ရေနစ်သေဆုံး

စစ်ကိုင်း၊ ဧပြီ ၂၉၊ ၂၀၂၃။

စစ်ကိုင်းမြို့၊ တကောင်းရပ်ကွက်၊ ရတနာပုံတံတားအောက်က ဧရာဝတီမြစ်ထဲမှာ ရေးဆင်းကူးတဲ့ အမျိုးသား ၁ ဦး ရေနစ်သေဆုံးသွားတယ်လို့ သိရပါတယ်။

ယနေ့ ဧပြီလ ၂၉ ရက် နေ့လယ် ၁၂ နာရီ​ကျော်ခန့်က စစ်ကိုင်းတံတားအောက် တကောင်းဆိပ်မှာ အမျိုးသား ၅ ဦး ရေဆင်းကူးချိန် ၁ ဦးရေနစ်ပျောက်ဆုံးရာက ပြန်လည်တွေ့ရှိချိန်မှာ သေဆုံးလျှက်တွေ့ခဲ့ရတာလို့ ဒေသခံတဦးက ပြောပါတယ်။

“စစ်ကိုင်းမှာဒီလိုပါဘဲ မီးကမလာ ရာသီဥတုကပူတာဆိုတော့ မြစ်ဆိပ်တွေမှာ ရေဆင်းကူးနေကြပါဘဲ။ ခုလည်း အဖော်တွေနဲ့ ရေဆင်းကူးချိန်ဖြစ်သွားတာ။ လူတဦး ရေနစ်တယ်ဆိုတော့ ကယ်ဆယ်ရေးအဖွဲ့တွေ ဝိုင်းရှာကြတာ၊ နေ့လည် ၁ နာရီလောက်မှာ သူတို့ရေဆင်းကူးတဲ့နေရာနားလောက်ကဘဲ အလောင်းကို ပြန်ဆယ်ရခဲ့တယ်” လို့ သူက ပြောပါတယ်။

ရေနစ်သေဆုံးသူဟာ အသက် ၂၉ နှစ်အရွယ် ကို​အောင်မြတ်သူဖြစ်ပြီး တင်းတိမ်ရပ်ကွက်၊ စစ်ကိုင်းမြို့နေထိုင်သူ ဖြစ်တယ်လို့ သိရပါတယ်။

သေဆုံးသွားသူရဲ့အလောင်းကိုတော့ ဒေသလူမှုကူညီရေးအသင်းတွေက စစ်ကိုင်းဆေးရုံကို ပို့ဆောင်ပေးခဲ့ပြီးနောက် မိသားစုတွေရဲ့ ဆန္ဒအရ နေ့ချင်း သဂြိုလ်လိုက်တယ်လို့ သိရပါတယ်။

မတ်လ ၅ ရက်နေ့ကလည်း စစ်ကိုင်းမြို့၊ ဝါဆိုကျောင်းက ကိုရင် ၃ ပါး စစ်ကိုင်းတံတားအောက် ဧရာဝတီမြစ်ထဲမှာ ရေဆင်းကူးချိန် အသက် ၁၂ နှစ်အရွယ် ကိုရင် ၁ ပါးရေနစ်သေဆုံးခဲ့ပါသေးတယ်။

စာတည်း-007

ပြည်၊ ဧပြီ ၂၇၊ ၂၀၂၃။

ပဲခူးတိုင်း(အနောက်ခြမ်း)၊ ပြည်မြို့၊ ကမ်းနားလမ်းဘောတံတားအနီးမှာ ဧပြီလ ၂၆ ရက် မနေ့ညနေ ၅ နာရီခွဲလောက်က အမျိုးသား ၃ ဦးနဲ့ အမျိုးသမီး ၂ ဦး ဧရာဝတီမြစ်အတွင်းရေချိုးဆင်းရာကနေ အမျိုးသားလူငယ် ၃ ဦး ရေနစ်သေဆုံးခဲ့တယ်လို့ သိရပါတယ်။

