီးအဖွဲ့ဝင် အင်အား ၄၀ ဝန်းကျင်ဟာ ပန်းရံရွာနေ ခွန်တောင်းကြီးရွာဘက်ကိုထွက်ခွာလာချိန် အဲ့ဒီရွာ ၂ ရွာအကြား လယ်ထဲမှာ ပေါင်းကောက်(ပေါင်းနုတ်)နေတဲ့ ပြည်သူတွေကိုတွေ့ရှိပြီး လက်နက်ကြီးနဲ့ ပစ်ခတ်ခဲ့တာကြောင့် အမျိုးသမီး ၃ ဦး ဒဏ်ရာရရှိခဲ့တယ်လို့ ဆိုပါတယ်။

“ပန်းရံရွာက အကြမ်းဖက်စစ်တပ်နဲ့ပျူတွေက ပန်းရံကနေခွန်တောင်းကြီးရွာကို သွားတာပါ။ လယ်ထဲပေါင်းကောက်နေတာမြင်ရဲ့သားနဲ့ လက်နက်ကြီးနဲ့ပစ်တာ။ အဲ့မှာ ပေါင်းကောက်နေတဲ့သူတွေကိုထိတာ။” လို့ ဒေသခံတဦးက ပြောပါတယ်။

စစ်ကောင်စီတပ်ကပစ်ခတ်တဲ့လက်နက်ကြီးကြောင့် ညောင်ကန်ရွာကပြည်သူတွေဖြစ်တဲ့ မသန္တာထွေး အသက် ၁၆ နှစ်၊ ဒေါ်သန်းသန်းစိုး ၄၀ နှစ်နဲ့ ဒေါ်ပပစိုး ၅၀ နှစ်တို့ လက်နက်ကြီးစထိမှန်ဒဏ်ရာရခဲ့ပြီး မသန္တာထွေးကတော့ စိုးရိမ်ရတဲ့ဒဏ်ရာနဲ့ ဆေးကုသနေရတယ်လို့ သိရပါတယ်။

အဲ့ဒီနေ့ ညနေပိုင်းမှာလည်း ကြွက်ထောင်နေတဲ့ညောင်ကန်ရွာက အမျိုးသား ၁ ဦးကို စစ်ကောင်စီတပ်ဖွဲ့ဝင်တွေက ဖမ်းဆီးသတ်ဖြတ်ခဲ့သေးတယ်လို့ သူကဆက်ပြောပါတယ်။

“သေတဲ့အမျိုးသားအမည်က တော့မသိပါ။ ကြွက်ထောင်နေတဲ့အမျိုးသား ၁ ယောက်ကို တော်လှန်ရေးအဖွဲ့က ကင်းထောက်လွှတ်တယ်ဆိုပြီး ဖမ်းပြီးသတ်လိုက်တာ။ ကျနော်စုံစမ်းရသလောက်တော့ သေတဲ့သူက ကင်းထောက်မဟုတ်ဘူး” လို့ ၎င်းက ပြောပါတယ်။

သိုက်ထွန်း၊ ကျော်စွာ

ဆားလင်းကြီး၊ ဖေဖော်ဝါရီ ၂၀၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်၊ ဒုန်းတောကျေးရွာမှာ ဖေဖော်ဝါရီ ၁၉ မနေ့ ညနေ ၆ နာရီခွဲခန့်က စစ်ကောင်စီတပ်ဖွဲ့ဝင်တွေပစ်တဲ့ လက်နက်ကြီး ဗုံးသီးထိမှန်ပြီး အမျိုးသမီး ၁ ဦးသေဆုံးကာ ၂ ဦး ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

ဒုန်းတောရွာ အနောက်ဘက်မှာရှိတဲ့ မြန်မာ-ယန်စီကုမ္ပဏီရဲ့ လုံခြုံရေးဂိတ်ကနေ ပစ်ခတ်ခဲ့ဖြစ်ပြီး စစ်ကောင်စီတပ်ဖွဲ့ဝင်တွေရဲ့ အက်ဆစ်သယ်ကားတွေ၊ ကြေးနီသယ်ကားတွေ သွားလာတဲ့ လမ်းကြောင်းရှိရင် အခုလို ကျေးရွာတွေကို လက်နက်ကြီးနဲ့ ပစ်ခတ်နေကျဖြစ်တယ်လို့ ဆိုပါတယ်။

