မကွေး

စစ်ကိုင်း၊ ဧပြီ ၃၀၊ ၂၀၂၆။

စစ်ကိုင်းတိုင်း၊ ယင်းမာပင်မြို့နယ်နဲ့ မကွေးတိုင်း၊ ဂန့်ဂေါ၊ ထီးလင်းမြို့နယ်တွေမှာ စစ်ကော်မရှင်ကလေကြောင်းကနေ ဗုံးကြဲခဲ့တယ်လို့ ဒေသကာကွယ်ရေးအဖွဲ့တွေနဲ့ ဒေသခံတွေဆီက သိရပါတယ်။

ဧပြီ ၂၉ ရက် ညနေ ၃ နာရီခန့်မှာ ယင်းမာပင်မြို့နယ်၊ အိုးဘိုကျေးရွာ တောရဘုန်းကြီးကျောင်းပေါ်ကို စစ်ကော်မရှင်ဘက်က စက်တပ်လေထီး ၁ စီးနဲ့ ဗုံး ၂ လုံးကြဲချခဲ့တယ်လို့ဆိုပါတယ်။

” စက်တပ်လေထီးတက်လာကတည်းက ရွာကလူတွေကော ဘုန်းကြီးတွေကော ကြိုတင်ရှောင်နိုင်လို့ လူထိခိုက်တာတော့မရှိခဲ့ဘူး။ ဗုံးတွေက ဘုန်းကြီးကျောင်းပေါ်ကျတာ”လို့ ဒေသကာကွယ်ရေးအဖွဲ့ဝင်တဦးကပြောပါတယ်။

ဗုံးကြဲခံရလို့ တောရကျောင်းအတွင်းရှိ ကျောင်းအဆောင် ၂ ဆောင်ပျက်စီးသွားခဲ့ပြီး လူထိခိုက်မှုမရှိခဲ့ဘူးလို့ဆိုပါတယ်။

အလားတူ ဧပြီ ၃၀ ရက်မနက် ၁၀ နာရီခန့်မှာလည်း ဂျက်ဖိုက်တာ ၁ စီးက ဂန့်ဂေါနဲ့ ထီးလင်းအစပ်က ဂန့်ဂေါမြို့နယ်၊ မင်းရွာအနောက်ဘက်နဲ့ ထီးလင်းမြို့နယ်၊ ကျားခဲရွာနဲ့အကြည်ဘမ်းရွာကြားကို ဗုံး ၉ လုံးကြဲချခဲ့တယ်လို့ဒေသခံ‌တွေဆီက သိရပါတယ်။

“ထီးလင်းက ၇ လုံး၊ ဂန့်ဂေါက ၂ လုံး။ ဂန့်ဂေါမှာက ရှောက်ပင် စစ်ကော်မရှင်ဂိတ်နဲ့ ၂ မိုင်ကျော်အကွာ မင်းရွာအနောက်မြောက်ဘက် တောထဲကျတယ်။ ထီးလင်းက တောစပ်နဲ့ယာခင်းဟောင်းတွေကြား ကျတာ”လို့ ဒေသခံတဦးက ပြောပါတယ်။

အဆိုပါဗုံးကြဲမှုအတွင်း လူထိခိုက်မှုနဲ့အဆောက်အဦပျက်စီးတာမရှိဘဲ အလေ့ကျပေါက်ပင်တွေ မီးလောင်တာ၊ မြေရိုင်းနေရာအချို့ကိုသာကျရောက်ခဲ့တာလို့ ဆိုပါတယ်။

ပြီးခဲ့တဲ့ ဧပြီ ၂၁ ရက်ကလည်း ရွှေဘိုမြို့နယ်၊ ဆောင်နန်းကျေးရွာအနီး လေကြောင်းကနေ ဗုံးကြဲခံရလို့ အမျိုးသမီး ၁ ဦးသေ ၃ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ဆော၊ ဧပြီ ၂၈၊ ၂၀၂၆။

မကွေးတိုင်း၊ ဆောမြို့နယ်၊ ကံကြီးကျေးရွာကို စစ်တပ်က စစ်ကြောင်းထိုးဝင်ရောက်ရာကနေ အထိုင်ချတပ်စွဲထားတယ်လို့ သိရပါတယ်။

ကျောက်ထုမြို့အခြေစိုက် အမှတ် ၃၆၈ အမြောက်တပ်ရင်းကနေ အင်အား ၁၈၀ ခန့်နဲ့ ထွက်လာတဲ့ စစ်ကော်မရှင်စစ်ကြောင်းဟာ ကျောက်ထုမြို့နဲ့ ၇ မိုင်သာကွာဝေးတဲ့ ဆောမြို့နယ် ကံကြီးကျေးရွာမှာ ဧပြီ ၂၅ ရက်ကစတင်ပြီး အထိုင်ချတပ်စွဲထားတာလို့ ဒေသခံတွေက ပြောပါတယ်။

