ဝေါ၊ ဇန်နဝါရီ ၂၆၊ ၂၀၂၆။

ပဲခူးတိုင်း၊ ဝေါမြို့နယ်၊ သူရဲသမိန်ရဲစခန်းက ရဲတပ်သား ၁ ဦး ဇန်နဝါရီ ၂၆ ရက်မနက် ၅ နာရီခွဲမှာ စနိုက်ပါနဲ့ပစ်ခတ်ခံရပြီး သေဆုံးခဲ့တယ်လို့ ဖြစ်စဥ်ကိုသိရှိတဲ့ဒေသခံတဦးဆီက သိရပါတယ်။

ပစ်ခတ်ခံရတဲ့ ရဲတပ်သားဟာ အသက် ၃၀ ကျော်အရွယ်ရှိပြီး ရဲစခန်းနဲ့ ရွာဘုရားအကြား ကင်းစခန်းမှာရှိနေချိန် ပစ်ခတ်ခံရတာလို့ဆိုပါတယ်။

“ရဲစခန်းကို အရှေ့ပေါက်ကိုပိတ်ထားပြီး အနောက်ပေါက်ကနေ အဝင်အထွက်လုပ်ကြတာ။ ရဲစခန်းနဲ့ဘုရားကြားမှာ ကင်းရှိတယ်။ အဲဒီမှာသေတာ။ ကင်းပုန်းပါ။ ကင်းပုန်းထဲမှာရှိနေချိန် ပစ်ခံရတာ။”လို့ ဖြစ်စဥ်ကိုသိတဲ့ ရွာခံတဦးက ပြောပါတယ်။

အဆိုပါရဲတပ်သားမှ ပစ်ခတ်ခံရပြီးနောက် ဝမ်းဗိုက်ပွင့်ဒဏ်ရာနဲ့ နေရာမှာတင်ပွဲချင်းပြီးသေဆုံးကာ အလောင်းကိုတော့ ထော်လာဂျီနဲ့မြစ်ကျိုးဆေးရုံကို သယ်ဆောင်သွားတယ်လို့ ဆိုပါတယ်။

သေဆုံးသူ ရဲတပ်သားဟာ သူရဲသမိန်ရဲစခန်းကို ရွေးကောက်ပွဲလုံခြုံရေးကိစ္စနဲ့ အင်အားထပ်ဖြည့်တဲ့ ၂၀ ဦးခန့်မှာပါဝင်လာသူဖြစ်ပြီး ရဲစခန်းကိုရောက်တာ ၁ ပတ်ခန့်သာရှိသေးတယ်လို့ သိရပါတယ်။

အဆိုပါပစ်ခတ်မှုနဲ့ပတ်သက်ပြီး ပစ်ခတ်မှုပြုလုပ်ခဲ့တဲ့ အဖွဲ့တွေဘက်ကသတင်းထုတ်ပြန်တာမျိုး မရှိသေးပါဘူး။

ဇန်နဝါရီ ၁၅ ရက်မနက်ပိုင်းကလည်း ဝေါမြို့နယ်၊ သူရဲသမိန်ရဲစခန်းရှေ့မှာ ပစ်ခတ်ခံရပြီးနောက် ပြည်သူအမျိုးသား ၂ ဦး ကျည်ထိမှန်သေဆုံးခဲ့ပါသေးတယ်။

စာတည်း – လင်း

ရွှေဘို၊ မေ ၁၉၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ညောင်ပင်သာ စိုက်သိပ္ပံတက္ကသိုလ်နဲ့ ပန်းရံကျေးရွာသွားလမ်းပေါ်မှာ ဒုရဲအုပ်အပါအဝင် ၂ ဦးပစ်ခတ်ပြီး သေနတ် ၂ လက်သိမ်းဆည်းရမိခဲ့တယ်လို့ မေ ၁၉ ရက်မှာ ရွှေဘိုခရိုင်အမှတ် ၄ တပ်ရင်းကသတင်းထုတ်ပြန်ပါတယ်။