ပြည်မြို့၊ စည်တော်မင်္ဂလာရပ် နေထိုင်သူတွေဖြစ်တဲ့ အသက် ၁၆ နှစ်အရွယ် ရိုကီရာဘီ (ခ) ယမင်းသူဇာ၊ ၁၅ နှစ်အရွယ် ဂျိုဝိုရီယာ(ခ) စိုးပြည့်သဇင်၊ ၁၃ နှစ်အရွယ် အိုစမာ (ခ) မြင်မိုရ်ဦး၊ ၂၈ နှစ်အရွယ် အလီ (ခ) ကျော်မင်းထွန်း၊ ၂၇ နစ်အရွယ် အာမင်း(ခ) ကျော်မြင့်ဦးတို့ ရေဆင်းကူးရာကနေ အမျိုးသား ၃ ဦး သေဆုံးခဲ့တာလို့ မြို့ခံတဦးက မြေလတ်အသံကိုပြောပါတယ်။

“ကလေးတွေ ရေနစ်တာကို ကယ်ဆယ်ရင်းနဲ့ ကြီးတဲ့သူတွေပါ ရေနစ်သွားတာပါ။ သေဆုံးသူ ၃ ဦးက အစ္စလာမ်ဘာသာဝင်တွေ ဖြစ်တယ်” လို့ မြို့ခံတဦးက ပြောပါတယ်။

ရေနစ်သေဆုံးသူတွေထဲက အလီနဲ့အိုစမာတို့ ၂ ဦးကို မနေ့ည ၇ နာရီဝန်းကျင်လောက်မှာ ရှာဖွေတွေ့ရှိခဲ့ပြီး အာမင်းကို ဒီနေ့မနက်အစောပိုင်းမှာ ဆယ်ယူရရှိခဲ့တာဖြစ်ကာ ပြည်မြို့ပြည်သူ့ဆေးရုံ ရင်ခွဲရုံကို ပရဟိတအသင်းကားတွေနဲ့ ပို့ဆောင်ခဲ့တယ်လို့ သိရပါတယ်။

ပြီးခဲ့တဲ့ မတ်လအတွင်းကလည်း ပဲခူးတိုင်း အနောက်ခြမ်း မြို့တွေဖြစ်တဲ့ ကြို့ပင်ကောက်နဲ့နတ်တလင်းမြို့နယ်တွေမှာ အသက် ၄ နှစ်အရွယ် ကလေးတွေအပါအဝင် အမျိုးသမီး ၅ ဦး ရေကူးကစားရင်း ရေနစ်သေဆုံးခဲ့တယ်လို့ သိရပါတယ်။

စာတည်း – ရင်ငြိမ်း

ကြို့ပင်ကောက်၊ ဧပြီ ၁၄၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ ကြို့ပင်ကောက်မြို့မှာ မနေ့ညက အမျိူးသားတဦး ရေကန်အတွင်း‌ ရေချိုးဆင်းရာက ရေနစ်သေဆုံးခဲ့တယ်လို့ သိရပါတယ်။

ဧပြီလ ၁၃ ရက် မနေ့ည ၁၀ နာရီလောက်က ရေနစ်သေဆုံးခဲ့တာဖြစ်ပြီး ကြို့ပင်ကောက်မြို့၊ ရွာမမြောက်ရပ်ကွက် အေးသန်းဆန်စက်ဝန်းမှာနေတဲ့ အသက် ၃၃ နှစ်အရွယ် ကိုမျိူးလွင်ဦး ဖြစ်တယ်လို့ သိရပါတယ်။

“သူနေတဲ့ အေးသန်းဆန်စက်ဝန်းထဲက ရေကန်ကြီးထဲမှာ ညအချိန်မတော် ရေဆင်းချိုးရင်း ဖြစ်တာပါ။ ရာသီဥတုကလည်း ပူတာလည်း ပါတာပေါ့။ ညတွင်းချင်းပဲ ဆယ်ယူခဲ့ပါတယ်” လို့ ပြောပါတယ်။

အလောင်းကို ကြို့ပင်ကောက်မြို့ နာရေးကူညီမှုအသင်းက ကြို့ပင်ကောက်ဆေးရုံ ရင်ခွဲရုံကို ပို့ဆောင်ခဲ့တယ်လို့ သိရပါတယ်၊၊

