စစ်ကောင်စီ

ဆိပ်ဖြူ၊ ဖေဖော်ဝါရီ ၂၃၊ ၂၀၂၃။

မကွေးတိုင်း၊ ဆိပ်ဖြူမြို့နယ်ထဲမှာ စစ်ကောင်စီက စည်းရုံးရေးဟောပြောမှု လုပ်ဆာင်သွားပြီး ရွာကနေ ပြန်လည်ထွက်ခွာချိန်မှာတော့ ရွာသားတဦးကို ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။

ဖေဖော်ဝါရီ ၂၃ ရက် ဒီနေ့ မနက် ၇ နာရီကျော်လောက်မှာ အင်အား ၇၀ နီးပါးရှိတဲ့ အဲဒီစစ်ကြောင်းဟာ ဆိပ်ဖြူမြို့နယ်ထဲက ရေရင်ညောင်ရွာကနေ မြောက်ရွာမကျေးရွာထဲ ခြေလျင်စစ်ကြောင်းနဲ့ ဝင်ရာက်လာခဲ့တာလို့ ဒေသခံတွေက ပြောပါတယ်။

စစ်ကောင်စီစစ်ကြောင်းဟာ ရွာထဲကို ဝင်လာပြီး‌တဲ့‌နောက် ရွာထဲမှာရှိနေတဲ့ ရွာသားတချို့ကို တအိမ်တယောက် မဖြစ်မနေ စည်းဝေးပွဲတတ်ရမယ်ဆိုပြီး စည်းရုံးဟောပြောခဲ့တယ်လို့ ဆိုပါတယ်။

“ရွာသားတွေကို သူတို့ဆီလာခိုင်းတယ်။ စည်းရုံးရေးလုပ်တဲ့ သဘောပေါ့။ ရွာသားတွေကိုဘာပြောသွားလဲဆိုတာတော့ အတိအကျ မသိရသေးဘူး။ လမ်းပြအဖြစ် ဖမ်းခေါ်သွားတဲ့ရွာသားဟာလည်း မည်သူ၊ မည်ဝါဆိုတာ မသိရသေးပါဘူး” လို့ ဆိပ်ဖြူမြောက်ပိုင်း ပြည်သူ့ကာကွယ်ရေးတပ်ဖွဲ့ (NSP)တာဝန်ခံ ဆရာဒေးဗစ်က မြေလတ်အသံကို ပြောပါတယ်။

အဲဒီစစ်ကောင်စီ စစ်ကြောင်းဟာ ညနေ ၄ နာရီထိုးလောက်မှာတော့ မြောက်ရွာမရွာထဲမှာရှိတဲ့ အလိုတော်ပေါက်ဘုရာကြီးရဲ့မြောက်ဘက်မှာ ရှိနေတယ်လို့ ဆရာဒေးဗစ်က ဆက်ပြောပါတယ်။

“သူတို့ရှိနေတဲ့ နေရာနဲ့ ရွာနဲ့က သိပ့်မဝေးတော့ ထွက်ပြေးနေတဲ့ ရွာသားတွေက ရွာထဲပြန်ဝင်မရဲသေးဘူး။ သူတို့က ဘယ်ကို စစ်ကြောင်း ဆက်ထိုးမလဲဆိုတာ မသိရသေးဘူး” လို့ ဆိုပါတယ်။

မြောက်ရွာမရွာထဲကို စစ်ကောင်စီ စစ်ကြောင်းထိုးတာဟာ ဒီနေ့နဲ့ဆို ၃ ကြိမ်‌မြောက်ရှိပြီဖြစ်ကြောင်းနဲ့ အဲဒီသုံးကြိမ်ထဲမှ ၂ ကြိမ်ဟာ ဖေဖော်ဝါရီလထဲမှာပဲ ဖြစ်တယ်လို့ သိရပါတယ်။

ယင်းမာပင်၊ ဖေဖော်ဝါရီ ၂၃၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ဆားလင်းကြီးမြို့နယ်ရှိ စစ်တပ်က မီးရှို့ဖျက်ဆီးခဲ့တဲ့ ကျေးရွာ ၈ ရွာက ဒေသခံပြည်သူ ၃၀၀ ကျော်ကို မနေ့က ဖေဖော်ဝါရီလ ၂၂ ရက်မှာ အိမ်အသုံးအဆောင်ပစ္စည်းတွေ ကူညီထောက်ပံ့ပေးခဲ့တယ်လို့ သိရပါတယ်။

