နတ်တလင်း

နတ်တလင်း၊ ဧပြီ ၁၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ နတ်တလင်းမြို့နယ်က ကျေးရွာအုပ်ချုပ်ရေးမှူးတဦးကို ဧပြီလ ၁၂ ရက်မနေ့ညနေက သေနတ်နဲ့ပစ်ခဲ့ရာမှာ ဒဏ်ရာရရှိသွားတယ်လို့ ပေါင်းတည်ပြည်သူ့ကာကွယ်ရေးတပ်ဖွဲ့တာဝန်ရှိသူက ပြောပါတယ်။

နတ်တလင်းမြို့နယ်၊ ပွဲသာအုပ်စု၊ အုပ်ချုပ်ရေးမှူး ကိုတင်ထွန်းကို ကုန်ကလေးရွာက ဆိုင်ကယ်နဲ့ပြန်လာချိန် သပြေစမ်းရွာအနီးမှာ မနေ့ည ၇ နာရီလောက်က ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ – ပြည်ခရိုင် ၃၆၀၁ PPDF တပ်ရင်း၊ တပ်ခွဲ ၅ နွေဦးတပ်ဖွဲ့က ပစ္စတိုနဲ့ ပစ်ခတ်ခဲ့တာလို့ သိရပါတယ်။

“အဲဒီနေရာက လမ်းကျဥ်းတယ်။ အလှူကပြန်တဲ့သူတွေနဲ့ ရှုပ်သွားတော့ ရှောင်တိမ်းပစ်ခတ်ရင်း နားထင်ကို ရှပ်ထိသွားတာ ကျတော်တို့လည်း လွတ်အောင်ပြန်ဆုတ်ခဲ့ရတယ်” လို့ PPDFက သတင်းတာဝန်ခံက ပြောပါတယ်။

ဒေသခံတဦးကတော့ အဲဒီအုပ်ချုပ်ရေးမှူးဟာ တတောင့်ထိုးလက်လုပ်သေနတ် ကိုင်ဆောင်ထားတယ်လို့လည်း​ ဆိုပါတယ်။

နတ်တလင်းမြို့နယ် ကုန်းကလေးရွာ အိမ်တက်ပွဲကအပြန်မှာ ပစ်ခတ်ခဲ့တာဖြစ်ပြီး အဲဒီအုပ်ချုပ်ရေးမှူးဟာ စစ်ကောင်စီအလိုကျ အပတ်စဉ်လောင်းကစားလိုင်းကြေး ကောက်ခံပေးတာ၊ သမချေးငွေနဲ့ စိုက်ဘဏ်ချေးငွေ ခြိမ်းခြောက်တောင်းတဲ့အပြင် ကျေးရွာအုပ်စုထဲမှာ နေသူအချို့ကို PDF လို့ စွပ်စွဲဖမ်းဆီးတာအပြင် နည်းမျိုးစုံနဲ့ ပြည်သူကို ဒုက္ခပေးနေသူလို့ ထုတ်ပြန်ချက်မှာ ဖော်ပြပါတယ်။

နွေဦးအဖွဲ့ဟာ ပြီးခဲ့တဲ့ဧပြီလ ၉ ရက်မနက်ကလည်း ပေါင်းတည်မြို့က သင်္ကြန်မဏ္ဍပ်ကို ဗုံးဖောက်ခွဲ့ခဲ့သလို ဧပြီလ ၁၁ ရက်ညကလည်း သဲကုန်းမြို့နယ်မှာ ဘောလုံးပွဲလုံခြုံရေးယူပြန်လာတဲ့ စစ်သားနဲ့ရဲတွေကို မိုင်းဆွဲတိုက်ခိုက်ခဲ့ပါသေးတယ်။

နတ်တလင်းမြို့နယ်ဟာ စစ်ကောင်စီခန့် ပဲခူးတိုင်းဝန်ကြီးချုပ် မျိုးဆွေဝင်းရဲ့ ဇာတိမြို့ဖြစ်ပြီး စစ်ကောင်စီက မာရှယ်လောထုတ်ပြန်ထားတဲ့ မြို့နယ်တခု ဖြစ်ပါတယ်။