“ဒီရွာဟာ မကွေး – ချင်း – ရခိုင် ကုန်လမ်းကြောင်းအတွက် အချက်အချာကျတဲ့နေရာလို့ ပြောလို့ရပါတယ်။ စစ်ကြောင်းရောက်ကတည်းက ဘယ်ကုန်ကားမှ အဝင်အထွက်မရှိသလို ကုန်ကားတွေလည်း မဖြတ်ကြပါဘူး။ ၂၆ ရက်က ပလက်ဝဘက်ကနေ ဆင်းလာတဲ့ကုန်ကား ၁ စီး အဖမ်းခံရတာကလည်း လူတွေကို ပြန်လွှတ်ပေးလိုက်ပြီလို့ သိရပါတယ်။ အဆင်း‌ဆိုတော့ ကုန်အလွတ်တွေပါ။ ခုတော့ အတက်ခြမ်းက ကုန်ကားတွေ ဆောမြို့ထဲမှာပဲ ရှိနေကြသေးတယ်။” လို့ ဆောမြို့နယ် ဒေသခံအမျိုးသားတဦးက ပြောပါတယ်။

စစ်တပ်အထိုင်ချမှုကြောင့် ချင်း – ရခိုင် ဘက်မှ မကွေးတိုင်းဘက်သို့ သွားရောက်မယ့်ကုန်ကားတွေ ဖမ်းဆီးခံရမှာကိုလည်း ကုန်ကားမောင်းသူတွေက စိုးရိမ်နေကြပါတယ်။

“ချင်းနဲ့ ရခိုင်ဘက်က ကုန်ကားတွေတော့ အထွက်နားထားတယ်ဗျ။ မကွေးဘက်ကအဝင်တော့ မသိပေမဲ့ ကျနော်တို့က ပလက်ဝဘက်ကနေ ဆင်းရမှာဆိုတော့ ဖမ်းခံရနိုင်ခြေ ပိုများတယ်။” လို့ ရခိုင်ပြည်နယ်၊ ကျောက်တော်မြို့မှ ကုန်ကားနောက်လိုက်တဦးက ပြောပါတယ်။

ကံကြီးရွာကို အင်အား ၁၈၀ နဲ့ စစ်ကြောင်းထွက်လာတာကြောင့် ကျောက်ထုမြို့ အမတ ၃၆၈ တပ်ရင်းမှာလည်း သူတို့နှင့်အနီးတဝိုက် ကင်းလှည့်တာတွေလုပ်ဆောင်ရာမှာ အင်အားနည်းပါးနေတယ်လို့ စစ်ရေးသတင်းရင်းမြစ်တဦးက ပြောပါတယ်။

“အမတ ၃၆၈ မှာက ဌာန်ကုန်ရှိမှ အင်အား ၃၀၀ လောက်ပဲ။ ဒီလိုစစ်ကြောင်းထွက်လာတော့ တပ်အင်အားနည်းသွားတယ်။ သူတို့ပုံမှန်လုပ်နေကျ ကင်းပတ်တာတွေ နယ်မြေရှင်းလင်းရေးဝင်တာတွေတောင် အနားကရွာတွေအထိ မရောက်တော့ဘူး။ တပ်နားတင် ကင်းပတ်ပြီးပြန်ကြတယ်။” လို့ သူက ပြောပါတယ်။

ကံကြီးရွာအတွင်း လမ်းဆုံ၊ လမ်းခွမျတွေနဲ့ ရွာအဝင်အထွက်တွေမှာ စစ်ကော်မရှင်တပ်သားတွေကကင်းပုန်း၀ပ် နေရာယူထားကြပြီး ကျေးရွာအတွင်း ပြည်သူအချို့ပဲကျန်ရစ်ကာ အခြားပြည်သူတွေကတော့ ရှောင်ရှားနေကြတယ်လို့ သိရပါတယ်။

သတင်း – မရွှေထား

နတ်မောက်၊ ဧပြီ ၂၄၊ ၂၀၂၆။

မကွေးတိုင်း၊ နတ်မောက်မြို့နယ်၊ ကျီးကန်ကျေးရွာကိုဝင်လာတဲ့ စစ်ကော်မရှင်စစ်ကြောင်းက ဒေသခံညီအကို ၂ ဦးကိုပစ်သတ်ကာ နေအိမ် ၄ လုံးကိုမီးရှို့သွားတယ်လို့ နတ်မောက်မြို့နယ်ပကဖ တာဝန်ရှိသူဆီက သိရပါတယ်။