“မနေ့က သွားရောက် လှူဒါန်းခဲ့တာပါ။ ဆားလင်းကြီးမြို့နယ် ကျေးရွာ ၈ ရွာအတွင်းက မီးဘေးသင့်ပြည်သူ ၃၀၇ ဦးအတွက် လူသားချင်း စာနာမှုအနေနဲ့ သွားရောက်တွေ့ဆုံပြီး ကူညီထောက်ပံ့ပေးခဲ့တာပါ” လို့ ယင်းမာပင် – ဆားလင်းကြီးရွာပေါင်းစုံသပိတ် ဦးဆောင်ကော်မတီဝင် တဦးက ပြောပါတယ်။

ယင်းမာပင် – ဆားလင်းကြီးရွာပေါင်းစုံသပိတ် ဦးဆောင်ကော်မတီနဲ့ ပြည်သူမှပြည်သူသို့ ပရဟိတအဖွဲ့တို့ ပူးပေါင်းကာ သွားရောက်လှူဒါန်းခဲ့တာဖြစ်ပြီး၊ လှူဒါန်းခဲ့တဲ့ ကျေးရွာအမည်တွေကိုတော့ လုံခြုံရေးအရ ပြောကြားခဲ့ခြင်း မရှိပါဘူး။

အဆိုပါအဖွဲ့တွေဟာ ဖေဖော်ဝါရီလ ၂၀ ရက်ကလည်း ယင်းမာပင်မြို့နယ် မီးဘေးသင့် လူဦးရေ ၂၁၀ အတွက် သွားရောက်ထောက်ပံမှုတွေ ပြုလုပ်ခဲ့သလို မီးရှို့ခံရမှုအတွက် အားမငယ်ဖို့၊ ဆက်လက်အားမွေးပြီး တောင့်ခံတော်လှန်ပေးကြပါဖို့ အားပေးစကားပြော၊ တောင်းဆိုတာတွေ ပြုလုပ်ခဲ့ကြတယ်လို့ သိရပါတယ်။

မြေလတ်အသံ၊ ဖေဖော်ဝါရီ ၂၃၊ ၂၀၂၃။

စစ်အာဏာသိမ်းအပြီး ၂ နှစ်အကြာမှာ အုပ်ချုပ်ရေး ယိုယွင်းလာတဲ့အတွက် စစ်ကောင်စီက နိုင်ငံတဝှမ်းက မြို့နယ်အချို့ကို စစ်အုပ်ချုပ်ရေး ကြေညာအပြီး ၂၀ ရက်အကြာမှာ အနောက်မြောက်တိုင်း စစ်ဌာနချုပ်(နမခ)နယ်မြေက မြို့နယ် ၃ ခုကိုလည်း ဖေဖေါ်ဝါရီလ ၂၂ ရက် မနေ့က စစ်အုပ်ချုပ်ရေး(မာရှယ်လော) ကြေညာလိုက်ပါတယ်။

စစ်ကိုင်းတိုင်းထဲက ရွှေဘိုမြိုနယ်၊ ဝက်လက်မြို့နယ်နဲ့ အရာတော်မြို့နယ်တို့ကို စစ်အုပ်ချုပ်ရေး မြို့နယ်တွေအဖြစ် ထပ်မံကြေညာတာ ဖြစ်ပါတယ်။

စစ်ကောင်စီက စစ်အုပ်ချုပ်ရေး ကြေညာတာနဲ့ပတ်သက်ပြီး ပြည်သူ့တော်လှန်ရေး တပ်ဦးရဲ့ဗဟို သတင်းနဲ့ ပြန်ကြားရေးဌာန တာဝန်ခံ ရဲဘော်လွန်းညီ​ကတော့ “စစ်အုပ်စုက စစ်အုပ်ချုပ်ရေး ကြေညာလိုက်တယ်ဆိုတာ သူတို့ရဲ့အကြပ်အတည်းကို ထုတ်ဖော်ပြသလိုက်တဲ့ ထွက်ပေါက်တခုလို့ မြင်ပါတယ်။ သူတို့စစ်အုပ်ချုပ်ရေး ကြေညာလိုက်တဲ့ ဒေသတွေဟာ လက်နက်ကိုင်ပြီး နည်းလမ်းနဲ့သော်၎င်း၊ ဆန္ဒထုတ်ဖော်ပြီးတော့သော်၎င်း စစ်ကောင်စီကို အပြင်းအထန် ခုခံတော်လှန်နေတဲ့ ဒေသတွေ ဖြစ်တယ်။ ဒီဒေသတွေကို ထိမ်းလို့သိမ်းလို့ မလွယ်ကူတဲ့ အခြေအနေမျိုး ဖြစ်လာတယ်။ အဲဒီအတွက် ပိုပြီးတော့ ဒီဒေသတွေကို ဖိနှိပ်နိုင်အောင် တော်လှန်ရေးအင်အားစုတွေကို နိမ်နင်းဖို့ လူထုကိုပိုပြီးတော့ ဒုက္ခပေးနိုင်ဖို့ ကြေညာလိုက်တယ်လို့ပဲ မြင်တယ်” လို့ ပြောပါတယ်။