“သေဆုံးသူက တင်ပါးကို လက်နက်ကြီးစ ထိမှန်တာ၊ အချိန်မီ ဆေးကုသခံယူခွင့်မရှိလို့ သွေးလွန်ပြီးသေတာပေါ့။ မနေ့က ညနေပိုင်းမှာ လက်နက်ငယ် လက်နက်ကြီးတွေ တောက်လျှောက်ပစ်နေတယ်။”လို့ ဒေသခံတဦးက မြေလတ်အသံကို ပြောပါတယ်။

လက်နက်ကြီးဗုံးသီးစ ထိမှန်လို့ အသက် ၅၅ နှစ်ဝန်းကျင် ဒေါ်သန်းဌေး သေဆုံးခဲ့ပြီး အသက် ၆၅ နှစ်အရွယ် အမျိုးသား ၁ ဦးနဲ့ အသက် ၄၅ နှစ်အရွယ် အမျိုးသမီး ၁ ဦး ထိခိုက်ဒဏ်ရာရခဲ့တယ်လို့ သိရပါတယ်။

လက်ပံတောင်းတောင်က မြန်မာ-ဝမ်ပေါင်ကုမ္ပဏီကို သွားမယ့် အက်ဆစ်ကားတန်းတွေကို လုံခြုံရေးပေးဖို့အတွက် စစ်ကောင်စီတပ်ဖွဲ့ဝင်တွေဟာ ဖေဖော်ဝါရီ ၁၉ ရက် မနက်ပိုင်းထဲက ပုသိမ်-မုံရွာလမ်းပိုင်းတလျှောက်မှာ အင်အားအများအပြားနဲ့ ကင်းယူနေကြတာ ဖြစ်ပါတယ်။

အခုလက်ရှိ မြန်မာ-ဝမ်ပေါင် ကုမ္ပဏီထဲကို အက်ဆစ်တွေတင်လာတဲ့ကား ၅၀ နီးပါးဝင်သွားပြီဖြစ်ပြီး ၃၀ နီးပါးကျန်ရှိနေသေးတဲ့အတွက် စစ်ကောင်စီတပ်ဖွဲ့ဝင်တွေက ပုသိမ်-မုံရွာလမ်းပေါ်မှာ ဒီကနေ့ထိ လက်နက်ငယ်တွေ ပစ်ဖောက်ပြီး ကင်းယူထားဆဲဖြစ်တယ်လို့ သိရပါတယ်။

စစ်ကောင်စီတပ်ဖွဲ့ဝင်တွေရဲ့ လက်နက်ကြီးပစ်ခတ်မှုကြောင့် ဆားလင်းကြီးမြို့နယ်ထဲက ဒုန်းတောရွာနဲ့ ဂုဏ်တောရွာက ပြည်သူ ၂,၀၀၀ ကျော် စစ်ဘေးရှောင်နေကြရတယ်လို့လည်း ဒေသခံတွေဆီက သိရပါတယ်။

စာတည်း – ချယ်ရီ

မန္တလေး၊ ဖေဖော်ဝါရီ ၁၄၊ ၂၀၂၅။

မန္တလေးတိုင်း၊ မတ္တရာမြို့နယ်၊ မြောင်းသစ်ကျေးရွာမှာ စစ်ကောင်စီတပ်ဖွဲ့ဝင်တွေပစ်တဲ့လက်နက်ကြီးကျည်ထိပြီး အမျိုးသမီး ၁ ဦးသေဆုံးခဲ့တယ်လို့ ကျေးရွာနဲ့နီးစပ်သူဆီက သိရပါတယ်။

ဖေဖော်ဝါရီ ၁၃ ရက်မနက် ၁၁ နာရီခန့်မှာ မတ္တရာမြို့ဘက်ရှိ စစ်ကောင်စီ တပ်ဖွဲ့ဝင်တွေကလက်နက်ကြီးနဲ့ပစ်ခတ်ခဲ့ရာ မန္တလေး-မြစ်ကြီးနားလမ်းပိုင်းဘေးရှိ မြောင်းသစ်ရွာထဲကို လက်နက်ကြီး ၃ လုံးကျရောက်ပေါက်ကွဲခဲ့တာလို့ ဆိုပါတယ်။