မေ ၁၅ ရက်မနက် ၇ နာရီခန့်မှာ စိုက်သိပ္ပံတက္ကသိုလ်ကနေ ပန်းရံကျေးရွာဘက်ကို ဆိုင်ကယ်နဲ့ လာတဲ့ ရဲ ၂ ဦးကို ပစ်ခတ်ခဲ့ရာမှာ ၂ ဦးစလုံးနေရာတင်သေဆုံးသွားတယ်လို့ ဆိုပါတယ်။

“အရပ်ဝတ်နဲ့သွားတာကို ကြားဖြတ်တိုက်ခိုက်တာပါ။ သူတို့ပြန်ပစ်နိုင်တာမရှိဘူး။ ၂ ဦးတည်း ဆိုင်ကယ်တစီးနဲ့ လာတာပါ။ မြေပြင်အခြေအနေအရ သတင်းလုံခြုံမှုကို ပထမ ဦးစားပေးတာကြောင့် သတင်းကို ဒီနေ့မှထုတ်ပြန်ရတာဖြစ်တယ်။ “လို့ ရွှေဘိုခရိုင်အမှတ် ၄ တပ်ရင်းတာဝန်ရှိသူက ပြောပါတယ်။

ပစ်ခတ်ခံရတာကြောင့် ဒုရဲအုပ် ၁ ဦး၊ ရဲတပ်သား ၁ ဦး စုစုပေါင်း ၂ ဦးစလုံးနေရာမှာပင်သေဆုံးသွားပြီး သူတို့ရဲ့ရာထူးတွေကိုတော့ သိမ်းဆည်းရမိတဲ့သက်သေခံကပ်ပြားတွေကနေ အတည်ပြုထားနိုင်တာလို့ ဆိုပါတယ်။

သူတို့ဟာ မြစ်ကြီးနားအခြေစိုက် ရဲတပ်ရင်း ၃၀ ကရဲတပ်ဖွဲ့ဝင်တွေဖြစ်ပြီး စိုက်သိပ္ပံတက္ကသိုလ်မှာ တာဝန်ကျနေသူတွေဖြစ်တယ်လို့လည်း သိရပါတယ်။

ပစ်ခတ်ပြီးနောက် ၃၅ ဗို့ခြောက်လုံးပြူး သေနတ် ၁ လက်၊ G-3 သေနတ် ၁ လက်၊ ကျည်ဘောက် ၂ ခု၊ ကျည်ဆံ ၃၃ တောင့်တို့ကို သိမ်းဆည်းရမိခဲ့တယ်လို့ ရွှေဘိုခရိုင်အမှတ် ၄ တပ်ရင်းရဲ့ ထုတ်ပြန်ချက်မှာ ဖော်ပြပါတယ်။

ဒီတိုက်ခိုက်မှုကို ရွှေဘိုခရိုင်အမှတ်(၄) တပ်ရင်းနဲ့ နယ်မြေခံပကဖ တို့ ပူးပေါင်းတိုက်ခိုက်ခဲ့တာလို့ ဆိုပါတယ်။

မတ် ၁၄ ရက်ကလည်း ရွှေဘိုမြို့နယ်၊ ဥသျှစ်ကန်ကျေးရွာ သုသာန်အနီး၊ ကျွန်းတောကွေ့ ရွှေဘို-ရေဦးလမ်းပိုင်းမှာ ပျူစောထီးရိက္ခာသယ်ကားကို ကြားဖြတ်တိုက်ခိုက်ခံရပြီး ၂ ဦးသေဆုံးကာ ကားကိုလည်း ဒေသကာကွယ်ရေးအဖွဲ့တွေက မီးရှို့ခဲ့သေးတယ်လို့ သိရပါတယ်။

စာတည်း – လင်း

တောင်သာ၊ ဧပြီ ၂၈၊ ၂၀၂၅။

မန္တလေးတိုင်း၊ မြင်းခြံခရိုင်၊ တောင်သာမြို့မှာ လုံခြုံရေးစောင့်နေတဲ့ ရဲတပ်သား ၁ ဦး လက်နက်ခဲယမ်းတွေနဲ့ ဘက်ပြောင်းခိုလှုံလာတယ်လို့ Myingyan Black Tiger-MBT မြင်းခြံခရိုင်တပ်ရင်း ၉ ဆီက သိရပါတယ်။