ဖေဖေါ်ဝါရီလ ၂ ရက်က ပထမအကြိမ် ထုတ်ပြန်ကြေညာရာမှာ စစ်ကိုင်းတိုင်းထဲက အင်းတော်၊ ဗန်းမောက်၊ ကောလင်း၊ ပင်လယ်ဗူး၊ မြောင်၊ ဆာလင်းကြီး၊ ပုလဲ၊ ယင်းမာပင်၊ ခင်ဦး၊ တန့်ဆည်နဲ့ ရေဦးမြို့နယ် တို့ဖြစ်ပြီး အခု ၃ မြို့နယ် အပါအဝင် စစ်ကိုင်းအတွင်း စစ်အုပ်ချုပ်ရေး ကြေညာထားတဲ့ မြို့နယ် ၁၄ ခု ရှိပြီဖြစ်ပါတယ်။

မြေလတ်ဒေသ မကွေးတိုင်းထဲက ပေါက်၊ မြိုင်၊ ထီးလင်း၊ ဂန့်ဂေါနဲ့ ဆောမြို့နယ်တွေ ပါဝင်ပြီး ပဲခူးတိုင်းမှာ အရှေ့ခြမ်းက ထန်းတပင်မြို့နယ်နဲ့ အနောက်ခြမ်းက အုတ်ဖို၊ နတ်တလင်း၊ ပေါင်းတည်နဲ့ ပေါက်ခေါင်း စတဲ့မြို့နယ်တွေကိုလည်း ဖေဖေါ်ဝါရီလ ၂ ရက်ကတည်းက စစ်အုပ်ချုပ်ရေး ကြောညာခဲ့တာ ဖြစ်ပါတယ်။

အဲဒီနေ့မှာပဲ ချင်းပြည်နယ်က တီးတိန်နဲ့ တွန်းဇံမြို့နယ်တို့ကို စစ်ကောင်စီက စစ်အုပ်ချုပ်ရေး ကြေညာခဲ့ပါသေးတယ်။

လက်ရှိမှာ ရွှေဘို၊ ဝက်လက်နဲ့ အရာတော်မြို့နယ်တွေမှာ ဒေသခံတော်လှန်ရေး တပ်ဖွဲ့တွေက အပြင်းအထန် ခုခံနေသလို စစ်ကောင်စီတပ်ကလည်း ကျေးရွာတွေကို လှည့်လည်မီးရှို့တာတွေ လုပ်ဆောင်နေပါတယ်။

စစ်ကိုင်း၊ ဖေဖော်ဝါရီ ၂၃၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်မှာ တိုက်ပွဲမဖြစ်ဘဲ စစ်ကောင်စီတပ်သားတွေနဲ့ပျူစောထီတွေက ဖေဖော်ဝါရီလ ၂၁ ရက်ည ၈ နာရီမှာ လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့တာကြောင့် အဘွားအိုတဦးနဲ့ အမျိုးသားတဦးဒဏ်ရာရရှိခဲ့ပါတယ်။

ဒဏ်ရာရှိခဲ့သူမှာ အင်းပတ်ကွေ့ကျေးရွာမှ အသက် ၆၀ ကျော်အရွယ်အဘွားနဲ့ အသက်၃၀ ကျော်အရွယ် အမျိုးသားတဦးတို့ဖြစ်ပြီး၊ သူတို့ ၂ ဦးမှာ အချိန်မီဆေးကုသမှုခံယူခဲ့ရတာကြောင့် အသက်အန္တရာယ်မစိုးရိမ်ရတော့ဘူးလို့ ခင်ဦးမြို့နယ်သတင်းမှန်ပြန်ကြားရေးအဖွဲ့မှ တာဝန်ရှိသူတဦးက ပြောပါတယ်။