“ပြည်သူနေအိမ်နား ၁ လုံး။ ဘုန်းကြီးကျောင်းထဲ ၂ လုံးကျတယ်။ လက်နက်ကြီးကျချိန် ဘုန်းကြီးကျောင်းဝင်းကို သန့်ရှင်းရေးတံမြတ်စည်းလှဲနေတဲ့သူက လက်နက်ကြီးစမှန်ပြီး သေသွားတယ်”လို့ ကျေးရွာနဲ့နီးစပ်သူတဦးက ပြောပါတယ်။

စစ်ကောင်စီတပ်ဘက်က ပစ်ခတ်တဲ့လက်နက်ကြီးထိမှန်လို့ မြောင်းသစ်ကျေးရွာနေ အသက် ၃၄ နှစ်အရွယ် မစိုးစိုး ဟာနေရာတင်သေဆုံးခဲ့တယ်လို့ ဆိုပါတယ်။

ဒါ့အပြင် ဘုန်းကြီးကျောင်းအဆောက်အဦ ၂ လုံးနဲ့ကျောင်းအနီးက နေအိမ် ၁ လုံးလည်းပျက်စီးခဲ့တယ်လို့ ဆိုပါတယ်။

မြောင်သစ်ကျေးရွာမှာ အိမ်ခြေ ၁၅၀ ကျော်၊ လူဦးရေ ၅၀၀ ခန့်ရှိပြီး လက်နက်ကြီး ကျရောက်ပေါက်ကွဲပြီးနောက် ဒေသခံထက်ဝက်နီးပါးဟာ ဘေးလွတ်ရာကို ယာယီတိမ်းရှောင်နေကြတယ်လို့ သိရပါတယ်။

ဖေဖော်ဝါရီ ၁၂ ရက်ကလည်း မတ္တရာမြို့နယ်၊ စာတိုက်တကာကျေးရွာအတွင်း လက်နက်ကြီးကျရောက်ပေါက်ကွဲပြီး ဒေသခံ ၁ ဦးထိခိုက်ဒဏ်ရာရခဲ့ပါသေးတယ်။

စာတည်း – လင်း

ဒိန်းဂျား၊ စောကျော်ငြိမ်း။

မကွေး၊ ဇန်နဝါရီ ၂၇၊ ၂၀၂၅။

မကွေးတိုင်း၊ ဆိပ်ဖြူမြို့နယ်၊ ကင်မွန်းတောင့်ရွာရှိ နေအိမ်တလုံးပေါ် လက်နက်ကြီးဗုံးသီးကျရောက်ပေါက်ကွဲလို့ ၅ နှစ်အရွယ်အမြွှာညီအကိုအပါ မိသားစုဝင် ၅ ဦး လက်နက်ကြီးဗုံးစ ထိမှန်သေဆုံးခဲ့တယ်လို့ ဆိပ်ဖြူအခြေစိုက်ဒေသကာကွယ်ရေးတပ်ဖွဲ့တွေထံက သိရပါတယ် ။

ဇန်နဝါရီ ၂၆ ရက် မနေ့ညနေ ၅ နာရီခွဲမှာ ဆိပ်ဖြူ၊ ရွှေဘိုးကျွန်းရွာအခြေစိုက် အမှတ် ၂၂ ကာကွယ်ရေးပစ္စည်းစက်ရုံ (ကပစ ၂၂)က ပစ်ခတ်တဲ့ လက်နက်ကြီးဗုံးသီးဟာ ၁၃ မိုင်အကွာမှာရှိတဲ့ ကင်မွန်းတောင့်ရွာအနောက်မြောက်ပိုင်းရှိ နေအိမ်တလုံးပေါ်ကျရောက်ပေါက်ကွဲခဲ့တာလို့ ဆိုပါတယ်။