အသက် ၂၇ နှစ်အရွယ် ရဲတပ်သားဟာ ရန်ကုန်တိုင်း၊ မှော်ဘီအခြေစိုက် ရဲတပ်ရင်း ၅ ကနေ တောင်သာမြို့က အထက စာသင်ကျောင်းကိုပြောင်းရွှေ့ပြီး လုံခြုံရေးစောင့်နေတဲ့အချိန် ဧပြီ ၂၆ ရက်မှာ တော်လှန်ရေးတပ်ဖွဲ့ဝင်တွေနဲ့ ချိတ်ဆက်ပြီး ခိုလှုံလာတာလို့ ဆိုပါတယ်။

“သူက သင်္ကြန်အပြီး နှစ်ဆန်း ၃ ရက်မှာ တောင်သာမြို့မှာ တာဝန်ကျတာ၊ ဧပြီ ၂၂ ရက်မှာ ကျနော်တို့ကို ဆက်သွယ်လာတယ်၊ ဧပြီ ၂၆ ရက်မှာ ကျနော်တို့ MBT တပ်ဖွဲ့ထံကို အလင်းဝင်ရောက်လာတာပါ၊ ကျနော်တို့ တောင်သာမြို့ပေါ်အထိ ဘေးအန္တရယ်ကင်းကင်းနဲ့ ခေါ်ဆောင်လာခဲ့နိုင်ပါတယ်။”လို့ Myingyan Black Tiger-MBT မြင်းခြံခရိုင်တပ်ရင်း ၉ ခေါင်းဆောင်ဗိုလ်မိုက်ခဲက ပြောပါတယ်။

စစ်တပ်ရဲ့လူမဆန်တဲ့ အကျင့်ပျက်ခြစားမှု၊ နှိပ်စက်ဖိနှိပ်တာတွေ၊ ပြည်သူအပေါ်ကျင့်သုံးနေတဲ့ စစ်တပ်ရဲ့ဆက်ဆံရေးတွေကို သဘောမကျတာကြောင့်ခုလို ဘက်ပြောင်းလာခဲ့တာလို့ ရဲတပ်သားပြောပြချက်ကို ကိုးကားပြီး ခေါင်းဆောင်ဗိုလ်မိုက်ခဲက ပြန်ပြောပါတယ်။

အဆိုပါရဲတပ်သားနဲ့အတူ အူဇီသေနက် ၁ လက်၊ ကျည်ဘောက် ၃ ခု၊ G3 ကျည် ၂ တောင့်၊ 9 မမ ကျည် ၂၀၀ အတူပါလာတဲ့အတွက် ကျပ် ၂၅ သိန်း ဆုချီးမြှင့်ပေးထားပြီး သူနေထိုင်ချင်တဲ့နေရာကို သူ့မိသားစုနဲ့ အတူလုံခြုံစွာပို့လိုက်ပြီလို့ ဆိုပါတယ်။

စစ်အာဏာသိမ်းချိန်ကနေ အခုနှစ် ဧပြီ ၂၈ ရက်အထိ Myingyan Black Tiger-MBT မြင်းခြံခရိုင်တပ်ရင်း ၉ ဆီကို ဘက်ပြောင်းခိုလှုံလာသူ ရဲတပ်သားနဲ့ စစ်ကောင်စီတပ်သား စုစုပေါင်း ၈ ဦးရှိပြီလို့ အဲ့ဒီအဖွဲ့ဆီကသိရပါတယ်။

စာတည်း – လင်း

ရွှေဘို၊ ဖေဖော်ဝါရီ ၂၁၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ပျူစောထီးနဲ့ပူးပေါင်းတပ်ဖွဲ့တွေထိန်းချုပ်ထားတဲ့ ညောင်ကိုင်းရွာက ရဲတပ်သားတဦး လက်နက်နဲ့အတူ ဘက်ပြောင်းခိုလှုံလာတယ်လို့ တောင်သူဦးကြီးများအဖွဲ့-LDF ဆီက သိရပါတယ်။

