မြေလတ်အသံ

■ ဘယ်လိုအခက်အခဲကြုံကြုံ စစ်တပ်နဲ့ပူးပေါင်းမှာမဟုတ်ဟု SRF ပြော

မင်းကင်း၊ မေ ၂၇၊ ၂၀၂၆။

စစ်ကိုင်းတိုင်း၊ မင်းကင်းမြို့နယ်အခြေစိုက် ကျောင်းသားတော်လှန်ရေးတပ်တော်-SRF ဥက္ကဌ အပါအဝင် ၂ ဦးကို မင်းကင်းမြို့နယ် ပသုံးလုံးကဖမ်းဆီးခဲ့ပြီး ဒီဖမ်းဆီးမှုအပေါ်ဒေသခံတွေကလည်း ဆန္ဒပြခဲ့ကြတယ်လို့ SRF ပြောခွင့်ရ မသူသူက ပြောပါတယ်။

SRF ဥက္ကဌ စံတင်ထွန်းကို မေ ၂၆ ရက် ညနေ ၅ နာရီခန့်မှာ မင်းကင်းမြို့နယ် ပအဖ၊ ပကဖ တပ်ရင်းတွေကဖမ်းဆီးခဲ့ပြီးနောက် တဆက်တည်းမှာပဲ SRF တပ်ရင်းမှူး ၁ ဦးကိုပါဆက်လက်ဖမ်းဆီးရာ တပ်ရင်းမှူးကိုမမိတဲ့အတွက် အမျိုးသမီးဖြစ်သူကို ဖမ်းခေါ်သွားခဲ့တာလို့ ဆိုပါတယ်။

“ကျနော်တို့လည်း သတင်းကညပိုင်းမှ သိရတာ၊ တိုက်ရိုက် အဆက်အသွယ်ရတာတော့ မဟုတ်ဘူး၊ တဆင့် ဆက်သွယ်လာပေးတာ၊ တပ်ရင်းမှူး အပါအဝင် ရဲဘော် ၄ ယောက်နဲ့ တပ်ရင်းမှူးနဲ့ ၅ ယောက်က ဖောက်ပြီးတော့ ထွက်ပြေးလာခဲ့တယ်၊ လက်နက်တွေတော့ ထားခဲ့တယ်၊ ထားခဲ့ပြီးတော့ ကျနော်တို့ရဲ့စစ်ဒေသ တနေရာကို ရောက်နေတာ၊ အဲဒီရောက်နေတဲ့ အခြေအနေမှာ တပ်ရင်းမှူးကို ပြန်ဖမ်းကြတဲ့ အခြေအနေပေါ့၊ ဖမ်းကြတဲ့အချိန်မှာ တပ်ရင်းမှူးဖမ်းမရလို့ တပ်ရင်းမှူးအမျိုးသမီးကို ဖမ်းခေါ်သွားတဲ့ အခြေအနေရှိတယ်။” လို့ မသူသူခိုင်က ဆိုပါတယ်။

ဒါ့အပြင် ဖမ်းဆီးချိန်မှာ ပသုံးလုံးဘက်ကပစ်ခတ်ခဲ့တာကြောင့် ဒေသခံ ၃ ဦး သေနတ်ထိမှန် ဒဏ်ရာရခဲ့ပြီး လက်ရှိမှာတော့ ပသုံးလုံးဖက်က ဆေးကုသမှုပြန်ပေးနေတယ်လို့ မသူသူက ပြောပါတယ်။

ဒီကနေ့ မေ ၂၇ ရက် မနက်ပိုင်းမှာလည်း ကိုစံတင်ထွန်းကို ထောက်ခံတဲ့ရွာ ၃ ရွာက ရာနဲ့ချီတဲ့ ဒေသခံတွေက SRF ဥက္ကဌ ကိုစံတင်ထွန်းအပါ ဖမ်းဆီးခံထားရသူတွေကို ပြန်လွှတ်ပေးဖို့ ဆန္ဒပြတောင်းဆိုခဲ့ကြတာလို့ ဆိုပါတယ်။