စာတည်း – 007

နတ်တလင်း၊ ဧပြီ ၁၀၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ နတ်တလင်းမြို့မှာ သင်္ကြန်ပွဲကျင်းပဖို့အတွက် စစ်ကောင်စီက လောင်းကစားဒိုင်တွေနဲ့ လုပ်ငန်းရှင်တွေဆီကနေ ငွေကြေးတောင်းခံနေတယ်လို့ သိရပါတယ်။

ဧပြီလ ပထမအပတ်ကစတင်ကာ နတ်တလင်းမြို့က ဘောလုံးဒိုင်၊ ၂ လုံးဒိုင်နဲ့ ချဲဒိုင်တွေအပြင် လုပ်ငန်းရှင်တွေဆီကနေ စစ်ကောင်စီလက်အောက်ခံ ထွေအုပ်စာရေးတွေက တောင်းခံခဲ့တာလို့ မြို့နယ်ထွေအုပ်ရုံးနဲ့ နီးစပ်သူတဦးက ပြောပါတယ်။

“သင်္ကြန်မဏ္ဍပ်မှာ ကုန်မယ့်ငွေကို သက်ဆိုင်ရာထွေအုပ်စာရေးတွေက အုပ်ကြီးတွေဆီမှာ လောင်းကစားဒိုင်စာရင်းနဲ့ လုပ်ငန်းရှင်စာရင်းယူပြီး သူ့ရပ်ကွက်ကျေးရွာအလိုက် လိုက်တောင်းပေးရတာ” လို့ ပြောပါတယ်။

လောင်းကစားဒိုင်တွေကို အကြီးအသေးအလိုက် ကျပ် ၅ ထောင်ကနေ ကျပ်၂ သိန်းအထိတောင်းပြီး၊ ရွှေလုပ်ငန်းရှင်နဲ့ တခြားလုပ်ငန်းရှင်တွေကို ကျပ် ၂ သောင်းကနေ ကျပ် ၅ သိန်းအထိ တောင်းတယ်လို့ သူကဆက်ပြောပါတယ်။

လက်ရှိမှာတော့ နတ်တလင်းမြို့၊ ဇီးကုန်းကလေးရပ်ကွက်၊ ရန်ကုန်-ပြည်လမ်း ဘုရားကြီးရှေ့မှာ သင်္ကြန်မဏ္ဍပ် ဆောက်လုပ်ထားပြီး၊ ခုလို စစ်ကောင်စီက ကျင်းပမယ့် သင်္ကြန်ပွဲမှာ မြို့ခံပြည်သူတွေအနေနဲ့ စိတ်ဝင်စားမှုရှိမှာ မဟုတ်သလို စစ်တပ်ထောက်ခံသူတွေသာ ပါဝင်နိုင်တယ်လို့ နတ်တလင်း ဒေသခံတဦးက သုံးသပ်ပါတယ်။

“မနှစ်ကလည်း ရေကစားတာသိပ်မရှိဘူး။ အခုနှစ်လည်း ပြည်သူ လုံးဝ စိတ်မဝင်စားဘူး။ သင်္ကြန်သီချင်းတောင် ဖွင့်သံမကြားဘူး။ သင်္ကြန်အတွက်လည်း အစိမ်းနဲ့ဘောမ ဝန်ထမ်းတွေပဲ လုပ်မဲ့ကိုင်မဲ့သူရှိတယ်။ သာမန်ပြည်သူက သင်္ကြန်ရက်မထွက်ဖို့ များတယ်” လို့ ပြောပါတယ်။