ဘက်ပြောင်းလာသူမှာ ညောင်ကိုင်းရွာမှာတပ်စွဲနေတဲ့ အသက် ၂၅ နှစ်အရွယ် ရဲတပ်သား စိန်သောင်း ဖြစ်ပြီး ဖေဖော်ဝါရီ ၁၆ ရက် နေ့လယ် ၁၂ နာရီခန့်မှာ ၎င်းတပ်စွဲနေရာကနေ ထွက်ခွာလာတာလို့ ဆိုပါတယ်။

“ သူကလည်း သတ်မှတ်ထားတဲ့ နယ်မြေတနေရာရောက်အောင်လာပြီးတော့ ကျနော်တို့ကလည်း သတ်မှတ်ထားတဲ့‌နေရာအထိ သွားပြီးခေါ်ထုတ်တာ။” လို့ တောင်သူဦးကြီးများအဖွဲ့-LDF တာဝန်ခံအမျိုးသမီးက ပြောပါတယ်။

ရဲတပ်သား စိန်သောင်း ဟာ ကရင်နီပြည်နယ်ဇာတိဖြစ်ပြီး စစ်အာဏာသိမ်းပြီးနောက် ရွှေဘိုမြို့ကတဆင့် ညောင်ကိုင်းရွာကိုပို့ဆောင်ခံရတာ ၁ နှစ်ခန့်ရှိပြီဖြစ်ကာ ဘက်ပြောင်းလာဖို့ ယမန်နှစ်အောက်တိုဘာလက စတင်ဆက်သွယ်လာတာဖြစ်တယ်လို့ ဆိုပါတယ်။

ဘက်ပြောင်းလာသူရဲတပ်သားနဲ့အတူ BA 94(အူဇီ)သေနတ် ၁ လက်၊ ကျည်ဘောက် ၂ ခု၊ လက်ပစ်ဗုံး ၁ လုံးယူဆောင်လာတာကြောင့် တောင်သူဦးကြီးများအဖွဲ့-LDF က ငွေ ၁၀ သိန်းကျပ် ဆုချီးမြှင့်ခဲ့တယ်လို့ သိရပါတယ်။

စာတည်း – ဟိန်းစံ

စစ်ကိုင်း၊ ဖေဖော်ဝါရီ ၈၊ ၂၀၂၅။

စစ်ကိုင်းတိုင်း၊ ရေဦးမြို့မရဲစခန်းက ရဲတပ်သား ၁ ဦး လက်နက်တွေနဲ့အတူ ဘက်ပြောင်းခိုလှုံလာတယ်လို့ ဖေဖော်ဝါရီ ၇ ရက်မှာ ရေဦးမြို့နယ်ပြည်သူ့ကာကွယ်ရေးအဖွဲ့က ထုတ်ပြန်ပါတယ်။

ဘက်ပြောင်းခိုလှုံလာသူက ရေဦးမြို့မရဲစခန်းမှာ လုပ်သက် ၅ နှစ်ရှိ အသက် ၂၃ နှစ်အရွယ် ရဲတပ်သား အောင်သျှိုင်းကျော်ဖြစ်ပြီး ဇန်နဝါရီ ၂၃ ရက်မှာ ရေဦးမြို့နယ်ပြည်သူ့ကာကွယ်ရေးဆီ ဘက်ပြောင်းခိုလှုံလာတာလို့ ဆိုပါတယ်။

“စကစရဲ့ လုပ်ရပ်ကိုလက်မခံနိုင်တော့လို့ ကာကွယ်ရေးအဖွဲ့တွေနဲ့ ပူးပေါင်းချင်တယ်ဆိုလို့ထွက်လာတာ။ သူရဲ့အတွင်းကကိစ္စတွေ၊ မိသားစုလုံခြုံရေးအခြေနေတွေကြောင့် အခုမှ ထုတ်ပြန်ရတာပါ။ ကျနော်တို့ဘက်က မြောက်ပိုင်းပကဖကို ဖုန်းနဲ့ချိတ်ဆက်ပြီး အလင်းဝင်လာတာပါ။”လို့ ရေဦးမြို့နယ်ပြည်သူ့ကာကွယ်ရေးအဖွဲ့ တာဝန်ခံက ပြောပါတယ်။