အခုလို မိတ်ဖက်ပဋိပက္ခနဲ့ အခက်အခဲတွေဘယ်လောက်ပဲရှိလာပါစေ SRF အနေနဲ့ လက်နက်ကိုင် လက်တုန့် ပြန်တာတွေ၊ စစ်ကော်မရှင်ဆီဘက်ပြောင်းခိုလှုံတာတွေ ပြုလုပ်မှာမဟုတ်ဘူးလို့လည်း ဆိုပါတယ်။

“ကျနော်တို့က လုံးဝပြောလို့ရပါတယ်၊ ဘယ်လို အကြပ်အတည်းပဲ ဖြစ်နေဖြစ်နေ ဒီပကဖတွေအနေနဲ့ တပ်ရင်းတပ်ဖွဲ့တွေအနေနဲ့ MOD အနေနဲ့ လက်နက်သုံးပြီး ဖြေရှင်းလာတဲ့အပေါ် စစ်ရေးအရ ပြန်တုန့်ပြန်ဖို့ မရှိသလို ကျနော်က MODရဲ့ တာဝန်ရှိသူတွေတင် မကပေါ့နော် NUGရဲ့ အစိုးရတခုလုံး ကိုယ်စားပြုထားတဲ့ တာဝန်ရှိသူတွေနဲ့ ဆွေးနွေးမယ်၊ ညှိနှိုင်းမယ်၊ ညှိနှိုင်းမှု ဆွေးနွေးမှုကိုပဲ လက်ခံသွားမယ်၊ အဲဒါတွေပဲလုပ်ချင်တယ်။” လို့ မသူသူခိုင်ကပြောပါတယ်။

ပြီးခဲ့တဲ့ ၂၀၂၅ ဩဂုတ် ၂၈ ရက်၊ ၂၀၂၆ မေ ၁၀ ရက်နဲ့ မေ ၂၁ ရက်တို့မှာ SRF တပ်ဖွဲ့ဝင် ET၊ ယက္ခ၊ နှံကောင်၊ အောင်ကိုလတ်၊ နေလင်းဦးနဲ့ ဂျိုးလေးတို့ကို မင်းကင်းမြို့နယ် ပသုံးလုံးက ဖမ်းဆီးထားခဲ့ပြီး တပ်ဖွဲ့နဲ့ရော မိသားစုဝင်တွေနဲ့ပါအဆက်အသွယ်မရခဲ့ဘူးလို့ မေ ၂၂ ရက်မှာ SRF က ထုတ်ပြန်ခဲ့ပါသေးတယ်။

စာတည်း – လင်း

မင်းကင်း၊ မေ ၂၅၊ ၂၀၂၆။

စစ်ကိုင်းတိုင်း၊ မင်းကင်းမြို့နယ်အခြေစိုက် ကျောင်းသားတော်လှန်ရေးတပ်တော် – SRF တပ်ဖွဲ့ဝင် ၆ ဦးကို မင်းကင်းမြို့နယ် ပကဖနဲ့ တပ်ရင်းတပ်ဖွဲ့တွေက ဖမ်းဆီးထားတယ်လို့ မေလ ၂၂ ရက် ရက်စွဲနဲ့ SRF က ထုတ်ပြန်လာပါတယ်။

ဖမ်းဆီးခံထားရသူတွေဟာ SRF တပ်ဖွဲ့ဝင် ET၊ ယက္ခ၊ နှံကောင်၊ အောင်ကိုလတ်၊ နေလင်းဦးနဲ့ ဂျိုးလေးတို့ ဖြစ်ကာ ၂၀၂၅ ဩဂုတ် ၂၈ ရက်၊ ၂၀၂၆ မေ ၁၀ ရက်နဲ့ မေလ ၂၁ရက်တွေမှာ ဖမ်းဆီးခဲ့တာဖြစ်ပြီး လက်ရှိအချိန်ထိ တပ်ဖွဲ့နဲ့ မိသားစုတွေက အဆက်အသွယ်မရသေးဘူးလို့ ထုတ်ပြန်ချက်မှာ ဖော်ပြပါတယ်။