ပြီးခဲ့တဲ့ ဧပြီလ ၁၀ ရက်ည ၇ နာရီလောက်ကလည်း ကြို့ပင်ကောက်မြို့၊ တန် ၁၀၀ ဆန်စက်အနီးဆည်မြောင်းရေထိန်းတံခါးမှာ ရေချိုးဆင်းတဲ့ တောင်ဘန့်ဘွေးကုန်းရွာက အသက် ၄၁ နှစ်အရွယ် ကိုပိုက်ထွေးလည်း ဆည်မြောင်းတံခါးအောက်မှာ ဦးခေါင်းညှပ်ကာ သေဆုံးခဲ့ပါသေးတယ်။

ကြို့ပင်ကောက်မြို့မှာ အခုနှစ်မတ်လအတွင်း ရေနစ်သေဆုံးသူ ၄ ဦးရှိပြီး မတ်လ ၅ ရက်ကကြို့ပင်ကောက်မြို့၊ ပန်းတင်ရပ်ကွက် ပန်းတင် ၂ လမ်းက ဆည်မြောင်းအတွင်း ရေချိုးဆင်းတဲ့အသက် ၄ နှစ်အရွယ် မိန်းကလေးငယ် ၂ ဦး၊ မတ်လ ၁၀ ရက်မှာ မြို့လယ်ချောင်းရွာက မြို့လယ်ချောင်းထဲ ရေချိုးဆင်းတဲ့ အသက် ၄၅ နှစ်အရွယ် အမျိူးသားတဦး၊ မတ်လ ၂၄ ရက်မှာ အေဝမ်းဆန်စက်ဝန်းက အသက် ၃၈ နှစ်အရွယ်အမျိူးသားတဦးတို့ ရေနစ်သေဆုံးခဲ့ပါသေးတယ်။

ရက် ၄၀ အတွင်း‌ရေနစ်သေဆုံးသူ ၆ ဦးထဲမှာ အသက် ၄ နှစ်အရွယ် မိန်းကလေးငယ် ၂ ဦးပါဝင်ပြီး ကျန် ၄ ဦးဟာ အသက် ၃၃ နှစ်အထက် အမျိုးသားတွေ ဖြစ်ပါတယ်။

အဲဒီအထဲမှာ မတ်လ ၂၄ ရက်က သေဆုံးတဲ့ အမျိုးသားတဦးသာ အတက်ရောဂါနဲ့ ရေမြောင်းထဲကို ပြုတ်ကျသေဆုံးတာဖြစ်ပြီး ကျန် ၅ ဦးဟာ ရေချိုးဆင်းရာက ရေနစ်သေဆုံးကြတာ ဖြစ်ပါတယ်။

စာတည်း – 007

မကွေး၊ မတ် ၃၀၊ ၂၀၂၃။

မကွေးတိုင်း၊ သရက်ခရိုင်၊ သရက်မြို့နယ် စစ်ကောင်စီလက်အောက်ခံလူဝင်မှုကြီးကြပ်ရေးနဲ့ ပြည်သူ့အင်အားဦးစီးဌာန (လဝက) ဝန်ထမ်း ၁ ဦး မတ်လ ၃၀ ရက် ဒီကနေ့မနက်ပိုင်းက ဧရာဝတီမြစ်အတွင်း ရေနစ်သေဆုံးခဲ့တယ်လို့ မြို့ခံတွေဆီကသိရပါတယ်။

ရေနစ်သေဆုံးသူဟာ အသက် ၃၇ နှစ်အရွယ် သရက်မြို့နယ် လဝက လက်ထောက်လူဝင်မှုကြီးကြပ်ရေးမှူး ဦးသွင်ခန့်ပေါင် ဆိုသူဖြစ်ပြီး သရက်မြို့၊ရုံးရပ်ကွက် ဧရာဝတီမြစ်အတွင်း ဇက်ဆိပ်မှာ ဒီမနက် ၉ နာရီလောက်က ရေဆင်းချိုးရာမှာ ရေနစ်သေဆုံးတာလို့ ဆိုပါတယ်။

“သူက လဝက ၃ ရစ် လက်ထောက်ကြီးကြပ်ရေးမှူးပေါ့။ သူက ချင်းလူမျိုး၊ သူအပါ သူငယ်ချင်း ၃ ယောက်လာတာမှာ သူတယောက်ပဲရေကူးတတ်တော့ ကျန်တဲ့၂ ယောက်ကရေမကူးပဲ ကုန်းပေါ်မှာကျန်ခဲ့တာ။ သူပဲ ရေချိုးဆင်းရင်းရေနစ်တာ”လို့ မြို့ခံတဦးက မြေလတ်အသံကို ပြောပါတယ်။