ရဲတပ်သားရဲ့စိတ်ဆန္ဒအရ တော်လှန်ရေးအဖွဲ့တွေနဲ့အတူ လက်တွဲဆောင်ရွက်လိုပါက အချိန်အတိုင်းအတာတခုထိစောင့်ကြည့်ပြီး ပါဝင်ခွင့်ပေးသွားမှာဖြစ်သလို စီးပွားရေးလုပ်ချင်ရင်လည်း လိုအပ်တဲ့ အကူအညီပေးသွားမှာလို့ ရေဦးမြို့နယ်ပြည်သူ့ကာကွယ်ရေးအဖွဲ့ တာဝန်ခံကပြောပါတယ်။

ဘက်ပြောင်းခိုလှုံလာတဲ့ ရဲတပ်သားဟာ G3 ၁ လက်၊ ကျည်ဆန် ၁၈၀၊ ကျည်အိမ် ၄ ခု၊ ကျည်ကာအင်္ကျီ ၁ ထည်၊ လက်ပစ်ဗုံး ၁ လုံးယူဆောင်လာခဲ့ပြီး သူ့ကို ကျပ်သိန်း ၅၀ ချီးမြှင့်ပေးထားတယ်လို့ သိရပါတယ်။

“ကျနော်က လက်နက်နဲ့စစ်ရေးပြလုပ်လိုပါတယ်။ အဲ့ဒီနေ့က စခန်းကိုသွားရမှာ။ သေနတ်လွယ်သွားလို့ရတယ်ဆိုတော့ တခါတည်းထွက်လာလိုက်တာ။ ပုံမှန်ဆို သေနတ်လွယ်သွားလာလေ့မရှိဘူး။ ကျနော်က မြို့အထွက်ဂိတ်မှ တာဝန်ကျနေတာ။ အဲကနေ စခန်းကိုသွားရမှာကို စခန်းကိုမသွားတော့ဘဲ လမ်းကြားကနေချိုးပြီး ထွက်လာလိုက်တာ။”လို့ ဘက်ပြောင်းခိုလှုံလာတဲ့ ရဲတပ်သား အောင်သျှိုင်းကျော်က ပြောပါတယ်။

စစ်အာဏာသိမ်းကာလ ၄ နှစ်ကျော်အတွင်း ရေဦးမြို့နယ်ပြည်သူ့ကာကွယ်ရေးအဖွဲ့ဆီ ဘက်ပြောင်းခိုလှုံလာသူ စစ်ကောင်စီတပ်ဖွဲ့ဝင် ဗိုလ်ကြီး ၁ ဦးအပါအဝင် ၅ ဦး၊ ရဲတပ်သား ၁ ဦး စုစုပေါင်း ၆ ဦးထိရှိနေပြီး ဗိုလ်ကြီးအပါအဝင် ၃ ဦးကတော့ တပ်ဖွဲ့မှာပါဝင်ပြီး စစ်ကောင်စီတပ်ကို ပြန်လည်တိုက်ခိုက်နေတယ်လို့ ရေဦးမြို့နယ်ပြည်သူ့ကာကွယ်ရေးအဖွဲ့ တာဝန်ခံကပြောပါတယ်။

စာတည်း – လင်း

မန္တလေး၊ ဇန်နဝါရီ ၁၅၊ ၂၀၂၅။

မန္တလေးတိုင်း၊ တောင်သာမြို့နယ်၊ ခြုံကြီးကျေးရွာကို စစ်ကောင်စီတပ်ဖွဲ့ဝင်တွေက စစ်ကြောင်းထိုးချိန် အိမ်သာတက်ရင်းကျန်ခဲ့တဲ့ ရဲတပ်သား ၁ ဦးကို PDF တွေဘက်က ဖမ်းမိခဲ့တယ်လို့ မြင်းခြံခရိုင်တပ်ရင်း ၃ တပ်ရင်းမှူးထံက သိရပါတယ်။