“ ၁၂၀ မမ လက်နက်ကြီးလို့ ယူဆရတယ်။ အပြစ်မဲ့ပြည်သူ ၅ ဦးသေဆုံးပြီးတော့ ၃ ဦး ထိခိုက်ဒဏ်ရာရတယ်။ သေဆုံးထိခိုက်ဒဏ်ရာရသူတွေကတော့ မိသားစုဝင်ဆွေမျိုးသားချင်း‌တွေပါ။“ လို့ ဆိပ်ဖြူမြောက်ပိုင်းပြည်သူ့ကာကွယ်ရေးတပ်ဖွဲ့ သတင်းနဲ့ပြန်ကြားရေးတာဝန်ခံက ပြောပါတယ်။

လက်နက်ကြီးဗုံးသီး ကျရောက်ပေါက်ကွဲထိမှန်တာကြောင့် ကင်မွန်းတောင့်ရွာက အသက် ၅ နှစ်အရွယ် မောင်သုခမင်း နဲ့ သုခဝင်း အမွှာညီအကို၊ ၎င်းတို့ရဲ့ အဘွားတော်စပ်သူ အသက် ၈၀ နှစ် ဒေါ်ရွှေကျင်၊ ဦးလေးနဲ့အဒေါ်တော်စပ်သူ အသက် ၆၅ နှစ် ဦးမြင့်နိုင်နဲ့ အသက် ၅၅ နှစ် ဒေါ်သန်းနွဲ့ လင်မယား စုစုပေါင်း ၅ ဦးသေဆုံးခဲ့တယ်လို့ သိရပါတယ်။

ဒါ့အပြင် လက်နက်ကြီးအစထိမှန်တာကြောင့် မမြင့်မြင့်စိုး အသက် ၄၀ နှစ်၊ မဝိုင်းပြည့်ဖူး အသက် ၉ နှစ်၊မောင်ဖိုးပိန် အသက် ၂၅ နှစ်တို့မှာ ဒဏ်ရာ(စိုးရိမ်ရ)ရရှိခဲ့ပြီး အရေးပေါ်ဆေးကုသမှု ခံယူနေတယ်လို့ ဆိုပါတယ်။

ဆိပ်ဖြူမြို့နယ်ပကဖတာဝန်ခံ ကိုသူရိန်က” ဒဏ်ရာရသူထဲကအမျိုးသမီး(ဒေါ်ရွှေကျင်)ကို ဆေးရုံပို့တယ်။ ခုမနက်လမ်းမှာပဲ သေဆုံးသွားတယ်။” လို့ ဆိုပါတယ်။

ဆိပ်ဖြူမြို့နယ် ရွှေဘိုးကျွန်းရွာအခြေစိုက် ကပစ ၂၂ တပ်ဟာ စစ်ကောင်စီတပ်သုံး လက်နက်ငယ်တွေ ထုတ်လုပ်နေတဲ့ တပ်ရင်းဖြစ်ပြီး စက်ရုံမှူးဟာ ဒုတိယဗိုလ်မှူးကြီး မြတ်သူ ဖြစ်တယ်လို့ ကပစတပ် အသိုင်းအဝိုင်းထံက သိရပါတယ်။

ဇန်နဝါရီ ၂၇ ရက် ဒီကနေ့မှာလည်း ကပစ ၂၂ တပ်ကနေ အနီးဝန်းကျင်ရှိကျေးရွာတွေကို လက်နက်ကြီးနဲ့ ပစ်ခတ်နေတယ်လို့ သိရပါတယ်။

စာတည်း – ဟိန်းစံ

စစ်ကိုင်း၊ ဇွန် ၁၅၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ညောင်ပင်ကြီးရဲစခန်းမှာတပ်စွဲနေတဲ့ စစ်ကောင်စီတပ်သားတွေက လက်နက်ကြီးတွေနဲ့ပစ်ခတ်လို့ အနီးရှိ နှင်းတောကျေးရွာက အမျိုးသားတဦး ကျည်ထိမှန်သေဆုံးခဲ့တယ်လို့ ဒေသခံတွေဆီက သိရပါတယ်။