နတ်တလင်းမြို့နယ် ပြည်သူ့ကာကွယ်ရေးတပ်ဖွဲ့ကလည်း စစ်ကောင်စီက ပြုလုပ်မယ့် သင်္ကြန်ပွဲတော်အပါအဝင် ဘယ်လိုပျော်ပွဲရွှင်ပွဲမဆို ဒေသခံပြည်သူတွေအနေနဲ့ မပါဝင်ကြဖို့ ပြီးခဲ့တဲ့ဧပြီလ ၆ ရက်က ထုတ်ပြန်တိုက်တွန်းထားပါတယ်။

ဒါ့အပြင် နတ်တလင်းမြို့နဲ့ မြို့ချင်းကပ်လျက် ပေါင်းတည်မြို့မှာလည်း စစ်ကောင်စီက သင်္ကြန်မှာ စည်ကားဖို့အတွက် မဏ္ဍပ်တွေဆောက်လုပ်လျှက်ရှိရာ၊ ဧပြီလ ၉ ရက်မနေ့က မနက် ၅ နာရီလောက်မှာတော့ ပေါင်းတည်မြို့၊ စျေး ၂ ရပ်ကွက်၊ ဘုရားကြီးလမ်းပေါ်က ဆောက်လုပ်ဆဲမဏ္ဍပ်ကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ တပ်ရင်း-၃၆၀၁ တပ်ခွဲ – ၅ နွေဦးတပ်ဖွဲ့က ဗုံးခွဲသတိပေးခဲ့ပါသေးတယ်။

နတ်တလင်း၊ မတ် ၂၃၊ ၂၀၂၃။

ပဲခူးတိုင်း၊ သာယာဝတီခရိုင်၊ နတ်တလင်းမြို့နယ်မှာ အထိုင်ချတပ်စွဲထားတဲ့ စစ်တပ်အထိုင်စခန်းကို ဝင်ရောက်တိုက်ခိုက်ခဲ့ရာ စစ်သားတဦး သေဆုံးခဲ့တယ်လို့ နတ်တလင်းမြို့နယ် တပ်ရင်း ၃၈၀၁ တပ်ခွဲ ၂ Phoenix DF က သတင်းထုတ်ပြန်ထားပါတယ်။

နတ်တလင်းမြို့နယ်၊ တောင်ညိုဆည်အထက် ကြက်မနက်ရွာမှာ လွန်ခဲ့တဲ့ ၂ ပတ်လောက်ကစပြီး အင်အား ၄၀ ဦးလောက်နဲ့ တပ်စွဲထားတဲ့စစ်သားတွေကို မတ်လ ၁၉ ရက် ညနေ ၆ နာရီလောက်မှာ တိုက်ခိုက်ခဲ့တာလို့ ဆိုပါတယ်။

“သူတို့စခန်းက ရွာရဲ့အရှေ့ဘက်နားမှာ စခန်းချထားတာ၊ ပထမဆုံး စပြီးပစ်ခတ်ခံရတဲ့ကောင်က စခန်းရှေ့မှာတဦးထဲရှိနေတဲ့အချိန် ပစ်နိုင်ခဲ့တာ လဲကျသွားတာကို မြင်လိုက်ရတယ်” လို့ Phoenix DF အဖွဲ့ဝင်တဦးက ပြောပါတယ်။

ဒီသေဆုံးမှုကို ဒေသခံတွေရဲ့ ပြန်လည်ပြောပြချက်အရ အတည်ပြုနိုင်ခဲ့ကာ အလောင်းကိုတော့ ဘယ်ကိုသယ်ဆောင်သွားတယ်ဆိုတာ မသိရဘူးလို့ သူကဆက်ပြောပါတယ်။

Phoenix DF နဲ့အတူ ပြည်ခရိုင်တပ်ရင်း ၃၆၀၁ တပ်ခွဲ ၂ နဲ့ ၃တို့ ပူးပေါင်းတိုက်ခိုက်ခဲ့တာဖြစ်ပြီး၊ အပြန်အလှန်ပစ်ခတ်ချိန် ၁၅ မိနစ်လောက်ရှိခဲ့ကာ တော်လှန်ရေးရဲဘော်တွေဘက်က အထိအခိုက်မရှိ ဆုတ်ခွာနိုင်ခဲ့တယ်လို့ ဆိုပါတယ်။