“အဘွားကတော့ လက်နက်ကြီးစထိတာ။ အစတွေက အဘွားခန္ဓာကိုယ်ရဲ့ ညာဖက်နံရိုးကို ထိသွားတာ။ အမျိုးသားတယောက်ကတော့ လက်နက်ငယ်ကျည်ထိတာ ဘယ်ဖက်ပေါင်မှာထိတာ။ အခုအချိန်ထိတော့ ဆေးကုသမှုခံယူနေရဆဲပါ။ ဒါပေမယ့် မစိုးရိမ်ရတော့ဘူး။ သူတို့ရဲ့နာမည်တွေကိုတော့ လုံခြုံရေးအရမပြောရဘူး” ဆိုပါတယ်။

လက်နက်ကြီး၊ လက်နက်ငယ်တွေ နေ့တိုင်းလိုလိုပစ်ခတ်နေတဲ့ စစ်အုပ်စုစခန်းကတော့ အင်းပတ်ကွေ့ကျေးရွာအနီးမှာရှိတဲ့ အင်းပတ်ကွေ့စျေးတန်း(စကစအထိုင်ချစခန်း)နဲ့ ရွာသစ်ကုန်း(ပျူ)စခန်းတို့ကဖြစ်တယ်လို့ အထက်ပါတာဝန်ရှိသူက ပြောပါတယ်။

“အဲနေ့ကတိုက်ပွဲဖြစ်တာမရှိခဲ့ဘူး။ လက်နက်ကြီး ၃လုံးပစ်တာမှာ တလုံးကျသွားတာရွာထဲကို။ စကစတွေနဲ့ပျူတွေက နေ့တိုင်းလိုလို လက်နက်ကြီး၊ လက်နက်ငယ်တွေပစ်တယ်။ အခုလိုပစ်ခတ် နေတာကတော့ သူတို့စခန်းကို PDF တွေ မတိုက်ခိုက်လာအောင် လုပ်နေတာလို့သိရတယ်” လို့ ဆိုပါတယ်။

အဆိုပါပျူစခန်းမှာ စစ်သားနဲ့ပျုတပ်သား ခန့်မှန်းခြေ ၅၀ကျော်ရှိပြီး၊ အဲဒီစခန်းကပဲ လက်နက်ကြီးတွေ ရမ်းသမ်းပစ်ခတ်ခဲ့တာကြောင့် အင်းပတ်ကွေ့ကျေးရွာထဲကို ကျရောက် ပေါက်ကွဲခဲ့လို့ အခု ၂၀၂၃ ခုနှစ်ထဲမှာအမျိုးသားတဦးသေဆုံးခဲ့သလို ၁၅ ဒဏ်ရာရရှိထားတယ်လို့ သိရပါတယ်။

ကြို့ပင်ကောက်၊ ဖေဖော်ဝါရီ ၂၂၊ ၂၀၂၃။

ပဲခူးတိုင်းအနောက်ခြမ်း၊ ကြို့ပင်ကောက်မြို့နယ်၊ နွယ်ခွေရပ်ကွက်၊ ဗားခရာဘုန်းကြီးကျောင်း ဘုရားထီးတင်ဆိုင်းပွဲက ပြန်လာတဲ့ အမျိုးသားတဦးကို ဖေဖေါ်ဝါရီလ ၂၀ ရက် မနက်အစောပိုင်းမှာ စစ်ကောင်စီ တပ်သားတွေက သေနတ်နဲ့ ပစ်သတ်လိုက်တယ်လို့ သိရပါတယ်။

ကြို့ပင်ကောက်မြို့နယ်၊ လက်ပံပင်စုအုပ်စု၊ သာစည်ရွာက အုတ်ဖုတ်လုပ်ငန်း လုပ်ကိုင်သူ အသက် ၅၀ နှစ်အရွယ် ဦးသန်းဦးဆိုသူဟာ သူ့ရွာနားက မိုင်တဲတာဝါတိုင်အနီးမှာ ပစ်သတ်ခံခဲ့ရတာလို့ ဒေသခံတဦးက ပြောပါတယ်။