အဲ့ဒီစစ်ကောင်စီတပ်သားတွေက ဇွန်လ ၁၄ ရက်မနေ့ မနက် ၉ နာရီလောက်မှာ ၄၀ မမ၊ ၆၀ မမ လက်နက်ကြီးတွေနဲ့ ပစ်ခတ်ခဲ့တာကြောင့် အသက် ၂၇ နှစ်အရွယ် နှင်းတောရွာသားတဦး သေဆုံးပြီး၊ နောက်ထပ်အမျိုးသား ၂ ဦးလည်း ဒဏ်ရာရရှိခဲ့တာဖြစ်ပါတယ်။

“ညောင်ပင်ကြီးရဲစခန်း ပစ်ခတ်ခံရပြီးနောက်ပိုင်းမှာ ရွာတွေဘက်ကို လက်နက်ကြီးတွေနဲ့ ပစ်ခတ်တာမျိုးတွေ လုပ်တယ်။ မနေ့က လက်နက်ကြီးထိမှန်ပြီး သေဆုံးသွားတဲ့သူရဲ့ အလောင်းကို ပြန်မရသေးပါဘူး၊ ထိခိုက်ဒဏ်ရာရသွားတဲ့ ၂ ယောက်ကိုလည်း ဆေးရုံကို ပို့ပေးထားပါတယ်” လို့ ချင်းတွင်းမြစ်သပိတ်ကော်မတီဝင်တဦးက ပြောပါတယ်။

ထိခိုက်သေဆုံးသူတွေနဲ့ပတ်သက်တဲ့ ကိုယ်ရေးအချက်အလက်တွေကိုတော့ လုံခြုံရေးအရ ထည့်သွင်း ပြောကြားခဲ့ခြင်း မရှိပါဘူး။

ဒါ့အပြင် မနေ့ကတရက်တည်းမှာတင် စစ်ကောင်စီတပ်သားတွေက နှင်းတောရွာသား ၈ ဦးကိုလည်း ညောင်ပင်ကြီးရဲစခန်းကို ဖမ်းဆီးခေါ်ဆောင်သွားပြီး ဇွန်လ ၁၅ ရက် ဒီနေ့အထိ ပြန်လွတ်မလာသေးဘူးလို့ သိရပါတယ်။

“ရွာသားတွေ ရွာထဲပစ္စည်းဝင်ယူပြီး ပြန်ထွက်ချိန် သူတို့ (စစ်ကောင်စီ)နဲ့တိုးပြီး အဖမ်းခံလိုက်ရတယ်။ အဖမ်းခံလိုက်ရတာ ယောကျာ်းလေးတွေချည်းပဲ အသက်အရွယ်တွေက ၂၅ နဲ့ ၃၀ ကြား အရွယ်တွေပါ။ ရွာသားတွေကို ရဲစခန်းမှာ အလုပ်လုပ်ခိုင်းဖို့ ဖမ်းသွားတာနေမှာ” လို့ အထက်ပါသပိတ်ကော်မတီဝင်က ဆက်ပြောပါတယ်။

ညောင်ပင်ကြီးရဲစခန်းမှာ နှင်းတောရွာသား ၈ ဦးအပါအဝင် အခြားကျေးရွာက ဒေသခံတွေလည်း ဖမ်းဆီးခံထားရပြီး၊ ရွာလမ်းတချို့ကိုလည်း ဘက်ဟိုးကားနဲ့ ဖျက်ဆီးထားခဲ့တယ်လို့ သိရပါတယ်။

ပြီးခဲ့တဲ့ ဇွန်လ ၉ ရက် ညနေ ၅ နာရီခွဲလောက်မှာ PDF မဟာမိတ်ပူးပေါင်းတပ်ဖွဲ့တွေက ညောင်ပင်ကြီးရဲစခန်းကို ဝင်ရောက်ပြီး စခန်းသိမ်းတိုက်ပွဲဆင်နွှဲခဲ့ရာ စစ်အုပ်စုဘက်က သေဆုံးမှုများခဲ့တာကြောင့် လေကြောင်းပစ်ကူနဲ့ လက်နက်ကြီးပစ်ကူ အများအပြား အသုံးပြုခဲ့တယ်လို့လည်း ကာကွယ်ရေးတပ်ဖွဲ့တွေက ပြောပါတယ်။

စာတည်း – လင်း