ဇန်နဝါရီ ၁၄ ရက် မနက် ၅ နာရီခန့်မှာ တောင်သာမြို့ဘက်ကနေ အင်အား ၅၀ ကျော်နဲ့ထွက်လာတဲ့ စစ်ကောင်စီတပ်ဖွဲ့ဝင်တွေနဲ့ ရဲတပ်ဖွဲ့ဝင်ပါတဲ့ စစ်ကြောင်းက ကျေးရွာထဲကိုဝင်ရောက်ပြီးနောက် PDF အဖွဲ့ဝင်တွေကိုရှာဖွေရာမှာ မတွေ့တာကြောင့် မနက် ၇ နာရီလောက်မှာ ကျေးရွာထဲကနေ ပြန်ထွက်သွားပါတယ်။

စစ်ကောင်စီစစ်ကြောင်းက ကျေးရွာထဲကနေ ပြန်ထွက်သွားချိန် အိမ်သာတက်ရင်းကျန်ခဲ့တဲ့ စစ်ကြောင်းနဲ့ပါလာတဲ့ မှော်ဘီရဲတပ်ရင်း ၅ က၊ ရဲတပ်သား အသက် ၂၀ ကျော်အရွယ် ဥက္ကာဖြိုးကို ဖမ်းမိခဲ့တာလို့ဆိုပါတယ်။

“သူက အိမ်သာတက်ရင်း နောက်ကျနေတာ။ သူကြည့်လိုက်တော့ စစ်ကြောင်းကမရှိတော့ဘူး။ နောက်ကနေ ပြေးလိုက်တဲ့အချိန်မှာ ကျနော်တို့နဲ့တွေ့ပြီး ဖမ်းမိလာတာ။ ကျနော်တို့လည်း စစ်ကြောင်းနောက်ကိုလိုက်နေတာကိုး။ သူက ရွာဘုန်းကြီးကျောင်းအိမ်သာမှာ အိမ်သာတက်ရင်းကျန်ခဲ့တာ။ “လို့ မြင်းခြံခရိုင် တပ်ရင်း ၃ တပ်ရင်းမှူးက ပြောပါတယ်။

ရဲတပ်သားကို ဖမ်းမိချိန်မှာ G 3 ၁ လက်၊ ကျည် ၃၀၀၊ ကျည်ဘောက် ၄ ခု၊ အီကွေမန့်နဲ့ စစ်အသုံးအဆောင်ပစ္စည်းအချို့ကို သိမ်းဆည်းရမိခဲ့တယ်လို့ ဆိုပါတယ်။

ဖမ်းဆီးရမိထားတဲ့ ရဲတပ်သားကိုတော့ စစ်သုံ့ပန်းဥပဒေနဲ့အညီ ထိန်းသိမ်းထားတယ်လို့ သိရပါတယ်။

ဖမ်းဆီးခံရတဲ့ ရဲတပ်သားက စစ်အာဏာသိမ်းပြီး ၂၀၂၂ ခုနှစ်လောက်မှ ရဲတပ်ဖွဲ့ထဲ ရောက်လာသူဖြစ်ပြီး ရဲတပ်ရင်း ၅ မှာ တာဝန်ကျနေစဥ် တောင်သာမြို့နယ်ကို ၂၀၂၄ ခုနှစ်အတွင်း လုံခြုံရေးတာဝန်ကျလို့ ရောက်ရှိလာသူဖြစ်ပါတယ်။

စစ်ကောင်စီစစ်ကြောင်းက ခြုံကြီးရွာကနေ ပြန်ထွက်သွားစဉ် ကျေးရွာအတွင်းက အသက် ၃၀ ကျော်အရွယ် ဒေသခံ ကိုဟိန်းဇော်ဆိုသူကို ဖမ်းဆီးသွားတယ်လို့ သိရပါတယ်။

ဇန်နဝါရီ ၁၃ ရက် နေ့လယ် ၁၂ နာရီကျော်မှာ အထက ၁ ကျောင်းဝန်းထဲက အင်အား ၂၀ ကျော်ရှိနေတဲ့ စစ်ကောင်စီအဖွဲ့ဝင်တွေကို PDF တွေဘက်က တိုက်ခိုက်ရာ စစ်ကောင်စီအဖွဲ့ဝင် ၄ ဦးသေဆုံးပြီး သေနတ် ၁လက် သိမ်းဆည်းရမိခဲ့သေးတယ်လို့ သိရပါတယ်။