“ဦးသန်းဦးတို့ လင်မယားက ဗားခရာဘုန်းတော်ကြီးကျောင်း ဘုရားထီးတင်ပွဲမှာ ဆိုင်းပွဲကြည့်တာ။ ဦးသန်းဦးက သူရဲ့မိန်းမကို ထားခဲ့ပြီး တယောက်တည်း အုတ်ဖုတ်တဲကို အပြန် ည ၁၂ နာရီခွဲလောက်မှာ စစ်သားတွေက သေနတ်နဲ့ ပစ်သတ်သွားတာ” လို့ ဒေသခံတဦးက ပြောပါတယ်။

ပစ်သတ်ခံရပြီး မနက် ၆ နာရီလောက်မှာတော့ အလောင်းကို စစ်ကောင်စီတပ်သားတွေက ပြည်မြို့ကုတင် ၁၀၀ ဆေးရုံကို သယ်ယူသွားတယ်လို့ သူကဆက်ပြောပါတယ်။။

ဒီဖြစ်စဥ်နဲ့ပတ်သက်ပြီး စစ်ကောင်စီဝါဒဖြန့် တယ်လီဂရမ်ချန်နယ်မှာတော့ အဲဒီအမျိုးသားဟာ ဖေဖေါ်ဝါရီလ ၂၀ ရက် နေ့လယ်၂ နာရီလောက်က သာစည်ရွာ မိုင်တဲတာဝါတိုင်ကို မိုင်းထောင် ဖောက်ခွဲဖို့လာတဲ့ PDF တဦးဖြစ်တဲ့အတွတ် စစ်တပ်က ပစ်သတ်လိုက်တယ်လို့ ဖေဖေါ်ဝါရီလ ၂၁ ရက်မနေ့က ဖော်ပြထားပါတယ်။

ပဲခူးတိုင်းအနောက်ခြမ်းမှာ စစ်အုပ်စုက ဒေသခံပြည်သူတွေကို အခုလို စည်းကမ်းမဲ့သတ်ဖြတ်တဲ့ ဖြစ်စဥ်တွေ မကြာခဏဆိုသလို ရှိလာပြီး မြေလတ်အသံက စုစည်းထားတဲ့စာရင်းအရ အကြောင်းမဲ့ ပစ်သတ်ခံရမှု ၄ ကြိမ် ဖြစ်ပွားခဲ့ကာ အရပ်သား ၅ ဦး သေဆုံးခဲ့ပါတယ်။

ဇန်နဝါရီလ ၁၄ ရက်နေ့လယ် ၂ နာရီလောက်က နတ်တလင်းမြို့နယ်၊ တာပွန်မြို့အဝင် စစ်ဆေးရေးဂိတ်မှာ နတ်တလင်းမြို့နယ်၊ လှပခြင်းအုပ်စု၊ သရက်ကုန်းရွာက အသက် ၂၃ နှစ်အရွယ် ဒုတိယနှစ်ကျောင်းသား မောင်ဝင်းဇော်ထွဠ်ကို ဆိုင်ကယ်ရပ်မပေးလို့ဆိုကာ သေနတ်နဲ့ ပစ်သတ်ခဲ့ပါတယ်။

အဲဒီနေ့ညနေမှာပဲ ဇီးကုန်းမြို့နယ်၊ လေးမျက်နာရဲစခန်းက ရဲတွေက ဆိုင်ကယ်ရပ်မပေးလို့ဆိုပြီး ကြို့ပင်ကောက်မြို့နယ်၊ စမ်းအိုင်ရွာက ကြံ့ခိုင်ရေးအမာခံ ရေခဲချောင်းရောင်းသူ အသက် ၄၅ နှစ်အရွယ် ဦးတင်မောင်ဆွေ(ခ)ဗိုက်ကြီးကိုလည်း စစ်သားတွေက သေနတ်နဲ့ပစ်သတ်ခဲ့ပါသေးတယ်။

ဒါ့အပြင် အောက်တိုဘာလ ၂၈ ရက်မှာလည်း ပေါင်းတည်မြို့နယ်၊ နွားခြံကုန်းရွာသား တက္ကသိုလ်ကျောင်းသား အသက် ၂၀ ကျော်အရွယ် ကိုဝေဖြိုးအောင်နဲ့ ကိုသန်းဇာ်ဦးတို့ ၂ ဦး ရွာကိုပြန်လာချိန်မှာ အရက်မှုးနေတဲ့ စစ်သား ၂ ဦးက အကြောင်းမဲ့ပစ်သတ်ကာ လက်စွပ် ၁ ကွင်းနဲ့ ဆွဲကြိုး ၁ ကုံးကို ယူဆောင်သွားခဲ့ပါတယ်။

