မင်းတုန်း

■ တိုက်ပွဲ ၁၇ ကြိမ်ဖြစ်ပြီး စစ်ကော်မရှင်ဘက်က သေဆုံးသူများဟုဆို

မင်းတုန်း၊ ဇွန် ၁၊ ၂၀၂၆။

မကွေးတိုင်း၊ မင်းတုန်းမြို့နယ်မှာ စစ်ကော်မရှင်တပ်က အင်အား ၁,၀၀၀ ကျော်နဲ့ စစ်ကြောင်းထိုးနေပြီး ဒေသခံကာကွယ်ရေးတပ်တွေနဲ့လည်း တိုက်ပွဲ ၁၇ ကြိမ်ဖြစ်ခဲ့တယ်လို့ ဇွန်လ ၁ ရက်မှာ သရက်ခရိုင် အမှတ် ၄ တပ်ရင်းက သတင်းထုတ်ပြန်ပါတယ်။

ဧပြီ ၁၈ ရက်ကနေ ဒီကနေ့ ဇွန်လ ၁ ရက်အထိ မင်းတုန်းမြို့နယ်၊ သရက်-မင်းတုန်းလမ်းပိုင်းမှာ စစ်ကော်မရှင်စစ်ကြောင်းဝင်ရောက်နေပြီး ပြောင်းကျေးရွာနဲ့ ဒေါင်းတိုက်ကျေးရွာအနီးမှာ ကြားဖြတ် ပစ်ခတ်မှု၊ မိုင်းဆွဲတိုက်ခိုက်မှုနဲ့ ဒရုန်းတိုက်ခိုက်မှုတွေပြုလုပ်ခဲ့တယ်လို့ ဆိုပါတယ်။

“လက်နက်ခဲယမ်း သိမ်းဆည်းရမိတာမျိုးတော့ မရှိပါဘူး။ ရန်သူသေဆုံးမှုကို တိုက်ပွဲထဲ မျက်မြင်တွေ့ရှိတာတွေနဲ့ ကျနော်တို့ အထောက်တွေဆီကနေ ပြန်လည်သိရှိရတာတွေနဲ့ အတည်ပြုနိုင်ပါတယ်။ ဒဏ်ရာရရှိတဲ့သူတွေကို မင်းတုန်းနဲ့ သရက်ကို ပို့တာတွေလည်း ရှိပါတယ်။ စစ်ကြောင်းက ၃ ကြောင်းခွဲပြီး မင်းတုန်းမြို့နယ်အနောက်ခြမ်းကျေးရွာတွေနဲ့ ရခိုင်ရိုးအစပ်ကို ဆက်ပြီး စစ်ကြောင်းထိုးနေတယ်။ ပြီးတော့ မင်းတုန်းရဲ့ တောင်ဘက်နဲ့ မြောက်ဘက်ကို ဆက်ထိုးနေတယ်။” လို့ သရက်ခရိုင် အမှတ် ၄ တပ်ရင်း သတင်းပြန်ကြားတာဝန်ခံ ကိုမြတ်က မြေလတ်အသံကို ပြောပါတယ်။

အဲဒီတိုက်ပွဲတွေအတွင်းမှာ သရက်ခရိုင် အမှတ် ၄ တပ်ရင်းက တပ်ဖွဲ့ဝင် ၂ ဦး လက်နက်ကြီးစထိမှန်ကာ မစိုးရိမ်ဒဏ်ရာရရှိခဲ့တယ်လို့ ထုတ်ပြန်ချက်အရ သိရပါတယ်။

အဆိုပါစစ်ကြောင်းဟာ ရက်ရှည်ဝင်ရောက်နေတဲ့အတွက် မင်းတုန်းမြို့နယ်က ကျေးရွာ ၂၀ ထက်မနည်းက ဒေသခံတွေလည်းထွက်ပြေးတိမ်းရှောင်နေရပြီး သူက ဆက်ပြောပါတယ်။

“ပြည်သူတွေကတော့ မြို့ပေါ်လည်းရှောင်ကြတဲ့လူရှိသလို တောင်ယာတွေထဲမှာ ယာယီတဲလေးတွေ ဆောက်ပြီးရှောင်ကြပါတယ်။ အဓိကကတော့ မိုးရာသီလည်း ဖြစ်တဲ့အတွက် ကျန်းမာရေး အခက်အခဲတွေရှိပါတယ်။ ငှက်ဖျားဖြစ်တာတွေလည်း ရှိပါတယ်။” လို့ ကိုမြတ်က ပြောပါတယ်။