ပြီးခဲ့တဲ့ မတ်လ ၁၇ ရက်ညကလည်း အဲ့ဒီကြက်မနက်ရွာစခန်းကို ဒေသခံကာကွယ်ရေးတပ်ဖွဲ့တွေ ပူးပေါင်းပြီး လက်နက်မျိုးစုံနဲ့ ပစ်ခတ်ခဲ့သေးတယ်လို့ သိရပါတယ်။

နတ်တလင်းမြိူ့နယ်မှာ မကြာခဏထိတွေ့တိုက်ပွဲတွေဖြစ်နေပြီး၊ စစ်တပ်ဘက်ကလည်း ဒေသခံကာကွယ်ရေးတပ်တွေကို ရိက္ခာဖြတ်တဲ့အနေနဲ့ တောင်ညိုဆည်အထက်က ကျေးရွာသားတွေကို လူတဦးလျှင် တနေ့စာ ဆန်နို့ဆီဗူး ၃ လုံးနဲ့ ၇ ရက်စာသာ ဝယ်ယူခွင့်ရတယ်လို့ သိရပါတယ်။

စာတည်း – လင်း

နတ်တလင်း၊ မတ် ၁၉၊ ၂၀၂၃။

ပဲခူးတိုင်းအနောက်ခြမ်း၊ နတ်တလင်းမြို့နယ်အရှေ့ဘက်၊ ပဲခူးရိုးမအစပ်က ဒေသခံတွေဟာ ဆန်ဝယ်ယူရာမှာ လွတ်လပ်စွာဝယ်ယူခွင့်မရဘဲ ကန့်သတ်ခံနေရတယ်လို့ ဒေသခံတွေက ပြောပါတယ်။

နတ်တလင်းမြို့နယ်၊ တောင်ညိုဆည်အတွင်း နေထိုင်သူတွေနဲ့ ဆည်အထက်က ပြည်သူတွေကို အဓိကထားကန့်သတ်တာဖြစ်ပြီး လူတဦးလျှင် တပတ်စာ ဆန်နို့ဆီဗူး ၂၁ လုံးသာ ဝယ်ယူခွင့်ရပြီး ထောက်ခံစာလုပ်ကာ ဝယ်ယူရတာလို့ ဆိုပါတယ်။

“ဆယ်ကိုဖြတ်ပြီး တောင်ညိုကွက်သစ် ဒါမှဟုတ် နတ်တလင်းမြို့ကိုသွားပြီး စျေးဝယ်တဲ့အခါမှာ တောင်ညိုစက်လှေဂိတ်မှာ စစ်သားတွေက ပစ္စည်းတွေကို စစ်ဆေးတယ်။ အဲ့ဒီဂိတ်မှာ အိမ်ရှိလူစာရင်း ထောက်ခံစာ လုပ်ရတယ်။ အိမ်မှာရှိတဲ့ လူဦးရေထက် ဆန်ကိုပိုဝယ်လို့မရဘူး။ လူကြုံဝယ်လို့လည်း မရဘူး။ အဲတော့ တအိမ်တယောက် ထွက်ဝယ်ရတယ်။ တပတ်တခါ လမ်းစရိတ်ကုန်သလို အလုပ်လည်း ပျက်ရတယ်။ ဖြတ် ၄ ဖြတ် လုပ်တဲ့သဘောရှိတယ်” လို့ နတ်တလင်းနယ်အခြေစိုက် နတ်စစ်သည် PDF အဖွဲ့မှ တာဝန်ရှိသူက ဆိုပါတယ်။

ဘုန်းကြီးဆွမ်းလောင်းဖို့နဲ့ ဧည့်သည်အတွက်ပါ ပိုဝယ်လို့မရသလို ခွေးစာ၊ကြက်စာအတွက်လည်း ဝယ်ထားခွင့်မရဘူးလို့ သူကဆက်ပြောပါတယ်။