ကန့်ဘလူ၊ ဖေဖော်ဝါရီ ၂၂၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကန့်ဘလူမြို့နယ်မှာ စစ်ကောင်စီ၊ ပျူစောထီးပူးပေါင်းတပ်ဖွဲ့တွေက ၀င်ရောက်မီးရှို့ဖျက်ဆီးခဲ့လို့ ၃ ရက်အတွင်း လူနေအိမ် ၂၄၈ လုံး မီးလောင်ဆုံးရှုံးခဲ့တယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁၉ ရက်နေ့စလို့ အိမ်ခြေ ၄၀၀ ကျော်ရှိတဲ့ မြေမွန်ရွာကို စစ်ကောင်စီ ခမရ ၃၆၉ တပ်ရင်းက အင်အား ၈၀ နီးပါးနဲ့ မီးရှို့ဖျက်ဆီးသွားခဲ့တာကြောင့် နေအိမ် ၂၁၈ လုံး မီးလောင်ပျက်စီးခဲ့ပြီး၊ ၂၀ ရက်နေ့မှာ အဲဒီစစ်ကြောင်းကပဲ မြေမွန်ရွာရဲ့ တောင်ဘက်မှာရှိတဲ့ တရော်ကိုင်းရွာထဲကို သေနတ်ပစ်ဖောက် ဝင်ရောက်လာကာ နေအိမ် ၂ လုံးကို ထပ်မံမီးရှို့ခဲ့တယ်လို့ ပြောပါတယ်။

ဖေဖော်ဝါရီ ၂၁ ရက်နေ့မှာတော့ ကျွန်းလှမြို့ပေါ်က စစ်ကောင်စီတပ်နဲ့ ကန့်ဘလူမြို့နယ် ပေကုန်း (တောင်)ရွာက ပျူစောထီးတွေ ပေါင်းပြီး အင်အား ၁၂၀ နီးပါးနဲ့ ချောင်းကြားရွာထဲကို ၀င်ရောက်ပြီး နေအိမ် ၂၈ လုံးကို မီးရှို့ဖျက်ဆီးသွားတယ်လို့ ကျွန်းလှ တက်ကြွလှုပ်ရှားသူများအဖွဲ့မှ တာဝန်ခံတဦးက မြေလတ်အသံကို ပြောပါတယ်။

“မြေမွန်ရွာနဲ့ တရော်ကိုင်းရွာက ပထမအကြိမ် မီးရှို့ခံရတာပါ။ ချောင်းကြားရွာက အခုအကြိမ်နဲ့ဆို ၃ ကြိမ်မြောက် မီးရှို့ခံရတာပါ။ ၃ ကြိမ်ပေါင်း နေအိမ်စုစုပေါင်း ၅၉ လုံး မီးလောင်ပျက်စီးသွားပါပြီ။ ခုက ၃ ရက်အတွင်း ရွာ ၃ ရွာကို ၂၄၈ လုံး မီးရှို့ခံလိုက်ရတယ်” လို့ သူက ပြောပါတယ်။

ကန့်ဘလူခရိုင်အတွင်းမှာ စစ်ကောင်စီတပ်ဖွဲ့တွေရဲ့ ကျေးရွာနေအိမ်တွေကို မီးရှို့ဖျက်ဆီးမှုကြောင့် မီးဘေးသင့်စစ်ရှောင်ဒေသခံ ၃ သုံးသောင်းနီးပါးအထိ ထွက်ပြေးတိမ်းရှောင်နေရဆဲ ဖြစ်တယ်လို့ သူက ဆက်လက်ပြောပါတယ်။

“စစ်ရှောင်ဦးရေက တခရိုင်လုံးစာ ခြုံပြီး ပြောပေးတာပါ။ တချို့က ရွာတွေ ပျက်သွားလို့ လုံးဝပြန်ဝင်မရတဲ့ဟာတွေ ရှိပါတယ်။ တစ်နှစ်နီးပါး ရှိပါပြီ။ အဲ့ဒါကြောင့် အကုန်ခြုံပြောပေးတာပါ” လို့ ဆိုပါတယ်။