ဧပြီ ၂၂ ရက်မနက် ၉ နာရီခန့်မှာ အင်အား ၂၀၀ ခန့်ပါစစ်ကြောင်းက ကျီးကန်ကျေးရွာကိုဝင်လာချိန် အသက် ၄၀ အရွယ် ကိုဟန်မြင့်နဲ့ အသက် ၃၈ နှစ်အရွယ် ကိုဝင်းမြင့်တို့ကိုပစ်သတ်ပြီး အလောင်းတွေကိုလည်း မီးရှို့သွားတယ်လို့ ဆိုပါတယ်။

“ကျနော်တို့ဆီက ယာခင်းတွေမှာအိမ်ဆောက်ပြီး တဲတိုက်မှာနေကြတာ။ ၁ ယောက်ကနားမကြားဘူး။ ၁ ယောက်က စကားမပြောတတ်ဘူး။ သူတို့လမ်းပေါ်နွားကျောင်းနေချိန် စစ်ကြောင်းနဲ့တိုးပြီး ခေါင်းကိုပစ်သတ်ပြီး မီးရှို့သွားတာ”လို့ နတ်မောက်မြို့နယ်ပကဖတာဝန်ခံက ပြောပါတယ်။

ပစ်ခတ်ပြီးနောက် အဆိုပါစစ်ကြောင်းဟာ ရွာထဲကနေအိမ် ၄ လုံးကိုလည်းမီးရှို့ခဲ့ပြီးနောက် ကန်ဦးကုန်းကျေးရွာကိုဆက်သွားကာ အဲ့ဒီကတဆင့် ကန်လေးကုန်းရွာကိုဝင်ရောက်ပြီး ဧပြီ ၂၄ ရက် ဒီနေ့အထိအဲ့ဒီရွာမှာနေထိုင်နေတယ်လို့ ဆိုပါတယ်။

စစ်ကြောင်းဝင်လာတာကြောင့် ကန်ဦးကုန်း၊ ကျီးကန်၊ ကန်လေးကုန်းရွာအပါအဝင် ကျေးရွာ ၅ ရွာကပြည်သူ ၁,၀၀၀ ကျော်ထွက်ပြေးတိမ်းရှောင်နေကြရတယ်လို့ သိရပါတယ်။

ဇန်နဝါရီ ၂၅ ရက်ကလည်း နတ်မောက်မြို့နယ်၊ စမ်းကုန်းကျေးရွာမှာ ကျေးရွာထဲဝင်လာတဲ့ စစ်ကြောင်းက သတ်ဖြတ်မီးရှို့လို့ သားအဖ ၂ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

စလင်း၊ ဧပြီ ၂၄၊ ၂၀၂၆။

မကွေးတိုင်း၊ စလင်းမြို့နယ်၊ စိဇွဲကျေးရွာအနီးမှာ မန်ကျည်းရွက်သွားခူးတဲ့ အမျိုးသမီး ၁ ဦးမိုင်းထိပြီး ခြေထောက်ပြတ်သွားတယ်လို့ ဒေသခံတွေဆီက သိရပါတယ်။

မိုင်းထိသူဟာ အသက် ၅၀ ကျော်အရွယ်ရှိသူ ဒေါ်မြင့်မြင့်ဝေ ဆိုသူဖြစ်ပြီး ဧပြီ ၂၂ ရက်မနက် ၁၀ နာရီခန့်မှာ ကျေးရွာအနောက်ဘက်ခြမ်းကိုသွားချိန် မိုင်းနင်းမိခဲ့တာလို့ဆိုပါတယ်။

“သူက မန်ကျည်းရွက်ခူးဖို့ ရွာအနောက်ဘက်ကိုသွားရင်းထိတာလို့တော့ သိရတယ်။ ဘယ်ဘက် ခြေကျင်းဝတ်အောက်ဘက်ကတော့ တော်တော်ဒဏ်ရာများတယ်”လို့ ကူညီဆောင်ရွက်ပေးခဲ့သူတဦးက ပြောပါတယ်။

လက်ရှိမှာ ဆင်ဖြူကျွန်းဆေးရုံကို ပို့ဆောင်ပေးခဲ့ရပြီး ဘယ်ခြေကျင်းဝတ်အောက်ပိုင်း ဒဏ်ရာပြင်းထန်လို့ ဖြတ်လိုက်ထားရကာ ဧပြီ ၂၄ ရက် ဒီမနက်ပိုင်းအထိ ဆေးကုသမှုဆက်လက်ခံယူနေရတယ်လို့ ဆိုပါတယ်။