တောင်ညိုစက်လှေဂိတ်မှာ စစ်သားအင်အား ၂၀ အထက်ရှိပြီး ကုန်ပစ္စည်းသယ်ယူရာမှာ အရင်ကထက် စစ်ဆေးမှုတင်းကြပ်သလို ပြည်သူ့ကာကွယ်ရေးတပ်ဖွဲ့ဝင်တွေအတွက် ထောက်ပို့လုပ်မှာကို စိုးရိမ်နေပုံရတယ်လို့ ဒေသခံကျေးရွာသားတဦးက ပြောပါတယ်။

တောင်ညိုဆည်အထက်မှာ ညောင်လေးပင်၊ ကွေ့ကြီး သဖန်းချောင်း၊ လေးအိမ်တန်း၊ ကျောက်ပြုတ် စတဲ့ကျေးရွာတွေက ဒေသခံတွေလည်း စစ်ရှောင်နေရပြီး၊ လူဦးရေ ၃၅၀ ကျော်ရှိတယ်လို့လည်း Phoenix DF အဖွဲ့ဝင်တဦးက ပြောပါတယ်။

အဲဒီဒေသမှာ မကြာခဏဆိုသလို ဒေသခံတော်လှန်ရေးတပ်ဖွဲ့တွေနဲ့ စစ်ကောင်စီတပ်တို့ ထိတွေမှုတွေရှိနေပြီး၊ စစ်တပ်ဘက်က သေဆုံးမှုတွေရှိသလို တောင်ညိုဆည်ဘက်ကနေ ပေါင်းတည်မြို့နယ်ထဲကိုသွားတဲ့ စစ်ကြောင်းဟာလည်း မတ်လ ၁၇ ရက်မနေ့က ဝဲကြီးဆည်အထက်မှာ တိုက်ခိုက်ခံခဲ့ရပါသေးတယ်။

နတ်တလင်းမြို့ဟာ စစ်ကောင်စီခန့် ပဲခူးတိုင်းဝန်ကြီးချုပ် မျိုးဆွေဝင်းရဲ့ ဇာတိဖြစ်ပြီး မာရှယ်လောသတ်မှတ်ခံထားရတဲ့မြို့လည်း ဖြစ်ပါတယ်။

သာယာ၀တီ၊ ဖေဖော်ဝါရီ ၂‌၇၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ နတ်တလင်းမြို့နယ်၊ ညောင်လေးပင်ရွာဟောင်းက ဒေသခံတွေကို စစ်ကောင်စီတပ်က ဖမ်းဆီးသွားတယ်လို့ နတ်စစ်သည်အဖွဲ့ခေါင်းဆောင် ကိုအောင်က ပြောပါတယ်။

ဖမ်းဆီးခံရသူတွေဟာ ပဲခူးရိုးမအစပ်၊ တောင်ညိုဆည်အထက်ပိုင်းမှာရှိတဲ့ အဲ့ဒီရွာဟောင်းက ကိုတင်အောင်၊ ကိုဝင်းနိုင်စိုး၊ ကိုလှမိုး၊ ကိုဇော်ထိုက်နဲ့ ကိုကျော်မျိုးအောင် စတဲ့သူတွေအပြင် အမျိုးသမီးတချို့နဲ့ ကလေးငယ်တွေအပါ ၁၄ ဦး ဖြစ်ပြီး ဖေဖော်ဝါရီလ ၂၀ ရက်ဝန်းကျင်မှာ အင်အား ၁၀၀ လောက်ပါတဲ့ စစ်ကောင်စီစစ်ကြောင်းက ဝင်ရောက်ဖမ်းဆီးခဲ့ကာ သူတို့ကို တောင်ညိုဆည်မှာ စစ်ဆေးမှုတွေ ပြုလုပ်နေတယ်လို့ ဆိုပါတယ်။