SRF တပ်တော်က ဒေသခံပြည်သူလူထုကာကွယ်ရေးနဲ့ စစ်ကော်မရှင်တပ်ကို အနိုင်တိုက်ရေးသာ အာရုံစိုက်စေလိုတာကြောင့် မိတ်ဖက်ပဋိပက္ခတွေကို တော်လှန်ရေးအကျိုးစီးပွားနဲ့ မဟာမိတ်ညီညွတ်ရေးကို ရှေးရှုပြီး နိုင်ငံရေးနည်းလမ်းနဲ့သာ ဖြေရှင်းလိုတယ်လို့ ဆိုပါတယ်။

အခုဖြစ်ပေါ်နေတဲ့ ပဋိပက္ခတွေဟာ တော်လှန်ရေးတပ်ဖွဲ့ ၂ ခုအတွင်းက ပြဿနာမဟုတ်ဘဲ တော်လှန်ရေးတခုလုံးရဲ့ ပြဿနာဖြစ်တာကြောင့် တော်လှန်ရေးရဲ့ အဆုံးအဖြတ်ဖြစ်တဲ့ အဖိနှိပ်ခံပြည်သူလူထုက ဝန်းရံဖြေရှင်းပေးလိမ့်မယ်လို့ ယုံကြည်ကြောင်း SRF တပ်တော်က ထုတ်ပြန်ထားပါတယ်။

မေလ ၂၄ ရက်မှာလည်း မင်းကင်းမြို့နယ်ပြည်သူ့အုပ်ချုပ်ရေးအဖွဲ့ သတင်းထုတ်ပြန်ရေးက SRF တပ်ဖွဲ့ဟာ လက်နက်ကိုင်တော်လှန်ရေးတခုတည်းကိုသာ လုပ်ဆောင်နေတာမဟုတ်ဘဲ NUG ယန္တရားတွေရဲ့ အုပ်ချုပ်ရေး၊ ပညာရေး၊ ကျန်းမာရေး၊ ဥပဒေပြုရေးတွေမှာ ဝင်ရောက်စွက်ဖက်နေပြီး အုပ်ချုပ်ရေးနဲ့ ကာကွယ်ရေးအဖွဲ့တွေစင်ပြိုင်ထောင်တာ၊ NUG လက်အောက်ခံ ပအဖ၊ ပကဖ တွေကို လက်နက်ကိုင်အင်အားသုံးပြီး ဖမ်းဆီးသတ်ဖြတ်တာ၊ NUG အစိုးရပုံရိပ်ကျအောင် ဒေသခံပြည်သူလူထုကို မကြာခဏဆန္ဒပြပွဲတွေဖြစ်ဖို့ စည်းရုံးလှုံ့ဆော်တာ၊ ဥပဒေမဲ့ တပ်သား စုဆောင်းရေးလုပ်တာ၊ ပြည်သူတွေကို ဖမ်းဆီးတာတွေကြောင့် ကျူးလွန်ထားတဲ့ အမှု ၈ ခုနဲ့ သက်ဆိုင်ရာ ဝန်ကြီးဌာနဆီ တရားစွဲဆိုထားတယ်လို့ ထုတ်ပြန်ခဲ့ပါတယ်။

ပြစ်မှုကျူးလွန်ထားတဲ့ SRF တပ်ဖွဲ့ဝင်တွေကို ဥပဒေအတိုင်းဖြေရှင်းဖို့ ဆင့်ခေါ်ခဲ့ပေမယ့် ပူးပေါင်းဆောင်ရွက်တာမရှိတဲ့အပြင် မင်းကင်းမြို့နယ် ပကဖအဖွဲ့ဝင်တွေကို ဖမ်းဆီးမှုတွေ ဆက်လက်ပြုလုပ်လာခဲ့တာကြောင့် တရားခံတွေကို လိုက်လံဖမ်းဆီးတာတွေ ပြုလုပ်နေပြီလို့ မင်းကင်းမြို့နယ် ပအဖ ရဲ့ထုတ်ပြန်ချက်မှာ ဆိုပါတယ်။