ပြီးခဲ့တဲ့ ဖေဖော်ဝါရီ ၁၇ ရက်နေ့ကလည်း ကန့်ဘလူခရိုင်၊ ကန့်ဘလူမြို့နယ်၊ ထန်းကုန်းတိုက်နယ်က အသက် (၂၂) နဲ့ အသက် (၃၂)အရွယ် စစ်ရှောင်အမျိုးသား ၂ ဦးကို မီးရှို့သတ်ဖြတ်သွားခဲ့တယ်လို့ သိရပါတယ်။

ပခုက္ကူ၊ ဖေဖော်ဝါရီ ၂၂၊ ၂၀၂၃။

မကွေးတိုင်း၊ ပခုက္ကူမြို့နယ်၊ အရှေ့ချောက်ကန်ကျေးရွာအနီးနဲ့ ပခုက္ကူမြို့ထဲမှာ အသက်မပြည့်သေးတဲ့ လူငယ်အမျိုးသား ၃ ဦးကို PDF တွေဆိုပြီး စစ်ကောင်စီတပ်သားတွေက ဖမ်းဆီးသွားတယ်လို့ သိရပါတယ်။

ဖေဖော်ဝါရီလ ၂၁ ရက်မနေ့ကမနက်ပိုင်းမှာ အရှေ့ချောက်ကန်ကျေးရွာအနီး ပခုက္ကူ-မြိုင်သွားလမ်းမှာ လမ်းလျှောက်လာနေတဲ့ လူငယ် ၂ ဦးကို စစ်ကောင်စီဘက်က ဖမ်းဆီးသွားပြီးနောက် အမှတ် ၃ ရပ်ကွက်ထဲက လူငယ် ၁ ဦးကိုပါ ထပ်မံဖမ်းဆီးသွားတာလို့ ဒေသခံတဦးကပြောပါတယ်။

“မနေ့က စကစ အဖွဲ့တွေ မြို့ထဲမှာစစ်ဆေးရေးတင်းကြပ်ခဲ့တယ်။ PDF ၁၀ ယောက်လောက် မြို့ထဲရောက်နေတယ်ဆိုပြီး သတင်းထွက်နေတော့ တွေ့ကရလူ စစ်ဆေးဖမ်းဆီးသွားတာနေမယ်။ စကစ ဘက်ကတော့ လူဖမ်းချင်ရင် ဒီလိုဘဲခေါင်းစဥ်တပ်ဖမ်းနေတာပဲ”လို့ ပြောပါတယ်။

ဖမ်းဆီးခံရသူတွေဟာ ဖိုးသင်္ကြန် ၁၇ နှစ်၊ ကျော်ဇော်ဟိန်း ၁၆ နှစ်နဲ့ ရဲလင်းအောင် ၁၇ နှစ်တို့ဖြစ်ပြီး၊ ဖိုးသင်္ကြန်ကတော့ အမှတ် ၃ ရပ်ကွက်မှာနေထိုင်သူဖြစ်ကာ ကျန် ၂ ဦးရဲ့နေရပ်ကိုတော့ အတည်မပြုနိုင်သေးပါဘူး။

သူတို့ ၃ ဦးကိုဖမ်းဆီးပြီးနောက် ပခုက္ကူရဲစခန်းထဲကိုခေါ်ဆောင်သွားပြီး စစ်ဆေးနေတယ်လို့သိရကာ ဒီဖြစ်စဥ်နဲ့ပက်သက်တဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲဖြစ်ပါတယ်။

ဒါ့အပြင် ပြီးခဲ့တဲ့နှစ် ဒီဇင်ဘာလ ၂၈ ရက်ညနေပိုင်းမှာလည်း ပခုက္ကူမြို့နယ်၊ မြေနီတွင်းကျေးရွာက အသက် ၂၀ အရွယ်အမျိုးသား ၄ ဦးနဲ့ အသက် ၅၀ အရွယ်အမျိုးသား ၁ ဦးလည်း ပျူစောထီးတွေရဲ့ ဖမ်းဆီးတာကို ခံခဲ့ရပါတယ်။