“တောင်ယာလုပ်ပြီး ယာခုတ်စားနေတဲ့ အစုလေးကို ဖမ်းသွားတာပါ။ ကျနော်တို့သွားကြည့်တော့မှ အဲ့နေရာမှာ လူမရှိတော့ဘူး။ ဘာအဆက်အသွယ်မှ မရဘူး။ လူတွေမရှိတော့ဘူးဆိုတာ သိရလို့ စုံစမ်းမှ ပဲခူးရိုးမထဲက စစ်ကြောင်းနဲ့ တောင်ညိုဆည်မှာ တပ်စွဲနေတဲ့ စစ်ကြောင်းက ဖမ်းသွားတာပါ” လို့ နတ်တလင်း PDF နတ်စစ်သည်အဖွဲ့ခေါင်းဆောင် ဗိုလ်အောင်က မြေလတ်အသံကို ပြောပါတယ်။

ဖမ်းဆီးခံရသူတွေဟာ ဖမ်းဆီးခံရပြီး တပတ်ကျော်အကြာ ဒီကနေ့အထိ အဆက်အသွယ် ပြတ်တောက်နေတယ်လို့လည်း သူက ဆက်ပြောပါတယ်။

ဖမ်းဆီးခံရသူတွေဟာ ပဲခူးရိုးမအစပ်မှာ တောင်ယာ လုပ်ကိုင်နေကြတဲ့သူတွေ ဖြစ်ပြီး သူတို့နေထိုင်တဲ့ ဝါးတဲတွေအတွင်း ဆန်အပါအဝင် စားသောက်ကုန်တွေကို စစ်ကောင်စီတပ်သားတွေက ဖျက်ဆီးခဲ့ကြသလို လူနေတဲတွေအနီးမှာလည်း စစ်ကောင်စီတပ်ဘက်က နင်းမိုင်းတွေ ထောင်ထားတယ်လို့ ပြောပါတယ်။

အဲဒီစစ်ကြောင်းဟာ ပေါက်ခေါင်းဘက်က လာတာဖြစ်ပြီး နတ်တလင်း တောင်ညိုဆည်က စစ်သားတွေနဲ့ ပေါင်းကာ လက်ရှိမှာ တောင်ညိုဆည်ဘောင်မှာ တပ်စွဲထားတယ်လို့ ဆိုပါတယ်။

တောင်ညိုဆည်အထက်က ဒေသခံတွေဟာ ဆည်အတွင်း သွားလာစဥ် စစ်ကောင်စီတပ်ဂိတ်မှာ မှတ်ပုံတင်နဲ့ ဝယ်ယူလာတဲ့ စားသောက်ကုန်တွေကို စစ်ဆေးတာတွေလည်း ပြုလုပ်လေ့ရှိတယ်လို့လည်း ဒေသခံတဦးဆီက သိရပါတယ်။

ပြီးခဲ့တဲ့ ဖေဖော်ဝါရီလ ၁၀ ရက်ကတော့ စစ်ကောင်စီတပ် တောင်ပိုင်းတိုင်း စစ်ဌာနချုပ် (တပခ) တိုင်းမှူး ဗိုလ်ချုပ်ထိန်ဝင်း နတ်တလင်းကို လာရောက်ပြီး PDFတွေကို ထောက်ပံ့ရင်မြို့နာမယ်ဟုဆိုကာ နတ်တလင်းက လုပ်ငန်းရှင်တွေကို ကြိမ်းမောင်းခဲ့ပါသေးတယ်။

ပဲခူး၊ ဖေဖော်ဝါရီ ၁၉၊ ၂၀၂၃။

ပဲခူးတိုင်းအနောက်ခြမ်း၊ နတ်တလင်းမြို့နယ်၊ ပဲခူးရိုးမအစပ်ရှိ တောင်ညိုဆည်ရဲ့အထက်မှာ ဖေဖေါ်ဝါရီလ ၁၈ ရက်မနေ့က စစ်ကြောင်းထိုးလာတဲ့စစ်ကောင်စီစစ်ကြောင်းကို မိုင်းဆွဲတိုက်ခိုက်ခဲ့တယ်လို့ နတ်စစ်သည်အဖွဲ့ကသတင်းထုတ်ပြန်ထားပါတယ်။