စလင်းမြို့နယ်အတွင်းမှာ စစ်ကော်မရှင်တပ်တွေနဲ့ဒေသကာကွယ်ရေးတပ်တွေအကြား မကြာခဏ တိုက်ပွဲဖြစ်ပြီး နှစ်ဖက်စလုံးက မိုင်းတွေလည်းထောင်ကြတာကြောင့် အခုနင်းမိတဲ့မိုင်းဟာ ဘယ်အဖွဲ့အစည်းဘက်ကထောင်တဲ့မိုင်းလဲဆိုတာ မသိရဘူးလို့ အထက်ပါ ကူညီဆောင်ရွက်ပေးခဲ့သူကပြောပါတယ်။

ပြီးခဲ့တဲ့ ဖေဖော်ဝါရီ ၂၆ ရက်ကလည်း စလင်းမြို့နယ်၊ မြောင်းဘောင်ကျေးရွာအနီး တောစပ်မှာ ပျားဖွတ်သွားတဲ့ လင်မယား ၂ ဦး မိုင်းထိပြီး ဒဏ်ရာရခဲ့သေးတယ်လို့သိရပါတယ်။

စာတည်း – လင်း

ပေါက်၊ ဧပြီ ၁၇၊ ၂၀၂၆။

မကွေးတိုင်း၊ ပေါက်မြို့နယ်၊ ဝန်လဲကျေးရွာကို စစ်ကော်မရှင်တပ်ကလေကြောင်းကနေ ဗုံးကြဲတိုက်ခိုက်ခဲ့တာကြောင့် သက်ကြီးပိုင်းပြည်သူ ၂ ဦးသေဆုံးပြီး ၈ ဦးဒဏ်ရာရခဲ့တယ်လို့ ကျေးရွာနဲ့နီးစပ်သူတွေဆီက သိရပါတယ်။

ဧပြီ ၁၆ ရက်နေ့လယ် ၂ နာရီကျော်မှာ ဂျက်ဖိုက်တာတစီးဟာ ဝန်လဲရွာကို ပေါင် ၅၀၀ ဗုံးသီး ၁ လုံး၊ ရော့ကက် ၃ လုံးကြဲချပစ်ခတ်ခဲ့တာလို့ ဆိုပါတယ်။

“ဗုံးက ရွာလယ်ခေါင်တည့်တည့်ကိုကျတာ။ ဘာပွဲမှလုပ်တာမရှိဘူး။ ဘာသတင်းကြားပြီး ကြဲတာလဲတော့ မသိဘူး။ တခါတည်းသေသွားတာက ၂ ယောက်။ လေကြောင်းကြဲခံရပြီးတော့ ရွာခံတွေရှောင်ရတာရှိတယ်။”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးထိမှန်တာကြောင့် အသက် ၆၂ အရွယ် ဒေါ်တင်ကြည်နဲ့ အသက် ၆၀ ဦးဌေးဝင်းတို့ နေရာမှာတင်သေဆုံးသွားပြီး အသက် ၁၇ နှစ်အရွယ် မခင်မိုးသက်၊ အသက် ၅၀ ကျော်အရွယ် ဦးဘိုဝင်း၊ ဦးမောင်လွင်၊ အသက် ၅၆ နှစ်အရွယ် ဦးသန်းမောင် အသက် ၄၀ အရွယ် ဦးဇော်နိုင်ထွန်း၊ အသက် ၄၈ နှစ်အရွယ် ဒေါ်စန်းစန်းနိုင်၊ အသက် ၄၀ အရွယ် ဒေါ်စန်းမြင့်ဌေး၊ အသက် ၁၈ နှစ်အရွယ် မပြည့်ဖူးခိုင်တို့မှာ ထိခိုက်ဒဏ်ရာရခဲ့တယ်လို့ ဆိုပါတယ်။

ဒါ့အပြင် နေအိမ် ၁၅ လုံးပျက်စီးပြီး နွား ၅ ကောင်နဲ့ဝက် ၃ ကောင်လည်းသေဆုံးပြီး ဒေသခံတွေလည်း ယာယီတိမ်းရှောင်နေကြရတယ်လို့ ဆိုပါတယ်။

ပြီးခဲ့တဲ့နှစ်ဩဂုတ် ၂၂ ရက်ကလည်း ပေါက်မြို့နယ်၊ ဆယ်ဝကျေးရွာကို စစ်ကော်မရှင်တပ်က လေကြောင်းကနေ ဗုံးကြဲခဲ့တာကြောင့် ရွာခံ ၂ ဦးသေဆုံးပြီး ၆ ဦးဒဏ်ရာရတယ်လို့ သိရပါတယ်။

သတင်း – ကျော်ကြီး၊ စာတည်း – လင်း