သေဆုံးသူရဲ့ရုပ်အလောင်းကို နေ့လယ် ၁၂ နာရီခွဲလောက်မှာ ဆယ်ယူရရှိခဲ့ပြီးအလောင်းကို သုခရတနာလူမှုကူညီရေးအသင်းကားနဲ့ သရက်ခရိုင်ဆေးရုံကို ပို့ဆောင်ခဲ့တယ်လို့ သိရပါတယ်။

ပြီးခဲ့တဲ့မတ်လ ၆ ရက် ညနေပိုင်းကလည်း ရေနံချောင်းမြို့၊ ဧရာဝတီမြစ်အတွင်း ဒေသအခေါ် ညောင်လှချောင်းသာမှာ ရေဆော့ကစားတဲ့ အသက် ၁၅ နှစ်အောက်မိန်းကလေး ၂ ဦးအပါ စုစုပေါင်း ၄ ဦး ရေနစ်သေဆုံးခဲ့ပါသေးတယ်။

စာတည်း- ရင်ငြိမ်း

ကြို့ပင်ကောက်၊ မတ် ၂၅၊ ၂၀၂၃။

ပဲခူးတိုင်း(အနောက်ခြမ်း)၊ ကြို့ပင်ကောက်မြို့မှာ မတ်လ ၂၄ ရက် မနေ့ညနေ ၅ နာရီဝန်းကျင်က အမျိုးသားတဦး ရေနစ်သေဆုံးခဲ့တယ်လို့ သိရပါတယ်။

သေဆုံးသူဟာ ကြို့ပင်ကောက်မြို့ အေဝမ်းဆန်စက်ဝန်းမှာနေတဲ့ အသက် ၃၈ နှစ်အရွယ် ကိုကျော်ဇင်ဦး ဖြစ်ပြီး ကံဦး ၂ လမ်းနဲ့ လှည်းတန်းလမ်းထောင့်က ရေမြောင်းထဲမှာ ရေနစ်သေဆုံးတာလို့ သိရပါတယ်။

“ကိုကျော်ဇင်ဦးက အတက်ရောဂါရှိတယ်။ အရက်ကလည်း သောက်တတ်တယ်။ သူရေနစ်သေဆုံးတဲ့ မြောင်းကလည်း သိပ်ပြီးနက်တာမဟုတ်ဘူး။ သူ့ကံပဲပေါ့” လို့ မြို့ခံတဦးက ပြောပါတယ်။

အလောင်းကို မြို့ခံပရဟိတအသင်းကားနဲ့ ကြို့ပင်ကောက် ပြည်သူ့ဆေးရုံရင်ခွဲရုံကို ပို့ဆောင်ထားတယ်လို့လည်း သိရပါတယ်။

ကြို့ပင်ကောက်မြို့ရှိ ရေနစ်သေဆုံးသူ ၃ ဦးတွင် ပန်းတင် ၂ လမ်းပန်းတင်ရပ်ကွက်က အသက် ၄ နှစ်အရွယ် မမေသက်ချိုနဲ့ မဇင်ပိုပိုချစ်တို့ ၂ ဦးဟာ မတ်လ ၅ ရက်က သူတို့ရပ်ကွက်အနီး ဆည်မြောင်းမှာ ရေနစ်သေဆုံးတာဖြစ်ပြီး မတ်လ ၁၀ ရက်က ရေနစ်သေဆုံးသူ အသက် ၄၅ နှစ်အရွယ် အမျိုးသားကတော့ မြို့လယ်ချောင်းကျေးရွာအနီးက မြို့လယ်ချောင်းမှာ ရေနစ်သေဆုံးခဲ့တာပါ။

ရက်ပေါင်း ၂၀ အတွင်း သေဆုံးသူတွေထဲမှာ အမျိုးသား ၂ ဦးနဲ့ အသက် ၄ နှစ်အရွယ် မိန်းကလေးငယ် ၂ ဦးဖြစ်တယ်လို့ ကြို့ပင်ကောက်မြို့နယ် ပရဟိတအသင်းရဲ့ ထုတ်ပြန်ချက်အရ သိရပါတယ်။