နတ်တလင်းမြို့နယ်၊ မကျီးပင်ရွာမှာ ပြီးခဲ့တဲ့နှစ်ကတည်းကအထိုင်ချထားတဲ့ စစ်ကောင်စီတပ်ရဲ့ စစ်ကြောင်းကို ရစ်ကွင်းရွာအနီးမှာ မနေ့နေ့လယ် ၂ နာရီလောက်က မိုင်းဆွဲခဲ့တာလို့ ဆိုပါတယ်။

“မကျီးပင်ရွာတောလမ်းအတိုင်း စစ်ကြောင်းထိုးလာတာကို ရစ်ကွင်းရွာအနီးကနေ သတင်းအရစောင့်ပြီးမိုင်း ၂ လုံးဆွဲခဲ့တာပါ။ ၃ ယောက် ပြင်းထန်ဒဏ်ရာရတယ်။ သေမသေတော့ အတိအကျမသိရသေးဘူး”လို့ နတ်စစ်သည်အဖွဲ့မှ တာဝန်ရှိသူက ပြောပါတယ်။

တိုက်ခိုက်မှုအပြီးစစ်ကောင်စီစစ်ကြောင်းဟာ ရစ်ကွင်းရွာဘက်ကို ဆက်သွားခဲ့တယ်လို့ သူကဆက်ပြောပါတယ်။

ပြီးခဲ့တဲ့ ဇန်နဝါရီလ ၂၈ ရက်ကလည်း နတ်စစ်သည်အဖွဲ့ဟာ Phoenix DF၊ MRF Nattalinတို့နဲ့ပေါင်းပြီး နတ်တလင်းမြို့နယ်၊ တောင်ညိုဆည်အထက်မှာ စစ်ကြောင်းထိုးလာတဲ့ စစ်ကောင်စီတပ်ကို ဖောင်းအိုင်ကုန်းရွာအနီးမှာ တိုက်ခိုက်ခဲ့ပါသေးတယ်။

နတ်တလင်းမြို့နယ်ဟာ စစ်ကောင်စီက မာရှယ်လောကြေညာထားတဲ့ ပဲခူးတိုင်းအတွင်းကမြို့နယ်တခုလည်းဖြစ်ပါတယ်။

ပြီးခဲ့တဲ့ ဖေဖေါ်ဝါရီလ ၁၀ ရက်ကတော့ တောင်ပိုင်းတိုင်းစစ်ဌာနချုပ်တိုင်းမှူးဗိုလ်ချုပ်ထိန်ဝင်းကိုယ်တိုင် နတ်တလင်းကိုလာရောက်ပြီး PDFတွေကိုမထောက်ပံ့ဖို့အတွက် မာရှယ်လောကြေညာထားတဲ့ နတ်တလင်း၊ ပေါင်းတည်နဲ့ အုပ်ဖိုက လုပ်ငန်းရှင်တွေကို ခေါ်ယူကြိမ်းမောင်းခဲ့သလို ပဲခူးရိုးမကို စစ်အင်အားတွေလည်း တိုးချဲ့ချထားခဲ့ပါတယ်။

ပဲခူး၊ ဖေဖော်ဝါရီ ၁၁၊ ၂၀၂၃။

ပဲခူးတိုင်းအနောက်ခြမ်း၊ နတ်တလင်းမြို့မှာ စစ်ကောင်စီက ဆိုင်ကယ်မောင်းခွင့် ကဒ်ဆိုကာ တကဒ်ကို ကျပ် ၃၀၀၀ နဲ့ လုပ်ခိုင်းနေတယ်လို့ မြို့ခံတွေဆီက သိရပါတယ်။