စာတည်း – ဈာန်မြင့်

စစ်ကိုင်း၊ ဇန်နဝါရီ ၂၆၊ ၂၀၂၃။

စစ်ကိုင်းတိုင်း၊ ရွှေဘိုမြို့မှာ ပျူစောထီးခေါင်းဆောင်ရဲ့တူမနဲ့ ရဲတပ်သားတဦးတို့ မင်္ဂလာဆောင်နေတာကို ဒေသခံတော်လှန်ရေးတပ်ဖွဲ့တွေက ဒရုန်းနဲ့ဗုံးကြဲတိုက်ခိုက်ခဲ့လို့ စစ်အုပ်စုဘက်က ၃ ဦးသေဆုံးသွားတယ်လို့ ပါဝင်တဲ့ Snake Eye PDF အဖွဲ့ဆီက သိရပါတယ်။

ရွှေဘိုမြို့နယ်၊ ဇီးဖြူကုန်းရွာမှာ မင်္ဂလာပွဲပြုလုပ်နေချိန် ဇန်နဝါရီလ ၂၄ ရက်မနက် ၉ နာရီလောက်မှာ ဒရုန်းနဲ့ ဗုံး ၂ လုံးကြဲချခဲ့တာလို့ ဆိုပါတယ်။

“ရဲတယောက်နဲ့ဇီးဖြူကုန်းရွာက ပျူစောထီးခေါင်းဆောင်မောင်စန်းတူမ မင်္ဂလာဆောင်တာ အသံချဲ့စက်မပါဘူး၊ တိတ်တိတ်ပုန်းလုပ်နေတာ၊ ကျနော်တို့က မနက်ကတည်းကစောင့်ကြည့်ပြီးမှ ကြဲချလိုက်တာ။ မီးဖိုဆောင်ကိုကျပြီး သုံးဦးသေသွားတာ မင်္ဂလာဆောင်ကနေ အသုဘဖြစ်သွားတာပေါ့ဗျာ” Snake Eyes PDF အဖွဲ့ဝင်တဦးက ပြောပါတယ်။

သေဆုံးသွားသူတွေနဲ့ပတ်သက်ပြီး စစ်အုပ်စုထဲက ဘယ်သူတွေဖြစ်တယ်ဆိုတာကိုတော့ အသေးစိတ်မသိရဘူးလို့ သူကဆက်ပြောပါတယ်။

ဇီးကုန်းရွာနဲ့ သီလုံးရွာတွေဟာပျူစောထီးရွာတွေဖြစ်ပြီး စစ်အုပ်စုကတပ်သားအင်အားဖြန့်ကျက်ထားပြီး ကျေးရွာအနီးဝန်းကျင်ကဒေသခံလယ်သမားတွေရဲ့ စပါးခင်းတွေကိုခိုးရိတ်တာတွေရှိသလို ကောက်ရိတ်စက်နဲ့ထော်လာဂျီတွေကို သိမ်းယူတာတွေရှိတာကြောင့် လယ်ဧကတရာဝန်းကျင် အကျိုးမဲ့ပျက်စီးခဲ့ရတယ်လို့လည်း ဒေသခံတဦးကပြောပါတယ်။

အဲဒီတိုက်ခိုက်မှုမှာ ShweBo Federal Army SBFA ၊ SNAKE EYES PDF ၊ C&T SHWEBO PDF နဲ့ ရွှေဘိုတိုက်နယ် ၂ တော်လှန်ရေးညီအကိုတွေ ပူးပေါင်းခဲ့တာလို့သိရပါတယ်။

ဇန်နဝါရီ ၁၈ ရက်နေ့ကလည်း ShweBo Federal Army SBFAဟာ ရွှေဘိုမြို့နယ် သီလုံးကျေးရွာဝန်းကျင်မှာ ကင်းပုန်းဝပ်နေတဲ့ စစ်ကောင်စီတပ်နဲ့ပျူစောထီးတွေ ဒရုန်းအသုံးပြုပြီး ဗုံးကြဲတိုက်ခိုက်ခဲ့ပါသေးတယ်။