ဒါ့အပြင် မေ ၂၄ ရက် တရက်တည်းမှာပဲ SRF တပ်ဖွဲ့က NUG နဲ့ စင်ပြိုင်အုပ်ချုပ်ရေး မတည်ဆောက်ခဲ့ကြောင်း၊ ပညာရေး၊ ကျန်းမာရေးနဲ့ တရားဥပဒေစိုးမိုးရေးကို ဒေသခံတွေနဲ့ အုပ်ချုပ်ရေးအဖွဲ့တွေရဲ့ တောင်းဆိုချက်ကြောင့် NUG အစိုးရ ယန္တရားကိုဝန်းရံခဲ့တာဖြစ်ကြောင်း သဘောထားထုတ်ပြန်ပါတယ်။

ဒါ့အပြင် ဆန္ဒပြပွဲတွေနဲ့ပတ်သက်လို့ ပြည်သူလူထုက SRF တပ်ဖွဲ့ စည်းရုံးလှုံ့ဆော်တိုင်း ဆန္ဒပြလောက်တဲ့အထိ အသိပညာကင်းမဲ့ခြင်းမရှိတာကြောင့် NUGကို ပုံရိပ်ချနေတာမဟုတ်ဘဲ အောက်ခြေတာဝန်ခံတွေရဲ့ အမှားတွေကို ထိန်းကျောင်းပေးဖို့ တောင်းဆိုနေကြခြင်းဖြစ်တယ်လို့ ဆိုပါတယ်။

စစ်ကော်မရှင်နဲ့ ပတ်သတ်ဆက်နွယ်သူတွေ၊ ပြည်သူ့စစ်တွေနဲ့ သတင်းပေးသူလျှိုတွေကို ဖမ်းဆီးထိန်းသိမ်းခဲ့ပြီး တော်လှန်ရေးတပ်ဖွဲ့ဝင်တဦးတယောက်ကိုမှ ဖမ်းဆီးတာမရှိခဲ့တာကြောင့် တရားစွဲဆိုထားတဲ့ ပြစ်မှု ၈ ခုကို သမာသမတ်ကျတဲ့ ဥပဒေပညာရှင်တွေနဲ့ တရားဝင်ဖြေရှင်းပြီး ပြည်သူလူထုရဲ့ အဆုံးအဖြတ်ကို ခံယူလိုတယ်လို့ SRF တပ်ဖွဲ့က ဆိုပါတယ်။

ပဋိပက္ခအတွင်း ထိခိုက်မှုတွေရှိရှိလာလျှင် တော်လှန်ရေးအတွက် အကျိုးမရှိတာကြောင့် ဖမ်းဆီးထားတဲ့ SRF တပ်ဖွဲ့ဝင် ၆ ဦးကိုလည်း တရားဝင် တရားရုံးတင်ပေးဖို့ တောင်းဆိုထားပါတယ်။

တဖက်မှာလည်း မေလ ၂၄ ရက်မှာပဲ မင်းကင်းမြို့နယ်၊ လက်ချိတ်ရွာအနီးမှာ NUG တပ်ရင်းတွေနဲ့ Upper Chidwin Liberation Army – UCLA တို့အကြား နှစ်ဖက်ပစ်ခတ်မှုတွေ ဖြစ်ခဲ့ပြီး UCLA တပ်ဖွဲ့ဝင် ၁ ဦးကိုဖမ်းဆီးခဲ့ကာ ညနေပိုင်းမှာ ပြန်လွှတ်ပေးခဲ့တယ်လို့ ဒေသခံတွေဆီက သိရပါတယ်။