ဖေဖေါ်ဝါရီလ ၉ ရက်က စတင်ကာ သက်ဆိုင်ရာ ရပ်ကျေးအုပ်ချုပ်ရေးမှူးတွေက ဦးဆောင်လုပ်ပေးနေတာ ဖြစ်တယ်လို့ ဆိုပါတယ်။

“ဆိုင်ကယ်စီးမယ်ဆိုရင် စီးတဲ့သူတိုင်း သူတို့လုပ်ပေးတဲ့ ဆိုင်ကယ်စီးတဲ့ ကဒ်လုပ်ရမယ်။ ဥပမာအနေနဲ့ အိမ်တအိမ်မှာ ဆိုင်ကယ်တစီးပဲရှိပြီး ဆိုင်ကယ်မောင်းတတ်သူက ၃ ယောက်ရှိရင် ၃ ကဒ် လုပ်ရမယ်။ တစီးပဲရှိလို့ တကဒ်ပဲ လုပ်လို့မရဘူး။ ကဒ်မှာ ဆိုင်ကယ်စီးသူရဲ့ ဓါတ်ပုံနဲ့ မှတ်ပုံတင်လည်း ပါတယ်” လို့ မြို့ခံတဦးက ပြောပါတယ်။

ပြည်သူတွေ စီးပွားရေးကျပ်တည်းနေချိန်မှာ အခုလို အမျိုးမျိုး ပြည်သူ့ငွေတွေကို ကြံဖန်တောင်းခံနေတာ ဖြစ်ပြီး၊ အဲဒီငွေကြေးက ဘယ်ကိုသွားမှာလဲဆိုတာလည်း မသိရသလို ပဲခူးတိုင်းအနောက်ခြမ်း ၁၄ မြို့နယ်ထဲမှာ အခုလို ဆိုင်ကယ်စီးနင်းခွင့် လုပ်တာဟာ နတ်တလင်းတမြို့တည်းသာ ဖြစ်တယ်လို့လည်း သူကဆက်ပြောပါတယ်။

အဲ့ဒီကဒ်တွေကို တရားဝင်ကြေညာတာမျိုးမရှိပဲ ပြုလုပ်နေတာဖြစ်ပြီး မပြုလုပ်ပဲ စီးနင်းပါက ဆိုင်ကယ်ကို သိမ်းဆည်းမယ်ဆိုတဲ့သတင်းလည်း ထွက်ပေါ်နေသလို အခြားမြို့က လာရောက်သူတွေကို ဘယ်လိုအရေးယူမယ်ဆိုတာကိုတော့ ထုတ်ပြန်တာမျိုး မရှိပါဘူး။

ဖေဖေါ်ဝါရီလ ၉ ရက်ကနေ တပါတ်အတွင်း ပြုလုပ်ရမှာ ဖြစ်တာကြောင့် ဒေသခံတွေအနေနဲ့ ဆိုင်ကယ်သိမ်းဆည်းခံရမှာကို ကြောက်လန့်ပြီး ပြုလုပ်နေကြရတယ်လို့လည်း သိရပါတယ်။

ဆိုင်ကယ်စီးနင်းခွင့်ကဒ်မှာ မနက် ၅ နာရီကနေ ည ၉ နာရီအတွင်း နတ်တလင်းရဲစခန်းနဲ့ တာပွန်ရဲစခန်းပိုင် နယ်မြေအတွင်းသာစီးနင်းခွင့်ရှိပြီး စစ်ဆေးတာကို လက်ခံပါမယ်ဆိုတဲ့ ခံဝန်ကတိလည်း ပါဝင်တယ်လို့ သိရပါတယ်။

စစ်ကောင်စီက စစ်အုပ်ချုပ်ရေးအဖြစ် ကြေငြာထားတဲ့ ပဲခူးတိုင်း ၅ မြို့နယ်စာရင်းထဲမှာ ထန်းတပင်၊ အုပ်ဖို၊ ပေါင်းတည်၊ ပေါက်ခေါင်းတို့နဲ့အတူ နတ်တလင်းမြို့လည်း ပါဝင်နေပါတယ်။