အလားတူ ဒီဇင်ဘာလ ၁၆ ရက်ကလည်း ရန်ကုန်ကနေ ခရီးသည်တင်ကားနဲ့လိုက်ပါလာတဲ့ အသက် ၂၀ နဲ့ ၂၅ ဝန်းကျင်ရှိအမျိုးသား ၄ ဦးကို ဒရုန်းသင်တန်းပေးဖို့လာတဲ့သူတွေလို့ စွပ်စွဲပြီး ပခုက္ကူမြို့နယ်၊ ဧရာဝတီတံတား(ပခုက္ကူ)ပေါ်မှာ စစ်ကောင်စီတပ်တွေက ဖမ်းဆီးခဲ့ပါသေးတယ်။

စစ်ကိုင်း၊ ဖေဖော်ဝါရီ ၂၂၊ ၂၀၂၃။

စစ်ကိုင်းတိုင်း၊ အင်းတော်မြို့ရှိ စစ်ကောင်စီရဲ့ ရိက္ခာကုန်းတပ်က ဖေဖော်ဝါရီလ ၂၁ ရက်မနက် ၁၀ နာရီဝန်းကျင်မှာ လက်နက်ကြီးနဲ့ ပစ်ခတ်ခဲ့တာကြောင့် ၇၈ နှစ်အရွယ် အဘွားတဦးအပါ ၄ ဦး ဒဏ်ရာ ရခဲ့တယ်လို့ သိရပါတယ်။

ဒဏ်ရာရှိခဲ့သူမှာ ကျော်ရွာမှ အသက် ၇၈ အဖွားအို ၁ ဦး၊ ၂၄ နှစ်အရွယ် အမျိုးသား ၁ ဦး၊ ၃၀ နှစ်အရွယ် အမျိုးသား ၁ ဦးနဲ့ မိုးယူရွာမမှ အသက် ၄၀ နှစ်အရွယ် အမျိုးသမီး ၁ ဦးတို့ ဖြစ်ကြတယ်လို့ Indaw Revolution-IR မှ တာဝန်ရှိသူတဦးက ပြောပါတယ်။

“နာမည်တွေတော့ လုံခြုံရေးအရ ပြောမရဘူး။ ကျော်ရွာက သုံးယောက်ကတော့ အနည်းငယ် ဒဏ်ရာရသွားတာဖြစ်လို့ မစိုးရိမ်ရဘူး။ မိုးယူရွာက အမျိုးသမီးကတော့ ခြေတောက်၊ ကျော၊ ခေါင်းနဲ့ လည်ပင်းတို့မှာ ဒဏ်ရာပြင်းရသွားတယ်။ သူမက အခုအင်းတော်ဆေးရုံမှာ ဆေးကုသမှု ခံယူနေပါတယ်” လို့ ဆိုပါတယ်။

တိုက်ပွဲမဖြစ်ဘဲ စစ်အုပ်စုဘက်က ပစ်လိုက်တဲ့ လက်နက်ကြီး ကျည် ၂ လုံး ကျရောက်ပေါက်ကွဲခဲ့တဲ့ ကျေးရွာ ၂ ရွာမှာ ရွာနီးစပ်ချင်း ဖြစ်သလို အင်းတော်မြို့နဲ့ ၂မိုင်ခန့်သာ ကွာဝေးတယ်လို့ အထက်ပါ တာဝန်ရှိသူက ပြောပါတယ်။

“လက်နက်ကြီးက တရွာမှာ တလုံးစီ ကျတာ။ လက်နက်ကြီးကျလို့ လူတွေအပြင် မိုးယူရွာမမှာတော့ နေအိမ် ၁ လုံး၊ ကျော်ရွာမှာတော့ နေအိမ် ၃ လုံးလည်း ထိခိုက်ပျက်စီးခဲ့ပါတယ်” လို့ ဆိုပါတယ်။

အင်းတော်မြို့နယ်ကို စစ်အုပ်ချုပ်ရေးကြေညာပြီးနောက် ဖေဖော်ဝါရီလ ၉ ရက်မှာလည်း မဲဇာကျေးရွာကနေ အလယ်ဆိပ်ကျေးရွာကို ပြန်လာတဲ့ ဦးစိုးနိုင် ၄၅ နှစ်မှာ မဲဇာရဲစခန်းရှေ့ ဖြတ်သန်းသွားချိန် ရဲစခန်းထဲတပ်စွဲထားတဲ့ စစ်သားတွေက ပစ်ခတ်ခဲ့တာကြောင့် သေဆုံးခဲ့ရတယ်လို့ သိရပါတယ်။