စစ်ကြောင်းထိုးဝင်ရောက်နေစဉ်အတွင်း ကျေးရွာတွေကို မီးရှို့ဖျက်ဆီးတာနဲ့ ဒေသခံပြည်သူတွေကို ဖမ်းဆီးတာတွေရှိပြီး အသေးစိတ်ကိုတော့အတည်မပြုနိုင်သေးဘူးလို့ ဆိုပါတယ်။

ခလရ ၄၄၊ ကပစ ၁၂၊ လပခလက်အောက်ခံတပ်တွေနဲ့ စစ်မှုထမ်းတပ်သားတွေပါဝင်တဲ့ စစ်ကြောင်းဟာ ဆက်လက်စစ်ကြောင်းထိုးနေတဲ့အတွက် တိုက်ပွဲတွေဆက်လက်ဖြစ်ပွားနေပြီး ဒေသခံတွေအနေနဲ့ လေကြောင်းနဲ့ လက်နက်ကြီးအန္တရာယ်သတိပြုဖို့၊ ဘေးကင်းလုံခြုံတဲ့နေရာတွေမှာ နေထိုင်ဖို့လည်း သရက်ခရိုင် အမှတ် ၄ တပ်ရင်းက တိုက်တွန်းထားပါတယ်။

စာတည်း – လင်း

မင်းတုန်း၊ ဇန်နဝါရီ ၃၀၊ ၂၀၂၆။

မကွေးတိုင်း၊ မင်းတုန်းမြို့နယ်အတွင်းမှာ စစ်ကော်မရှင်တပ်ဖွဲ့ဝင်တွေစစ်ကြောင်းထိုးကာ နေအိမ် ၂၀၀ နီးပါးကိုမီးရှို့ပြီး အမျိုးသား ၁ ဦးကို သတ်ဖြတ်ခဲ့တယ်လို့ သရက်ခရိုင်တပ်ရင်း ၄ က ဇန်နဝါရီ ၃၀ ရက် ဒီကနေ့မှာ သတင်းထုတ်ပြန်ပါတယ်။

ဇန်နဝါရီ ၁၇ ရက်ကနေ ဇန်နဝါရီ ၂၉ ရက်အထိ အင်အား ၁၅၀ ခန့်ပါစစ်ကြောင်းက ကြပ်ကြီး၊ မဲဇလီ၊ သရက်အုပ်၊ ထိန်ကိုင်း၊ ထန်းလေးပင်၊ ပြောင်း၊ သီးပင်ကုန်း၊ ဝက်ကော်၊ သဖန်ရောင်၊ ထန်းပင်ကုန်း၊ ထန်းလေးပင်၊ တမာ၊ ကင်းမွန်တောင့်ကျေးရွာတွေကို စစ်ကြောင်းထိုးဝင်ရောက်ခဲ့တယ်လို့ ဆိုပါတယ်။

“ကျေးရွာတွေကို စစ်ကြောင်းထိုးတဲ့အချိန်မှာ ပျက်စီးစေလိုတဲ့ရည်ရွယ်ချက်နဲ့ မီးရှို့တာ။ သူတို့က စစ်ကြောင်းဝင်လာပြီဆိုတာနဲ့ အဲဒီရွာ ၁ ရွာမှာရှိတဲ့ ပစ္စည်းတွေကိုယူတယ်။ အဲဒီမှာ ကျနော်တို့နဲ့ တိုက်ပွဲဖြစ်ပြီးဆို မီးရှို့တယ် အဲ့လိုပုံစံမျိုး။ သူတို့အထိနာပြီဆို ရှို့တယ်။ အချို့ရွာတွေက ပစ္စည်းယူပြီးပြန်ထွက်တာမျိုးရှိတယ်”လို့ သရက်ခရိုင်တပ်ရင်း ၄ ပြန်ကြားရေးတာဝန်ခံ ကိုမြတ်က ပြောပါတယ်။

အဆိုပါစစ်ကြောင်းဟာ ထန်းလေးပင်ရွာကို ဇန်နဝါရီ ၂၂ ရက်ညနေပိုင်းမှာ ၁ ကြိမ်၊ ဇန်နဝါရီ ၂၅ ရက်မနက်ပိုင်းမှာ ၁ ကြိမ် မီးရှို့ခဲ့ပြီး ဇန်နဝါရီ ၂၄ ရက်မှာ ဝက်ကော်ရွာက နေအိမ်တွေကိုလည်း မီးရှို့ခဲ့တယ်လို့ ဆိုပါတယ်။

ဒါ့အပြင် ဇန်နဝါရီ ၂၂ ရက်မှာပဲ သီးပင်ကုန်းကျေးရွာကို ဝင်ရောက်လာတဲ့စစ်ကြောင်းဟာ ရွာခံ ၂၀ ခန့်ကို ဖမ်းဆီးပြီး ဘုန်းကျောင်းမှာဖမ်းထားစဥ် အသက် ၄၀ ကျော်အရွယ် ကိုမှင်ဆိုသူကိုလည်း ရိုက်နှက်နှိပ်စက်ရာက သေဆုံးခဲ့တယ်လို့ ကိုမြတ်က ဆက်ပြောပါတယ်။

“ကျေးရွာကို ဝင်တဲ့အခါမှ မထွက်ပြေးတဲ့ဒေသခံအချို့ကိုဖမ်းတယ်။ ကြိုးတုပ်တယ်။ ထိပ်တုံးခတ်ပြီး ရိုက်နှက်နှိပ်စက်တဲ့အခါမှာ သူကသေဆုံးတယ်။ သူက အရှိုချင်းတိုင်းရင်းသားပါ”လို့ ပြောပါတယ်။

အဲ့ဒီနောက် ဇန်နဝါရီ ၂၉ ရက်မနက်ပိုင်းမှာ တမာရွာကိုဝင်ရောက်ပြီး ရွာခံပစ္စည်းတွေသိမ်းယူနေချိန် တိုက်ခိုက်ခံရတာကြောင့် လက်နက်ကြီးတွေနဲ့ပစ်ခတ်ရာ ကျေးရွာနဲ့ ၁ မိုင်ကျော်အကွာရှိ ကင်းမွန်တောင်ကျေးရွာကို ကျပြီးနေအိမ်တွေမီးလောင်ခဲ့တယ်လို့ သရက်ခရိုင်တပ်ရင်း ၄ ပြန်ကြားရေး တာဝန်ခံ ကိုမြတ်ကပြောပါတယ်။

စစ်ကော်မရှင်စစ်ကြောင်း မီးရှို့တာနဲ့လက်နက်ကြီးကြောင့် ဝက်ကော်ကျေးရွာက နေအိမ် ၂၈ လုံး၊ ထန်းလေးပင်ကျေးရွာကနေအိမ် ၅၀ ကျော်နဲ့ ကင်းမွန်တောင့်ကျေးရွာက နေအိမ် ၁၀၀ ကျော် မီးလောင်ပျက်စီးခဲ့တယ်လို့ ဆိုပါတယ်။

ကျေးရွာတွေကို စစ်ကြောင်းထိုးလာစဥ်မှာ ဒေသအခြေစိုက် PDF တပ်ဖွဲ့တွေနဲ့ ကြပ်ကြီးကျေးရွာနားမှာ ၁ ကြိမ်၊ သရက်အုပ်ကျေးရွာအနီး ၁ ကြိမ်၊ ထိန်ကိုင်းကျေးရွာနဲ့ကောက်ကွေ့ကျေးရွာကြားမှာ ၂ ကြိမ်၊ ထန်းလေးပင်ကျေးရွာအနီးမှာ ၄ ကြိမ်၊ ပြောင်းကျေးရွာနဲ့ ယင်းကောက်ကျေးရွာကြားမှာ ၁ ကြိမ်၊ တမာကျေးရွာအနီး ၂ ကြိမ်၊ ကျွဲဒွန်းကျေးရွာအနီး ၁ ကြိမ် စုစုပေါင်း တိုက်ပွဲ ၁၂ ကြိမ်ဖြစ်ခဲ့ပြီး စစ်ကော်မရှင်ဘက်က ၃၀ ခန့်သေဆုံးခဲ့တယ်လို့ ဆိုပါတယ်။

စစ်ကြောင်းထိုးနေစဥ်ကာလအတွင်း ဇန်နဝါရီ ၁၈ ရက်မှာ သရက်ခရိုင်တပ်ရင်း ၄ နောက်တန်းစခန်းကို စစ်ကော်မရှင်ဘက်က လေကြောင်းကနေ ၁၀ ကြိမ် ဗုံးကြဲတိုက်ခိုက်ခဲ့ကာ စခန်းအဆောက်အဦနဲ့ ပစ္စည်းတချို့ပျက်စီးခဲ့ပြီး ထိခိုက်ဒဏ်ရာရသူတော့မရှိခဲ့ဘူးလို့ သိရပါတယ်။

စစ်ကြောင်းက ဇန်နဝါရီ ၂၉ ရက်မှာ မင်းတုန်းမြို့နယ်ထဲကပြန်ဆုတ်ခွာသွားပြီး ဖမ်းဆီးထားတဲ့ ဒေသခံတွေကိုတော့ ပြန်လွှတ်ပေးခဲ့တယ်လို့ ကိုမြတ် ဆီက သိရပါတယ်။

စာတည်း – လင်း